Malamalama i le Feagaiga Fou ma le Faavavau o Faaipoipoga

I le tautotogo o le 1847, na tuua e Peresitene Polika Iaga lona aiga i Uinita Kuota, ma na ia taitaia le aumalaga muamua o le Au Paia i sisifo. I se tusi i lona faletua o Mary Ann, na faamatalaina ai taumafaiga a le aumalaga e “sauniuni mo le malaga,” na ia ta’ua ai: “La’u soa pele i puapuaga ma faigata, … Ou te faafetai atu faaafe ia te oe mo au tusi agalelei mai ia te au, aemaise ai o au faiga agalelei, ae sili atu i lo lena mo lou loto alofa. Ou te tatalo pea lava pea mo oe ma le fanau ma lo tatou aiga uma. Ou te manatu ua faamanuiaina au e le Alii i se tasi [o] aiga aupito silisili ua i ai i le fogaeleele” (MAAY). Ia Peresitene Iaga, o le talalelei e saunia ai le Au Paia mo le ola e faavavau, o se olaga e avea ai le faaipoipoga ma le aiga o se sini autu. O le feagaiga fou ma le faavavau o le faaipoipoga e faataatia ai le faavae “mo lalolagi, mo agelu, ma mo Atua” (DBY, 195).

Aoaoga a Polika Iaga

O le feagaiga fou ma le faavavau o le faaipoipoga e faataatia ai le faavae mo le ola e faavavau.

Ole faaipoipoga e faavavau e leai sona amataga o aso po o se iuga o tausaga… . E mafai ona tatou iloa nisi o mea e faatatau i ai; na te faataatiaina le faavae mo lalolagi, mo agelu, ma mo Atua; mo tagata atamamai ina ia faapaleina i le mamalu, o le tino ola pea, ma le ola e faavavau. O le mea moni, o le mataupu faavae lea e mai le amataga e oo i le iuga o le Talalelei paia o le Faaolataga—o le Talalelei a le Alo o le Atua; e mai le vavau e oo i le faavavau (DBY, 195).

E tatau i le tama ma le tina, o å ua auai i lenei Ekalesia ma le Malo, ona uia se ala amiotonu, ma taumafai i le malosi la te mafaia ia aua lava nei faia se sese, ae ia faia mea lelei i o la olaga; afai e tasi se fanau la te maua pe tasi le selau foi, afai la te faia e pei ona tatau ai ona la faia, fusia i latou i le Alii i lo la faatuatua ma tatalo, ou te le popole pe o fea e o i ai na fanau, a ua fusia i latou i o latou matua i se noataga o le faavavau, ma e leai se malosi po o se mana i le fogaeleele po o seoli e mafai ona tuueseeseina i latou mai o latou matua i le faavavau; o le a toe foi atu i latou i le punavai na puna mai ai (DBY, 208).

Ua matou iloa le toatele o tagata talavou ua aulia tausaga e faaipoipo ai ae o loo nofofua lava … E tatau ona manatunatu o tatou alii talavou ma tamaitai talavou i o latou matafaioi o le tasi i le isi, i le Atua, le lalolagi, o o latou matua, ma augatupulaga i le lumanai mo lo latou faaolataga ma le faaeaina faatasi ma Atua ma mo le mamalu o Ia o lå o loo tatou auauna atu i ai (DNSW, 25 Oct. 1870, 2).

O le a ou tuuina atu alii talavou taitasi o Isaraelu, o å ua aulia le tausaga e faaipoipo ai, se misiona e o atu ai loa lava ma faaipoipo i ni tuafafine lelei, ia siomia se nofoaga i se pa, toto se faatoaga ma laau aina ma faia ai se aiga. O le misiona lenei ou te tuuina atu i alii talavou uma o Isaraelu (DBY, 196).

E leai lava se alii talavou i lo tatou nuu o le a le naunau e malaga atu mai iinei i Egelani ina ia faaipoipo sa’o, pe a malamalama i mea o i ai; e leai se tamaitai talavou i lo tatou nuu, o så e alofa i le Talalelei ma moomoo i ona faamanuiaga, o le a faaipoipo i se isi lava ala; o le a ola e le faaipoipo seia oo ina mafai ona faaipoipo e pei ona tatau ai, [tusa lava] pe ola seia matutua e pei o Sarai a o lei fanauina e ia Isaako [vaai Kenese 17:17]. E toatele o tatou uso ua latou faafaaipoipoina a latou fanau e aunoa ma le mafaufau i nei mea, ma ua latou mafaufau i ai faapea e le taua tele. Maimau pe a na tatou malamalama uma i lenei mea e pei ona malamalama ai le lagi (DBY, 195–96).

O se tasi o uluai solitulafono a le aiga ua ta’ua o Isaraelu, o lo latou o atu lea i isi aiga po o isi atunuu e filifili ai ni paaga. O se tasi lenei o mea sese aupito tele ua faia e fanau a Aperaamo, Isaako ma Iakopo, aua ua latou o atu ma faaipoipo i isi aiga, e ui lava ina faasaina e le Alii, ma tuuina atu ia te i latou se tulafono mauai e uiga i le mataupu [vaai Kenese 28:1–2]. Na ia poloaiina i latou e aua nei faaipoipo atu i tagata o Nuu Ese, peitai na latou faia lava [vaai Kenese 24:3] (DBY, 196).

Ia faaeteete, outou na o tina o Isaraelu, ma aua le aoaoina a outou tama teine i le lumanai, e pei ona aoaoina ai le toatele o i latou, e faaipoipo i fafo atu o Isaraelu. Talofa e ia te outou o le a faia; o le a outou le mauaina o outou pale e pei ona soifua ai le Atua (DBY, 196).

O loo i ai le anoano o agaga mama atoatoa o loo faatalitali ia maua o latou tino faitino, o lea la, o le a lo tatou tiute? … O le tiute lea o alii ma tamaitai amiotonu uma ina ia saunia tino faitino mo agaga uma latou te mafaia (DBY, 197).

E tatau ona mulimuli tama ia Keriso a o latou alolofa, faatonu, ma tausia o latou aiga.

O lea, sei ou fai atu lava i le Au Peresitene Sili, i Aposetolo, i Epikopo uma i Isaraelu, ma korama uma, aemaise i latou o taitai pulefaamalumalu. Ia faatuina lena faataitaiga i luma o lou [toalua] ma lau fanau, o ou tuaoi ma nei tagata, e mafai ona e fai atu, “Mulimuli mai ia te au, e pei ona ou mulimuli ia Keriso.” A tatou faia lenei mea, o le a lelei mea uma, ma o le a manino o tatou mafaufau (DBY, 198).

Ia lolo’uina e le tane ma le tama lona manao i le finagalo o le Atua, ona ia faatonuina lea o lona [toalua] ma le fanau i lenei lesona o le tausia e outou lava e ala i ana faataitaiga faapea foi mataupu, ma ona tuaoi foi, ma faaalia ia te i latou pe faapefea ona lototetele ma tutumau, i le faatoilaloina o uiga vaogata ma le agasala. O lea ituaiga faiga e iu ina faatoilaloina ai lena aafiaga lå paia o loo galue i le loto o le tagata (DBY, 198).

Ia aua lava nei aunoa se aso ma le i ai o le Agaga Paia i o outou luga; ma aua lava nei muta, tama, ona outou tatalo atu ina ia faaaogaina e o outou taitoalua lenei faamanuiaga, ina ia maua e a latou fanau le Agaga Paia mai le manava o lo latou tina. Afai tou te fia vaai i se atunuu e tulai mai ma le faatumulia i le Agaga Paia ma le mana, o le auala lenei e maua ai (BYP, 8 Apr.1852).

Afai tatou te le faia se taumafaiga e aoao ai a tatou fanau, e aoao ma faatonu i latou e uiga i nei upumoni faaalia, o le a i o tatou luga le faasalaga, i le avea ai ma matua, pe o se isi foi tulaga (DBY, 207).

Ia avea le tama ma ulu o le aiga, o le matai o lona auaiga; ma ia faia e ia lona aiga, e pei ona faia ai e se agelu (DBY, 197–98).

E tatau i le tane ona ia aoaoina le auala e faaputuputu mai ai tulaga sologa lelei e siomia ai lona aiga, le auala e pulea ai ona lagona ma lona ita, ma le ala e tuuina atu ai le faaaloalo, e le gata i lona aiga ae faapea foi i ona uso uma ma tuafafine, ma uo (DBY, 198).

O le pupula agalelei, o gaioiga agalelei, o upu agalelei, ma le onosaia lelei o fanau o le a fusia mai ai a tatou fanau ia i tatou i noataga e le faigofie ona lepetia; a o le faasaunoa ma le agaleaga o le a aveeseina ai i latou mai ia te i tatou, ma motusia ai noataga paia uma, lea e tatau ona noatia mai ai i latou ia te i tatou ma le feagaiga e faavavau lea e tuufaatasia ai i tatou. Afai e le usiusitai lo’u aiga ia te au i tulaga o le agalelei, ma se olaga lelei i luma o tagata, ma luma o le lagi, ona faatofa atu lea i aafiaga uma (DNW, 7 Dec. 1864, 2).

E tatau i le tama ona taumafai e faafiafia ma faamalie le tina, ina ia faamafanafanaina lona loto ma ia le pona’ia lona alofa i lå e tausia ma puipuia o ia i lenei fogaeleele, ina ia taalililili lona tagata atoa i lona alofa i le Atua ma le amiotonu, ina ia ona fanauina mai fanau ua faatumulia i uiga lelei e tatau ai mo se tagata ua fuafuaina i le nofo tupu o tupu ma alii o alii (DBY, 199).

Ia tofu alii uma i le laueleele … ma se ava, ona malaga atu lea e galulue i o outou lima ma suaina le eleele, pe galulue i ni pisinisi tau masini, po o ni fefaatauaiga faamaoni ina ia maua ai se olaga faamaoni mo outou ma i latou e faalagolago ia te outou mo lo latou tausiga; ia tausisia le faautauta, ma le upumoni alofa ma le amiolelei; ona faapea lea ona maua e le fafine le tausiga lelei, fafaga, faamamalu ma faamanuiaina, ma avea ma tina faamamaluina o alii ma tamaitai e sili atu ona televave le faaatoatoaina i le faaletino ma le mafaufau nai lo o latou tama. O le a avea lea ma mea e faatupuina ai suiga i lo tatou atunuu, ma o le a maua mai ai iuga lelei e le mafaatusalia (DBY, 194–95).

Ia faaleleia e le tane lona umukuka ma kapoti ma ona potumoe mo le manuia o lona aiga, ma faaleleia togalaau, savaliga, ma isi mea, faamatagofie mea tou te nonofo ai ma o latou siosiomaga, ma faia ni auala e savavali ai ma toto laau paolo (DBY, 198).

E tatau i tina ona alolofa ma faatonu o latou aiga ma ia avea ma aafiaga lelei i le lalolagi o loo siomia ai i latou.

Pe a ou manatunatu i tiute o o tatou tina ma tuafafine, ma aafiaga latou te aumaia, ou te tilotilo atu i ai o le pogai sili lea ma le mafuaaga tonu o lo tatou i ai iinei. E moni e muamua le tane. Na tuuina iinei le Tama o Atamu o le tupu o le fogaeleele, i lalo o lana vaavaaiga. Peitai, ina ua oo mai le Tina o Eva, sa tele sona aafiaga mo ia. E tele ni manatu faapea e lei lelei; ou te manatu sa sili ona lelei (DBY, 199).

O le tiute o le tina, o le vaavaaia lea o lana fanau ma tuuina atu ia te i latou la latou muai aoaoga, aua o uiga e maua a o itiiti, e tumau. Ua outou iloa, e outou lava, e ala i mea na oo i ai, o uiga na outou mauaina i le popofou o lo outou i ai i le olaga faitino, o loo oo mai lava i lenei vaitaimi, faatasi ma le mamafa aupito sili i o outou mafaufau. E toafilemu lelei ma faatuatuaina e le tamaitiiti lona tina, e te tuuina atu ia te ia se sootaga faanatura, tusa lava pe o a ona foliga mai, o le mea lena e manatu ai o ia, o lona tina e silisili ma aupito aulelei i le lalolagi. Ou te tautala lava au ia mo au. E i ai le faatuatuaga o fanau uma lava i o latou tina; ma afai e faia e tina taumafaiga lelei, e mafai ona latou totoina i loto o a latou fanau mea e fiafia i ai (DBY, 201).

O le a outou toe manatuaina le faitau i le Tusi a Mamona, e uiga i alii talavou e lua afe, o e sa aoaoina ma ua talitonu, afai latou te tuuina atu lo latou faatuatuaga atoa i le Atua, ma auauna atu ia te ia, e leai se malosi po o se mana e faatoilaloina i latou. Tou te toe manatua foi le faitau i lo latou o e tau, ma sa totoa i latou, ma sa matua matautia lo latou faatuatua, ma sa le mafai ai e o latou fili ona fasia i latou. O lenei malosi ma le faatuatua, na latou maua mai i aoaoga a o latou tina (DBY, 201).

O le valaauga o le ava ma le tina, lo latou iloa o mea e fai i mea uma lava e aumai i totonu o le fale, galulue ina ia avea lona aiga ma mea e fiafia ma manaomia e lana tane ma le fanau, avea o ia ma se Eva i totonu o se parataiso laitiiti na te faia e ia lava, opoopo mai le alofa ma le faatuatuaina o lana tane, ma fusia lana fanau ia te ia lava, i se alofa e malosi atu nai lo le oti, mo se tofi e faavavau (DBY, 198).

E toatele tuafafine e faavauvau ona o le le faamanuiaina i se fanau. O le a outou vaai i le taimi e faitau miliona ai fanau e siomiaina outou. Afai tou te faatuatua ma faamaoni i a outou feagaiga, o le a avea outou ma tina i atunuu (DBY, 200).

E le o sa’u galuega le fautuaina o tuafafine e aua le usiusitai i a latou tane, ae o la’u fautuaga o le—usiusitai i a outou tane; ma ou te talitonu ma tautala malosi atu i lena mataupu. Peitai ou te lei fautuaina lava se tamaitai e mulimuli atu i lana tane i le Tiapolo (DBY, 200–201).

O tina o ni mea faigaluega ogaoga i le aao o le Alii e taitaiina mea e oo i ai malo… . O lea la, ua outou iloa ai le mea o loo ou manao e faamamafa atu i o outou mafaufau, o tina o masini latou te tuuina atu faatosinaga lelei i le tagata atoa, ma taitaiina taunuuga ma olaga o tagata i le fogaeleele (DBY, 199–200).

Fautuaga mo Suesuega

O le feagaiga fou ma le faavavau o le faaipoipoga e faataatia ai le faavae mo le ola e faavavau.

Na saunoa mai Peresitene Iaga, o le faaipoipoga e faavavau “e faataatia ai le faavae mo lalolagi … [ma] mo tagata atamamai ina ia faapaleina i le mamalu.” E mafai faapefea ona tatou faapaiaina a tatou faaipoipoga mo lena faamoemoega e faavavau? O a ni mea patino e mafai ona outou faia e tausisia ai lena vaaiga i aso taitasi?
O le a le mea na saunoa i ai Peresitene Iaga o le misiona a alii talavou uma? E faatatau faapefea lena mea ia te oe?
O le a le mea na faatatau i ai le saunoaga a Peresitene Iaga ina ua ia fautuaina tagata talavou ina “ia faaipoipo sa’o?” O a faamanuiaga e oo mai ia i latou o å faia mea uma e “faatuina ai se malo?” (Vaai foi Aperaamo 2:9–11.)
“O se tasi lenei o mea sese aupito tele” ua faia e nisi o fanau a Aperaamo, Isaako, ma Iakopo o le faaipoipo lea i fafo atu o le feagaiga o faaipoipoga e faavavau. (Vaai foi Kenese 28:1–2.) O a faamanuiaga ua le maua e i latou e faaipoipo i fafo atu o le feagaiga o faaipoipoga e faavavau? O a mea e mafai ona e fai ina ia mautinoa ai lou agavaa mo lenei feagaiga o le faaipoipoga ma mafai ai ona maua ona faamanuiaga i se aso?
O le a le “tiute o alii ma tamaitai amiotonu uma”? Aisea e avea ai le foafoaina o tino faaletino mo fanau agaga a le Atua ma se tiutetauave taua tele o se faaipoipoga i le feagaiga fou ma le faavavau? E faapefea ona iloa e se ulugalii ua la faataunuuina lenei tiutetauave e tusa ai ma le finagalo o le Atua mo i laua? (Tagai foi i lou epikopo po o le peresitene o le paranesi e tusa ai ma le fautuaga o loo tuuina atu i le Tusi Taulima Aoao o Faatonuga.)

E tatau ona mulimuli tama ia Keriso a o latou alolofa, faatonu, ma tausia o latou aiga.

O le a le faataitaiga e tatau i tama taitasi ona faia i lana ava ma le fanau? O le a le uiga o le tatau i le alii ona mulimuli i a Keriso? E faapefea e se alii ona “aoao e lolo’u lona manao i le finagalo o le Atua”? O a mea ua e aoaoina mai tama ua latou faamatuu atu i latou lava i le finagalo o le Atua?
O a upumoni e tatau ona aoao atu e matua i a latou fanau? (Vaai foi MFF 68:25.)
E tusa ai ma le saunoaga a Peresitene Iaga, e faapefea ona pulefaamalumalu se tama i le aiga? (Vaai foi MFF 121:41–46.) E faapefea ona faia e se alii lona aiga? O a gaioiga e “motusia ai noataga paia uma, lea e tatau ona noatia mai ai i latou ia te i tatou ma le feagaiga e faavavau”? E mafai faapefea e le ava ma le fanau a le alii ua tumu i le agalelei ma le Agaga ona faataunuu a latou matafaioi?
O le a le mea na ta’ua e Peresitene Iaga e tupu pe a tausia faamaoni e se tane lona aiga? (Vaai foi MFF 83:1–2.) E mafai faapefea i lenei mea ona tulai mai ai se suiga?

E tatau i tina ona alolofa ma faatonu o latou aiga ma ia avea ma aafiaga lelei i le lalolagi o loo siomia ai i latou.

E tusa ai ma le saunoaga a Peresitene Iaga, o a tiute ma valaauga o se ava ma se tina?
O le a se faamafanafanaga na tuu atu e Peresitene Iaga ia i latou e leai pe le mafai foi ona maua ni fanau?
E faapefea ona faatosinaina oe, o lou aiga, ma lou nuu e tamaitai o le Au Paia o Aso e Gata Ai? E mafai faapefea ona latou faia i le lumanai?
O le a le uiga o le saunoaga a Peresitene Iaga ina ua faapea mai, “ou te lei fautuaina lava se tamaitai e mulimuli atu i lana tane i le Tiapolo?” E mafai faapefea ona iloa e se ava pe o mulimuli lana tane i a Keriso? O a faamanuiaga e oo mai i tane ma ava latou te usiusitai faatasi i le finagalo o le Atua?
Na saunoa mai Peresitene Iaga o tina o le a “taitaiina taunuuga o atunuu.” E mafai faapefea e tamaitai ona faataunuu lenei folafolaga?

pioneer newlyweds — O paionia faatoa faaipoipo o Sarah Farr Smith ma John Henry Smith i le 1866. Na aoao atu e Peresitene Iaga o le faaipoipoga e faavavau “o le mataupu faavae lea e mai le amataga e oo i le iuga o le Talalelei paia o le Faaolataga—e mai le vavau e oo i le faavavau” (DBY, 195).