Faatuatua i le Alii o Iesu Keriso

O le faatuatua ia Iesu Keriso o se malosiaga mamana lea i le soifuaga o Peresitene Polika Iaga. O lona faatuatua i le Faaola ma le talalelei toefuataiina a Iesu Keriso na mafai ai e ia ona onosaia faigata ogaoga ma tofotofoga. O lenei faatuatua, na ia faataunuuina ai le tele o misiona; na ia onosaia ai faigata o le Tolauapiga a Siona; na ia tumau mauai ai ma le faamaoni i le talalelei ma le Perofeta o Iosefa Samita i taimi faigata i Katelani ina ua toatele tagata o le Au Paia ua tuua le Ekalesia. O lenei faatuatua, na ia taitaiina ai le Au Paia i le Vanu o Sate Leki ma faatuina ai le malo o le Atua iina. Na ia saunoa mai: “O tagata uma lava e ola i lenei Ekalesia e tatau ona faatuatua. E le mafai ona faia i le vaai, ae e tatau ona matua faaaogaina le faatuatua i le Alii o Iesu Keriso, ina ia mafai ai ona olioli i le malamalama o le Agaga Paia. Pe a latou lå amanaiaina lenei, ona pulea ai lea o i latou e le agaga o le lalolagi, ma latou fememeai ai ma le fua mai, ma lafoaiina ai i latou i le pogisa, ma le oti faaleagaga” (DNW, 25 Apr. 1855,2).

Aoaoga a Polika Iaga

O le Faatuatua i le Alii o Iesu Keriso o le mataupu faavae muamua o le talalelei ma e na o le mana o le Agaga Paia e mafai ona malamalama ai.

Ole Talalelei o loo tatou talaiina atu, o le mana o le Atua i le faaolataga; ma o le mataupu faavae muamua o lena Talalelei o le … faatuatua i le Atua, ma faatuatua ia Iesu Keriso lona Alo, le Faaola. E tatau ona tatou talitonu o ia le ua faailoaina mai i Tusitusiga Paia… . E tatau ona tatou talitonu o Iesu lava lenei sa faasatauroina mo agasala a le lalolagi (DBY,153).

E mafai ona e faapea mai o le Alii ma lana Talalelei e leai se aoga e faailoa ai, poo lou ifo i ai (DBY, 153).

Ina ia malamalama i mataupu faavae muamua o le Talalelei—ina ia malamalama sao iai, e ao i le tagata ona iai le atamai e sau mai luga; e ao ona faamalamalamaina o ia e le Agaga Paia; … e ao ona olioli o ia i faamanuiaga o le faaolataga, ina ia mafai ona ia talai atu ai i isi (DBY, 152).

O vaega uma o le upumoni ua maua e tagata uma o le meaalofa a le Atua. Ua tatou maua ia upumoni, ma maua ai lea mana ma lea mana, … ma maua ai le malamalama i mea uma, ma avea ai ma Atua, poo Atalii o le Atua. O i latou ia e ou le selesitila. O i latou ia ua filifilia e le Alii ona o lo latou usiusitai. Latou te le i teena le upumoni, ina ua latou faalogo iai. O i latou ia latou te le i teena le Talalelei, ae ua latou talia Iesu ma le Atua i lo latou tagata moni; ua latou talia agelu i o latou tagata moni. O i latou ia ua galulue mo le faaolataga o le aiga o tagata (DBY, 152).

O le Faatuatua ia Keriso, o le meaalofa a le Atua e maua mai i le talitonuga, usiusitai, ma galuega amiotonu.

Afai e te talitonu i mataupu faavae o le Talalelei ma maua ai le faatuatua, o le meaalofa a le Atua, o le a ia faaopoopo le faatuatua tele, ma faaopoopo le faatuatua i le faatuatua. Ua ia tuuina mai le faatuatua i luga o ona tagata soifua o se meaalofa; ae o ona tagata ua latou maua le faamanuiaga o le talitonu i le Talalelei i lona moni poo le sese (DBY, 154).

Afai tatou te tautala i le faatuatua i lona tulaga lautele, o le mana lea o le Atua sa foafoaina ma faia ai le lalolagi, ma o le meaalofa a le Atua ia i latou ua talitonu ma usiusitai i ana poloaiga. I se isi itu, e leai se o soifua, poto, pe auauna i le Atua pe leai, e galue e aunoa ma le talitonu. E ao ai ia te ia ona ola e aunoa ma le manava e pei o le ola e aunoa ma le mataupu faavae o le talitonu. Ae ao ona ia talitonu i le upumoni, usiusitai i le upumoni, ma ola ai i le upumoni, ina ia maua le mana o le Atua e taua o le faatuatua (DBY, 153).

Ua ia i tatou le tautinoga o le talitonu i lo tatou Atua; ma o le faavae lenei o mea uma tatou te fai e i tatou lava (DBY, 154).

A o outou faitau i faaaliga, poo le faalogo i le finagalo o le Alii e faatatau ia te outou, mo lo outou lava manuia aua nei taliaina lena mea ma le agaga masalosalo (DBY, 155).

O lo tatou Tama oi le Lagi e le faailoa soo mai i ana fanau galuega lilo o lana taitaiga, pe na te faaali foi ia i latou le iuga mai le amataga; aua e ao ona latou aoao ona talitonu ia te ia o le na folafola mai na te tauina a tatou taua, ma faapaleina i tatou i le manumalo, pe afai tatou te faatuatua e pei o le faatuatua o Aperaamo (DBY, 156).

Afai ua iai i tagata le masani o le fefinauai i mataupu uma, ma ua na ona faalagolago i le mea ua tatou taua o le mafaufauga faaletagata, o le a maua pea e i latou le sese. Ae tuu le tagata i se tulaga ua ia finau ai ina ia lagolagoina ai ia lava, e maua le faatuatua i le suafa o Iesu Keriso, ma maua ai le avanoa ua ia iloa ai e ia lava; ma fiafia e pei o i latou e sao mai i tofotofoga, pe afai latou te tutumau i le amiotonu ma le faatuatua i o latou valaauga (DBY, 154).

O galuega amiotonu e faaalia ma faamalosia ai le faatuatua.

Ina ia faamatala le tele o lo tatou talitonuga i le Atua, afai ou te faaaoga se upu e fetaui ia te au lava, e ao ona ou faapea, o le talitonuga mauai. E i ai lou faatuatuaga i lou Atua, ma o lena faatuatua e talafeagai ma galuega ou te fai. Ou te le talitonu i le faatuatua, ae leai ni galuega (DBY, 155).

Afai o le a tumu tagata i galuega lelei, ou te tautino atu o le a i ai lo latou faatuatua i le taimi e manaomia ai (DBY, 154).

Afai e oo mai le faatuatua i le loto, o le a mulimuli mai galuega lelei, ma o le a faateleina galuega lelei o loo i ai le faatuatua mama (DBY, 156).

O lou faatuatuaga e faapea, afai o le a uma ona tatou faia o mea uma, o le a i ai i le Alii le matafaioi, ma o le a le faanoanoa le tagata faatuatua; o le a ia faia mea uma o totoe (DBY, 155).

Afai o le a tuuina se tagata i se tulaga o le a le mafai ai lava e ia ona maua se mea e ola ai, o le a ia faaaoga loa lona faatuatua i le Atua e fafaga ia te ia, o le e auina mai le oreva e aumaia se fasi aano o manu mai se nuu o loo tele ai le mau; ma faapau ifo i luga o le tagata galala. Afai ou te le mafai ona ou fafagaina ia te au lava e ala i mea ua foai mai e le Atua i lou malosi, o le a lava le taimi mo ia, e faaaoga ai lana taitaiga i se auala e le masani ai e fesoasoani ai i mea o loo ou manaomia. Ao mafai ai ona tatou fesoasoani ia i tatou lava, o la tatou matafaioi o le faia lea (DBY, 155).

O le tele o tagata lelei, o e o loo maua tele le Agaga o le Alii ua masani ai ona masalosalo, ua itiiti lo latou faalagolago ia i latou lava, o nisi o taimi ua masalosalo ai poo i latou o ni tagata o le Au Paia moni pe leai. E masani ona masalosalo ae le tatau ai ia i latou. Afai lava ua latou savavali i le lotomaulalo i luma o le Atua, tausia ana poloaiga, ma usiusitai i ana sauniga, lagona e foai atu uma mo Keriso, ma faia mea uma e faaeaina ai lona malo, e le tatau ona masalosalo i latou, aua o le a molimau le Agaga ia i latou pe ni o le Atua i latou pe leai (DBY, 155).

Afai e ola ai tagata o le Au Paia i lo latou tofi, ma faaaogaina lo latou faatuatua i le suafa o Iesu Keriso, ma ola ai i le fiafia ona o le tumu i le Agaga Paia i aso uma, e leai se mea o i luga o le lalolagi latou te valaau atu ai, e le auina mai ia i latou. O loo faatali le Alii e faaalia lona mamalu i ona tagata, ma sasaa atu i o latou luga le oa, mamalu ma le mana, ina ia latou maua ai mea uma e tusa ai ma le folafolaga sa ia faia e ala atu i ana Aposetolo ma Perofeta (DBY, 156).

Fautuaga mo Suesuega

O le Faatuatua i le Alii o Iesu Keriso o le mataupu faavae muamua o le talalelei ma e na o le mana o le Agaga Paia e mafai ona malamalama ai.

Aisea e maua ai lo tatou faamoemoe i lo tatou faatuatua i le Alii o Iesu Keriso?
O a ni mea patino sa taua e Peresitene Iaga e ao ona tatou talitonu ai ina ia maua ai le faatuatua ia Iesu Keriso?
Aisea ua avea ai le faatuatua ia Iesu Keriso ma mataupu faavae muamua o le talalelei? (Vaai Moronae 7:33–34; Mataupu Faavae o le Faatuatua 1:4.) E tusa ai ma le saunoaga a Peresitene Iaga, e mafai faapefea ona tatou malamalama i le faatuatua ia Keriso, o le mataupu faavae muamua lea o le talalelei?
O ai i “latou o loo galulue mo le faaolataga o le aiga o tagata”?

O le Faatuatua ia Keriso o le meaalofa a le Atua e maua mai i le talitonuga, usiusitai, ma galuega amiotonu.

E faapefea ona tatou atinaeina le faatuatua ia Keriso? O le a le uiga o le faaopoopo o le “faatuatua i le faatuatua”? (vaai Alema 32:26–28).
Aisea e tatau ai ona tatou talitonu, usitai, ma ola ai i le upumoni ina ia maua ai le faatuatua? (Vaai Alema 32:21.)
Aisea na saunoa ai Peresitene Iaga “O lo tatou tofi le talitonu i le Atua”? (vaai Eteru 12:6–7.) E faapefea ona faaali lo tatou talitonu i le Atua? (Vaai Eteru 3:11–12.)
E faalavelave faapefea le masalosalo ma manatu faaletagata i le faatuatua? E faapefea ona tatou iloa mo tatou lava lo tatou va ma le Atua? E faapefea ona faatosina e lo tatou faatuatua ia Iesu Keriso o tatou lagona e uiga ia i tatou lava?
Na saunoa mai Peresitene Iaga, “E fiafia i latou e maua i puapuaga, pe afai latou te tutumau i lo latou faamaoni ma lo latou faatuatua i o latou valaauga.” E faapefea ona tatou tutumau i lo tatou faatuatua ma le faamaoni i taimi faigata? E faapefea e lo outou faatuatua ma le faamaoni ona faaleleia puapuaga (vaai Helamana 12:3; Alema 32:6.)

O galuega amiotonu e faaalia ma faamalosia ai le faatuatua.

Na faapefea ona faamlamalama e Peresitene Iaga le faiã a le faatuatua ma galuega?
O le a le saunoaga a Peresitene Iaga i mea e ao ona tatou faia ina ia maua ai le fesoasoani a le Alii? O le a le mea e finagalo le Alii ia i latou e lagona “le naunautai e tuuina atu mea uma mo Keriso, ma faia mea uma e faaalualu ai i luma lona malo”?
O le a le folafolaga a Peresitene Iaga mo i latou e “faaaoga le faatuatua i le suafa o Iesu Keriso, ma ola ai i le fiafia o le atoatoa o le Agaga Paia i aso uma”? Afai e o faatasi a tatou tatalo ma le faatuatua ma musumusuga, o le a le tali? (Vaai MFF 46:30; Helamana 10:5.)

pioneers — Sa faaalia e le uluai Au Paia le faatuatua tele i le Alii a o latou tuua o latou aiga ma fanua ina ia faapotopoto i Siona i lalo o le taitaiga a Peresitene Polika Iaga

wagons in Salt Lake City — Ata o taavale toso i le Aai o Sate Leki i le amataga o le 1860