Sefuluai ma le Faapaiaga

E ui i faafitauli uma sa feagai ma Peresitene Iaga, ia te ia lava ia, “sa leai se mea faapena” o se ositaulaga (DNW, 24 Aokuso, 1854, 1) aua o mea uma e o le Atua ia, ma o mea ua tatou tuuina atu ua faamanuiaina ai i tatou ma saunia ai i tatou mo le faaeaga. Sa ia silasila i mea ua tatou taua o osigataulaga o ni avanoa e sui ai “se tulaga faaletonu i se tulaga lelei” (DNW, 24 Aokuso, 1854, 1). Na aoao mai Peresitene Iaga e mafai ona tatou auai i le galuega a le Alii e ala i le usiusitai i tulafono o le sefuluai ma le faapaiaga—ma faailoa atu ai o mea uma lava ua tatou maua, o mea ia a lo tatou Tama oi le Lagi ma faafoi atu se vaega o mea ua tatou maua ia te Ia.

Aoaoga a Polika Iaga

O le totogi o le sefuluai ua mafai ai ona tatou auai i le galuega a le Alii e ala i le toe faafoi atu o se vaega o Ana mea.

Ou te le talitonu mo se taimi, e i ai se tagata i lenei Ekalesia, ua le malamalama i le tiute o le totogiina o le sefuluai, poo le alagatatau foi le i ai o ni faaaliga i tausaga uma e faatatau i le mataupu. O loo i ai le tulafono— totogi le tasi o vae sefulu (DBY, 174).

Ua tele naua le tuufesili ua avea ma faasoesa; o le tulafono, e mo le tagata e totogi le tasi o vae sefulu … mo le fausiaina o le malumalu o le Atua, mo le faasalalauina o le talalelei, ma le lagolagoina o le perisitua. Afai e oo mai se tagata i le Ekalesia, na te fia iloa pe tatau ona ia faailoa atu ona lavalava, aitalafu, fanua, ma isi mea. O le tulafono le foai atu … le tasi o vae sefulu o ana mea uma e maua [vaai MFF 119:4] (HC, 7:301). O le tulafono o le sefuluai o le tulafono e faavavau. Ua le mafai ona i ai le malo o le Alii Silisiliese i le fogaeleele e aunoa ma le tulafono o le sefuluai i tagata, ma ua ia le mafai lava. O le tulafono e faavavau na faia e le Atua mo le manuia o le aiga o tagata, mo lo latou faaolataga ma le faaeaga. O lenei tulafono o loo i le perisitua, ma e tatou te le mananao i soo se tagata na te faataunuuina lenei tulafono sei vagana ua latou naunau e faia lea mea (DBY, 177).

Ua le faamalosia tagata e totogi a latou sefuluai, latou te faia i la latou lava faitalia, ua na ona uunai atu i o latou luga ona o se tiute i lo latou va ma le Atua (DBY, 177).

Ua tatou le fai atu i se tagata e totogi le sefuluai, seia vagana ua aoaoina ai i latou e faia lea mea; ae afai ua outou faafoliga ua totogi le sefuluai, ia totogi faapei o tagata faamaoni (DBY, 177).

E ao i tagata uma ona totogi la latou tasi o vae sefulu. O se tina mativa e ao ona totogi atu lana moa lona sefulu, pe afai ua ia manaomia le faasefuluina o le aoga o lana sefuluai e fesoasoani ai mo ia (DBY, 178).

E moni, e sili atu le totogiina o le sefuluai a le tagata mativa, nai lo le tagata mauoa. Afai e totogiina sefuluai a le au mauoloa, ua tatau ona tele a tatou mea. E tumu tagata matitiva i le faatuatua ma le faamaoni, ma e vave ona latou totogiina a latou sefuluai, ae o le au mauoloa, e faigata lava ona mafai ona latou totogiina a latou sefuluai—ua matua tele naua a latou mea. Afai e na o le sefulu tala sana tupe, e mafai ona ia totogiina le tasi; afai e na o le tasi le tala, e mafai ona ia totogiina le sefulu sene; e le afaina lava ia te ia. Afai e i ai sana selau tala e mafai lava ona ia totogiina le sefulu. Afai e i ai sana afe tala, o le a tilotilo o ia i ai ma faapea, “Ou te masalo o le a totogi; e tatau lava ona totogi;” ma e mafai ona ia totogiina le sefulu tala po o le selau tala. Ae a faapea ua matua mauoa tele se tagata ma e tatau ona ia totogiina se sefulu afe, o le a faatele ona tilotilo o ia i ai ma faapea, “Ou te masalo o le a ou faatali sei toe maua nisi tupe se tele, ona ou totogiina atu lea o se tupe tele.” Ona faatali ai lava lea, ma faatalitali, e pei o se alii matua i le itu i Sasae; na faatali, ma faatali, ma faatali e totogi lana sefuluai seia oo lava ina maliu, ma o le mea lea o loo tupu i le toatele. Latou te faatalitali, ma saga faatalitali, seia oo mai le Oti, ma tolotolo lemu atu ia i latou e aunoa ma se lapataiga, ma aveese le manava, ma o atu ai lava ae ua le mafai ona totogiina le sefuluai, ua tuai tele, ma o le mea lava lea e oo i ai (DBY, 175).

E le o sa’u le tulai atu ma faapea e mafai ona ou tuuina atu i le Alii, aua o le mea moni, e leai sa’u e tuuina atu. E foliga mai e i ai se mea o ia te au. Aisea? Aua ua silafia e le Alii ua tatau ona ou oo mai, ma ua faamanuiaina a’u taumafaiga i le faapotopotoina o mea o loo manaomia, ma mea ua ta’ua o meatotino (BBY, 176).

Ina ua malaga mai lo’u Epikopo e fuafua le tau o a’u meatotino, sa ia fia iloa pe o le a se mea na te aveina e fai ma a’u sefuluai. Sa ou fai atu ia te ia, e ave soo se mea lava a au o i ai, aua sa le’i pupu lo’u loto i se mea e tasi; o au solofanua, o povi, o mea i tuaolo, po o soo se mea lava na te aveina; sa pupu lo’u loto i le galuega a lo’u Atua, mo le lelei o tagata lautele o lona Malo tele (DBY, 176).

Afai tatou te ola i o tatou talitonuga faalelotu, o le a tatou naunau e totogi sefuluai (DBY, 176).

Tatou te le aiã ia i tatou lava, ua faatauina i tatou i le tau, o i tatou e o le Alii ia; o o tatou taimi, o a tatou taleni, o a tatou auro ma siliva, o sana ma saito ma falaoamata, o uaina ma suauu, o a tatou povi, ma mea uma i le fogaeleele ua tatou maua, o mea ia a le Alii, ma e manaomia e ia le tasi o vaesefulu o na mea mo le fausiaina o lona Malo. Pe ua tele a tatou mea pe itiiti foi, e tatau ona totogiina atu le tasi o vaesefulu mo le sefuluai (DBY, 176).

Pe a manao se tasi e tuuina atu soo se mea lava, e tatau ona ia tuuina atu le mea silisili o ia te ia. Na tuuina mai e le Alii ia te au mea uma ua ou maua; o le mea moni e leai sa’u mea, e leai se sene e faapea o sa’u lava. Atonu e te fesili, “Pe e te lagona e pei ona e fai mai ai?” Ioe, o le mea moni lava lea. O le peleue o loo ufiufi ai lo’u tua, e le o sa’u, ma e le o sa’u lava; sa tuuina aloaia mai e le Alii ia te au, ma o loo ou ofuina; ae afai e manao mai o ia i ai, ma lå o loo ia ofuina, e mafai tele ona ia aveina uma. E leai so’u fale, po o se faatoaga po o se fanua, se solofanua, se miula, taavale, po o se taavale solofanua … e le’i tuuina mai e le Alii, ma afai e toe manao o ia i ai, e mafai ona ia aveina pe a finagalo ai, tusa pe fetalai mai ai o ia, pe aveina foi e aunoa ma se upu (DBY, 175).

O mea uma a le Alii, ae o i tatou ua na o ni å e tausia (DBY, 178).

Ou te le o faamoemoe e vaai i le aso ou te tutoatasi ai lava na o au, seia vagana ua faapaleina au i le malo selesitila o lo’u Tama, ma ou tutoatasi ai e pei o lo’u Tama oi le Lagi. Ou te lei mauaina lava lo’u tofi na o au, ma o loo ou faamoemoe e tutoatasi seia oo ina taunuu, aua o mea uma ua ia te au, o loo faaune mai (DBY, 177).

O lo tatou tiutetauave, o le totogiina lea o le sefuluai ma lagolagoina i latou o å o loo taulimaina tupe o sefuluai

O le tagata lenei—(faasino ia Polika Iaga), na foafoaina e le Atua, faatulagaina, ma faia,—o vaega tetele ma vaega ninii uma o lo’u tagata mai le tumutumu o lo’u ulu e oo i o’u alofivae, na faia e lo’u Tama oi le Lagi; ma o loo manaomia e ia le tasi vaesefulu o lo’u fai’ai, fatu, neura, musele, sulugatiti, aano, ponaivi, ma lo’u tagata atoa, mo le fausiaina o malumalu, mo lana galuega, mo le lagolagoina o faifeautalai ma aiga o faifeautalai, mo le fafagaina o å matitiva, o tagata ua afu le soifua, o e tutuli ma e tauaso, ma mo le faapotopotoina mai o i latou mai atunuu ma tausia i latou pe a maea ona faapotopotoina mai. Na ia fetalai mai, “Lo’u atalii e, ia e tuuina atu atoa le tasi o vaesefulu o oe lava mo le lelei ma le faaatoatoaina o le galuega o le tausia o ou uso a tagata, folafolaina atu o le Talalelei, aumaia o tagata i le Malo; faia au fuafuaga ina ia tausia i latou e le mafai ona latou tausia i latou lava; faatonutonu galuega a i latou e mafai ona galulue; ma ua matua lava le tasi o vaesefulu pe a tuuina atu faalelei, ma le faaeteete ma le faautauta mo le faaalualuina i luma o lo’u Malo i le fogaeleele” (DBY, 176).

Afai ua manaomia e le Alii le tasi o vaesefulu o lo’u tomai e tuuina atu i le fausiaina o malumalu, o falelotu, faleaoga e faaaooga ai fanau, faapotopotoina mai o e matitiva mai atunuu o le lalolagi, aumaia o tagata ua afu le soifua, o e pipili, tutuli ma tauaso, ma fausia fale mo i latou e nonofo ai, ina ia latou maua le lagona lelei pe a taunuu i Siona, ma lagolagoina ai le Au Perisitua, e leai sa’u feau po o sa’u aiã e fesiligia ai le pule a le Silisiliese i lenei mea, po o ana auauna o loo vaaia. Afai ua manaomia lo’u totogiina o la’u sefuluai, o lo’u tiute le totogiina (DBY, 174).

Ou te fiafia i le faaupuga [sefuluai], aua e faaletusi paia, ma e sili atu lo’u faaaogaina nai lo se isi lava. O le Alii na ia uluai faatuina mai le sefuluai; na faia i aso o Aperaamo, ma e lei faagaloina lava e Enoka ma Atamu ma ana fanau a latou sefuluai ma taulaga. E mafai ona outou faitauina mo outou lava ma le manatu i mea ua manaomia e le Alii. Ou te fia fai atu lenei mea ia i latou ua avea o ni tagata o le Au Paia o Aso e Gata Ai—afai tatou te faatuatuanai i a tatou sefuluai ma taulaga o le a oo mai ia te i tatou le aao o le aoaiga a le Alii. Ua sili ai ona tatou faitauina nei o le a tupu lena mea. Afai tatou te faatuatuanai i le totogiina o a tatou sefuluai ma taulaga, o le a tatou faatuatuanai foi i isi mea ma o le a matua aafia ai lava i tatou, seia oo ina matua alu ese atoa le agaga o le Talalelei mai ia te i tatou, ma o le a valea i tatou ma faaletonu, ma lå iloa pe o fea e agai i ai (DBY, 174).

O loo manaomia e le Alii le tasi o vaesefulu o mea na ia tuuina mai ia te au; ua tatau ia te au ona ou totogiina le tasi o vaesefulu o le faasiliga po o manu ua faateleina ai la’u lafu ma mea uma o ia te au, ma e tatau i tagata uma ona latou faia lea lava mea e tasi. Atonu e tulai mai le fesili, “O le a le mea e faia i le sefuluai?” E mo le fausiaina o malumalu o le Atua; mo le faalauteteleina o tuaoi o Siona; auina atu o faifeau i misiona e folafola atu le Talalelei ma tausia ai o latou aiga. O le a i ai taimi e i ai ni malumalu tatou te ulu atu i ai, ma o le a tatou mauaina o tatou faamanuiaga, o faamanuiaga o le lagi, e ala i le usiusitai i aoaoga faavae o le sefuluai. O le a i ai malumalu e fausiaina i nei mauga, i vanu o lenei Aai ma vanu o isi Aai o loo sosoo atu ai, ma mulimuli ane ua aofia ai uma vanu o nei atumauga. Tatou te faamoemoe e fausia malumalu i le anoanoai o vanu. Tatou te o i le Fale o Faaeega Paia, ma ae tatou te lei o, tatou te maua mai se pepa faataga mai lo tatou Epikopo faapea ua totogi a tatou sefuluai (DBY, 178).

la’u pisinisi po o la’u matafaioi le pulea lelei o le faasoasoaina o sefuluai na totogiina e le Au Paia, ae le o se pisinisi a Toeaiina uma i le Malo o så ua manatu o le sefuluai e o na ia (DBY, 178).

Afai tou te faatagaina le tiapolo e fautuaina oe faapea ou te le o taitai sa’oina outou, ma faatagaina lena mafaufau e nofo i o outou loto, ou te folafola atu o le a taitaiina atu ai outou i le liliu ese. Afai tou te faatagaina outou e masalosalo i soo se mea ua faaalia mai e le Atua, o le a le pine ae amata ona outou faatuatuanai i a outou tatalo, mumusu e totogi a outou Sefuluai, ma saili masei i e taitaiina le Ekalesia. O le a outou saga faia foi faaupuga a e na liliuese e faapea, “E le o faaaogaina sa’o le Sefulufai”(DNSW, 29 Aug. 1876, 1).

O le faapaiaga o se naunautai lea e tuuina atu mea uma ma le faailoa atu o mea uma ua ia te i tatou, e o le Tama oi le Lagi ia.

Ua ou vaavaai atu i potopotoga a le Au Paia o Aso e Gata Ai i se faaaliga, faauta ua faatulagaina i latou o se aiga tele e tasi i le lagi, ua tofu faataunuuina e le tagata lava ia ona tiute i le galuega ua faatonuina ai, ua galulue mo le lelei o tagata uma nai lo le faaleleia o le tagata lava ia; ma i lenei vaaiga sa ou iloa ai le faatulagaga aupito matagofie e mafai ona mafaufau loloto i ai le tagata, ma iuga aupito matagofie mo le fausiaina o le Malo o le Atua ma le faateleina o le amiotonu i le fogaeleele. Faamata e oo i ai le fanauga a tagata i lenei faatulagaga o mea? Pe ua latou saunia nei ea e ola e tusa ai ma lena faatulagaga faapeteriaka, lea o le a faatulagaina i e faamaoni ma faatuatua a o lei mauaina e le Atua lona lava? Tatou te ioe uma lava, pe afai e mavae lenei olaga, faatasi ai ma ana faiga, o popolega, manatu faapito, tuinanau i le oa, ma le matape’ape’a i le malosi po o le pule, ma isi mea faasoesa sa fiafia i ai i la le tino, o lea la, pe a toe foi atu o tatou agaga i le Atua na aumai ai, o le a faalagolago i tatou i mea uma na ia manaomia ai i tatou, ona tatou nonofo faatasi ai lea o se aiga tele e tasi; o mea tatou te fiafia i ai o le a laugatasia, o se mea e masani ai. Aisea e le mafai ai ona tatou nonofo faapea i lenei lalolagi? (DBY,181).

Mata ea e oo mai le taimi e mafai ai ona tatou amata faatulagaina nei tagata o se aiga? Ioe. Pe ua tatou iloa pe faapefea ona faia? Ioe… . Mata e te manatu o le a tasi ea i tatou? Pe a tatou foi atu i lo tatou aiga i le Atua lo tatou Tama, mata o le a tatou le moomoo ina ia tatou i ai i le aiga? Pe o le a le avea ea ma o tatou faanaunauga aupito maualuga le ta’ua o atalii o le Atua soifua, o afafine o le Silisiliese, faatasi ai ma se aia tatau i mea o le aiga, ma le faatuatua e o le aiga, tofi o le Tama, o ana oloa, o lona tamaoaiga, o lona mana, o lona mamalu, lona malamalama ma le poto? (DBY, 179).

Pe a oo ina tasi nei tagata, o le a tasi i le Alii. O le a le tutusa o latou foliga. O le a le lanu faaefuefu, lanumoana, pe uliuli uma o tatou mata. O le a eseese lava o tatou foliga, ma a tatou gaioiga, o mafaufauga, ma taumafaiga e faaputuputu, faasoasoa, ma faaaoga o tatou taimi, taleni, tamaoaiga ma soo se mea e tuuina mai e le Alii ia te i tatou, i la tatou faigamalaga i le olaga. O le a eseese i tatou e pei lava o o tatou foliga. O le mataupu o loo finagalo le Alii e aumai ia te i tatou, o le usiusitai i ana fautuaga ma tausisia lana upu. Ona taitaiina lea o tagata uma ina ia mafai ona avea o se aiga (DBY, 180).

Matou te mananao e vaaia se nuu o faatulagaina ina ia galulue malolosi tagata uma, ia faatuatua ma faamaoni (DBY, 180).

Ia aua lava nei e manao i se mea e le mafai ona e maua, ia ola i mea ua ia te oe (DBY, 180).

Ina ua tuuina mai e le Alii le faaaliga e faatonuina ai i tatou i lo tatou tiute e faapaiaina mea ua tatou maua, pe ana mafai ona malamalama lelei tagata i mea e pei ona tuuina mai, ma usiusitai i le faaaliga, semanu e le tele pe itiiti ifo foi nai lo le na o le tuuina atu o mea e le o ni a latou, ia te ia o lå e ona ia mea. Ma ua faapea lava (DBY, 178).

Ua folafolaina mai e le Alii lona finagalo ina ia ulu atu lana fanau i feagaiga, e pei o Enoka ma lona nuu, aua o le mea e tatau ai a o le’i maua le avanoa e fausiaina ai Nofoaga Tutotonu o Siteki o Siona, aua o le a i ai iina le mana ma le mamalu o le Atua, ma e leai se tasi vagana ai e ua loto mama o le a mafai ona ola ma fiafia i ai (DBY, 178).

O loo i ai foi le isi faaaliga [po o le Mataupu Faavae ma Feagaiga 42] … o loo ta’ua mai ai o le tiute o tagata uma o å o atu i Siona le faapaiaina o a latou meatotino mo le Ekalesia a Iesu Keriso o le Au Paia o Aso e Gata Ai. O lenei faaaliga … o se tasi o uluai poloaiga po o faaaliga na tuuina mai i nei tagata ina ua latou maua le avanoa paia e faatulagaina ai i latou lava o se Ekalesia, o se tino, o se Malo o le Atua i le fogaeleele. Ua ou iloa ai iina, ma ua ou manatu, o le tasi lenei o toe faaaliga o le a maua e tagata i o latou loto ma malamalama ai, i lo latou lava filifiliga saoloto, ma manatu maualuga i ai o se mea fiafia, o se avanoa paia, ma se faamanuiaga ia te i latou le iloa ma matua tausisia ma le paia (DBY, 179).

O loo anoanoai meatotino, ma auro ma siliva i totonu ma luga o le fogaeleele, ma ua tuuina atu e le Alii se vaega i lea, ma se vaega i se isi—o e amioleaga atoa ma e amiotonu—ina ia iloa ai pe o le a la latou mea e faia i ai, ae o ana mea uma lava. Ua ia tuuina mai mea e tele i nei tagata… . Peitai e le o ni a tatou mea, ma pau lava le mea e tatau ona tatou faia, o le taumafai lea e saili pe o le a le mea e finagalo le Alii tatou te faia i mea ua ia te i tatou, ona o atu ai lea ma ia faia. Afai tatou faia se isi mea i luga atu o lenei mea, o lona uiga ua tatou laa atu i ni ituaiga pisinisi e le faatulafonoina. O la tatou pisinisi po o le galuega faatulafonoina, o le faia o le mea e finagalo le Alii tatou te faia, i mea ua ia tuuina mai ia i tatou e pei ona ia faatonuina, pe tatou te tuuina atu mea uma, tasi o vaesefulu, po o le sili atu foi (DNW, 23 Apr. 1873, 4).

O le a le umi o totoe tatou te ola ai, ona faatoa tatou iloaina lea e leai sa tatou mea e faapaia mo le Alii–o mea uma lava e o le Tama oi le lagi; o nei mauga e o Ia; o vanu, o laupapa, o le vai, o le palapala; i se aotelega, o le lalolagi ma mea uma o i ai? [vaai MFF 104:14–18, 55] (DNW, 20 Iuni 1855, 5).

O lea la, o fea o i ai le taulaga na osia e nei tagata? E leai se mea faapea. Ua na ona latou fesuiai se tulaga e sili ona leaga mo se tulaga e sili atu ona lelei, o taimi uma lava na siitia ai; ua latou fesuiai le valea mo le atamai, ma le poto masani mo lona faafeagai (DNW, 24 Aug. 1854, 1)

Pe a faapea lava ua valaauina i tatou ina ia tuua mea ua ia te i tatou nei, pe tatou te ta’ua ea lea mea o se osigataulaga? Talofa e i se tagata na te ta’ua faapea; aua o se faiga lea e faaopoopo atu ai ia te ia le poto, malamalama, mana, ma le mamalu, ma saunia ai o ia e maua pale, malo, o nofoalii, ma aloalii, ma faapaleina i le mamalu faatasi ma Atua o le faavavau. A aunoa ma lenei, e le mafai lava ona tatou mauaina le mea o loo tatou sailia (DNW, 3 Aug, 1854, 2).

O le a ou ta’uina atu ia te outou le mea e faia ina ia outou mauaina ai le faaeaina, lea e le mafai ona outou maua sei vagana ua outou aveina lenei mataupu. Afai e tuu atu ou faanaunauga i soo se mea ina ia taofia ai oe mai le tuuina atu i le Alii, ia uluai faia se faapaiaga o lena mea, ina ia mafai ona atoatoa le faapaiaga (DNW, 5 Jan. 1854, 2).

O a mea e taofia ai pe faalavelavea ai nei tagata mai le avea ma tagata paia e pei o le taimi o Enoka? E mafai ona ou ta’uina atu le mafuaaga i ni nai upu. E mafua ona o lou le atinaeina o le mafaufau ia faapena: o le mafuaaga atoa lava lenei. Afai e le o atoa ona tuuina atu lo’u loto i lenei galuega, o le a tuuina atu lo’u taimi, o a’u taleni, ma lima, ma a’u meatotino, seia iu ina tonu i lo’u loto o le a ou uai atu i ai; o le a ou faaaogaina o’u lima i le galuega a le Atua, seia uai atu atoa i ai lo’u loto (DNW, 5 Jan. 1854, 2).

Ua ou ta’uina atu ia te outou le mataupu e tulimatai ina ia maua ai se faaeaga. E ao ona faamuamua ma aupito taua le Alii i o tatou faanaunauga; o le fausiaina o lana galuega ma lona malo ua faamalosia mai ai le tatau ona tatou manatu muamua i ai (DNW, 5 Jan. 1854, 2).

Fautuaga mo Suesuega

O le totogi o le sefuluai ua mafai ai ona tatou auai i le galuega a le Alii e ala i le toe faafoi atu o se vaega o Ana mea.

Vaai fuaiupu taitasi o loo faaaoga ai e Peresitene Iaga le upu “tasi o vaesefulu,” ona lisiina uma lea o mea na ia ta’u mai e uiga i a tatou matafaioi mo sefuluai. O a mea e aofia i le sefuluai ma o ai foi e tatau ona totogiina? (Vaai foi MFF 119:3–4.)
Aisea na saunoa mai ai Peresitene Iaga e leai sana e tuuina atu? (Vaai foi Mosaea 2:19–24; MFF 104:14–18, 55). O le a le puna o mea uma ua tatou olioli ai, e aofia ai mea ua tatou totogi atu i sefuluai? O le a la le uiga faaalia e tatau ona ia te i tatou e uiga i isi iva vaesefulu o mea a le Alii ua Ia tuuina mai ia te i tatou? (Vaai foi Iakopo 2:17–19.) E fesoasoani faapefea lenei uiga tatou te malamalama ai i le Malaki 3:8–12?
Faitau ma le faaeteete le 2 Nofoaiga a Tupu 31:5–6. O anafea na totogiina ai e nei tagata a latou sefuluai? O a uiga e tatau ona tatou faaalia e uiga i le totogiina o a tatou sefuluai?

O lo tatou tiutetauave, o le totogiina lea o le sefuluai ma lagolagoina i latou o å o loo taulimaina tupe o sefuluai

O le a le uiga o le saunoaga a Peresitene Iaga ina ua ia faapea mai o loo “manaomia e le Alii le tasi o vaesefulu o… . lo’u tagata atoa”? O a ni auala e mafai ai ona e tuuina atu le tasi o vaesefulu o oe lava” mo le fausiaina o le malo o le Atua? Ua faapefea ona faamanuiaina oe ina ua e ofoina atu lou taimi ma taleni i le fausiaina o le malo o le Atua e faaopoopo i le totogiina o le sefuluai?
O a iuga e mulimuli mai na ta’ua e Peresitene Iaga ona o le le totogiina o le sefuluai a se tasi? E aafia faapefea le Ekalesia a le Alii ma le tagata o le ekalesia i le le totogiina o le sefuluai?
O a mea na saunoa mai Peresitene Iaga e faaaoga i ai le sefuluai? O ai e i ai le tiutetauave mo le faasoasoaina o tupe o le sefuluai? (Vaai foi MFF 120.) O a uiga na faaalia e Peresitene Iaga i le fesiligia o i latou e gafa ma le faasoasoaina o tupe o le sefuluai?

O le faapaiaga o se naunautai lea e tuuina atu mea uma ma le faailoa atu o mea uma ua ia te i tatou, e o le Tama oi le Lagi ia.

O le a le uiga o le “nuu o le Au Paia o Aso e Gata Ai” ina ia avea “o se aiga tele e tasi i le lagi” ma le avea ma “tofi o le Tama”?
Aisea ua avea ai le tulafono o le faapaiaga ma “o le tasi lenei o toe faaaliga o le a maua e tagata i o latou loto ma malamalama ai, i lo latou lava filifiliga saoloto, ma manatu maualuga i ai o se mea fiafia, o se avanoa paia, ma se faamanuiaga ia te i latou, le iloa ma matua tausisia ma le paia”?
Aisea e tuuina mai ai e le Alii meatotino tatou te tausia? O le a lo tatou tiutetauave i le avea ai ma e e tausia mea a le Atua? E tusa ai ma le saunoaga a Peresitene Iaga, o le a la tatou “pisinisi po o le galuega faatulafonoina” e tusa ai ma sefuluai ma le faapaiaga? E mafai faapefea ona tutusa le sese o le taumafai ia ova atu mea e faia ma le itiiti naua?
O a mea e tatau ona tatou faapaiaina pe tuuina atu pe a tatou faamoemoe e maua uma mea ua i ai i le Atua? Aisea? (Vaai foi MFF 84:38.) O a ni auala patino e mafai ai ona e faapaiaina mea uma ua e maua mo lo tatou Tama oi le Lagi? E faamanuiaina ai faapefea oe i lenei mea, o lou aiga, o isi tagata o le Ekalesia, ma isi tou te fegalegaleai?

Salt Lake City tithing store — O le Fale Teuoloa o Sefuluai i le Aai o Sate Leki i le 1860. Na aoao mai e Peresitene Iaga, o le tulafono o le sefuluai “o se tulafono e faavavau na faia e le Atua mo le manuia o le aiga o tagata, mo lo latou faaolataga ma le faaeaga” (DBY, 177).