Potutusi
O Le Toefuataiga o le Perisitua

“Toefuataiga o le Perisitua,” Autu ma Fesili (2023)

faamanuiaina o le faamanatuga

Taiala mo le Suesueina o le Talalelei

Toefuataiga o le Perisitua

Ua tuuina mai e le Atua le pule e galue ai i Lona suafa

Mafaufau pe o le a se eseesega o le a i ai lou olaga pe ana le toefuataiina e le Atua le pule o le perisitua e osia ai feagaiga, sauniga, ma le tele o isi meaalofa paia o loo avanoa mo oe ma e pele ia te oe. O se vaega taua o le talalelei a Iesu Keriso o le savali lea ona e alofa le Atua i Ana fanau, ua Ia faaee atu ai le mana ma le pule o le perisitua i luga o Ana auauna i le Ekalesia. O le perisitua e aofia ai le pule e talai atu ai le talalelei a Iesu Keriso ma faataunuu ai le galuega a le Atua o le faaolataga ma le faaeaga. E faitau miliona i aso nei ua faamanuiaina i feagaiga paia, sauniga, ma isi faamanuiaga ua tuuina mai e ala i le pule ma le mana o le perisitua a le Atua.

Ua faamanuiaina e le perisitua a le Atua Ana fanau i le talafaasolopito atoa o le lalolagi. Ina ua mavae le maliliu o Aposetolo a Keriso i taimi o le Feagaiga Fou, sa leiloa le pule e galue ai i le suafa o le Atua. Mulimuli ane, i le 1800, na o mai ai avefeau faalelagi ma faaee mai le pule o le perisitua ma ki o le perisitua i luga o Iosefa Samita ma Oliva Kaotui. O lenei toefuataiga o le mana o le Atua o se vaega taua o le Toefuataiga atoa o le talalelei a Iesu Keriso ma Lana Ekalesia. O le pule ma ki o le perisitua o loo tumau pea i le Ekalesia i aso nei.

O Le A le Toefuataiga o le Perisitua?

O le perisitua o le mana ma le pule e galue ai i le suafa o le Atua. O lenei pule paia e mafai ai e fanau a le Atua ona maua sauniga ma feagaiga ia e taua mo le faaolataga ma le faaeaga. O lena perisitua na leiloa ina ua maliliu Aposetolo a le Alii i taimi o le Feagaiga Fou. I le amataga o le 1800, na toefuatai mai ai le perisitua e avefeau faalelagi i le lalolagi e ala i le faaeeina mai i luga o Iosefa Samita ma Oliva Kaotui.

Vaaiga aoao i autu: Toefuataiga o le Ekalesia

O taiala fesootai mo le suesueina o le talalelei: Toefuataiga o le Talalelei, Iosefa Samita, Perisitua Arona, Perisitua Mekisateko, Ki o le Perisitua, Faamanuiaga o le Perisitua, Feagaiga ma Sauniga

Vaega 1

Ua Faasoa Mai e le Atua Lona Mana o le Perisitua e Faamanuia ai Ana Fanau

tagata o loo savavali atu i le malumalu

Na tuuina mai e le Atua le mana o le perisitua i Ana auauna talu mai le amataga (tagai Mose 6:7). O peteriaka anamua o Atamu, Noa, Aperaamo, Mose, ma le anoanoai o isi na umia le perisitua mo le faamoemoega o le faamanuiaina o fanau a le Atua. E ala i le perisitua, na faatagaina ai e le Atua Lona nuu e faasoa atu le savali o le talalelei ma faatino ia sauniga paia o se vaega o la latou tapuaiga. Soo se taimi lava e valaauina ai e le Atua ia perofeta, na Ia taitaia i latou e ala i faaaliga faalelagi ma tuu atu ia i latou le mana ma le pule o le perisitua.

I le asō, o tagata uma O Le Ekalesia a Iesu Keriso o le Au Paia o Aso e Gata Ai ua maua le avanoa e maua ai faamanuiaga e o faatasi ma le perisitua a le Atua. E ala i le perisitua, e mafai ai ona tatou maua le papatisoga, faamauga ma le meaalofa o le Agaga Paia, o sauniga o le malumalu, ma le tele o isi mea. E ala i sauniga o le perisitua, “ua faaalia ai le mana o le faaleatua” (Mataupu Faavae ma Feagaiga 84:20), e saunia ai i tatou ia avea atili e faapei o lo tatou Tama Faalelagi ma Lona Alo, o Iesu Keriso.

Mea e mafaufau i ai

  • O le osia ma le tausia o feagaiga e o faatasi ma sauniga o le perisitua e fatuina ai se sootaga taua faaleagaga i le va o oe ma le Atua. Na aoao mai Elder DaleG. Renlund: “O le tausia o feagaiga na osia i vai o le papatisoga ma i malumalu e aumaia ai foi ia i tatou le malosiaga e tatalia ai tofotofoga ma lototiga o le olaga nei. … O aoaoga faavae e o faatasi ma nei feagaiga ua faafaigofie ai lo tatou ala ma aumaia ai ia i tatou le faamoemoe, mafanafana, ma le filemu.”1 O le a se mea o le a e faia e osia ai ma tausia feagaiga o loo avanoa mo oe e ala i le perisitua? E mafai faapefea ona e lagolagoina isi ma fesoasoani ia i latou ia osia feagaiga ma le Atua?

Gaoioiga mo le aoao faatasi ma isi

  • Valaaulia tagata o lau vaega e faitau le saunoaga lenei a Peresitene Russell M. Nelson:

    “Ona ua toefuatai mai le Perisitua Mekisateko, ua tofu maua uma ai e tamaitai ma alii tausi-feagaiga le avanoa i ‘faamanuiagauma faaleagaga o le ekalesia’ [Mataupu Faavae ma Feagaiga 107:18] pe, e mafai ona tatou faapea, i ‘oa faaleagaga uma ua i ai i le Alii mo Lana fanau.

    “O tamaitai uma ma alii uma e osia ni feagaiga ma le Atua ma tausia na feagaiga, ma o e auai ma le agavaa i sauniga o le perisitua, e mauaina le avanoa tuusao i le mana o le Atua. O i latou ua maua faaeega paia i le maota o le Alii ua mauaina se meaalofa o le mana o le perisitua a le Atua e tusa ma le paia o a latou feagaiga, faatasi ma se meaalofa o le poto e iloa ai le auala e utuvai ai mai lena mana.”2

    O a nisi o “oa faaleagaga” po o faamanuiaga ua e maua e ala i le mauaina o sauniga ma le osia ma tausia o feagaiga?

Aoao atili

Vaega 2

Na Toefuatai mai e Ioane le Papatiso Toetu le Perisitua Arona ia Iosefa Samita ma Oliva Kaotui

Ioane le Papatiso ua tuuina atu le Perisitua Arona ia Iosefa Samita ma Oliva Kaotui

Ua saunia e le Alii se auala faatulagaina lelei e faasafua atu ai le pule o Lana perisitua. E le mafai e tagata ona tauaveina lenei pule i o latou lava luga (tagai Eperu 5:4). Na o i latou ua umia le perisitua e mafai ona faauuina isi i le perisitua, ma e faatoa mafai ona latou faia pe a faatagaina e i latou o e ua umia ki mo lena faauuga (tagai i le Mataupu Faavae o le Faatuatua 1:5).

A o faaliliuina le Tusi a Mamona, sa tau atu Iosefa Samita ma Oliva Kaotui i fuaitau e uiga i le papatisoga. Sa i ai ni fesili a Iosefa ma Oliva e uiga i ai (tagai Iosefa Samita—Talafaasolopito 1:68) ma filifili ai e ole atu i le Alii. Sa la o atu i le togavao e tatalo, ma i le tali atu i le la tatalo, sa faaali atu Ioane le Papatiso ia i laua ma tuu atu ia i laua le pule o le perisitua e ala i le faaee atu o lima (tagai Mataupu Faavae ma Feagaiga 13). Sa ia faatonuina i laua e papatiso e le tasi le isi ma faauu e le tasi le isi i le perisitua (tagai Iosefa Samita—Talafaasolopito 1:68–72).

Mea e mafaufau i ai

  • Sa ia Iosefa Samita talavou ni fesili e uiga i aoaoga faalelotu o ona aso. Ina ia saili le taitaiga, sa ia liliu atu i le Atua i le tatalo ma sa asia ai e le Tama Faalelagi ma Iesu Keriso. Faitau le Talafaasolopito o Iosefa Samita 1:17–20. E faapefea ona fesoasoani lenei fuaitau ia te oe e malamalama atili ai pe aisea na manaomia ai le toefuataiga o le perisitua?

Gaoioiga mo le aoao faatasi ma isi

  • Faatasi ai ma tagata o lau vaega, matamata le vitio “Restoration of the Priesthood” (2:00), faalogologo mo faamanuiaga e oo mai i o tatou olaga ona o le toefuataiga o le Perisitua Arona. E mafai faapefea ona tatou maua atoatoa faamanuiaga o le Perisitua Arona i o tatou olaga?

Aoao atili

Vaega 3

Na Toefuatai Mai le Perisitua Mekisateko ia Iosefa Samita ma Oliva Kaotui e avefeau Faalelagi o Peteru, Iakopo, ma Ioane

Ua tuuina atu e Peteru, Iakopo, ma Ioane le perisitua Mekisateko ia Iosefa Samita

I totonu o se masina o le asiasiga mai ia Ioane le Papatiso, na o mai ai nisi avefeau faalelagi ia Iosefa Samita ma Oliva Kaotui. O le taimi lea, na faaee atu ai e Aposetolo o le Feagaiga Fou o Peteru, Iakopo, ma Ioane ia Iosefa ma Oliva le Perisitua Mekisateko ma ki o le malo o le Atua (tagai Mataupu Faavae ma Feagaiga 27:12–13; 128:20). A o tuuina atu e le Perisitua Arona ia Iosefa ma Oliva le pule e papatiso ai, sa tuuina atu e le Perisitua Mekisateko ia i laua le pule e pulefaamalumalu ai i le Ekalesia ma faatautaia sauniga uma e manaomia e maua ai le faaolataga ma le faaeaga.

Mulimuli ane, na tuuina atu ia Iosefa Samita ma isi taitai o le Ekalesia ni ki faaopoopo o le perisitua, po o le pule e vaavaaia ai ma taitai ni vaega patino o le Ekalesia ma lana misiona. I le Malumalu o Katelani, na tuuina atu ai e isi avefeau faalelagi—Mose, Elaia, ma Elia—ki o le faapotopotoina o Isaraelu, le tisipenisione o le talalelei a Aperaamo (lea e aofia ai le toefuataiga o le feagaiga faa-Aperaamo), ma ki o le mana o faamauga (tagai Mataupu Faavae ma Feagaiga 110:11–16).

Mea e mafaufau i ai

  • E mafai e i latou uma e umia le perisitua ona saili lana pule i tua i le mea paia na tupu o le toefuataiga o le perisitua. Na taua e Elder Jeffrey R. Holland: “E mafai e i tatou o loo i totonu o le Ekalesia toefuataiina a Iesu Keriso ona sailia ma mauaina le laina o le pule o le perisitua o loo faatinoina e le tiakono sili ona fou i totonu o le uarota, o le epikopo o loo pulefaamalumalu ia te ia, ma le perofeta o loo pulefaamalumalu ia i tatou uma lava. O lena laina e tau atu lava i tua i se laina e le motusia i agelu avefeau o e na o mai mai le Alo o le Atua lava Ia e tuuina mai lenei meaalofa e le mafaatusalia mai le lagi.”3 O le laina o le pule o le perisitua o se alii e mafai ona talosagaina mai le laumua o le Ekalesia.

Gaoioiga mo le aoao faatasi ma isi

  • Na faapefea ona e lagonaina le suia o lou olaga ina ua uma ona maua se sauniga faaleperisitua? Ao tou mafaufau ma isi o le vaega i lenei fesili, faitau lenei fuaitau mai le Iosefa Samita—Talafaasolopito 1:74: “Ona ua faapupulaina nei o maʼua mafaufau, sa amata ona tatala faataatitiaina tusitusiga paia i o maʼua malamalamaaga, ma faaali mai ia i maʼua i se ala sa lē mafai ona ma maua muamua, pe sa ma mafaufau i ai muamua, uiga moni ma faamoemoega o o latou mau sili ona lilo.

Aoao atili

O Isi Punaoa e uiga i le Toefuataiga o le Perisitua