Potutusi
Feagaiga ma Sauniga

“Feagaiga ma Sauniga,” Autu ma Fesili (2023)

o se tamaitai i luma o le malumalu

Taiala mo le Suesueina o le Talalelei

Feagaiga ma Sauniga

O feagaiga ma sauniga taua e fesoasoani ia i tatou i le ala i le faaeaga ma le ola e faavavau

Faatasi ai ma tekinolosi o aso nei, e mafai ona vave maua faatonuga auiliili ma faafanua e fesoasoani ia i tatou e oo atu ai i soo se mea tatou te mananao e o i ai. O le talalelei toefuataiina a Iesu Keriso o la tatou faafanua ma faatonuga auiliili ia maua ai le uiga i lenei olaga faapea foi le ola e faavavau i le lalolagi a sau. Pe a tatou filifili e mulimuli ia Keriso ma ola i le talalelei, ua ofoina mai e le Atua ia i tatou feagaiga paia ma sauniga o le faaolataga ma le faaeaga, lea e fesootai ai i tatou ia te Ia ma taitai atu ai i tatou i luga o le ala e tau atu i le ola e faavavau.

O A Feagaiga ma Sauniga?

O sauniga o ni faatinoga paia, ma aloaia e faia e ala i le pule o le perisitua. E tele taimi e fesootai ai sauniga i feagaiga patino, po o folafolaga paia i le va o le Atua ma Ana fanau. A tatou osia feagaiga ma maua sauniga, tatou te alualu i luma i la tatou malaga faaleagaga e toe foi atu ai i le Atua. O sauniga e taua mo le faaolataga ma le faaeaga e aofia ai le papatisoga, faamauga ma le mauaina o le meaalofa o le Agaga Paia, faauuga i le Perisitua Mekisateko mo alii, faaeega paia o le malumalu, ma le faamauga i le malumalu i se toalua. O tamaiti e maliliu a o lei atoa le valu tausaga e le manaomia ni sauniga ina ia faasaoina ai i le malo selesitila (tagai i le Mataupu Faavae ma Feagaiga 137:10).

Vaaiga aoao i autu: Feagaiga ma Sauniga

Taiala fesootai mo le suesueina o le talalelei: Papatisoga, Meaalofa o le Agaga Paia, Perisitua Mekisateko, Faaeega Paia, Faamauga, Avea faapei o Iesu Keriso, Sauniga Sui mo e ua Maliliu

Vaega 1

O Le Ala o Feagaiga O Le A Taitai Atu ai Oe i le Ola e Faavavau

ulugalii i luma o le malumalu

Afai e te vaai faalemafaufau i lou olaga o se malaga toe foi atu i le Atua, o le osia o feagaiga ma le mauaina o sauniga e pei lava o le mulimuli i pou taiala i luga o le ala e tau atu i le ola e faavavau (tagai Mataupu Faavae ma Feagaiga 14:7). O laasaga autu nei i au taumafaiga e sau ia Iesu Keriso, o lana fesoasoani e te manaomia e alualu ai i luma i luga o le ala (tagai i le 2 Nifae 9:41). I le Ekalesia, o nisi taimi tatou te faasino ai i lenei mea o le “ala o feagaiga,” o se faatusa lea mo le ola ai i le talalelei a Iesu Keriso. O le maimoaina o le talalelei o se ala ua faamamafaina ai le taua o le osia ma le tausia o feagaiga ma le mauaina o sauniga a o tatou agai atu i luma i le ola e faavavau faatasi ma le Tama Faalelagi ma Iesu Keriso.

O le tumau ai i le ala o feagaiga o le a e maua ai le saogalemu, filemu, ma le olioli tumau. O le a e maua ai le malosi i taimi faigata. Na aoao mai Peresitene Russell M. Nelson, “I tagata taitoatasi o le Ekalesia ou te faapea atu nei, tumau i le ala o le feagaiga. O lo outou tuuto e mulimuli i le Faaola e ala i le osia o feagaiga ma Ia ona tausia lea o na feagaiga, o le a matala ai le faitotoa i faamanuiaga uma faaleagaga ma avanoa e maua e alii, tamaitai, ma fanau i soo se mea.” 1

Mea e mafaufau i ai

  • Sa valaaulia e le Faaola toetu ia tagata sa faapotopoto i le malumalu i Nuumau e o mai ia te Ia (tagai i le 3 Nifae 11:14–17). Matamata le vitio “Covenants and Ordinances” (1:37), faalogologo i mea ua aoao mai e Elder David A. Bednar e uiga i le ala e fesoasoani ai feagaiga ma sauniga ia i tatou e o mai ia Iesu Keriso. O a faamanuiaga e oo mai ia i latou o e osia ma le agavaa feagaiga ma le Atua ma maua Ana sauniga?

  • Sa tusifaamaumauina e le perofeta o Liae se miti lea na ia vaaia ai se ala e tau atu i le laau o le ola. Faitau le 1 Nifae 8:19–24, 30. O le a se mea e mafai ona tatou aoao mai i lenei fuaitau e uiga i le taua o le tumau ai i luga o le ala o feagaiga? O a ni taumafaiga ua e faia i lou olaga e tumau ai i luga o le ala o feagaiga? E mafai faapefea e le salamo ona fesoasoani ia te oe e tumau ai i le totonugalemu o le ala a le Atua?

Gaoioiga mo le aoao faatasi ma isi

  • E ala i le meaalofa o le Agaga Paia, e mafai ai e tagata e osia feagaiga ona maua le fesoasoani faalelagi e avea ai ma e tausi feagaiga. Matamata “Le Ala o Feagaiga” (2:30). Talanoa e uiga i auala e tausia ai feagaiga e pei ona faamamafa mai e Elder D. Todd Christofferson i lenei vitio. O a nisi o faamanuiaga o le faaauau ai i le ala o feagaiga?

  • Mafaufau e fai i tagata o lau vaega e suesue le tusiga “Aisea e Taua ai Sauniga ma Feagaiga.” Valaaulia tagata o le vaega e faailoa mai le matafaioi taua o loo faia e le maota o le Alii i a tatou taumafaiga e tulitulimatagau ma tumau ai i luga o le ala o feagaiga.

Aoao atili

Vaega 2

Ua Valaaulia Oe e le Atua e Fusia Oe Lava ia Iesu Keriso e ala i Feagaiga

tamaitiiti talavou o loo uuina se ata

O le osia ma le tausia o feagaiga paia e fusia ai oe i le Alii o Iesu Keriso (tagai Mataupu Faavae ma Feagaiga 35:24). Ua aoao mai Peresitene Russell M. Nelson: “o le ulu atu i se sootaga faalefeagaiga ma le Atua e noatia ai i tatou ia te Ia i se auala e faia ai mea uma e uiga i le olaga ia faigofie atu. Faamolemole ‘aua ne’i malamalama sese ia te a’u: Ou te le’i fai atu o le osia o feagaiga e faigofieai le olaga. … Ae o lou mulimuli o oe lava ia i le Faaola o lona uiga e te mauaina Lona mana faamalosiau ma togiola.”2

O mea uma i le talalelei a Iesu Keriso ua mamanuina e saunia ai oe e mulimuli ia te Ia ma avea atili e faapei o Ia. Na saunoa Elder David A. Bednar, “O feagaiga ma sauniga o poloka faufale ia e mafai ai e i tatou ona fausia o tatou olaga i luga o le ‘papa o lo tatou Togiola’ [Helamana 5:12] ma Lana Togiola.”3 A e saili e tumau e oo i le iuga e ala i le tausia o au feagaiga, o le a e olioli i le faaolataga ma le togiola na ofoina mai e Iesu Keriso (tagai Ominae 1:26).

Mea e mafaufau i ai

  • E ui ina eseese sauniga tatou te maua, ae e tofu uma lava i latou ma se mea e tasi e tutusa ai—e fesoasoani ia i tatou e faalatalata atili atu ai ia Iesu Keriso ma maua ai le avanoa i Lona mana. O nisi o sauniga o le perisitua i le Ekalesia e fesoasoani ia i tatou e faalatalata atili atu ai ia Iesu Keriso ae e le taua i le faaolataga ma le ola e faavavau (e pei o le faaigoaina ma le faamanuiaina o fanau, faapaiaina o le suauu, po o le faapaiaina o tuugamau).

    O isi sauniga e manaomia mo lo tatou faaolataga ma le faaeaga (papatisoga, faamauga ma le mauaina o le meaalofa o le Agaga Paia, faauuga i le Perisitua Mekisateko mo alii, faaeega paia o le malumalu, ma le faamauga i le malumalu i se toalua). E mafai faapefea e le aoao e uiga i nei sauniga taua ma feagaiga e o faatasi ai ona fesoasoani ia te oe e fua lou alualu i luma i luga o le ala o feagaiga?

Gaoioiga mo le aoao faatasi ma isi

  • O le perofeta o le Feagaiga Tuai o Aperaamo o se faataitaiga o se tasi sa faamaoni i le osia ma le tausia o feagaiga ma le Atua. Matamata le vitio “Elder Nelson Talks about Covenants” (4:45), faalogologo mo faamanuiaga na folafola atu e le Atua ia Aperaamo. O fea o nei faamanuiaga folafolaina o loo avanoa mo tagata o le Ekalesia i aso nei? E faapefea ona fesoasoani nei faamanuiaga o le feagaiga tatou te malamalama atili ai i le fuafuaga alofa a le Tama Faalelagi mo Ana fanau?

Aoao atili