A’o Tatou Agai Faatasi Atu i Luma

Saunia e Peresitene Russell M. Nelson

Uso e ma tuafafine, ua faamamaluina a’u e faatasi ai ma outou i lenei taeao. O le fa aso ua mavae sa tatou falelauasiina ai se tamalii maoae tele, o se perofeta a le Atua—Peresitene Thomas S. Monson. E le lava upu e faamatala ai le tulaga ma le mamalu o lona soifuaga. O le a ou faatauaina pea e faavavau le ma faauooga ma le lotofaafetai mo mea na ia aoaoina mai ia te a’u. Ua tatau nei loa ona tatou taulai atu i luma i le lumanai ma le faatuatua atoatoa i lo tatou Alii o Iesu Kerisi, o Lana Ekalesia lenei.

O le lua aso ua mavae sa feiloai faatasi ai Aposetolo soifua uma i le potu i luga o le Malumalu o Sate Leki. O iina na latou faia ai se faaiuga autasi, muamua, ina ia toefaatulaga le Au Peresitene Sili i le taimi nei ma le, lona lua, ia ou auauna atu o se Peresitene o le Ekalesia. Ua le lava upu e faamatala atu ai ia te outou le lagona o le i ai o O’u Uso—le Usoga o e umia uma ki o le perisitua e ala mai i le Perofeta o Iosefa Samita i lenei tisipenisione—faaee o latou aao i luga o lo’u ulu e faauu ma vaetofia a’u e avea ma Peresitene o le Ekalesia. O se aafiaga paia ma le lotomaualalo.

Ona avea lea ma o’u tiutetauave ia iloatino po o ai ua saunia e le Alii e avea ma o’u fesoasoani. E faapefea ona ou filifili na o le toalua mai isi Aposetolo e Toasefululua, o e ou te matuai alofa faapelepele ia i latou taitoatasi? Ou te matuai faafetai lava i le Alii mo le taliina o a’u tatalo faatauanau. Ou te faafetai tele ia Peresitene Dallin Harris Oaks ma Peresitene Henry Bennion Eyring i le naunau e galulue faatasi ma a’u o ni Fesoasoani Muamua ma le Lua. O Peresitene Dieter F. Uchtdorf ua toe foi atu i lona nofoaga i le Korama a Aposetolo e Toasefululua. Ua uma ona ia mauaina ni valaauga tetele lea ua matua tulagaese lona agavaa ai.

Ou te faamalo atu ia te ia ma Peresitene Erying mo le la auaunaga maoae o ni fesoasoani ia Peresitene Monson. Sa matua gafatia, tuuto, ma musuia i laua. Tatou te matuai faafetai tele ia i laua. Ua naunau i laua taitoatasi e auauna atu i le taimi nei i le mea ua matua manaomia ai o ia.

I le avea ai ma Aposetolo lona lua i le tulaga sinia, ua avea ai foi Peresitene Oaks ma Peresitene o le Korama a Aposetolo e Toasefululua. Ae peitai, ona o lona valaauga i le Au Peresitene Sili ma ina ia ogatusa ma le faatulagaga o le Ekalesia, o le a auauna atu ai nei Peresitene M. Russell Ballard, e sosoo i le tulaga sinia, ma Sui Peresitene o lena korama. O le a galulue soosootauau le Au Peresitene Sili ma le Toasefululua ia iloatino le finagalo o le Alii ma tulei i luma Lana galuega paia.

Matou te faafetai mo a outou talosaga. Ua ofoina atu e le lalolagi atoa mo i matou. I le taeao na sosoo ai ma le tuumalo o Peresitene Monson, na tuuina atu ai sea ituaiga tatalo e se tamaitiiti e fa tausaga e igoa ia Benson. Ou te siiina mai se vaega mai le tusi a lona tina i lo’u toalua, o Wendy. Na tatalo Benson, “Tama Faalelagi, faafetai ua mafai nei ona toe vaai Peresitene Thomas S. Monson i lona toalua. Faafetai mo le matou perofeta fou. Fesoasoani ia te ia ia lototoa ma aua nei fefe ona e fou o ia. Fesoasoani ia te ia ia tuputupu ae ma ia ola maloloina ma malosi. Fesoasoani ia te ia ia maua le mana ona e ia te ia le perisitua. Ma fesoasoani ia i matou ina ia agalelei pea.”

Ou te faafetai i le Atua mo fanau e pei o lenei tamaitiiti ma mo matua o e matua popole i le latou tuuto atu ina ia amiotonu ma faamoemoeina i le tulaga faamatua—mo matua uma, faiaoga, ma tagata o le ekalesia o e tauaveina ni avega mamafa ae o loo auauna atu ma le naunautai. I se isi faaupuga, mo outou taitoatasi, ou te matuai faafetai atu ai lava.

O loo tu le Alii i le Foe.

A o tatou agai faatasi i luma, ou te valaaulia outou ina ia mafaufau e uiga i le auala faamamaluina lea na pulea ai e le Alii Lana Ekalesia. A tuumalo se Peresitene o le Ekalesia, e leai se tulaga faalilolilo po o ai o le a sosoo e valaauina e auauna atu i lena tofiga. E leai ni palota, leai ni faatosinaga, ae ua nao galuega filemu o se fuafuaga paia o le faasologa, ua faatulagaina e le Alii Lava Ia.

O aso taitasi o le auaunaga a se Aposetolo o se aso lea o le aoaoina ma le sauniuniga mo nisi tiutetauave i le lumanai. E manaomia ai le tele o tausaga o le auaunaga mo se Aposetolo e siitia ai mai le nofoa laitiiti i le nofoa sinia i le li’o. I lena taimi, na ia maua ai se aafiaga patino i vaega taitasi o le galuega a le Ekalesia. Na amata foi ona ia masani lelei i tagata o le lalolagi, e aofia ai ma o latou talafaasolopito, aganuu, gagana a o aveina atu soo o ia e tofiga i le salafa o le kelope. O lenei faiga o le faagasologa i le taitaiga o le Ekalesia e tulagaese. Ou te leiloa lava se isi mea faapenei. E le tatau ona tatou tetei ai i lena mea, ona o le Ekalesia lenei a le Alii. E le galue o Ia e tusa ma auala a tagata.

Ua ou galue i le Korama a le Toasefululua i lalo o Peresitene e toalima ua mavae o le Ekalesia. Na ou vaai i Peresitene taitasi o mauaina se faaaliga ma tali atu i lena faaaliga. E i ai pea le Alii i taimi uma ma o le a aoao ma uunaia i taimi uma Ana perofeta. O loo tu le Alii i le Foe. O i tatou o e ua faauuina ina ia molimau atu e uiga i Lona suafa paia i le lalolagi atoa o le a faaauau pea ona saili ia iloa Lona finagalo ma mulimuli i ai.

Tumau i le Ala o le Feagaiga

O lenei, i tagata taitoatasi o le Ekalesia ou te faapea atu, tumau i le ala o le feagaiga. O lo outou tuuto e mulimuli i le Faaola e ala i le osia o feagaiga ma Ia ona tausia lea o na feagaiga, o le a matala ai le faitotoa i faamanuiaga uma faaleagaga ma avanoa e maua e alii, tamaitai, ma fanau i soo se mea.

I le avea ai ma se au peresitene fou, matou te fia amata ma le faatasi ai o le taunuuga i le mafaufau. Mo lenei mafuaaga, ua matou talanoa atu ai ia te outou i le asō mai se malumalu. I le taunuuga lea tatou te tauivi uma i ai ina ia faaeeina i le mana i totonu o se maota o le Alii, faamauina o ni aiga, faamaoni i feagaiga e osia i totonu o se malumalu lea e agavaa ai i tatou mo le meaalofa silisili a le Atua—le ola e faavavau. O sauniga o le malumalu ma feagaiga tou te faia iina o le ki lea i le faamalosia o lou olaga, lau faaipoipoga ma le aiga, ma lou tomai e tetee atu ai i osofaiga a le fili. O lou tapuai ai i totonu o le malumalu ma lau auaunaga iina mo ou tuaa o le a faamanuiaina ai oe i le faateleina o faaaliga faaletagata lava ia ma le filemu, ma o le a faamalosia ai lou tuuto e tumau i luga o le ala o le feagaiga.

Ia, afai la ua e laa ese mai le ala, ou te fia valaaulia oe ma le faamoemoe atoa i lo’u loto ina ia faamolemole toe foi mai. Po o a lava ou atugaluga, po o a lava ou luitau, o loo i ai se faamoemoega mo oe i lenei, le Ekalesia a le Alii. O le a faamanuiaina oe ma augatupulaga e lei faananau mai e ala ia outou galuega i le taimi nei ina ia toe foi mai i le ala o le feagaiga. E pele i lo tatou Tama o i le Lagi Lana fanau, ma e finagalo o Ia mo i tatou taitoatasi ina ia toe foi atu ia te Ia i le aiga. E i ai se sini maoae a Le Ekalesia a Iesu Keriso o le Au Paia o Aso e Gata Ai—ina ia fesoasoani ia i tatou taitoatasi ia toe foi mai i le aiga.

Ou te fia faailoa atu lo’u alofa tele mo outou—alofa ua tuputupu ae i le aluga o tausaga o le feiloai ai ma outou, tapuai faatasi ma outou, ma auauna atu ia te outou. O la tatou tiute paia o le o atu i atunuu uma, ituaiga, gagana, ma tagata, e fesoasoani e saunia le lalolagi mo le Afio Mai Faalua o le Alii. O le a tatou faia lenei mea ma le faatuatua i le Alii o Iesu Keriso; ma le iloaina o loo pule o Ia. O Lana galuega ma Lana Ekalesia lenei. O i tatou o Ana auauna.

Ou te tautino atu lo’u tuuto i le Atua lo tatou Tama Faavavau ma i Lona Alo, o Iesu Keriso. Ou te iloaina i La’ua, alofa ia i La’ua, ma tautino atu e auauna atu ia i La’ua—faapea ma outou—faatasi ai ma le manava uma o loo totoe o lou ola. I le suafa paia o Iesu Keriso, amene.