“Oso i le Vaitafe!”

Elvin Jerome Laceda

Pampanga, Filipaina

I se tasi aso sa fai mai ai lo’u tinamatua ou te alu e ave se meaai sa ia saunia i le uso o lo’u tina. O se aoauli vevela o le Aso Toonai, ma sa tele isi mea sa ou manao e fai nai lo lo’u alu i se feau a lo’u tinamatua. Sa ou fai atu ia te ia e tuli i ai se tasi o o’u tausoga, ae sa fai mai lava e tatau ona ou alu.

Sa mavae se itula, ma sa amata ona ou lagonaina e tatau ona ou alu e fai le mea sa fai mai ai lo’u tinamatua. Sa ou tago i le meaai ma ou savali agai atu loa i le fale o le uso o lo’u tina. Sa fai si mamao, ma ina ua ou taunuu, ou te lei fuafua ou te nofo umi.

Sa ou maua atu le uso o lo’u tina ma lana pepe e lima masina le matua o i luga o se moega upega sa nonoa i ni tama’i mago se lua. Sa i autafa o laau (mago) se vaitafe e tafe i tua o le fale. Sa ou savalivali atu i ai e ave le meaai. Sa faafuasei, ona motusi maea o le moega upega. Sa taavavale atu le uso o lo’u tina ma lana pepe i le vaitafe. Sa oo mai le fefe ia te au. Sa ou le iloa aau, ma sa leai se isi na latalata mai e fesoasoani mai. Sa ou le iloa po o le a le mea a fai.

O le taimi lava lea, sa ou faalogoina ai le leo o le Agaga: “Puna i totonu!”

E aunoa ma se isi manatu, sa ou puna loa. O le mea e laki ai, sa ou maua le pepe i ni nai sekone, ma sa mafai ona alu ese mai le uso o lo’u tina mai le vai. A o ou alu ese mai le vai ma le pepe, sa le mafai ona ou talitonu i le mea lea na faatoa tupu. Sa ou puna i totonu o se vaitafe ae ou te le iloa aau, ae talu ai sa ou faalogo i le Agaga, o lea sa ou faasaoina ai si o’u tausoga pepe mai le malemo.

Sa ou iloa ai le taua o le iloaina ma le faalogo i le taitaiga ma musumusuga e tuuina mai ia te i tatou e le Atua e ala mai i le Agaga Paia. Ou te faafetai ona sa iu ina ou faia le mea sa fai mai ai lo’u tinamatua e ave le meaai i le fale o le uso o lo’u tina. Ou te iloa e tatau lava ona tatou faia taumafaiga ina ia nofouta ai i uunaiga faaleagaga ina ia mafai ai ona avea i tatou ma aao o le Atua e fesoasoani ai i Ana fanau.