I Lona soifuaga atoa i le olaga nei, sa tele malaga sa faia e le Faaola—O Lana malaga mai Peteleema agai atu i Aikupito a o tamameamea, o Lana malaga e 40-aso i le vao, o Ana mau malaga i aai, ma faoa aai, ma fale e aoao atu ai, faamalolo, ma faamanuia i le taimi o Lana auaunaga, ma le tele o isi mea. Ae e i ai le malaga e tasi na tatau i le Faaola ona ia faia na o Ia, ma o se malaga sa na o Ia e mafai ona onosaia.
“I le Aso Sa o le Eseta tatou te faamanatu ai le mea aupito loa–ona tatalia ma le mamalu na tupu i le talafaasolopito o le lalolagi.”
“O le aso na suia ai mea uma.
“O lena aso na suia ai lo’u olaga.
“Na suia ai lou olaga.
“Na suia ai le taunuuga o fanau uma a le Atua.”
Peresitene Dieter F. Uchtdorf, Fesoasoani Lua i le Au Peresitene Sili, “O Le Meaalofa o le Alofa Tunoa,” Liahona, Me 2015, 108.
Puapuagatia e le Mafaatusalia
Lo’u Tama e, saunia e Simon Dewey
“E leai se tagata ola e mafai ona tāēa le taua atoatoa o le mea na faia e Keriso i Ketesemane.”
“Ua tatou iloa sa puna mai le afutoto i puninii uma o Lona tino a o Ia inuina ‘alu o lena ipu oona na tuuina atu e Lona Tama ia te Ia.”
“Ua tatou iloa sa puapuagatia o Ia, i le tino ma le agaga, e sili atu nai lo mea e mafai ona tigaina ai le tagata, sei vagana ai e oo i le oti.”
“Ua tatou iloa i se isi itu, e le mafai ona tatou malamalama i ai, o Ona puapuaga na faamalieina ai manaoga o le faamasinoga tonu, faasaolotoina ai tagata salamo mai tiga ma faasalaga o le agasala, ma mafai ai ona maua le alofa mutimutivale e i latou o e talitonu i Lona suafa paia.”
“Ua tatou iloa sa faō o Ia i luga o le eleele ona o tiga ma mafatiaga o se avega e le mafuatia lea na mafua ai ona gatete o Ia ma na toetoe a le mafai ona Ia inuina le ipu oona.”
Elder Bruce R. McConkie (1915–85) o le Korama a Aposetolo e Toasefululua, “O le Mana Faamamaina o Ketesemane,” Ensign, Me 1985, 9.
Faaaogaaga e le Tagata Lava Ia: E ui atonu tatou te le iloaina i taimi uma, ae na mafatia le Faaola i soo se ituaiga o tiga i le taimi o le Togiola. Ua malamalama o Ia i tiga faaletino uma, mai se ponaivi ua gau i le ma’i ogaoga aupito matuia. Sa Ia lagonaina le pogisa ma le leai o se faamoemoe o ma’i faalemafaufau e pei o le lotofati, atuatuvale, o mea ua fai ma vaisu, tuulafoaiina, ma le faanoanoa. Ma sa Ia lagonaina manu’aga uma faaleagaga aua sa Ia tauaveina i ona Lava luga agasala uma a tagata.
Na aoao mai Elder David A. Bednar o le Korama a Aposetolo e Toasefululua, “I se taimi o le vaivai atonu tatou te alalaga, ‘E leai se tasi na te iloa pe faapei. E leai se tasi e malamalama i ai.’ Ae e silafia lelei ma malamalama foi i ai le Alo o le Atua, aua sa Ia lagonaina ma tauaveina a tatou avega mamafa taitasi” (“Tauave ma le Faigofie a Latou Avega,” Liahona, Me 2014, 90).
Sa Na o Ia Lava e Mafaia
Solo agai i Kalevaria, saunia e Bernardo Cavallino, Chrysler Museum of Art
“O le mea sa Ia faia sa na o le Atua lava e mafai ona faia. I le avea ai ma Alo Pele e Toatasi o le Tama i le tino, sa maua ai Iesu uiga auaumama paia. Sa na o Ia le tagata ua fanau mai i le tino e mafai ona faatinoina lenei aga e sili ona taua ma silisiliese. Ile na o le pau lea o le Tagata sa soifua i le lalolagi e leai se agasala, o lea sa le mafai ai ona oo ia te ia le oti faaleagaga. Ona o Lona tulaga faaleatua, sa ia te Ia foi le mana e pulea ai le oti faaletino. O lea na Ia faia ai mo i tatou le mea sa le mafai ona tatou faia mo i tatou lava. Sa Ia motusiaina le uumau malulu o le oti. Sa Ia faia foi ia mafai e i tatou ona maua le mafanafana maoae toafilemu o le meaalofa a le Agaga Paia.”
Peresitene James E. Faust (1920–2007), Fesoasoani Lua i le Au Peresitene Sili, “O Le Togiola: O Lo Tatou Faamoemoega Sili,” Liahona, Ian. 2002, 20
Faaaogaaga e le Tagata Lava Ia: E ala i Lana Togiola, sa motusia ai e le Faaola noataga o le oti ma togiolaina ai i tatou uma mai a tatou agasala ina ia mafai ai e tagata taitoatasi uma ona maua le ola e faavavau. Sa na o Ia e mafai ona faataunuuina sea galuega taufaafefe ma le faigata. Pe a tatou feagai ma luitau ogaoga, e mafai ona tatou maua le mafanafana i le iloa, e mafai moni e le Faaola ona faia ia mafai mea e le mafai ona fai.
E Le’i Solomuli o Ia
O Le Tanuga, saunia e Carl Heinrich Bloch
“I luga o se maupuepue e igoa o Kalevaria, a o vaavaai atu soo ua leai se faamoemoe, sa tu’itu’i ai Lona tino ua manu’a i se satauro. Sa tauemuina o Ia ma le le alofa ma sa fetuuina ma amusia. …
“Na mavae atu itula o le mafatiaga a o taulalata atu i Lona maliu. Mai i Ona laugutu ua matutu na tulei mai ai upu, ‘Lo’u Tama e, ou te tuuina atu lo’u nei agaga i ou aao: ua na fetalai ia upu, ona to ai lea o lana manava.’ …
“I le taimi mulimuli semanu lava e mafai e le Alii ona toe solomuli. Ae sa le’i foi o Ia. Sa Ia oo atu i le taele o mea uma ina ia mafai ai ona Ia faasaoina mea uma. Sa vave ona tuuina ifo ma le faaeteete lona tino maliu i se tuugamau nono.”
Peresitene Thomas S. Monson (1927–2018), “Ua Toetu o Ia!” Liahona, Me 2010, 89.
Faaaogaaga e le Tagata Lava Ia: Na puapuagatia o Ia mai tiga ogaoga, tuulafoaiina, ma le leai o se faamoemoe, peitai na onosaia pea lava e le Faaola ma faamaea ma le alofa tunoa Lana malaga i le tino nei—ae na ole atu lava i le Tama e faamagalo i latou o e na faasatauroina o Ia. Ona o Lana faataitaiga atoatoa, e mafai ai ona tatou faafetaiaia ma le alofa tunoa o tatou lava tofotofoga ma faigata, ma faatasi ai ma Lana fesoasoani e mafai ai foi ona tatou onosai e oo i le iuga.
O Molimau e Toatele o Lona Toetu
Funa e, Se a Le Mea E Te Tagi Ai? saunia e Mark R. Pugh
“Ou te talitonu i le toatele o molimau i le Toetu o le Faaola o loo maua o latou aafiaga ma molimau i le Feagaiga Fou—o Peteru ma ana soa o le Toasefululua ma le pele, mama a’ia’i o Maria le Makatala, faatasi ai ma isi. Ou te talitonu i molimau o loo maua i le Tusi a Mamona—o Nifae le Aposetolo ma le motu o tagata e lemailoa i le laueleele o Nuumau, faatasi ai ma isi. Ma ou te talitonu i le molimau a Iosefa Samita ma Sini Rikitone o e, i le mavae ai o le tele o isi molimau na folafola mai ai le molimau sili o lenei tisipenisione mulimuli, ‘o loo soifua o ia! Aua sa ma vaai ia te ia.’ I lalo o le vaaiga a Ona fofoga e silafia mea uma, ou te tu atu ai o se molimau, o Iesu le Nasareta o le Togiola toetu, ma ou te molimau atu i mea uma o mulimuli mai e uiga i le moni o Lona Toetu. Talosia ia outou maua le talitonuga maumaututu ma le mafanafana o lena lava molimau e tasi.”
Elder D. Todd Christofferson o le Korama a Aposetolo e Toasefululua, “O Le Toetu a Iesu Keriso,” Liahona, Me 2014, 114.
Faaaogaaga e le Tagata Lava Ia: E ui tatou te le i ai ma i latou na vaai i le tino toetu ma le atoatoa o le Faaola, ae e mafai lava ona tatou tutu atu o ni molimau ia te Ia i le taimi nei. E mafai ona avea o Ia ma taulaiga o o tatou olaga e le aunoa, tusa lava po o le a le taimi po o le nofoaga tatou te i ai. O taimi taitasi tatou te ofo atu ai o tatou loto ma lima e auauna atu ai i isi, faaali atu le agamalu, agalelei, ma le faaaloalo i tagata uma; puipuia le upumoni; ma faasoa atu a tatou molimau o le talalelei, tatou te tutu atu o ni molimau faamaoni a Iesu Keriso.
Tatou Te Le Tau Savavali Na o i Tatou
Faamatalaga mai le Walk with Me, saunia e Greg Olsen, e le mafai ona kopiina
“O se tasi o faamafanafanaga sili o lenei vaitau o le Eseta o le, ona sa savalia e Iesu se ala umi ma le pagatia mafatia na o ia lava, tatou te tau le faia ai lena mea. O Lana malaga toatasi na aumaia ai se ‘au toatele mo la tatou vaega itiiti o lena ala—o le tausiga alofa mutimutivale a lo tatou Tama i le Lagi, le mafutaga e le uma a lenei Alo Pele, o le meaalofa atoatoa o le Agaga Paia, o agelu i le lagi, o tagata o aiga i itu uma o le veli, perofeta ma aposetolo, faiaoga, taitai, ma uo. O nei mea uma ma le tele o isi ua tuuina mai e fai ma a tatou soa i la tatou malaga i le tino nei ona o le Togiola a Iesu Keriso ma le Toefuataiga o Lana talalelei. Ua alagaina mai i le tumutumu o Kalevaria le upumoni e faapea, o le a le tuua lava na o i tatou e aunoa ma se fesoasoani, e ui o nisi taimi tatou ono lagonaina ai ua [tuuaunoa] i tatou. …
“… Talosia ia tatou tutu i autafa o Iesu Keriso ‘i taimi uma ma i mea uma, ma i nofoaga uma [tatou] e i ai, e oo lava i le oti,’ aua e moni lava o le ala lea sa Ia tu ai i o tatou autafa ina ua oo i le oti ma ina ua tu na o Ia lava.”
Elder Jeffrey R. Holland o le Korama a Aposetolo e Toasefululua, “Sa Leai Se Tasi na I Ai Faatasi ma Ia,” Liahona, Me 2009, 86.
Faaaogaaga e le Tagata Lava Ia: O Le Eseta Lenei, ia manatua le malaga faaiu, tuuatoatasi a le Faaola. Na Ia ositaulagaina mea uma na ia te Ia ina ia mafai ai e oe ma tagata uma i le lalolagi ona faamamaina ma maua le ola e faavavau. Aoao mai Lana faataitaiga atoatoa. Tuu o Ia i ou mafaufauga ma i lou loto. Ma ia manatua i taimi uma, e le tuuaunoaina lava i tatou. Talu ai sa Ia onosaia Lana malaga faaiu e na o ia lava, o le a Ia le tuulafoaiina ai lava oe. O Lona alofa mo oe e le uma ma e le masuia, ma ua Ia saunia foi e ofo atu ia te oe le filemu, mafanafana, ma le faamoemoe a o e faaauauina lau lava malaga. O Lana meaalofa o le Togiola e faavavau, ma ua tuuina atu ia te oe.