E i ai se mea taua e uiga ia te oe

Saunia e Shenade Mataupu

O le tuputupu ae i le ekalesia, o a’u, e pei lava o le toatele o tamaiti peraimeri, e masani lava ona fesiligia pe ou te manatu o le a auauna atu i se misiona. O taimi uma lava (atoa ai ma sina faalotolotolua) e vave lava ona ou tali atu i se ioe mautinoa, po o le sii o lo’u lima i le vasega e faailoa atu lo’u naunau e auauna atu. E ui e lei lava sou malamalama i le taua moni o le auauna atu i se misiona, sa ou lagona mai lo’u laitiiti o le valaauga e auauna atu, o se valaauga paia mai lo tatou Tama Faalelagi. O aoaoga o le talalelei a matua alofa, faataitaiga a uso ma tuagane matutua, ma le faamalosiauga a uo pele, na mafai ai e lo’u manao faaletagata lava ia e auauna atu i se misiona ona malena ae i totonu o a’u.

A o faagasolo tausaga, o le suia mai le faateineitiiti i le talavou, sa amata ona faavaivaia la’u vaaiga malosi lea sa i ai mo le auauna atu i se misiona faafaifeautalai. O le taulaiga lea sa i ai muamua i le avea ma se faifeautalai faamisiona, ua lilo nei i mea faalavefau le taua o le lalolagi. Masalo, o le fautuaga a Alema le itiiti i lona atalii o Helamana o se tasi lea [o fautuaga] ou te tuuina atu ia i latou o loo tauivi ma ia ituaiga le mautonu po o masalosaloga i lona faapea mai, “Filifili faatasi ma le Alii i au mea uma e fai, ma o le a ia taitai oe mo le lelei” (Alema 37:37).

Ina ua mavae le tele o tatalo, anapogi ma le mafaufau loloto mo le mea e finagalo le Alii ou te faia, sa ou filifili e toe taulai atu lo’u malosi ma tautino atu a’u lava i le auauna atu i se misiona. O a’u o le uii o le fanau e toalima, i matua matagofie e toalua. O lo’u tama, o Siaosi Mataupu sa auauna atu i le Misiona a Apia Samoa mai le 1977 i le 1979, a’o lo’u tina o Ruth Mataupu na auauna atu foi i Samoa mai le 1985 i le 1987. O o’u tuagane matutua e toalua o George ma Roger, na auauna atu i le Misiona a Uelegitone Niu Sila mai le 2008 i le 2011, o lo’u uso, o Gladys, na auauna atu i le Misiona a Ausetalia Perisipeni, ma Julius o le uii o tama, sa auauna atu i le Misiona a Filipaina Sepu i Sasae. O le mafaufau ai i nei faataitaiga o faifeautalai ua toe foi mai, lea e i ai i totonu o lo’u aiga, faapea foi ma uo o e ua uma ona tala’i, sa mafai ai ona amata le faagasologa o le talosaga mo se misiona faafaifeautalai. I le maea ai o la’u talosaga, sa ou mauaina le valaauga i le masina mulimuli ane mai lo tatou Perofeta pele o Thomas S. Monson, e auauna atu mo le umi e 18 masina i le Misiona a Egelani Leeds.

Ou te manatua le ulufale atu i le galuega faamisiona ma le iloaina auauai o Egelani, o se atunuu ese lea e leai se tasi e iloaina a’u, ma o le a avea ma o’u aiga mo le 18 masina. E ui i le le masani i le tau, sitaili o le olaga, ma le nofoaga, sa ou iloa ua ou sauni e laveaiina ia soifua. O le ma aso muamua o le galuega sa ou ala ae ma le naunautaiga e auauna atu ma talanoa i tagata uma. Ae paga lea, a o faagasolo le aso, ma se vaega o le teena mulimuli ane, sa vave lava ona ou lotovaivai. O lagona o le naunautaiga sa ou lagona muamua, ua vave lava ona liua i le masalosalo ma le fefe. Ou te manatua le fesiligiaina e le gata i ou faamoemoega ae faapea foi pe ua ou agavaa mo sea galuega. Sa ou lagona le matuai tuuatoatasi.

E lata i le faaiuga o le ma aso, sa matou o faatasi ma se isi paga o uso faifeautalai, ua toe foi i lo matou fale. I le aluga o le ala, sa matou feiloai ai i se tamaitai lelei e igoa ia Maxine lea na faailoa mai lona iloaina o i matou mai se feiloaiga ua muamua atu ma faifeautalai ua tuanai. O le talanoa faatasi ma ia, sa matou iloa ai sa ia aafia i le tele o faafitauli i lona olaga, o le tele o na [faafitauli] sa ia tuuaia ai le Atua. E ui e lei mafaufau Maxine o ia o se tagata lotu, ae sa ia faamalo mai ia i matou i le galuega o loo matou gauai atu i ai o ni faifeautalai.

O le fefe, matamuli ma le leai lava o se talitonuga, sa ou tutu filemu ai i tua ma matauina ia Faifeautalai Tamaitai sinia o loo talanoa ma Maxine. Ina ua mavae le pe tusa ma le afa itula o faalogologo i a’u soa nei o talanoa ma Maxine, sa ou matauina le sui mai o lana vaai, i le ogatotonu o le talanoaga, e agai mai ia te a’u. O le lotovaivai lea na tuputupu ae ia te a’u i le aluga o le aso, sa agai mai Maxine ia te a’u, tuua le talanoaga ma a’u soa ma tu mai i o’u luma. Ou te manatua le fai atu ia te ia “E alofa ma popole le Atua ia te oe”. Sa tu o ia mo sina taimi ma fai mai se tala sa ou manaomia le faalogo i ai, lea e le galo lava ia te a’u. Sa fai mai o ia, “e i ai se mea taua e uiga ia te oe, e i ai se mea taua o loo tosinaina mai a’u ia te oe”. I le mavae ai o se aso e tumu i le le mautonu, lotovaivai ma le fefe, sa ou iloaina ua faamafanafanaina a’u e le Tama Faalelagi e ala mai ia Maxine. Sa ou iloaina le uiga lua o le tala sa ou fai atu ai ia te ia i lena po ina ua ou fai atu, “E alofa ma popole le Atua ia te oe”. Atonu na Ia manaomia lo’u malamalama i lea lava mea e tasi, e Na te alofa ma popole ia te a’u. Atonu, e ao ona toe faamanatu mai ia i tatou o loo i ai se mea taua e uiga ia i tatou taitoatasi, ma e ao foi ona tatou ola ina ia agavaa ai mo lo tatou Faaola, o Iesu Keriso.

“O outou o le malamalama o le lalolagi outou. E le mafai ona lilo le aai ua tu i luga o le mauga … Latou te le tutuina foi le lamepa i le tuu ai i lalo o le mea e fua a’i saito, a e tuu i luga lava o le tuugalamepa ia pupula atu ai i e o i le fale uma. Ia faapea ona pupula atu lo outou malamalamama i luma o tagata ina ia latou iloa la outou amio lelei, latou te vivii atu ai i lo outou Tama o i le lagi” (Mataio 5:14–16)

Ua oo ina ou malamalama e ala i lenei aafiaga ma le tele o isi mea lea e le tofu i tatou ma le gafatia e susulu atu ai, ae o le tiute lava ina ia susulu atu. O la tatou tiutetauave o le susulu atu ina ia mafai ai ona tatou pai atu i loto o i latou o siomiaina i tatou, e ala atu ia tatou faataitaiga e mafai ai ona tatou molimau atu o loo soifua le Atua, ma o Iesu o le Keriso, ma ia avea ia tatou ma sulu o le faamoemoe i taimi e foliga mai ai ua leai se faamoemoe ma ua faigata.

O Shenade Mataupu na muai ola i Samoa ma sa auauna atu i le misiona a Egelani Leeds mai ia Mati 2016 ia Oketopa 2017. O loo nofo nei i Magele ma e i le uarota a Thomas road, i Manukau, Niu Sila.

E i ai sau tala faafaifeautalai e te manao e faasoa mai? Emeli mai ia Shilo i le [e-mail]