O Ato ma Fagu

Saunia e Chieko N. Okazaki

E Uiga ia Sister Okazaki

O Chieko Nishimura Okazaki (1926–2011) na soifua ae i Hawaii, ISA, i se aiga e Lotu Puta o augatama e mai Iapani. Sa auai o ia i le Ekalesia ina ua 15 ona tausaga.

E oo atu i le taimi lena, ua iloa e Sister Okazaki le lavelave o ona tulaga faaagaifanua ma faaleaganuu. O le popole pe o le a faapefea ona vaai atu isi ia i latou ina ua mavae le tuipomuina e le militeli a Iapani ia Pearl Harbour, i Hawaii, sa aoina ai e Sister Okazaki ma lona tina a latou suvania uma mai Iapani ma susunuina. Ona ia tilotilo lea i le faaata ma mafaufau, “Ou te lei tuvae lava i Iapani. E le o au o se Iapani i lo’u loto. Ae e le mafai ona ou sola ese mai ia te a’u lava. O o’u mata, o lo’u pa’u, ma lo’u lauulu e Sapani.”¹

Sa fetaiai Sister Okazaki ma le faailogalanu i lona olaga atoa. Sa amata ona ia faiaoga a o lei leva ona maea le Taua Lona Lua a le Lalolagi, a o maualuga pea le malosi o le tetee ia Iapani i le Iunaite Setete. E toatolu ni tina sa mumusu e faataga a latou fanau e o i lana vasega. Ae e lei pine ae manumalo ai Sister Okazaki ia i latou.²

O Sister Okazaki o le tamaitai muamua lea na galue i le au faatonu o ausilali e tolu a tamaitai: muamua o Tamaitai Talavou, ona sosoo ai lea ma le Peraimeri, ma sosoo ai ma le Aualofa.³

O le savali lenei o se vaega na sii mai i lana lauga o le konafesi aoao ia Aperila 1996 e uiga i le lotogatasi ma eseesega (ua faalaugatasia faailoga ma faamataitusi tetele).

Ua tuuina mai e le Atua ia i tatou le tele o meaalofa, tele eseesega, ma le tele o mea e le tutusa ai, ae o le mea e taua o le mea ua tatou iloa e uiga i le tasi ma le isi—o i tatou uma o Ana fanau.

O la tatou luitau o ni tagata o le Ekalesia o le tatau lea ia i tatou uma ona aoao mai le tasi ma le isi, ina ia tatou taufai alolofa uma o le tasi i le isi, ma tuputupu ae faatasi.

O aoaga faavae o le talalelei e taua tele. E taua, ae o le teuina o se mea e filifili ai. Se’i ou faasoa atu sina faataitaiga faigofie e faaali atu ai le eseesega i le va o aoaoga faavae o le Ekalesia ma le faatinoga faaleaganuu. O se fagu lea o pite [peaches] mai Iuta, sa saunia e se tausiaiga Iuta e fafaga ai lona aiga i le vaitau o le kiona. O le au tausiaiga i Hawaii latou te le tuufaguina fualaau aina. Latou te tauina ni fualaau aina ia lava mo ni nai aso ma tuu i totonu o ato faapenei mo o latou aiga. O le ato lenei o loo i ai se mago, fa’i, se fala, ma se esi … na tauina e se tausiaiga Polenisia e fafaga ai lona aiga i se tau e pula ai fualaau aina i le tausaga atoa.

O le ato ma le fagu o ni koneteina eseese, ae e tutusa mea o loo i ai: o fualaau aina mo se aiga. Pe ua sa’o le fagu ae sese le ato? E leai, e sa’o uma lava. O koneteina e talafeagai i le aganuu ma manaoga o tagata. E talafeagai uma foi mo mea o loo la tauaveina, o fualaau aina ia.

Ia, o le a la le fualaau aina? Na ta’u mai ia i tatou e Paulo, “A o le fua o le Agaga o le alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le le gaoia” [Kalatia 5:22–23]. I le usoga a tamaitai o le Aualofa, i le usoga o korama o le perisitua, i le o mai faatasi ma le migao e taumamafa i le faamanatuga, o fua o le Agaga ua tuufaatasia ai i tatou i le alofa, olioli, ma le filemu pe o le Aualofa e i Taipei po o Toga, pe o le korama o le perisitua o i Monatana po o Mekisiko, ma pe o le sauniga faamanatuga o faia i Fiti po o Filipaina.

… Ina ua tofia au i le Au Peresitene Aoao o le Aualofa, sa fautua mai Peresitene [Gordon B. Hinckley] ia te au: “E te aumaia se uiga auaumama tulaga ese i lenei au peresitene. O le a iloa oe o se tasi ua fai ma sui o i latou i talaatu o tuaoi o le Iunaite Setete ma Kanata. O le a latou vaaia ia te oe se faatusa o lo latou tasi ma le Ekalesia.” Sa ia tuuina mai ia te au se faamanuiaga ia matala lo’u laulaufaiva a o ou tautala atu i tagata.⁴

… [Ina ua ou tautala atu i isi atunuu,] sa mafai ona ou lagonaina le Agaga o aveina atu a’u upu i o latou loto, ma sa mafai ona ou lagonaina “le fua o le Agaga” o toe aumaia ia te au lo latou alofa, lo latou olioli, ma lo latou faatuatua. Sa mafai ona ou lagonaina le faia e le Agaga ia tasi i tatou.

Uso e ma tuagane pe o au fualaau aina o ni pite po o ni esi, ma pe o e aumaia i ni fagu po o ni ato, matou te faafetai atu ia te outou i lo outou ofoina mai o i latou ma le alofa. Le Tama e i le Lagi, tau ina ia tasi i matou ma ia avea i matou mou,⁵ ou te tatalo ai i le suafa paia o lo tatou Faaola, o Iesu Keriso, amene.