Tausia o le Tupulaga Faia’e
Sa ou auai talu ai nei i se tolauapiga mo le Autalavou Nofofua Matutua i Toga. Sa saofafai ai iina i o’u luma atu, i lena taeao susulu o le Aso Faraile le silia ma le lima selau o le ‘au sili a le Alii. Sa latou sisiva, pepese, ma fiafia i gaoioiga lelei ma faalogo i aoaoga musuia mai le tasi ma le isi ma o latou taitai. O se fiafiaga le faatasi ai ma i latou, le lagonaina o lo latou lelei ma le iloaina sa nonofo i o’u luma atu nisi o taitai o le Ekalesia, nuu ma pisinisi o a taeao.
E tele mea tatou te faamanatu ai le lelei o loo ausia e le Tupulaga Faia’e o alii ma tamaitai talavou i le Pasefika. O le toatele o i latou o loo auauna atu i ni misiona, faaipoipo atu i le malumalu ma auauna atu i uarota ma paranesi i atunuu o le Pasefika atoa. E ui i le lelei o nei mea ua ausia, o loo i ai lava se ava tele i le va o i latou o loo tumau malolosi ma faamaoni i a latou feagaiga ma i latou e le o tumau ma faamaoni ma o le popolega autu lena mo i tatou uma.
Ua valaau mai le Au Peresitene o le Eria a le Pasefika i le Tupulaga Faia’e ina ia tausia le uelefea faavavau o o latou lava agaga. E leai se tasi o lenei augatupulaga e mafai ona lafoai lena tiutetauave i se isi tagata. E tatau i tagata taitoatasi ona faamautinoa lo latou lava olataga e faavavau e ala i le fafagaina o i latou lava faaleagaga lea e manaomia ai le osia ma le tausia o feagaiga ma le auai i gaoioiga lelei. O se soo amio pulea a Keriso o le a avea le Faaola ma totonugalemu o o latou olaga ma faia mea e sili ona taua o se mea ia faamuamua. O le tatalo faamaoni i aso uma, suesueina o tusitusiga paia, auai i le Seminare ma le Inisitituti, auai i le Lotu, umiaina o se pepa faataga o le malumalu o loo aoga, o le faafouina o feagaiga ma le auauna atu i isi ua na o nisi ia o mea e sili ona taua. Ioe, e tatau i tagata taitoatasi o le Tupulaga Faia’e ona nafa ma lo latou lava manuia faaleagaga i le faia o mea e sili ona taua.
Ma o le avea ai o Keriso ma totonugalemu o o tatou olaga, o loo i ai isi vaega e fa o le a fesoasoani ia i tatou ina ia tumau malolosi ma faamaoni i le Talalelei toefuataiina. E aofia ai le talisapaia o lou auai i le Ekalesia. O le taimi lava tatou te faatalale ai e uiga i lena mea o le taimi tonu lava lena e amata ai ona tatou faasamasamanoa ia tatou feagaiga. Lua, e tatau ona tatou manatua o loo i ai se fuafuaga mo le fanau a le Atua i le fogaeleele, ma o le iuga, e tatau ona tatou toe foi atu e toe nonofo faatasi ma Ia. O le tatou malamalama lelei atili i le Fuafuaga Sili o le Fiafia o le sili atu foi lea o le tatou ausiaina ma le manuia o le fuafuaga. Tolu, e tatau ona tatou manatua o le auaunaga faafaifeautalai e faalolotoina ai lo tatou liua ia Keriso ma faateleina lo tatou faatuatua ia te Ia. E tatau ona tatou liua atoatoa uma atu e tetee atu ai i u fanafana a le tiapolo. O le mea lona fa e taua o le tautino atu i se faaipoipoga. O le faaipoipoga i le va o se alii ma se tamaitai ua faauuina e le Atua ma e le tatau ona tolopoina ma le le tatau.
E leai se tasi e tatau ona tuua na o ia i le ola faaletino ma o lea ua faamautinoa mai ai e le Atua pe a oo mai le tetee e maua le fesoasoani. O le a maua e le Tupulaga Faia’e le fesoasoani i matua lelei, taitai o le Perisitua ma ausilali, ma uo fesoasoani o e tutusa o latou tulaga faatauaina. E pei o tagata uma o le ekalesia, o le a latou iloa o le fesoasoani sili lava e maua lea i le tootuli o tulivae a o latou augani atu mo se fesoasoani e foia ai faafitauli ma faaosoosoga o loo fetaiai ma i latou. O le a latou lagona, e pei ona ou lagona, ia musumusuga a le Agaga Paia o loo taialaina ma faamautinoaina i latou i taimi faigata.
I le naunau e fesoasoani atili i le Tupulaga Faia’e, na faia ai e Elder Christofferson se talosaga faapitoa i “Tamatane matutua—tamā, tagata nofofua matutua, taitai, faiaoga o aiga—ina ia avea ma faataitaiga agavaa ma fesoasoani i le Tupulaga Faia’e o tama ia avea ma tamatane. Aoao atu ia i latou ia tomai faaagafesootai ma isi: pe faapefea ona auai i se talanoaga, pe faapefea ona faamasani ma fegalegaleai ma isi, pe faapefea ona fesootai i tamaitai ma teineiti, pe faapefea ona auauna atu, pe faapefea ona sogasoga ma fiafia i gaoioiga, pe faapefea ona tuliloaina mea e fiafia i ai e aunoa ma le avea ma vaisu, pe faapefea ona faasa’o mea sese ma faia ni filifiliga sili ona lelei.” Tamatane matutua o le Pasefika, matou te talosaga atu ia te outou ina ia tutulai a’e ma tali atu i lenei valaau mai se perofeta a le Atua.
Na ia toe ta’ua foi o le “faatosinaga amitonu a tamaitai e leai se mea e sili atu ona lagonaina ai pe sili atu ona faamanuiaina ai nai lo le aiga. E leai se isi nofoaga e sili atu ona lelei mo le tausiga o le tupulaga faia’e nai lo o le aiga masani, lea e galulue faatasi ai se tamā ma se tina e tuuina atu mea e manaomia, aoao ma faafailele le la fanau.” E manino lava, o se aiga malosi a le AAG o se vaega taua lea i le tausiaina o le Tupulaga Faia’e.
Matou te valaaulia matua ma taitai uma ina ia mautinoa, pe a feagai ai ma teteega ma faaosoosoga ia leai se Tupulaga Faia’e e leiloa ma ia e auai faatasi ma i latou i le latou sailiga ina ia tumau faamaoni ia latou feagaiga ma ia laveai mai a latou uo ua se ese.