O Faatusa e 6 o le Paseka E Ono Suia Ai le Ala E Te Vaai Ai i le Eseta

Saunia e Valerie Durrant

Mekasini a le Ekalesia

A tatou manatua le faafaatusa o le Paseka, o le a loloto atu lo tatou malamalama ma le olioli i le moni o le Toetu.

Ou te fiafia lava i le Eseta, o se aso malolo e faamanatu ai le faasaolotoina e Iesu Keriso o fanau a le Atua mai le nofopologa i le oti ma seoli.

Ae i le 1,500 tausaga a o lei oo mai le Toetu, sa i ai se aso paia faapena na faamanatuina ai le faasaolotoina e Ieova o le fanauga a Isaraelu mai lo latou nofopologa i Aikupito.

O le Eseta e manatua ai le taulaga togiola a le Faaola; o le Paseka na muai faamalumalu ai. A tuufaatasi, e mafai ona faalolotoina ai lo tatou malamalama i le Toetu. O i lalo ifo ni nai sootaga i le va o le Paseka ma le Eseta:

Paseka	Eseta
1. O le Paseka sa faaogatotonu i le tamai mamoe e fasia, o se po’a e sao ona lelei, (tagai Esoto 12:5), e leai ni ponaivi gaui (tagai Esoto 12:46).	1. O Iesu o le Tamai Mamoe a le Atua (tagai Ioane 1:29), e leai se agasala ma e leai ni ponaivi gaui (tagai Ioane 19:36).
2. O le areto e le faafefeteina, e leai se mea e faaleagaina ai (tagai Bible Dictionary, “Faafefeteina”), e o faatasi ma le tausamiga o le Paseka (tagai Esoto 12:8, 15).	2. O Iesu o le Areto o le Ola, e leai se mea e le mama ia te Ia (tagai Ioane 6:35).
3. O laauafu oona, o se faatusa o le nofopologa o Isaraelu, e o mai faatasi ma le tausamiga o le Paseka (tagai Esoto 12:8).	3. Atonu e mafai ona tatou nofopologa i le agasala, ae talu ai sa inu e Iesu le ipu oona (tagai MF&F 19:18), e mafai ona tatou manumalo ai e ala i Lana Togiola (tagai 1 Korinito 15:22).
4. O le tausamiga o le Paseka sa tatau ona aai faataalise ai (tagai Esoto 12:11).	4. O le tino o le Faaola na saunia faatopetope mo le tanuga (tagai Ioane 19:31).
5. O le au talitonu o e sa valiina i le toto o le tamai mamoe i faalava o o latou faitotoa na faasaoina mai le oti faaletino (tagai Esoto 12:7 13).	5. O le au talitonu o e feinu faafaatusa i le toto o le Tamai Mamoe i vaiaso taitasi i le faamanatuga ma “manatua pea o ia” (MF&F 20:77, 79) e mafai ona faasaoina mai le oti faaleagaga ma le faaletino (tagai Mosaea 4:2).
6. O le aso na sosoo ma le aso na fasiotia ai ulumatua, sa tautino atu ai le saolotoga o Isaraelu sa faapagotaina (tagai Esoto 12:29--32).	6. O le aso na sosoo ma le aso na fasiotia ai le Ulumatua, sa tautino atu ai e Iesu le saolotoga o i latou o e sa faapagotaina i le Lalolagi o Agaga (tagai MF&F 138:18, 31, 42).