O Atatosi o le Faatuatua
O Rakotomalala Alafone
Sarodroa, Matakasa
Ina ua oo ina fiafia Rakotomalala i le talalelei, o le lotu sa aupito latalata ane sa i ai lea i Antsirabe, o se aai e 30 maila (50 kilomita) mai lona nuu o Sarodroa. Sa maua e Rakotomalala ma sana uo se auala e malaga ai i Aso Sa taitasi.
O le taimi nei, ua i ai i Sarodroa se tamai faletapuai lea e lolotu i ai le silia ma le 100 tagata o le au paia i Aso Sa taitasi. Sa vaaia e Rakotomalala le talia e lona nuu o le talalelei. E toafa faifeautalai ua auauna atu e mai i Sarodroa ma o loo faaauau pea ona ola le Ekalesia.
Cody Bell, o le pueata
Ina ua ma’i lo’u tamamatua, sa ou alu i Antsirable e faatasi ma ia. Sa asiasi atu faifeautalai i lona fale i ni nai taimi. O ma’ua ma lo’u tamamatua e le o ni tagata o le Ekalesia, ae sa fiafia o ia e talatalanoa ma faifeautalai. I se tasi po, sa la faia ai se faamanuiaga o tamamatua, ma ina ua uma le afiafi faaleaiga, sa la tuu mai ia i ma’ua le Tusi a Mamona.
“Faamolemole faitau le tusi lea ma ole atu i le Atua pe moni,” o le la tala lea.
Ina ua ou toe foi i Sarodroa, sa ou le manao e faitau le Tusi a Mamona ona sa ou mafaufau e le moni. Ona oo lea i se tasi aso, sa ou matua ma’i lava ma sa tele ni aso sa ou mau ai i le fale. A o ou sailia se mea e fai, sa ou maua le Tusi a Mamona ma amata loa ona faitau.
Mulimuli ane, sa ou toe foi ai i Antsirabe ma feiloai ai ma faifeautalai. Sa la aoaoina atili au i le Tusi a Mamona ma le Perofeta o Iosefa Samita. Sa ou fai atu ia i la’ua tatou te lei manaomia ni perofeta ma sa leai se perofeta i aso nei. Sa fai mai faifeautalai ou te tatalo i le Atua ma fesili i ai pe o i ai se perofeta i le taimi nei. Sa la folafola mai o le a tali mai le Atua ia te au. Sa ou tatalo ma sa ou lagonaina e moni mea sa fai mai ai faifeautalai.
Sa ou manao e alu i le lotu, ae sa leai sa’u tupe mo le pasi. Sa ou talanoa i la’u uo, o Rasafinaravaonasolo, ma sa ia fai mai e mafai ona ma o i la’u uila. E lua itula sa ma tietie ai i le na o le alu mai Sarodroa i Antsirable i Aso Sa uma. A ou lelava vili, ona ou tietie lea i tua ae amata ona vili o ia. A oo foi ina lelava o ia, ona ma toe fesuiai foi lea.
Na iu ina matou auai ma le aiga o Rasafinaravaonasolo i le Ekalesia. Sa matou o i le lotu i Antsirabe seia oo ina tatala se paranesi i Sarodroa. Sa matou matua fiafia lava ina ua mafai ona matou lolotu lava matou i le matou nuu.
Sa tofia le tama o Rasafinaravaonasolo e fai ma peresitene o le paranesi. I se tasi aso sa ia talanoa mai ai ma fautuaina au ou te sauniuni mo se misiona. Ou te lei manatu e mafai ona ou faamisiona, peitai sa ia faamautinoa mai e mafai. Sa ou taliaina le valaau e auauna atu i le Misiona a Matakasa Antananarivo. Ua ou faaipoipo nei ma e toalua la’u fanau. Ou te faafetai lava mo lo’u aiga, ma e tele ni o’u aafiaga na i ai nai lo mea e mafai ona ou faasoa atu sa fesoasoani ou te iloa ai o le Ekalesia moni lenei.
Ina ua auai i le Ekalesia, sa auauna atu ia Rakotomalala (taumatau) i le Misiona a Matakasa Antanarivo, a o Rasafinaravaonasolo (tauagavale) sa auauna atu i le Misiona a le Temokarasi Ripapelika o Congo Kinshasa.
I le 2013, sa fausia ai e tagata o le au paia i Sarodroa le tamai falelotu laau lenei e tapuai ai. Ua fiafia Rakotomalala e fesoasoani e faia ni suiga sa moomia i le fale.
O le araisa o le meaai autu lea i Matakasa. E toetoe o tagata uma i Sarodroa e galulue i faatoaga araisa e tausi ai o latou aiga.
A o faaauau pea ona faatupulaia le Ekalesia, sa manaomia e tagata o le au paia i Sarodroa se falesa fou. Faatasi ai ma se falesa fou e tuaoi, sa galulue ai ia Rakotomalala ma isi e faafou le falesa laau tuai e fai ma potuaoga ma se ofisa o le epikopo.
Talu mai aso na la tietie ai i se uila mo le lua itula i le na o le alu i le lotu i Aso Sa uma, ua tumau pea ona avea ia Rasafinaravaonasolo ma Rakotomalala ma se uo mamae. La te faafetai lava mo faamanuiaga ua aumaia e le talalelei ia i la’ua ma o la aiga.
O Rakotomalala ma Rasafinaravaonasolo o loo tutu i luma o le falesa fou i Sarodroa. O le falesa lenei, e faia i sima ma piliki, sa fauina e tagata o le au paia.