Fiafia: E Sili Atu Nai Lo Na o se Lagona Fesuisuiai

Saunia e Dennis ma Charlotte Larcabal

Mekasini a le Ekalesia

Ua aoaoina i tatou o le maua o le olioli o le faamoemoega lea o lo tatou i ai iinei (tagai 2 Nifae 2:25). Ae aisea la e foliga mai ai, o nisi taimi e matua faigata ai lava ona maua le fiafia? Atonu ona tatou te le malamalama i le mea moni e igoa o le fiafia … ma le mea e le o se fiafia.

O Le A le Fiafia?

I le tulaga aupito faigofie, o le fiafia o le sii a’e lea i luga mo sina taimi o lou tulaga faalemafaufau i se laasaga maualuga atu nai lo ou faalogona masani.¹ I se isi faaupuga, o lona uiga o le lagonaina o lagona lelei.

E tele auala e faamatua’ia ai se faalogona maualuga---faia o tala ula ma se uo, taalo i se taloga malie, po le ‘aia foi o se fasi kekesisi---ae e le umi ona i ai. E masani ona tatou feosoosofi solo mai lea puna o le faafiafiaina i le isi, i se taumafaiga ia toe maua lena faalogona maualuga. Ae pe le o i ai ea se fiafia e tumau?

Ioe---ae e sili atu ona maaleale nai lo le mea o e mafaufau i ai, lea e mafua ai ona tatou misia le auga. O loo ta’u mai e le lalolagi ia i tatou, o se olaga tauaogaina e tatau ona tumu i mea [tatou te] fia iloa, e faapea o ou aso e tatau ona avea o se aso o tietiega le malolo o mea faafiafia i lalo o se auala faigofie ma tumu i mea e faananau i ai. Ae o le mea moni, e te le manaomia le sagisagi fiafia i taimi uma ina ia ola ai “e tusa ma le ala o le fiafia” (2 NIfae 5:27). O le fiafia tumau---o le mea e mafai ona tatou faaigoaina o le fiafia moni o se lagona toafilemu, maua’i o le soifua manuia nai lo se lagona iloagofie o le faagaeetia. E matafi ese atu mea malie ma mea faafiafia, ae o le fiafia moni e le o se lagona fesuisuiai e mou ese---e umi lava se taimi e [lagonaina] i ai. Afai o le maua o faananauga e siitia ai ou faalogona i luga atu o le tulaga paleni faalemafaufau, o le mauaina la o le fiafia moni ua pei o le siitia ae o le paleni faalemafaufau lava ia.²

Atonu e te manatu o le fiafia mausali e manaomia ai le manuia mausali ma le saoloto mai tiga ma tofotofoga. Ae ua faaalia i suesuega o tulaga e sili ona manaia e le faamautinoa ai le fiafia, a o tulaga e le manaia e le ‘alo ai. Ae, i mea moni uma e aafia ai lou fiafia, o au filifiliga o loo i ai nisi o faatosinaga silisili.³ Na aoaomai e Elder Ulisses Soares o le Au Peresitene o Fitugafulu e faapea, ”O le fiafia e fua i mamanu o mausa, amioga, ma mafaufauga ia e mafai ona tatou taulimaina tuusao i faatinoga ma le loto.” O le fiafia e sili atu nai lo na o se uiga fesuisuiai po o se olaga faasamasamanoa---o se auala o mafaufauga ma le olaga lea e mafai ona tatou pulea. O maualuga o uiga fesuisuiai masani e aafia moni i kenera ma auala na tatou ola ae ai, ae e tele foi se matafaioi a o tatou filifiliga patino. Pe a faapuupuu, “o le fiafia o se filifiliga e mafai e soo se tasi ona fai.”⁴

E Mafai Faapefea Ona Ou Fiafia?

E faapefea tonu lava ona tatou “filifili” ia fiafia? O le a le fua faalilolilo o la tatou kekesisi o le fiafia? Ua faamalamalama mai e Elder Soares, o le fiafia moni e manaomia ai “se taumafaiga e umi ona lagolagoina mo se mea e sili atu ona taua i le olaga.” E faapena foi, sa fautuaina mai e Viktor Franki, o se tagata lauiloa na sao mai i le Fasiotiga Tagata Tele ma o o se fomai faapitoa o le mafaufau e faapea, o le fiafia o le “aafiaga e afua mai i le tuuto atu o se tasi i se faamoemoega e sili atu nai lo ia lava.”⁵

Ma o le a la se faamoemoega e sili atu nai lo lea ua faataatia mai e le Atua mo i tatou? I la tatou sailiga mo le fiafia, tatou te le tau toe vaavaai i se isi mea nai lo le fuafuaga a le Tama Faalelagi. Aua, ua ta’ua o le “ata o le fiafia” mo se mafuaaga! (Alema 42:8, 16). O loo molimau mai lea mau ma lea mau e faapea, o le mulimuli i le fuafuaga a le Atua e aumaia ai le fiafia (tagai 2 Nifae 2:13; Helamana 13:38). E ui o le a le faasaoina i tatou e le ola amiotonu mai lototiga uma, ae o le a tuuina i tatou i se tulaga e sili atu ona tatou maua ai le poto masani o le fiafia i lenei olaga, ma e taitai atu ai i lo tatou faaeaga ma le olioli e faavavau i le lalolagi a sau.

E faapei foi lava o le faatuatua, o le fiafia e mafai ona faavaivaia pe faamalosia foi, e faalagolago lava i a tatou faatinoga. Afai e te faaalu lou taimi e tulimatai ai mea faafiafia ua na o sina taimi, o lou fiafia o le a “feaveaiina e matagi uma” (Efeso 4:14). Ae afai e te taumafai e ola amiotonu, o le a e atinaeina se lagona mautu o le filiemu faavaea ma le soifua manuia lea e mafai ona talitalia soo se matagi. Ma afai e te faamuamua le faatuatua nai lo mea malie, e mafai ona e maua le olioli moni—le ituaiga lea e mafai ona e maua i le na o “le ua salamo faamaoni ma le ua saili mo le fiafia ma le lotomaualalo” (Alema 27:18).