Ia Tatou Faasoa Atu Lo Tatou Malamalama o se Faaola

April 2018

Ia Tatou Faasoa Atu Lo Tatou Malamalama o se Faaola

Saunia e Elder Gary E. Stevenson

O Le Korama a Aposetolo e Toasefululua

Mai se saunoaga i le Brigham Young University Women’s Conference, “O le Malamalama o se Faaola,” sa fofogaina atu i le aso 5 Me, 2017.

O la tatou savali o le savali o le filemu, ma o outou o avefeau o e tala’ia. E mafai ona outou faia lenei mea e ala i auala fou ma le mananaia o le tekinolosi.

O i tatou o le Ekalesia a Iesu Keriso, ua faatuina i aso e gata ai. I le auala e tasi na faatonuina ai e le Alii Ona soo i aso anamua, ua poloaiina foi i tatou i aso e gata ai e “o atu ia outou i le lalolagi uma, ma talai atu ai le talalelei i tagata uma” (Mareko 16:15).

Na aoteleina faapuupuu mai e le perofeta anamua o Nifae lenei misiona ma le savali ma le faamoemoga na i ai i tua mai: “Ma ua matou tautalatala e uiga ia Keriso, ua matou olioli ia Keriso, ua matou talai atu Keriso, ua matou vavalo e uiga ia Keriso, ma ua matou tusitusi foi e tusa ma a matou valoaga, ina ia mafai ona iloa e a matoufanau po o le a le puna e mafai ona latou tepa taulai i ai mo se faamagaloga o a latou agasala” (2 Nifae 25:26).

I le tusi a Mosaea, ua tatou faitau ai i le faapotopotoina e le perofeta anamua o le Tusi a Mamona, le Tupu o Peniamina, ona tagata i le nuu atoa i le mea na i ai le malumalu, ma faatonu atu e faatu se ‘olo, ma aoao atu ai ia te i latou. A o ia aoao atu i latou, sa ia vavalo atu foi ia te i latou e uiga i o tatou aso: “E le gata i lea, ou te fai atu ia te outou, o le a oo mai le taimi e salalau atu ai le malamalama o se Faaola i atunuu uma, ituaiga, gagana, ma tagata” (Mosaea 3:20).

“O Le Malamalama o se Faaola”

O se tasi o meaalofa aupito taua e teuina i totonu o o tatou aiga ma avatu i isi o “le malamalama o se Faaola,” po o Iesu Keriso.

Faatasi ai ma le tatalaina mai o le tisipenisione o le atoaga o taimi na oo mai ai se malamalamaga i luga o tagata uma ma le anoanoai o auiluma faatekinolosi. Na aumai faatasi ai ma le vaitausaga o fatufatuga gaosi ma meafaigaluega o fesootaiga, ua mafai ai ona faataunuuina le valoaga a le Tupu o Peniamina.

I le avea ai ma se uso o le Korama a Aposetolo e Toasefululua, ua valaauina e avea o se molimau faapitoa “o le suafa o Keriso i le lalolagi uma” (MF&F 107:23) faatasi ai ma ni tofitofiga patino i Mataupu Tau i le Va i Fafo ma le Komiti o Auaunaga Tau Fesootaiga, ua mafai ai ona ou taulai atu i le faataunuuga o lenei valoaga–e faapea “o le malamalama o se Faaola” ua salalau atu i le lalolagi atoa—e faaaoga ai tekinolosi aupito fou ua tatou maua.

“I Atunuu Uma, Ituaiga, Gagana, ma Tagata”

I le talafaasolopito, o le auiluma i lomiga ma le fatuga o leitio ma TV ua mafai ai ona oo atu savali o le Toefuataiga i le lalolagi atoa. E anoanoai faataitaiga o nei mea ua tatou maua, o nisi o nei mea o loo i totonu o o tatou manatua.

I totonu o le 10 tausaga o le Uluai Faaaliga, ma le masina a o lumanai ai le faatulagaina o le Ekalesia, e 5,000 kopi o le Tusi a Mamona na lolomiina. Talu mai lena taimi, ua silia ma le 175 miliona kopi ua uma ona lolomiina.

Soo se taeao o se Aso Sa, e mafai ona e faalogologo pe matamata foi i le faasalalauga o Musika ma le Afioga Tulei, lea ua lata nei i le lona 5,000 ona faasalalauga. O le uluai faasalalauga na faia tuusao i le leitio i le 1929. O le uluai faasalalauga o le konafesi aoao i le TV na faia i le 1949.

O le mea malie, i le 1966, na amata ai ona saunoa Peresitene Tavita O. MaKei (1873–1970) e uiga i mea o le a oo mai: “O mea fou ua maua ua loa ona natia o i ai se mana malosi tele, a le mo le faamanuiaina po o le faatafunaga o tagata soifua, ma ua avea ai le tiutetauave a le tagata i le faafoeina o ia mea o se [tiutetauave] sili ona maoae, ua taulimaina e tagata. … Ua tumu lenei vaitau i mea matautia e leai se tuaoi, faapea foi mea e mafai ona fai e le’i ta’ua mai.”¹

I le 1974, na faamatala mai ai e Peresitene Spencer W. Kimball (1895–1985) lana faaaliga i se aso o le a oo mai: “Ua faamanuiaina e le Alii le lalolagi i le tele o … satelite. Ua maualuluga i le lagi lo latou faatutuina, e avatu ai faasalalauga faailoilo i le toetoe o tulimanu uma o le lalolagi. … E mautinoa lava o nei satelite ua na o le amataga o mea o teuina mo le lumanai o faasalalauga i le lalolagi atoa. … Ou te talitonu o loo naunau le Alii e tuu mai i o tatou lima ni meafaigaluega faaonapo nei tatou te le i vaai muamua lava i ai.”²

Faatasi ai ma le auiluma o tekinolosi i fesootaiga ma faasalalauga lea ua matuai taotao mai lava i le initoneti, e foliga mai ua tatou molimauina i o tatou taimi le faataunuuina moni o valoaga a le Tupu o Peniamina, Peresitene MaKei, ma Peresitene Kimball.

O loo i ai foi se mamanu manino o le faaaogaaga o nei tekinolosi e fausia ai le malo o le Alii i le lalolagi. Ou te fia faasoa atu ni faataitaiga o lenei mea ia te outou.

LDS.org ma le Mormon.org

I le 1996, sa amata aloaia ai e le Ekalesia ona faaaoga le upega po o le uepi e fai ma auala e feaveai ai feau ma fesootaiga. Talu mai lena taimi, ua tusa ma le 260 uepisaite e lagolagoina e le Ekalesia ua folasia mai, e aofia ai saite o loo maua i le toetoe o atunuu uma i mea e nonofo ai tagata o le Ekalesia, ia latou lava gagana.

Ou te faasoa atu ni faataitaiga se lua ua masani ai o nei uepisaite. Muamua o le LDS.org, na faavaeina i le 1996, lea i le taimi nei ua mauaina le silia ma le 24 miliona o le au asiasi fou i ai i le tausaga ma le silia ma le 1 miliona le averesi o le au asiasi i ai i vaiaso taitasi. E toatele tagata o le au paia o loo maua ai i i mataupu aoaoina mo le aoaoina atu ma lauga o konafesi aoao ua mavae. Lona lua o le Mormon.org, o se uepisaite ua mamanuina e folasia atu ai le talalelei i o tatou tuaoi ma uo o e le auai i le Ekalesia. O le saite lenei ua mauaina le silia ma le 16 miliona o le au asiasi tulaga ese i le tausaga.

Polokalama i Masini Feaveai

Ioe, ua agaigai i luma ia tekinolosi i se saoasaoa matautia, e moomia ai se taumafaiga faateleina ma punaoa e iloa ai pea ona faaaoga. Faatasi ai ma le gaosiga o telefonipopoto ua oo mai ai le malosi e faafoefoe ai ma maua ai se aofaiga maoae o faamatalaga i se fatuga e umia i le lima. O le tele o ia faamatalaga ua faatulagaina i le ituaiga o polokalama feaveai, po o “apps.” O uluai polokalama na lagolagoina e le Ekalesia sa faamatuu mai i le 2007.

E anoanoai faataitaiga o le aoga o lo tatou faaaogaina o polokalama feaveai e faasalalau atu ai lo tatou “malamalama o se Faaola.” O le a ou le faamatalaina le anotusi o le tele o polokalama o loo maua i ou tumutumulima, ae o nisi nei o faataitaiga o apps e peiseai ua outou masani ai.

Potutusi o le Talalelei
Alaata Mamona
Laau Faaleaiga
Musika a le AAG
Meafaigaluega a le AAG

Ua faitau miliona taimi e faaaogaina ai nei [apps] i le vaiaso e le faitau miliona o tagata e faaaogaina.

Ala o Faasalalauga Faaleagafesootai

O le faauigaga, o ala o faasalalauga faaagafesootai o tekinolosi sooupu–faakomepiuta lea e mafai ai e tagata taitasi ma faalapotopotoga ona maimoaina, fatufatu, ma fefaasoaai faamatalaga, manatu, ma isi ituaiga o faailoaga e ala i faapotopotoga e le tinoa ma upegafesootai.

Pe o le amataga o le 2010, na amata ai e le Ekalesia se faiga naunautai o le faaaogaina o faasalalauga faaagafesootai e faataunuu ai le faasalalauina “o le malamalama o se Faaola.” O se fatuga faafuainumera maoae le televave lea. E toetoe ina a lemafaatusalia i le saoasaoa o le suiga.

O se tasi o uiga mataituina o faasalalauga faaagafesootai, o le taimi lava e lagona ai e se tasi ua masani pe ua fiafia i se polokalama faakomepiuta, ona alia’e mai foi lea o se isi [polokalama] e fou atu, tele atu, pe manaia atu pe sili atu foi.

O le a ou faamatala faapuupuu atua ni polokalama se lima o faasalalauga faaagafesootai o loo faaaoga e le Ekalesia e fai ma alaleo o fesootaiga:

1. O le Facebook ua silia ma le 2 piliona i latou e faaaogaina i le lalolagi atoa. O iina, e fauina ai e i latou e faaaogaina a latou lava upegafesootai faaagafesootai o uo i luga o le tafailagi.

2. O le Instagram o se saite faaagafesootai e totonugalemu i ata ma vitio.

3. O le Pinterest e pei o se laupapa puletini e le tinoa. O i e faapipii i ai ata vaaia e ta’u o “pins [pine]” i luga o le laupapa. O nei mea e mafai ona avea o ni fasifuaitau musuia po o ata pue faatupu manatu.

O le Twitter o se upega faaagafesootai e mafai ai e tagata e faaaogaina ona auina atu ma faitau ia savali pupuu e ta’i 280-mataitusi e ta’u o “tweets.”

5. O le Snapchat e faaalia ai atapue ma vitio pupuu ia a le vave ona mou ese atu pe o totonu o le 24 itula ona mou lea.

I tulaga faafaapotopotoga, o loo tatou faaaogaina nei saite o fesootaiga faaagafesootai i se ala mamana.

Facebook

Atonu tou te manatua le savali mu’amu’a o le konafesi e uiga i le taomiaga lea na saunoa i ai Elder Jeffrey R. Holland o le Korama a Aposetolo e Toasefululua i ni nai tausaga ua mavae.³ Mai lana saunoaga sa i ai se vaega o se vitio na faaalia na maua ai le silia ma le lua miliona tagata na maimoaina i luga o le Facebook lava ia, ma le faitau afe o e na fiafia i ai, faasoa atu, ma ni manatu faaalia lelei.⁴

Instagram

Ia Aokuso 2016, na tuu ai i luga e Peresitene Dieter F. Uchtdorf se vitio i le Instagram, o le aoaoina o mataupu faavae o le talalelei i le atalii o lona afafine o Erik i le—e mafai ona e mateina mai—le potu o le avevaalele i totonu o se vaalele!⁵ Sa faitau afe na fiafia i le faasilasilaga a Peresitene Uchtdorf i le Instagram, ma sa aumaia ai ma le anoanoai o manatu faaalia lelei.

Sa faasalalauina foi e le Ekalesia i lana faitotoa Instagram ia Novema 2017 se vitio o Elder Dallin H. Oaks ma Elder M. Russell Ballard o loo taliina se fesili a se tamaitai matua e uiga i tamaitai e auauna atu i ni misiona. E silia ma le 112,000 taimi na maimoa ai [e tagata] lenei faasalalauga.

I luga o le Pinterest, e mafai e se tasi ona maua ai le faitau selau o pine mai le LDS.org ma le tele o isi mai tagata taitoatasi o le au paia, e musuia ai isi.

Mo se faataitaiga, e toatele e fefaasoaai i upu a perofeta—ua tuanai ma le taimi nei. O se pine o se tasi o aoaoga a Peresitene Thomas S. Monson e faitauina faapea, “E tele naua mea i le olaga e faalagolago i o tatou uiga faaalia.”⁶

Twitter

O se fafatala [tweet] na faasoa e Elder David A. Bednar o le Korama a Aposetolo e Toasefululua i le tausaga ua tuanai atu i le taeao o le Eseta sa maimoaina faa-210,000. Na faata’ita’ia e Elder Bednar o se feau puupuu, faigofie, “E le o iinei o Ia, aua ua toetu o Ia” (Mataio 28:6), e mafai ona i ai se aafiaga tumau maoae.

Snapchat

O le mea mulimuli, o ata ma upu e faasoa atu se tasi o Savali a Peresitene Monson o le Au Peresitene Sili na faaalia talu ai nei i le Snapchat.

O Lamatiaga e O Mai Faatasi Ai

Ia, i le faatoa uma ai ona faalauiloa atu o mea lelei uma o nei tekinolosi fou ma faapupula atu o latou faaaogaaga talafeagai, ou te manatu e aoga foi ona talanoaina nisi o lamatiaga e o mai faatasi ai.

E ao ona tatou nofouta uma i le taimi e mafai ona alu uma ai i ala o faasalalauga po o le faaaogaina o polokalama feaveai. O le faaaogaina foi o ala o faasalalauga faaagafesootai e i ai se tulaga lamatia o le faaitiitia o fegalegaleaiga faafesagai, lea e taofiofia ai le atinaega o tomai faaagafesootai o le toatele o o tatou tagata talavou.

O tulaga matautia e o mai faatasi ma anotusi e le talafeagai e le mafai ona ta’uitiitia. O loo i ai se faama’i ua faateleina o le vaisu o ponokalafi i le lalolagi, lea ua leaga sona aafiaga ma afaina ai e oo lava i tagata ma aiga o le Ekalesia.

O le mea mulimuli, ou te ofoina atu ni tulaga lamatia faaopoopo se lua ua alia’e mai, ua faapulou e o la’ua upega le toetoe o tagata uma, e aofia ai tamaitai talavou ma tina ma ava o le lumanai. Ua ou faaigoaina nei tulaga lamatia e lua o “faafoliga o le meamoni” ma “faatusatusaga faavaivailoto.” Ou te manatu o le ala sili e faamatala ai nei tulaga lamatia e lua o le tuuina atu lea o ni nai faataitaiga.

I se tulaga lautele e masani ai, o ata e tuu i luga o ala o faasalalauga e foliga mai e faaataata mai ai le olaga i lona tulaga sili ona lelei ae e masani lava o se auala e le moni. E tele taimi e tumu ai i ata matagofie o teuga o fale, o nofoaga matagofie mo tafaoga, ma le tele o tapenaga o meaai. Ioe, o le mea e matautia ai, o le toatele o tagata e lotovaivai ai ona e foliga mai ua latou matua le gafataulimaina lava lea mea moni ua na ona faafoliga.

Ina ua musuia i se pine o le keke “panikeke” o se aso fanau, sa tuu ai i luga talu ai nei e si o’u tei sana taumafaiga i le mea lava lea. Nai lo le faatagaina o lenei mea e fatu ai se taomiaga e le moomia, sa tonu ia te ia e musuia isi i le tuuina i luga o lana “Pinterest le taulau” (tagai i le ata o le panikeke).

Talosia, ia mafai ona tatou aoao ia maua le tele o mea malie ae ia itiiti le lotovaivai pe a fetaiai ma ni ata o loo faaalia ai ni tulaga faafoliga ma e masani ona taitai atu ai i faatusatusaga faavaivailoto.

E manino ua le na o se faailoga lenei o o tatou taimi ae peitai, a fua atu i upu mai ia Paulo, sa i ai foi i taimi ua sola: ‘Ae o loo fefuafuaai i latou ia te i latou … ma fefaatusatusai i latou ia te i latou, e le popoto” (2 Korinito 10:12).

Sa tuuina mai foi talu ai nei e Elder J. Devn Cornish o le Fitugafulu se fautuaga ua fetaui lelei lava: “Ua tatou faatigaina fua lava i tatou lava e ala i le faatautava ma le faatusatusa. Tatou te faamasino sese lo tatou agavaa faaletagata lava ia e ala i mea tatou te maua pe le maua foi faapea ai ma manatu o isi. Afai e tatau ona tatou ola faatusatusa, ia o tatou faatusatusa lo tatou tulaga sa tatou i ai i le tuanai i le tulaga ua i ai i aso nei—faapea ai ma le tulaga tatou te mananao ia avea ai i le lumanai.”⁷

Sei ou faasoa atu se tasi o mealilo a lo matou aiga, o loo maua i le ata lenei o lo matou aiga (tagai i le itulau o sosoo ai) na pueina i ni nai tausaga ua mavae, a o lei amataina faasalalauga faaagafesootai. A na faapea na pue le ata lea i aso nei, semanu e tuu i luga, e tuu atu ai se aiga o ni tama aulelei se toafa, ua faatulagalelei ia lanu, ma amiolelei, o loo fiafia faatasi i se avanoa o se ata o le aiga. Pe tou te fia mananao i le tala moni lava?

Ou te manatua pea le valaau mai a lo’u toalua i le telefoni. “Gary, o fea oe? O lea matou te i le falepueata o loo i fafo le pueata. O lea ua matou sauni uma e pu’e [le ata]. Sa le’i faigofie le tau faiga o lavalava o tamaiti uma, ia fetaui lelei, ma saunia. Ua e tai latalata mai?”

Oi, ua galo ia te au ma o lea ou te lei alu ese ma le ofisa! Sa afa itula na ou tuai ai, ma sa lei manuia tele le aluga o mea i lo’u le i ai, ua i le laina o le faaletonu.

O le a le mea na tupu? Ia, o lo’u atalii matua, na tamoe solo i le malae ma sa ia tau atu ai i se laau o le apu, ma sa ia tufiina ni apu ma amata ona tau’ai atu i le isi aualii. Sa tau le apu i le tua o lo ma atalii lona tolu ma sa pa’u o ia i lalo, ma amata ai ona tagi.

O le taimi lea, a o tupu lena mea, sa saofai i lalo lo ma atalii lona lua ma sa migi teisi i luga lona ofuvae. Na iloa atu e le isi aualii o ona totini o ni totini taalo papae, e le o totini lotu ia na tuu i fafo e lona tina e fai. Sa ia fesili atu ia te ia, “Aisea na le faia ai ou totini lotu?”

Sa ia fai mai, “Oi, ou te le manao ai. E mageso.”

A o talanoa atu o ia ia te ia, sa tamoe atu lo ma atalii e lua tausaga i le malae, ma lavea ai i se mea, pau i lalo, ma tafetotoi ai lona isu. Ia lea ua sisina ifo le toto i lona ofupaepae faaua laumei ma ua pisipisia ai. O le taimi lea na ou taunuu atu ai. Na pau lava le auala e faasao ai le ata o le liliu o le mitiafu faaua laumei e faau i tua, e nana ai le pisipisia i le toto mai le mea pueata.

O le mea na oo i ai, a o tamoe le ma atalii matua faataamilo ma tauai apu, sa pau o ia i lalo ma sa tele se pisia mai le vao i lona tulivae. O lea la, i le ata sa tuu ai lona ogalima ma le faaeteete e pupuni ai pisia mai le vao.

Ae mo le ma atalii lona tolu, ia, sa matou faatalitali mo le 20 minute seia uma le mumu o ona mata mai le tagi.

Ma, ioe, ua i le papatua nei o le ma atalii laaitiiti ia pisipisia i le toto o lona ofu.

Ae o le ma atalii lona lua ua tuu faalelei lava ona lima i luga o ona totini afeleti papae ina ia fetaui lelei mea uma.

A o au, ia, o le a matuai faatalitali lelei lava aua o lo’u tuai atu lea na mafua ai nei mea uma.

O le mea lea, a outou tagai i lenei ata matagofie o lo matou aiga ma tagiaue ai, “O le a le mea e le mafai ona tatou tuufaatasia ai mea uma ma avea o se aiga e lelei atoatoa le ata e pei o le latou ata?” ia ua outou silafia lelei lava!

Ala o Faasalalauga ma le Galuega Faafaifeautalai

Ua mafai nei ona outou tagai i ai, e manaomia ona tatou manatunatu i tulaga matautia ma tulaga e lamatia ai, e aofia ai mea moni e faafoliga ma faatusatusaga e faavaivailoto. O le lalolagi e le masani ona susulu e pei ona aliali mai i luga o faasalalauga faaagafesootai. Ae ui i lea, e tele mea lelei ua i ai ma o le a oo mai e ala mai i nei fatuaiga o fesootaiga.

Na tuuina mai e le Matagaluega o Faifeautalai ni faatonuga fou i le 2017 i auala lelei e mafai ona faaaoga ai faasalalauga faaagafesootai i le galuega faafaifeautalai. O le tele o punaoa faafuainumera o loo ua avanoa mo i tatou e mafai ona faaaoga i ni auala mamana, faigofie, faatauvaa, ma e matua aoga lava.

E tele naua polokalama mo le faaaogaina o le tekinolosi i ala talafeagai ma le musuia. E tatau ona tatou faia mea uma tatou te mafaia e aoao atu ai le faaaogaina amiotonu o tekinolosi i le augatupulaga faia’e ma ia lapataia ai ma puipuia le faaaogaina ma le le tonu ma mea matautia e o mai faatasi ai foi. E tatau ona fesoasoani lea mea tatou te mautinoa ai, o le a sili atu le aoga o tekinolosi nai lo o lamatiaga e o mai faatasi ai.

“Se Mea ina a Matagofie o Avefeau”

I le taimi sa ou manatunatu loloto ai ma tatalo ma le loto e uiga i lenei savali, sa ou alapo a’e i se tasi taeao ma se pese i ona upu faigofie i lo’u mafaufau: “Se mea ina a matagofie o avefeau o loo folafola mai ia i tatou le talalelei o le filemu.”⁸

O la tatou feau o le savali o le filemu, ma o outou o avefeau matagofie o loo folafolaina atu. E mafai ona outou faia lenei mea e ala i nei alaleo fou ofoofogia o tekinolosi. Ua tatou ola i se lalolagi tulagaese i le atoaga o taimi faatasi ai ma le tomai e folafola atu ai le talalelei o le filemu lea ua i ai moni i o tatou tumutumulima.

Ua ia te i tatou upu faaperofeta a perofeta anamua, ia e faauigaina lelei ai lava o tatou taimi ma tuu mai ai le taitaiga mo o tatou taimi: “Ma e le gata i lea, ou te fai atu ia te outou, o le a oo mai le taimi e salalau atu ai le malamalama o se Faaola i atunuu uma, ituaiga, gagana, ma tagata” (Mosaea 3:20).

Ua i ai foi ia i tatou upu mai i faaaliga i ona po nei, e talanoa mai ma tuuina mai taitaiga mo o tatou taimi ma tulaga. Ou te sii atu [le saunoaga a] Elder Bednar: “Ou te talitonu ua oo mai le taimi mo i tatou o soo o Keriso e faaaogaina lelei ia sili atu le aoga o nei meafaigaluega musuia e molimau atu ai i le Atua le Tama Faavavau, o Lana fuafuaga o le fiafia mo Lana fanau, ma Lona Alo, o Iesu Keriso, o le Faaola o le lalolagi; e folafola atu le moni o le Toefuataiga o le talalelei i aso e gata ai; ma faataunuu le galuega a le Alii.”⁹

Ou te valaaulia outou taitoatasi ina ia matua mafaufau atoatoa i a outou matafaioi e folafola atu le talalelei o le filemu o ni avefeau ofoofogia. Ia tofu faia e i tatou la tatou vaega e faasoa atu ai lo tatou “malamalama o le Faaola” i nuu uma, ituaiga, gagana, ma tagata. O le ala sili e faia ai lenei mea o le tasi o le laa i le taimi ma i se ala tulagaese e sili ona aoga mo oe ma lou aiga. Talosia ia tofu maua e outou taitoatasi le lototele e fai ai lautusi faaletagata i le initoneti, pine, fiafia i ai, faasoa, tuu i luga, tweet, snap, ma toso i luga i se ala e viia, faamamalu ai, ma faaaloalogia ai le finagalo o lo tatou Tama Faalelagi alofa ma aumaia ai se malamalama o le Faaola i lou aiga, o a tatou pele, ma uo—e aofia ai au uo i luga o fesootaiga faaagafesootai.