Lagonaina o le Toe I Ai i le Aiga

Judy Rascher, Colorado, ISA

Ou te lei saunia mo le telefoni mai o lo’u tuagane. “Ua faatoa maliu lava Tina,” o lana tala lea. “Sa pau o ia ma lavea ai lona ulu.”

Sa ou te’i. Ua alu lo’u tina, ae sa ma talanoa ma ia talaatu anapo. Sa ou tuufesili pea pe aisea ua tupu ai lenei mea. Sa le mafai ona ou malamalama pe aisea ua ia tuua ai au. Sa ou ita! Sa tele vaiaso o o’u nofo ai pea ma le ita.

Sa iu ina tonu ia te au le ou te tuua’ia. O le sese o le Atua. Ua vave tele ona Ia aveeseina o ia mai ia te au. Ua tele mea taua o lo’u olaga ua misia e tina, ma sa ou mafaufau o Ia le pogai. Sa le o au o se tagata o le Ekalesia i lena taimi, ae o au o se Kerisiano faamaoni. Nai lo lo’u faalagolago i le Atua mo le malosi, sa ou fulitua mai ia te Ia ma tulei ese atu o Ia mai lo’u olaga.

Ua ou matua misia lava lo’u tina. A o ou tuputupu ae, o le matou fale ma o’u matua o se nofoaga saogalemu. Po o fea lava ou te i ai pe o le a foi sa’u mea sa fai, o taimi uma lava ou te talanoa ai i lo’u tina ma faaalu o’u taimi faatasi ma ia, sa ou lagonaina lava o loo ou i ai i le aiga. O le taimi nei, o lena lagona o le “i ai i le aiga” ua aluese atu.

Na mavae tausaga, ma ua toetoe lava ina a leai atoa so’u faatuatua. Sa ou taumafai e malamalama pe aisea ua oti ai lo’u tina, ae sa leai se mea na aumaia ia te au le filemu. Ona oo lea pe tusa o le vaiaso, sa oo mai pea lava pea le manatu lenei i lo’u mafaufau: Ua tatau ona ou tepa ae i le lagi mo le malamalama. Sa ou faamatalaina lenei mea i si a’u uo pele o se tasi o le Ekalesia. Sa ia fesili mai pe ou te manao e aoao atili i lana faatuatuaga.

Sa ou le iloaina i lena taimi, ae sa fagua lo’u agaga e le Agaga mai se moe gase. O le tele o lo’u aoao e uiga i le talalelei, o le tele foi lena o lo’u lagonaina ua ou toe maua se nofoaga saogalemu. Sa toe foi mai le lagona o le “i ai i le aiga”.

Sa ou papatiso ia Me 2013. Ou te faafetai ona ua toe foi mai lo’u faatuatua. Ua ou le toe fulitua i le Atua. Nai lo lena, ua ou opomauina o Ia. O loo ou faanoanoa pea lava i le maliu faafuasei o lo’u tina, ae ona o lo’u faatuatua i le Atua, ua ou iloa ai o le a i ai se aso o le a ou “i ai i le aiga” faatasi ma lo’u tina ma lo’u aiga e faavavau.