Faaipoipoga, Tupe, ma le Faatuatua
E alala le tusitala i Ashanti Region, Kana.
E utiuti se ma taimi na i ai ma la’u uo a o lei faia le ma faaipoipoga, ma utiuti foi le seleni, peitai, sa ia i ma’ua se mea na sili atu le taua: o le faatuatua.
Sa ou auai i le fonotaga a le autalavou nofofua matutua i Kumasi, Kana, e le faapea ona sa ou manaomia se uo teine—ua uma la’u faamauga—ae ona sa ou lagonaina sa ou manaomia se uunaiga atili ma o le fonotaga lea o le nofoaga sa’o lea e maua ai. E moni lava, na tali mai a’u tatalo i le fonotaga ina ua uma ona saunoa Sister Call, o se faamisiona matua sa tofi e galulue ma le autalavou nofofua matutua, e uiga i le taua o le faaipoipoga i le malumalu.
I le taufaaiuiuga o le talanoaga, sa faafuasei ona suia ona foliga ma sa ia faapea mai, “E te le manaomia ni tupe e faaipoipo ai—na pau le mea e te manaomia o le faatuatua.” Sa ou lagonaina e pei lava o la e talanoa sa’o mai ia te au, ae ou te lei manatu e mafai moni ona ou faaaogaina aua sa tatau ona ma faatauina ni mea e tapena ai mo le faaipoipoga. Sa ou faapea ifo ia te au lava, “E mafai faapefea ona ou le manaomia le tupe ae na o le faatuatua?”
Sa ou saga mafaufau pea i lenei mea i le aluga o le vaiaso. I le faagasologa sa ou fesili ifo ai ia te au lava, “Pe fuapau ea e le Atua mea e mafai ona Ia faia?” Muamua, sa ou mafaufau e leai, ae i se toe mafaufau i ai, sa ou manatu ai ioe. Ona oo mai ai lea o se fesili tulitatao, “E mafai faapefea ona Ia fuapauina pe afai o ia te Ia le mana uma?” Na aoaoina au e le Agaga i le tali: O faamanuiaga a le Atua e faalagolago i lo tatou usiusitai ia te Ia. E le fuapauina Lona gafatia ona faamanuia i tatou, ae e tatau ona tatou valaaulia na faamanuiaga e ala i le faaaogaina o le faatuatua e faia ai mea e finagalo o Ia tatou te faia.
Mulimuli ane, sa ou valaau atu i la’u uo, o Pisila, e talanoaina a ma fuafuaga faataatitia o le faaipoipoga. E ui i le utiuti o a ma tupe, ae sa tonu ia i ma’ua e filifili se aso mo la ma faaipoipoga, ae sa lei mafai ona tonu ia i ma’ua se aso. Sa ma ioe e tatau ona ia fesili i lona epikopo pe o a aso o loo avanoa i kalena a le siteki ma le uarota. Mai aso e lua sa ia ofoina mai, sa ma filifilia le aso 27 o Setema, 2014—o lona uiga toeitiiti le atoa le fitu vaiaso oo i le aso o le faaipoipoga!
Na fesili Pisila, “Obim [o lona uiga, “lo’u fatu” i le gagana Igbo], o i ai sau tupe? Ua puupuu le taimi.”
Sa ou tali atu, “E leai, ae o loo i ai sina o’u faatuatua.”
Sa ata o ia ma fai mai, “E le afaina. Ta anapopogi ma tatalo.” I le toe faaupuina o le 1 Nifae 3:7, sa ia toe fai mai, “O le a tatala e le Alii se ala mo i ta’ua aua ua Ia poloai mai ia i ta’ua ia faaipoipo.”
I totonu o lena vaiaso sa totogi ai au i se galuega sa ou faia i ni masina ua mavae. Ona fai mai lea o Pisila, ua manao e amata se pisinisi e sue ai nisi tupe. O le tupe na ou maua, sa ia faatauina mai ai ni ato taitai tuai a fafine ma toe faatauina atu. Ina ua uma ona faatau mai nisi o mea o lana lisi o mea sa moomia, sa totoe le sili atu i le faaluaina o le tupe sa ou tuuina atu ia te ia.
I le taimi lea, sa leai ni galuega na aga mai mo au. Sa le oo galuega uma na folafola mai. Ua toe lua vaiaso na totoe ma sa i ai lava mea sa manaomia ona faatau. Sa fautua mai la’u uo e toe tolo i tua le aso. Na pau lava la’u tala o le, “O loo agai mai se vavega.”
O le toe lua o aso oo i le aso o la ma faaipoipoga, na tupu ai le vavega: Sa totogi a’u mo se galuega sa ou faia i le silia ma le lua vaiaso na muamua atu. Sa ou aoaoina foi, o le faatuatua ma le galue malosi, o le a faamanuia ai i tatou e le Alii e faataunuu a tatou sini amiotonu.
Sa ma o i le faletupe e tala le siaki ma mai iina i le maketi e faatau mai mea na totoe sa manaomia e ui i timuga mamafa, lea na ma vaai atu i ai o le faamaoniga a le lagi i a ma’ua faatinoga o le faatuatua.
E lei atoa le 24 itula mulimuli ane, ae ma faaipoipo loa. Ina ua faatonuina i ma’ua e faafesuiai a ma tautoga, sa leai se mea i lo’u olaga e faatusa i ai le lagona na ou maua. Sa ou matuai lagonaina le [lagona] o le ausia o se mea, lea sa ou talitonu e mafai ona ou faia mea uma e ala i le faatuatua mai lava i lena taimi. Na faamauina i ma’ua mulimuli ane i le Malumalu o Accra Kana.
E ui atonu e te manaomia sina tupe e sauniuni ai mo le faaipoipoga, ae o le mea aupito sili ona taua e te manaomia o le faatuatua.