O Ala i le Fiafia Moni
Saunia e Elder Ulisses Soares
O Le Au Peresitene o Fitugafulu
Mai se saunoaga i se faauuga, “O Ala mo le Fiafia,” na tuuina atu i le Iunivesite o Polika Iaga–Hawaii i le aso 8 Iuni, 2017.
Talosia ia tatou tofu filifili e alolofa i le Alii ma mulimuli i Ona ala i le fiafia.
E sili atu nai lo se isi lava mea, e finagalo le Tama Faalelagi i lo tatou fiafia moni ma tumau.
“O lo tatou fiafia o le mamanu lea o faamanuiaga uma ua Ia tuuina mai ia i tatou—aoaoga o le talalelei, poloaiga, sauniga o le perisitua, sootaga faaleaiga, perofeta, malumalu, o le matagofie o foafoaga, e oo lava i le avanoa e oo ai i puapuaga. … Na Ia auina mai Lona Alo Pele e faatino le Togiola ina ia mafai ai ona tatou fiafia i lenei olaga ma maua se atoaga o le olioli i le faavavau.”1
O loo taufai saili tagata i soo se mea mo se mea. I la latou lava ala, o le mea o loo latou sailia moni o le fiafia. Peitai, o le mea moni lava ia, e toatele e le o maua le fiafia “ona ua latou le iloa le mea e maua ai” (MF&F123:12).
Talu ai latou te le iloa le mea e maua ai le fiafia moni ma le tumau, ua latou sailia ai i mea e aumaia moni ai na o le fiafia e le tumau—o le faatauina o mea, sailia o le mamalu ma viiga mai le lalolagi e ala i amioga e le talafeagai pe taulai atu foi i le aulelei ma le lalelei faaletino.
O le tuinanau e tele ina fenumiai ma le fiafia. E foliga mai o le tele lava ina sailia e tagata o le tuinanau e le tumau, o le faaitiitia foi lea o lo latou fiafia. E masani lava, o le tuinanau e mo na o sina taimi puupuu lava.
E pei ona saunoa Peresitene Tavita O. MaKei (1873–1970): “E ono mafai ona e maua lena tuinanau faapasitaimi, ioe, ae e le mafai ona e maua le olioli, e le mafai foi ona e maua le fiafia. O le fiafia e nao lena lava ala maomoomo e maua ai, e ui lava ina vaapiapi ae sa’o, lea e tau atu i le ola e faavavau.”2
Ae paga lea, mo le toatele, o le fiafia e le mafaamatalaina. Ua iloa e saienitisi e faapea “e sili atu i le na o se lagona lelei, o le fiafia o se tulaga o le soifua manuia lea e siomia ai le ola i se olaga lelei—o lona uiga, e faatasi ai ma se lagona o le taua ma le faamalieina loloto.”3
Ua faaalia i sailiiliga e faapea, o le fiafia e le o le taunuuga o le oso atu mai lea aafiaga i le isi. Nai lo lena, o le ausiaina o le fiafia e masani lava ona aofia ai se taumafaiga e umi ona lagolagoina mo se mea e sili atu ona taua i le olaga. O le fiafia e fua i mamanu o mausa, amioga, ma mafaufauga ia e mafai ona tatou taulimaina tuusao i le faatinoga ma le faamoemoe i ai. O le tele o lo tatou fiafia o le mea moni e “i lalo o le faafoega a le tagata lava ia.”4
Se’i o tatou mafaufau lava i le taua o nisi o ala o le fiafia o loo maua i tusitusiga paia ma sa aoao mai e perofeta ma aposetolo o ona po nei. O le totoina faamaoni ma le mausali o o tatou tulagavae i luga o na ala o le a mafai ai ona tatou olioli i le fiafia i la tatou malaga o loo lupe.
Mama
O le ala muamua o nei ala o le mama, o se mamanu lea o mafaufauga ma amioga e faavae i luga o tulaga faatonuina mama ma maualuga. E aofia ai le legavia ma le amio mama a’ia’i, lea e te agavaa ai e ulu atu i malumalu paia. O tagata amiomama ua ia te i latou se agatamalii filemu ma le malosiaga i totonu. E to’a i latou aua ua latou agavaa e maua ma ia taialaina e le Agaga Paia. O le mama e amata i le loto ma le mafaufau, ma o se faaputuga o le fia afe o nai faaiuga ma faatinoga laiti i aso taitasi.
“Ia teuteuina ou manatu i le mama e le aunoa; ona malosi ai lea o lou faatuatua fai ifo i luma o le Atua; ma toto ifo i lou agaga le mataupu faavae o le perisitua e pei o le sau mai le lagi.
“O le a avea le Agaga Paia ma āu soa e lē aunoa, ma o lou tootoo o le a avea ma se tootoo lē feliuliuaʼi o le amiotonu ma le upumoni; ma o lau puleaga o le a avea ma se puleaga tumau-faavavau, ma e aunoa ma ni ala faamalosia, o le a tafe mai ia te oe e faavavau ma faavavau lava” (MF&F 121:45–46).
Sa aoao mai Peresitene Thomas S. Monson (1927-2018) e faapea, “e leai se faigauo e sili atu ona taua nai lo lou lava lotofuatiaifo manino, lou lava ola mama—oka se lagona ina a mamalu o le iloa lea o loo e tu i lou tulaga atofaina ma le mama ma le mautinoa o loo e agavaa e faia lena mea.”5
Amiosa’o
O se ala lona lua o le fiafia o le amiosa’o. Na aoao mai Elder Richard G. Scott (1928–2015) o le Korama a Aposetolo e Toasefululua:
“Ia iloa o le fiafia tumau e maua mai i le ituaiga tagata o e i ai, ae le mai i au mea o i ai.”
“O le olioli moni e maua mai le uiga amiotonu, ma e fausia lena mea mai se mamanu o faaiuga amiotonu faifai pea. … O au faaiuga amiotonu e fua i ai pe o ai oe ma pe o a mea e taua ia te oe. Latou te faia e faafaigofie ai le faia o mea tonu. Mo le fiafia i le taimi nei ma lou olaga atoa, ia usiusitai ma le mausali i le Alii.”6
A tatou suesue i tusitusiga paia, tatou te aoao ai o folafolaga na faia e le Alii ia i tatou e uunaia ai le ola amiotonu. O na folafolaga e faafailele ai o tatou agaga, e aumaia ai le faamoemoe e ala i le faamalosiauina o i tatou e aua le fiu e oo lava i le fesaga’iga ma luitau i aso taitasi, o le ola ai i se lalolagi ua fai ifo ia mataupu faavae mama ma le faatauaina o le ola mama. O le mea lea, e manaomia ona tatou faamautinoa o o tatou mafaufauga, upu, ma faatinoga e taitai atu ai i tatou i le ala e toe foi ai i lo tatou Tama Faalelagi.
Faamaoni
O se ala lona tolu i le fiafia o le faamaoni. E taua lava le malamalama e faamanuiaina i tatou e le Atua e tusa ai ma lo tatou faatuatua, o le faapogai lea o le ola ma se faamoemoega paia ma se vaaiga i le faavavau. O le faatuatua o se mataupu faavae aoga e musuia ai le maelega. E faaalia i o tatou uiga lelei ma le manao ia faia ma le lotomalie mea uma e poloaiina ai i tatou e le Atua ma Iesu Keriso. O mea e aveifo ai i tatou i o tatou tulivae ia ole atu i le Alii mo le taitaiga ma fautuaina ai i tatou e tulai ae ma faatino ma le mautinoa, ia ausia mea e ogatusa ma Lona finagalo.
A o e agai atu i luma i lau malaga, o le a tofotofoina oe ia iloa ai pe o le a e faia mea uma e poloaiina ai oe e le Alii lou Atua (tagai Aperaamo 3:25). O se vaega lea o le potomasani i le olaga nei. O le a manaomia ai lou fetaomi atu i luma ma le tumau i le faatuatua ia Keriso, taialaina e le Agaga ma faalagolago atu o le a tuuina mai e le Atua o tatou manaoga.
Ia manatua e le tatau ona e faavaivai i lou faatuatua—e oo lava i taimi e sili ona faigata. A e tumau mausali, o le a faateleina e le Alii lou gafatia e tulai ae ai i luga atu o luitau o le olaga. O le a mafai ona e faatoilaloina lagona le lelei, ma o le a e atiae le gafatia e faatoilalo ai, e oo lava i mea e foliga mai o ni faafitauli lofituina.
Paia
O le paia, o se tasi lea ala i le fiafia, e fesootai i le atoatoaga faaleagaga ma le mama. O le paia e faailoa mai ai le mama a’ia’i o le loto ma faamoemoega. E mafai faapefea ona tatou galulue i aso taitasi e fafaga i tatou lava faaleagaga ina ia mafai ona tatou atiae se uiga faaleatua?
Na tali Peresitene Harold B. Lee (1899–1973): “Tatou te atiae o tatou lava tagata faaleagaga e ala i le faata’ita’ia. … E tatau ona fai a tatou faamalositino i aso taitasi e le agaga e ala i le tatalo, e ala i le faia o galuega lelei i aso taitasi, e ala i le faasoa atu i isi. E tatau ona fafaga o tatou agaga i aso taitasi e ala i le suesue o tusitusiga paia i aso uma, e ala [i afiafi faaleaiga], e ala i le auai i sauniga, e ala i le aai ma feinu i le faamanatuga. …
“O le tagata amiotonu e taumafai mo le faaleleia atili o ia lava ma le iloa e tatau ona ia salamo i aso taitasi.”7
O se tasi elemene taua o le paia e fesootai i le osia ma le tausia o feagaiga i le malumalu. Afai tatou te faamaoni, o nei feagaiga e mafai ona sii ae ai i tatou i luga atu o tuaoi o lo tatou lava mana ma le vaaiga mamao. O faamanuiaga uma ua folafolaina mai o le talalelei a Iesu Keriso e mafai ona tatou maua e ala i lo tatou faamaoni i sauniga ma feagaiga tatou te osia i luma o le Tama Faalelagi ma Iesu Keriso i le malumalu. O se vaega o le mamanu o le ola “e tusa ma le ala o le fiafia” e aofia ai le fauina o se malumalu e tapuai ai ma osifeagaiga ai ma le Alii (tagai 2 Nifae 5:16, 27).
O le vaega taua o lenei ala o le tatau lea ona tatou matua faaeteete e atiae faaleagaga ma ia mama a’ia’i.
Usiusitai
O le tausia o poloaiga uma a le Atua e fesootai ma isi ala i le fiafia. Ina ua uma ona vavaeese mai sa Nifae mai ia sa Lamana, sa matua faamanuiaina lava i latou a o latou tausia faaiuga, tulafono, ma poloaiga “a le Alii i mea uma, e tusa ai ma le tulafono a Mose” (2 Nifae 5:10). O le mamanu lea o se tasi lea elemene taua o le ola “e tusa ma le ala o le fiafia.”
Na aoao mai Peresitene Monson: “Pe a tatou tausia poloaiga, o le a sili atu le fiafia o o tatou olaga, sili ona faamalieina, ma faaitiitia foi le faigata. O le a faigofie atu ona onosaia o tatou luitau ma faafitauli, ma o le a tatou mauaina faamanuiaga folafolaina [a le Atua].”8 Na Ia fetalai foi, “O le malamalama lea tatou te sailia, o tali o loo tatou momoo i ai, ma le malosi ua tatou mananao i ai i nei aso e faafetaiaia ai luitau o se lalolagi faigata ma fesuisuiai e mafai lava ona fai mā tatou pe a tatou naunau e usiusitai i poloaiga a le Alii.”9
O le Faaola e pulugavaina i tatou:
“Afai tou te alofa mai ia te aʼu, ia outou tausi mai i aʼu poloaiga. …
“O le ua ia te ia a’u poloaiga ma tausi i ai, o ia lea e alofa mai ia te a’u: o lē alofa mai foi ia te a’u e alofaina o ia e lo’u Tama, ou te alofa foi ia te ia, ma ou faaali ia te ia” (Ioane 14:15, 21).
O Le Le Manatu Faapito ma le Alofa
O le ala auro i le fiafia o se ala o le le manatu faapito ma le alofa—alofa e i ai le manatu atu, naunau, ma ni fuataga o le alofa mama mo tagata ola uma. O le alofa o le ala tuusao lea i le fiafia lea o le a faatamaoaigaina ma faamanuiaina ai o tatou olaga ma olaga o isi. O lona uiga, e pei ona fetalai le Faaola, e te faaalia le alofa tusa lava pe o ou fili (tagai Mataio 5:44).
O le faia o lena mea, o le a e faataunuuina ai le poloaiga e sili atu o le alofa i le Atua. O le a e lele a’e i luga atu o matagi faataumaoi e agi mai—i luga ae o mea inosia, o mea faatoilalo tagata, ma mea inosia. O le fiafia moni ma le tumau e oo mai i le na o le taimi tatou te filifili ai e “alofa atu i le Alii lou Atua ma lou loto atoa, ma lou agaga atoa, ma lou manatu atoa” (Mataio 22:37; tagai foi Teuteronome 6:5; Mareko 12:30; Luka 10:27).
Ia taitasi i tatou ma filifili e alofa i le Alii ma mulimuli i Ona ala i le fiafia, “o le faamoemoe lea ma le mamanu o lo tatou i ai iinei.”10