Faamagaloga

O le faamagalo atu o se uiga auaumamā faaleatua. O le faamagalo po o le onotafia se tasi mai tuuaiga mo se solitulafono po o se mea sese. O loo faatatau tusitusiga paia i le faamagaloga i ni auala se lua. Ua poloaiina i tatou e le Alii ia salamo i a tatou agasala ma saili i Lana faamagaloga. Ua Ia poloaiina foi i tatou e faamagalo i latou o e faatiga pe faaafāina i tatou.

Vaaiga Lautele

Tusifaamaumau Ou Lagona Uunai

Sailia o le Faamagaloga mai le Alii

O le agasala o se avega mamafa. E aumaia ai popole o le ta’usalaina ma le ita i le iloaina sa tatou faia faatinoga e faasagatau i le finagalo o lo tatou Tama oi le Lagi. E aumaia ai le faanoanoa umi a o tatou iloa ona o a tatou amioga, atonu na tatou faatiga ai i isi ma taofia ai i tatou mai le mauaina o faamanuiaga ua saunia lo tatou Tama e tuu mai ia i tatou.

Ona o le Togiola a Iesu Keriso, ua mafai ai ona tatou maua le faamagaloga mo a tatou agasala e ala i le salamo faamaoni ma atoatoa. O le agasala e aumaia ai le mafatia ma le tiga, ae o le faamagaloga a le Alii e aumaia ai le toomaga, mafanafana, ma le olioli. Ua folafola mai le Alii:

“Faauta, o ia o lē ua salamo i ana agasala, o ia lava lea ua faamagaloina, ma o Aʼu, o le Alii, e lē toe manatuaina lava i latou” (Mataupu Faavae ma Feagaiga 58:42).

“E ui lava ina pei o ofu mumu a outou agasala, e sisina ia e pei o le kiona; e ui lava ina mumu ia e pei o le ie ulaula, e avea e pei o fulufulu mamoe” (Isaia 1:18).

E mafai ona tatou oo i lenei vavega, e tusa lava pe tatau ona tatou salamo i agasala matuia po o vaivaiga o lea aso ma lea aso. E pei lava ona faatoga atu le Faaola i tagata anamua, ua Ia faatoga mai foi ia i tatou i aso nei:

“Ia outou o mai ia te au, outou uma o e tigaina ma mafatia i avega, o au foi e malolo ai outou.

“Ia outou amoina la’u amo, ma ia outou faaa’oa’o ia te au, aua o au lē agamalu ma le loto maulalo, ona maua lea e outou o le malologa mo outou agaga.

“Aua e avegofie la’u amo, o la’u avega foi e mama ia” (Mataio 11:28–30).

“Pe tou te le foi mai nei ea ia te au, ma salamo ia outou agasala, ma liliu, ina ia ou faamaloloina outou?”

“Ioe, e moni ou te fai atu ia te outou, afai tou te o mai ia te au, o le a outou maua le ola faavavau. Faauta, ua faaloaloa atu ia te outou lou lima alofa mutimutivale, ma o soo se tasi e sau, o ia lea o le a ou taliaina; ma amuia lava i latou o e e o mai ia te au” (3 Nifae 9:13–14).

Faamagalo Atu i Isi

E faaopoopo atu i le sailia o le faamagaloga mo a tatou lava agasala, e tatau foi ona tatou naunau e faamagalo atu i isi. Ua fetalai mai le Alii, “E tatau ona outou faamagalo i le tasi; ona o ia o lē e lē faamagalo atu i lona uso i ana agasala, e tu taʼusalaina o ia i luma o le Alii; aua e tumau ia te ia le agasala tele atu. “O Aʼu, o le Alii, Ou te faamagalo i lē o le a Ou faamagaloina, ae o outou ua poloaiina ia faamagalo atu i tagata uma” (Mataupu Faavae ma Feagaiga 64:9–10).

I tulaga o le olaga i aso uma lava, o le a mautinoa lava lo tatou afaina ona o isi tagata—o nisi taimi sa le’i fuafuaina ae o nisi taimi sa faia ma le loto i ai. E faigofie lava ona lagona le to’atama’i po o le ita po o le fia tauimasui i tulaga faapena, ae e le o le ala lena a le Alii. Na fautua mai le Faaola, “Ia outou alolofa atu i e ua ita mai ia te outou, ia outou faamanuia atu i e ua fetuu mai ia te outou, ia outou agalelei atu i e ua inoino mai ia te outou, ia outou tatalo foi mo e ua tuuai fua mai ma faasaua mai ia te outou” (Mataio 5:44). Ua Ia faia le faataitaiga atoatoa o le faamagaloga ina o i ai o Ia i luga o le satauro. I le faatatau atu i fitafita Roma o e sa faasatauroina o Ia, sa tatalo o Ia, ‘Lo’u Tama e, ia e faamagalo atu ia te i latou; aua ua latou le iloa le mea ua latou faia’ (Luka 23:34; tagai i le vaefaamatalaga c).

E tatau ona tatou tatalo mo le malosi e faamagalo ai i latou o e ua agaleagaina i tatou, ma e tatau ona tatou lafoaia lagona o le ita, to’atama’i, po o le tauimasui. E tatau foi ona tatou vaavaai mo le lelei i isi nai lo o le taulai atu i o latou sasi ma faateleina o latou vaivaiga. O le a faamasino le Atua i amioga faatiga a isi.