O Le Mana o le Faamagalo Atu

“Sau la’ia, uso pele e, talu ai o le taua ua mavae, Aua o uo muamua, ua toe uo foi ma e tumau ma mamae”

Mai le Soifuaga o Iosefa Samita

I le taumafanafana o le 1839, na faaigoaina ai e le Perofeta ia Navu le nofoaga lea na faapotopoto i ai le Au Paia i itu i Ilinoi o le Vaitafe o Misisipi. O le igoa e mafua mai le gagana Eperu, e faailoa mai ai “se tulaga po o se nofoaga matagofie, e tauaveina foi ma le manatu o se malologa.”¹ I lalo o le taitaiga a le Perofeta, na amata ona suia e le Au Paia le nuu o Commerce i se aai matagofie tele. Na muamua lava ona suia o latou tamai fale ma faleie i ni fale laau o nofoaga tau faato’a, ona sosoo ai lea ma fale laupapa ma amata loa ona i ai fale piliki tetele lava. Na latou totoina laau aina ma laau pāolo ma laau sosolo ma laau teuteu e faamatagofie ai o latou fasi fanua tetele. I la latou Navu matagofie, na faamoemoe le Au Paia e maua ai se nofoaga sulufai filemu lea e mafai ona latou faagaloina ai sauaga na oo ia i latou i Misuri.

I le taimi lea o le fausiaina o lo latou nuu, na i ai se mea na oo i ai Iosefa Samita na faaalia ai lona mafaufau alofa mutimutivale ma le naunautai e faamagalo atu i isi, ma tuuina atu ai ia i latou le avanoa e salamo ai i sese na latou faia i le taimi ua te’a. Na faamatala mai e Daniel Tyler le mea na tupu:

“O se alii o le na tu maualuga i le Ekalesia a o i Sisifo Mamao [Misuri], na ma’i tigaina ma faataotolia i le maalili po o le mumu ma le fiva. A o vaivai lava lona mafaufau ma lona tino, na faaita lona mafaufau ma faatosinaina o ia e le au liliuese ina ia latou o faatasi. Na ia faia ai se molimau faatuiese i le Perofeta. A o faamautu le Au Paia i Commerce, ma malosi o ia mai lona mai, na malaga ese o ia mai Misuri ae agai atu i Quincy, Ilinoi. O iina na galue ai o ia e ta ta fafie e maua ai se tupe e mafai ai ona malaga ma lona aiga i Navu, ma [ave ai] se meaalofa i le tagata o le Atua ua manu’a pe afai o le a ia faamagaloina o ia ma faatagaina o ia e toe foi atu i le lafu. … Na ia lagonaina e leai lava se faaolataga i se isi lava mea mo ia ma afai o le a faafitia lana talosaga o lona uiga ua leiloa ma faaumatia mea uma i lona manatu. Na amata o ia i se loto faavauvau ma foliga faanoanoa.

“A o malaga [lenei alii] na tauina atu e le Alii ia Uso Iosefa o loo malaga mai o ia. Na tilotilo atu le Perofeta i le faamalama ma iloa atu ai o ia o loo agai i le auala. O le taimi lava na liliu ai o ia e tatala le faitotoa, na tulai le Perofeta mai lona nofoa ma tamoe atu e faafetaui ia te ia i le lotoa, ma alaga, ‘Oi Uso e—, ua matua ou fiafia lava e vaai ia te oe!’ Na ia fusi atu i lona ua ma fetagisi ai faatasi i la’ua pei o ni tamaiti.

“Ua lava le faapea atu na uia auala tonu uma o le toefuataiga ma o le alii na pa’ū na toe ulufale mai i le Ekalesia e ala i le papatisoga, toe maua lona Perisitua, malaga atu i ni misiona taua, faapotopoto ma le Au Paia i Siona ma maliu ai a o atoatoa lona faatuatua.”²

O George Q. Cannon, o le na auauna o se fesoasoani i le Au Peresitene Sili, na tuuina mai nisi foi faamaoniga o le natura faamagalo atu o Iosefa Samita: “Faatasi ai ma lana lagolago maumaututu o le upu moni, ma lona usiusitai tutumau i poloaiga a le Atua, na maua ai e Iosefa le alofa tunoa i taimi uma i e vaivai ma e agasala. I le taumafanafana o le 1835, na galue ai o ia i aufono ma fonotaga i Katelani ma nuu lata ane, ma tofia ai e auai i faamasinoga na faia e molia ai nisi o tagata o le Ekalesia o e na faamasinoina ona o faamatalaga na latou faia e tetee ai i le Au Peresitene o le Ekalesia. Pe na palasi atu ia te ia le vili na te tulai e aioi mo le ua molia pe tu ai e tetee i le ua molia, e ui lava atonu o ia lava na faia i ai se mea sese, na ia faia lana vaega ma le tele o lona alofa ma le faamasinoga tonu na manumalo ai o ia i le alofa o tagata uma.”³

Aoaoga a Iosefa Samita

E tatau ia i tatou ona faaaoga le mataupu faavae o le alofa tunoa ma faamagalo atu i o tatou uso ma tuafafine.

“O se tasi o vaaiga sili ona faafiafia loto lea e mafai ona tupu i le lalolagi, pe a faia se agasala e se tasi tagata i se isi, o le, faamagaloina o lena agasala; ona tusa ai lea ma le mamanu maoae silisili ma le atoatoa a le Faaola, ia tatalo i lo tatou Tama i le Lagi e faamagalo foi ma [lē agasala].”⁴

“Ia tausi i le faaaogaina o le mataupu faavae o le alofa tunoa, ma ia saunia e faamagalo atu o tatou uso i le uluai faailoga lava o le salamo, ma le talosaga mai mo se faamagaloga; ma afai lava tatou te faamagalo i o tatou uso, po o o tatou fili foi, a o le i salamo o ia ma talosaga mai mo se faamagaloga, o le a faapena foi ona oo mai le alofa tunoa o le Tama Faalelagi ia i tatou.”⁵

“Fetausiai ma onosaia e le tasi le isi, aua e faapena ona faia e le Alii ia i tatou. Tatalo mo o outou fili i le Ekalesia ma aua nei outou fetuu i o outou fili i fafo o le Ekalesia: aua o ia te a’u le taui ma sui, ua fetalai mai ai le Alii, ma ou te taui atu [tagai i le Roma 12:19]. I tagata faauuina taitoatasi, faapea tagata uma lava, matou te faapea atu, ia alofa mutimutivale ma o le a outou maua ai le alofa tunoa. Saili atu ia fesoasoani e faasaoina agaga, ae le o le faaumatia o i latou: aua e moni ua outou iloa, e ‘faapea foi ona tele o le olioli i le lagi i le tagata agasala e toatasi e salamo, a e itiiti i e amiotonu e toaivagafulu ma le toaiva e le tusa i ai le salamo.’ [Tagai i le Luka 15:7.]”⁶

Na lipotia mai e Eliza R. Snow nei upu a le Perofeta: “E tatau [i le Au Paia] ona faaauupegaina i le alofa tunoa, e ui lava i agasala i lo tatou lotolotoi. Na ia faapea mai na fesoasoani i le aumaia o agasala i le malamalama—o se lagona faanoanoa lea ma le matautia ona o le toatele o e tuuina atu i latou lava i le tausalaga a le tiapolo, ma o atu ai i le malaia. Faatasi ma lagona loloto na ia faapea mai o i latou o uso faaletino, na tatou alolofa ia i latou, e le tatau ea ona tatou faamalosiau ia i latou i le toefuataiga? Tatou te le i faamagaloina i latou seia fitugafulu ni fitu, e pei ona faatonuina e lo tatou Faaola [tagai i le Mataio 18:21–22]; atonu e le i faatasi ona tatou faamagaloina i latou. O loo i ai nei se aso o le faaolataga mo e salamo ma toefuatai mai.”⁷

“Manatu pe a faapea e tetee Iesu Keriso ma agelu paia ia i tatou i mea faatauvaa, o le a le mea e oo i ai i tatou? E tatau ona tatou alofa mutimutivale le tasi i le isi, ae aua le amanaiaina mea laiti.”⁸

Na lipotia mai e Uiliata Risati, o se sui o le Korama a le Toasefululua: “Na ta’u mai e Iosefa ua lelei mea uma i le va o ia ma le lagi; ma e leai se feitagai i le va o ia ma se tasi; ma e pei o le tatalo a Iesu, po o lana mamanu, na tatalo ai Iosefa—‘Le Tama e, faamagalo mai a’u i a’u agasala e pei ona ou faamagaloina atu i e agaleaga mai ia te a’u’ [tagai i le Mataio 6:12, 14], aua ou te faamagalo fuaina atu tagata uma. Afai tatou te faamautuina ma faatupuina le alofa o isi, e tatau ona tatou alolofa i isi, e oo lava i o tatou fili faapea foi a tatou uo.”⁹

O le faamagalo atu e toefuataiina mai ai le lagona o le lotogatasi.

“E oo mai ia te a’u le faanoanoa ona e le o i ai se lagona sili atu o le lotogatasi; afai e mafatia se tagata e toatasi, e lagona e tagata uma; e ala i le gatasi o lagona tatou te maua ai le mana faatasi ma le Atua. Na fetalai mai Keriso na Ia afio mai e valaau e agasala i le salamo, ina ia faaolaina ai i latou. Na ta’usalaina Keriso e le au sa Iutaia faafia-amiotonu aua na Ia faatasi atu ma e agasala; na Ia aveina i latou i luga o le mataupu faavae ua latou salamo i a latou agasala. … Afai e salamo [e agasala], e tatau ona tatou aveina i latou, ma e ala i le agalelei ia faapaia ma faamama i latou mai amioletonu e ala i a tatou uunaiga i le leoleoina o i latou. … E leai ma se isi auala ua fuafuaina e taitaiina tagata ina ia tuueseina le agasala nai lo le uuina o o latou lima, ma leoleo ia i latou ma le alofa.”¹⁰

Na tusi le Perofeta o Iosefa Samita i se vaega o taitai o le Ekalesia: “O lenei, uso e, ou te fia ta’u atu ia te outou, o lo’u agaga o le foai atu ma le faamagalo atu, o le tauave ma le taofimau, faatasi ai ma le faapalepale ma le onosai, i leaga, sese, vaivaiga, ma amioleaga a o’u uso ma le lalolagi atoa o tagata; ma o lo’u faatuatuaga ma lo’u alofa ia te outou e le faaitiitia, pe faavaivaia. Ma lenei, afai e valaauina outou e tauaveina faatasi ma i matou se vaega itiiti o o matou vaivaiga ma sese, ma afai, e talia faatasi ma i matou se aoaiga ia te outou, aua nei tiga o outou loto. … Pe a tatou feiloai faafesagai, ou te faamoemoe, e aunoa ma so’u masalosalo, o mataupu uma i lo tatou va o le a manino ma malamalama, ma o le a manumalo le alofa atoatoa; ma o feagaiga paia ia o loo fusifusia ai faatasi i tatou, o le a nofo i le tumutumuga o o tatou loto.”¹¹

Na tuuina mai e le Perofeta o Iosefa Samita le saunoaga lea i se fonotaga ma ona fesoasoani i le Au Peresitene Sili ma le Toasefululua: “Ua i ai taimi ua ou tautala atu ai ma le malosi mai le lagona o lea lava taimi, ma e talu ai ua ou faamanu’alia o outou lagona, uso e, ou te talosagaina la outou faamagaloga, auā ou te alofa ia te outou ma o le a ou lagolagoina outou ma lo’u loto atoa i le amiotonu atoatoa, i luma o le Alii, ma luma o tagata uma; auā ia outou mautinoa, uso e, ua ou naunau e taofi le agi mai o le faatuiesega uma, i afa ma matagi, i faititili ma uila, mai le sami ma mai le eleele, i le vaomatua po o uso pepelo, po o tagata leaga, po o soo se mea lava e valaauina i ai tatou e le Atua i Lona finagalo silafia. Ou te matua finafinau ina ia le mafai e mea maualuluga po o mea loloto, nofoaiga po o mana, mea o le taimi nei po o mea o le a oo mai, po o se mea ola lava e tasi, o le a vavaeeseina a’u mai ia te outou [tagai i le Roma 8:38–39].

“Ma o le a ou osi feagaiga nei ma outou i luma o le Atua, o le a ou le faalogo lava pe faamaonia soo se lipoti faatoilalo e tetee i soo se isi lava o outou, pe ta’usalaina outou ona o ni molimau i lalo o le lagi, vagana ai o lena molimau lea e matua faamaonia, ae seia oo ina tatou feiloai faafesaga’i, ma iloa ai le moni ma le faamaoni; ma ou te matua tuuina atu lo’u faatuatuaga i a outou upu, aua ou te talitonu ia te outou o tagata o le upu moni. Ma ou te talosaga atu foi ia te outou, pe a ou ta’u atu ia te outou soo se mea, o le a faapena foi ona outou tuuina mai lo outou faatuatuaga i la’u upu, aua ou te le ta’uina atu ia te outou ou te iloaina se mea ou te le iloa.”¹²

I le tautoulu o le 1835, na faatuiese ai le uso laitiiti o le Perofeta o Viliamu i se filifiliga na faia e le Perofeta, ma matua ita ai, ma amata ai ona le ava o ia i le Perofeta ma ia uunaiina ai isi ina ia faia foi faapena. O nei amio na matua faanoanoa ai le Perofeta, ma na ia tusi ai ia Viliamu upu ia: “Ou te naunau, Uso Viliamu, o le a e faamaualaloina oe lava. Ou te matua faamagaloina oe, ae e te iloa e le maluelue ma le suia lo’u tulaga; ou te iloa lē ou te faatuatuaina; ou te tu i luga o le papa; e le mafai e lologa, e leai, latou te le mafai lava, ona faatoilaloina a’u. Ua e iloa o le aoaoga faavae o loo ou aoao atu e moni, ua e iloa ua faamanuiaina a’u e le Atua. … Ua e iloa o lo’u tiute le apoapoai atu ia te oe, pe a e faia mea sese. Ou te faaaogaina pea lenei aia, ma e ia te oe foi lena lava aia. Ou te faaaogaina lea aia ou te apoapoai atu ai ia te oe, ona o lou tofi mai lou fanau mai; ma ou te tuuina atu ia te oe lena aia aua o lo’u tiute o le lotomaualalo, ma ou te talia foi aoaiga ma faatonuga mai i se uso, po o se uo. …

“Ma lenei ia i ai le alofa tunoa o le Atua i luga o le fale o lo’u tama; ia aveesea e le Atua le feitagai i le va o oe ma a’u; ma ia toefuataiina faamanuiaga uma, ma faagaloina e faavavau le taimi ua tuanai. Ia aumaia faatasi i maua i le salamo maualalo ia te Oe, Le Atua e, ma Lou mana ma Lau puipuiga, ma se pale, e fiafia ai i le mafutaga o le tama, tina, Alevine, Ailama, Sofaronia, Samuelu, Katerina, Kalosi, Lusi, o le Au Paia, ma ia faapaiaina i le filemu, e faavavau lava, o le tatalo lea a lou uso.”¹³

I le aso 1 o Ianuari, 1836, na faia ai e le Perofeta upu ia e uiga i lona taumafai e faafoia lenei tulaga faigata i lona aiga: “E ui lava i le agaga faafetai o loo faatumulia ai lo’u loto i le tomanatu atu i le tausaga ua mavae atu, ma le tele naua o faamanuiaga ua faapaleina ai o tatou ulu, o loo tiga lo’u loto i totonu ia te a’u, ona o le tulaga faigata o loo tulai mai i totonu o le aiga o lo’u tama. … Ua ou finafinau o le a leai se mea e tasi o la’u pitolaau e faaletonu ina ia fetuunai ai ma lafoai ma le lagona fiafia, ma faafilemu tulaga faigata uma faaleaiga i le aso lenei, ina ia oo mai le tausaga ma tausaga, pe laiti pe tele, o le a mafuta ai i le amiotonu i luma o le Atua. …

“Na o mai Uso Viliamu ma Ailama, ma Uncle Ioane Samita, i lo’u fale ma matou o ai i se potu na o i matou, faatasi ai ma tama ma Elder Matini Harisi. Na amataina e Tama Samita la matou faatalanoaga i se tatalo, ina ua maea ona ia faaali mai loa lea o ona lagona i se auala tumu i le ootia ma le faanoanoa tele, o lagona malamalama alofa o se tama, o le na matua loloto le tiga o ona lagona ona o le tulaga faigata lea na i ai i totonu o le aiga; ma a o ia laugaina i matou, na oo mai le Agaga o le Atua i luga ia i matou i le mana maoae, ma na faamaualalo ai o matou loto. Na tauina mai e Uso Viliamu i le lotomaualalo lona sese ma talosaga mai mo sa’u faamagaloga mo mea leaga na ia faia mai ia te a’u. Ma po o a foi mea na ou sese ai, na ou talosaga foi mo lana faamagaloga.

“Ma na tutusa le oo mai ia i matou uma o le agaga o le faailoa atu o sese ma le faamagalo atu, ma na matou osi feagaiga faatasi, i luma o le Atua, ma agelu paia, ma le usoga, ina ia taumafai malosi mai le taimi lenei ma agai i luma e siitia e le tasi le isi i luga i le amiotonu i mea uma lava, ma aua le faalogo i lipoti leaga e faatatau ia i latou taitoatasi; ae, e pei o uso moni lava, ia alu le tasi i le isi, e tusa ai ma o matou faanoanoaga, i le agaga o le agamalu, ma ia faalelei, ma auala mai ai le faatupuina o lo matou fiafia, ma le fiafia o le aiga, ma, i se aotelega puupuu, le fiafiaga ma le lelei o tagata uma. Ona valaauina loa lea o lo’u toalua ma lo’u tina ma la’u tusiupu e o mai i totonu o le potu, ma na matou toe fai atu ia i latou le feagaiga ua matou osia; ma a o faatumulia o matou loto i le agaga faafetai, na matua maligi o matou loimata. Ona talosagaina loa lea o a’u ou te faaiuina la matou faatalanoaga i se tatalo; ma o se iupeli moni lava ma se taimi o le olioli tele.”¹⁴

E ala i le faaali atu o le faapalepale, onosai, ma le alofa tunoa i tagata ua salamo, e mafai ona tatou fesoasoani e aumaia i latou i totonu “o le saolotoga o le fanau pele a le Atua.”

I le faaiuga o le 1838, o William W. Phelps, o le na avea ma tagata faatuatuaina o le Ekalesia, na i ai faatasi ma i latou o e na faia molimau pepelo e tetee i le Perofeta ma isi taitai o le Ekalesia, ma oo atu ai i lo latou falepuipuiga i Misuri. Ia Iuni 1840, na tusi mai Uso Phelps ia Iosefa Samita, ma aioi mai mo se faamagaloga. Na tali atu le Perofeta o Iosefa: “Ou te ta’u atu ou te tusia nai upu ia te oe ma ni lagona e le masani ai e tali atu ai i lau tusi o le aso 29 [o le masina ua te’a]; ae i le taimi lava e tasi ou te olioli i le avanoa ua tuuina mai ia te au.

“Atonu o loo e iloa o’u lagona, faapea foi ma lagona o Elder Rigdon ma Uso Ailama, ina ua matou faitauina lau tusi—e moni ua ootia o matou loto ma lagona ai le tiga alofa ma le alofa ina ua matou iloa ai ma le mautinoa ou faamoemoega, ma isi. Ou te folafola atu ia te oe ou te lagonaina se manatu ia ou taulimaina lau mataupu i se auala o le a talafeagai ma le finagalo o Ieova, (o le āna lana auauna o a’u lava), ma talafeagai ma aoaoga faavae o le upu moni ma le amiotonu ia ua maea ona faaalia mai; ma e pei lava ona tumu i le faapalepale, onosai ma le alofa mutimutivale le finagalo o lo tatou Tama Faalelagi mo e lotomaualalo ma salamo, ou te lagona ai lo’u naunau ina ia ou mulimuli i le faataitaiga, faatauaina le mataupu faavae lava lea e tasi, ma i le faia o lea o le a avea ai a’u ma faaola i o’u uso a tagata.

“E moni lava, ua matou puapuagatia tele ma o se taunuuga o le mea na e faia—o le ipu oona, ua matua tumu tele mo tagata ola e inu ai, na matua tumu lava ma taumasuasua ina ua e liliuese ma faasagatau mai ia i matou, o oe o se tasi na masani ona tatou faufautua faatasi, ma fiafia faatasi i le tele o avanoa mai le Alii—‘pe ana o se fili, semanu ua mafai ona matou tauaveina.’ [Tagai i le Salamo 55:12–14.] ‘O le aso sa e tu ai faafeagai, o le aso sa ave faatagataotaua ai ana au e tagata ese, na ulu atu ai foi tagata ese i ona faitotoa, ma latou fai ai le vili i luga o fanua i [Sisifo Mamao], sa i ai lava oe e faapei o so latou. A ua le tatau ina ua e maimoa i le aso o lou uso, o le aso na avea ai o se tagata ese, ua le tatau foi ona e tautala faasiasia i le aso o le puapuaga.’ [Tagai i le Opetaia 1:11–12.]

“Ae peitai, ua inumia le ipu, ua faataunuuina le finagalo o le Tama, ma o loo matou ola pea, lea matou te faafetai ai i le Alii. Ona ua faasaoina i matou mai lima o tagata leaga e ala i le alofa tunoa o le Atua, matou te faapea ua oo mai lou avanoa e faasaoina mai ai oe mai le mana o le tiapolo, ma aumaia i le saolotoga o le fanau pele a le Atua, ma toe tu i lou tulaga i le lotolotoi o le Au Paia a le Silisili Ese, ma e ala i le filiga, lotomaualalo, ma le alofa faamaoni, ia tuuina atu oe lava i lo tatou Atua, ma lou Atua, ma le Ekalesia a Iesu Keriso.

“I le talitonuina o le moni o lau faatoesega, ma le faamaoni o lou salamo, ou te fiafia e toe tuuina atu ia te oe le lima taumatau o le faaaumea, ma olioli i le toe foi mai o le faamaimau oa.

“Na faitauina lau tusi i le Au Paia i le Aso Sa ua tea, ma na talia foi o latou lagona faaalia, ma ua lotogatasi, o W. W. Phelps e tatau ona taliaina ma faaaumeaina.

“ ‘Sau la’ia, uso pele e, talu ai o le taua ua mavae,

Aua o uo muamua, ua toe uo foi e tumau ma mamae.’ ”¹⁵

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai i itulau vii–xii.

O loo i lenei mataupu nai tala o le faamagaloina e Iosefa Samita o isi. Toe iloilo nei tala i itulau 417–19, 422–24, ma le 424–26). O a ni auala e mafai ai ona fesoasoani nei tala i se tasi o loo tauivi e faamagalo se tasi?
O a faamanuiaga e oo mai i o tatou olaga pe a tatou faamagaloina i latou o e ua faamanualia i tatou? Aisea e i ai ai tulaga faigata i nisi taimi i le faamagaloina o isi? O a ni mea e mafai ona tatou faia e faatupuina atili ai se agaga faamagalo?
I le itulau 420 o loo i ai ni faamatalaga poto pupuu e uiga i le faamagalo atu o isi. Mo se faataitaiga: “Tauaveina ma le onosaia e le tasi o le isi, aua e faapena ona faia e le Alii ia i tatou.” “Ia alofa mutimutivale ma o le a outou maua ai le alofa tunoa.” “Saili atu ia fesoasoani e faasaoina agaga uma, ae le o le faaumatia o i latou”? E tatau ona tatou alofa mutimutivale le tasi i le isi, ma aua le amanaiaina mea laiti.” O a ni aoaoga e te maua mai nei faamatalaga taitasi?
I le parakalafa o loo amata i le pito i lalo o le itulau e 421, toe iloilo upu a le Perofeta o Iosefa Samita e faatatau i le aafiaga o le agalelei ma le agamalu. Aisea e te manatu ai e moni lenei fautuaga? E faapefea ona e aafia i nei aoaoga faavae i lou lava olaga?
Toe iloilo le parakalafa lea e amata i le pito i lalo o le itulau 422. O a ni faafitauli e mafai ona tatou aloese mai ai a o tatou mulimuli i lenei fautuaga? Aisea e faigata ai ona mulimuli i lenei fautuaga i nisi o taimi? E faapefea ona tatou foia faaosoosoga e talitonu i lipoti leaga e uiga i isi?
I ana taumafaiga e faamagalo isi, na saunoa ai le Perofeta i lona naunautaiga e “mulimuli i faataitaiga” a le Tama Faalelagi (itulau 425 ma soifua “e tusa ai ma mamanu maoae silisili ma le atoatoa a le Faaola” (itulau 420). A o tatou tauivi e mulimuli i faataitaiga a le Tama Faalelagi ma Iesu Keriso, o a nisi o uiga e tatau ona tatou tauivi e faatupuina?

Mau E Faatatau I Ai: Salamo 86:5; Mataio 18:21–35; 1 Nifae 7:16–21; Mosaea 26:29–31; MFF 64:9–11

Christ teaching — O le Faaola o loo faaali atu le alofa mutimutivale i se fafine na tuua’ia i le mulilua (tagai Ioane 8:1–11). “Na fetalai mai Keriso na sau o Ia e valaau atu i e agasala ina ia salamo, ina ia laveaiina i latou,” na tautino mai ai e Iosefa Samita.

W. W. Phelps speaking with Joseph — O William W. Phelps, o loo faaalia i i ma Iosefa Samita, ina ua toe taliu mai e mafuta atoatoa ma le Au Paia, na tusia e uiga i le Perofeta, o lē sa matuai faamagalo atu ia te ia: “Ia viia le na fetaiai ma Ieova!” (*Viiga,* nu. 15).