Salamo

“Ia tatou toe amata fou i le aso lava lenei, ma faapea nei, ma o tatou loto atoa, o le a tatou tiai a tatou agasala ae tatou amiotonu.”

Mai le Soifuaga o Iosefa Samita

I le aso 14 o Iuni,1828, na tuua ai e Matini Harisi ia Heremoni, Penisilevania, ma ave uluai itulau e 116 o tusitusiga na faaliliuina mai papatusi auro e faaali i nisi o lona aiga i Palamaira, Niu Ioka. I le aso lava na sosoo ai, na fanau ai le uluai tama a Iosefa ma Ema, o se atalii e igoa ia Alevine. Na maliu le pepe i le aso lava lena, ae tuua ai le tina ma le tama lotomomoia e faanoanoa i le matautia o lo laua faamativaina. Na tusia e le tina o le Perofeta faapea: “Mo sina taimi, na foliga e gatete [Ema] ua toetoe ina a oti o ia. Na matua le mautonu lona tulaga mo sina taimi na atoa le lua vaiaso e le i mafai ona moe filemu lana tane mo se itula. I le faaiuga o lena taimi, na matua faateteleina le popole [o Iosefa] e uiga i tusitusiga na ia filiga ai, talu ai ua faasolosolo ina feoloolo lana ava, o le taimi lava e toe faaopoopo ai se isi ona malosi o le a malaga loa o ia i Niu Ioka ma vaai le tulaga o tusitusiga.”¹

Ia Iulai, i le fautuaga a Ema, na tuua ai e le Perofeta ia Ema i le tausiga a lona lava tina ae malaga i le taavale solofanua i le fale o ona matua i le Aai o Maniseta, Niu Ioka. Na malaga le Perofeta i maila e 125 ma e lua pe tolu aso na faataunuu ai. A o mafatia o ia i le maliu o lona uluai atalii, popole i lana ava, ma matua tiga popole e uiga i tusitusiga, na le ai ai pe moe Iosefa i lana malaga atoa. O se tasi tagata malaga, na o ia lava le isi pasese i le taavale solofanua, na matauina le tulaga vaivai o le Perofeta ma maumaututu ai i lona manatu e malaga faatasi ma ia i le savaliga e 20-maila mai le nofoaga e tu ai le taavale solofanua agai i le fale o Samita. Mo le fa maila mulimuli o le savaliga, na tusia ai e le tina o le Perofeta, “na manaomia e le tagata ese ona ia taitaiina le lima o Iosefa, aua ua matua vaivai tele o ia ma e moe lava o ia a’o tu ona vae.”² Na taunuu loa lava i le fale o ona matua, ona aami loa e le Perofeta ia Matini Harisi.

Na taunuu Matini i le fale o Samita i le aoauli, e matua faanoanoa ma lē fiafia. E le i i ai ia te ia le faaliliuga, o lana tala lea, ma e na te le iloa foi po o fea o i ai. O le faalogo atu i lena tala na valaau ai Iosefa, “Oi! Lo’u Atua e, lo’u Atua e. … Ua leiloa mea uma, ua leiloa. O le a le mea o le a ou fai? Ua ou agasala. O a’u lava na ou tofotofoina le toasa o le Atua i lo’u fesili atu ia te ia mo le mea e le i ai sa’u aia ou te fesili ai. … A faapefea nei ona ou alu atu i luma o le Alii? O le a se aoaiga o le a le talafeagai mo a’u mai le agelu mai le Silisili Ese?”

A o faagasolo pea le aso, sa fesavalia’i solo le Perofeta i le fale o ona matua ua matautia lona puapuagatia, ua “tutulu ma faavauvau tele.” O le aso na sosoo ai na toe foi ai o ia i Heremoni, lea na ia faapea mai ai, “Na amata ona ou faamaualalo au lava i le tatalo faatauanau i luma o le Alii. … pe a fai e mafai ou te fia mauaina le alofa i ona aao ma maua ai se faamagaloga o mea uma lava ua ou faia e le tusa ai ma lona finagalo.”³

Na mamafa le aoaiga o le Perofeta e le Alii ona ua sili atu lona mata’u i tagata nai lo le Atua, ae na faamanino atu ia te ia e mafai ona faamagaloina o ia. “O oe o Iosefa,” na fetalai mai ai le Alii, “ma na filifilia oe e faia le galuega a le Alii, peitai ona o solitulafono, afai e te le faaeteete o le a e pau. A e manatua, e alofa mutimutivale le Atua; o le mea lea, ia salamo ai i lena mea ua e faia ua le tusa ma le poloaiga lea na ou tuuina atu ia te oe, ma ua filifilia pea oe, ma ua toe valaauina i le galuega” (MFF 3:9–10).

Mo sina taimi, na aveesea ai e le Alii le Urima ma le Tumema faapea ma papatusi mai ia Iosefa. Ae e lei umi ae toefuatai mai e le Alii nei mea ia te ia. “Na olioli le agelu ina ua ia toe tuuina mai ia te a’u le Urima ma le Tumema,” o le tala lea a le Perofeta, “ma faapea mai ua fiafia le Atua i lo’u faatuatua ma lo’u lotomaualalo, ma alofa mai ia te a’u ona o lo’u faamaoni ma lo’u filiga i le tatalo, lea na matua lelei ai ona ou faataunuuina o’u tiute ma … mafai ai ona toe amatalia le galuega o le faaliliuga.”⁴ A o agai i luma Iosefa i le galuega taua ua tuuina mai ia te ia, ua faamalosia nei o ia i faalogona lelei o le mauaina o le faamagaloga a le Alii faatasi ai ma se nanautaiga faafouina ina ia faia Lona finagalo.

Aoaoga a Iosefa Samita

O le salamo i a tatou agasala, tatou te latalata atu ai i le Atua ma faapei ai o Ia.

O Uilifoti Uitilafi, a o auauna o se sui o le Korama a le Toasefululua, na ia tusia: “na tulai mai Iosefa le Tagatavaai i le mana o le Atua; ua aoai ma ta’uvaleina le amioleaga i luma o tagata, i le suafa o le Alii le Atua. Na ia naunau e fai atu ni nai upu e talafeagai ma le tulaga o le toatele o tagata, ma na ia faapea atu:

“ ‘Ou te tautala atu ma le pule o le Perisitua i le suafa o le Alii le Atua. … E ui lava ua tautino mai e lenei faalapotopotoga o i latou o le Au Paia, ae peitai o loo ou tu nei i le ogatotonu o ituaiga ma vasega o tagata eseese. Afai tou te mananao e o atu i le mea o loo i ai le Atua, e tatau ona outou faapei o le Atua, pe ia te outou mataupu faavae o loo i le Atua, aua afai tatou te le o faalatalata atu i le Atua i mataupu faavae, ua tatou o ese mai ia te Ia ae faalatalata atu i le tiapolo. Ioe, o loo ou tu i le ogatotonu o ituaiga tagata eseese uma lava.

“ ‘Saili o outou loto, ma vaai pe o faapei outou o le Atua. Ua ou saili lo’u lava loto, ma lagona ai e tatau ona ou salamo i a’u agasala uma.

“ ‘O lo o i ai le au faomea faatasi ma i tatou, o e mulilulua, o e le faamaoni, o e pepelo. Afai e fetalai mai le Atua mai le lagi, o le a Ia poloaiina outou e aua le faomea, aua le manao fua, aua le taufaasese, ae ia faamaoni i nai mea iti. … E le lelei ea le Atua? O lea ia outou amio lelei ai; afai e faatuatua o Ia, e tatau foi ona outou faatuatua. Faaopoopo i lo outou faatuatua le amiolelei, ia faaopoopo foi le poto i le amiolelei, ma saili mo mea lelei uma. E tatau ona faamamaina le Ekalesia, ma ou te folafola atu e tetee i amioletonu uma.’ ”⁵

“E tatau ona outou mama, a leai ua le mafai ona outou o mai i luma o le Atua: afai tatou te o mai i luma o le Atua, e tatau ona tatou tausia i le mama i tatou lava, e pei ona mama o Ia. Ua i le tiapolo le mana matautia e faasese ai; o le a ia suia mea ina ia faifai i latou i e o loo faia le finagalo o le Atua. … E tatau ona lafoai ese le amioletonu mai totonu o le Au Paia; ona tatala ai lea o le veli, ma o le a tafe mai i lalo faamanuiaga o le lagi—o le a tafe mai e pei o le Vaitafe o le Misisipi.”⁶

“Aua nei faasalalauina e se tagata sona lava amiotonu, aua e iloa atu lava e isi lena mea ia te ia; ae sili ai le ta’uta’u atu o ana agasala, ona faamagaloina ai lea o ia, ma o le a ia fua mai ai atili.”⁷

“E tatau i loto uma ona salamo ma ia mama, ma o le a amanaia ma faamanuia i latou e le Atua i se auala e le mafai e se isi lava auala ona faamanuiaina i latou.”⁸

O le finagalo lava o le Atua ia tatou lafoai a tatou agasala ma tuu ese le leaga mai totonu ia i tatou.

“Faalogo mai ia, outou tuluiga uma o le lalolagi—outou uma ositaulaga, outou uma e agasala, ma tagata uma. Salamo! Salamo! Usitai i le talalelei. Liliu atu i le Atua.”⁹

“Ia tatou toe amata faafouina i le aso lava lenei, ma tatou faapea nei, ma o tatou loto atoa, o le a tatou lafoai a tatou agasala ae tatou amiotonu.”¹⁰

“O le tagata le talitonu o le a tau tapatapa i soo se mea mo se fesoasoani seia oo ina pulatoa atu le oti i ona mata, ona faatoa sola ai lea o lona le talitonu, aua o tulaga moni o le lalolagi faavavau e faalagolago ma le mana malosi i ona lava luga; ma a oo ina le maua e ia le lagolago a le lalolagi, ona faatoa ia lagona moni ai lea o upu moni faavavau e uiga i le tulaga ola pea o le agaga. E tatau ai ona tatou faaaoga le lapataiga ae le o le faatali seia latalata i le oti ona salamo lea; e pei ona tatou vaaia le tamaitiiti ae aveesea e le oti, ia faapena foi le talavou ma le matua, ae maise foi le tamaitiiti ona faafuasei ona valaauina i le ola e faavavau. Ia avea la lenei ma lapataiga i tagata uma ia aua ne’i faatuai le salamo, pe faatali seia latalata i le oti, aua o le finagalo o le Atua ia salamo le tagata ma auauna atu ia te Ia i le maloloina, ma i le malosi ma le mana o lona mafaufau, ina ia faamautu ai Ana faamanuiaga, ae aua le faatali seia oo mai le valaau e oti.”¹¹

“Na tufatufa atu le faamanatuga i le Ekalesia [ia Mati 1 1835]. A o lei faia le faamanatuga, na ou tautala e uiga i tulaga paia o lenei sauniga i le Ekalesia, ma uunaiina le taua o le faia ina ia taliaina i luma o le Alii, ma fesili atu, O le a le umi tou te manatu e mafai ai e se tagata ona tagofia pea lenei sauniga ma le le agavaa, ae le aveesea e le Alii Lona Agaga mai ia te ia? O le a le umi o le a ia ta’ufaatauvaaina ai mea paia, ae le tuuina atu o ia e le Alii i faiga a Satani seia oo mai le aso o le faaolataga! … O le mea lea e tatau ai ona maualalo o tatou loto, ma tatou salamo i a tatou agasala, ma tuu ese mea leaga mai ia i tatou.”¹²

“O le salamo o se mea e le mafai ona ta’ufaatauvaaina i aso uma. O le agasala i aso uma ma le salamo i aso uma e le o mea ia e malie i le silafaga a le Atua.”¹³

Na tusia upu ia e le Perofeta o Iosefa Samita i lona uso o Viliamu Samita ina ua ita Viliamu ia te ia ma inoino ia te ia: [Ua uma ona ou talanoa atu ia te oe] ma le faamoemoe moni lava o le taumafai e lapatai, fautua, apoapoai, ma laveai mai oe mai le pau atu i faigata ma faanoanoaga, ia na ou muai vaai ua e goto atu i ai, e ala i le usitaia o lena agaga leaga, lea e te taua o ou lagona tuinanau, ia e tatau ona e aveesea ma nuti i lalo, ma soli i ou vae; ia afai e te le faia, e le mafai ona faaolaina oe, i lo’u iloa, i le Malo o le Atua. E manaomia e le Atua loto o Ona tagata ina ia faaumatia i Lona finagalo.”¹⁴

Ua finagalo lo tatou Tama Faalelagi e faamagalo i latou o e salamo ma toe foi atu ia te Ia ma le faamoemoega atoa o le loto.

I le 1835 na maua ai e le Perofeta o Iosefa Samita se tusi mai ia Harvey Whitlock, o le sa liliu ese mai le Ekalesia ae ua naunautai e toe foi mai i le atoatoa o le usoga. Na tali le Perofeta: “Ua ou mauaina lau tusi o le aso 28 o Setema, 1835, ma ua faalua ona ou faitauina, ma e oo mai ai ia te au lagona e faigofie atu ona vaai faalemafaufau i ai nai lo le faamatalaina atu; a ua lava lava lo’u faapea atu ua le mafai ona taofiofia o’u lagona—ma ua le mafai ona taofia lo’u tagi tele. Ou te faafetai i le Atua ua mafai ona ulufale i lou loto e taumafai e toe foi i le Alii, ma lona nuu, pe a fai o le a alofa o Ia ia te oe. Ua ou talanoa atu i le Alii e uiga i lou tulaga; ma o upu nei na oo mai ia te a’u:

“Faaaliga ia Harvey Whitlock.

“‘E moni, ua fetalai mai le Alii ia te oe—Ia tuu o ia o le sa avea o la’u auauna o Harvey, e toe foi mai ia te a’u, ma i le fatu o la’u Ekalesia, ae lafoai agasala uma ia sa ia faia e tetee mai ai ia te a’u, ma tulimatai ai mai le taimi lava lenei se olaga mama ma le tonu, ma tumau ai i lalo o le taitaiga a i latou o e ua ou tofiaina e avea ma poutu ma ulu o la’u Ekalesia. Aua faauta, ua fetalai mai ai le Alii lou Atua, o le a soloieseina ana agasala mai lalo o le lagi, ma o le a faagaloina e tagata, ma o le a le toe oo mai i o’u taliga, pe tusitusia o se faamanatu e tetee ia te ia, ae o le a Ou sii o ia i luga, e pei e sii ese mai le palapala loloto, ma o le a faaeaina o ia i nofoaga maualuluga, ma faitauina e agavaa e tutu faatasi ma aloalii, ma o le a avea o se u fanafana ua faapupulaina i la’u utu i le faatoilaloina o lima uumau o le agasala ia i latou o e tuuina i latou lava i luga, ina ia latou taupule faatasi foi e tetee mai ia te a’u, ma faapea ona tetee ai i a’u auauna faauuina i aso gataaga. O le mea lea, ia tuu o ia e vave saunia ia lava ma alu atu ia te oe, i Katelani lava. Ma e moni afai e usitai o ia i au fautuaga uma mai le taimi lenei, o le a toefuatai mai o ia i lona tulaga na i ai muamua, ma o le a faaolaina o ia i le faatumutumuga sili, a o soifua le Alii lou Atua. Amene.’

“Ua e vaai nei, lo’u uso pele, i le naunautaiga o lo tatou Tama faalelagi e faamagalo agasala, ma toefuatai i le lelei i latou uma lava o e ua naunautai e faamaulalo i latou lava i Ona luma, ma ta’uta’u atu a latou agasala, ma lafoai i latou, ma toe foi atu ia te Ia ma le faamoemoega atoa o le loto, ae le fai se mea pepelo, e auauna ia te Ia e oo i le iuga [tagai 2 Nifae 31:13].

“Aua e te ofo ua faamaualalo e le Alii Ia lava e fetalai mai le lagi, ma tuuina atu ia te oe faatonuga e mafai ai ona e aoao i lou tiute. Ua ia faafofogaina au tatalo ma molimauina lou lotomaualalo, ma tuuina mai le aao o le tama alofa mo lou toe foi atu; ua olioli agelu ona o oe, ma ua naunautai le Au Paia e toe talia oe i totonu o le usoga.”¹⁵

“E leai lava se taimi e faapea ai le agaga ua matua tele e alu atu ai i le Atua. O i tatou uma lava e mafai ona aapa mai i ai le alofa faamagalo, o e e lei faia le agasala le mafaamagaloina.”¹⁶

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoani faaopoopo, tagai i itulau vii–xii.

A o e faitauina le tala o le tali a le Perofeta i le leiloloa ai o itulau e 116 (itulau 75–76), o a ni manatu e te maua mai e uiga ia Iosefa Samita? O a ni mea e te aoao mai i lana faataitaiga e faatatau i le salamo?
Toe iloilo le vaega o loo amata i le itulau 77. A o e mafaufau loloto i aoaoga o lenei mataupu, ia faaaoga se taimi e saili ai lou loto, e pei ona fautuaina mai e le Perofeta. Mafaufau e uiga i mea e manaomia ona e faia—ma mea e manaomia ona tuu lou faia—e avea atili ai faapei o le Atua.
Mafaufau loloto i lapataiga a Iosefa Samita e tetee i le faatuai o lo tatou salamo (itulau 78–79). O a ni taunuuga e ono oo mai i le faatuai o le salamo?
Suesue le fautuaga a le Perofeta o Iosefa e uiga i le liliu atu i le Atua ma faamaualalo i tatou lava i Ona luma (itulau 79–81). Aisea e le atoatoa ai le salamo e aunoa ma le lotomaualalo? O le a sou manatu o le a le uiga o le “toe foi atu i le [Atua] ma faamoemoega atoa o le loto” (itulau 81).
Faitau le faaaliga na maua e Iosefa Samita mo Harvey Whitlock, ma matau folafolaga a le Alii pe a fai e salamo ma le faamaoni ia Uso Whitlock (itulau 79). O a ni ou manatu po o lagona a o e mafaufau loloto i “le naunautaiga o lo tatou Tama Faalelagi e faamagalo agasala, ma toefuatai [i tatou] i le lelei”?

Mau E Faatatau I Ai: 2 Korinito 7:9–10; Mosaea 4:10–12; Alema 34:31–38; MFF 1:31–33; 58:42–43

Christ in Gethsemane — E mafai ona salamo e ala i le taulaga togiola a le Faaola, o Iesu Keriso. “Saili o outou loto, ma vaai pe o faapei outou o le Atua,” na saunoa mai ai le Perofeta o Iosefa Samita. “Ua ou saili lo’u lava loto, ma lagona ai e tatau ona ou salamo i a’u agasala uma.”

prodigal son returning — E faapei lava ona talia le atalii faamaimau oa e lona tama, e faapena foi ona naunau le Tama Faalelagi “e faamagalo agasala, ma toe fuatai i le lelei i latou uma lava o e ua naunautai e faamaulalo i latou lava i Ona luma.”