E Maeu Le Mamalu o Uo Faamaoni, Amiotonu, ma Moni

“O le faauo atu o se tasi o mataupu faavae sili ona taua o le ‘Faa-Mamona.’ … Na te fusifusia le aiga faaletagata i lana uunaiga fiafia.”

Mai le Soifuaga o Iosefa Samita

Ia Aokuso o le 1842, na taumafai ai pea lava pea pulega mai Misuri ina ia pueina ma saisaitia le Perofeta. Ona o le mata’u ina ne’i fasiotia o ia pe a moliaina ma ave i Misuri, o lea na lafi ai le Perofeta o Iosefa Samita. I le aso 11 o Aokuso, na ia auina atu ai se feau i ni tagata faamaoni o lona aiga ma ni uo latou te feiloai i se motu i le Vaitafe o Misisipi, e le mamao mai Navu. I lena po, na faapotopoto atu ai Ema Samita, Ailama Samita, Newel K. Whitney, ma isi i tafatafa o le siui o le vaitafe ona malaga ai lea i se tamai vaa i le nofoaga na atofaina mo le feiloaiga. Ma le olioli, na opoina ai e le Perofeta lima o i latou taitoatasi, i le agaga faafetai mo le fesoasoani ma le faamafanafanaga o faauooga moni. Na mulimuli ona ia tusia se tala umi i lana tusi faamaumau e faatatau i ona lagona o le faafetai mo tagata o lona aiga ma ana uo. O nisi o nei faamaumauga o loo aofia ai i lenei mataupu. I ni nai vaiaso mulimuli ane, na faaiuina ai e le Perofeta se tusi i le Au Paia i Navu i upu nei na ta’u atu ai ona lagona mo i latou: “O a’u e tumau pea o la outou auauna lotomaulalo ma le uo tumau, o Iosefa Samita” (MFF 128:25).

O lagona lava foi ia o le Au Paia i le Perofeta, ma manatu e le gata o ia o lo latou Perofeta, ae o ia foi o la latou uo. Na manatuaina e se uo vavalalata ma failautusi faapitoa a Iosefa Samita, o Benjamin F. Johnson: “‘O Iosefa le Perofeta’—o se uo na ia faamaoni, faapalepale, tautamalii ma moni. … O se soa, i le va ma isi, na matua faameaalofaina o ia—na agalelei, loto foai, e faamama’i i le ’ata ma le fiafia. … Mo faafiafiaga na ia tauivi ai i nisi taimi ma se uo, pe o le tele atu foi o taimi e tauva malosi ma isi i le nonofo ai lea i luga o le fola ma tuu faatasi vae ma se laau e uuina i le va o i laua. Ae e lei maua lava se isi la te tutusa. O talasua, o le faaaogaina o ata e faailoa ai upu, o le faatutusa o laina o se solo ina ia tutusa faaiuga, ma isi, o ni mea masani. Ae o le valaau atu o le usuina o se tasi po o le sili atu o pese e sili ona fiafia i ai o se mea e tupu soo lava. … Ae peitai, e ui lava i ona uiga fiafia ma isi po o le agaga faaleuo i lea taimi ma lea taimi, na te le faaalia lava ni uiga faamaualuga pe soona lafo foi upu ma uiga e faaali.”¹

O Iosefa Samita na agalelei e pei lava o lona fiafia i isi, e pei ona manatua ai e se tasi alii talavou: “Na ou i ai i le fale o Iosefa; na i ai o ia iina, ae o nisi alii na nonofo i luga o le pa. Na sau i fafo Iosefa ma talanoa mai ia i matou uma. E lei umi lava ae sau loa se alii ia te ia ma faapea mai o se uso mativa lea na nofo tau mamao mai le taulaga na mu uma lona fale i le po ua tuanai atu. Toeitiiti lava o tamaloloa uma na fai mai na latou lagona le alolofa i lea alii. Na tuu le lima o Iosefa i lana taga, ma aumai i fafo le lima tala ma faapea mai, ‘Ou te alofa i lenei uso i le aofaiga e lima tala; o le a le tele o lo outou alofa [mo ia]?’ ”²

Atonu o le alofa maoae o Iosefa Samita mo ana uo na faapitoa ai lava le faigata ona tauaveina le taufaalata o nisi o na uo. I Navu, o uo o e na faatuatuaina e le Perofeta na liliu ma faatuiese mai ia te ia. Ae ui lava i lea, o le toatele o uo na faamaoni i latou i le Perofeta, ma lagolagoina o ia e oo i le iuga.

O se tasi o na uo o Uiliata Risati, o se uso o le Korama a le Toasefululua, o le na falepuipui faatasi ma Iosefa ma Ailama Samita ma Ioane Teila i Karefasi, Ilinoi. A o taofia i latou i le falepuipui, na faatagaina alii e o atu mai le sela i le fogafale muamua i se potu moe feololo atu lona lelei i le fogafale lua o le falepuipui. Ona, i se taimi puupuu lava ae oo loa i le maliu faamaturo, na fai ane le leoleo falepuipui e sili atu le saogalemu o le ave o pagota i se sela pa uamea e sosoo ma le potu moe. Na fesili atu Iosefa ia Elder Risati, o le sa valaau e ana uo o “fomai” aua na avea o ia ma se fomai: “ ‘Afai matou te o i le sela, e te sau tatou te o?’ Na tali mai le fomai, ‘Le uso e Iosefa, e te lei fai mai ia te au ou te sopoia le vaitafe faatasi ma oe—e te lei fai mai ia te au ou te sau i Karefasi—e te lei fai mai ia te au ou te sau i le falepuipui faatasi ma oe—ma e te manatu ea la ou te tuulafoaiina nei oe? Ae o le a ou tau atu ia te oe le mea o le a ou faia; afai o le a faasalaina oe ina ia sisiina ona o le faalata, o le a sisiina au e sui ai oe, ma o le a e saoloto.’ Sa fai atu Iosefa, ‘E le mafai ona e faia.’ Na tali atu le fomai, ‘O le a ou faia.’ ”³

Aoaoga a Iosefa Samita

O uo moni e faamama e le tasi faanoanoaga o le isi ma tumau i le faamaoni e oo lava i taimi o faigata.

Na tusia e Iosefa Samita mea nei e faatatau i tagata o lona aiga ma uo o e na asia o ia i le aso 11 o Aokuso, 1842, a o lafi o ia: “E matua lelei ma matagofie le foliga mai ia te a’u, le i ai o uo mama ma paia, o e faamaoni, ma moni, ma e le faavaivai o latou loto; ma e malolosi o latou tulivae ma e le faavaivai, a o faatalitali i le Alii, i le auauna mai i o’u tulaga manaomia, i le aso o le a liligi mai ai le ita o o’u fili i luga ia te a’u. …

“E matua matagofie o’u lagona ina ua ou feiloai i lena vaega faamaoni ma faauo, i le po o le aso sefulutasi, i le Aso Tofi, i le motu i le gutu o le taufusi, i le va o Saraemila ma Navu: faatasi ai ma le fiafia e le mafaamatalaina, ma lagona malolosi o le olioli ua faatumulia ai lo’u loto, ina ua ou opo mai i o’u lima, i lena po, la’u pele o Ema—o ia o la’u ava, o le ava o lo’u talavou, ma le na ou filifilia i lo’u loto. E tele lava manatunatuga loloto o lo’u mafaufau pe a ou tomanatu mo sina taimi i le tele o mea na tutupu na valaauina i maua e ui atu ai, o galuega ma taumafaiga, o faanoanoaga ma mafatiaga, ma oliolisaga ma faamafanafanaga, mai lea taimi i lea taimi, ia na tutupu i le ala ma faamanuiaina ai o ma olaga. E, o se tuufaatasia o manatu na faatumulia ai lo’u mafaufau mo se taimi, o lenei ua toe iinei o ia, … e le faavaivaia, e malosi, e le maluelue—e le mafai ona suia, Ema loto alofa!

“Na i ai foi Uso Ailama o le na sosoo ai ona opoina a’u i ona lima—o se uso e alofa moni. Na ou mafaufau ia te a’u lava, Uso Ailama e, oka se loto faamaoni ua ia te oe! E, ia faapaleina oe e Ieova Faavavau i faamanuiaga faavavau i luga o lou ulu, o se taui mo lou alofa i lo’u agaga! E, le tele o faanoanoaga ua ta uia faatasi; a ua toe noanoatia faatasi foi i ta’ua i lima le alolofa o le pule saua. Ailama, o le a tusia lou igoa i le Tusi o Tulafono a le Alii, mo i latou o e o le a mulimuli mai ina ia vaai i ai, ina ia latou faataitai ai i au galuega.

“Na ou faapea ane ia te a’u lava, Ua iinei foi Uso Newel K. Whitney. Ua fia ni vaaiga faanoanoa na tutupu i o ta’ua olaga; ae peitai ua ta toe feiloai tasi lava e toe fefaasoaai foi i le faanoanoa. O oe o se uo faamaoni o le ua mafai e atalii mafatia o tagata ona faaali atu i ai lagona, ma le saogalemu sili ona atoatoa. Ia faapaleina lou ulu i faamanuiaga a Ieova Faavavau. E matua mafanafana lena loto! E matua naunau lena agaga! Mo le manuia o se tasi o le na tulia i fafo, ma itagia toetoe o tagata uma. Uso Whitney, ua e le iloa le matua malosi o na fusi o loo fusifusia ai lo’u agaga ma lo’u loto ia te oe. …

“Ou te le manatu e ta’ua auiliiliga o le talaaga o lena po paia, ia o le a faavavau lava ona ou manatuaina; ae o igoa o e faamaoni ia ou te naunau ina ia faamaumauina i lenei nofoaga. O i latou nei na ou feiloai i ai i le manuia, ma o i latou o a’u uo; ma o lenei ua matou feiloai i faigata, ae o i latou lava o a’u uo e sili pea ona mafana. O i latou nei e alolofa i le Atua o loo ou auauna i ai; latou te alolofa i upu moni o loo ou aoaoina; latou te alolofa i na mataupu faavae mama ma paia o loo ou teuina i lo’u fatafata ma faalogona e sili ona mafanafana o lo’u loto, faatasi ai ma lena maelega lea e le mafai ona faafitia. …

“… Ou te faamoemoe o le a ou toe vaai i [a’u uo], ina ia ou galue mo i latou, ma fesoasoani atu foi ia latou fiafia. O le a latou le moomoo mo se uo a o ou ola; o le a alofa lo’u loto ia i latou, ma o le a galue o’u lima mo i latou, o e alolofa ma galulue mo a’u, ma o le a faavavau ona latou faamaoni i le avea ma a’u uo. Pe ou te le faafetai ea? E moni e leai! Ia faasaina e le Atua!”⁴

I le aso 23 o Aokuso, 1842, na faaauauina e le Perofeta: “Ua ou lagonaina o’u faalogona … e faatatau i a’u uo ua faaolaina, a o ou tomanatu i uiga mama ma amioga lelei o le toaitiiti faamaoni, ia ua ou faamaumauina nei i le Tusi o le Tulafono a le Alii,—o i latou ia o e na tutu i o’u tafatafa i itula uma o faigata, mo nei tausaga uumi e sefululima ua mavae,—e pei, mo se faataitaiga, o lo’u uso matua ma pele, o Joseph Knight, Le Matua, o le na i ai faatasi ma e na muamua lava fesoasoani mai i o’u tulaga manaomia, a o ou galue ai i le amataga o le aumaia i luma o le galuega a le Alii, ma le faataatiaina o le faavae o le Ekalesia a Iesu Keriso o le Au Paia o aso e Gata Ai. Mo le sefululima tausaga na ia faamaoni ma tumau, ma amiotonu ma atoatoa ona lelei, ma amio mama ma agalelei, e le femoumouai i le itu taumatau po o le itu tauagavale. Faauta o ia o se tagata amiotonu, ia faafualoa e le Atua Silisili Ese aso o lenei alii matua; ma ia faafouina lona tino gatete, tigaina, ma mafatia, ma ia toe liliu atu i ona luga le malosi o le soifua maloloina, pe a tusa ai ma Lou finagalo, e tumau pea, Le Atua e; ma ia ta’ua o ia, e atalii o Siona, a o tumau se tasi o i latou, o lenei tagata o se tagata faamaoni i Isaraelu; o le mea lea o le a le faagaloina ai lava lona igoa. …

“… A o ou manatuaina le au faamaoni toaitiiti o e o loo ola mai nei, ou te manatua ai foi i latou e faamaoni o a’u uo o e ua oti, aua e toatele i latou; ma e toatele e faia ma le agalelei—le agalelei faatama ma le faauso—ia ua latou faaee mai i o’u luga; ma e talu ai na tuliloa a’u e le au Misuri, e tele naua vaaiga o faataitaiga ua oo mai i lo’u mafaufau. …

“E toatele agaga o e ua ou alofa i ai i le malosi ua sili atu nai lo le oti. Ia i latou ua faamaonia lo’u faamaoni i ai—ia i latou o loo ou naunautai e faamaonia lo’u faamaoni, seia oo ina valaauina a’u e le Atua ou te oti.”⁵

O le faauo e fusia faatasi ai le aiga faaletagata, e aveesea le feitagai ma le le femalamalamaai.

“Ou te le popole pe faapefea uiga o se tagata; pe a fai o ia o sa’u uo—o se uo moni, o le a avea a’u ma uo ia te ia, ma talai atu le Talalelei o le faaolataga ia te ia, ma tuuina atu ia te ia fautuaga lelei, ma fesoasoani ai ia te ia i ona faigata.

“O le faauo o se tasi o mataupu faavae autu maoae o le ‘faa- Mamona’; [ua fuafuaina] e faatupuina ai ma faamalamalamaina ai le lalolagi, ma faatupuina le taofia o taua ma fevaevaeaiga ma avea ai tagata o uo ma uso. …

“… O le faauo e pei o Uso [Theodore] Turley i lona fale fai uamea e uelo ai le isi uamea i le isi uamea; e fusia faatasi le aiga faaletagata i lona aafiaga fiafia.”⁶

“O lena faauo lea e talia e tagata popoto e faamaoni e tatau lava ona tupuga ae mai le alofa, ma o lena alofa e tupu ae mai le ola mama, lea o se vaega o le ekalesia e pei lava o le malamalama o se vaega o Ieova. Faauta i le fetalaiga a Iesu, ‘E le sili lava le alofa o se tasi i lenei alofa, ia tuuina atu e se tasi lona ola e sui a’i ana uo.’ [Ioane 15:13.]”⁷

Ia Mati 1839, a o faafalepuipuiina le Perofeta o Iosefa Samita ma nisi o ana soa i le falepuipui i Liperate, Misuri, na tusi mai le Perofeta i tagata o le Ekalesia: “Na matou maua ni tusi i le afiafi ua te’a—e tasi mai ia Ema, tasi mai ia Toni K. Samita [uso o Iosefa], ma le tasi mai ia Epikopo [Edward] Patridge—o loo manavaina mai e i latou uma lava se agaga agalelei ma le faamafanafana. Na matua faafiafiaina i matou i mea na tusia mai i nei tusi. Na umi lava se taimi o aunoa i matou ma se faamatalaga; ma ina ua matou faitauina nei tusi na faapei o le malu o le ea faaolatotoga, ae o lo matou olioli na filogia ma le faanoanoa, talu ai mafatiaga o e matitiva ma le tele o le Au Paia ua faamanualia. Matou te le tau fai atu ia te outou na ootia o matou loto i le loloto o le alofa mutimutivale ma na avea o matou mata ma punavai o loimata, ae o i latou o e e lei siomia lava i puipui o se falepuipui e aunoa ma se mafuaaga po o se pogai, e itiiti lava so latou manatu i le matua suamalie o le leo o se uo; o se tasi o faailoga o le faauo mai o soo se isi lava po o le a lava e fafaguina ma faatupuina ai lagona tigaalofa uma; e aumai i lena lava taimi mea uma lava ua te’a; e uumauina le taimi lava lenei ma le naunautaiga [maelega] o le uila emo; e uumauina le lumanai ma le feai e pei o le taika; e faagaoioia le mafaufau e agai i tua ma luma, mai lea mea i le isi, seia faaumatia ma le manumalo ai le feitagai, o le faufauleaga ma le inoino, ma feeseeseaiga ua te’a, o le le femalamalamaai ma le le pulea i vae o le faamoemoe.”⁸

O le Au Paia a le Atua o uo moni lava le tasi i le isi.

Na tusia e le Perofeta upu nei i se tagata o le Ekalesia ia Aokuso 1835: “Matou te manatua lou aiga, faatasi ai ma aiga muamua uma lava o le Ekalesia, o e na uluai talisapaia le upu moni. Matou te manatua lo outou faaogea ma o outou faanoanoaga. O o tatou uluai sootaga e le i motusiaina; matou te i ai faatasi ma outou i mea leaga faapea foi ma mea lelei, i faanoanoaga faapea foi ma olioliga. O la tatou faatasiga, matou te faatuatuaina, e sili atu le malosi nai lo le oti, ma e le mafai lava ona motusia.”⁹

Na saunoa mai le Perofeta e faatatau i se taumafataga na ia auai atu i ai ia Ianuari 1836 i Katelani: “Na ou auai i se taumafataga matagofie i le fale o Epikopo Newel K. Whitney. O lenei taumafataga na mulimuli i le faatulagaga a le Alo o le Atua—na valaaulia ai le pipili, le ua le mafai lava ona savali, ma le tauaso, e tusa ai ma aoaoga a le Faaola [tagai i le Luka 14:12–13]. … Na toatele na auai, ma a o le i amataina le taumafataga na matou usuina ni pese o Siona; ma na faafiafiaina o matou loto i se uluai tofo i na olioliga ia o le a liligi mai i luga o ulu o le Au Paia pe a latou faapotopoto faatasi i luga o le Mauga o Siona, e faafiafiaina ai i le faatasi o le tasi ma le isi mo le faavavau, faapea foi ma faamanuiaga uma o le lagi, pe a oo ina le faalavelaveina i latou e se tasi pe faafefeina i tatou.”¹⁰

O Tuafafine Presendia Huntington Buell na taumafai e asia Iosefa Samita a o faafalepuipuiina o ia i le Falepuipui i Liperate i le 1839, ae na faasaina o ia e le leoleo falepuipui. Na tusi mulimuli ane le Perofeta ia te ia: “Oka, se olioli e oo mai ia i matou i le vaai atu ia matou uo! Semanu e faafiafiaina lo’u loto i le maua o le avanoa e talatalanoa ai ma oe, ae peitai na i luga ia i tatou le lima o le pule saua. … Ou te manao i [lau tane] ma oe e iloa o a’u lava o la oulua uo moni. … E leai se laulaufaiva e mafai ona faamatala le olioli le mafaamatalaina e aumai i se tagata, i le uma ai ona siomia i puipui o se falepuipui mo le lima masina, le vaai atu i foliga o se tasi na avea ma uo. E foliga mai ia te a’u o le a sili atu ona agalelei lo’u loto pe a mavae lenei mea nai lo le tulaga na i ai muamua. E tiga pea lo’u loto pe a ou manatunatu loloto i mafatiaga o le Ekalesia. Oi, pe ana mafai ona ou faatasi ma i latou! Ou te le aloese ona o le mata’u i galuega mamafa ma faigata ina ia avatu ia i latou le lagona filemu ma le faamafanafanaga. Ua ta toe manao i le faamanuiaga o le sii ae o lo’u leo i le lotolotoi o le Au Paia. Semanu ou te sasaa atu lo’u agaga i le Atua mo lo latou aoaoina.”¹¹

I lana lauga i Navu, Ilinoi, lea na toatele tagata o le Ekalesia na taunuu mai i ai ma ni meatotino itiiti lava, na ia aoao atu ai: “E tatau ona tatou faatupuina le tigaalofa mo e ua puapuagatia o loo i ai faatasi ma i tatou. Afai e i ai se nofoaga i le fogaeleele e tatau ai i tagata ona faatupuina le agaga ma liligi i ai le suauu ma le uaina i fatafata o e puapuaga, o iinei lava i lenei nofoaga; ma o lenei agaga o loo faaalia iinei; ma e ui lava [o se tagata o se] tagataese ma pagatia i le taimi e taunuu mai ai, e na te maua lava se uso ma se uo ua sauni e fesoasoani i ona tulaga manaomia uma.

“Ou te manatu i ai o se tasi o faamanuiaga silisili, pe afai e tatau ai ona ou puapuagatia i lenei lalolagi, ia faia la’u vili i le mea e mafai ona ou maua ai uso ma uo i mea uma ou te i ai.”¹²

O Siaosi A. Samita, le tausoga o le Perofeta, na ia manatuaina: “I le faaiuga o le talanoaga, na fusi mai e le Perofeta ona aao ia te a’u, ma fusi mau atu a’u i lona fatafata ma faapea mai, ‘Siaosi A., ou te alofa ia te oe faapei ona ou alofa i lo’u lava ola.’ Na ou lagonaina le alofa tele, ma na faigata ona ou tautala.”¹³

Fautuaga mo Suesuega ma le Aoaoina Atu

Mafaufau i manatu nei ao e suesueina le mataupu po o lou sauniuni foi e aoao atu. Mo fesoasoaniga faaopoopo, tagai i itulau vii–xii.

Toe iloilo le uluai parakalafa i le itulau 489. Ona susue lea i itulau 491–93 ma matau uiga lelei na matauina e Iosefa Samita ia Ema Samita, Ailama Samita, Newel K. Whitney, ma Joseph Knight Sr. Aisea e te manatu ai na avea ai la latou faauooga o se faamafanafanaga ia te ia i taimi o faigata? O a ni auala ua lagolagoina ai oe e ni uo a o e faafeagai ma ni tofotofoga? O le a se mea e mafai ona tatou faia e lagolago ai nisi a o latou aafia i ni tofotofoga?
O le tele lava o tala i lenei mataupu e faatatau i le taua o faauooga moni i taimi o faigata. Ae i le parakalafa lea e amata i le pito i lalo o le itulau 489, o loo faamatala mai ai e Benjamin F Johnson uiga faauo o Iosefa Samita i taimi o le filemu. O a ni mea e te maua mai i lenei faamatalaga? E faapefea ona aoga ia tatou faauooga ma fesootaiga faaleaiga pe a tatou faaavanoa ni taimi e talie ai ma taaalo faatasi?
Suesue le parakalafa lona fa atoa i le itulau 493. Aisea e te manatu ai e ono faapea mai Iosefa Samita o le faauo o se “tasi o mataupu faavae autu maoae o le ‘faa-Mamona’ ”? O a ni auala e mafai ai e le talalelei toefuataiina ona fesoasoani i tagata ia vaai atu le tasi i le isi o ni uo? O a auala ua avea ai isi Peresitene o le Ekalesia ma faataitaiga o le faauo i tagata uma?
Toe iloilo le parakalafa lona lima atoa o loo i le itulau 493. E faapefea ona pei le faauo o le ueloina o le uamea i le uamea?
Faitau le parakalafa o loo amata i le pito i lalo o le itulau 496 ma le parakalafa o loo sosoo ai. Matau le faasinoga i le “suauu ma le uaina” mai le faataoto o le Samaria agalelei (Luka 10:34). O a nisi o mea patino e mafai ona tatou faia e mulimuli ai i fautuaga a le Perofeta? E mulimuli ai i le faataitaiga a le Samaria agalelei?

Mau E Faatatau I Ai: 1 Samuelu 18:1; Faataoto 17:17; 2 Nifae 1:30; Mosaea 18:8–10; Alema 17:2; MFF 84:77; 88:133

Joseph and Hyrum — O Ailama Samita o se faapogai faifaipea o le malosi ma le lagolago i lona uso o Iosefa. “Uso Ailama,” na tautino mai ai e le Perofeta, “e maeu se loto faamaoni ua ia te oe!”

Joseph greeting member — E toatele le Au Paia na taunuu i le taulagavaa i Navu sa manatuaina le Perofeta o Iosefa Samita o sau e faafeiloai i latou ao latou o ese mai vaa, ma taliaina i latou i lo latou nofoaga fou.