Mataupu 43: ‘O Ia o se Perofeta a le Atua’: Ua Molimau Tupulaga a Iosefa Samita i Lana Misiona Faa-Perofeta

Mataupu 43

“O Ia o se Perofeta a le Atua”: Ua Molimau Tupulaga a Iosefa Samita i Lana Misiona Faa-Perofeta

“Ou te lagona lo’u fia alaga, aleluia, i taimi uma, pe a ou mafaufau na ou iloaina Iosefa Samita, le Perofeta.” (Polika Iaga)

Mai le Soifuaga o Iosefa Samita

I Navu, na faapotopoto faatasi soo le Au Paia e faalogologo i le Perofeta o Iosefa Samita o laugaina i latou. Talu ai e leai se fale i Navu e lava le tele e aofaga potopoto uma ai le Au Paia, o lea na lauga soo ai le Perofeta i fafo. Na masani lava ona lauga o ia i se togalaau o loo i le itu i sisifo o le malumalu, lea e mafai ona faapotopoto ai le afe ma afe [o tagata]. Na fausia se tulaga e mafai ona fesiitai mo taitai o le Ekalesia ma le au failauga, ma na nonofo le au faalogologo i luga o le vao po o luga o ogalaau po o piliki. Na lauga foi le Perofeta i isi nofoaga i Navu, e aofia ai le malumalu e lei maea ma fale o aiga. Na lipotia mai e se tagata asiasi i Navu i le amataga o le 1843 na ia vaai o faia se fonotaga “i luga o le fola talatala o le fogafale pito i lalo o le Malumalu, ma i ia fonotaga e masani ona lauga ai le Perofeta.”¹

A lauga le Perofeta i fafo, na masani ona amata ana lauga i lona talosaga atu i le Au Paia e tatalo ina ia faafilemuina le matagi ma le timu seia maea ona lauga o ia. I se konafesi na faia i Navu i le aso 8 o Aperila, 1843, na amata se lauga a le Perofeta i lona faapea mai: “E i ai a’u talosaga se tolu e fai atu i le faapotopotoga: Muamua, o i latou uma o e i ai le faatuatua o le a faaaogaina e tatalo ai i le Alii e faafilemu le matagi; aua a agi mai nei, e le mafai ona ou tautala umi e aunoa ma le matua faaletonu ai o lo’u ola maloloina; o lona lua ia i ai a outou tatalo mo a’u ina ia faamalosia e le Alii o’u mama, ina ia mafai ona outou lagona uma mai a’u; ma le lona tolu, ia outou tatalo mo le Agaga Paia e oo mai ia te a’u, ina ia mafai ai ona ou folafola atu na mea ua moni.”²

O faatulagaga mo le Perofeta e lauga, na matua taua tele i tagata o le Ekalesia, ma o nisi taimi na ia lauga ai i faapotopotoga e afe ma afe le fuainumera. “E leai se tasi na faalogo ia te ia faapea na le lavā faalogo i ana lauga,” na manatua ai e Parley P. Pratt. “Na ou iloa le mafai ona ia taofia faatasi se faapotopotoga o tagata faalogologo o e na naunau ma tinou mo le tele o itula, i le lotolotoi o le malulu po o le susulu o le la, timu po o le matagi, a o latou soisoi i le tasi minute ae tutulu i le isi minute.”³ O Alvah J. Alexander, o se tama talavou i na tausaga i Navu, na ia manatuaina faapea “e leai ni mea faafiafia po o ni taaloga na sili atu ona ou fiafia ai nai lo le faalogo o tautala o ia.”⁴

Na manatua e Amasa Potter lona auai i se lauga mamana na laugaina ai e le Perofeta o Iosefa Samita se vaega tele o le Au Paia i Navu:

“E tusa e tolusefulu minute talu ona lauga [le Perofeta] ae oo mai se matagi ma se afa mamafa lava. Na matua mafiafia le pefu na le mafai e le tasi ona iloa le isi i soo se mamao, ma na amata ona o ese nisi tagata ae valaau atu loa Iosefa ia i latou e taofi ma sii ae a latou tatalo i le Atua Silisili Ese ina ia taofia le agi o matagi ma taofia le pau mai o le timu, ma o le a faapena lava. I ni nai minute lava na faamutaina matagi ma le timu ae filemu elemene uma e pei o se taeao o le taumafanafana. Na vaeluaina le matagi ma alu atu ai i le itu i matu ma le itu i saute o le aai, ma na mafai ona matou vaai atu i laau tetele ma laau iti o loo lue mai i le matagi, a o le nofoaga na matou i ai na matua filemu mo le itula, ma i lena taimi na pau mai ai i fofoga o le Perofeta se tasi o lauga matua silisili ona maoae ua ia laugaina na ia lauga ai i le mataupu o e ua oti.”⁵

O le Au Paia o e na faalogo o lauga le Perofeta o Iosefa Samita na tuuina mai ni molimau mamana ma le manino o lana misiona faaperofeta. O le toatele o i latou na faamaumauina mea na latou manatuaina o lauga na latou faalogo o ia tuuina mai ma aafiaga na latou maua faatasi ma ia, aua na latou mananao i augatupulaga e mulimuli mai ia i latou ina ia latou iloaina, e pei ona latou iloa, o Iosefa Samita o se perofeta moni lava a le Atua.

Molimau ia Iosefa Samita

E pei o le uluai Au Paia, e mafai ona tatou iloa o Iosefa Samita o le perofeta o le na auala mai ai le toefuataiina mai e le Alii o le atoaga o le talalelei.

O Polika Iaga, le Peresitene lona lua o le Ekalesia: “Ou te lagona lo’u fia alaga, aleluia, i taimi uma, pe a ou mafaufau na ou iloaina Iosefa Samita, le Perofeta na faatu ae e le Alii ma faauuina, ma o le na ia tuuina i ai ki ma le mana e faatuina ai le malo o le Atua i le lalolagi ma lagolagoina. O nei ki ua tuuina atu i lenei nuu, ma ua ia i tatou le mana e faaauau ai le galuega na amataina e Iosefa.”⁶

O Eliza R. Snow, o le peresitene aoao o le Aualofa mai le 1866 i le 1887: “I le tuutuuga fuafuaina o le upumoni ma le amiotonu— i mea uma lava e aoga mo lona uso a tagata, na maumaututu lona faamaoni e pei o poutu o le Lagi. Na ia iloa na valaauina o ia e le Atua i le galuega, ma o mana uma o le lalolagi ma seoli na aufaatasi, na toilalo e faalavelavea pe liliueseina o ia mai lona faamoemoega. Faatasi ai ma le fesoasoani a le Atua ma lona usoga, na ia faataatiaina ai le faavae o le galuega silisili ona maoae ua faatuina e se tagata—o se galuega e oo atu e le gata i tagata o loo ola, ma augatupulaga uma o le a oo mai, ae faapea foi i e ua oti.

“Na ia toa ma lototele i lona faafeagai ai ma aganuu sese, talitonuga sese, lotu sese, faiga sese ma le le malamalama o le lalolagi— na faamaonia e ia lava le faamaoni i aoaoga faavae uma ua faaalia mai le lagi—na faamaoni i lona usoga ma faamaoni i le Atua, ona faamaufaailogaina lea o lana molimau i lona toto.”⁷

O Bathsheba W. Smith, o le peresitene aoao o le Aualofa mai le 1901 i le 1910: “Ou te iloaina o ia lava o le ua ia fai mai ai—o se perofeta a le Atua, ma na toefuataiina e le Alii e ala mai ia te ia le talalelei e faavavau ma sauniga uma ma faaeega paia o le a taitaia i tatou i le malo selesitila.”⁸

O Uilifoti Uitilafi, o le Peresitene lona fa o le Ekalesia: “Ua ou lagonaina le olioli matua sili ona maoae i le mea na ou vaai ai ia Uso Iosefa, aua i lana gaoioiga faalauaitele ma le faalilolilo na ia tauaveina le Agaga o le Silisili Ese, ma na ia faaalia se tulaga maoae o le agaga ou te lei vaai ai lava i se isi tagata.”⁹

O Daniel D. McArthur, o se uluai tagata o le Ekalesia o le na mulimuli ane taitaia se tasi o vaega o taavaletoso agai atu i le Aai i Sate Leki: “O la’u molimau o ia lava o se Perofeta moni a le Atua soifua; ma o le tele lava o taimi na ou faalogo ai i ana tautalaga ma vaai ai i ana gaoioiga o le tele foi lea o le faatalitonuina o au na ia vaai moni lava i le Atua le Tama ma Lona Alo o Iesu Keriso, faapea foi ma agelu paia a le Atua. … Na foliga mai lava ia te a’u afai e i ai se mea se tasi na ou iloaina i lenei lalolagi, na ou matua mautinoa o ia o se Perofeta.”¹⁰

O Alexander McRae, o se tasi o i latou o e na falepuipui i le Falepuipui i Liperate faatasi ma Iosefa Samita: “O lo matou talitonuga lea ia [Iosefa Samita] o se Perofeta, lea a oo ina ia faapea mai, ‘Ua fetalai mai ai le Alii,’ na matou faatuatua o le a tupu lava e pei ona ia saunoa mai ai; ma o le tele lava o taimi matou te tofotofoina mea sa ia saunoa ai, o le tele foi lea o le faatuatua na matou maua, aua matou te lei iloaina lava se taimi e tasi na toilalo ai lana upu.”¹¹

O Lyman O. Littlefield, o se uso o le Tolauapiga a Siona: “O malosiaga uma o lona agaga atoa na faaaogaina uma i le galuega mamalu i aso e gata ai, lea na valaauina i ai o ia e lona Matai Faalelagi.”¹²

O Mary Alice Cannon Lambert, o se tagata liliu mai Egelani o le na malaga mai i Navu i le 1843: “Na ou vaai muamua lava ia Iosefa Samita i le Tautotogo o le 1843. Ina ua taunuu le vaa na matou o mai ai i le Vaitafe o Misisipi i le taulaga vaa i Navu, na i ai ni nai alii taitai iina e faafeiloaia le vaega o le au paia na o mai ai. Na i ai le Perofeta o Iosefa Samita faatasi ma na uso. Na ou iloaina o ia i le taimi lava na vaai ai o’u mata ia te ia, ma i le taimi lava lena na maua ai la’u molimau o ia lava o se Perofeta a le Atua. … E lei faasinoina mai o ia ia te a’u. Na ou iloaina o ia mai isi tagata uma lava, ma, i le avea ai o a’u ma se tamaitiiti (sa na o le sefulufa o’u tausaga) na ou iloaina na ou vaai i se Perofeta a le Atua.”¹³

O Angus M. Cannon, o se tagata o le Ekalesia o le na nofo i Navu o se talavou ma sa mulimuli ane avea ma peresitene o le siteki i le Aai i Sate Leki: “I se tasi o taimi faapitoa lava na ou manatua ai Uso Iosefa a o ia lauga atu i se faapotopotoga o le Au Paia, i le tautotogo o le 1844. Na i lalo o se laau aoa tele, i se vanu itiiti i le itu i saute o le Malumalu, e latalata i le auala o Parley. Na ia lauga faatatau ai i le moni o le Atua, i le faatuina o Lana Ekalesia, na ia faatulagaina ai ia na o le toatasi lava le tagata na faatagaina, e le Atua, ia mauaina faaaliga ia e tatau ona fusifusia i luga o le Ekalesia. … O le taimi lava foi lea e tasi na ou faalogo ai i le Perofeta o folafola mai na ia mauaina le Perisitua Mekisateko, i lalo o le taitaiga a Peteru, Iakopo ma Ioane.

“O le manatunatuga loloto ua tulai mai i lo’u mafaufau talavou i tautalaga musuia a Iosefa Samita ua taitaiina ai au i lo’u olaga atoa mulimuli ane; ma a oo ina puaoa lo’u mafaufau i le pouliuli, e oo mai ma le manino lana molimau i o’u luma, ma aumaia ia te a’u faamaoniga o le Ekalesia a Iesu Keriso o le Au Paia o Aso e Gata Ai ua faatuina ma taitaia e ala i le mana manino ma le pule a le Atua.”¹⁴

O Ailama Samita, le uso o le Perofeta ma le Peteriaka mo le Ekalesia: “Na i ai perofeta muamua, ae o Iosefa e i ai le agaga ma le mana o perofeta uma lava.”¹⁵

O Iosefa Samita sa avea ma faataitaiga e mafai ona tatou mulimuli ai i le faatupuina o uiga faa-Keriso.

O Parley P. Pratt, o se uso o le Korama a Aposetolo e Toasefululua mai le 1835 i le 1857: “O Peresitene Iosefa Samita o se tagata umi ma tino lelei, e malosi ma gaioi tele; e paepae ona foliga, samasama lona lauulu, lanumoana ona mata, laitiiti lava sana ava, ma e tulaga ese ona foliga ia te ia lava. … O ona foliga e matua filemu, mafanafana ma faiuo, e faaali manino mai ai lona atamai ma lona agalelei; faatasi ai ma se vaaiga o le naunau ma se foliga ataata, po o foliga fiafia, ma atoatoa ona saoloto mai le faafoliga mai o sona taua; ma na i ai lava se mea na fesootai ma lana pupula toafilemu ma le sagatonu o lana vaai, e faapei e ati i lagona ma manatu loloto o le loto o le tagata, pulatoa atu i le faavavau, ati atu i le lagi, ma malamalama i lalolagi uma. Na ia te ia se [uiga] toa faatamalii ma le tutoatasi o lona tagata; e faigofie ma faamasani gofie ona uiga; o lana aoaiga e matautia e faapei o se leona; o lona agalelei e le faatuaoia faapei o le moana; o lona atamai e matua lautele ma o’oo’o i tulaga uma o le olaga.”¹⁶

O John Needham, o se tasi o uluai tagata Egelani na liliu mai: “O Iosefa Samita o se tagata matua maoae, o se tagata o aoaoga faavae, o se tagata sao ma faamaoni; e le o se tagata foliga fia paia, ae e matua faafeagai lava ma lena tulaga. E moni e le mautonu nisi ona o ia o se tagata e tautala tuusao, ma tautala manino, o se tagata fiafia, ae o mea na e faatupu atili ai lo’u alofa ia te ia.”¹⁷

O Emmeline B. Wells, o le peresitene aoao o le Aualofa mai le 1910 i le 1921: “Ou te … molimau atu o ia o le alii e silisili ona maoae ma le perofeta silisili ona maoae ma o le tagata e silisili ona maoae o lenei augatupulaga, o le silisili ona maoae, ou te saogalemu ai i lo’u faapea atu, talu mai aso o le Faaola. O lona mamalu i lona foliga mai o se mea matagofie. E te ono manatu ua sili mamao atu lona umi ma sili mamao atu lona tele nai lo lona tulaga moni lava. Atonu o le toatele o outou ua matauina tagata o e i ai ia ituaiga o foliga pe a latou tutulai ma savavali. O le tulaga lea na i ai le Perofeta o Iosefa. E leai ni ata o i ai ou te iloa, e faatusatusalia le matagofie ma le mamalu o lona tulai mai.”¹⁸

O Mary Alice Cannon Lambert: “O le alofa na i ai i le au paia mo ia na le mafaamatalaina. Na semanu latou te naunau lava e tuuina i lalo o latou ola mo ia. Pe a faapea e tautala o ia, e tuueseina uma a latou galuega ina ia mafai ona latou faalogo i ana upu. E le o ia o se ituaiga o tagata masani. Na lagonaina ma matauina tutusa e le Au Paia ma le au agasala se mana ma se uunaiga na tauaveina e ia. Na matua faigata [i se tagata] le feiloai ma ia ae le aafia ai [ona] lagona loloto i le malosi o ona uiga faaletagata ma lana uunaiga.”¹⁹

O John M. Bernhisel, o se fomai na nofo i le fale o Iosefa ma Ema i Navu mo ni nai masina i le vaitaimi o le 1843 ma le 1844: “O Iosefa Samita o lona natura o se tagata e i ai mana malolosi tau i le mafaufau, ma o loo ia te ia le malosiaga tele ma ni uiga naunautai, se malamalamaaga maoae, ma se atamai loloto o le natura faaletagata. O ia o se tagata e toafilemu lana faamasinoga, e silasila mamao, ma ua lauiloa faapitoa lava i lona fiafia i le faamasinoga tonu. O ia o se tagata e agalelei ma loto fesoasoani, lima foai ma agaalofa, e faauogofie ma mata fiafia, ma o loo ia te ia se mafaufau e manatunatu loloto ma magafagafa lona uiga. O ia o se tagata e faamaoni, tautala sa’o, e le fefe ma tutoatasi, ma e aunoa o ia mai le faafoliga pepelo, o se ituaiga o tagata e le mafai ona maua. … I le avea ai o se faiaoga faalelotu, faapea ma le avea ai o se tagata, ua matua maoae le alofagia o ia e ona tagata.”²⁰

O Jesse N. Smith, o se tausoga o Iosefa Samita: “[O le Perofeta na] le mafaatusalia le avea o ia o le tagata sili ona faapei o le Atua ua ou vaai i ai. … Ou te iloa o lona natura e le mafai ona ia pepelo pe taufaalata, ae ua ia te ia se agalelei silisili ona maoae ma le tamalii o ona uiga. O taimi lava ou te i ai faatasi ma ia na ou lagonaina lava e mafai ona ati lana vaai ia te a’u i o’u lagona ma manatu. Ou te iloa e moni uma lava mea ua faamatalaina ai o ia.”²¹

O William Clayton, o se tagata Egelani liliu mai o le sa avea ma failautusi ia Iosefa Samita: “O le tele lava o taimi ou te i ai faatasi ma ia, o le tele foi lena o lo’u alofa ia te ia; o le tele o lo’u iloa o ia, o le tele foi lena o lo’u faatuatuaga ua ia te ia.”²²

O Iosefa F. Samita, o le Peresitene lona ono o le Ekalesia: “Na faatumulia o ia i le natura faaletagata sili ona tamalii ma mama, lea na masani ona faailoa mai i faafiafiaga mama—i le taalo polo, i le tauivi ma ona uso ma le taaalo ma i latou, ma faafiafiaina ia lava; e le pei o ia o se tagata e faafoliga lona sasao noa ma malo lona amiotonu, ma ni ona foliga e foliga malo e le mafai ona ataata, ma leai se olioli i lona loto. Oi, na tumu o ia i le olioli; na tumu o ia i le fiafia; na tumu o ia i le alofa, ma isi uiga tamalii uma ia e faia e tagata maoae ma le lelei, ma i le taimi lava e tasi e faigofie ma mama, ina ia mafai ai ona alu ifo i tulaga sili ona maualalo; ma na ia te ia le mana, e ala i le alofa tunoa o le Atua, e malamalama ai foi i fuafuaga uma a le Silisili Ese. O uiga na o le Perofeta o Iosefa Samita.”²³

I le avea ai ma perofeta lea na auala mai ai le toefuataiina o le talalelei, na aoaoina atu e Iosefa Samita le ata o le faaolataga a le Atua ma le manino ma le mamana.

O Polika Iaga: “O le atoatoa o le mamalu o uiga o le Uso o Iosefa Samita o le tulaga lea o le mafai ona ia faamatalaina mea faalelagi i le malamalamaaga o tagata ola. A oo ina lauga atu o ia i tagata—na ia faailoa atu mea a le Atua, le finagalo o le Atua, le ata o le faaolataga, faamoemoega o Ieova, la tatou fesootaiga ma ia ma tagata faalelagi uma lava—na ia faamatalaina ana aoaoga i le malamalamaaga o alii, tamaitai ma tamaiti uma taitoatasi, ma faamaninoina i latou e pei o se auala matua auiliili ona faamatalaina mai. O lenei tulaga na tatau ona faatalitonuina tagata taitoatasi uma, o e na faalogo ia te ia, i lana pule ma le mana faalelagi, aua e leai se isi lava tagata na mafai ona aoao atu e pei ona ia faia, ma e leai se tagata na mafai ona faaalia mea a le Atua, vagana e ala mai i faaaliga a Iesu Keriso.”²⁴

O Howard Coray, o se failautusi a Iosefa Samita: “Ua ou suesueina le Talalelei e pei ona faaalia mai e Iosefa Samita ma mafaufau ai pe faamata e mafai e se tagata e aunoa ma le fesoasoani a le Agaga o le Atua ona mafai ona faaalia lea ituaiga o faatulagaga e pei o le faaolataga ma le faaeaga mo le tagata. O la’u faaiuga e leai e le mafai. E tele naua taimi na ou nofonofo ai ma faalogologo i ana lauga i le tulaga i Navu ma oo ina matua alu atoatoa i ai lo’u mafaufau i le mana o ana upu e le mafaamatalaina— a o lauga mai i se auala ou te lei faalogo lava i ai o lauga mai ai se isi tagata.”²⁵

O Joseph L. Robinson, o se fesoasoani i le au epikopo i Navu: “Ua leva lava ona matou talitonu ma iloa moni lava o Iosefa Samita o se Perofeta moni ma le lotomaualalo a le Atua, ae o lenei ua mafai ona vaai atu i ai o matou mata ia te ia, ma faalogo i ai o matou taliga i lona leo, lea e pei o le leo o le faititili malosi o le Lagi, ae o lana gagana e agamalu ma aoao mai ai, e matua faagaeetia. Ae e i ai se mana ma se mamalu o i ai i ana upu ma ana lauga matou te lei vaai i ai muamua i se isi lava tagata, aua o ia o se Perofeta malosi, o se tagata paia o le Atua. Na aoaoina moni lava o ia i mea faatatau i le malo o le Atua ma na maualuga le faatumulia o ia i le Agaga Paia, lea na avea o se soa tumau.”²⁶

O Orson Spencer, o se faifeau Papatiso o le na auai i le Ekalesia i le 1841: “I tulaga o mataupu faavae o le Susuga a Samita e maoae lona atamai i tusitusiga paia. Ou te lei iloa lava se taimi na ia faafitia ai pe ta’ufaatauvaaina se upumoni e tasi o le Feagaiga Tuai ma le Feagaiga Fou; ae na ou iloaina i taimi uma na te faamalamalamaina ma puipuia i latou i se auala faatofala’ia lelei. I le tofia ai e le Atua, mo le faamoemoega o le aoaoina ma le faaatoatoaina o le ekalesia, e manaomia lona iloa pe faapefea ona faatulagaina mea o loo faaletonu ina ia aumaia ai mea fou ma mea tuai, faapei o se tusiupu ua lelei ona aoaoina. O lenei tofiga ma le tulaga faaaposetolo e foliga o loo ia faalauteleina; i lona taulimaina e [pei ua] toe ola mai lava perofeta anamua, ma o le matagofie ma le mana o a latou faaaliga e faaalia maia i latou lava ma le fiafia faagaeetia mo i latou uma o e faalogologo ai.”²⁷

O Jonah R. Ball, o se tagata o le Ekalesia o le na ola i Navu: “[Na ou] alu i le sauniga. Na ou faalogo i le Perofeta o lauga i luga o le fola o le malumalu. Na i ai ni nai afe o tagata e faalogologo ia te ia. E le sese lava. O le auala na te folafolaina mai ai tusitusiga paia ua siliga ona taumateina pe faatuieseina. O le tusi [na ia faaaogaina] o le mataupu muamua o le 2 Peteru. Na ia faamalamalamaina i le manino e pei o le la i le [aoauli].”²⁸

O William Clayton: “Na matou maua le avanoa e talanoa ai ma Iosefa Samita le Itiiti ma na faafiafiaina i matou i le faatasi ma ia. … O ia. … o se tagata e tonu lana faamasinoga ma faatumulia o ia i le tele o le atamai, ma a o e faalogo i lana talanoa e te maua ai le atamai e faalauteleina ai lou mafaufau ma faatupuina ai le olioli i lou loto. E matua faigofie ona talanoa ia te ia ma e fiafia tele e aoao le tagata mativa o le au paia. E mafai ona ou talanoa i ai e pei ona ou talanoa atu ia te oe, ma e tusa ai ma le naunau e fesootai atu aoaoga na ia faapea mai, ‘Ou te maua fua mai ma ou te foaiina atu fua.’ E naunau lava o ia e tali soo se fesili ua ou tuuina atu ia te ia ma e fiafia pe a matou fesili atu ia te ia. E foliga e matua maoae lona malamalama i tusitusiga paia, ma a o talanoaina soo se mataupu e i ai se ituaiga o malamalama ma le matagofie e faaalia ou te lei vaai lava i ai muamua. Afai na ou sau mai Egelani ma le faamoemoe e talanoa ma ia mo ni nai aso ou te iloa o le a matua tauia lelei a’u i a’u taumafaiga.”²⁹

O Mercy Fielding Thompson, o se tagata Peretania liliu mai o lana tane, o Robert B. Thompson, na auauna o se failautusi ia Iosefa Samita: “Ua ou. … faalogo i ana faamalamalamaga manino ma le faatofala’ia lelei o fesili loloto ma le faigata. Ia te ia e foliga o mea uma lava e manino ma faigofie ona malamalama ai, ma o le mea lea e mafai ai ona ia faamaninoina i isi ma e leai lava se isi tagata ua ou faalogo i ai na te mafai ona faia.”³⁰

E faapei o le uluai Au Paia, e mafai ona tatou teuina upu a Iosefa Samita ma ola i mataupu faavae na ia aoaoina.

O Emmeline B. Wells: “I le Perofeta o Iosefa Samita, ou te talitonu na ou matauina le mana faaleagaga maoae na aumaia le olioli ma le mafanafana i le Au Paia. … O le mana o le Atua na i luga ia te ia i se maualuga lea na i ai i le tele o tulaga na foliga e liua o ia. O ona foliga e toafilemu ma toetoe lava e faapei o se tamaitiiti pe a malolo; ma i taimi e laugaina ai tagata, o e alolofa ia te ia e foliga i le faaaloaloina, o le mamalu o ona foliga na le mafaamatalaina. I isi taimi o le mana maoae o lona uiga, e sili atu nai lo le tulaga o lona siufofoga (lea na maoae le mamana ia te a’u), na foliga e luluina le nofoaga lea na matou tutu ai ma ati i le totonugalemu o le agaga o le au faalogologo, ma ou te mautinoa i le taimi lena e mafai ona latou tuuina i lalo o latou ola e puipui ai ia te ia. O taimi uma na ou faalogo ai ma le le gaoia i ana upu uma—o le na filifilia e le Atua i lenei augatupulaga faaiu.”³¹

O Lorenzo Snow, o le Peresitene lona lima o le Ekalesia: “O le uluai taimi na ou vaai ai i le Perofeta o Iosefa o le taimi a o ou tama talavou [tusa o le 17 tausaga]. Na lauga o ia i se faapotopotoga itiiti. Na ia tau atu ia i latou e faatatau i asiasiga a agelu ia te ia. … Na matua fiafia tagata e faalogo ia te ia, aua na tumu o ia i faaaliga. … E tusa ai ma folafolaga a le Alii, o e na taliaina ia mataupu faavae, na latou maua mai le Alii se molimau o le moni o ia mea.”³²

O Edward Stevenson, o se uso o le Au Fitugafulu mai le 1844 i le 1897: “Na muamua ou vaai ia te ia i le 1834 i Pontiac [Michigan] ma na i ai se uunaiga malosi i lo’u mafaufau ia te ia ua mafua ai ona tupu se fiafia tele ia te au e faamatala atu lena ata i ana mau uo. O le alofa ia te ia, o se Perofeta moni lava a le Atua, na maumaututu lava ona uunaia malosi i lo’u mafaufau, ma na tumau ai lava ia te au i taimi uma mai lena taimi, e ui ua toeitiiti onosefulu tausaga ua mavae talu mai lena taimi. I lena tausaga lava e tasi, 1834, i le totonugalemu o le tele o faapotopotoga tetele, na molimau le Perofeta ma le mana maoae e faatatau i le asiasiga a le Tama ma le Alo, ma lana fesootaiga ma i laua. E leai lava se taimi muamua na ou lagonaina ai sea ituaiga o mana e pei ona faaalia i taimi ia.”³³

O Mary Ann Stearns Winters, o se afafine fai o Elder Parley P. Pratt: “Na ou tu latalata i le Perofeta a o ia lauga atu i Initia i le Togalaau e latalata i le Malumalu. Na faasusuluina e le Agaga Paia ona fofoga seia oo ina susulu e pei o se malamalama na siosioina o ia, ma o ana upu na ati i loto o i latou uma o e na faalogo ia te ia. …

“Na ou vaai i tino maliu o Uso Iosefa ma Ailama a o faataotolia i laua i le Fale Tele ina ua aumaia i laua mai Karefasi, ma ou vaai foi i nisi o lavalava na la laeiina, na pisipisia i le toto o o laua soifua. Na ou iloa o i laua o tagata o le Atua, o le Perofeta ma le Peteriaka, e moni ma faamaoni. Tau ina ia tatou agavaa e feiloai ma i laua i le lalolagi a sau!”³⁴

O Uilifoti Uitilafi, na lipotia mai se lauga o le aso 6 o Aperila, 1837: “Na tulai Peresitene Iosefa Samita le Itiiti ma laugaina le faapotopotoga mo le taimi e tolu itula, na laei i le mana, agaga, ma fofoga o le Atua. Na ia faaalia lona mafaufau ma lagona i le fale o ana uo. Na ia faaalia le tele o mea e maoae lo latou taua i mafaufau o toeaina o Isaraelu. E, ina seia togitogia i latou i luga o o tatou loto e faapei i se peni uamea ina ia tumau ai e faavavau ina ia tatou faaaogaina i latou i o tatou olaga [tagai Iopu 19:23–24]. O lena punavai o le malamalama, mataupu faavae, ma le amio mama e puna mai i le loto ma le fofoga o le Perofeta o Iosefa, o le e pei lona agaga o Enoka na tumu e leai se mea e gata mai ai faapei o le faavavau—ou te faapea atu, o nei ituaiga o faamaoniga na faaalia i sea ituaiga o malosiaga na tatau ona soloi esea uma tulaga o le le talitonu ma le masalosalo mai mafaufau o le au faalogologo, aua o ia ituaiga o gagana, lagona, mataupu faavae, ma agaga e le mafai ona tafe mai i le pouliuli. O Iosefa Samita le Itiiti o se perofeta a le Atua na faatuina mo le laveaiina o Isaraelu e moni lava e pei ona mu lo’u loto i totonu ia te au.”³⁵

O Polika Iaga: “Mai le uluai taimi na ou vaai ai i le Perofeta o Iosefa e lei galo ia te au se upu na pau mai ia te ia e faatatau i le malo. Ma o le ki lenei o le malamalama ua ia te a’u e oo mai i le aso, na ou faalogo i upu a Iosefa, ma teuina na upu i lo’u loto, teu eseina i latou, ma talosaga atu i lo’u Tama i le suafa o Lona Alo o Iesu e aumaia i latou i lo’u mafaufau i taimi e manaomia ai. Na ou teuina mea a le Atua, ma o le ki lenei ou te umiaina e oo mai i le aso. Na ou matua naunau e aoao mai ia Iosefa ma le Agaga o le Atua.”³⁶

Fautuaga mo le Suesueina ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai i itulau vii–xii.

Faitau molimau e uiga i le Perofeta o Iosefa Samita i itulau 528–30. O a ni mea e uunaia ou lagona e uiga i nei molimau? O le a le faavae o lau oe lava molimau ia Iosefa Samita? E faapefea ona e mauaina lenei molimau? Atonu o le a e manao e tusia lau molimau i lau tusi faamaumau pe faasoa i lou aiga.
O itulau 530–533 o loo i ai faamatalaga e faamatalaina mai ai foliga o Iosefa Samita, o ona lagona, ma ona uiga faaletagata. E faapefea e nei faamatalaga ona uunaia ou lagona faatatau ia Iosefa Samita? Mafaufau i auala e mafai ai ona e faatupuina nisi o nei lava uiga.
Suesue molimau e uiga i le auala na aoao atu ai e le Perofeta o Iosefa le talalelei ma faamalamalamaina tusitusiga paia (itulau 533–35). E faapefea e nei molimau ona fesoasoani ia i tatou a o tatou suesueina ma aoao atu le talalelei?
Toe iloilo le vaega faaiu o lenei mataupu (itulau 537). E faapefea ona e mulimuli i faataitaiga a Uilifoti Uitilafi ma Polika Iaga i au suesuega o lenei tusi? E faapefea ona e mulimuli i faataitaiga a o e suesueina aoaoga a perofeta soifua? O le a sou manatu o le a le uiga o le faatagaina o le upumoni e “togitogia i luga o o tatou loto faapei [ua tusia] i se peni uamea”?

Mau E Faatatau I Ai: 2 Nifae 3:6–19; MFF 24:1–9; 124:1

Joseph Smith teaching — “Sa fiafia tagata e faalogologo [i le Perofeta o Iosefa Samita], aua sa tumu o ia i faaaliga.” Sa tautino mai e Lorenzo Snow, “E tusa ai ma folafolaga a le Alii, o i latou o e taliaina mataupu faavae sa ia aoaoina mai, e mauaina mai i le Alii se molimau o lo latou moni.”