Mataupu 20
O Se Loto e Tumu i le Alofa ma le Faatuatua: O Tusi a le Perofeta i Lona Aiga
“Ia manatua o au o se uo moni ma le faamaoni ia te oe ma le fanau e faavavau. O ou lagona mo oe e oo i le faavavau faavavau lava. Aue, ia faamanuia outou uma e le Atua.”
Mai le Soifuaga o Iosefa Samita
I lona valaauga faaperofeta, sa manaomia ai Iosefa Samita e malaga pea lava e faafetaiai manaoga o se faapotopotoga ua vave tele le faatupulaia. Ina ua maea ona ia faailoaina Independence, Misuri, o le nofoaga mo le faatuina o Siona i le taumafanafana o le 1831, sa vave le ola o le Ekalesia iina, e faapea foi ona faaauau ai i Katelani, Ohio. Mai le 1831 i le 1838, sa lua nofoaga autu o faapotopotoga a le Ekalesia, e tasi i Misuri ma le isi i Katelani, lea sa nofo ai le Perofeta. I lea vaitaimi, sa faalima ona faia e le Perofeta se malaga faigata e 900-maila i Misuri ina ia vaaia le atiina ae o le Ekalesia i lea nofoaga.
I le 1833 ma le 1837, sa asiasi atu ai Iosefa Samita i Upper Canada, ma aoaoina le talalelei ma faamalolosia paranesi. I le 1834 ma le 1835, sa malaga ai o ia i Michigan e asiasi i tagata o le Ekalesia. I se vaitaimi o na tausaga, sa ia folafola atu le talalelei ma taitaiina mataupu a le Ekalesia i Springfield, Ilinoi; Boston ma Salem, Massachuttes; Monmouth County, New Jersey; le Aai o Niu Ioka ma Albany, Niu Ioka; Cincinnati, Ohio; Filatelefia, Penisilevania; Uosigitone, D.C.; ma isi nofoaga eseese.
O femalagaiga a le Perofeta sa faifai pea ona aveesea ai o ia mai lona fale ma le aiga, faapea foi ma sauaga sa ia feagai ai pea. Sa molia seseina o ia ma faafalepuipuiina i le tele o taimi, ma sa afaina o ia i le tele o moliaga e le faavaea. Mo se faataitaiga, i le aso 27 o Iulai, 1837, o le Perofeta ma nisi o taitai o le Ekalesia sa tuua Katelani ma asiasi atu i le Au Paia i Kanata. Ina ua latou taunuu i Painesville, Ohio, sa “taofia i latou i le aso atoa i ni moliga taufaamatau ma le taufaaleaga.” Talu ai e lei mamao tele i latou mai Katelani, sa amata ona foi atu i o latou aiga mo se malologa ma toe amata ai la latou malaga i le aso e sosoo ai. “E tusa o le goto ifo o le la sa ou toe oso ai i lau taavale solofanua e toe foi atu i le fale i Katelani,” sa tusia ai e le Perofeta. “I lea taimi sa oso tu mai ai le leoleo i totonu o lau taavale solofanua, ma taofia maea e ave ai le taavale solofanua, ma toe tuuina mai se isi tusi samania mo au.”1
O le tele o le toesea o le Perofeta mai lona aiga o ni tofotofoga tiga ia ia te ia ma lona aiga. O ana tusi ia Ema o loo faaalia ai le tuulafoaiina na ia oo i ai, ma ona lagona moomoo mo ia ma le la fanau. Sa ia tusi faaauau ma lona alofa tele mo lona aiga ma lona faatuatua i le Atua. Sa ia tuuina atu foi ni faamalosiau maumaututu i lona aiga, e faailoa atu ai le manatu lelei mo le lumanai e ui i faigata o loo o latou feagai ai.
I le aso 1 o Aperila, 1832, sa tuua ai e le Perofeta lona aiga mo lana malaga lona lua i Misuri, i le na o le tasi le vaiaso talu ona faataina ma faafulumanuina o ia e le au faatupu faalavelave ma ua na o le lua aso talu ona maliu lona atalii fai. E mautinoa lava o loo mamafa lona loto i le faanoanoa ma le manatu popole mo lona toalua, o Ema, ma lona alo e toatasi o loo ola, o Iulia. Ao ia toe foi mai i lona fale i le masina na sosoo ai, ma le naunautai e toe faatasi ma lona aiga, sa taofia o ia mo ni vaiaso i Greenville, Indiana. O Epikopo Newel K. Whitney, o se tasi o soa malaga a le Perofeta, sa tigaina i le lavea o lona vae i se faalavelave i le taavale solofanua ma sa manaomia ai le toe maua o le malosi ae lei toe faaauauina le malaga. I lea taimi, sa faaonaina le Perofeta i se faiga, ma mafua ai ona puai o ia ma sa tigaina ma afaina ai lona auvae. Sa ia oo atu ia Epikopo Whitney, o le e ui o loo faataotolia pea i le moega, sa ia tuuina atu se faamanuiaga faaleperisitua ia Iosefa. Sa vave lava ona faamaloloina le Perofeta.
I se taimi puupuu ina ua maea lenei aafiaga, sa tusia ai e le Perofeta nei laina i lona faletua: “O Uso Matini [Harisi] ua taunuu mai iinei ma aumaia le tala fiafia o loo manuia o matou aiga ina ua ia tuua i latou, lea sa matua faafiafiaina ai o matou loto ma toe faamalosia ai o matou agaga. Matou te faafetai i le Tama oi Le Lagi mo lona agalelei ia i matou ma outou uma. … O le tulaga o loo ou i ai ose tulaga faaletonu, e ui o loo ou taumafai ia taliaina, ma le fesoasoani mai a le Alii ia te au. … Ua ou manao ou te vaai ia Iulia laitiiti ma toe sii o ia i luga o ou vae ma talatalanoa ma oe. … Ou te faamaoni ia te oe o lou toalua. Ia faamanuia le Alii ia te oe, ia i ai le filemu faatasi ma oe, ma faatofa atu seia ou toe foi atu.”2
Aoaoga a Iosefa Samita
O tagata o le aiga e tatalo mo, faamafanafanaga, ma faamalosiau le tasi i le isi.
Ia Ema Samita i le aso 13 o Oketopa, 1832, mai le Aai o Niu Ioka, Niu Ioka: “O lenei aso sa ou savali ai i le vaega pito sili ona matagofie o le aai o Niu Ioka. O fale e matuai sili ma le matagofie, i le ofo ai o i latou uma e vaai i ai. … Ina ua maea ona ofo i mea uma ua ou maofa ai, sa ou toe foi i lou potu ma mafaufau loloto ma faatoafilemu lou mafaufau; ae faauta, o mafaufauga o le aiga, o Ema ma Iulia, ua osofai mai i lou mafaufau ua pei o se lolo ma sa ou moomoo mo sina minute ia faatasi ma i laua. O lou loto ua tumu i lagona uma ma le faapelepele o se matua ma se toalua, ma pe ana mafai ona faatasi ma oe o le a ou tau atu ia te oe le tele o mea. …
“Ou te lagona e pei ua ou manao e tau atu se mea ia te oe e faamafanafana ai oe i ou tofotofoga patino ma aafiaga o loo i ai nei [O Ema o loo maitaga i le taimi lea]. Ou te faamoemoe o le Atua o le a tuuina atu ia te oe le malosi ina ia e le matapogia. Ou te tatalo i le Atua ia faavaivai loto o i latou o loo latalata ia te oe ia agalelei ia te oe ma aveese le avega mai ou tauau i le tele e mafai ai ae aua le faatiga ia te oe. Ou te mafaufau mo oe, ona ou te iloa lou tulaga ae o isi e latou te le iloa, ae e tatau ona e toafimalie ia te oe lava i le iloa ai o le Atua o lau uo i le lagi ma o loo i ai sau uo moni o loo ola i luga o le fogaeleele, o lou toalua lea.”3
Ia Ema Samita i le aso 12 o Novema, 1838, mai Richmond, Misuri, lea sa taofia faapagota ai o ia: “Sa ou maua lau tusi, lea sa ou lauina ma toe lauina; o se mea taua ia te au. Le Atua e, faataga ina ia ou maua le avanoa e toe vaai tasi ai i lou aiga manaia i le fiafiaga o faamanuiaga o le olaga saoloto ma fiafia faatasi ma isi. O le fusi mai o i latou i lou fatafata ma o le sogi atu i o latou alafau mananaia o le a tumu ai lou loto i le agaga faafetai e le mafaamatalaina. Tau atu i tamaiti o loo ou ola ma talitonu o le a ou alu atu ma vaai ia i latou ma e le o toe umi. Faatoafilemu i o latou loto i mea uma e te mafaia, ma taumafai ia faatoafilemuina foi oe i mea uma e te mafaia. …
“I.S. Tusitusi mai pea pe a mafai, afai foi e talafeagai sau e vaai au, ma aumai tamaiti pe a mafai. Galue e tusa ai ma ou lava lagona ma lau faamasinoga lelei, ma taumafai e maua le toafimalie pe a talafeagai, ma ou te talitonu o le a lelei mea uma.”4
Ia Ema Samita i le aso 4 o Aperila, 1839, mai le falepuipui i Liperate, Misuri: “Lau pele Ema, ou te mafaufau pea ia te oe ma tamaiti. … Ou te manao e vaai ia Frederick laitiiti, Iosefa, Iulia, ma Alesana, Johanna [o se ua leai ni matua o loo nofo i le au Samita], ma Major matua [o le taifau a le aiga]. Ae mo oe, afai e te manao ia iloa po o le a le tele o lo’u manao e vaai ia te oe, suesue ou lagona, po o le a le tele o lou manao e vaai ia te au, ma faamasino ia te oe lava. Ou te matua fiafia lava e savali atu mai iinei ia te oe e aunoa ma ni seevae, leai ni lauulu ma leai se ofu tino e vaai ia te oe ma manatu o se fiafiaga sili, ae e le manatu o se malaga faigata. … Ou te gafatia ma le malosi ou tiga ona o sauaga; e faapea foi i latou ua faatasi ma au. E leai se tasi o i matou ua solomuli.”5
Ia Ema Samita i le aso 20 o Ianuari, 1840, mai Chester County, Penisilevania: “Ua ou lagona ma le naunautai e fia vaai ia outou uma mo se taimi se tasi i lenei lalolagi. Ua foliga mai ua umi se taimi o aveesea au mai ia te oe, ae i le fesoasoani a le Alii, o le a le toe umi ai se taimi e toesea ai ma oe. … Ua faatumuina au i le naunautaiga faifai pea ma o le a i ai lava seia ou oo atu i le fale. Ou te tatalo i le Atua ia faasaoina outou uma seia ou oo atu i le aiga. Lau pele Ema, o ou lagona mo oe ma le ta fanau e oo i le faavavau faavavau lava. Ou te manao ia e manatua au. Tau atu i tamaiti uma ou te alofa ia i latou ma o le a ou oo atu i le aiga i le vave e mafai ai. Mo oe lava e tumau i le alofa, o lou toalua.”6
O le matafaioi i le aoaoina o a tatou fanau ua i ai pea lea ia i tatou.
Ia Ema Samita i le aso 12 o Novema, 1838, mai Richmond, Misuri, lea sa taofia faapagota ai o ia: “Tau atu ia Iosefa laitiiti e tatau ona avea o ia ma se tama lelei. E alofa tama ia te ia i le alofa atoatoa. O ia o le ulumatua ma e le tatau ona faatiga ia i latou e laiti ia te ia, ae faamafanafana ia i latou. Tau atu ia Frederick laitiiti e alofa tama ia te ia ma lona loto atoa; o ia o se tama tausaafia. O Iulia o se teineitiiti e tausaafia. Ou te alofa foi ia te ia. O ia o se teneitiiti o loo faaalia se tulaga alualu i luma. Tau atu ia te ia e manao tama ia te ia e manatuaina o ia ma avea ma se teine lelei. Tau atu ia i latou uma o loo ou mafaufau ia i latou ma tatalo mo latou uma. … O Alexander laitiiti o loo i ai i lou mafaufau i taimi uma. Oi la’u Ema faapelepele e, ou te manao ia te oe ia e manatua o au o se uo moni ma le faamaoni ia te oe ma le fanau e faavavau. O ou lagona mo oe e oo i le faavavau faavavau lava. Ia faamanuia le Atua ia te outou uma, amene. O au o lau tane ua saisaitia ma puapuagatia.”7
Ia Ema Samita i le aso 4 o Aperila, 1839, mai le falepuipui i Liperate, Misuri: “Ou te le manao ia te oe e faatagaina tamaiti e faagalo ia te au. Tau atu ia i latou e alofa tama ia i latou i le alofa atoatoa, ma o loo ia faia mea uma na te mafaia ina ia alu ese mai ai mai le au faatupu faalavelave, ae alu atu ia i latou. Ia e aoao [i tamaiti] i le mea e te mafaia, ina ia i ai ni mafaufau lelei. Ia faapelepele ma agalelei ia i latou; aua e te maitaita ia i latou, ae faalogo i o latou manaoga.Tau atu ia i latou ua fai atu tama e tatau ona avea i latou ma ni tamaiti lelei ma usitai i lo latou tina. Lau pele Ema, o loo i ai se matafaioi tele o loo i ou luga i le faasaoina o oe lava i le faaaloalo ma le toafilemu i o latou luma ma aoaoina i latou i mea sao; ina ia fausia ai o latou mafaufau talavou ma le mu’amu’a ina ia latou amata i le auala sao ae aua nei faaleagaina ao laiti i le vaaia o faataitaiga e le faaleatua.”8
Ia Ema Samita i le aso 9 o Novema, 1839, mai Springfield, Ilinoi: “O le a faatumuina au i le naunautaiga faifai pea e uiga ia te oe ma le fanau seia oo ina ou faalogo atu ia te oe ma, aemaise lava o Frederick laitiiti. Sa matua tiga lava le tuua o ia ao ma’i. Ou te faamoemoe o le a e vaaia na fanau faapelepele i se tulaga tatau ai o se tina ma se tagata paia ma taumafai e atiina ae o latou mafaufau ma [aoao] i latou e faitau ma toafilemu. Aua nei tuua latou e fetaiai ma le tau nei taia i latou i le malulu ma mamai, ma taumafai ina ia maua sau malologa i le mea e mafai ai. O le a avea o se taimi umi ma le tuulafoaiina i lo’u toesea ai mai ia te oe. … Ia e onosai seia ou oo atu, ma faia le mea lelei e te mafaia. E le mafai ona ou tusia le mea ou te manao i ai ae ia e talitonu mai, o ou lagona mo oe o le ituaiga sili lava.”9
O le Atua o la tatou uo, ma e tatou te faatuatuaina o Ia i o tatou taimi faigata.
Ia Ema Samita i le aso 6 o Iuni, 1832, mai Greenville, Indiana: “Sa ou asiasi i se togalaau o loo i tua o le taulaga toeitiiti lava o aso uma, lea ou te alu ese mai ai mai mata o soo se tagata ma o iina e faaali atu ai ou lagona uma o lou loto i le mafaufau loloto ma le tatalo. Ua ou toe manatua mea uma ua tuanai o lou olaga ma ua tuua au ou te tagi ma maligi loimata o le faanoanoa i lou valea i le faatagaina o le fili o lou agaga ia i ai le tele o le malosi ia te au e pei ona ia faia i taimi ua sola. Ae o le Atua e agaalofa ma ua faamagaloina au agasala, ma ua ou fiafia ua ia auina mai le e Faamafanafana ia i latou uma o e talitonu ma faamaualalo i latou lava i ona luma. …
“O le a ou taumafai e taliaina ma le lotomalie mea ua tuuina mai, i le iloa ai o le Atua o lau uo. Mai ia te Ia o le a ou maua ai le mafanafana. Ua ou tuuina atu lou ola i ona aao. Ua ou saunia ou te alu atu i lana valaau mai. Ua ou naunau ia faatasi ma Keriso. E le taua ia te au lo’u ola [sei vagana ai] le faia o lona finagalo.”10
Ia Ema Samita i le aso 4 o Iuni, 1834, mai auvai o le Vai o le Misisipi i le ogatotonu o Ilinoi; ao malaga le Perofeta o Iosefa ma le Tolauapiga a Siona: “Mai i lea taimi i lea taimi o o matou mafaufau o loo tumau pea e le mafai ona faamatalaina le naunau mo o matou taitoalua ma a matou fanau—o matou sootaga i le tino o loo fusia i o matou loto—faapea foi o matou uso ma uo. … Tau atu ia Tama Samita ma le aiga uma ma le uso ia Oliva [Kaotui] ia toafilemu ma vaai i le lumanai i le aso o tofotofoga ma puapuaga o lona olaga o le a oo mai le iuga, ma o le a tatou fiafia uma i fua o a tatou galuega pe a tatou taofi mau ma le faamaoni i le iuga, lea ou te tatalo ia avea o se taunuuga mo i tatou uma.”11
Ia Ema Samita i le aso 4 o Novema, 1838, mai Independence, Misuri, lea o loo taofia faapagota ai o ia: “Lau pele ma lau soa faapelepeleina o lou agaga i puapuaga ma aafiaga, ou te manao e faailoa atu ia te oe o loo ou manuia lava ma o i tatou uma o loo i ai le agaga lelei e faatatau i o tatou lava taunuuga. … O loo i ai lou naunautaiga tele lava e uiga ia te oe ma lau fanau matagofie. E tagi lou fatu ma lagona le alofa mo uso ma tuafafine ma le faaumatiaina o tagata o le Atua. … O le a le mea e faia e le Atua mo i tatou ou te le iloa, ae ou te faamoemoe mo le mea sili i tulaga uma. E ui ou te alu atu i le oti, ou te talitonu lava i le Atua. O a ni mea leaga e ono faia e le au faatupu faalavelave ua ou le iloaina lava, ae ia manatu o le a i ai le laitiiti po o le leai foi o se taofiofiga. Aue, ia i ai le agalelei o le Atua ia i tatou. … O le Atua sa faasaoina nisi o i tatou e oo mai i lenei taimi; masalo o le a ia faalautele le agalelei i se vaega agai mai ia i tatou. …
“E le mafai ona ou aoaoina ni mea se tele ma le mautinoa i le tulaga o loo ou i ai, ae na ona ou tatalo mo se laveai e tuuina mai ma taliaina mea uma pe a oo mai ma le onosai ma le lototele. Ou te faamoemoe o le a e faatuatua ma tumau i tautinoga uma. E le mafai ona tele ni mea e tusia i le tulaga o loo ou i ai. Ia faia uma mea e tusa ai ma le tulaga o loo e i ai ma le manaomia ai. Ia alofa le Atua e tuuina atu ia te oe le atamai ma le faautauta ma le toafilemu lea e i ai mafuaaga uma ou te talitonu ai o le a e maua.
“O na fanau iti o se mataupu o loo ou mafaufau loloto pea i ai. Tau atu ia i latou o loo ola pea Tama. Ia alofa le Atua e tuuina mai le avanoa ia toe vaai ai ia i latou. Aue Ema e, … aua nei e tuua au po o le mea moni, ae ia e manatua au; afai ou te le toe feiloai ia te oe i lenei olaga, ia alofa le Atua ia ta toe feiloai i le lagi. Ua le mafai ona faailoa atu ou lagona; ua tumu lou loto. Faatofa atu, Aue lau Ema agalelei e ma le faapelepeleina. O au lava mo oe e faavavau, o lou toalua ma lau uo moni.”12
Ia Ema Samita i le aso 21 o Mati, 1839, mai le falepuipui i Liperate, Misuri: “Lau pele Ema, ua ou iloaina lelei au galuega fita ma ua alofa atu ia te oe. Afai e toe faasaoina lo’u ola e le Atua ina ia maua le avanoa e tausi ai ia te oe, o le a ou faamamaina ou popolega ma taumafai e faamafanafana i lou loto. Ou te manao ia te oe ia e tausia i le mea e sili ona mafai ai le aiga. Ou te talitonu o le a e faia mea uma e te mafaia. Ua ou faanoanoa ina ua ou maua tala sa ma’i Frederick, ae ou te talitonu ua toe malosi o ia ma o loo e manuia foi. Ou te manao ia te oe e taumafai ia maua se taimi ma tusi mai ia te au se tusi umi ma tau mai ia te au mea uma ma po o ola pea Major matua ma po o a ni tala a tamaiti o fai ao taupe i lou ua. … Tau atu ia i latou o loo ou i le falepuipui ina ia faasaoina o latou ola. …
“O le Atua e pulea mea uma e tusa ma le fautuaga o lona lava finagalo. O lo’u faatuatuaga o loo ia te Ia. O le faaolataga o lou agaga o se mea sili ona taua ia te au aua o le tele lea o lou iloa ai ma le mautinoa o mea o le faavavau. E le afaina ia te au pe a tuua ai pea au e le Alii i le falepuipui. E tatau ona ou faatulaga lelei lo’u agaga, lea ou te manatu ia faia. Ou te manao ia te oe ia e faia foi lea mea. O lau pele e faavavau.”13
Ia Ema Samita i le aso 16 o Aokuso, 1842, latalata i Navu, Ilinoi; o le Perofeta o Iosefa o loo lafi mai ona fili: “Ua ou faia le saolotoga e ofoina atu ia te oe lau faafetai tele mo asiasiga e lua mananaia ma le faamalie loto sa e faia mo au i le taimi o le toetoe a faaaunuua au. E le mafai e upu ona faailoa atu le agaga faafetai o lou loto, mo le mafanafana ma le agaga moni faaleuo sa e faaalia i ia mea ia te au. Ua mou atu le taimi, talu ona e tuua au, i le malie atoatoa e tusa ai ma lenei mea, ma lou mafaufau ua atoatoa le faatulagaina i le mea o le a ou oo i ai, ia tuu ai pea ia po o le a lena mea. …
“Tau atu i tamaiti o loo lelei pea mea uma i lo latou tama; ma o loo tumau o ia i le tatalo faatauanau i le Atua Silisili ese mo le saogalemu mo ia, ma oe, ma i latou.Tau atu ia Tina Samita o le a lelei mea i lona atalii, po o i lenei olaga po o le oti; aua o loo faapea mai ai le Alii le Atua. Tau atu ia te ia o loo ou manatuaina pea o ia i taimi uma, e faapea foi Lucy [le tuafafine o Iosefa], ma i latou uma. E tatau ona latou maua le agaga fiafia. … O lau lava ma le mafanafana, o lou toalua faapelepeleina seia oo ina oti, e oo i le faavavau; ma le faavavau lava.”14
Fautuaga mo Suesuega ma le Aoaoina Atu
Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai itulau vii–xii.
-
Toe iloilo lelei lenei mataupu, ma iloa lagona o Iosefa Samita agai ia Ema ma le la fanau. O le a le mea o loo aoao mai e lenei faataitaiga ia i tatou e uiga i le auala tatou te talanoa ai ma amio ai i o tatou aiga? O a ni mea e mafai ona tatou aoao mai i taumafaiga a Iosefa ma Ema Samita e tusitusi atu le tasi i le isi, ma vaai le tasi i le isi? O a nisi o mea ua e faia e faaalia ai i lou aiga e te alofa ia i latou?
-
O le Perofeta o Iosefa sa tau atu ia Ema o ia o le “uo moni ma le faatuatuaina ia te [ia] ma le fanau e faavavau,” ma sa ia faafetai atu ia te ia mo lana “faauo mafanafana ma le agaga moni” (tagai itulau 252, 261). O le a se mea e faia e tane ma ava e faafaileleina ai a latou faigauo?
-
I ana tusi, o loo faaalia e Iosefa Samita lona faamoemoe ia Ema, i le faailoa o lona faatuatuaga o le a ia faia ni faaiuga lelei ma faia mea uma na te mafaia mo le vaaia o le aiga (itulau 261). E faapefea ona avea ia lagona o le faatuatuaina e aafia ai le va feagai ai o le tane ma le ava?
-
Faitau le savali a le Perofeta o Iosefa i lana fanau i le parakalafa lona lua i le itulau 261). E faapefea ona avea lea mea ma mea e fesoasoani ai i lana fanau i le maua ai o lea tala? I taimi o tofotofoga, o le a se mea e faia e matua e faaalia ai ia latou fanau e i ai lo laua faatuatua i le Atua?
-
Toe iloilo lagona faaalia o Iosefa Samita e uiga i le faalagolago i le Atua o loo maua i itulau e 259–62. Faailoa mai le tele o nei lagona faaalia e sili ona faamomoiloto ia te oe. E mafai faapefea ona e faaaogaina nei mea moni i lou olaga?
Mau E Faatatau I Ai: Kenese 2:24; 1 Korinito 11:11; Efeso 5:25; Mosaea 4:14–15; MFF 25:5, 9, 14; 68:25–28
O tiutetauave e tele o le Perofeta, faapea foi sauaga na feagai ma ia, e tele ina aveeseina ai o ia mai lona aiga. A o faafalepuipuiina o ia ma lona uso o Ailama i le Falepuipui i Liperate, sa o atu lona faletua, o Ema, ma lo la atalii o Iosefa e asiasi atu ia te ia.
O se vaega o le tusi a le Perofeta o Iosefa Samita sa tusia ia Ema Samita mai le Falepuipui o Liperate i le aso 21 o Mati, 1839.