O Le Alofa Moni, O Le Alofa Mama Lea O Keriso

“O le alofa o se tasi lea o uiga autu o le Atua, ma e tatau ona faaalia mai e i latou o e tausinio ina ia avea ma atalii o le Atua.”

Mai le Soifuaga o Iosefa Samita

I se faaaliga na tuuina mai e ala mai ia Iosefa Samita i le 1841, na faamautuina ai e le Alii le siteki i Navu, Ilinoi, o se “maa tulimanu o Siona, e faapupulaina i le faamamaina e uiga i le faafoliga mai o se maota” (MFF 124:2). I lalo o le taitaiga a le Perofeta, na avea ai Navu ma lotolotoi ola o fefaatauaiga, aoaoga, ma le faatufugaga. E toatele tagata na galulue i a latou faatoaga, a o i latou o e na i ai se eka fanua i le aai na totoina laau aina ma fualaau aina i togalaau i o latou aiga. O ili laau, fale fai piliki, ofisa lomitusi, vili falaoamata, fale fai uamea, ma fale falaoa na faatutuina i le aai, faapea foi ma fale mo kamuta, fai omea, fai apa, fai maa taua, fai uamea, fai meaafale. I Navu, na mafai ona faafiafiaina le Au Paia i le fale matamata, i siva, ma konaseti. E fiaselau tamaiti aoga na auai i aoga i totonu o le nuu, ma na faia fuafuaga mo se iunivesite.

A o televave pea le tupu a’e o Navu, o nisi o fale fai piliki na fausiaina se piliki mumu lea na maua ai se vaaiga ese i fale o Navu. O se tasi o nei fale o le Faleoloa Piliki Mumu o le Perofeta. Na fausiaina le faleoloa e avea ma ofisa mo le Perofeta ma le Au Peresitene Sili faapea foi ma se pisinisi e fesoasoani i le Perofeta e lagolagoina lona aiga. O se tulaga na tupu mai i le Faleoloa Piliki Mumu na faaalia ai le natura alofa o le Perofeta lea na matua alofagia ai o ia.

O James Leach o se tagata Egelani o le na o mai i Navu ma lona tuafafine na liliu mai ma lona toalua, o Agnes ma Henry Nightingale. Ina ua maea ona saili sana galuega ae lei faamanuiaina, na finafinau loa James ma Henry e talosagaina le Perofeta mo se fesoasoani. Na toe manatua e James:

“Na ma … maua atu [le Perofeta] i se tamai faleoloa o faatau atu ni oloa i se tamaitai. O le taimi muamua lea na ou maua ai le avanoa e latalata atu ai ia te ia ma vaai lelei ai ia te ia. Na ou lagonaina na i ai ia te ia se agaga maoae. Na ese lava o ia mai se isi lava tagata na ou feiloai i ai muamua; ma sa ou faapea ai i lo’u loto, o ia lava o se Perofeta a le Atua silisili ese.

“Talu ai e le o a’u o se tagata o le Ekalesia na ou manao ai ia Henry e talosaga atu i ai mo se galuega, ae na te le i faia, ma na tatau ai ia te au. Na ou faapea atu, ‘Lau Susuga Samita, pe a mafai faamolemole, o i ai ni au galuega e mafai ona ma faia, ina ia mafai ai ona maua ni mea e tausi [ai lo matou aiga]?’ Na vaai mai ia i maua ma foliga fiafia, faatasi ai ma se lagona o le agalelei, na faapea mai, ‘Ia, alii, o a mea e mafai ona oulua faia?’ Na ma tau atu ia te ia a ma galuega sa faia a o lei tuua lo matou nuu.

“Na ia faapea mai, ‘E mafai ona oulua eliina se alavai?’ Na ou tali atu o le a faia le mea e sili ona ma mafai. ‘Ua sao lena, alii,’ ma sa ia pikiina i luga se fua ma ia faapea mai, ‘Mulimuli mai ia te a’u.’

“Na ia taitai atu i maua i ni nai mita mai le faleoloa, tuu mai ia te au le mama o le fua e uu, ma toso atoa atu le fua mai le mama ma fua se laina e ma te galulue ai. Na ia faapea mai, ‘Ia, alii, e mafai ona oulua eliina se alavai e tolu futu le lautele ae lua ma le afa futu le loloto e mulimuli i le laina lea?’

“Na ma fai atu o le a ma faia le mea sili, ona tuua lea o ia o i maua. Na ma galulue, ma ina ua uma na ou alu ma tau atu ia te ia ua maea. Na oo mai o ia ma tagai i ai ma faapea mai, ‘Alii, e le sili atu pe a na ou faia e au lava ia. O mai tatou o.’

“Na ia taitai atu le ala i le faleoloa, ma fai mai ia i maua e piki le fasi puaa e sili ona lelei mo i maua. I lo’u matamuli, na ou fai atu ai e sili pe a tuu mai e ia se mea mo i maua. Na ia pikiina fasi puaa silisili ona lapopoa ma lelei se lua ma taga falaoamata mo i maua taitoatasi, ma sa fesili mai po ua lava lena. Na ma fai atu ma te naunau e faia nisi galuega mo ia mea, ae na ia fai mai, ‘Afai ua oulua malilie, alii, ua ou [malie foi].’

“Na ma matua faafetai atu ia te ia, ma sa ma o loa i le fale ma le olioli i le loto-agalelei o le Perofeta a lo tatou Atua.”

Na papatisoina James Leach i le tausaga lava lena ma faamaumauina faapea na ia “masani ona maua le avanoa e vaai ai i foliga tamalii [o le Perofeta] o susulu mai i le Agaga ma le mana o le Atua.”¹

Aoaoga a Iosefa Samita

O se tagata e faatumuina i le alofa o le Atua e naunau e faamanuia isi.

“O le alofa o se tasi lea o uiga autu o le Atua, ma e tatau ona faaalia e i latou o e tausinio e avea ma atalii o le Atua. O se tagata e faatumuina i le alofa o le Atua, e le faamalieina i faamanuiaga mo na o lona lava aiga, ae faasalafa atu i le lalolagi atoa, le naunautai e faamanuia le lalolagi atoa o tagata.”²

Na faamaumauina e Lucy Meserve Smith le tala lea: “Na faapea mai [Iosefa Samita], ‘Uso e ma tuafafine, ia alofa le tasi i le isi; alofa le tasi i le isi ma ia alofa mutimutivale i o outou fili.’ Na ia faia faalausosoo nei lava upu i se leo malosi ma se amene leotele.”³

Ia Iulai 1839, na saunoa le Perofeta i se vaega o taitai o le Ekalesia: “Ona ou lauga atu ai lea ia i latou ma tuuina atu ni faatonuga se tele … talanoaina ai le tele o mataupu taua ma le aoga ia i latou uma o e moomoo e savavali ma le lotomaualalo i luma o le Alii, ae maise lava le aoaoina o i latou ina ia faatinoina le alofa, poto ma le lagona-faauso, faatasi ai ma le alofa atu i le isi i mea uma, ma laasaga uma lava.”⁴

Ua ia i tatou se tiute faapitoa e alofa ma agalelei mo e o loo manaomiaina.

“O se tiute lea e tatau i tagata taitoatasi o le Au Paia ona tuuina atu saoloto i lona uso—ia alofa ia i latou i taimi uma, ma matua fesoasoani ia i latou. Ina ia taliaina i luma o le Atua e tatau ia i tatou ona alolofa le tasi i le isi: e tatau ona tatou manumalo i le leaga; e tatau ona tatou asiasi atu i e ua matua oti ma fafine ua oti a latou tane i o latou tiga, ma ia leoleo foi ia i tatou lava ina nei pisia mai i tatou i le lalolagi; aua o ia uiga lelei e tafe mai le vaipuna sili o talitonuga mama [tagai i le Iakopo 1:27].”⁵

“[O se tagata o le Ekalesia] e tatau ona fafagaina i latou e fia aai, faaofu e le lavalava, e tausia fafine ua oti a latou tane, e soloia loimata o e matua oti, e faamafanafana i e mafatia, pe o i totonu o lenei ekalesia, pe le auai foi i se lotu, po o fea lava na te maua ai i latou.”⁶

“E le mafai ona faaolaina le mauoa e aunoa ma le alofa moni, foai atu e fafaga ai e matitiva i le taimi ma le auala e finagalo ai le Atua.”⁷

“Manatunatu i tulaga o e tiga ma taumafai e faamāmā i o latou mafatiaga; avatu a outou meaai e fafaga ai e fia aai, ma o outou lavalava e faaofu ai e ua le lavalavā; ia avatu lo outou lima foai e soloia loimata o e ua matua oti, ma faafiafiaina fafine faanoanoa ua oti a latou tane; ia avea a outou tatalo, o lo outou oo atu i ai, ma le agalelei, e faamamaina ai le tiga o e faanoanoa, ma lo outou lima foai e fesoasoani i o latou tulaga manaomia; ia faia le lelei i tagata uma, aemaise lava i le aiga faatuatua, ina ia avea outou ma e ua le mata’uleagaina ma e ua sao le amio, o le fanau a le Atua e le ponā. Tausi ia poloaiga a le Atua—o mea uma na ia tuuina mai, o loo tuuina mai, pe o le a tuuina mai, ma se susulu o le mamalu o le a malamalama ai o outou ala; o le a tulai mai e matitiva ma faafetai ia te outou; o le a faaeaina ma faamamaluina outou e tagata lelei uma; ma o le a avea o outou ala ma ala o e amiotonu, e tupu pea lava pea lona malamalama e oo i le tutonu o le la [tagai i le Faataoto 4:18].”⁸

“O le Agaga Paia … o le a sasaa mai i luga o o outou ulu i taimi uma, pe a outou faataunuuina na mataupu faavae o le amiotonu, ia e finagalo i ai le mafaufau o le Atua, ma ua tonu ona alofa le tasi i le isi, ma ua faaeteete i auala uma ia manatua i latou o e o loo nofo pologa, ma lagona le faanoanoa, ma i ai i le loloto o faigata mo lo outou lelei. Ma afai o loo i ai nisi ia te outou o e tausinio mo lo latou lava viiga sili atu, ma saili a latou lava oa, a o loo i ai o latou uso i le mativa, ma feagai ma tofotofoga ma faaosoosoga tiga, e le mafai e i latou ona manuia e ala i le musumusuga a le Agaga Paia, lea e tuuina mai fautuaga mo i tatou i le ao ma le po i lo tatou oi e le mafai ona talatalaina [tagai i le Roma 8:26].

“E tatau ia i tatou i taimi uma ona matua faaeteete o lea ituaiga o manatu faasausili o le a le tatau lava ona i ai se nofoaga i totonu o o tatou loto; “ia feoai ma e ua faamaulalo”, faatasi ai ma le faapalepale uma ia fesoasoani i le vaivai o e ua le lavavā.”⁹

O le alofa e faapalepale, alofa mutimutivale, ma agalelei.

Na lipotia mai e Eliza R. Snow se lauga na tuuina mai e le Perofeta: “Na amata loa ona ia faitauina le mataupu 13 [o le 1 Korinito]—‘Afai ou te tautala i gagana a tagata atoa ma agelu, a e leai so’u alofa, ua avea a’u ma apa memea taalili, po o se sumepalo tagitagi;’ ma faapea mai, aua nei faaitiitia la outou vaai e tusa ai ma uiga lelei o outou tuaoi, ae ia outou nofouta i le faafia-amiotonu, ma ia faaitiitia le iloiloina o outou lava uiga lelei, ma aua le manatu ifo ua sili atu lo outou lava amiotonu nai lo isi; e tatau ona outou faateleina o outou agaga o le alofa ma le ava agai atu i isi, pe afai o le a outou faia faapei o Iesu, ma tauaveina o outou usoa-tagata i le fatafata o Aperaamo. Fai mai a ia na ia faaalia le faapalepale, taofiofi ma le onosai agai i le Ekalesia, faapea foi ma ona fili; ma e tatau ona tatou onosai i vaivaiga o le tasi i le isi, e pei ona onosaia e se matua agaalofa ia vaivaiga o lana fanau.

“… A o faateleina lo outou lotomama ma le amioatua, a o faateleina lo outou lelei, ia faateleina o outou loto, ia faateleina lo outou alolofa atu i isi; e ao ina outou lava faapalepale ma onosai i faaletonu ma sese o tagata. E taua tele agaga o tagata! …

“… Aua le tuinanau i laei faaalialia ma faiga faafoliga a e agasala, aua o loo i ai i latou i se tulaga leaga; ae i le tele tou te mafai, ia alofa mutimutivale ia i latou, aua i se taimi puupuu o le a faaumatia i latou e le Atua, pe afai o le a latou le salamo ma liliu atu ia te ia.”¹⁰

“O tagata popoto e tatau ona lava le malamalamaaga e faafetaiai ai tagata i le agalelei. ‘O le tali filemu e liliueseina ai le ita,’ ua fai mai ai le tagata poto [Faataoto 15:1]; ma o le a matua viia ai le Au Paia o Aso e Gata Ai e faaali atu le alofa o le Atua, e ala i le faia ma le agalelei i le taimi lava lenei i latou o e atonu na faia sese i se taimi o le le malamalama; aua e moni lava na fetalai mai Iesu, Tatalo mo ou fili [tagai i le Mataio 5:44].”¹¹

“Ou te le saga mafaufau pea i o outou sese, ma o le a outou le [saga mafaufau pea foi] i o’u leaga. O le alofa mama, o le alofa lea, e ufiufi ai agasala e tele [tagai i le 1 Peteru 4:8]; ma e tele ona ou ufiufiina sese uma i totonu ia te outou; ae o le mea sili ona matagofie o le matua leai lava o ni sese. E tatau ona tatou faatupuina se agaga agamalu, filemu ma toafimalie.”¹²

Na lipotia mai foi e Eliza R. Snow se isi lauga na tuuina mai e le Perofeta: “A faaali mai e tagata se agalelei ma le alofa itiiti ia te au, e maeu lava le mana e aumaia i lo’u mafaufau, ae o le auala faafeagai e faatupuina ai le oo mai o lagona leaga uma ma faapologaina ai le mafaufau faaletagata.

“O se faamaoniga e tasi e faapea o le le masani o tagata i aoaoga faavae o le amioatua o le vaaia lea o le faaitiitia o lagona alofa ma le leai o se alofa mama i le lalolagi. O le mana ma le mamalu o le amioatua ua faasalalau atu i se aoaoga faavae vaai-lautele ina ia faamafola atu le ofu talaloa o le alofa mama. E le silasila lava le Atua i le agasala ma faatagaina ai sina mea itiiti lava, ae a ua agasala le tagata, e tatau ona i ai se faatagaga e faia mo i latou. … O le latalata tatou te oo atu ai i lo tatou Tama faalelagi, o le faateleina foi lena o lo tatou naunau e vaai atu ma le alofa mutimutivale i agaga o le a fano; tatou te lagona tatou te mananao e tauaveina i latou i luga o o tatou tauau, ma lafoai a latou agasala i o tatou tua. …

“… Ua faafia ona taumafai alii ma tamaitai popoto e faatonuina Uso Iosefa e ala i lo latou faapea atu, ‘Oi, ana o a’u o Uso Iosefa, ua ou faia lenei ma lena,’ ae a na faapea ua latou tutu i le tulaga o Uso Iosefa semanu ua latou iloa ai e le mafai ona faamalosia alii ma tamaitai i le malo o le Atua, ae e tatau ona feagai ma i latou i le faapalepale, ma iu ai ina tatou faaolaina i latou. O le auala e tuu faatasia ai le Au Paia, ma faataavale pea i luma le galuega, o le faatalitali ma le faapalepale, seia aumaia e le Atua i latou o e agasala i le faamasinoga tonu. E le tatau ona i ai se faatagaga mo agasala, ae o le alofa mutimutivale e tatau ona o faatasi ma le aoaiga.”¹³

Tatou te faailoa atu le alofa mama e ala i faatinoga faigofie o le auauna atu ma le agalelei.

“O a’u o la outou auauna, ma ua na o le Agaga Paia e mafai ai ona ou faia mea lelei mo outou. … Matou te le faailoa atu i matou lava i o outou luma o nisi lava, ae o a outou auauna maualalo, o loo naunau e faaaoga [o matou ola] ma tigaina e auauna atu ai ia te outou.”¹⁴

Na manatuaina e Edwin Holden: “I le 1838, na taaalo ai Iosefa ma nisi o alii talavou i taaloga eseese i fafo, lea na i ai ma se taaloga e faia i le polo. Na le i umi ae amata ona latou vaivai. Na ia iloa atu, ma ina ua ia valaau atu e faapotopoto mai na ia faapea atu: ‘Tatou o e fau se fale laau.’ Ona latou o ai lea, o Iosefa ma alii talavou, e fausia se fale laau mo se tina ua oti lana tane. E faapea lava auala a Iosefa, e fesoasoani i taimi uma i soo se mea na te mafaia.”¹⁵

Na faapea mai Lusi Maki Samita, le tina o le Perofeta o Iosefa Samita, e uiga i se taimi ina ua faatoa amata ona faamautu le Au Paia i Commerce, Ilinoi, lea na mulimuli ane taua o Navu: “A o faagasolo pea le tau, o le au uso o e na faamautu iina na amata ona lagonaina aafiaga o o latou faigata, ia na faaopoopo i ai ma le le lelei o le tau, na faataotolia ai i latou i le pueia ma le fiva o le mumu, ma na oo ai lava i se tulaga faigata o le aafia o aiga atoatoa ia na leai ma se tagata e toatasi na mafai ona aumaia i se tasi se ipu vai malulu pe fesoasoani foi ia i latou lava. O le toatele lava o le aiga o Ailama na mamai. O la’u tama teine pito i laitiiti, o Lusi, na matua mai foi o ia, ma sa na o nai tagata toaitiiti lava o le nofoaga atoa na malolosi.

“Na aumaia e Iosefa ma Ema e na mamai i lo la fale ma tausia ai i latou iina. Ma na faaauau pea ona aumaia vave i latou i taimi lava e maua ai i le mai seia oo ina matua faatumulia lo laua fale, lea e na o le fa potu, lea na manaomia ai le faatuina o se faleie i le malae mo le vaega o le aiga o e na malolosi. Na tuuina atu atoa e Iosefa ma Ema lo la taimi ma o la mafaufau i le tausiaina o e na mamai i lenei taimi o mafatiaga.”¹⁶

Na manatuaina e Ioane L. Samita, le tausoga o le Perofeta, le mea lea na tupu i le taimi lava lea e tasi: Na asia i matou e le Perofeta o Iosefa ma lo’u tausoga o Ailama. Na matou mamai uma lava i le fiva ma le pueia vagana ai Tina, o Tama foi na faaletonu lona mafaufau i se vaega tele o le taimi. Na aveese e Iosefa seevae mai ona vae ina ua vaai mai i le tulaga faaletonu o i matou ma tuuina atu i vae o Tama, aua na leai ni ona seevae, ma na toe foi ai [i lana solofanua] e aunoa ma ni ona seevae. Na ia auina mai nisi e avatu Tama i lona fale ma laveaiina lona ola ma aauina mai mea matou te manaomia e faamafanafanaina ai i matou ma o lea na matou malolosi ai.”¹⁷

Na manatuaina e Elizabeth Ann Whitney: “I le amataga o le Tautotogo o le 1840 na matou o atu ai i luga i Commerce, [le igoa] lea na faaauau pea ona valaauina ai le vaega pito i luga o Navu. Na matou nofototogi i se fale o Hiram Kimball. … O iina na matou mamai uma ai lava i le pueia, maalili ma le fiva, ma na oo i se tulaga sa na o sina mafai laitiiti lava ona tolotolo solo e tau fesoasoani le tasi i le isi. I le taimi o nei tulaga matua faigata na fanau ai la’u tamaitiiti lona iva. O Iosefa, ina ua asiasi mai ia i matou ma vaai ai i o matou tulaga ua suia, na uunaia i matou i le taimi lava lena e o atu ma faaaoga lona fale. Na matou faalogoina le le toe umi ona matou tauaveina faigata o le tau, o le vai, ma le tuua na o i matou; o le mea lea na matou taliaina ai lana talosaga ma o atu ai ma nonofo i le fanua o le Perofeta o Iosefa i lona tamai fale; na vave ona matou malolosi, ma toe foi ai tamaiti i o latou uiga masani. Na faigaluega la’u tane i se faleoloa na fausia e Iosefa ma faatumuina i oloa na matua manaomia e tagata.

“I le tasi aso a o ou sau i fafo o le fale i le fanua na ou manatuaina se valoaga na tuuina mai e Iosefa Samita ia te a’u, a o nofo o ia i lo matou fale i Katelani, ma na emo mai i lo’u mafaufau e pei o se taia i le uila; o le mea lenei: faapea e pei lava ona matou faia mo ia, i le tatalaina o o matou faitotoa ia te ia ma lona aiga a o lei i ai sona fale; e faapea foi ona taliaina i matou e ia i le lumanai i lona fale.”¹⁸

Na lipotia mai e Mosiah L. Hancock le aafiaga lea na tupu i Navu a o talavou o ia: “I le taumafanafana lenei [1841] na ou uluai taalo ai lava i le taaloga o le polo faatasi ma le Perofeta. Na fesuisuiai i matou i le taina ma le tuliina o le polo, ma ina ua maea le taaloga na faapea mai le Perofeta, ‘Uso e, faamau a outou taavale solofanua,’ lea na matou faia, ona matou tietie uma atu ai lava lea agai i le togavao. Na ou aveina se taavale solofanua e tasi le solofanua ma ou tu i le laau faalava pito i luma, a o Uso Iosefa ma tama na tietie i faamau o le vaega pito i tua [o le laau faalava ma faamau o vaega ia o le fausaga o le taavale solofanua]. E 39 taavale solofanua i le vaega ma na matou aoina mai fafie seia tutumu a matou taavale. Ina ua tutumu a matou taavale solofanua, na ofo mai Uso Iosefa e tauva i le taaloga toso laau ma se isi o le na manao e tauva ma ia—ma na ia tosoina uma lava taitoatasi i luga i latou.

“Ina ua maea, na aauina atu e le Perofeta taavale solofanua i nofoaga eseese o tagata na manaomia le fesoasoani; ma ia tau atu ia i latou e tata fafie mo le Au Paia o e na manaomiaina. Na fiafia tagata uma e faia e pei ona saunoa mai ai le Perofeta, ma e ui lava ina matou faama’ima’i, ma na siomia lava i matou e le oti, na mata fiafia lava tagata ma taumafai e faafiafia uma tagata.”¹⁹

Ia Ianuari 5, 1842, na tusia e le Perofeta le vaega lea i se tusi ia Edward Hunter, o le na mulimuli ane auauna o se Epikopo Pulefaamalumalu: “O a tatou oloa eseese [i le Faleoloa Piliki Mumu] e lelei lava—e lelei tele, e tusa ai ma faatauga eseese ua faia e tagata eseese i taimi eseese, i lalo o tulaga ia na taitaia a latou filifiliga i a latou faatau i nisi itu; ae ou te olioli ua mafai ona lelei a tatou taumafaiga e pei ona i ai, aua o loto o le toatele o uso ma tuafafine o e matitiva o le a faafiafiaina i na fesoasoaniga tau oloa ia ua mafai ona latou latalata atu i ai.

“Ua matua tumu le faleoloa i le oloa ma ua sili atu, ma sa ou tu i tua o le fata faifaatau i le aso atoa, ma faia faatau o oloa i le vave e pei lava o se isi faatauoloa ua e vaai i ai, e fesoasoani ia i latou o e na faamalosia [e o latou tulaga matitiva] e leai ni a latou taumafataga masani o le Kerisimasi ma le Tausaga Fou, ona o le leai o sina suka laitiiti, molasi, vine, ma isi, ma isi, ma ina ia faafiafiaina ai foi au lava, aua ou te fiafia tele e fesoasoani atu i le Au Paia, ma avea o se auauna i tagata uma, ma le faamoemoe o le a faaeaina a’u i le aso tatau a le Alii.”²⁰

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai i itulau vii–xii.

A o e iloiloina tala i itulau 451–54 ma itulau 458–61, mafaufau loloto i ou lagona agai i le Perofeta o Iosefa Samita. O a mea ua aoaoina mai e nei tala e faatatau ia te ia? O a ni auala e te manatu ai e uunaiina ai e ana gaoioiga tagata na latalata atu ia te ia? O a ni auala ua aafia ai lou olaga e ala i le agalelei o isi?
Toe iloilo uluai parakalafa e tolu i le itulau 455. Aisea e te manatu ai o se tagata ua faatumulia i le alofa o le Atua e manao e faamanuia tagata ola uma? E faapefea e a tatou faatinoga o le alofa ma le agalelei ona fesoasoani e faamanuiaina tagata uma?
O a nisi o tiutetauave ua ia i tatou i le tausiaina o i latou o e manaomia le fesoasoani? (Mo ni faataitaiga, tagai i itulau 455–56. E faapefea e nei tiutetauave ona fesootai ma tulaga manaomia faaletino o tagata? E faapefea ona fesootai ma tulaga manaomia faaleagaga? O a ni faataitaiga ua e vaai i ai mai tagata o e tausia i latou o i ai tulaga manaomia?
Faitau le parakalafa o loo amata i le pito i lalo o le itulau 456. O a ni mea e mafai ona tatou faia e tupu ai lo tatou talisapaia o uiga lelei o isi? Aisea e te manatu ai e tatau ona tatou “faaeteete i le faafia-amiotonu, ma ia faaitiitia le faitaulia o o [tatou] lava uiga lelei”?
Na faailoa mai e le Perofeta o Iosefa Samita lagona popole e tusa ai ma “le faaitiitia o lagona alofa … i le lalolagi” (itulau 457. I le faafeagai, na ia faapea mai e tatau ia i tatou ona “faateleina o [tatou] agaga o le alofa ma le ava agai atu i isi” ma “ia faateleina o [tatou] loto, ia faateleina lo [tatou] alolofa atu i isi” (itulau 456–57). O le a sou manatu o le a le uiga o le faateleina o o outou loto ma agaga agai atu i isi?
Faitau le parakalafa atoa lona lima i le itulau 459. O a ni auala e mafai ona tatou faaaogaina ai nei aoaoga a o tatou fegalegaleai ma tagata o o tatou aiga?

Mau E Faatatau I Ai: 1 Korinito 13:1–13; Mosaea 4:14–16, 26–27; Eteru 12:33–34; Moronae 7:45–48; MFF 121:45–46

Red Brick Store — O le Faleoloa Faapiliki Mumu i Navu lea na toe fauina. O lenei fale sa avea ma ofisa mo le Perofeta o Iosefa Samita, ma sa avea o se pisinisi e fesoasoani ai ia te ia e lagolago lona aiga. E tele sauniga faaleEkalesia ma gaoioiga faafiafia na faia ai i le faleoloa.

men building — “Ona latou o ai lea, o Iosefa ma alii talavou, e fausia se fale laau mo se tina ua oti lana tane. E faapea lava auala a Iosefa, e fesoasoani i taimi uma i soo se mea na te mafaia.”

Emma caring for sick — I se taimi o le tele o le faama’i i Commerce, Ilinoi, sa aumaia ai e Iosefa ma Ema i latou sa mama’i i lo latou fale ma tausi ai i latou iina.