O Le Soifuaga ma Galuega a Iosefa Samita

“OIosefa Samita, le Perofeta ma le Tagatavaai a le Alii, e sili atu ana mea ua faia, vagana o Iesu lava, mo le faaolataga o tagata i lenei lalolagi, i lo soo se isi lava tagata ola na ola ai” (MFF 135:3). O lenei faasilasilaga ofoofogia o loo faamatala mai ai se tagata sa valaauina e le Atua i le 14 o ona tausaga ma soifua ai e oo atu i le na o le 38 o ona tausaga. Mai le taimi na soifua mai ai Iosefa Samita i Veremona ia Tesema 1805 ma lona maliu matautia i Ilinoi ia Iuni 1844, e tele mea ofoofogia na tutupu. O le Atua le Tama ma Lona Alo o Iesu Keriso na oo mai ia te ia, ma sili atu mea na aoao mai ia te ia nai lo mea na iloaina mo seneturi e tele. Sa faaeeina mai e perofeta ma aposetolo anamua mana paia o le perisitua i luga o Iosefa, ma avea ai o ia o se molimau fou faauuina a le Atua i lenei tisipenisione mulimuli. E le mafaatusalia le sasaaina mai o le malamalama ma mataupu faavae na faaalia mai e ala mai le Perofeta, e aofia ai le Tusi a Mamona, le Mataupu Faavae ma Feagaiga, ma le Penina Tau Tele. Na ala mai ia te ia, le toe faatulagaina o le Ekalesia moni a le Alii i luga o le fogaeleele.

I le aso, o le galuega sa amataina mai ia Iosefa Samita o loo agai pea i luma i le lalolagi atoa. E uiga i le Perofeta o Iosefa Samita, na molimau mai Peresitene Uilifoti Uitilafi: “O ia o se perofeta a le Atua, ma na ia faataatiaina le faavae o le galuega ma le augatupulaga silisili ona maoae ua faatuina i le lalolagi.”¹

Tupuaga ma Lona Tuputupu A’e

O Iosefa Samita o se Amerika tupulaga lona ono, o ona tuaa sa malaga mai Egelani i Amerika i le vaitaimi o le 1600. O tuaa o le Perofeta sa maua ai uiga sa masani ona iloa gofie ai uluai augatupulaga o tagata Amerika: sa latou talitonu i le tausiga tonu a le Atua i luga o i latou, sa ia i latou le agaga o le galue malosi, ma sa latou finafinau i le auauna atu i o latou aiga ma lo latou atunuu.

O matua o Iosefa Samita, o Iosefa Samita Matua ma Lusi Maki Samita, sa faaipoipo i le 1796 i Turnbridge, Veremona. O i laua o se ulugalii galulue malosi ma matata’u i le Atua, ma sa amatalia lo la’ua olaga faatasi i ni tulaga lelei tele tau tupe. Ae paga lea, na aveesea uma mai ia Iosefa Samita Matua, o fale ma fanua o lana faatoaga atoa, ma sa mafatia i le tele o tulaga faaletonu tautupe i tausaga na sosoo ai. Na faamalosia le aiga o Samita e fesiitai solo lo latou aiga i taimi eseese i le taumafai ai o lo latou tama e tausia lo latou aiga e ala i le galueaiina o mauga laiti o Egelani Fou, o le galulue i faatoaga a isi, faatu se pisinisi o oloa fefaataua’i, po o le faiaoga i aoga.

Na soifua mai Iosefa Samita Laitiiti i le aso 23 o Tesema, 1805 i Sarona, Veremona, o le lona lima o se fanau e toasefulutasi. Sa faaigoa i lona tama. O le faasologa o le fanau a le aiga o Samita e tusa ma o latou aso fanau: o se atalii e lei faaigoaina (e lei leva ona fanau mai ae maliu), Alevine, Ailama, Sofaronia, Iosefa, Samuelu, Efaraima (o le na lei atoa se lua vaiaso o ola), Viliamu, Katerina, Toni Kalosi, ma Lusi.²

O ni faailoga o uiga tulagaese o le Perofeta na vave alia’e mai i lona olaga faatamaitiiti. Na nonofo le aiga o Samita i Lepanona i Sisifo, New Hampshire, ae taia loa le toatele o tagata i le faamai matautia o le fiva taifoi, na aafia ai uma le fanau a Samita. A o faasolo manuia uma isi tamaiti e aunoa ma ni tulaga faigata, na tupu ae se ma’i ogaoga i le vae agavale o Iosefa, o le na o le fitu ona tausaga. Na malie Dr. Nathan Smith o le Dartmouth Medical School i le nuu tuaoi o Hanover, New Hampshire, e faatinoina se taotoga fou e taumafai e laveai le vae o le tama. Ao sauniuni Dr. Smith ma lana vaega e fai le taotoga, na talosaga atu Iosefa i lona tina e alu ese ma le potu ina ia le vaai ai o ia i lona tigaina. Na ia le manao i se pia e faaitiitia ai le tiga ae na o le faalagolago lava i le fusi faamafanafana atu o lona tama, ma na onosaia ai ma le lototele e Iosefa le taotoga a o tipiina e le fomai le ponaivi o lona vae. Na faamanuiaina le taotoga, e ui lava ina sa savali Iosefa i ni tootoo i ni nai tausaga na sosoo ai ma sipa laitiiti ai lana savali i lona olaga atoa.

I le 1816, ina ua tele taimi o faafeagai pea ma le faaletonu o faatoaga, na siitia e Iosefa Samita Matua lona aiga mai Norwich, Veremona, agai i Palamaira, Niu Ioka, ma le faamoemoe e maua ai ni tulaga faamanuiaina. “I le i ai i ni tulaga mativa,” na manatuaina e le Perofeta i tausaga mulimuli ane, “na i ai la [matou] matafaioi e galulue malosi mo le lagolagoina o se aiga toatele …, ma e talu ai lena tulaga, o lea na manaomia ai le matua galulue malosi o tagata uma ma sa mafai ai ona tuuina i ai se fesoasoani mo le lagolagoina o le aiga, o le mea lea na matou le maua ai le faamanuiaga i aoaoga. Ua lava lo’u faapea atu, na gata lava a’u i sina aoaoga o le faitau, tusitusi ma tulafono faavae o le numera.”³

O Le Uluai Faaaliga

Na tusia e Iosefa Samita e uiga i lona uluai aoaoina e faapea, “Na ou fanau mai … matua lelei o e na faia mea uma la te mafai e aoaoina au i le lotu Kerisiano.”⁴ Ae peitai, e pei lava o isi tagata Kerisiano, na matauina e matua o Iosefa o loo i ai mataupu faavae o le talalelei na aoaoina e Iesu ma Ana Aposetolo na le i ai i lotu i lena vaitaimi. I le eria o Palamaira i le 1820, na taumafai lotu kerisiano eseese e manumalo i le faaliliuina o tagata. Na auai atu le tina o Iosefa, o ona uso e toalua, ma lona tuafafine matua i le lotu Peresipeteriane, ae o Iosefa, faatasi ai ma lona tama ma lona uso o Alevine na le i auai i latou i ni lotu. E ui lava o Iosefa ua na o se tama, ae sa loloto lona popolega i lona lava tulaga i luma o le Atua faapea ma le tulaga fenumiai i le va o vaega lotu eseese.

A o ia suesue i tusitusiga paia, na uunaia Iosefa e 14 ona tausaga i se mau mai le tusi a Iakopo: “A e afai ua leai se poto i so outou, ina ole atu ia i le Atua, o le foai tele mai i tagata uma ma le le toe tautaua; ona foaiina mai ai lea ia te ia.” (Iakopo 1:5). Ina ua musuia o ia i lenei folafolaga mai le Alii, na alu atu ai Iosefa i le togavao latalata ane i lona aiga e tatalo ai i se aso tautotogo i le 1820. Na ia tootuli i lalo, ma tuuina atu manaoga o lona loto i le Atua. I le taimi lava lena na osofia ai o ia e le mana o le pogisa, lea na siomia atoa lava o ia ma lagona ai lona matau o le a faaumatiaina o ia. Ona i ai lea o se tali i lana tatalo faatauanau, na tatala mai ai le lagi ma sa laveaiina o ia mai lona fili le vaaia. I se malamalama faaniutu e sili atu le pupula nai lo le la, na ia vaaia ai ni Peresona se toalua, o tutu i ona luga ae i le ea. Sa fetalai mai le tasi, ma valaau le tama i lona igoa, ma faapea mai, “O Lo’u Atalii Pele lenei. Faalogo ia te Ia!” (Iosefa Samita 2:17).

I lenei faaaliga mamalu, na afifio mai ai lava le Atua le Tama ma Lona Alo, o Iesu Keriso, i le taulealea o Iosefa. Na talanoa Iosefa ma le Faaola, o le na ta’uina atu ia te ia e aua nei auai i se tasi o na lotu o ona aso, aua “ua sese uma lava i latou” ma “o mataupu uma a ia lotu o ni mea inosia ia i ona luma; … ua latou fai ma mataupu poloaiga a tagata, o e ua peiseai ua amioatua, a o le mana o i lea mea ua latou teena” (Iosefa Samita 2:19). Na folafola atu foi ia Iosefa “o le atoatoaga o le Talalelei o le a faailoa mai ia te [ia] i se taimi o le lumanai.“⁵ Ina ua mavae seneturi o le pogisa, na faaalia mai le afioga a le Atua ma le tulaga moni o le Atua le Tama ma Lona Alo, o Iesu Keriso, i le lalolagi e ala mai i lenei ipu talavou ma le mama.

O Asiasiga a Moronae

Na mavae tausaga e tolu, lea na inosia ma ulagia ai e isi o lona nuu le faasilasilaga a Iosefa Samita sa vaai o ia i le Atua. Na manatunatu le Perofeta talavou, lea ua 17 ona tausaga, po o a tulaga o le a oo i ai o ia i le lumanai. I le afiafi o le aso 21 o Setema, 1823, na tatalo faatauanau o ia mo se taitaiga ma le fia faamagaloina o ana “agasala [faatamaitiiti] ma ona tulaga le atoatoa.” (Talafaasolopito—Iosefa Samita 2:29). O le tali i lana tatalo, na faatumulia ai e le malamalama lona potumoe pito i luga, ma oo mai ai se avefeau faalelagi e igoa ia Moronae. Na ia tau mai o ia o se agelu a le Atua. “Na [ia] folafola mai o ia lava o se agelu a le Atua,” na manatua ai e Iosefa, “ua auina mai e aumai le tala fiafia o le feagaiga lea na faia e le Atua ma Isaraelu anamua ua latalata ona faataunuuina, o le galuega sauniuni mo le toe afio mai faalua o le Mesia o le a faavave ona amataina; ma o le taimi ua latalata mai mo le Talalelei i lona atoatoaga o le a talaiina i le mana, i atunuu uma ina ia saunia se nuu mo le nofoaiga faa-Meleniuma. Na tauina mai ia te au o au na filifilia e fai ma meafaigaluega i aao o le Atua e aumai nisi o Ana fuafuaga i lenei augatupulaga mamalu.”

Na tau atu foi e Moronae ia Iosefa o loo i ai se aotelega o tusitusiga anamua, na togitogia i papatusi auro e perofeta anamua, i se mauga itiiti latalata ane. O lenei faamaumauga ua faamatala mai ai se nuu na taitaiina mai e le Atua mai Ierusalema agai i le Itulagi i Sisifo i le 600 tausaga a o lei soifua mai Keriso. O Moronae o le perofeta mulimuli o lea nuu ma na ia tanumia le faamaumauga, lea na folafola mai e le Atua e aumaia i aso e gata ai. O Iosefa Samita o le a faaliliuina lea galuega paia i le gagana Peretania.

Mo le fa tausaga na sosoo ai, na manaomia le feiloai o Iosefa ma Moronae i le maupuepue i ia tausaga uma i le aso 22 o Setema ina ia maua ai le malamalama atili ma faatonuga. Na manaomia e ia ia tausaga o sauniuniga ma le faaleleia atili o ia lava aua le faaliliuina o le faamaumauga anamua. Na manaomia le saunia o ia mo le matafaioi o le aumaia o se galuega, o lona faamoemoega o le faatalitonuina lea o “tagata Iutaia ma Nuu ese, o Iesu o le Keriso lava ia, o le Atua Faavavau, o loo faaali mai o ia i atunuu uma lava” (itulau faaulutala o le Tusi a Mamona).

Faatuina o le Malo o le Atua i le Fogaeleele

Faaliliuga o le Tusi a Mamona

A o ia faatalitali mo le mauaina o papatusi auro, na fesoasoani Iosefa Samita e tausia lona aiga i mea sa manaomia faaletino. I le 1825, na alu ai o ia i Heremoni, Penisilevania, e galue mo Josiah Stowell. O iina na ia nofo ai i le aiga o Isaac ma Elisabeth Hale ma feiloai ai ma le la tama teine o Ema, se tamaitai faiaoga e umi o ia, ma uliuli lona lauulu. I le aso 18 o Ianuari, 1827, na faaipoipo ai Iosefa ma Ema i South Baindridge, Niu Ioka. E ui lava na tofotofoina lo la aiga i le oti o a la fanau, faigata tautupe, ma le toesea soo o Iosefa mai le fale ona o le faataunuuina o ona tiute, ae na matua loloto lava e le aunoa le alofa o Iosefa ma Ema o le tasi i le isi.

I le aso 22 o Setema, 1827, o le fa o tausaga talu ona vaai muamua o ia i papatusi, na tuuina atu ai loa ia Iosefa. Ae na i ai loa papatusi i lana vaavaaiga, na faalausosoo ona matuai taumafai tagata leaga e gaoia. Ina ia aloese mai nei sauaga, na toe foi atu ai Iosefa ma Ema i Heremoni, lea na nonofo ai i matua o Ema. Ina ua mautu iina, na amata loa e Iosefa ona faaliliuina papatusi.

I le amataga o le 1828, na maua ai e Matini Harisi, o se faifaatoaga faamanuiaina mai Palamaira, se molimau i le galuega o aso e gata ai a le Alii ma malaga ai i Heremoni e fesoasoani ia Iosefa i le faaliliuga. E oo atu ia Iuni o lena tausaga, ua tulai mai le galuega a Iosefa i le faaliliuga, ua 116 itulau o le tusi. Na aioi soo lava Matini i le Perofeta mo se faatagaga e ave ai ia itulau i lona aiga i Palamaira e faaali atu i ni tagata patino o lona aiga. Na talosaga atu le Perofeta i le Alii ma maua ai le tali e leai, ae na ia toe talosagaina faalua le Alii ma iu ai ina faataga Matini e ave ia tusitusiga. A o i ai ia tusitusiga i Palamaira, na leiloloa ai, ma le toe maua ai lava. Na aveesea e le Alii le Urima ma le Tumema, ma papatusi mai le Perofeta mo sina taimi, ae tuua ai o ia ua faamaualaloina ma ua salamo. I se faaaliga mai le Alii, na aoao mai ai e Iosefa le matua tatau ona sili atu lona mata’u i le Atua nai lo tagata (tagai MFF 3). Ina ua mavae lena taimi, e ui lava e na o le 22 ona tausaga, ae na avea lona olaga ma faataitaiga, i le tuuina atu atoa lea o ia lava, e mulimuli i poloaiga uma a le Alii.

O le aso 5 o Aperila, 1829, na taunuu ai Oliva Kaotui, o se faiaoga na o le tasi le tausaga e laitiiti ai ia Iosefa, i le fale o Iosefa i Heremoni. O le tali i ana tatalo, na maua ai e ia se molimau i le moni o le galuega a le Perofeta. I le lua aso mulimuli ane, na toe amata ai le galuega o le faaliliuga, e faalau Iosefa ae tusitusi Oliva.

Toefuataiga Mai o le Perisitua a le Atua

A o galulue Iosefa ma Oliva i le faaliliuga o le Tusi a Mamona, sa la faitau ai i le tala o le asiasiga a le Faaola i Sa Nifae anamua. O se taunuuga, na laua filifili ai e saili se taitaiga mai le Alii e uiga i le papatisoga. I le aso 15 o Me, na la o atu ai i luga o auvai o le Vaitafe Susquehanna, e latalata ane i le fale o Iosefa i Heremoni, e tatalo ai. Sa ofo tele i laua, aua na asiasi mai ia i laua se tagata faalelagi, ma faasilasila mai o ia o Ioane le Papatiso. Na ia faaee atu i o laua luga le Perisitua Arona ma faatonuina i laua e papatiso ma faauu e le tasi le isi. Mulimuli ane, e pei ona folafola mai e Ioane le Papatiso, na oo mai ai foi Aposetolo anamua o Peteru, Iakopo, ma Ioane ia Iosefa ma Oliva ma faaee atu i o laua luga le Perisitua Mekisateko ma faauuina i laua o ni Aposetolo.

A o le i oo mai ia asiasiga, na i ai ia Iosefa ma Oliva le malamalama ma le faatuatua. Ae ina ua maea asiasiga a avefeau faalelagi, na i ai foi ia i laua le pule—le pule ma le mana o le perisitua a le Atua lea e manaomia e faatuina ai Lana Ekalesia ma faatinoina ai sauniga o le faaolataga.

Lolomiga o le Tusi a Mamona ma le Faatulagaga o le Ekalesia

I le masina o Aperila ma Me o le 1829, sa matua faateleina ai le faalavelaveina o le galuega a le Perofeta mo le faaliliuga i lona fale i Heremoni, ona o sauaga. O le taunuuga, sa o atu ai Iosefa ma Oliva mo se taimi le tumau i Niu Ioka, e faamaea ai le faaliliuga i le fale o Pita Uitimera Matua. Sa maea le faaliliuga ia Iuni, ae lei atoa se tolu masina ina ua amata galue Oliva e fai ma failautusi a le Perofeta. E oo atu ia Aokuso, ua faia se konekarate a Iosefa ma le lomitusi o Egbert B. Grandin o Palamaira, e lolomi le tusi. Na mokesi e Matini Harisi lana faatoaga ina ia mautinoa ua totogi le lolomiga o le tusi, ma sa ia faatauina atu i se taimi mulimuli ane le 151 eka o lana faatoaga e totogi faauma ai le mokesi. Sa mafai ona faatau atu le Tusi a Mamona i tagata lautele i le faletusi o Grandin i le aso 26 Mati, 1830.

I le aso 6 o Aperila, 1830, i le na o le sefulutasi aso talu ona faasalalauina le Tusi a Mamona mo le faatauina atu, na i ai se faapotopotoga o tagata e tusa o le 60 na faapotopoto i le fale ogalaau o Pita Uitimera i Faiete, i Niu Ioka. O iina na faatulagaina aloaia ai e Iosefa Samita le Ekalesia, lea na mulimuli ane tuuina mai i se faaaliga, O Le Ekalesia a Iesu Keriso o Aso e Gata Ai (tagai MFF 115:4). O se aso na matua olioli ai, faatasi ai ma le maoae o le sasaa mai o le Agaga. Na faapaiaina ma tufatufa atu le faamanatuga, na papatisoina le au talitonu, na faaeeina atu le meaalofa o le Agaga Paia, ma na faauuina alii i le perisitua. I se faaaliga na maua ai i le taimi o le fonotaga, na tofia ai e le Alii ia Iosefa Samita o le taitai o le Ekalesia: “o se tagata vaai, o se faaliliu upu, o se perofeta, o se aposetolo a Iesu Keriso, o le toeaina o le ekalesia e tusa i le finagalo o le Atua le Tama, atoa ma le alofa tunoa o lo outou Alii o Iesu Keriso” (MFF 21:1). Ma ua toe faatuina ai Le Ekalesia a Iesu Keriso i luga o le fogaeleele.

Katelani, Ohio: Faalauteleina o le Ekalesia ma le Malo

A o faasoa atu ma le naunautai e tagata o le Ekalesia le upumoni ua latou maua, na vave lava ona tupu le Ekalesia fou. Na vave ona faatu ni paranesi i aai o Niu Ioka o Faiete, Maniseta, ma Colesville. Ia Setema 1830, e le’i leva ona masii mai Iosefa ma Ema Samita mai Heremoni, Penisilevania, i Faiete, ae faaali mai e le Alii i le Perofeta e tatau i faifeautalai ona o atu “i Sa Lamana” o loo nonofo i le tausiusiuga i sisifo o Misuri (MFF 28:8). Na ui atu le malaga a faifeautalai i le vaega o Katelani, Ohio lea na latou feiloai ai ma se vaega lotu o loo saili le upumoni ma faaliliuina ai se 130 o i latou, e aofia ai Sidney Rigdon, o le na mulimuli ane avea o se tasi o le Au Peresitene Sili. Na tupu le faapotopotoga o le Au Paia i Katelani seia oo atu i sina tai selau a o faasoa atu pea e tagata o le Ekalesia le talalelei i isi latou te feiloai i ai.

A o tupu pea le Ekalesia i Niu Ioka, na tupu ae foi ma le tetee i le Ekalesia. Ia Tesema 1830, na talia ai e le Perofeta le faaaliga na faatonuina ai tagata o le Ekalesia e “o atu i Ohio” (MFF 37:1), lea e sili atu i le 250 maila le mamao. I nai masina na sosoo ai, o se vaega toatele o le Au Paia i Niu Ioka na latou faatau atu a latou meatotino, o le tele lava i ni tau le talafeagai tele, ma faia ai taulaga manaomia ina ia faapotopoto atu ai i Katelani, Ohio. O Iosefa ma Ema Samita na i ai i le vaega muamua na amata malaga mo Ohio, ma taunuu ai i Katelani po o le aso 1 o Fepuari, 1831.

Lua Nofoaga e Faapotopoto ai le Au Paia

Ia Iuni o le 1831, a o tupu malosi le Ekalesia i Katelani, na faatonuina e le Alii le Perofeta ma isi taitai o le Ekalesia e malaga i Misuri. O iina na Ia faaalia ai ia i latou “le laueleele o lo outou tofi” (tagai MFF 52:3–5, 42–43). I le taimi o Iuni ma Iulai 1831, na malaga ai le Perofeta ma isi i le tusa ma le 900 maila mai Katelani i Jackson County, Misuri, i se tausiusiuga i sisifo o le nofoaga o tagata Amerika. Na lei umi lava talu ona ia taunuu, ae talia e le Perofeta se faaaliga mai le Alii na faapea mai ai “o le laueleele lava o Misuri, o le laueleele lea ua ou filifilia ma faapaiaina mo le au paia e faapotopoto i ai. O le mea lea, o le laueleele lenei o le folafolaga, o le tulaga foi mo le aai o Siona. … o le aai ua taua nei o Independence o le laumua lea; o le tulaga mo le malumalu sa o loo i le itu i sisifo” (MFF 57:1–3).

I le faataunuuina o folafolaga na faia e perofeta anamua o le Tusi Paia, na amata ona faataatia e Iosefa Samita e 25 ona tausaga le faavae o le aai o Siona i Amerika. Ia Aokuso 1831, na ia pulefaamalumalu ai i le faapaiaina o le fanua o se nofoaga e faapotopoto ai ma faapaiaina o se tulaga mo le malumalu. I se taimi itiiti lava mulimuli ane, na toe foi atu ai le Perofeta i Ohio, lea na ia faamalosiau ai i nisi o tagata faatuatua e faapotopoto atu i Misuri. E tele ni selau o le Au Paia na latou manumalo i le faigata o ituaiga ala o faigamalaga o le seneturi e 19 i le malaga atu i le tausiusiuga o Amerika ma taunuu atu ai i o latou nofoaga fou i Misuri.

Mai le 1831 i le 1838, na nonofo uma ai tagata o le Ekalesia i Ohio ma Misuri. Na nonofo le Perofeta, uso o le Korama o le Toasefululua, ma le toatele o tagata o le Ekalesia i Katelani, a o faapotopoto atu isi tagata o le Ekalesia i Misuri ma taitaia i latou e o latou taitai perisitua iina, i lalo o le taitaiga a le Perofeta. Na fesootai taitai o le Ekalesia e ala i tusi ma malaga masani i le va o Katelani ma Misuri.

Faaaliga Faaauau Pea

A o nofo o ia i le eria o Katelani, na talia ai e le Perofeta le tele o faaaliga mai le Alii e faatatau i le toefuataiga o le talalelei i aso e gata ai. Ia Novema 1831, na tonu ai i taitai o le Ekalesia e lolomi le tele o faaaliga, i se tuufaatasiga ia taua o le Tusi o Tulafono. Na tuu e lolomi lena tusi i Independence, Misuri. Ae ia Iulai 1833, na faatamaiaina ai e tagata leaga le lomitusi ma le tele o pepa ua maea ona lolomiina. Vagana ai ni nai kopi laiti ia na laveaiina, e le i maua lava e tagata o le Ekalesia le Tusi o Tulafono. I le 1835 o faaaliga na faamoemoe mo le Tusi o Tulafono, faatasi ai ma le tele o isi faaaliga, na lomia i Katelani o le Mataupu Faavae ma Feagaiga.

A o nofo i le eria o Katelani, na faapena foi ona faaauau pea e le Perofeta lana galuega i le Faaliliuga a Iosefa Samita o le Tusi Paia, o se galuega na ia amataina i le 1830 e pei ona poloaiina ai e le Alii. E tele mea faigofie ma taua na leiloloa mai le Tusi Paia i seneturi e tele, ma na taitaia le Perofeta e le Agaga ina ia faia faasaoga i le King James Version o le Tusi Paia ma toefuatai mai faamatalaga na leiloloa. O lenei galuega na mafua ai le toefuataiina o upumoni taua o le talalelei, e aofia ai le tele o faaaliga ua i ai nei i le Mataupu Faavae ma Feagaiga. E ui lava na faamoemoe le Perofeta e lolomi lana toe iloiloga o le Tusi Paia, ae peitai o mataupu faigata, e aofia ai sauaga, na taofia ai lona lomiaina i le vaitaimi o lona soifua, le atoatoaga [o le faaliliuga].

O se vaega o lana toe iloiloga musuia o le Tusi Paia, na mauaina ai e Iosefa Samita le faaaliga lea ua avea nei o le tusi a Mose ma se faaliliuga musuia o le Mataio 24, lea ua taua nei o le Iosefa Samita—Mataio. I le 1835, na amata ai e le Perofeta ona faaliliuina le tusi a Aperaamo mai ni pa’ulaau faaAikupito anamua na faatauina mai e le Ekalesia. O nei faaliliuga uma na mulimuli ane avea o se vaega o le Penina Tau Tele.

I faaaliga uma na talia e le Perofeta i Katelani na i ai faaaliga ia na faataatia faalauaitele mai ai le puleaina o le Ekalesia. I lalo o le taitaiga a le Alii, na faatulagaina ai e Iosefa Samita le Au Peresitene Sili i le 1832.⁷ Na ia faatulagaina le Korama a Aposetolo e Toasefululua ma se Korama a Fitugafulu i le 1835. Sa faatulagaina se siteki i Katelani i le 1834. I le vaitaimi lea, na ia faatulagaina ai foi korama a le Perisitua Arona ma le Perisitua Mekisateko ina ia auauna atu ai i tulaga na manaomia e tagata o le Ekalesia.

O Le Uluai Malumalu I Lenei Augatupulaga

O se tasi o vaega sili ona taua o le Toefuataiga, na faaalia ai e le Alii ia Iosefa Samita le manaomia o malumalu paia. Ia Tesema 1832, na poloaiina ai e le Alii le Au Paia e amata ona fausia se malumalu i Katelani, Ohio. E ui lava e tele tagata o le Ekalesia na le lelei ni fale, galuega, ma meaai, ae na latou tali atu ma le naunautai i le poloaiga a le Alii, faatasi ai ma lo latou Perofeta sa latou galulue faatasi lava.

I le aso 27 o Mati, 1836, na faapaiaina ai e Iosefa Samita le malumalu i le ogatotonu o le sasaa mai faapenetekoso o le Agaga. I le vaiaso mulimuli ane, i le aso 3 o Aperila, 1836, na tutupu ai nisi o mea silisili ona taua i tala faasolopito faalelotu. Na afio mai le Alii o Iesu Keriso ia Iosefa Samita ma Oliva Kaotui i le malumalu, ma folafola mai, “ua ou talia lenei fale, o lo’u igoa foi o le a iinei; ma o le a ou faaali a’u lava i lo’u nuu i le alofa mutimutivale i lenei fale” (MFF 110:7). E toatolu ni avefeau mai le tisipenisione o le Feagaiga Tuai—Mose, Elaia, ma Elia—na faapena foi ona oo mai. Sa latou toefuatai maia ki o le perisitua ma le pule ua leva ona le toe i ai i le lalolagi. Ua i ai nei i le Perofeta o Iosefa Samita le pule e faapotopoto ai Isaraelu mai itu e fa o le lalolagi ma faamauina aiga, faatasi mo le taimi nei ma le faavavau atoa. (Tagai MFF 110:11–16.) O lenei toefuataiga o ki o le perisitua na mulimuli i le mamanu a le Alii o le tuuina atu i le Perofeta “mai fuaiupu, ma fuaiupu, o le mataupu ma le mataupu; o sina mea itiiti iinei, ma sina mea itiiti iina” (MFF 128:21) seia toefuataiina le atoatoaga o le talalelei a Iesu Keriso i le lalolagi.

Talaiina o le Talalelei Faavavau

I le galuega atoa a le Perofeta, na taitaiina o ia e le Alii e auina atu faifeautalai e “talai atu le talalelei i tagata uma” (MFF 68:8). Na lagona lava e le Perofeta ia le mamafa o lenei faatonuga ma tuua ai lona fale ma lona aiga i le tele o taimi e talai atu le talalelei. I tausaga amata o le Ekalesia, na valaauina ai faifeautalai e talai i vaega eseese o le Iunaite Setete ma Kanata.

Ona oo lea i le taumafanafana o le 1837, na musuia ai le Perofeta e auina atu ni toeaina i Egelani. Na faatonuina e le Perofeta ia Heber C. Kimball, o se tasi o le Korama o le Toasefululua, e taitaia se vaega toaitiiti o faifeautalai i lenei galuega tele. I le tuua ai o lona aiga na toetoe a leai ni meaai, lavalava, ma mea manaomia, na malaga ese atu ai Elder Kimball ma le faatuatua o le a taitaiina o ia e le Alii. I le tausaga e tasi, e tusa e 2,000 tagata na auai mai i le Ekalesia i Egelani. Na mulimuli ane auina atu e Iosefa Samita sui o le Toasefululua i Peretania Tele e auauna ai mai le 1839 i le 1841, ma na matua faamanuiaina ai foi lenei misiona. E oo atu i le 1841, ua sili atu i le 6,000 tagata ua talisapaia le talalelei. O le tele o nei tagata na malaga atu i Amerika, ma toe faaolaina ma faamalosiaina ai le Ekalesia i taimi sili ona faigata.

O Le Tuua o Katelani

Na mafatia le Au Paia i Katelani i sauaga toetoe lava amata mai le taimi na latou taunuu ai iina, ae na faateteleina le itu tetee i le 1837 ma le 1838. “E faatatau i le malo o le Atua,” na saunoa mai ai le Perofeta, “o taimi uma lava e faatu ai foi e le tiapolo lona malo i le taimi lava e tasi e tetee ai i le Atua.”⁸ Na oo mai i le Perofeta le loloto o sauaga, e le gata mai fili i fafo o le Ekalesia aemaise mai le au liliuese o e na faatuiese ia te ia. Na tuuaia ma le le tonu o ia i le tele o soligatulafono, na lamatia o ia i le fale faamasino i le tele o faamasinoga faalesolitulafono ma le faalauaitele, ma faamalosia ai o ia e lafi mai e na saili e faaumatia lona soifua. Ae na tu o ia ma le faamaoni ma le lototele i le ogatotonu o faafitauli ma faatuiesega ia na toetoe ina a tupu i taimi uma.

Mulimuli ane, na matua oo ina le mafai ona tatali sauaga i le eria o Katelani. Ia Ianuari 1838, na faamalosia le Perofeta ma lona aiga e tuua Katelani ma sulufai atu i Sisifo Mamao, i Misuri. E oo atu i le faaiuga o le tausaga, o le toatele o le Au Paia i Katelani na mulimuli atu ia te ia, ae tuua ai o latou fale ma lo latou malumalu peleina.

O Le Au Paia i Misuri

O Le Tulieseina mai Jackson County ma le Savali o le Tolauapiga a Siona

A o tauivi le Au Paia i Katelani e faamalosi le Ekalesia i lo latou eria, e toatele foi isi tagata o le Ekalesia sa faia le mea lava lena e tasi i Jackson County, Misuri. Na amata ona faamautuina le Au Paia o Aso e Gata Ai i le nuu lea i le taumafanafana o le 1831. I le lua tausaga mulimuli ane, na tusa pe 1,200 le numera o le Au Paia, po o le tasi vaetolu o le faitau aofai o tagata iina.

O le taunuu o le toatele o le Au Paia na le malilie ai e ua leva ona nonofo i le eria. Na matauina e tagata Misuri le aveesea mai ia i latou o pulega faaupufai o malo ae tuuina atu i e fou mai, o le toatele lava e o mai i le itu i matu o le Iunaite Setete ma e na latou le lagolagoina faiga faanofopologa a le itu i saute. Na masalosalo foi tagata Misuri i le uiga ese o mataupu faavae a le Au Paia o Aso e Gata Ai—e pei o le talitonuga i le Tusi a Mamona, faaaliga fou, ma le faapotopotoina o Siona—ma latou le fiafia i le Au Paia o Aso e Gata Ai i lo latou fefaatauai na o i latou lava. Na vave ona faalavelave tagata leaga ma le vaegaau a le nuu i le Au Paia ma, ia Novema 1833, na latou tulieseina ai i latou mai Jackson County. O le toatele o le Au Paia na sosola i matu e ui atu i le Vaitafe o Misuri ma agai atu ai i Clay County, Misuri.

Na loloto le popolega o Iosefa Samita e uiga i faafitauli o le Au Paia i Misuri. Ia Aokuso 1833 na ia tusi atu ai mai Katelani i taitai o le Ekalesia i Misuri: “Uso e, ana o a’u o outou semanu ua i ai sa’u vaega atoa i lo outou mafatiaga, ma e ui lava ina o le natura faaletagata le aloese mai mafatiaga ma le oti, ae e le mafai e lo’u agaga ona tuulafoai outou ia oti. O loo fesoasoani mai le Atua ia te a’u. O lea, ina fiafia ia, aua ua latalata mai lo tatou faaolataga. Le Atua e, ia laveai o’u uso i Siona.”⁹

Ia Fepuari 1834, na talia ai e Iosefa Samita se faaaliga na faatonuina ai o ia e taitaiina se malaga mai Katelani i Misuri e fesoasoani i le Au Paia puapuagatia ma fesoasoani e toe tuuina atu ia i latou o latou lava fanua i Jackson County (tagai MFF 103). Ina ia tali atu ai i le poloaiga a le Alii, na faatulagaina ai e le Perofeta se vaega e taua o le Tolauapiga a Siona mo le savaliga agai i Misuri. Ia Me ma Iuni o le 1834, na malaga atu ai lea vaega, lea na iu lava ina aofia ai le sili atu nai lo le 200 tagata, agai atu i sisifo e ui atu i Ohio, Indiana, Ilinoi, ma Misuri. Na latou fetaiai ma le tele o faafitauli, e aafia ai le pesia i le faamai o le palagaau. I le aso 22 o Iuni, 1834, ina ua latalata le savaliga i Jackson County, na taliaina ai e le Perofeta se faaaliga e faamuta ai le tolauapiga. Ae peitai, na folafola mai e le Alii o le a faaolaina Siona i Lona lava taimi talafeagai. (Tagai MFF 105:9–14.) Ina ua maea ona faatulagaina se siteki i Clay County ma Tavita Uitimera o le peresitene, na toe foi atu ai le Perofeta i Ohio.

E ui lava e lei toe mauaina e le Tolauapiga a Siona meatotino a le Au Paia, ae na saunia ai se aoaoga sili ona taua mo taitai mo le lumanai o le Ekalesia, aua na aoaoina e i latou na auai ni mataupu faavae o le taitaiga amiotonu mai faataitaiga ma aoaoga a le Perofeta. I se fonotaga a sui o le Tolauapiga a Siona ma isi tagata o le Ekalesia na faia i Katelani i le aso 14 o Fepuari, 1835, na faatulagaina ai e le Perofeta le Korama a Aposetolo e Toasefululua. I le lua vaiaso mulimuli ane, na ia faatulagaina ai se Korama a Fitugafulu. O le toaiva o sui o le Korama a le Toasefululua ma sui uma lava o le Korama a Fitugafulu na auai i latou o se vaega o le Tolauapiga a Siona.

Nofoaga i Misuri i Matu

Sa toatele tagata o le Ekalesia sa nonofo ai pea lava i Clay County, Misuri, seia oo i le 1836, ina ua fai ane tagata o lena nuu ua le toe mafai ona latou tuuina atu se nofoaga o le sulufaiga. O le mea lea na amata ai ona malaga atu le Au Paia i Misuri i matu, ma nonofo ai le toatele o i latou i Caldwell County, o se itumalo fou na faatulagaina e le fono faitulafono a le setete, e nonofo ai le Au Paia o Aso e Gata Ai o e na tutuli ese mai. I le 1838 na faatasi atu ai se vaega toatele o le Au Paia o e na tutulieseina mai Katelani. Na taunuu le Perofeta ma lona aiga ia Mati o le tausaga lava lena i Sisifo Mamao, i le nofoaga o le Au Paia o Aso e Gata Ai lea ua tupu ma ola i Caldwell County, ma faatuina ai le ofisa tutotonu o le Ekalesia iina. Ia Aperila na faatonuina ai e le Alii ia Iosefa Samita e fausia se malumalu i Sisifo Mamao (tagai MFF 115:7–16).

Ae peitai, na puupuu se taimi o le filemu mo le Au Paia i Misuri i matu. I le tautoulu o le 1838, na toe faalavelavea ai foi ma osofaia e tagata leaga ma le vaegaau le Au Paia o Aso e Gata Ai. Ina ua tali atu tagata o le Ekalesia ma puipuia i latou lava, na molia Iosefa Samita ma isi taitai o le Ekalesia i ni moliaga o le taufaalata. Ia Novema na faafalepuipuia i latou i Independence ona sosoo ai lea ma Richmond, Misuri; ma i le aso 1 o Tesema, na aveina atu i latou i le falepuipui i Liperate, Misuri. I le taumalulu lena, na mafatia tele le Perofeta ma ana soa ona o faiga saua tele. Na taofia i latou i le potu pogisa o le falepuipui—o se sela e pogisa, malulu, ma palapala leaga—ma tuuina atu i ai ni meaai e matuai leaga lava, ma sa le mafai ona latou aai ai seia oo ina toe taitai atu i latou i ai ona o le fiaai. Na faamatalaina e le Perofeta le tulaga o ia ma le Au Paia e faapei “o se tofotofoga o lo latou faatuatua e tutusa lelei ma le tofotofoga o Aperaamo.”¹⁰

A o falepuipui le Perofeta, o le afe ma afe o le Au Paia, e aofia ai ma le aiga o le Perofeta lava ia, na tulieseina faamalosi mai o latou aiga i Misuri i le taimi tonu o le taumalulu ma le tautotogo o le 1838–39. I le aso 7 o Mati, 1839, na tusi atu ai Ema ia Iosefa mai Quincy, Ilinoi: “E leai se tasi ua na o le Atua ua silafia manatunatuga o lo’u mafaufau ma lagona o lo’u loto ina ua ou tuua lo tatou fale ma lo tatou aiga ma toeitiiti lava o a tatou meatotino sei vagana ai a taua fanau laiti, ma alu ai la’u malaga agai ese atu ma le setete o Misuri, ae tuua ai oe e lokaina i lena falepuipui taaligoligoa.”¹¹ I lalo o le taitaiga a Polika Iaga ma isi taitai o le Ekalesia, na taitaia le Au Paia agai i sasae e sulufai atu i Ilinoi.

O Tausaga i Navu

Taitai e Pele i Ona Tagata

Ia Aperila 1839, na siitia atu le Perofeta ma ona soa ona o le suia o se nofoaga o le faamasinoga ma le Falepuipui o Liperate i Gallatin, Misuri. A o toe siitia atu foi pagota, mai Gallatin agai atu i Columbia, Misuri, na faatagaina ai e leoleo i latou e sosola ese mai ona o le le tonu o lo latou faafalepuipuiina. Na malaga atu ai loa i latou agai i Quincy, Ilinoi, lea na faapotopoto i ai le vaega tele o le Ekalesia talu ona sosola ese mai Misuri. I lalo o le taitaiga a le Perofeta, na vave ona amata faamautu le Au Paia i le 50 maila i matu i Commerce, Ilinoi, o se nuu e tu i le tulilima o le Vaitafe o Mississippi. Na toe faaigoaina e Iosefa le aai o Navu, ma i tausaga na sosoo ai na lolofi ane ai tagata o le Ekalesia ma tagata fou liliu mai i Navu mai le Iunaite Setete, Kanata, ma Peretania Tele, ma avea ai lena nofoaga o se tasi o nofoaga sili ona ainā o Ilinoi.

Na faamautu Iosefa ma Ema e latalata i le vaitafe i se fale laau laitiiti, lea na avea o se ofisa o le perofeta i uluai aso o Navu. Na ia faia faatoaga e tausi ai lona aiga ma mulimuli ane faia e ia se faleoloa. Ae peitai, talu ai ona o ona tiute faale-Ekalesia ma le faalenuu na matua manaomia tele ai lona taimi, o lea na faigata ai i le Perofeta ona tausia lona aiga i mea faaletino sa latou manaomia. Ia Oketopa 1841 na lisiina ana lava meatotino “O Sale toeaina (o se solofanua) na tuuina atu ia te ia i Katelani, lua tia fagafao, lua pipi lapopoa ma pipi laiti e fa, o le povi toeaina na tuuina atu ia te ia e se uso i Misuri, o lana Major toeaina (o se taifau), … faatasi ai ma ni nai meaafale laiti.”¹²

I le taufaaiuiuga o Aokuso 1843 na masii atu ai le Perofeta ma lona aiga i le isi itu auala i se fale fogafalelua fou lava faatoa maea ona fausiaina na taua o le Mansion House. O le taimi lea ua i ai ia Iosefa ma Ema le fanau e toafa na ola mai: Na la tanuina ni fanau faapelepele e toaono i le gasologa o tausaga, ma le isi tamaitiiti e toatasi o le a fanau mai pe a mavae le maliu o Iosefa. O fanau e sefulutasi i le aiga o Iosefa ma Ema o: Alevine, na fanau i le 1828, e le’i leva ona fanau mai ae maliu; o le masaga o Thadeus ma Luisa, na fananau mai i le 1831, na maliliu ae le’i leva ona fananau mai; o le masaga vaetama o Iosefa ma Iulia, na fanauina e John ma Julia Murdock i le 1831 ona aveina lea e Iosefa ma Ema ina ua maliu Iulia i le taimi na fanauina ai [le masaga] (sa maliu Iosefa i le 11 o ona masina i le 1832)¹³; o Iosefa III, na fanau mai i le 1832; Feterika, na fanau mai i le 1836; Alesana, na fanau mai i le 1838; o Toni Kalosi, na fanau mai i le 1840, o le na maliu i le matua e 14 masina; o se atalii na fanau mai i le 1842, ma maliu ai lava i le aso na fanau mai ai; ma Tavita, na fanau mai i le 1844, ina ua toeitiiti atoa le lima masina talu ona maliu faamaturo lona tama.

I lona soifua galue atoa, na matua fiafia tele le Perofeta e faatasi ma le Au Paia. Na ia saunoa e uiga i le aai ma ona tagata, “O le nofoaga sili lenei ona matagofie ma tagata sili ona lelei i lalo o le lagi.”¹⁴ Sa faapena foi ona alofaina o ia e le Au Paia ma lagona e i latou o ia o la latou uo, ma masani ai ona valaauina o ia o “Uso Iosefa.” Na faapea mai se tasi o tagata liliu mai, “Na i ai ia te ia se malosiaga faapitoa e pei o se maneta lea na mafai ona tosoina atu ai ia te ia tagata uma o e na masani ma ia.”¹⁵ “E le faafoliga mai o ia e pei o se tagata e leai ni ona vaivaiga ma ni ona sese,” o le tusitusiga lea a se tagata Navu. “O ia o se tagata e faigata ona e le fiafia i ai; … e le faafefeteina foi o ia i lona tulaga maoae e pei ona manatu ai le toatele, i le faafeagai e faamasani ma faauo o ia i soo se tagata amiolelei lava.”¹⁶ O William Clayton, o se tagata Egelani liliu mai, na tusi atu i lona aiga mai Navu e uiga i le Perofeta, faapea, “E moni lava ta te moomoo maimau pe ana pei ita o lea ituaiga o tagata.”¹⁷

Na tuuina atu e le Perofeta ni lauga e tele i Navu, ma sa matua fiafia tagata o le Ekalesia e faalogologo ia te ia, aua na ia aoao atu ma le mana ia upumoni faaalia o le talalelei. Na manatua e Angus M. Cannon faapea: “E leai lava se taimi ua ou faalogo ai ia te ia o tautala e lei lagona ai i lo’u tagata atoa se lagona faagaeetia ma vivii atu ai lo’u agaga atoa i le Alii.”¹⁸ Na folafola mai e Polika Iaga faapea: “Ou te le i faamaimauina lava se avanoa ou te faamasani ai i le Perofeta o Iosefa ma ou faalogologo ia te ia o lauga faalauaitele po o i le lotoifale, ina ia ou asu mai ai le malamalama i le vaipuna lea na ia lauga mai ai, ina ia mafai ona ou umiaina ma auina atu pe a manaomia. … O taimi faapenei sa sili atu ona taua ia te a’u nai lo le oa uma o le lalolagi.”)¹⁹

Na oo atu le taitaiga a Iosefa Samita i tua atu o ona tiutetauave faalelotu. I Navu na aofia le Perofeta i auaunaga faalenuu, tulafono, pisinisi, aoga, ma le faamiliteli. Na manao o ia e ofoina atu e le aai o Navu i ona tagata ia tulaga lelei ma avanoa uma faaleaganuu ma le faalenuu. Ia Ianuari 1844, na faasilasila mai ai e Iosefa Samita lona avea ma sui tauva mo le tulaga peresitene o le Iunaite Setete o Amerika, o se mafuaaga tele lava ona o lona le fiafia i le tulaga faaletonu o le taulimaina e taitai o le malo o le toefuataiina mai o aia tatau ma meatotino na aveesea mai le Au Paia i Misuri. E ui lava na iloa e le toatele o tagata e laitiiti se avanoa e filifilia ai o ia, ae na avea lona avea ma sui tauva na iloa ai e tagata lautele le salalau o le solitulafono e faasaga i aia tatau maumaututu a le Au Paia i lalo o le tulafono faavae. Na folafola mai ai e le Perofeta i se tasi taimi faapea, O tagata uma lava “e i ai aia tatau tutusa e tofotofo ai i le fua o le laau maoae o lo tatou saolotoga faaleatunuu.”²⁰

E Paia i le Alii: Fausiaina o se Malumalu i le Atua i Navu

Ina ua faamalosia le Au Paia e tuua Katelani, na latou tuua le malumalu na latou matua galulue malosi e fausia. Ae peitai o le a toe i ai lava se malumalu paia i lo latou lotolotoi, aua na poloaiina i latou e le Alii ina ia amata ona fausia se malumalu i Navu. Na amata le galuega i le tautoulu o le 1840, faatasi ai ma le faataatiaina o maatulimanu i le aso 6 o Aperila, 1841, i se sauniga na pulefaamalumalu ai le Perofeta. O le fausiaina o le Malumalu i Navu o se tasi lea o galuega faufale matua sili ona maoae i le mea na ta’ua o Amerika i sisifo i lena vaitaimi. O le fausiaina o le malumalu na manaomia ai le Au Paia ina ia faia taulaga matuai tetele, aua e tusa ai ma le faimalaga mai pea e le muta o tagata i totonu o le aai tau atiae, na tele lava ina matitiva tagata o le Ekalesia.

Na amata e le Perofeta ona aoao atu aoaoga faavae o le papatisoga mo e ua oti i le aso 15 o Aokuso, 1840, a o le i leva ona faavae le Ekalesia. Ae talu ai na i ai le malumalu i ona tulaga faavae o lona fausaga, na muamua lava faatinoina e le Au Paia papatisoga mo e ua oti i vaitafe tetele ma vaitafe laiti iina lava. Ia Ianuari 1841, na faaalia mai e le Alii o le a faaauau pea lea faiga seia oo ina ua mafai ona faatinoina i totonu o le malumalu (tagai MFF 124:29–31). I le vaitaimi o le taumafanafana ma le tautoulu o le 1841, na fausia ai e le Au Paia se vai papatisoga laupapa le tumau i le fogafale fou lava o le malumalu e fausia i lalo o le palapala na faatoa maea ona eliina. O uluai papatisoga mo e ua oti i lenei vai papatisoga na faatinoina i le aso 21 o Novema, 1841.

I le 1841 na faia ai uluai faamauga o ulugalii, ma i le 1843 na faamatalaina e le Perofeta le faaaliga lea e faamatalaina ai le natura o le feagaiga o le faaipoipoga (tagai MFF 132). O aoaoga faavae o i lenei faaaliga, na silafia e le Perofeta talu mai le 1831.²¹E pei ona poloaiina ai e le Atua, na ia aoao atu foi le mataupu faavae o le faaipoipoga faaautaunonofo.

Talu ai na ia silafia o le a le maea le malumalu mo se taimi, o lea na filifili ai Iosefa Samita e faataunuu le faia o faaeega paia o le malumalu i fafo ane o ona puipui paia. I le aso 4 o Me, 1842, i le potu pito i luga o lona Faleoloa Piliki Mumu i Navu, na faatinoina ai e le Perofeta uluai faaeega paia mo se vaega toaitiiti o le usoga, e aofia ai Polika Iaga. E lei soifua le Perofeta e tagai i le faamaeaina o le Malumalu o Navu. Peitai, i le 1845 ma le 1846 e afe ma afe le Au Paia na maua o latou faaeega paia o le malumalu mai ia Polika Iaga ma isi o e na maua o latou faamanuiaga nei mai le Perofeta.

Ua Lamalama Faaiu le Galuega a Iosefa Samita

A o tau amata ona faafiafiaina le Au Paia i sina filemu, na amata ona matua faateteleina mai sauaga e faasaga i le Perofeta, ma na ia lagonaina ai ua lamalama faaiu lana misiona i le lalolagi. I se faatasiga le mafaagaloina ia Mati 1844, na faatonuina ai e le Perofeta le Toasefululua ina ia pulea le Ekalesia pe a mavae lona maliu, ma faamalamalama atu o lea ua i ai nei ia i latou le pule manaomia e faia ai. Na mulimuli ane folafola mai e Uilifoti Uitilafi, o se sui o le Korama a le Toasefululua i le taimi lena, e faapea: “Ou te molimau atu i le amataga o le tautotogo o le 1844, i Navu, na valaauina e le Perofeta o Iosefa Samita faatasi aposetolo ma ia tuuina atu ia te i latou sauniga o le ekalesia ma le malo o le Atua. Ma o ki ma mana uma lava na faaeeina i ona luga e le Atua, na faamauina i luga o o matou ulu, ma ia tau mai ia i matou e tatau ona tuu faatasi o matou tauau ma tauaveina lenei malo, a leai o le a ta’usalaina i matou. … O ona foliga e manino pei o le susulu o le maa taua, ma na faaofuina o ia i se mana ou te le i vaai lava i ai muamua i se tagata i la le tino.”²⁰ Ina ua mavae le maliu o le Perofeta, o le a taoto le tiutetauave o le Ekalesia ma le malo o le Atua i luga o le Korama a Aposetolo e Toasefululua.

Ia Iuni 1844 na i ai se moliaga o le faatupu faalavelave na faia faasaga i le Perofeta. E ui lava na solofua mai i lenei moliaga i Navu, ae na finau malosi lava le kovana o Ilinoi, o Thomas Ford, e tatau ia Iosefa ona auai i le faamasinoga mo le moliaga lava lea e tasi i Karefasi, Ilinoi, o le laumua o Hancock County. Ina ua taunuu le Perofeta ma lona uso o Ailama i Karefasi, na tatalaina i laua i tua i le totogiina o se tupe mo le uluai moliaga, ae na toe moliaina foi i laua mo taupulepulega sese faasaga i le setete o Ilinoi, ma sa faapagotaina ai i le falepuipui iina.

I le aoauli vevela ma le susu o le aso 27 o Iuni, 1844, na osofaia e se vaega leaga ua vali uli o latou foliga le falepuipui ma fasiotia Iosefa ma Ailama Samita. E tusa e tolu itula mulimuli ane, na auina mai ai se feau faanoanoa i Navu e Uiliata Risati ma Ioane Teila, o e na i ai i le falepuipui faatasi ma le au maturo, e faapea: “Falepuipui o Karefasi, ta o le 8:05, i le afiafi 27 o Iuni, 1844. Ua maliliu Iosefa ma Ailama. … Na vave lava ona faatinoina le gaoioiga.”²³ I le 38 o tausaga, na faamaufaailogaina ai e le Perofeta o Iosefa Samita lana molimau i lona toto. O lana galuega i le faaletino ua faamaeaina, ua faatuina le Ekalesia ma le malo o le Atua i lona tulaga mo le toe taimi i luga o le fogaeleele, ua fasiotia Iosefa Samita e le au fasioti tagata. E faatatau i le Perofeta o Iosefa Samita, na molimau mai le Alii lava Ia: “Na ou valaau atu i ai [ia Iosefa Samita] i a’u agelu, o a’u auauna fesoasoani, ma i lo’u lava leo mai le lagi, e aumaia la’u galuega; O lona faavae foi na ia faataatia, ma na faamaoni; na ou aveina foi o ia ia te a’u lava. Ua taufai ofo nisi e toatele ona o lona maliu; a e na moomia lava, ona ia faamaufaailogaina lana molimau i lona toto, ina ia faamamaluina o ia, ae faasalaina e amioleaga” (MFF 136: 37–39).

O Iosefa Samita, le perofeta maoae, tagatavaai, ma le talifaaaliga o aso e gata ai, o se auauna loto toa ma le usiusitai a le Silisili Ese. Ua faamaonia mai e Peresitene Polika Iaga faapea: “Ou te le manatu o i ai se tagata o ola i le lalolagi e sili atu lona iloaina o ia nai lo a’u; ma ou te toa ou te faapea atu, vagana ai Iesu Keriso, e leai se tagata sili atu na ola po o loo ola i luga o lenei fogaeleele. O a’u o lana molimau.”²⁴

log home — I le taimi o le Uluai Faaaliga, sa nofo Iosefa Samita faatasi ma lona aiga i se fale ogalaau i Palamaira, Niu Ioka.

map of Palmyra — O le eria o Palamaira, Niu Ioka. E tele mea taua na tutupu iinei i le uluai talafaasolopito o le Ekalesia, e aofia ai le Uluai Faaaliga ma asiasiga a Moronae ia Iosefa Samita.

Sacred Grove — O Le Vao Paia i le tusa o le 1907. I le tautotogo o le 1820, na alu ai le taulealea o Iosefa Samita i le vao lenei o laau e latalata ane i lona aiga, e tatalo ai i le Alii mo se taitaiga.

Peter Whitmer Sr. home — O le ata faatusa o le fale o Pita Uitimera Matua i Faiete, Niu Ioka. O lenei fale na toe fausia, o loo tu i le tulaga na faatulaga aloaia ai e le Perofeta le Ekalesia i le aso 6 o Aperila, 1830.

Church history sites — O nofoaga taua i le uluai talafaasolopito o le Ekalesia ma le soifuaga o le Perofeta o Iosefa Samita.

Kirtland Temple — O Le Malumalu o Katelani pe tusa o le 1900. Sa fausia lenei malumalu i se osigataulaga tele e le Au Paia, ae lafoaiina ina ua tutulieseina i latou mai Katelani ona o sauaga.

Liberty Jail — Falepuipui o Liperate, lea sa faafalepuipui ai Iosefa Samita i le taumalulu o le 1838–39.

Mansion House — O Le Maota i Navu. Sa siitia Iosefa Samita ma lona aiga i le maota lea ia Aokuso 1843.

Nauvoo Temple — O le Malumalu o Navu i le ogatotonu o le 1840. Sa susunuina le malumalu i le 1848, ina ua uma ona tutuliese le Au Paia mai Navu, ma sa faaleagaina nisi o ona puipui i se taimi mulimuli ane e se asiosio, ma totoe ai puipui ua matua vaivai lava ma o lea sa tuu ai loa i lalo.

Carthage Jail — Falepuipui o Karefasi, lea sa maliliu faamaturo ai Iosefa Samita ma lona uso o Ailama, i le aso 27 o Iuni, 1844.