Mataupu 42: O Le Aiga: O Le Faatasiga Sili ona Suamalie mo le Olaga Nei ma le Faavavau.

Mataupu 42

O Le Aiga: O Le Faatasiga Sili ona Suamalie mo le Olaga Nei ma le Faavavau.

“O le faatasiga sili ona suamalie ma fiafia na matua faatumuina ai lo matou fale. E leai se feeseeseaiga po o se finauga na faalavelavea lo matou filemu, ma na nofotupu ai i totonu ia i matou le toafimalie.” (Lusi Maki Samita)

Mai le Soifuaga o Iosefa Samita

Eoo atu i le 1843, e ui lava ina e le i maea le Malumalu o Navu, na faasilasila ai e le Perofeta le mataupu faavae o le faaolataga mo e ua maliliu, ma na ia faatinoina faaeega faalemalumalu o se vaega faatuatua o le Au Paia. Ae o se vaega taua o le galuega paia o le malumalu na le i oo i le taimi e faatuina ai i lona tulaga. I le aso 16 o Me, 1843, na malaga atu le Perofeta mai Navu i Ramus, Ilinoi, lea na nofo ai o ia i le fale o lana uo mamae o Benjamin F. Johnson. I lena afiafi, na ia aoaoina ai Uso ma Tuafafine Johnson ma nisi uo mamae e faatatau i le “feagaiga fou faavavau o le faaipoipoga.” Na ia faamalamalama mai o lenei feagaiga o le “faatulagaga o le perisitua” ina ia maua ai le tulaga aupito i luga o le malo selesitila. (Tagai MFF 131:1–4.) Na ia aoaoina foi i latou sei vagana ua ulu atu se alii ma se tamaitai i le feagaiga o le faaipoipoga e faavavau, “o le a faamutaina ona uluuluola pe a latou oti; o lona uiga, o le a leai ni a latou fanau pe a mavae le toetutu.” O i latou o e ulufale i lenei feagaiga ma tumau faamaoni” o le a faaauau pea ona uluuluola ma maua fanau i le malo selesitila.”¹

I le lua masina mulimuli ane, i le aso 12 o Iulai, 1843, i le ofisa i le falealuga o lona Faleoloa Piliki Mumu, na faalauina ai e le Perofeta ae tusitusia e William Clayton se faaaliga e faatatau i le mataupu faavae o le faaipoipoga e faavavau (tagai i le MFF 132). Na iloaina ma aoaoina e le Perofeta lenei mataupu faavae mo sina taimi ua tea. I lenei faaaliga, na folafola mai ai e le Alii afai o le a le faamauina se tane ma se ava i le mana o le perisitua paia, “e le mafai ona faalauteleina i laua, ae o le a tumau eseese ai ma tutoatasi, e aunoa ma le faaeaga, i o la tulaga faaolaina, i le faavavau atoa lava” (tagai MFF 132:15–18). Ina ia maua le faaeaina, e tatau ona faamauina tane ma ava e le mana o le perisitua ma tumau ai i le faamaoni i a latou feagaiga:

“E moni ou te fai atu ia te oe, afai e faaipoipo le tane i lana ava i la’u upu, o la’u tulafono lea, ma i le feagaiga fou faavavau, ma faamaufaailogaina ai i laua e le Agaga Paia o le folafolaga, e le ua faauuina, ua ou tofia i lenei mana ma ki o lenei perisitua; … o le a faia ia te i laua mea uma ua tuuina atu e la’u auauna i o la’ua luga, o lenei olaga, e oo lava i le faavavau; o le a faatumauina atoatoa foi pe a o ese atu i la’ua mai le lalolagi; e ui atu foi i la’ua i tala ane o agelu, ma atua, ua faatuina i lea mea e oo i lo la’ua faaeaga ma le mamalu i mea uma, e pei ona faamaufaailogaina i luga o o la’ua ulu, o le mamalu lea o le atoatoa ma le fanafanau pea lava pea e faavavau faavavau lava.

“Ona avea ai lea o i laua ma atua, aua e leai so laua iuga; o lea o le a i ai i laua e faavavau faavavau lava, aua e tumau pea i laua; o lea e aupito i luga lava i laua i mea uma, aua e pule i laua i mea uma. Ona avea ai lea o i laua ma atua, aua ua maua e i laua mana uma, ma e auauna agelu ia te i laua. E moni, e moni, ou te fai atu ia te oe, e le mafai ona e maua lenei mamalu, sei iloga e te usitai i la’u tulafono” (MFF 132:19–21).

Mo Elder Parley P. Pratt o le Korama a le Toasefululua, o se malamalamaaga i lenei mataupu faavae ua faalolotoina ai lona alofa mo lona aiga: “O Iosefa Samita le na aoaoina mai ia te au le auala e faataua ai fesootaiga pele a tama ma tina, tane ma le ava; o le uso ma le tuafafine, o le atalii ma le afafine. O ia lava na ou aoaoina mai ai o le avā o lo’u loto e mafai ona faamautuina mai ia te a’u mo le taimi nei ma le faavavau atoa; ma o tigaalofa ma lagona alofa ua pele ai ia i matou le tasi i le isi e susulu mai mai le punavai o le alofa paia faavavau. E mai ia te ia na ou aoao mai ai e mafai ona tatou atiina ae nei lagona alofa, ma tupu ai ma faateleina i le auala lava e tasi i le faavavau atoa; a o le taunuuga o a tatou faatasiga e le iu o le a matua faatoateleina lava lau fanau e pei o fetu o le lagi, e pei o le oneone foi i le matafaga. … Na ou alofa muamua, ae ou te le i malamalama i le mafuaaga. Ae o lenei ua ou alofa—ma se mama—se malosi o se lagona siitia, faaeaina, lea o le a sii ai i luga lo’u agaga mai mea le tumau o lenei lalolagi matautia ma faalauteleina e pei o le sami. … A faapuupuu, ua mafai nei ona ou alofa ma le agaga faapea foi ma le malamalama.”²

Aoaoga a Iosefa Samita

Ia faamamalu e tane ma ava le tasi i le isi e ala i le faaali atu o le alofa, agalelei, ma lagona o le alofa.

“O le faaipoipoga [o se] faatulagaga a le lagi, na faatuina i le faatoaga o Etena.”³

“O le tiute o le tane e alofa, faataua, ma faamalosia lana ava, ma pipii atu ia te ia ae le o se isi [tagai MFF 42:22]; e tatau ia te ia ona faamamalu ia te ia e pei o ia lava, ma e tatau ia te ia ona manatu i ona lagona ma le agaga alofa, aua o ia o lona tino, ma lona ivi, na faia ina ia avea ma fesoasoani ia te ia, i mea uma i la le tino, ma le faaleagaga; o se tasi e mafai ona ia saoloto e sasaa atu i ai i lona loto ona faafitauli uma, o se o loo naunau (i lona fuafuaina) e i ai sana vaega i ana avega mamafa, e faamālū ma faamalosiau ai ona lagona e ala i lona leo malu.

“O le tulaga o le alii, ia tu i le ulu o lona aiga, … e le ina ia pule i lana ava e faapei o se pule saua, e le faapei foi o se tasi o le e mata’u pe fuā faapea i nei le tu lana ava i lona tulaga, ma taofia ai o ia mai le faaaogaina o lana pule. O lona tiute lea o le avea o se tagata o le Atua (aua o le tagata o le Atua o se tagata o le poto,) e saunia i taimi uma e maua mai tusitusiga paia, faaaliga, ma mai luga, ituaiga o faatonuga e tatau mo le aoaoina, ma le faaolaina o lona auaiga.”⁴

I se fonotaga a uso o le Aualofa, na faapea ai Iosefa Samita: “E le manaomia ona outou taufaifai ia outou tane ona o a latou galuega, ae ia lagonaina le uunaiga o a outou amiomama, agalelei ma lagona alofa, ia e sili atu ona malosi nai lo le nonoa o se maaolo tele i le ua; e le o taua, e le o fefinauaiga, e le o feeseeseaiga, po o misa, ae o le lotomaualalo, alofa, mama—o mea nei e tatau ona faalauteleina oe i le vaai a alii lelei uma. …

“… Pe a oo ina lofituina se alii i faafitauli, pe a oo ina le mautonu o ia i ona tiutetauave ma faigata, afai e mafai ona ia feiloai ma ni foliga ataata nai lo se finauga po o se muimuiga—afai e mafai ona ia feiloai atu ma le agalelei, o le a faafilemuina lona agaga ma faamaluina ona lagona; pe a oo ina faasolo atu i le matua mafatia tele o le mafaufau, o le a manao i se faamafanafanaga o lagona alofa ma le agalelei. … Pe a e alu i le fale, aua aua lava nei tuuina atu se upu ita po o se upu le alofa i a outou tane, ae ia avea le agalelei, alofa mama ma le alofa e faapaleina au galuega i le taimi lenei ma le agai atu i luma.”⁵

Na lipotia mai e Eliza R. Snow: “Na apoapoai mai [le Perofeta o Iosefa Samita] i tuafafine ina ia tulimatai lo latou faatuatua ma a latou tatalo mo, ma tuuina atu le lagona talitonuina i a latou tane, o e ua tofia e le Atua mo i latou e faamamaluina.”⁶

O fanau e ava i o latou matua e ala i le faailoa atu o le agaga faafetai ia i latou ma le faatauaina o i latou i o latou olaga atoa.

Mo ni nai aso ia Oketopa 1835, na asiasi ai i aso uma le Perofeta i lona tama na matua tigaina lona gasegase, tausi ia te ia “ma le popole tele.” Na faamaumauina i le tusi faamaumau a le Perofeta: “Toe tausi i lo’u tama, o le o loo mai tele. I le tatalo faalilolilo i le taeao, na fetalai mai ai le Alii, ‘La’u auauna e, o le a ola lou tama.’ Na ou tausia o ia i le aso atoa ma lo’u loto na sii ae i le Atua i le suafa o Iesu Keriso, ina ia Ia toefuatai mai o ia i le maloloina, ina ia faamanuiaina ai a’u i lona mafuta mai ma ana fautuaga, ma talisapaia o se tasi o faamanuiaga faaletino sili ona maoae le faamanuiaina i le faatasi ma matua, o e avea le matua o o latou tausaga ma aafiaga e agavaa ai i latou e tuuina mai fautuaga sili ona atoatoa ma lelei. I le afiafi na oo mai ai Uso Tavita Uitimera. Na ma valaau atu i le Alii i le tatalo faatauanau i le suafa o Iesu Keriso, ma faaee atu o ma lima i ona luga, ma faamaloloina le mai. Ma na faafofoga mai ma tali mai le Atua i a ma tatalo—i le olioli sili ma le faamalieina o o ma agaga. Na tulai mai lo ma tama matua ma faia ona lavalava, alaga, ma vivii ae i le Alii.”⁷

“Amuia lo’u tina, aua o lona agaga e faatumulia i taimi uma i le agaga alofa ma le lima foai; ma e ui lava i lona matua, ae o le a maua pea e ia le malosi, ma o le a faamafanafanaina i le lotolotoi o lona fale, ma o le a ia maua le ola e faavavau. Ma amuia foi lo’u tama, aua o le a i ona luga le aao o le Alii, aua o le a ia vaai ua aveesea mafatiaga o lana fanau; ma a oo ina matuā matua lona ao, o le a ia vaai ia te ia lava faapei o se laau olive, o ona lala e lauusiusi ma lolo’u mai i lalo i le tele o ona fua; o le a ia maua foi se maota i luga.”⁸

“Ua ou manatuaina vaaiga o lo’u tamaitiiti. Ua ou mafaufau i lo’u tama o le ua maliu. … Na mamalu lona tulaga ma sa i ai ia te ia se mafaufau maualuga, ma paia, ma faaeaina, ma mama. O lona agaga na siitia i luga ae o na mataupu faavae o mea leaga ma le toilalo ia ua fai ma natura o le loto o le tagata ola. Ou te fai atu nei na te lei faia lava se mea leaga, lea e ono faapea o se mea le alofa i lona olaga, i lo’u lava iloa. Ou te alofa i lo’u tama ma lona soifuaga; ma o lona soifuaga o galuega amiotonu o se uunaiga malosi i lo’u mafaufau, ma o le tele o ana upu agalelei ma le faamatua ia te a’u o loo tusia i le maa o lo’u fatu.

“E paia ia te a’u manatu ia ou te faatauaina i le talaaga o lona olaga, ia ua faafegasoloai i lo’u mafaufau, ma ua totoina iina e ala i lo’u lava mafaufau matau, talu ona ou fanau mai. E paia ia te a’u lona efuefu, ma le tulaga o loo taoto ai o ia. E paia ia te a’u le tuugamau ua ou faia e faataaliolio i luga a’e o lona ao. Ia ola e faavavau le soifuaga o lo’u tama i manatu. … Ia silasila mai i lalo le Atua mai luga lea ou te alofa i ai ma laveai a’u mai o’u fili iinei, ma uuina lo’u lima ma ave atu a’u i luga o le Mauga o Siona ina ia ou tu ai, ma faapaleina a’u faatasi ma lo’u tama iina e faavavau.

“E le lava upu ma gagana e faamatala atu ai le agaga faafetai lea ou te nofo aitalafu ai i le Atua mo le auina mai ia te a’u o ni matua sili ona faamamaluina.

“O lo’u tina foi o se tasi o tamaitai sili ona tamalii ma sili ona lelei. Ia foaiina mai e le Atua ia te ia le faafualoaina o ona aso faapea foi ma o’u aso, ina ia mafai ai ona ma ola e talisapaia le mafutaga umi a le tasi ma le isi.”⁹

“Pe a tatou tomanatu ma le faaeteete, faatasi ai ma le filiga faifaipea na finafinau ai o tatou matua e puipui ia i tatou, ma le tele o itula o le faanoanoa ma le popole na latou faaaluina, i luga ae ma talaane o o tatou moega, i taimi o ma’i, e taua lo tatou faaeteete i o latou lagona i o latou soifuaga matutua! E le mafai ona avea ma puna o manatu lelei ia i tatou, le fai atu o se upu po o le faia o se mea e aumaia ai o latou lauulu sinasina i le tuugamau ma le faanoanoa tele.”¹⁰

O le alofa i le va o uso ma tuafafine e mafai ona suamalie ma faaauau pea.

E faatatau i le toalua o ona uso, o e uma na oti a o talavou, na tusia ai e le Perofeta faapea: “O Alevine, lo’u uso ulumatua— ou te manatua lelei tiga o le faanoanoa na faatumulia ai lo’u fatafata talavou ma na toetoe a pa ai lo’u fatu vaivai ina ua oti o ia. O ia na sili ona matua ma sili ona tamalii o le aiga o lo’u tama. O ia o se tasi o atalii sili ona tamalii o atalii o tagata. … I totonu ia te ia na aunoa ma se faa’ole’ole. Na ola o ia e aunoa ma se pona mai lava i le taimi a o tamaitiiti o ia. … O ia e sili ona faautauta o tagata uma, ma ina ua oti o ia na asia o ia e agelu a le Alii i ona toe taimi. …

“O lo’u uso laitiiti o Toni Kalosi Samita … o se tama tamalii foi; ou te lei iloa lava se sese ia te ia; ou te lei vaai lava i se uluai amio le mama, po o se uluai manatu le tonu pe le tamalii i le tamaitiiti mai lava i le taimi na fanau mai ai seia oo atu i le taimi o lona oti. O ia o se tamaitiiti matagofie, amiolelei, loto alofa ma amio mama ma faamaoni, ma amiosao; ma o le mea e alu i ai lona agaga, ia alu ai foi lo’u agaga.”¹¹

Na tusia e Iosefa Samita upu ia i se tusi i lona uso matua o Ailama: “Lo’u Uso Pele Faapelepeleina Ailama, ua tele ni ou popolega ia te oe, ae ou te manatua pea oe i a’u tatalo, i le valaau atu i le Atua e tausia oe ina ia e saogalemu e ui lava i tagata po o tiapolo. … Ia puipuia oe e le Atua.”¹²

E faatatau ia Ailama, na tusia e le Perofeta: “E mafai ona ou tatalo i lo’u loto maimau pe ana faapei uma o’u uso o lo’u uso peleina o Ailama, o le ua i ai le filemu o le tamai mamoe, ma le faamaoni o Iopu, ma a faapuupuu, o le agamalu ma le lotomaulalo o Keriso; ma ou te alofa ia te ia i lena alofa lea e sili atu lona malosi nai lo le oti.”¹³

O matua o e alolofa, lagolagoina, ma tatalo mo a latou fanau e aumaia faamanuiaga le mafuatia i olaga o a latou fanau.

Ina ua tuanai lana asiasiga i le Mauga o Kumora ia Setema 1823, na faamatala e Iosefa Samita lona aafiaga i lona aiga ona faaauau ai lea ona faasoa atu ma i latou ona aafiaga. Na tusi faamaumauina e le tina o le Perofeta: “I afiafi uma lava ma te faapotopotoina ai faatasi le ma fanau. Ou te manatu na matou faaalia se vaega silisili ona uiga ese mai soo se aiga lava ua ola i le lalolagi, nonofo uma lava i se li’o, o tama, tina, atalii, ma afafine o loo faalogologo ma le naunautaiga toto’a i aoaoga faalelotu a se tama e [sefulufitu] tausaga lona matua. …

“Na matou talitonu ua lata ona aumaia i le malamalama e le Atua se mea e mafai ona faamalolosia ai i matou faalemafaufau ma faaletagata, se mea e mafai ai ona matou maua se malamalama atoatoa nai lo se isi lava mea na aoaoina mai ia i matou muamua, ma na matou fiafia ai ma le matua olioli tele. O le faatasiga sili ona suamalie ma fiafia na matua faatumulia ai lo matou fale. E leai se feeseeseaiga po o se finauga na faalavelavea lo matou filemu, ma na faatumauina i le lotolotoi o lo matou aiga le toafimalie.”¹⁴

O le latalata i le faaiuga o le savaliga a le Tolauapiga a Siona, ia Iuni 1834, na pagatia ai Iosefa ma Ailama Samita, faapea ma le toatele o isi, i le palagaau. Na faamatalaina e lo la tina le tala lea faatatau i o la aafiaga: “O le fiafia o Ailama ma Iosefa … ina ua matou toe feiloai i le maloloina na matua maoae, e le mafuatia, ona o tulaga faigata na la sao mai ai i le taimi na toesea ai i laua. Na la nonofo mai i lalo, taitoatasi i o’u itu, na uuina e Iosefa le tasi o o’u lima a o Ailama le isi, ma sa la faamatala maia le tala lea. …

“ ‘Na vave ona oo mai le ma’i ia i matou, ma i ni nai minute na matou oo i se mafatiaga matautia. Na faia e le tasi i le isi ni faailoga le leoa ma sa ma tuua ai le fale mo le faamoemoe o le o atu i se nofoaga tuese e tuua ai faatasi i maua i le tatalo ia laveaiina i matou e le Atua mai lenei aafiaga matautia. Ae e lei lava lelei le mamao na ma oo i ai ia saogalemu ai i maua mai le ono faalavelavea, ae na toetoe lava ina a le mafai ona ma tutu i o ma vae ma na matuai faateia i maua, ma e na ma manatu ai o le a ma oti ai lava i lenei vaomatua i sisifo i le mamao mai o maua aiga, e aunoa ma se avanoa e faamanuia ai a maua fanau pe tuuina atu ia i latou se upu se tasi o se fautuaga faamavae. Na tagi mai Ailama, “Iosefa, o le a le mea e tatau ona ta faia? Pe o le a vavae eseina ea i taua mai luga o le fogaeleele e lenei malaia mataga?” “Ia ta,” na faapea mai ai [Iosefa], “tootutuli ifo i lalo i o taua tulivae ma tatalo i le Atua e aveesea le tiga ma isi mafatiaga ae toefuatai mai i taua i le maloloina, ina ia mafai ona ta toe foi i o ta aiga.” Na ma faia loa ae aunoa ma se tulaga lelei, ae na faasolo pea ina leaga tele. …

“‘Na vave ona ma taunuu i se faaiuga o le toe aioi atu i le Atua mo lona alofa mutimutivale ma aua nei tulai ese se tasi mai ona tulivae seia maua e le tasi po o le isi se molimau o le a faamaloloina i maua. … Na ma tatalo mo ni nai taimi, muamua le tasi ona tatalo lea o le isi, ma e lei umi ae iloa ai ua amata ona tatala atu le tiga. Ma i se taimi puupuu mulimuli ane, na oso i luga Ailama i ona vae ma alaga, “Iosefa, o le a ta foi, aua ua ou vaai i se faaaliga vaaia lea na ou vaai ai ia Tina i ona tulivae i lalo o le apu o loo tatalo mo i taua, ma o loo ia talosaga atu i le taimi lava lenei i le Atua e faasaoina o taua ola ina ia mafai ona toe vaai mai o ia ia i ta’ua i la le tino. Ma ua molimau mai le Agaga ia te au o le a talia ana tatalo ma a taua tatalo.” Ma e mai lava i lena taimi na faamaloloina i maua ma sa ma malaga atu ai ma le olioli.’

“ ‘Oi, lo’u Tina e,’ na fai atu ai Iosefa, ‘ua faafia ea ona avea au tatalo ma auala e fesoasoani mai ai ia i maua a o siomia i maua e ata o le oti.’ ”¹⁵

O le alofa o Lusi Maki Samita mo lana fanau tama na faaalia i lana tala o le taimi na ave faapagotaina ai le Perofeta ma lona uso o Ailama i se taavale solofanua mai Sisifo Mamao, Misuri, ia Novema 1838, i Independence ona sosoo ai lea ma Richmond, Misuri, i le mea o le a faafalepuipuiina ai i la’ua. Sa popole le aiga ina nei fasiotia ai Iosefa ma Ailama. “Ina ua oo mai ia i matou le tala o le a aveeseina la ma fanau tama, na tau mai e le avefeau afai lava ma te toe vaai i la ma fanau o ola, e tatau ona ma o atu ia i laua, aua na aveeseina i laua i le taavale solofanua ma e toe o ni nai minute ae aveesea loa. Na matua ma’i tele la’u tane ma sa le mafai ona alu atu, ae o a’u ma Lusi [se tama teine] na ma o atu na o i maua, aua na o i maua lava o le aiga na malolosi.

“Ina ua ma oo mai i le 400 iata o le taavale solofanua, na le mafai ona ma o atu i se isi mamao ona o alii na siomiaina i laua. ‘O a’u o le tina o le Perofeta,’ na ou tagi atu ai, ‘ma e leai ea se tamalii iinei e mafai ona fesoasoani mai ia te au i lenei tumutumu agai atu i le taavale solofanua le la ina ia mafai ai ona ou toe vaai atu i la’u fanau ma tautala tasi atu ia te i laua ao lei oti i laua?’ O se tagata e toatasi na ofo mai na te faaavanoaina se ala i le va o fitafita, ma na ma o atu ai i le lotolotoi o pelu, ma ituaiga o fana eseese, lamatia i le oti i laasaga uma, seia iu lava ina ma taunuu ai iina. Na tautala le alii na taitai atua i maua ia Ailama, o le na nofo i luma, ma tau atu ia te ia ua iina lona tina ma o loo manao o ia e aapa mai lona lima ia te ia. Na ia faia loa, ae na lei faatagaina au ou te vaai ia i laua, aua o le ufiufi o le taavale solofanua na faia i se ie matua mamafa lava ma na nonoa faamalo i le pito lava i lalo i luma ma tuitui mau pito i fao. …

“Ona taitai atu lea o i maua e la ma uo i le pito i tua o le taavale solofanua, lea na i ai Iosefa, ma tautala atu ia te ia, ma faapea atu, ‘Susuga Samita, o lou tina ma lou tuafafine o loo iinei ma o loo mananao e lulu lima ma oe.’ Na faaofi mai e Iosefa lona lima i le va o le taavale ma le ufiufi lea na tuituiina i fao i le laupapa pito i tua. Na ma uuina lona lima, ae na lei tautala mai o ia ia te i maua. Na le mafai ona ou tuua o ia e aunoa ma le faalogo atu i lona leo. Na ou fai atu, ‘Oi, Iosefa e, tautala tasi maia i lou tina vaivai. E le mafai ona ou alu seiloga ou te faalogo atu ua e tautala mai.’

“Na ia fai mai, ‘Ia faamanuia oe e le Atua, Tina,’ ona oo mai lea o se valaau ma alu ese loa le taavale solofanua, ma vavae ese atu ai la’u tama ma i maua ao taumafai Lusi e toso mai lona lima ia te ia ina ia tuu atu i ai se sogi mulimuli a se tuafafine, aua na ma iloa na molia i laua ina ia ta fanaina.

“Na taunuu le ma toe malaga atu i le fale, e ui ina sa toetoe lava ina a le mafai ona ma savavali i ma’ua lava. … Mo sina taimi na leai se leo na faalogoina i le fale vagana leo o le mapuea ma le oi, aua ma te lei iloaina i le taimi lena tau lava o lea na ma vaai ia Iosefa ma Ailama mo le taimi mulimuli. Ae i le totonugalemu o o’u mafatiaga, na ou maua se faamafanafanaga e sili atu nai lo lagona filemu uma faalelalolagi. Na faatumulia au i le Agaga o le Atua ma maua ai le [valoaga] lea e ala i le meaalofa o le valoaga: ‘Ia faamafanafanaina lou loto e tusa ai ma lau fanau, aua o le a latou le sauaina se lauulu o o la ulu.’ … Na ou faapea lea, ‘La’u fanau e, aua tou te toe fetagisi. O le a le faaooina e tagata leaga le oti ia te i laua, aua ua faailoa mai e le Alii ia te a’u o le a ia laveaiina i laua mai lima o o laua fili.’ O se faamafanafanaga sili lea ia i matou uma lava, ma mulimuli ane na matou le toe matua mafatia ai e tusa ai ma le ono aveesea o o laua ola.”¹⁶

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai i itulau vii–xii.

Toe iloilo faamatalaga a Elder Parley P. Pratt pe faapefea e se malamalama i le mataupu faavae o le faaipoipoga e faavavau ona faamanuiaina lona olaga (itulau 513). O a ni auala e mafai ai e lenei aoaoga faavae ona uunaia o tatou lagona e uiga i o tatou aiga? le auala e taulima ai e le tasi le isi i totonu o le aiga?
Faitau le fautuaga a le Perofeta o Iosefa Samita i tane ma ava (itulau 514–15). Mafaufau pe faapefea e nisi vaega o lenei fautuaga ona aoga i tamaitai ma alii. Aisea e taua ai i tama ma tina le suesue i tusitusiga paia ma maua faaaliga e taitaiina ai le aiga? O a nisi o mea e mafai e se alii ona faia pe a vaai atu i lana ava o “lofituina i faafitauli”? Aisea e manaomia ai uma e tane ma ava ona aloese mai le faaaogaina o “se upu ita po o se upu le alofa”?
I le avea ai o se tagata matua, na faaauau pea e le Perofeta o Iosefa ona faafiafiaina i le faatasi ma ona matua, e saili la laua fautuaga, ma faamamaluina i laua (itulau 515–18). O le fea o saunoaga a le Perofeta e uiga i ona matua e sili atu ona e fiafia i ai? O a ni faataitaiga ua e vaaia i ni aafiaga faaauau pea a matua lelei e mafai ona i luga o a latou fanau? Mafaufau i mea e mafai ona e faia e faaleleia ai le faamamaluina o ou matua.
Toe iloilo faamatalaga a le Perofeta e faatatau i ona uso o Alevine, Toni Kalosi, ma Ailama (itulau 518). Aisea e te manatu ai e mafai ona umi ma malosi fesootaiga i le va o uso ma tuafafine? O a mea e mafai ona faia e matua e faamalosiau ai i o latou atalii ma afafine e avea ma uo lelei? O a ni mea e mafai ona faia e uso ma tuafafine e faafaileleina ai a latou faigauo a le tasi ma le isi?
Toe iloilo faamatalaga a Lusi Maki Samita e faatatau i lana tama o Iosefa a o ia aoaoina le aiga (itulau 519–20). O a ni aafiaga e mafai ona e faasoa atu ia na e lagonaina ai le “faatasiga sili ona suamalie ma fiafia” faatasi ma tagata o lou aiga? O a mea e mafai ona aoaoina e matua mai aafiaga na maua e Iosefa ma Ailama ina ua faamaloloina mai le palagaau? (Tagai i itulau 520–21.

Mau E Faatatau I Ai: Esoto 20:12; 1 Korinito 11:11; Efeso 6:1–4; Mosaea 4:14–15; Mose 3:18, 21–24

family praying — Na tautino mai e Parley P. Pratt: “O Iosefa Samita na aoaoina au i le auala e faataua ai le sootaga faapelepele a le tama ma le tina, tane ma le ava; o le uso ma le tuafafine, atalii ma le afafine.”

Smith family — Na tausia ma faafailele Iosefa Samita i se aiga e fealofani matua ma fanau ma faaaloalo le tasi i le isi. O lenei ata o loo faaalia ai le aiga o le au Samita ua toe faatasia ma lo latou tama i le 1816, ina ua ia taunuu muamua i le taimi ua latou masii atu ai i Palamaira, Niu Ioka.

Joseph teaching — “O afiafi uma lava ma te faapotopotoina ai faatasi le ma fanau,” sa toe manatua ai e Lusi Maki Samita, “o le tama, tina, atalii, ma afafine e faalogologo ma le naunautai i aoaoga faalelotu a se tama [e sefulufitu] tausaga le matua.”