O Mea Foaifua a le Agaga

“Pe afai o le a outou usiusitai i le Talalelei ma loto faamaoni, ou te folafola atu i le suafa o le Alii, o mea foaifua uma ua folafolaina mai e lo tatou Faaola e mulimuli atu ia te outou.”

Mai le soifuaga o Iosefa Samita

Ole itulau autu o le Tusi a Mamona o loo faamatala mai ai le auala o le a mafai ai ona maua e le lalolagi lenei tusitusiga paia ofoofogia. I aso anamua, o papatusi auro na ‘tusitusia ma faamaufaailogaina, ma natia i le Alii, ina ia le faatamaia i latou.” I aso e gata ai, e tatau “ona aumaia i le mea foaifua ma le mana o le Atua” ma ia faaliliuina “e ala i le mea foaifua a le Atua.” I le faataunuuina o nei valoaga, na filifilia e le Atua Iosefa Samita e faaliliuina le tala faamaumau paia. E manino lava, o le agavaa o Iosefa e faaliliu mataitusi anamua e le i maua mai le aoga: na gata lava o ia i se poto mai le aoga maualalo mo le na o le faitau, tusitusi, ma le numera. O lona agavaa e faaliliu le tala faamaumau na tusia i seneturi i luma atu i se gagana na matua le iloa e ia na oo mai lea o se mea foaifua mai le Atua Lava Ia.

O Ema Samita, o se uluai tusiupu i le galuega a lana tane, na molimau mai e uiga i lenei mea foaifua paia: “E leai se tagata e mafai ona faamatala mai tusitusiga o i tusitusiga paia vagana ua musuia o ia; aua, a o avea [a’u] ma ana tusiupu, e faalau mai [e Iosefa] ia te a’u i lea itula ma lea itula; ma pe a fo’i mai ina ua mae’a taumafataga, po o le mae’a foi ona faalavelavea, e mafai lava ona toe amata i le mea na gata ai, e aunoa ma le toe tau vaai i le tusi pe toe tau faitau atu ia te ia se vaega.”¹

Na tuuina atu e le Alii i le Perofeta le fesoasoani manaomia le tumau na fesoasoani ia te ia e agai ai i luma i le galuega o le faaliliuga. Na tuuina atu e Iosefa Knight le matua, o se uo a le Perofeta, tupe ma meaai i taimi eseese. I se tasi o taimi pagatia lava, na malaga ane ai Uso Knight i le fale o le Perofeta e tuuina atu ia Iosefa ma Oliva “se pusa eleni ma ni pepa mo tusitusiga,” faatasi ai ma le “iva pe sefulu fusi sana ma le lima pe ono fusi pateta.” Na manatuaina e Uso Knight faapea, “Na foi mai Iosefa ma Oliva i le fale o o’u i ai ma le faaoso, ma na fiafia i laua, aua ua matitiva i la’ua i mea e manaomia.”²

I le taimi o Aperila ma Me 1829, na faatetele lava ina faalavelavea le galuega faaliliu a le Perofeta i sauaga i lona aiga i Heremoni, Penisilevania. Na tusi Oliva Kaotui i sana uo, o Tavita Uitimera, ma faamatala i ai e uiga i le galuega paia ma fesili atu ia te ia mo se avanoa e faaauau ai le galuega i le fale o Uitimera i Faiete, Niu Ioka. I le faaiuga o Me po o le amataga o Iuni 1829, na malaga ai le Perofeta ma Oliva faatasi ma Tavita Uitimera i lana taavale solofanua e tasi i le fale o le tama o Tavita, o Pita Uitimera le matua. I le masina o Iuni, i se potu pito i luga o le fale o Uitimera, na faamaeaina ai le faaliliuga e ala i le mea foaifua ma le mana o le Atua.

Na faamatalaina e Oliva Kaotui lona aafiaga ofoofogia ao auauna ai o se tusiupu a le Perofeta: “O aso ia e le mafai ona faagaloina—o le nofo ai i lalo o le leo o se siufofoga na taitaia e le musumusuga a le lagi, na fafaguina ai le agaga faafetai silisili o lenei loto! I lea aso ma lea aso na faaauau ai, le faalavelavea, ona ou tusia mai lona fofoga, a o ia faaliliuina i le Urima ma le Tumema… le tala faasolopito po o le tala faamaumau ua ta’ua ‘O Le Tusi a Mamona’”³

I le taimi lea, na iloa ai e Iosefa Samita o le mea foaifua paia e faatoa i ai lava ia te ia pe a agavaa o ia e taitaia e le Agaga. Na faamatala Tavita Uitimera: “I se tasi taeao a o sauni [Iosefa Samita] e faaauau lana faaliliuga, sa i ai se mea na faaletonu i le fale ma sa le fiafia ai o ia i lena mea. O se mea sa faia e Ema lana ava. Sa ma o i le fogafalealuga ma Oliva ma e lei umi ae alu atu Iosefa e faaauau le faaliliuga, peitai sa le mafai ona faia e ia se mea. Sa le mafai e ia ona faaliliu se silapela se tasi. Ona alu lea o ia i le fogafalealalo, ma alu atu i fafo i le tovine, ma aioi atu i le Alii; ma e tusa e itula na alu ai o ia—ona toe foi mai lea i le fale, ma faatoga atu mo se faamagaloga mai ia Ema, ona sau ai lea o ia i le fogafalealuga sa ma i ai, ona toe sololelei ai lea o le faaliliuga. Sa le mafai ona ia faia se mea seiloga ua lotomaualalo o ia ma faamaoni.”⁴

[I lona] lotomaualalo ma le faamaoni i le faaaogaina o le mea foaifua na tuuina atu e le Atua ia te ia, na ausia ai e le Perofeta le galuega na foliga e faafaigata o le faaliliuina lea toetoe lava o le atoaga o le Tusi a Mamona i le va o le amataga o Aperila ma le faaiuga o Iuni 1829.

Aoaoga a Iosefa Samita

Ua tuuina mai ia i tatou taitoatasi mea foaifua a le Agaga; o mea foaifua a tagata taitoatasi e manaomia i le Ekalesia.

Mataupu Faavae o le Faatuatua 1:7: “Matou te talitonu i mea foaifua e pei o le tautala i gagana, valoaga, faaaliga, faaaliga vaaia, faamaloloina o mai, faamatalaga o gagana ma isi mea faapena.”⁵

“Matou te … talitonu i valoaga, i le tautala i gagana eseese, i faaaliga vaaia, ma faaaliga, i mea foaifua, ma le faamaloloina o ma’i; ma o nei mea e le mafai ona maua e aunoa ma le mea foaifua o le Agaga Paia.”⁶

Na manatuaina e Amasa Potter: “Ou te manatuaina le tulai o le Perofeta e lauga atu i se faapotopotoga tele i le togalaau i le itu i sisifo o le Malumalu i Navu. Na ia faapea mai o le a ia lauga i mea foaifua faaleagaga. … na faapea mai Iosefa o tagata taitoatasi o le Au Paia e i ai se mea foaifua, ma e ala i le ola i se olaga amiotonu, ma le tatalo ia maua, o le a faaalia ai ia te ia e le Agaga Paia.”⁷

“Ua faapea mai Paulo, ‘I le tasi ua tuuina atu i ai le mea foaifua o le tautala i gagana eseese, i le isi o le mea foaifua o le valoaga, ma i le isi o le mea foaifua o le faamaloloina o ma’i;’ ma sa toe faapea mai foi: ‘E vavalo uma ea? E tautala uma lava ea i gagana eseese? E faamatala uma ea?’ Ua faamaonia mai e le maua uma e tagata uma nei mea foaifua e tele; ae e toatasi e maua le mea foaifua e tasi, ma o le isi e maua se isi foi mea foaifua—e le i vavalo uma, e le i tautala uma i gagana eseese, e le i faia uma galuega o vavega; ae na maua uma le meaalofa o le Agaga Paia o nisi taimi na latou tautatala i gagana eseese ma vavalo i aso o Aposetolo, a o nisi foi taimi latou te le’i faia. …

“O le Ekalesia o se tino maopoopo ua i ai tagata eseese, ma e matua tutusa lelei lava ma le faatulagaga o le tino o le tagata, ma na faapea mai Paulo ina ua maea ona tautala e uiga i mea foaifua, ‘O lenei o le tino o Keriso outou ma itutino taitoatasi; ma ua faatuina e le Atua i le ekalesia e muamua o Aposetolo, o lona lua o Perofeta, o lona tolu o Aoao, pito ane i ai o e fai vavega, i le ma meaalofa e faamalolo ai ma’i, o e fesoasoani, o ta’ita’i, o gagana eseese. O Aoao uma ea? O fai vavega uma ea? E tautala uma lava ea i gagana eseese? E faamatala uma ea? Ua faamaonia latou te le faia faapena; ae o i latou uma lava o le tino e tasi. O vaega uma lava o le tino faanatura e le o le mata, po o le taliga, po o le ulu po o le lima—ae e le mafai e le mata ona fai ane i le taliga e leai sou aoga ia te a’u, po o le ulu foi i le vae, e leai sou aoga ia te a’u; o i latou uma lava o vaega eseese e tele i le masini atoatoa ona lelei—o le tino e tasi; ma afai e tiga le tasi itu tino, e tiga faatasi ai itu tino uma lava; pe afai e olioli le tasi itu tino, e viia faatasi ai itu tino uma lava. [Tagai 1 Korinito 12:9–10, 18–21, 26–30.]

“O mea uma nei, la, o mea foaifua uma lava; e aumaia i latou mai le Atua; e a le Atua ia; o mea foaifua uma lava a le Agaga Paia.”⁸

Tatou te mauaina mea foaifua a le Agaga e ala i le usiusitai ma le faatuatua.

“Talu ai ua leai se faatuatua, ua leai foi ni fua o le faatuatua. Talu mai le amataga o le lalolagi e le i i ai se tagata na i ai sona faatuatua e aunoa ma le i ai o se mea e tauia ai. Na mafai e le au faatuatua anamua ona tineia le malosi o le afi, sao ai mai le mata o le pelu, ma toe maua mai e fafine o latou tagata oti, ma isi. O le faatuatua na faia ai lalolagi. [Tagai Eperu 11:3, 34–35.] O se tagata e le i ai se mea foaifua e leai se faatuatua; ma ia faaseseina ia lava, pe a fai e manatu o i ai ia te ia le faatuatua. Sa leai se faatuatua, e le gata i tagata faapaupau, ae faapena foi i e ua tautino mai o i latou o Kerisiano, ma ua oo ai foi i gagana eseese, faamaloloina o ma’i, valoaga, ma perofeta ma aposetolo, ma mea foaifua ma faamanuiaga uma lava ua leai lava.”⁹

“I le taumalulu lenei [1832–33] na faaalu i le faaliliuina o Tusitusiga Paia; i le Aoga a Perofeta; ma le auai i konafesi. Na tele ni avanoa mamalu e faafouina ai le malosi i lo’u mafaufau ma lo’u agaga. O mea foaifua ia e mulimuli ia i latou o e talitonu ma usiusitai i le Talalelei, e fai ma faailoga o le Alii e tumau e faavavau i Ana fegalegaleaiga ma e fiafia ma mulimuli ma le lotomaualalo i le upu moni, na amata ona sasaa mai ia i matou, e pei lava o aso anamua.”¹⁰

Sa i ai Edward Stevenson a o lauga atu Iosefa Samita i Pontiac, Michigan, i le 1834. Sa ia toe manatua upu nei a le Perofeta: “Afai o le a outou usiusitai i le Talalelei ma loto faamaoni, ou te folafola atu ia te outou i le suafa o le Alii, o mea foaifua e pei ona folafola mai e lo tatou Faaola, o le a mulimuli atu ia te outou, ma o lena mea o le a mafai ai ona outou faamaonia o au o se auauna moni a le Atua.”¹¹

O mea foaifua a le Agaga e masani lava ona talia filemu ma patino i le tagata lava ia, e aunoa ma ni faaaliga faaaliali.

“E anoanoa’i ma feeseesea’i manatu o tagata e uiga i mea foaifua a le Agaga Paia. O nisi tagata e i ai le masani o le ta’ua o faaaliga faaleagaga uma lava o aafiaga o le Agaga o le Atua, ae manatu nisi e leai lava se faaaliga e fesootai i ai; ma o na faaaliga e leai se mea ua na o se lagona i le mafaufau, po o se lagona i le loto, se uunaiga, po o se molimau po o faamaoniga faalilolilo, ia e i tagata, ma e leai lava se mea e ta’ua o se faaaliga faaaliali.

“E le o se mea e ofo ai le le malamalama o tagata, i se itu tele lava, i mataupu faavae o le faaolataga, ae maise lava i le natura, tofiga, mana, uunaiga, meaalofa, ma faamanuiaga o le mea foaifua o le Agaga Paia; pe a tatou mafaufau atu o le aiga o le tagata na lilofia i le pogisa matautia ma le pouliuli faalemafaufau mo seneturi e tele ua te’a, e aunoa ma faaaliga, po o se isi lava tulaga tonu [e mafai ai] ona taunuu i se malamalama i mea a le Atua, ia faatoa mafai lava ona iloa e ala i le Agaga o le Atua. O le mea lea e masani ai lava, a oo ina talai atu Toeaina o lenei Ekalesia i tagata o le lalolagi, faapea afai latou te usiusitai i le Talalelei o le a latou maua le mea foaifua o le Agaga Paia, ona manatu ai lea o tagata o le a vaai i ni faaaliga matagofie, i ni faaaliga maoae o le mana, po o ni faatinoga o ni vavega matua uigaese. …

“O le aiga o le tagata e masani tele i le o’o o’o i manatu tupito, ae maise lava i mataupu faalelotu, o le mea masani lava a le o le manao i ni faaaliga faavavega, po o le matua le talitonu lava i mea foaifua o le Agaga Paia. Pe afai e faaee lima o se Toaeaina i luga o se tagata, ona manatu lea o le toatele o lena tagata e tatau ona tulai loa lava i lena taimi ma tautala i gagana eseese ma vavalo; o lenei manatu e aumaia mai le taimi na faaee ai lima o Paulo i luga o ni tagata o e na (latou fai mai) na papatisoina i le papatisoga a Ioane; lea ina ua maea, na latou ‘tautala lea i gagana eseese ma vavalo i latou.’ [Tagai Galuega 19:1–6.] …

“Tatou te talitonu o le Agaga Paia e tuuina mai e ala i le faaeeina o lima o e o i ai le pule, ma o le mea foaifua o gagana eseese, faapea foi ma le mea foaifua o le valoaga o mea foaifua ia a le Agaga, ma e maua i le auala lena [o le Agaga Paia]; ae o le manatu faapea o taimi uma lava e faaee ai lima e vavalo ai ma tautatala ai i gagana eseese tagata, o le faia lea o se tala e le moni, e faasaga ese mai le faiga a Aposetolo, ma feteenai ma tusitusiga paia. …

“… O mea foaifua uma a le Agaga e le iloa e le mata faanatura, po o le malamalama o le tagata; e moni e matua itiiti lava o ia [mea foaifua] e iloa … E itiiti foi mea foaifua a le Agaga e mafai ona iloa e se isi. O Peteru ma Ioane o Aposetolo, ae peitai na sasa i laua i le faamasinoga Iutaia faapea o i laua o tagata taufaasese. O Paulo o se Aposetolo ma se Perofeta, ae na latou fetogia o ia i maa ma tuu o ia i le falepuipui. Na le iloa e tagata se mea e uiga i ai, e ui lava na ia te ia le mea foaifua o le Agaga Paia. O lo tatou Faaola na ‘faauuina i le suauu o le olioli e sili i e latou te faatasi’ [Eperu 1:9], peitai na matua mamao tagata mai lo latou iloaina o Ia, ma latou fai mai ai o Ia o Pelesepulo, ma faasatauro o Ia faapea o se tagata taufaasese. O ai se e mafai ona iloa se Epikopo, se Aoao, se Peteriaka i o latou foliga, ae na ia i latou le mea foaifua o le Agaga Paia?

“Ae sei tautalagia isi tagata o le Ekalesia, ma iloilo mea foaifua ua tautalagia e Paulo, e mafai ona tatou iloa ai e mafai e le lalolagi i lona tulaga masani ona latou le iloa se mea e uiga i ia [mea foaifua], ma atonu e toatele ae vagana ai se toatasi po o se toalua e mafai ona iloa i le taimi lava lena, pe afai na sasaa uma mai i le taimi lava lena ina ua faaee atu lima. I le [1 Korinito 12:4–11], ua faapea mai Paulo, ‘E matalasi meaalofa, a e tasi lava le Agaga ia; e matalasi foi faiva, a e tasi lava le Alii ia; e matalasi foi mea mamana, a e tasi lava le Atua, o le na te matua galue i mea i tagata uma lava. Ua foaiina taitasi i tagata le faaaliga o le Agaga e aoga ai. Aua ua foaiina mai i le tasi le upu o le poto e le Agaga; e i le tasi le upu o le malamalama, e tusa ma le Agaga e tasi; e i le tasi o meaalofa e faamalolo a’i ma’i e le Agaga e tasi; e i le tasi na te faia vavega; e i le tasi o le perofeta; e i le tasi o suega o agaga; o i le tasi gagana eseese; e i le tasi o le faamatalaga o gagana. E matua galueaiina foi na mea uma e lea lava Agaga e tasi, o loo tufatufa i tagata ia taitasi ma lana mea e pei ona finagalo i ai o ia.

“E tele ni meaalofa o loo taua i i, ae o le fea o na mea e mafai ona iloa e se tagata na te matauina i le taimi o le faaeeina o lima? O le upu o le poto, ma upu o le malamalama, o ni meaalofa e pei lava o isi meaalofa, ae a i ai i se tagata meaalofa uma ia e lua, pe mauaina e i latou e ala i le faaee atu o lima, o ai se na te iloaina? Atonu e maua e se isi le meaalofa o le faatuatua, ae latou te matua le iloa se mea e uiga i ai. A faapea o se tagata na i ai le meaalofa o le faamaloloina o ma’i ma le mana e faia ai vavega, e le mafai ona iloaina i lena taimi; o le a manaomia le taimi ma le tulaga o i ai ina ia galueaiina ai nei meaalofa. A faapea o se tagata na mafai ona ia iloatino le eseesega o agaga, o ai se na te iloaina? Pe afai na ia te ia le faamatalaga o gagana, vagana ai ua tautala se tasi i se gagana e le iloa, e moni o le a tatau ona ia filemu; e na o le lua meaalofa e mafai ona vaaia—o le meaalofa o le tautala i gagana eseese ma le meaalofa o le valoaga. O mea nei e sili ona talanoaina, ae peitai a tautala se tagata i le gagana e le iloa, e tusa ai ma le molimau a Paulo, o le a avea o ia ma tagata o nuu ese ia i latou o loo i ai [tagai 1 Korinito 14:11]. O le a latou faapea mai e leai se uiga; ma afai na te vavalo o le a latou ta’ua o le talavalea. O le meaalofa o le tautala i gagana eseese o le meaalofa sili lea ona laitiiti atonu i lona atoaga, ae peitai o le tasi lea e sili ona sailia e tagata.

“O le mea lea e tusa ai ma le molimau a Tusitusiga Paia ma faaaliga a le Agaga i aso anamua, e laitiiti lava se mea e uiga i ai na mafai ona vaaia e le motu o tagata o i ai, vagana ai i nai taimi matua uigaese, e pei o le aso Penetekoso. O meaalofa sili ona maoae, sili ona lelei, ma sili ona aoga e mafai ona le iloa se mea e uiga i ai e se tagata na te matauina.

“O faaaliga o le mea foaifua o le Agaga Paia, o galuega a agelu, po o le faatupuina o le mana, le paia ma le mamalu o le Atua na seāseā faaalia faalauaitele, ae e masani lava ona faaalia i tagata o le Atua, e pei o Isaraelu; ae i lona tulaga masani a oo mai agelu, pe faaalia mai e le Atua Ia Lava, na taunuu i tagata taitoatasi ma patino i le tagata lava ia, i lona potu; i le vao po o le faatoaga, ma e leai se pisa po o se vavaō. O agelu na laveaiina Peteru mai le falepuipui i le vaeluapo; oo mai ai ia Paulo e aunoa ma se iloa e le toatele o le vaega; na faaali ia Maria ma Elisapeta e aunoa ma le iloa e isi; na tautala atu ia Ioane le Papatiso ae le iloa e tagata na i ai.

“Ina ua vaai Elisaia i kariota o Isaraelu ma tagata tietie solofanua, na le iloa e isi. Ina ua faaali le Alii ia Atamu na oo mai i le faitotoa o lona faleie; ina ua o atu agelu ia Lota, e le i iloa i laua e se isi ae na o ia lava, lea atonu o le tulaga foi lea ia Aperaamo ma lana ava; ina ua faaali le Alii ia Mose, na i le laau mumu, i totonu o le fale fetafai, po o le tumutumu mauga; ina ua aveina Elia i le kariota afi, na le i iloa e le lalolagi; ma ina ua i ai le vete i le maa, na i ai se faititili leotele, ae e le i i ai le Alii i le faititili; na i ai le mafuie, ae e le i i ai le Alii i le mafuie; ona i ai lea o le leo filemu ma le itiiti, o le leo o le Alii, ua fetalai mai, ‘Elia, se a lau mea e fai iina?’ [Tagai 1 Tupu 19:11–13.]

“E le iloa le Alii i taimi uma i le faititili o Lona siufofoga, i le faaalia o Lona mamalu pe i le faaalia o Lona mana; ma o i latou ua sili ona naunau e fia vaai i nei mea, ua sili ona le saunia e feiloai ma i latou, ma pe ana faaalia e le Alii Lona mana e pei ona Ia faia i le fanauga a Isaraelu, o na tagata o le a muamua ona faapea mai, ‘A e aua le fetalai mai le Atua ia te i matou, nei matou oti.’ [Tagai Esoto 20:19.]”¹²

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faoopoopo, tagai itulau vii–xii.

Na tuuina e le Alii i le Perofeta o Iosefa Samita se meaalofa ina ia mafai ona faaliliu papatusi auro (itulau 121–123). O anafea ua tuuina atu ai e le Alii ia te oe ni meaalofa e fesoasoani ia te oe e faia Lana galuega?
O a ni mea tatou te aoao mai le tala na faamatala e Tavita Uitimera i le itulau 123? O a ni aafiaga i lou lava olaga ua aoaoina oe e tatau ona e agavaa ina ia mafai ona faaaoga au meaalofa faaleagaga?
Toe iloilo le vaega lea e amata i le itulau 124. O a ni auala e aoga ai i le Ekalesia le i ai o tagata e eseese a latou meaalofa a le Agaga? O faapefea ona e manuia mai meaalofa faaleagaga a isi? O anafea ua e vaai ai i tagata ma meaalofa eseese o galulue faatasi e fesoasoani le tasi i le isi?
Suesue le vaega o i le itulau e 125. Mafaufau i meaalofa faaleagaga ia e faamalosia oe lava ia pe fesoasoani ai ia te oe e auauna i le Alii ma isi. Filifili po o le a le mea e te faia e ‘saili … ma le agaga naunau ia meaalofa silisili” (MFF 46:8),
Toe iloilo le mataupu lea e amata i le pito i lalo o le itulau 125. Mafaufau pe talanoaina foi le apoapoaiga patino ua e maua e uiga i le auala e maua ai pe faapefea ona faaalia mai meaalofa faaleagaga ia i tatou. Aisea e taua ai le manatua o meaalofa faaleagaga e “seāseā faaalia faalauaitele”? (itulau 125). Aisea e te manatu ai o le tele o meaalofa faaleagaga e oo mai i le filemu ma le patino i le tagata lava ia? Aisea e taua ai le manatua o le tele o meaalofa e manaomia le “taimi ma le tulaga o i ai e talosagaina ai ina ia galueaiina [nei meaalofa]”? (itulau 128).
Pe a maea ona faitauina lenei mataupu, o le a sau tala o nisi o faamoemoega o meaalofa faaleagaga?

Mau E Faatatau I Ai: 1 Korinito 12:1–31; 3 Nifae 29:6; Moronae 10:6–23; MFF 46:8–33

Book of Mormon manuscript — O se vaega o se itulau mai le uluai tusi o le Tusi a Mamona. O upu o loo faaalia ai o se vaega o le faamatalaga a Liae o lana faaaliga vaaia o le laau o le ola, lea o loo maua i le 1 Nifae 8:11–23.

Abraham receiving inspiration — “O le mana, silisiliese, po o le mamalu o le Atua [e] seasea ona faaalia i nofoaga faitele. … Ina ua faaali le Alii ia Aperaamo i le faitotoa o lona faleie [tagai Kenese 18:1].”