Aoaoga a Peresitene
Mataupu 31: ‘E i ai le Atua Faatasi ma Oe e Faavavau Faavavau lava’: O Le Perofeta i le Falepuipui i Liperate

Mataupu 31

“E i ai le Atua Faatasi ma Oe e Faavavau Faavavau lava”: O Le Perofeta i le Falepuipui i Liperate

“I Lona suafa Silisili Ese tatou te finafinau ai e manumalo i faigata e pei o se au tau lelei seia oo i le iuga.”

Mai le Soifuaga o Iosefa Samita

I le aso 1 o Tesema, 1838, na aveina ai le Perofeta o Iosefa Samita, lona uso o Ailama, ma isi uso mai le Richamond, Misuri, i le mea sa faafalepuipui ai i se fale ogalaau, ma tuuina ai i le falepuipui i Liperate, Misuri. O iina na latou nonofo ai mo le sili atu i le fa masina, e faatalitali le faamasinoga i moliaga sese na tulai mai i sauaga o le Au Paia i Misuri. I lena taimi, sa tutuliesea ai tagata mai o latou fale i Misuri e le ‘au faasaua, ma afua ai le pagatia tele naua. O faigata na feagai ma le Au Paia, o se faapogai lea o le popole tele o le Perofeta ma ana paaga i le taimi umi na latou falepuipui ai.

Na vavae le Falepuipui i Liperate i se potu i luga ma se potu palapala pogisa i lalo e 14-futu-faatafafa, lea na tuu ai pagota. Na faamatalaina e le Perofeta lo latou tulaga: “Ua vaavaaia i matou e leoleo e toatele, i le po ma le ao, i se falepuipui e ta’isautualua puipui ma faitotoa, faatapulaaina lo matou saolotoga e faia ai se mea e tusa ma o matou lagona, e matua laiti tele a matou meaai, e tasi lava le ituaiga, ma e le lelei foi; e leai so matou avanoa e kuka ai mo matou lava, e faamalosia i matou e momoe i luga o le fola e i ai vao mamago, e leai ni palanikete e mafai ona faamafanafana ai i matou; ma a fai sa matou afi, e i ai lava le asu i taimi uma. E tauina mai ma le faanoanoa mai lea taimi i lea taimi e faamasino latou te iloa e mama i matou, ma e tatau ona faasaolotoina i matou, ae e matatau e faaaoga le tulafono ia i matou, ona o le fefefe i tagata leaga.”1

E le maualuga le potu e mafai ai ona tu sao i luga se tagata, ma fai mai Alexander McRae, o meaai e “matua leaga lava i le tofo, ma e matua palapalā e le mafai ona matou aia vagana ua matua faamalosia i matou ona o le fia aai.”2

Na tusia mulimuli ane e Mercy Fielding Thompson, o se tagata o le Ekalesia o le na asia le au uso i le falepuipui: “E matua le mafai e so’u malosi ona faamatala o’u lagona ina ua faatagaina i matou i totonu o le falepuipui e le leoleo ma lokaina le faitotoa i o matou tua. E faigata ona le lagonaina e i matou se lagona o le matua mata’u ina ua iloa ua lokaina i matou i lena pu pogisa ma leaga, e talafeagai mo na o tagata solitulafono silisili ona leaga; ae o iina na matou vaai ai ia Iosefa, le Peofeta—le alii ua valaauina e le Atua, i le augatupulaga o le atoaga o taimi e umiaina ki o Lona malo i le lalolagi, ua i ai le mana e fusifusia ai ma tatalaina [soo se mea] e pei ona faatonuina e le Atua—o loo saisaitia i se falepuipui matagā e aunoa ma se mafuaaga ae ua na o lona folafola atu na musuia o ia e le Atua e faatuina Lana ekalesia i le lotolotoi o tagata.”3

I le taimi a o falepuipui le Perofeta, e na o le faatolu ona mafai ona asia o ia e Ema, lana ava. Pau lava le isi ala o a la’ua fesootaiga, o tusi. I le aso 4 o Aperila,1839, na tusia ai e le Perofeta: “La’u ava pele ma le alofaina. I le po o le aso Tofi, na ou nofo ifo ai a o alu ifo i lalo le la, a o matou tau tilotilo atu i le va o pa o le faamalama o lenei falepuipui faavauvau, e tusi atu ai ia te oe, ina ia ou faailoa atu ia te oe le tulaga ua ou i ai. Ou te talitonu, ua tusa o le lima masina nei ma le ono aso talu ona ou i ai i lalo o le vaavaaiga a leoleo i le po ma le ao, ma i ai i totonu o puipui, pa, ma faitotoa uamea o’io’Π o se falepuipui faaesea, pogisa, ma palapala. Ou te tusia lenei tusi ma lagona loloto e na o le Atua na te silafia. O manatunatuga o le mafaufau i lalo o nei tulaga e le mafai ona faamatalaina e le peni po o le gagana po o agelu pe faailoa atu i le tagata o se e le i oo lava i le aafiaga ua matou oo i ai. … Matou te faalagolago i le aao o Ieova ae le o se isi lava mo lo matou laveaiina.”4

Mai le Falepuipui i Liperate, na tusia foi e le Perofeta se tusi i le Au Paia, e faailoa atu ai lona alofa ia te i latou ma lona faatuatua o le a lagolago pea e le Atua i latou o e faatuatuaina o Ia. O le tele lava o vaega ia e sosoo mai e aumai i se tusi i tagata o le Ekalesia, tusia i le aso 20 o Mati, 1839, o loo i ai fautuaga a le Perofeta i le Au Paia, o ana talosaga faatauanau i le Atua, ma tali a le Atua i ana tatalo. O vaega o lenei tusi na mulimuli avea ma vaega 121, 122, ma le 123 o le Mataupu Faavae ma Feagaiga.

Aoaoaga a Iosefa Samita

E leai se mafatiaga e mafai ona vavaeeseina i tatou mai le alofa o le Atua ma le faaaumea a le tasi i le isi.

“O la outou auauna maualalo, o Iosefa Samita, le Itiiti, pagota mo le Alii o Iesu Keriso, faapea mo le Au Paia, aveina ma taofia i le malosiaga o tagata leaga, i lalo o le nofoaiga matautia a lana malelega, le kovana, Lilburn W. Boggs, faatasi ma ona uso pagota ma le au uso pele, Caleb Baldwin, Lyman Wight, Ailama Samita, ma Alexander McRae, e auina atu ia te outou uma o matou alofaaga. 5 Ia i luga ia te outou uma le alofa tunoa o le Atua le Tama, ma lo tatou Alii ma le Faaola o Iesu Keriso, ma mafuta ma outou e faavavau. Ia faateleina ia te outou le iloa lelei i le alofa tunoa o le Atua. Ia i totonu ia te outou ma faateleina ia te outou le faatuatua ma le ola mama, o le poto ma le le gaoia, o le faatuatua ma le amioatua, o le alofa faauso ma le alofa ina ia outou le mativa ai i soo se mea, pe le fua mai foi. [tagai 2 Peteru 1:5–8.]

“Aua e pei ona matou iloa o le toatele o outou ua iloa lelei mea sese ma le pule le tonu ma le saua o loo faia ia i matou; lea o loo ave ai faapagotaina i matou ma molia sese i mea leaga uma, ma togiina i le falepuipui, saisaitia i totonu o puipui malolosi, siosiomia e le toatele o leoleo, o e o loo vaavaaia pea i matou i le ao ma le po e le faavaivai lava e faapei o le tiapolo i le faaosoosoina ma le maileiina o tagata o le Atua:

“O le mea lea, uso pele e, ua matou matua sauni ma naunau e maua la outou faaaumeaga ma lo outou alofa. Aua o lo matou tulaga ua fafaguina ai o matou agaga i se manatuaina paia o mea uma lava, ma e matou te manatu o loo faapena foi o outou agaga, ma e le mafaia e se mea ona faateaeseina mai i matou i le alofa o le Atua ma le faaaumea o le tasi i le isi [tagai Roma 8:39]; ma o ituaiga uma o amioleaga ma sauaga ua faia ia i matou ua na ona fusia faatasi ai o matou loto ma faamauina faatasi ai i le alofa.

“E le manaomia ona matou fai atu ia te outou o loo saisaitia i matou i noanoataga e aunoa ma se mafuaaga, e le manaomia foi ona outou fai mai ia i matou, Ua tutulieseina i matou mai o matou aiga ma sauaina e aunoa ma se mafuaaga. Tatou te malamalama uma lava, a na fai e tuu pea lava e tagata o le setete o Misuri le Au Paia ia, ma mananao ina ia maua le filemu e pei foi o i latou, semanu e leai lava se fua e olo ae na o le manuia ma le filemu i le setete e oo mai i lenei aso; semanu tatou te le i ai i lenei seoli,… lea ua leai nisi mea ua uunaia lo tatou faalogo atu i ai ae na o tautoga taufaifai, ma molimauina se vaaiga o le fai upu leaga, ma onaga ma le talapepelo, ma mea inosia o soo se ituaiga. E le gata i lea, semanu e le o a’e i le Atua auega a ē matuaoti ma fafine ua oti a latou tane e faasaga ia i latou. Semanu foi e le pisia le eleele o Misuri i le toto o e ta’umamaina. … O se tala o le faavauvau; o se tala e tagitu’i ai; ioe, o se tala e tumu i le faanoanoa; e matua tele naua e tau faamatala; e matua tele naua e tau mafaufau i ai; e matua tele naua mo tagata soifua. …

[O o tatou fili saua] latou te faia nei mea i le Au Paia, o e e lei faia lava se mea sese ia i latou, o e taumamaina ma amiolelei; o e alolofa i le Alii lo latou Atua, ma sa naunau e lafoai mea uma mo Keriso. O nei mea e matautia tele e ta’u atu, ae ua moni ia mea. E oo mai lava mea e tausuai ai e ao ai; a e ui lava i lea, oi talofa ia i latou e oo mai ai mea e tausuai ai [tagai Mataio 18:7].”6

O tiga ma puapuaga o le a na o sina ituaso itiiti lava; afai tatou te onosai ma tumau, o le a faaeaina i tatou i le afioaga o le Atua.

“Le Atua e! o i fea ea oe? Po o fea foi le maota ua ufitia ai lou afioaga lilo? Pe taofia ea lou aao seia afea, ma silasila atu mai le lagi faavavau lau silafaga, ioe Lau silafaga mama lava, i sese ua faia i Lou nuu atoa ma Au auauna, ma oo atu i Lou fofoga a latou tagi?

“Ioe, le Alii e, e tigaina ea i latou seia afea i nei mea sese ma puapuaga e le tusa ma le tulafono, a o lei faamaluluina Lou finagalo ia i latou, ma uunaiina Lou alofa ia alofa mutimutivale ia i latou?

“Le Alii le Atua Mamana e, Le na faia le Lagi, le Lalolagi, ma Sami, ma mea uma lava o i ai, o le foi e pulea ma faatonuina le tiapolo, ma nofoaga pouliuli ma le pogisa o le malo o Seoli! Ia faaloaloa ia Lou aao; ia ati Lau silafaga; ia aveina ae Lou maota ia le toe ufitia Lou afioaga lilo; sei uai mai ia Lau faafofoga; ia faamaluluina Lou finagalo, ma uunaiina Lou alofa i le alofa mutimutivale ia te i matou. Ia faatupuina Lou toasa i o matou fili; ia E taui foi ma sui ia i matou i o matou fili i le tiga tele lava o Lou finagalo, ma Lau pelu; ia manatua Lau Au Paia puapuagatia, lo matou Atua e! ona olioli lea o Au auauna i Lou suafa e faavavau. …

“… Lo’u atalii e, ia i ai le filemu i lou agaga; o lou tiga ma ou puapuaga o le a na o sina ituaso itiiti lava; Ona faaeaina lea o oe e le Atua i le mea maualuga; afai e te onosai o le a e manumalo foi i ou fili uma.”7 [O parakalafa i lenei vaega o loo maua foi i le MFF 121:1–8.]

O le mana o le Atua e silisili nai lo so o se leaga, ma o upu moni o le talalelei o le a manumalo i le iuga.

“Faataga mai a’u ou te faapea atu ia te outou, uso e, o le valea, talitonu i togafiti faataulaitu ma le faamasinoga le tonu ua tulai mai i mea e le tatau ona i ai, ua masani ona faalavelave i le manuia o lenei Ekalesia, e pei o uaga malolosi mai le mauga e lolovai ai le vaitafe sili ona mama ma manino i le pala, ma le eleelea, ma le matagā, ma faanenefuina mea uma na manino muamua, ma tafe malosi atu ai i se lolovai tele; ae e i ai le taimi e suia ai mea uma; ma e ui ina ua tatou faalopalaina ai i tatou i le palapala o le lolovai i le taimi lenei, masalo o le isi tafega, a o faasolo pea le taimi, o le a aumaia ia i tatou le punaoa e manino e pei o le maa taua, ma mama e pei o le kiona; a o le matagā, ma le taetafe ma le otaota e tuua ma lafoaiina i le ala.

“E eleelea le vai o loo tafe seia afea? Po o le a ea le mana e taofi ai le lagi? E tusa lava pe ana faaloaloa atu e le tagata lona lima vaivai e taumafai e taofi ai le vaitafe o Misuri mai lona ala faatonuina pe toe faafoi ae lona tafe, pe ana ia taumafai e taofia Le Silisiliese mai le liligiina ifo o le malamalama mai le lagi i luga o le Au Paia o Aso e Gata ai. [O le parakalafa lea o loo maua foi i le MFF 121:33.]

“O le a ea ia [Kovana Lilburn W.] Boggs po o lana vaega fasioti tagata, a ua na o ni aa laau i augutu o le vaitafe e pueina le taetafe? E mafai ona tatou finau faapea o le vai e le o se vai, aua ua auina mai i lalo e le mauga le pala ma faanenefu ai le vai manino, e ui lava e mulimuli ane ua liua i le sili atu ona mama nai lo le taimi muamua; po o lena afi e le o se afi, aua e mafai ona tapeina, i le sasaa atu i ai o le lolovai; e pei o le faapea mai o la tatou fuafuaga faatuina ua pa’ū ona o e faalata, pepelo, ositaulaga, faomea ma fasioti tagata, o e e tutusa uma lava lo latou maumaututu ia latou togafiti ma a latou mau, ua sasaa mai, mai lo latou amioleaga i la le agaga i nofoaga maualuluga, ma mai o latou nofoaga malolosi o le tiapolo, o se lolovai o le eleele ma le pala ma le matagā … i luga o o tatou ulu.

“E leai! Ia faasaina e le Atua. Atonu e masua mai le ita tele o Seoli e pei o le lava ua mu o le mauga o Vesuvius, po o le mauga o Etna, po o mauga mu silisili ona matautia; ae ui i lea e tumau pea le “faa-Mamona”. O le vai, o le afi, ma le upu moni ma le Atua e moni uma lava. O le upu moni o le ‘faa-Mamona’. O le Atua o lona mataisau. O Ia o lo tatou talita. E ala mai ia te Ia na tatou maua ai lo tatou fananau mai. O Lona siufofoga na tofia ai i tatou i se augatupulaga o Lana Talalelei i le amataga o le atoaga o taimi. O Ia na tatou maua ai le Tusi a Mamona; ma o Ia ua tatou tumau ai e oo mai i lenei aso; ma e ala ia te Ia o le a tatou tumau ai, pe afai e mo lo tatou mamalu; ma i Lona suafa Silisili Ese ua tatou finafinau ai e manumalo i o tatou sauaga ma puapuaga e pei o le au tau seia oo i le iuga.

“… I le taimi tou te faitauina ai lenei tusi e tatau ona outou iloa ai, ae afai tou te le iloa ai, o le a outou iloa ai, o puipui ma filifili, faitotoa ma faamau faitotoa o’io’ī, ma leoleo ma tausi falepuipui fefevavale … o le faamoemoega lava o lo latou natura o le faamalosia lea o le agaga o se tagata faamaoni ina ia sili atu ona malosi nai lo mana o seoli. …

“… O i matou o o outou uso ma uso-i-puapuaga, ma ua noanoatia ona o Iesu Keriso mo le Talalelei, faapea ma le faamoemoe o loo i totonu ia i tatou mo le mamalu.”8

E malamalama le Faaola i o tatou mafatiaga uma, ma o le a Ia faatasi ma i tatou e faavavau faavavau lava.

Na faamafanafanaina e le Alii le Perofeta i upu nei: “O le a fesili tuluiga o le lalolagi i lou igoa, o le a faia foi oe ma tauemuga e tagata valelea, ma faasaga seoli ma le matuā lotoa ia te oe; a o ē loto mama ma ē faautauta, ma ē maualuluga, ma ē amiomama, o le a sailiili pea faatonuga ma pule ma faamanuiaga mai ia te oe, o le a le liua foi lou nuu e faasaga atu ai ia te oe i le mau a ē faalata; e ui foi ina lafoaiina oe i puapuaga ona o la latou uunaiga, ma falepuipui ma pa puipui, o le a aloaia lava oe, e na o sina ituaso itiiti foi a e sili atu ona matautia tele lou leo i ou fili, i lo le Leona feai, ona o lau amiotonu; o le a lagolagoina pea oe e lou Atua e faavavau faavavau lava.

“Afai foi e valaauina oe e ui atu i puapuaga; afai e te i ai i mea faigata a o faatasi i uso pepelo; afai e te i ai i mea faigata a o faatasi i tagata fao mea; afai e te i ai i mea faigata i le laueleele po o le sami; afai e molia oe i moliaga pepelo eseese uma; afai e oo atu ou fili i luga ia te oe; afai latou te saeia oe mai le mafutaga ma lou tama ma lou tina ma uso ma tuafafine; afai foi o le pelu ua sei e saeia ai oe e ou fili mai le fatafata o lau avā, ma lau fanau, a o lou uluai atalii, e ui ina na o le ono o ona tausaga, o le a piimau i ou ofu, ma fai atu, Lo’u tama e, lo’u tama e, aisea e te le mafai ona nofo ai pea faatasi ma i matou? Lo’u tama e, po o le a le mea o le a faia e tagata ia te oe? afai foi o le a tulieseina ai o ia mai ia te oe i le pelu, a e tosoina oe i le falepuipui, a o feoa’i ou fili e siomia ai oe e pei o luko mo le toto o le tamai mamoe; afai e lafoaiina foi oe i le lua, po o lima o e fasioti, ma le faasalaga o le oti ua tuuina atu ia te oe; afai e tuulafoaiina oe i le sami loloto; afai e taupulepule peau o le sami e faasaga atu ia te oe; afai e avea matagi afa mou fili; afai e faaputuputuina le pogisa e le lagi, ma au faatasi elemene uma e puipuia le ala; a e pito atu i mea uma, afai o iviauvae lava o seoli o le a faamagatele le gutu e faasaga atu ia te oe, ia e iloa ai, lo’u atalii e, e tuuina atu ia te oe le poto masani ona o ia mea uma, ma avea mou lelei.

“Na oo ifo i lalo o mea uma le Atalii o le Tagata. Pe sili ea oe i lo ia?

“O lea, ia tumau ai pea i lou ala, ma o le a tumau pea le perisitua ia te oe; aua ua puipuia o latou tuaoi, e le mafai i latou ona sopoia. E iloa ou aso, e le faitaulia foi ia faaitiitia le aofai o ou tausaga; o lea aua le fefe ai i mea e mafai e tagata ona faia, aua e i ai le Atua faatasi ma oe e faavavau faavavau lava.”9 [O parakalafa i lenei vaega o loo maua foi i le MFF 122:1–9.]

O le leo itiiti ma le filemu e musumusuina mai le faamafanafanaga i o tatou agaga i le loloto o le faanoanoa ma mafatiaga.

E le i pine lava ona faatagaina le Perofeta e sola ese mai ona leoleo i Misuri, na ia manatuaina lagona na ia te ia i le taimi o lona falepuipuiga: “I le taimi na ou i ai i lima o o’u fili, ou te fia faapea atu, e ui lava na ou faalogoina le matua popole tele e tusa ai ma lo’u aiga ma uo, o e na matua mataga le faiga ma le sauaina, … ae peitai e tusa ai ma lo’u lava lagona, na matua ou lagonaina le to’afilemu, ma ou lolo atu i le finagalo o lo’u Tama Faalelagi. Na ou iloa lo’u mamā faapea foi ma le mamā o le Au Paia, ma e leai lava se mea na matou faia e tatau ai ona oo mai ia i matou nei ituaiga faiga ai lima o o matou tagata saua. O le iuga la, e mafai ona ou vaai atu i lena Atua o le o i ai ola o tagata uma i Ona aao, ma le na faasaoina soo a’u mai faitotoa o le oti, mo le laveaiga; ma e ui lava ina foliga ua tapunia uma faitotoa mo se sola ese, ma pulato’a mai le oti ia te a’u, ma o lo’u faaumatiaga ua uma ona fuafuaina, e tusa ai ma manatu o tagata, ae peitai, mai lo’u uluai ulufale atu i le tolauapiga, na ou lagonaina le mautinoa o le a laveaiina a’u faatasi ma o’u uso ma o matou aiga.

“Ioe, o lena leo itiiti ma le filemu, lea e masani ona musumusu maia faamafanafanaga i lo’u agaga, i le loloto o le faanoanoa ma mafatiaga, sa augani mai ia te a’u ia e lototele, ma folafola mai se laveaiga, lea na auina mai ia te au le faamafanafanaga sili. Ma e ui lava ina faanunununu ai nuu ese, ma mafaufau ai nuu i le mea e le aoga, ae peitai o le Atua o ‘Au, le Atua o Iakopo o lou olo maualuga; ma a ou tagi atu ia te Ia i le aso e i ai puapuaga, Na te laveaiina a’u [tagai Salamo 46:7; 50:15]; o lea ou te valaau ai i lo’u agaga, ma mea uma o loo i totonu ia te a’u, e faamanuia ma vivii atu i Lona suafa paia. Aua e ui ina ou puapuagatia i mea uma, ae [ou te] le atuatuvale; ua fememeai, ae le matua fememeai; ua sauaina, a e le tuulafoaiina; lafotuina i lalo, a e le fano.’ [Tagai 2 Korinito 4:8–9.]”10

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai itulau vii–xii.

  • Toe iloilo le faamatalaina o le falepuipui i Liperate, Misuri (itulau 383–85). A o e suesueina ma talanoaina lenei mataupu, mafaufau i tulaga na i ai le Perofeta a o ia tusia nei upu o loo tusi faamaumau i lenei mataupu. Toe iloilo le parakalafa lona tolu i le itulau 383. E faapefea e tala i le Perofeta i le Falepuipui i Liperate ona avea ma faataitaiga o lenei upu moni?

  • Suesue le parakalafa lona tolu i le itulau 386–87. E faapefea e tulaga faigata i nisi taimi ona “fafaguina o [tatou] agaga i se manatuaina paia”? O a ni auala e mafai ai e tofotofoga ma sauaga ona “fusia faatasi o [tatou] loto” i tagata o aiga ma uo? O a ni aafiaga na e maua e fesootai ma nei upu moni?

  • Na folafola mai e Iosefa Samita e leai se mea e tasi e mafai ona vavaeeseina o ia mai ona uso mai le alofa o le Atua (itulau 387). O a ni ou manatu po o lagona a o e mafaufau loloto i lenei faaupuga? O a ni auala e mafai ona vavaeeseina ai i tatou mai le alofa o le Atua? O a nisi o mea e mafai ona tatou faia e mafuta ai i le alofa o le Atua?

  • Faitau le parakalafa atoa mulimuli i le itulau 388. O a ni mea e mafai ona tatou faia e maua ai le filemu o loo ofoina mai e le Alii ia i tatou? O a ni mea e mafai ona e maua mai i le faamautinoaga a le Alii o puapuaga ma faigata o Iosefa Samita e “na o sina ituaso itiiti lava”?

  • Toe iloilo ia faamautinoaga a Iosefa Samita i le Au Paia e le mafai ona faia e fili o le Ekalesia se mea e taofia ai le mana o le Atua (itulau 388–89). Aisea e galo ai ia i tatou i nisi taimi lenei upu moni? O a ni mea e mafai ona tatou faia e manatua ai?

  • Suesue afioga a le Atua i le Perofeta i itulau 390–91. Pe faapefea ona suia o tatou olaga a o tatou manatuaina o tofotofoga e mafai ona oo mai ai ia i tatou aafiaga ma avea ai mo lo tatou lelei? O le a le uiga ia te oe o le iloa o le Faaola na oo ifo i lalo o mea uma? O le a lou manatu o le uiga o le ia “tumau ai pea i lou ala”?

  • Faitau le parakalafa mulimuli o le mataupu (itulau 391–92). Mafaufau i taimi na faamafanafanaina ai oe e le Agaga Paia i se taimi o faigata. E i ai ni ou aafiaga e talafeagai e faasoa atu?

Mau E Faatatau I Ai: Filipi 3:8–9; Mosaea 23:21–24; Alema 7:11; 36:3

Faamatalaga

  1. Tusi mai ia Iosefa Samita ia Isaac Galland, Mati 22, 1839, Falepuipui o Liperate, Liperate, Misuri, lomia i le Times and Seasons, Fep. 1840, i. 52; ua faaonaponei faailoga.

  2. Alexander McRae, upusii i le History of the Church, 3:257; mai se tusi mai ia Alexander McRae i le faatonu o le Deseret News, Oke. 9, 1854, Aai o Sate Leki, Iuta, lomia i le Deseret News, Nov. 2, 1854, i. 1.

  3. Mercy Fielding Thompson, “Recollections of the Prophet Joseph Smith,” Juvenile Instructor, Iulai 1, 1892, i. 398; ua faaonaponei faailoga.

  4. Tusi mai ia Iosefa Samita ia Ema Samita, Ape. 4, 1839, Falepuipui o Liperate, Liperate, Misuri; Beinecke Library, Yale University, New Haven, Connecticut; kopi i le Church Archives, O Le Ekalesia a Iesu Keriso o le Au Paia o Aso e Gata Ai, Aai o Sate Leki, Iuta. I lenei tusi, a ta’ua e le Perofeta lona faafalepuipuiina mo le sili atu i le lima masina, o loo ia faitauina taimi na faafalepuipui ai o ia i Independence ma Richmond, Misuri, faapea foi ma Liperate.

  5. Na faafalepuipui Sidney Rigdon faatasi ma isi uso i le Falepuipui i Liperate i le aso 1 o Tesema, 1838. E ui i lea, i le aso 25 o Ianuari, 1839, e tusa ma le lua masina a o le i tusia e le Perofeta lenei tusi, na tuuina atu le faatagaga ia Sidney e tuua ai le falepuipui pe a totogiina aua na matua tigaina lona ma’i. Aua na fefe o ia e aluese mai le falepuipui ona o le faaauau pea o mea taufaamata’u, o lea na filifili ai o ia e tumau i le falepuipui seia oo i le aso 5 o Fepuari.

  6. History of the Church, 3:289–91; ua faaonaponei faailoga ma le kalama; ua suia le vavaega o parakalafa; mai se tusi mai ia Iosefa Samita ma isi ia Edward Partridge ma le Ekalesia, Mati 20, 1839, Falepuipui o Liperate, Liperate, Misuri; o vaega o lenei tusi na mulimuli ane faaopoopo i le Mataupu Faavae ma Feagaiga ma avea ma vaega 121, 122, ma le 123.

  7. History of the Church, 3:291, 293; ua faaonaponei le sipelaga; ua suia le vavaega o parakalafa; O nai suiga laiti i faailoga, mataitusi tetele, ma le kalama na faia e saunia vaega o le tusi a le Perofeta mo le faasalalauina i le Mataupu Faavae ma Feagaiga. O le mea lea o loo i ai ni nai eseesega laiti i le Mataupu Faavae ma Feagaiga 121, 122, ma le 123, ma mea ua tuuina atu i lenei mataupu.

  8. History of the Church, 3:296–98; ua faaonaponei le sipelaga ma faailoga.

  9. History of the Church, 3:300–301; ua suia le vavaega o parakalafa.

  10. History of the Church, 3:328–29; ua suia le vavaega o parakalafa; mai le “Extract, from the Private Journal of Joseph Smith Jr.,” Times and Seasons, Nov. 1839, i. 7–8.

Joseph in Liberty Jail

A o faafalepuipuiina le Perofeta o Iosefa Samita i le Falepuipui o Liperate, sa ia tusia ni tusi i lona aiga ma le Au Paia, ia na tautino atu ai e ia le mana o le Atua e manumalo ai i le leaga ma tu atu ai mo Ana Au Paia e “faavavau faavavau lava.”

Savior before Pilate

O Le Faaola i luma o Pilato, “Na oo ifo i lalo o mea uma le Atalii o le Tagata; pe sili ea oe i lo ia?”