Mataupu 23

“A o Outou e Ao Ina Outou Faamagalo Atu”

O le faamagalo atu o isi, tatou te faasaolotoina ai i tatou lava mai le avega mamafa o le inoino ma saunia ai i tatou lava mo le ola e faavavau.

Mai le Soifuaga o Siaosi Alapati Samita

I le 1897, a o talavou lava, sa auina atu ai Siaosi Alapati Samita i le Vaegaau o le Puipuiga a le Malo o Iuta. I le faamalosiauga a nisi o ana uo, sa ia tauva ai i se tofi filifilia i le Vaegaau, peitai i le gasologa o vaiaso seia oo i le palota, sa amata faasalalauina ai e se leoleo a le suitauva ni faamatalaga sese e tuua’ia ai Siaosi Alapati Samita i ni faiga e le tonu. O le taunuuga, sa faia’ina Satini Samita i se palota sa ia manatu e tatau ona malo ai. O le mea na atili ai ona faigata lea tulaga, o le tagata sa faasalalauina nei faamatalaga sese o se tasi o ana uo.

E ui ina sa taumafai o ia e faagalo, ae o lea mea sese sa tumu ai le loto o Siaosi Alapati Samita i le inoino. Sa alu o ia i le lotu i le Aso Sa na sosoo ai, ae na te lei lagona e sa’o lona tagofia o le faamanatuga. Sa tatalo o ia mo se fesoasoani ma sa iloa ai, e tatau ona ia salamo i le ita lea sa ia lagonaina. Sa tonu ia te ia e alu e sue lana uo la te faalelei.

Sa alu sa’o Siaosi Alapati Samita i le ofisa o le tamaloa ma fai atu i se leo malu, “Lo’u uso e, ou te manao ia te oe e te faamagalo mai au i lo’u ita ia te oe i nai vaiaso ua mavae.”

Na vave ona faamaluluina le loto o lana uo. “Uso Samita, e te le manaomia se faamagaloga,” na ia fai ane ai. “O a’u lea e manaomia le faamagaloga mai ia te oe.” Sa la faatalofa, ma sa faatumauina ai mai iina le avea ma uo lelei.¹ [Tagai fautuaga 1 i le itulau e 259.]

I nai tausaga mulimuli ane, sa avea ai e Siaosi Alapati Samita le faamagalo atu o se tasi o ana sini i le olaga atoa ina ua ia tusia i lana lava tautinoga: “O le a ou le faamanu’aina lava ma le iloa se lagona o se tasi, e oo lava i se tasi sa ono sese mai ia te au, ae o le a ou faia i ai mea lelei ma avea o ia ma a’u uo.²

Sa matauina e se uo a Peresitene Samita o le tomai e faamagalo atu ai, o se tasi moni lava o ona uiga taua e iloa ai o ia: “E moni lava sa ia faamagalo atu i tagata uma. Sa Ia silafia i lona soifuaga atoa le poloaiga a le Atua: O le a faamagalo e le Atua, ē na te loto e faamagalo. A o tatou, e tatau ona faamagalo atu i tagata uma. Sa mafai ona ia faia lena mea, ona tuu atu lea o le mataupu i le Atua. A o ia faamagalo atu, ou te talitonu sa ia faagaloina. Afai e mafai e se tasi e faamagalo atu ona faagalo, ona moni ai lea, o lena tagata e uiga ese, ioe, o se tagata lava o le Atua!”³

Aoaoga a Siaosi Alapati Samita

A tatou malamalama i le talalelei a Iesu Keriso, o le a atili ai ona tatou fuafua e faamagalo i isi.

E tasi se mea e mafai ona tatou taumafai e atiina ae, o le natura e faamagalo e le tasi le isi o tatou sese. O le agaga o le faamagalo atu o se amioatua a aunoa ma lena, o le a tatou le iloa atoatoa ia faamanuiaga ua tatou faamoemoe e maua.⁴

E le malamalama tagata o le lalolagi … i lagona o le Faaola i le mafatia o Lona agaga, sa Ia alaga atu ai i Lona Tama Faalelagi, ia aua nei ta’usalaina ma faaumatia i latou sa aveesea Lona soifua faaletino, ae sa Ia fai mai:

“… Lo’u Tama e, ia e faamagaloina atu ia te i latou; aua ua latou le iloa le mea ua latou faia.” (Luka 23:34.)

O le uiga lena e tatau ona i ai i tagata uma o le Ekalesia a Iesu Keriso o le Au Paia o Aso e Gata Ai. O le uiga lena e tatau ona i ai i atalii ma afafine uma o le Atua, e foliga mai ia te au, afai latou te malamalama atoa i le ata o le faaolataga. … O le ita ma le inoino i o tatou loto, o le a tatou le maua ai le filemu ma le fiafia.⁵

Ua tuuina mai e le Alii ia i tatou faamatalaga sili, ua faaalia mai Lona mafaufau ma Lona finagalo ia i tatou, ua aoaoina i tatou i mea e le o iloa e le lalolagi, ma, e tusa ai ma faamatalaga ua tatou maua, ua Ia tuu mai ia i tatou le tiutetauave ma ua faamoemoeina i tatou e ola i se olaga e maualuga atu, se olaga e sili ona lelei nai lo i latou e le malamalama atoa i le Talalelei e pei o i tatou. O le agaga o le faamagalo atu o se mea e mafai ona aoga pe a matua faaaogaina atoatoa e i latou lava. … E tatau ona tatou oo i se tulaga masani lea e mafai ona tatou faamagalo i o tatou uso.⁶ [Tagai fautuaga 2 i le itulau e 260.]

A tatou faamagalo atu i isi, ua tatou faaalia le agaga faafetai mo le faamagaloga e tuuina mai e le Tama Faalelagi ia i tatou.

E faatatau i lenei mataupu [o le faamagalo atu o isi], o le a ou faitauina atu ni nai fuaiupu mai le mataupu e sefuluvalu o le Mataio, e amata mai i le fuaiupu e luasefulutasi. E foliga mai sa faatasi le Au Aposetolo ma le Matai i le taimi lea, ona alu atu lea o Peteru ma fai atu ia te Ia:

“Le Alii e, e agaleaga mai faafia ea lo’u uso ia te au, ma ou faamagalo ia te ia? Seia atu fitu ea?

“Ua fetalai atu Iesu ia te ia, Ou te le fai atu ia te oe, seia atu fitu, a ia fitugafulu ni fitu.” [Mataio 18:21–22.]

Na tuuina mai e le Faaola se faataoto … e uiga i ni alii se toalua. O se tasi o i la’ua sa aitalafu i se vaega tupe tele, ma sa sau o ia ia te ia ma fai atu i ai, ua na le mafai ona totogi lana aitalafu, ma fesili atu ina ia mafai ona faamagalo lana aitalafu. Sa tuia le loto o le matai o lena auauna i le alofa, ma sa ia faamagalo i lana aitalafu. Sa vave ona alu atu i fafo lenei alii ua faamagaloina ma maua ai se auauna, o loo aitalafu ia te ia i sina tupe itiiti, ma sa ia faamalosia o ia ina ia totogi atu. Sa le mafai e le tagata mativa lenei ona totogi, ma sa ia fesili atu foi pe mafai ona faamagalo lana aitalafu. Peitai, e lei faamagaloina; nai lo lena, sa lafoina o ia i le falepuipui e lē ua uma ona faamagalo e lona alii. Ina ua vaai atu isi auauna i le mea ua tupu, ona latou o atu lea i le matai o lenei tagata ma ta’u atu i ai, ma sa ita o ia ma tuuina atu o ia i e faataumaoi, seiloga na te tauia mai ana mea uma. Sa lei lava lona malosi faaleagaga e talisapaia ai le alofa mutimutivale na faaali atu ia te ia, ma ona o le leai o se alofa moni o lea na gau uma ai ana mea. [Tagai Mataio 18:23–35.]

E i ai taimi tatou te fetaiai ai ma nai faigata laiti e tulai mai, ma galo ai ia i tatou le onosai o lo tatou Tama i le Lagi o loo faaalia mo i tatou, ae tatou faateleina i o tatou loto ni nai mea po o ni tala iti atonu e faia e lo tatou uso po o le tuafafine e faatatau ia i tatou. Tatou te le o ola pea i lena tulafono e finagalo le Alii ia tatou tausia e tusa ai ma nei mataupu. E galo ia i tatou le poloaiga na Ia tuu atu i Aposetolo i upu o le tatalo, lea na poloaiina ai i latou ia tatalo ina ia faamagalo mai i a latou agasala e pei ona latou faamagalo atu i e agaleaga mai [tagai Mataio 6:12]. Ou te manatu e tele ni mea e tatau ona tatou aoaoina e uiga i lenei mea. Tatou te lei tausia atoatoa mea ua poloaiina ai i tatou e lo tatou Tama Faalelagi.⁷ [Tagai fautuaga 3 i le itulau e 260.]

O le filifili e aua nei ita, e mafai ona tatou faamamaina ai mai o tatou loto lagona uma o le agaleaga.

Ua aoaoina i tatou e alolofa i ē ita mai, ma tatalo mo i latou o ē tuua’ifua mai ma upuleaga ia i tatou [tagai Mataio 5:44]. … A fetuuina oe, aua e te toe fetuu atu. A upuleagaina outou e isi, alofa i ai, ma tatalo mo i latou. Manatua le faataitaiga a le Matai Sili, o lē, ina ua faatautau i luga o le laau mataga, sa fetalai, “Lo’u Tama e, ia e faamagaloina atu ia te i latou aua ua latou le iloa le mea ua latou fai.”⁸

O nisi taimi e faatiga ai e se uso e i ai le pule, se tasi o tagata o le Ekalesia, atonu na te lei iloaina, ma sa tiga gugu ai lava lena atalii o lo tatou Tama, nai lo le faia o le mea sa poloai mai ai le Alii, o le alu lea i le tagata na tiga ai ma fai atu ma le agalelei ia te ia lagona o lona loto, ma avatu ai i lena uso se avanoa e fai atu ai ia te ia, “Ua ou sese i le faatiga ia te oe, ma ou te manao ia e faamagalo mai ia te au.” O le taunuuga, i nisi taimi, tatou te maua ai se lagona o le faigata ona faamagalo atu, e uunaia e Satani.⁹ [Tagai fautuaga 4 i le itulau e 260.]

E leai ni o tatou lagona le fiafia i se tasi o o tatou uso a tagata; e leai se taimi e fai ai. Afai latou te le malamalama ia i tatou, ta’u sese i tatou, ma sauaina i tatou, e tatau ona tatou manatua ua i ai i latou i aao o le Alii. … A tatou aai la ma feinu i le faamanatuga o le Talisuaga a le Alii, … e ao ina tatou faamamaina mai o tatou loto ia lagona leaga uma o le tasi i le isi o o tatou uso ma tuafafine, e le auai i la tatou tapuaiga.¹⁰

O le faamagalo atu o isi, e saunia ai i tatou lava mo le malo selesitila.

Ia tofu ola i tatou i se ala e le maua ai i tatou i le mana o le tiapolo. Afai o i ai ni o outou feeseeseaiga, afai sa i ai ni feeseeseaiga i lo oulua va ma ou tuaoi, ia vave ona faaleleia, i lalo o le uunaiga a le Agaga o le Alii, ina ia oo mai le taimi ua mafai ona oulua saunia faapea foi fanau e mulimuli mai, mo le mauaina o se tofi i le malo selesitila.¹¹

I le Tusi o Mataupu Faavae ma Feagaiga tatou te maua ai se mau e faatatau i lenei mataupu o le faamagalo atu, lea ua tuu mai ai e le Alii se poloaiga; o loo maua i le vaega e onosefulu ma le fa, ma e faasino ia i tatou i nei aso. E faitauina faapea:

“… E moni ou te fai atu ia te outou, o a’u le Alii, ou te faamagaloina agasala a e ta’uta’u a latou agasala i o’u luma ma ole mai ia faamagaloina, a ē le’i agasala e i’u i le oti.

“Sa sailia o’u soo e fai pona o le tasi i le isi i aso anamua, a e lē faamagalo atu le tasi i le isi i o latou loto; ma ona o lenei mea leaga na puapuagatia ma aoa’iina tiga ai i latou.

“O le mea lea, ou te fai atu ai ia te outou, e tatau ona outou faamagalo atu le tasi i le tasi; aua o lē le faamagalo atu i lona uso i ana solitulafono ua ta’usalaina i luma o le Alii, aua e i ai pea ia te ia le agasala sili ona mamafa.”

O le fuaiupu na mulimuli atu nei ona faitau, ou te fia faamamafaina.

“O a’u, le Alii, e faamagalo atu i e ou te loto ia faamagaloina, a o outou e ao ina outou faamagaloina atu i tagata uma.

“E tatau foi ona outou faapea i o outou loto, ia faamasino le Atua i lo ta va, ma tauia ia te oe e tusa ma au galuega.” [MFF 64:7–11.]

Afai e faapena o tatou olaga, pe a tatou feeseesea’i ma o tatou tuaoi, pe afai, nai lo le tatou nonofo ma faamasino le tasi i le isi, e mafai ona tatou talosaga atu ma le faamaoni ma le faaeteete i lo tatou Tama i le Lagi ma fai atu, “Le Alii e, faamasino mai lo ma va ma lo’u uso; ua e silafia lo’u loto; ua E silafia ou te le o lagonaina so’u ita ia te ia; fesoasoani mai ia i ma’ua ia tutusa la ma vaai, ma aumai ia i ma’ua le poto ia mafai ai ona ma fegalegaleai o le tasi ma le isi i le amiotonu,” o le a matua itiiti ni feeseeseaiga, ma oka se olioli ma faamanuiaga o le a tatou maua! Peitai, e tulai mai i lea taimi ma lea taimi nai faigata laiti lea e faalavelaveina ai le sologa lelei o o tatou olaga i aso taitasi, ma tatou lē fiafia ai lava aua ua tatou taliaina se uunaiga e lē tusa ai, ma leai se alofa moni. …

… “O lenei, ou te tautala atu ia te outou e uiga i o outou aiga; afai e fasi e tagata outou, po o o outou aiga, a e tou te talia ma le onosai ma lē faifai atu ia te i latou, pe saili e taui ma sui, o le a tauia outou;

“A e afai tou te le talia i le onosai, o le a taulia o se mea sa tatau ona oo ia te outou.” [MFF 98:23–24.]

O le upu foi lea a le Matai ia i tatou. Afai tatou te ola e tusa ai ma lenei tulafono, o le a tatou tuputupu ae i le alofa tunoa ma le malosi i lea aso ma lea aso, ma alofagia e lo tatou Tama Faalelagi. O le a faateleina le faatuatua i loto o a tatou fanau. O le a latou alolofa ia i tatou mo le amiotonu ma le amiosa’o i o tatou olaga, ma o le a latou olioli ua fananau mai i ni matua faapena. Ou te fai atu ia te outou, e lei tuuina mai lenei poloaiga i se ala lē faavaea; aua na tautino mai e le Alii Na te le tuuina mai se tulafono ma le le magafagafa, ae o tulafono uma ua tuuina mai ina ia tatou tausia ma ola ai.

O le a na o sina taimi puupuu tatou te i ai i lenei lalolagi. O le aupito itiiti ma le malosi o i tatou o le a na ona saunia mo le isi olaga, ma ae tatou te lei oo atu i le mamalu o lo tatou Tama ma olioli ai i faamanuiaga ua tatou faamoemoe e maua e ala i le faamaoni, e tatau ona tatou ola i tulafono o le onosai, ma faatino le faamagalo atu o i latou o e agaleaga mai ia i tatou, ma aveesea mai o tatou loto lagona uma o le inoino ia i latou.

“O lenei foi, afai o le a fasi faalua outou e lo outou fili, ma outou le faifai i lo outou fili, a e onosai ai, ona sautuaselau ai lea o lo outou taui.

“O lenei foi, afai o le a ia toe fasi faatolu ia te outou, a e tou te onosai ai, ona faaluaina ai lea o lo outou taui i le sautuafa.” [MFF 98:25–26.] …

Talosia ia nofo le Agaga o le Alii i o tatou loto, ma ia tatou faamagalo atu i tagata uma e pei ona Ia poloai mai, faamagalo, e le na o o tatou laugutu ae mai le ta’ele o o tatou loto, ia agaleaga uma atonu e faia mai ia i tatou. Afai tatou te faia lenei mea i o tatou olaga, o le a tumau faamanuiaga a le Alii i o tatou loto ma o tatou aiga.¹² [Tagai fautuaga 5 i le itulau e 260.]

Fautuaga mo Suesuega ma leAoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai i itulau e v–vii.

Mafaufau i le tala o i le itulau e 253 ma faitau le 3 Nifae 12:22–24. Aisea e te manatu ai ua poloai mai le Alii ia tatou faalelei ma o tatou uso ma tuafafine a o lei mafai ona tatou o atu ia te Ia?
I itulau e 253–54 o loo faamatala mai e Peresitene Samita e tatau ona fesoasoani lo tatou iloa o le ata o le faaolataga ia tatou faamagalo atu ai atili. Ua tatau i se a? E faapefea ona tatou “oo i se tulaga” (itulau e 254) e mafai ai ona tatou faamagalo atu i isi?
A o e suesue i le vaega o loo amata i le itulau e 254, manatu i se taimi na faamagalo ai oe e le Tama Faalelagi. Aisea e te manatu ai o le lē faamagalo atu i isi o le a tatou le agavaa ai mo le faamagaloga o loo tatou sailia?
Faitau i le parakalafa atoa lona lua o loo i le itulau e 255. O le a le mea tatou te faatuai ai ona faalelei ma se taitai o le Ekalesia po o se isi tagata ua faatiga ia i tatou ma le iloa po o le le iloa foi? O le a se mea e mafai ona tatou faia e faatoilalo ai nei faigata?
Toe iloilo le vaega mulimuli o aoaoga (itulau e 255–59). E faapefea e lo tatou naunautai e faamagalo atu ona saunia ai i tatou mo le malo selesitila? O faapefea ona faamanuiaina o tatou aiga pe a tatou faamagalo atu i isi?

Mau E Faatatau I Ai: Mataio 5:23–24, 38–48; 6:12, 14–15; 7:1–5; 18:15; 1 Nifae 7:16–21; Mataupu Faavae ma Feagaiga 42:88

Fesoasoani faafaiaoga: “A fesili se tagata i se fesili, mafaufau e valaaulia isi e tali ae aua e te taliina. Mo se faataitaiga, e mafai ona e fai atu, ‘O se fesili manaia. O le a se manatu o le isi vaega?’ po o le ‘E i ai se isi e mafai ona fesoasoani mai i le fesili lea?’” (O Le Aoao Atu, E Leai Se Isi Valaauga E Sili Ai, 70).

“Manatua le faataitaiga a le Matai Sili, o lē, ina ua faatautau i luga o le laau mataga, sa fetalai, ‘Lo’u Tama e, ia e faamagaloina atu ia te i latou aua ua latou le iloa le mea ua latou fai.’”

“Afai sa i ai ni feseeseaiga i lo oulua va ma ou tuaoi, ia vave ona faaleleia, i lalo o le uunaiga a le Agaga o le Alii.”