Mataupu 9

Tatala atu Lou Agaga i le Alii i le Tatalo

E ala i tatalo faaletagata lava ia ma faaleaiga, e mafai ai ona tatou lagona le uunaiga a le Tama Faalelagi i o tatou olaga ma i o tatou aiga.

Mai le Soifuaga o Siaosi Alapati Samita

Sa avea le tatalo ma se vaega taua o le aiga sa ola ae ai Siaosi Alapati Samita. “O tatalo faalilolilo ma faaleaiga, sa faia e tagata taitasi o le aiga,” na ia saunoa ai. “Sa vave ona ou aoaoina i le olaga, o le a tali mai e le Alii ia tatalo aua sa Ia taliina a’u tatalo, ma e tele auala na Ia aumaia ai ia te au ia faamaoniga o Lana tausiga alofa.”¹

E oo lava i le faaiuiuga o lona soifua, sa manatua lava ma le alofa e Peresitene Samita le aoaoina o ia e lona tina, o Sara Fara Samita, e tatalo:

“Sa aoaoina au i tulivae o se tina o le Au Paia o Aso e Gata Ai. O se tasi o uluai mea ou te manatuaina, ina ua ia uuina lo’u lima ma ta’ita’i au i le falealuga. O totonu o le potu, sa i ai moega e lua, o le moega sa momoe ai o’u matua, ma se tamai moega uili i le isi itu. E mafai ona ou manatuaina e pei lava o ananafi. Ina ua ma taunuu i le falealuga, sa saofai o ia i autafa o si o’u tamai moega uili. Sa ia faatootuli a’u i ona luma. Sa ia faapiilimaina au ma taofi i ona lima, ma aoao mai ia te au la’u uluai tatalo. O le a le galo lava ia te au. Ou te le manao e galo. O se tasi o manatua aupito matagofie i lo’u olaga, o se tina agelu sa nofo i autafa o lo’u moega ma aoao mai a’u e tatalo.

“O se tatalo faigofie lava, ae … o lena tatalo sa tatalaina ai mo a’u pupuni o le lagi. O lena tatalo na faaloaloa mai ai ia te au le aao o lo’u Tama i le lagi, aua sa ia faamatala mai ia te au le uiga ina ia malamalama ai se tamaitiiti laitiiti. Mai lava i lena aso seia oo mai i le taimi nei, e ui ua ou laasia pe tusa o le miliona ia maila i le lalolagi i fegalegaleaiga ma isi fanau a lo tatou Tama, ae o aso uma ma po uma, po o fea lava sa ou i ai, pe a ou alu i lo’u moega pe alafa’i mai ai foi, sa ou lagonaina lava lo’u latalata i lo’u Tama Faalelagi. E le o mamao ese o Ia.”²

I lona soifuaga atoa, sa faalagolago ai Peresitene Samita i le tatalo e le gata o se auala e latalata atili atu ai i le Atua, ae ole atu ai foi ia te Ia mo se fesoasoani i taimi e manaomia ai. I se tasi aso a o aau o ia i le Vasa Pasefika, i talaatu o le talafatai o Kalefonia, o le aafiaga lenei sa ia oo i ai:

“Sa faitaulia au o se tagata aau lelei tele ma sa ou matua fiafia lava i le taaloga. O le aso tonu lea, sa matua sua tutu’i ai le tai ma galuā. Ina ua ou tuua le apitagalu ae aau atu i le moana, sa ou puna atu i galu tetele a o faamalumalu mai ma faapalasi mai i o’u luga. Sa ou faamoemoe e taunuu atu i galu tetele i tua atu o galu fati, ma mafai ai ona ou taoto i lo’u tua ae tietie ai a o agai i luga ma lalo galu tetele ia.

“A o ou faatinoina lea taaloga, sa faafofoli mai se galu tele lava ma fati loa ae ou te lei faasa’oina la’u tu ina ua maea la’u maulu i le galu ua maea atu. Sa maua a’u e le galu na sosoo ai ma togi a’u i le alititai o le sami. Sa ou lagonaina le toso atu o a’u e aave o le sami. I le taimi lava lea sa vave ai le saputu mai o le tele o galu ma sa le mafai ai ona faasa’o la’u tu e sauni ai e maulu atu mai le tasi galu i le isi. Na ou iloa ua vave lava ona alu ese atu lo’u malosi, ma manaomia ai lo’u saili o se auala e fesoasoani ia te a’u. A o ou tietie agai atu i le tumutumu o se galu tele lava, sa ou vaaia ai ua latalata mai ni pou o se tamai uafu, ma ou manatu ifo ai o sa’u taumafaiga malosi tele i tua atu o lo’u malosi faaletagata o le a mafai ai ona ou oo atu i le saogalemu o ia pou ma mafai ai ona ou laveaia lo’u ola.

“Sa ou talosaga leleoa atu i lo’u Tama Faalelagi ina ia tuuina mai ia te a’u le malosi e taunuu atu ai i lo’u faamoemoega. A o toso atu a’u e le galu latalata lava i le uafu, sa ou aapa atu ai ma fusi i se tasi o pou. Sa lilofia ia pou i sisi maamaai lanu paauli, ma a o ou fusi mau atu o’u lima ma o’u vae i le pou ia ou saogalemu ai, sa lavelavea lo’u fatafata, o’u vae ma ogavae. Sa ou pipiimau pea a o mafai lava ona ou onosaia le tiga ma vaavaai se galu fati lelei o agai mai ia te a’u ia mafai ona ou faapalasi atu i ai ma tietie agai atu ai i se pou latalata i le matafaga. I taimi taitasi faatasi ma se tatalo i lo’u loto sa ou taumafai ai e malaga faasolosolo mai lea pou agai i lea pou faatasi ai ma le fesoasoani a galu lē fati.

“Sa faagesegese ae sa mautinoa lava faatasi ai ma le faigata tele, sa ou agai atu ai i uta lea e papa’u ai le vai e mafai ai ona ou savali i le matafaga. Ina ua ou taunuu i le saogalemu o le oneone mafanafana, sa ou pa’ū ai, i lo’u lelava tele. Sa matuai ou vaivai ma toetoe lava a ou malemo, sa le mafai ona ou savali i le fale sei vagana ai ua ou malolo mo sina taimi. I lo’u taotooto ai i le oneone i lona mafanafana ma le saogalemu, sa ou mafaufau ai i le aafiaga matautia sa faatoa ou sao mai ai ma sa faatumulia lo’u loto i le faafetai ma le faamaualalo ua mafai e le Alii … ona faasaoina lo’u ola.”³ [Tagai i le fautuaga 1 i le itulau e 103.]

Aoaoga a Siaosi Alapati Samita

O le tatalo e mafai ai ona tatou talanoa i lo tatou Tama Faalelagi e faapei o loo i ai o Ia.

O se faamanuiaga matagofie tatou te olioli ai i nei taimi o le ātu ma le faaletonu, o le lagona ai o le mautinoa o le taitaiga faalelagi, le i ai o le faatuatua a’ia’i i se Atua faaletagata lava ia o Lē e naunau mai ia i tatou ma o Lē foi e faafofoga ma tali mai ia tatou tatalo.⁴

I ni nai tausaga ua mavae … sa ou faalogo ai i se tamaitiiti e iva tausaga le matua, o se e matuaoti, o faatopetope atu i le falemai, lea na ta’u mai ai i se suesuega e tatau ona faia sona taotoga e aunoa ma le faatuai. Sa nonofo o ia ma ni uo sa ia maua ai se mea e nofo ai. Sa aoao e lona tama ma lona tina o ia, (a o ola i la’ua) e tatalo; o lea, ina ua sau o ia i le falemai, o le mea sa ia manao ai o le Alii ia fesoasoani ia te ia.

Sa tonu i fomai e faia se feutagaiga. Ina ua toso atu o ia i le potu tipitipi, sa ia tilotilo solo ma iloa ai tamaitai tausi soifua ma fomai o loo talanoa e uiga i lona tulaga. Sa ia iloaina e matuia, ona ia fai atu lea i se tasi o i latou, a o latou sauniuni e fai lona tui faagase: “Fomai, a o lei amataina le taotoga, pe le mafai ea faamolemole ona e tatalo mo au?”

Sa fai si maasiasi o le fomai, ma sa ia fai atu lana ‘alofaga, “E le mafai ona ou tatalo mo oe.” Ona fesili lea o le tamaitiiti i isi fomai, a o le tali lava lena.

Na iu ina tupu se mea ofoofogia tele; fai mai lenei tamaitiiti, “Afai e le mafai ona outou tatalo mo au, e mafai la faamolemole ona faatali se’i ou tatalo mo a’u lava ia?”

Sa latou aveesea le ieafu, ona ia tootuli lea i luga o le laulau tipitipi, ifo lona ulu ma faapea atu, “Le Tama Faalelagi e, ua na o au o se tamaitiiti ua matuaoti. Ua ou matua ma’i lava. Pe le mafai ea faamolemole ona e faamalolo ia te au? Faamanuia nei alii o le a faia le taotoga ina ia latou faia sa’o. Afai e te faamaloloina a’u, o le a ou taumafai e ola e avea ma se tagata lelei. Faafetai, Tama Faalelagi, mo le faamaloloina o au.”

Ina ua uma lana tatalo, sa taoto o ia i lalo. Sa faatumulia mata o fomai ma tausi soifua i loimata. Ona ia fai atu lea, “Ua ou sauni.”

Sa faia le taotoga. Sa toe ave le tamaitiiti i lona potu, ma ina ua mavae ni nai aso, sa latou aveeseina o ia mai le falemai, ua toeitiiti a malosi atoatoa.

Ina ua mavae ni nai aso talu ona mae’a, sa i ai se alii na faalogo i le mea na tupu ma alu ai i le ofisa o se tasi o fomai tipitipi ma faapea atu, “Faamatala mai e uiga i le taotoga sa outou faia i ni nai aso talu ai—le taotoga o se tamaitiiti.”

Sa fai mai le fomai tipitipi, “E toatele tamaiti sa ou faia taotoga.”

Sa toe fai atu lea alii, “Le tamaitiiti lea sa manao i se tasi e tatalo mo ia.”

Sa fai atu le fomai ma le matua faaeteete, “Sa i ai se tamaitiiti faapena, ae ou te le iloa, ou te manatu e paia tele e le tatau ona ou talanoa ai.”

Fai mai lea alii, “Fomai, afai e te faamatala maia, o le a ou taulimaina ma le faaaloalo; ou te fia faalogo i ai.”

Ona faamatala lea e le fomai o le tala e pei ona ou toe faamatalaina i i, ma toe faapea mai: “Ua fiaselau tagata ou te faia taotoga, o alii ma tamaitai sa manatu sa i ai lo latou faatuatua e faamaloloina ai; peitai, ou te lei lagonaina lava muamua le faatasi mai o le Atua vagana ai ina ua ou tu i luga a’e o lena tamaitiiti ma ou lagonaina ai. Na tatala e lena tamaitiiti ia pupuni o le lagi ma talanoa atu i lona Tama Faalelagi e faapei ona talanoa faafesagai ma se isi. Ou te fia fai atu ia te oe, ua avea au ma se tagata sili atu ona o lena aafiaga na ou tu ai ma faalogo i se tamaitiiti o talanoa i lona Tama i le lagi e pei lava o i ai.”⁵ [Tagai fautuaga 2 i le itulau e 103.]

O lea ia tatou ola ai ia oo ina tatou tootutuli i po ma taeao uma e tatalo, a tatou punonou i luma o le Atua i le loto faafetai, o le a i ai ia i tatou le mana e tatala ai pupuni o le lagi ina ia faafofoga mai ai le Atua ma tali mai i a tatou tatalo, ma o le a tatou iloa ai Na te taliaina i tatou.⁶

Afai tatou te ola latalata i lo tatou Tama Faalelagi, o le a musuia i tatou ia iloa le mea e tatalo atu ai.

A o talavou lo’u tama, sa [toeitiiti] a uma le ola o lo’u tama i leVaitafe o Provo. … Sa uunaia lona tama, lea sa i le Aai o Sate Leki, e alu i se potu ua uma ona vaetofia mo tatalo. Sa ia … tootuli i lalo … ma faapea atu, “Le Tama Faalelagi e, ua ou lagonaina e i ai se mea matuia o faaletonu i lo’u aiga i Provo. Ua e silafia e le mafai ona ou mafuta atu ia i latou i o ma ou i ai foi iinei. Le Tama Faalelagi e, ia e faasaoina ma malupuipuia i latou. …”

I le taimi a o tatalo o ia, toetoe lava o le taimi lea aua sa mafai ona iloa ina ua siaki le taimi, sa pa’ū ai lo’u tama i le vaitafe. O le taimi o tafega. Sa taufai toulu ifo laupapa ma ma’a mai le vanu, ma sa leai se mea na te mafaia. Sa vaaia e i latou sa latalata ane le faalavelave, ae sa le mafai ona āu atu i ai. O le aave o le vai e leai se tasi e mafai ona ola ai. Sa na ona latou tutu ai lava ma le matata’u. Sa faia e tamā mea uma na te mafaia ia ēa ai lona ulu i luga o le vai, peitai sa felafoa’i solo o ia i luga ma lalo ma patatū i maa ma laau. Na faafuasei ona sii a’e o ia e se galu mai le vai, ma togi atu i le pa’umatu. O se tali tuusao i … tatalo.⁷

E ao lava ona tatou gauai atu i a tatou tatalo faalilolilo. E ao lava ina tatou matua ola latalata i lo tatou Tama Faalelagi, a oo ina tatou ifo atu i Ona luma e mafai ona tatou iloa e faamalieina o Ia i mea o le a tatou ole atu ai, ma afai e le tuuina mai i le ala tatou te ole atu ai, e mafai ona tatou iloa o le a tatou maua le faamanuiaga tatou te āiā i ai, ma o le a avea moni lava o se faamanuiaga.⁸ [Tagai fautuaga 3 i le itulau e 103.]

O le tatalo o se uunaiga mamana i o tatou olaga patino, o o tatou aiga, ma o tatou nuu.

Ua uma ona faamalamalama mai … e le Alii le auala e mafai ai ona tatou maua faamanuiaga e ala i le tatalo. E toatele tagata i le lalolagi latou te le iloaina ia faamanuiaga moni o le tatalo. O le tatalo o le mana. Ua i ai se uunaiga e foliga mai e na o ni nai tagata e malamalama i ai. …

… E toafia nisi o i ai i le Ekalesia latou te le iloaina ua ia te i latou le aia tatau, aia tatau moni, e tatalo ai i lo tatou Tama i le lagi, ma ole atu ia te Ia e aveese mai o latou faanoanoaga ae taitai atu i latou i le lotomalie ma le fiafia?⁹

O se mea uiga ese pe a i ai se tagata o le Ekalesia a Iesu Keriso o le Au Paia o Aso e Gata Ai e tau uunai e fai ana tatalo, ae e i ai foi nisi tagata e le tatalo faalilolilo ma leai foi ni tatalo faaleaiga. Ae, tatou te le maua le puipuiga e aumaia e le tatalo sei vagana ua tatou tatalo.¹⁰ [Tagai fautuaga 4 i le itulau e 103.]

Ou te fia faamamafa atu le mea lenei: Ou te faamoemoe i le Au Paia uma o Aso e Gata Ai o le a lē misi le faia o a latou tatalo, a latou tatalo faalilolilo ma a latou tatalo faaleaiga. O fanau e tausia i aiga e le faia ni tatalo faaleaiga ma ni tatalo faalilolilo, e tele faamanuiaga latou te le maua, ma ou te popole ona e tele taimi e tuua ai aiga e aunoa ma se tatalo ma aunoa ma faamanuiaga a le Alii, i le lotolotoi o le fememea’i o le lalolagi, ma le pisi ma le vavao; e le mafai ona tumau le fiafia o nei aiga. Ua tatou ola i se vaitaimi tatou te manaomia ai lo tatou Tama Faalelagi e faapei o se isi lava taimi na manaomia ai o Ia.¹¹

Aua e te aveesea mai ia te oe le mana o le Atua. Ia faatumauina i o outou aiga ia uunaiga o le tatalo ma le faafetai, ma ia tafe atu le lotofaafetai ia te ia o le pule o o tatou tagata ma o lē e foai mai ai mea lelei uma.¹²

Ia avea o tatou aiga ma nofoaga tumau o le tatalo ma le talisapaia ma le lotofaafetai. … Ia tatou tatalo mo alii ma tamaitai lelei o le lalolagi o ē o loo manaomia le Alii, ae le malamalama i lona naunau mai mo i latou. Tatalo mo … o tatou kovana, o o tatou pulenuu o aai, o alii e i ai uunaiga i upu fai i o tatou nuu ma alalafaga eseese, ina ia mafai ona latou faia mea o le a lelei atili ai ma fiafia i tatou uma, ma fiafia ai lo tatou Tama Faalelagi. O lo tatou avanoa lena. Ou te fai atu ia te outou, o le mana o le tatalo o se mea e le mafai ona fuaina.¹³

O tatalo faaleaiga e aumaia ai le lotogatasi i aiga.

O i tatou [o tagata o le aiga] o le a lē ioe faatasi i se mea i taimi uma; o alii o le a lē manatu i taimi uma e faapei o a latou ava ma e faapena foi a latou ava faapei o i latou, ae afai tou te tatalo faatasi, ma se manao moni ia lotogatasi, e mafai ona ou fai atu ia te outou, o le a outou ioe i mataupu taua uma lava.

Sa ou matauina … i luga o se laupapa faasalalau: “O le aiga e tatalo faatasi e tumau faatasi foi.” Ou te le iloa po o ai na tuuina iina, ae ou te manao e fai atu afai tou te mafaufau i ai mo sina minute, ona outou iloa lea e moni. Ou te apoapoai atu ia outou tatalo faatasi i le Alii, ma e lē o le uiga o la’u tala ia tau ina tatalo, ou te le manao e … fai atu ma toe fai atu faafia se mea, ae ia tatala o outou agaga i le Alii o ni tane ma ni tamā i o outou aiga, ma avatu a outou ava ma fanau e faatasi ma outou. Faia ia latou faatinoina foi. Ona oo mai ai lea i le aiga o se uunaiga e mafai ona e lagonaina pe a e alu i ai.¹⁴

I le avea ai o se tasi na poloai i ai le Alii e aoao atu, ou te aioi atu ai ia te outou ina ia faatulagaina lelei o outou fale. Aua le soona faaaoga ma le le amanaiaina le tele o mea. Aua nei taitaia outou i tuinanau ma vaivaiga o le lalolagi. Ia malupuipuia o outou aiga i soo se auala e mafai ai. Ia tuufaatasi i latou i le uunaiga o le tatalo. … Oka se mana o le tatalo, e tausisia ai i tatou i le auala i le ola e faavavau ma taitai atu ai i tatou i le malo selesitila!¹⁵ [Tagai fautuaga 5 i le itulau e 103.]

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai i itulau v–vii.

I le “Mai le Soifuaga o Siaosi Alapati Samita” (itulau e 93–95), matau le ala na uunaia ai Peresitene Samita i lona soifuaga atoa ona o ona uluai aafiaga i le tatalo. O a ni auala aoga e aoao ai le fanau e uiga i le mana o le tatalo?
Toe iloilole tala e uiga i le tamaitiiti e iva tausaga le matua (itulau e 95–96). Aisea e le pei ai a tatou tatalo i nisi taimi o se talanoaga faafesagai ma le Tama Faalelagi? Mafaufau po o le a le mea e mafai ona e faia i au lava tatalo ia lagonaina soo ai Lona faatasi mai.
A o e manatunatu i aoaoga a Peresitene Samita o loo i itulau e 97–98, mafaufau i se taimi sa e lagonaina ai le uunaia o oe e ole atu mo se mea i le tatalo. O le a sau tali i se tagata ua manatu e le tali maia ana tatalo?
Mafaufau i le saunoaga lea a Peresitene Samita, “Tatou te le maua le puipuiga e aumaia e le tatalo sei vagana ua tatou tatalo” (itulau 98). Na faapefea ona e lagonaina le mana ma le puipuiga a le tatalo? Mafaufau e faasoa atu lau molimau i le mana o le tatalo, ia i latou e te asia o se faiaoga o aiga po o se faiaoga asiasi.
Sa aoao mai e Peresitene Samita o le tatalo o le a “faatumauina i tatou i le ala i le ola e faavavau” (itulau e 102). Faamata aisea e moni ai lea tulaga? O a mea e mafai e aiga ona fai ia mautinoa ai latou te tatalo faatasi e le aunoa? Mafaufau po o le a se mea e mafai ona e fai ia avea ai le tatalo faaletagata lava ia o se vaega e sili ona anoa o lou olaga.

Mau E Faatatau I Ai: Mataio 6:7–13; 7:7–11; 2 Nifae 4:35; Alema 34:18–27; 37:37; 3 Nifae 18:20–21; Mataupu Faavae ma Feagaiga 88:63–64

Fesoasoani faafaiaoga: “O le tagata a’oa’o e tatau ona faia faatinoga. A oo ina taulai atu i le faiaoga, e avea ma fetu o le ata, na o ia lava e tautala, ma faia uma le gaoioiga, e toetoe lava ina a mautinoa o loo avea o ia ma faalavelave i le aoaoina o tagata o le vasega” (Asahel D. Woodruff, i le O Le Aoao Atu, E Leai Se Isi Valaauga e Sili Ai, 64).

“O se faamanuiaga matagofie tatou te olioli ai … o le lagona ai o le mautinoa o le taitaiga faalelagi, le i ai o le faatuatua a’ia’i i se Atua faaletagata lava ia o lē e naunau mai ia i tatou ma o lē foi e faafofoga ma tali mai i a tatou tatalo.”

“E ao lava ina tatou matua ola latalata i lo tatou Tama Faalelagi, a oo ina tatou ifo atu i Ona luma e mafai ona tatou iloa e faamalieina o Ia.”

“Ia malupuipuia o outou aiga i soo se auala e mafai ai. Ia tuufaatasi i latou i le uunaiga o le tatalo.”