Folasaga

Ua faatulagaina e le Au Peresitene Sili ma le Korama a Aposetolo e Toasefululua le faagasologa o Aoaoga a Peresitene o le Ekalesia e fesoasoani ia te oe ia loloto atili ai lou malamalamaaga i le talalelei toefuataiina ma faalatalata atu ai i le Alii e ala i aoaoga a perofeta o aso e gata ai. A o faaopoopo isi voluma i lenei faagasologa, o le a e faatupuina ai se faaputuga o tusi o punaoa o le talalelei i lou aiga. O voluma o lenei faagasologa ua mamanuina ia faaaoga mo lau lava suesuega faapea aoaoga mo le Aso Sa. E mafai ona fesoasoani ia te oe e saunia isi lesona po o tautalaga ma tali fesili e uiga i mataupu faavae o le Ekalesia.

Ua avatu i lenei tusi aoaoga a Peresitene Siaosi Alapati Samita, o le na avea ma Peresitene O Le Ekalesia a Iesu Keriso o le Au Paia o Aso e Gata Ai mai le 21 o Me, 1945, i le 4 o Aperila, 1951.

Suesuega Faaletagata Lava Ia

A o e suesueina aoaoga a Peresitene Siaosi Alapati Samita, ia saili ma le loto tatalo mo musumusuga a le Agaga. O fesili i faaiuga o mataupu taitasi o le a fesoasoani ia te oe e te malamalama i aoaoga a Peresitene Samita ma faaaoga ai i lou olaga. A o e suesueina nei aoaoga, atonu o le a e manao e te mafaufau pe faapefea ona e aoaoina atu i tagata o lou aiga ma uo. O lea faiga o le a faamalosia ai lou malamalama i mea e te faitauina.

Aoao Atu mai le Tusi Lenei

E mafai ona e faaaogaina lenei tusi e aoao atu ai i le fale po o le lotu. O le a fesoasoani ia te oe taiala nei.

Sauni e Aoao Atu

Saili i le taitaiga a le Agaga Paia a o e sauni e aoao atu. Suesue ma le loto tatalo le mataupu ina ia mautu ai lou malamalamaaga i aoaoga a Peresitene Samita. O le a faatele atili ai le faamaoni ma le mana e te aoao atu ai pe a uunaia oe lava ia i ana upu (tagai i le MFF 11:21).

Afai o loo e aoao atu se lesona a le Perisitua Mekisateko po o le Aualofa, e le tatau ona e tuu esea le tusi lenei pe saunia foi lesona mai nisi punaoa. Filifili ma le loto tatalo aoaoga mai le mataupu e te lagona o le a sili ona fesoasoani ia i latou e te faiaoga ai. I nisi mataupu e tele atu vaega o loo i ai nai lo mea e mafai ona e talanoaina i le taimi o le vasega. Tuu atu e faaauau pea felafolafoaiga lelei nai lo le taumafai e fai uma aoaoga.

Faamalosiau i tagata auai e suesue le mataupu a o le i faia le lesona ma o mai ma aumai le tusi. Afai latou te faia lena mea, o le a sili atu ona saunia i latou e auai i se talanoaga ma fefaamalamalamaa’i ai e le tasi le isi.

Folasia le Mataupu

A o e folasia atu le mataupu, ma a o faagasolo le lesona, taumafai e faatupuina se siosiomaga e mafai ai e le Agaga ona pa’i atu i loto ma mafaufau o i latou e te faiaoga ai. A amata le lesona, fesoasoani ia i latou e te faiaoga ai ina ia taulai atu i aoaoga o le mataupu. Ina ia faia o lea, e mafai ona e:

Faitau ma talanoaina le vaega ua faaulutala “Mai le Soifuaga o Siaosi Alapati Samita” i le amataga o le mataupu.
Talanoaina se ata po o se mau mai le mataupu.
Usu se viiga talafeagai.
Faasoa se aafiaga puupuu faaletagata lava ia e uiga i le autu.

Tatai Atu i se Talanoaga e Uiga i Aoaoga a Peresitene Samita

A o e aoao atu mai le tusi lenei, valaaulia isi e faasoa mai o latou manatu, faia fesili, ma aoao atu le tasi i le isi. O le a sili ona aoaoina i latou pe a latou auai i faatinoga o le lesona. O se auala lelei foi lea e fesoasoani ai ia i latou e maua faaaliga faaletagata lava ia. Ina ia faamalosiau e talanoa, faaaoga fesili i le faaiuga o mataupu. O nei fesili ua i ai faasinoga i vaega eseese i totonu o le mataupu e faailoa mai ai le vaega o aoaoga o loo faasino i ai. E mafai foi ona e atiina ae au lava fesili e faapitoa lava mo i latou o loo e faiaoga ai. Mo se faataitaiga, e mafai ona e fesili i tagata e auai pe faapefea ona latou faaaogaina aoaoga a Peresitene Samita i o latou tiutetauave o ni matua po o faiaoga o aiga po o faiaoga asiasi.

O vaega ia e filifili mai ai e te ono maua ai ni manatu faaopoopo:

Talosagaina tagata e auai e faasoa mai mea ua latou aoaoina mai a latou suesuega faaletagata lava ia o le mataupu. E ono fesoasoani le faafesootai o nisi o le vasega a o faagasolo le vaiaso ma talosagaina i latou e sauniuni e faasoa mai mea ua latou aoaoina.
Tofia tagata auai e faitau fesili filifilia mai le faaiuga o le mataupu (taitoatasi pe i ni vaega laiti). Talosaga ia i latou e saili aoaoga o i le mataupu e fesootai ma fesili. Ona valaaulia lea o i latou e faasoa mai o latou manatu ma lagona i le vasega.
Faitau faatasi ni saunoaga filifilia a Peresitene Samita mai le mataupu. Talosagaina tagata auai e faasoa mai faataitaiga mai tusitusiga paia ma mai o latou lava aafiaga e faapupula mai ai mea sa aoao mai e Peresitene Samita.
Talosagaina tagata auai e filifili se vaega e fiafia i ai ma faitau leleoa. Valaaulia i latou e faatasi i ni vaega taitoalua pe taitoatolu sa filifilia foi le vaega lena ma talanoaina mea na latou aoaoina.

Faaiu le Talanoaga

Aotele faapuupuu le lesona pe talosagaina ni tagata auai e toatasi pe toalua e faia. Faamalosiau ia i latou o loo e aoaoina e faasoa atu i isi mea ua latou aoaoina mai i aoaoga a Peresitene Samita. Molimau atu i aoaoga ua outou talanoaina. Atonu foi e te manao e valaaulia isi e faasoa mai a latou molimau.

Faamatalaga e faatatau i Punaoa o Loo Ta’ua i Lenei Tusi

O aoaoga a Peresitene Samita o i lenei tusi o upusii sao mai lava i punaoa eseese. O nei upusii ua faatumauina faailoga, sipelaina o upu, mataitusi tetele, ma le faaparakalafaina o loo i uluai punaoa sei vagana ai ua manaomia le faia o suiga faalefaatonu pe faalomitusi ina ia faamanino atili ai le faitauina. Mo lea mafuaaga, atonu o le a e matauina ai feeseeseaiga laiti i le tusi. Mo se faataitaiga, o le upu talalelei o loo i mataitusi laiti i nisi upusii ma mataitusi tetele i isi.

E le gata i lea, e masani ona faaaogaina e Peresitene Samita o upu faapei o le tamaloloa, tamaloa, po o le tagata e faasino i tagata uma, o alii ma tamaitai. E faaaoga soo lava e ia soānauna o le ia (he), lana/lona (his), ma leia (him) e faasino i itupa uma e lua. O se faiga masani lea i le gagana o lona vaitaimi. E ui i eseesega i nei tulafono o gagana ma faaaogaaga sili ona lata mai, o aoaoga a Peresitene Samita e faatatau lava i tamaitai ma alii.