Mataupu 24

Ola Amiotonu i Taimi Matautia

O lo tatou faamaoni i le talalelei, e mafai ai ona tatou maua le saogalemu mai mea matautia o o tatou taimi ma avea ai ma se uunaiga lelei i le lalolagi.

Mai le Soifuaga o Siaosi Alapati Samita

O le auaunaga a Siaosi Alapati Samita o se Pulega Aoao, na aofia ai le tele o le afa muamua o le seneturi e 20. O le vaitau lenei sa tele mea faafatiatamai ma le faasoesa na tutupu, e aofia ai le Pau Tele o le Tamaoaiga ma taua e lua o le lalolagi. O nei mala, faatasi ai ma le mea sa ia manatu o se tulaga fāi ifo lautele o le tauleleia i tagata, na mafua ai ona ta’ua soo e Peresitene Samita, “Ua i ai lenei lalolagi i se tulaga matautia.”¹ Na ia vaaia i mea na tutupu i le lalolagi le faataunuuina o valoaga e uiga i aso e gata ai, ma sa faatalitonuina o ia na o le pau le faamoemoega mo le filemu i le lalolagi, o le usitai lea i tulafono a le Atua. I le ogaoga o le Taua Muamua a le Lalolagi, sa ia lapatai mai ai, “O le a le uma le taua ma o le a le muta lava le feteenai i lenei lalolagi seia vagana ua salamo le fanau a tagata i a latou agasala ma liliu atu i le Atua ma auauna atu ia te ia ma tausi ana poloaiga.”²

I le lotolotoi o nei taimi faigata, na maua ai e Peresitene Samita e toatele tagata ua lotovaivai. Sa ia saunoa, “Na ou maua le avanoa ou te alu atu ai i vaega eseese o [le Iunaite Setete] ma e seāseā maua nisi o ē lē matua masalosalo leaga lava, ona o tulaga e foliga e le mafai ona matou pulea.”³ E ui ina sa ia ta’ua o le taua, o mala faalenatura, ma matautia faaleagaga o vaega o le ola ai i aso e gata ai, ae na aoao mai e Peresitene Samita le Au Paia e mafai ona latou o ese mai le tele o mafatiaga o nei taimi matautia e ala i le ola ai i le talalelei ma tetee atu i faaosoosoga.

Sa ia maua foi le faamoemoe i lona talitonu e mafai e e amiotonu o le Au Paia o Aso e Gata Ai ona i ai se uunaiga mamana i le lalolagi o loo ola ai. Sa ia aoao mai e le tatau i le Au Paia ona na ona taliaina le tulaga ua i ai le lalolagi, ae e tatau ona tumau lo latou toaaga i o latou nuu ma taumafai e fai ia uluitino la latou uunaiga, tusa lava po o a tetee latou te feagai. “Ua ia i tatou uma lava le matafaioi o le faia ia avea lenei lalolagi o se nofoaga e sili atu ona fiafia tatou te nonofo ai,” o lana saunoaga lea.⁴

Sa faamatala e Sister Belle S. Spafford, le peresitene aoao o le Aualofa se aafiaga lea na aoaoina ai o ia e Peresitene Samita i lenei mataupu faavae. E lei leva ona valaau o ia i lona tofiga, sa faailoa atu ia Sister Spafford e i ai se fonotaga o le a faia i le Aai o Niu Ioka a le Fono Tuufaatasi a Tamaitai. E tele tausaga o avea le Aualofa ma sui auai o lena fono, ae i taimi nei ua tele isi sui auai o le fono sa tetee i le Ekalesia ma sa faamaasiasi ai sui usufono a le Au Paia o Aso e Gata Ai i ana fonotaga. Ona o lena mea, na manatu ai Sister Spafford ma ona fesoasoani ua tatau ona faamuta lo latou avea ai ma sui auai i lena aufono, ma sa latou tusia ai se fautuaga e ta’u atu ai o latou manatu. Sa faamatala mulimuli ane e Sister Spafford:

“Sa faatulaga se taimi i se tasi taeao, ma sa ou alu ai na o au e vaai Peresitene Siaosi Alapati Samita, ma ave le matou fautuaga, ma se lisi o mafuaaga na faia ai lea fautuaga. Sa faitauina ma le faaeteete e le Peresitene le tusi. Ona ia fesili mai lea, ‘E le o le faalapotopotoga ea lenei na auai tuafafine a o lei afa le seneturi?

“Sa ou fai atu, ‘Ioe, lau susuga.’

“Sa ia fai mai, ‘Pe tatau ea la ona ou malamalama o lea ua outou mananao nei e faamuta lena tulaga o le avea ma sui auai?’

“Sa ou fai atu, ‘Ioe, lau susuga.’ Ona ou fai atu lea, ‘E te silafia, Peresitene Samita, e leai se tatou mea o maua mai i lena Aufono.’

“Ona tagatagai mai lea o le Peresitene ia te au ma le faateia. Fai mai, ‘Sister Spafford, pe tou te mafaufau i taimi uma i ni mea tou te maua mai? Pe tou te le mafaufau ea ua oo i taimi e mafaufau ai po o a mea tou te tuuina atu? Ou te talitonu,’ sa ia faaauau ai, ‘e i ai se mea e tatau i tamaitai Mamona ona ofo atu i tamaitai o le lalolagi, ma e mafai foi ona latou aoao ai mai ia i latou. Ae nai lo le faamutaina o lo outou avea ai ma sui auai, ou te fautuaina e te alu ma ave nisi tagata e sili ona gafatia o la outou pulega ma toe o i le fono lea.’

“Ona ia fai mai lea ma se faamamafa, ‘Fai ia uluitino la outou uunaiga.’”⁵

Sa usitai Sister Spafford i lenei fautuaga ma sa filifilia mulimuli ane ai i tofiga faaleautaitai i le Aufono Tuufaatasi a Tamaitai, ma mulimuli ane ai filifilia e fai ma peresitene. [Tagai fautuaga 1 i le itulau e 270.]

Aoaoga a Siaosi Alapati Samita

Na muai vaaia faigata ogaoga mo aso e gata ai.

Na faailoa mai ia i tatou o aso e gata ai o le a tulai mai ai faigata ogaoga. … E le gata ina sa lapataia i tatou e tusitusiga paia na aumai i ona po o le Faaola ma a’o lei oo i lona taimi, ma ia na aumai ina ua mavae o ia, ae i lo tatou lava vaitau na fetalai mai ai le Alii ma o loo maua faaaliga a lo tatou Tama Faalelagi i le Mataupu Faavae ma Feagaiga. Afai tatou te faitauina nei faaaliga, o le a tatou iloa ai o aafiaga o loo tatou feagai sa muai vaaia. …

… E aumaia e le nusipepa o aso taitasi tala o mala ua i ai i soo se mea—o le vasa sousou ma ola ua faaumatia ai, o mafuie, o asiosio tetele, o mea e pei ona ta’u mai o le a tutupu i aso e gata ai—ma e foliga mai ia te au, uso e ma tuafafine, afai e matua mafaufau lelei tagata, afai o latou faitauina tusitusiga paia, e tatau ona latou iloa o mea na fetalai mai le Alii o le a tutupu i aso e gata ai, o lea ua tutupu. O lea ua oso lau o le laau o le mati [tagai Iosefa Samita—Mataio 1:38–39], ma o i latou o ē magafagafa ua tatau ona iloa ua oo mai le taumafanafana, o mea ia na muai ta’u mai e le Alii o le a muamua mai i lona afio mai faalua, lea ua faasolo ina taunuu.⁶

O loo lamatia lava i tatou. Ua oo i le taimi e faamamaina ai le lalolagi vagana ua salamo atalii ma afafine o lo tatou Tama Faalelagi mai i a latou agasala ma liliu atu ia te Ia. O lona uiga, e tatau i le Au Paia o Aso e Gata Ai, po o tagata o le Ekalesia a Iesu Keriso o le Au Paia o Aso e Gata Ai, faatasi ma isi tagata uma ae muamua lava i tatou, ona faia se faataitaiga.⁷ [Tagai fautuaga 2 i le itulau e 270.]

Na pau le ala i le filemu, o le talalelei a Iesu Keriso.

Na o le tasi lava le vailaau mo le pagatia i le lalolagi atoa— o se vaifofo mo le gasegase o le lalolagi. O le talalelei lea a Iesu Keriso; o le tulafono atoatoa o le ola ma le saolotoga, lea ua toefuataiina mai e faataunuuina ai Tusitusiga Paia.⁸

“Ou te tuuina atu ia te outou le manuia, o lo’u manuia ou te avatu ai ia te outou; ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau” (Ioane 14:27.)

O upu faamautinoa nei mai le Alii o le Filemu i Ona soo faamaoni. E moni lava e leai se mea e sili atu ona manaomia e tagata nai lo faamanuiaga o le filemu ma le fiafia ma ni loto ua saoloto mai le fefe. Ma o loo ofoina mai nei mea [ia i] tatou uma pe afai tatou te faaaogaina.

Ina ua toefuatai mai le talalelei i le lalolagi i lenei tisipenisione, sa toe ta’ua foi e le Alii le mea sa faatele ona ia ta’ua i le Feagaiga Tuai ma le Feagaiga Fou, e faapea o le tau o le filemu ma le fiafia o le amiotonu. E ui lava i lea iloa, e toatele e foliga mai e mafaufau faapea e mafai ona tatou maua le fiafia i se isi auala, ae ua tatau ona tatou iloa uma i le taimi nei, e leai lava se isi auala. Peitai ua faatosinaina lava e Satani e ala i ana togafiti taufaasese le toatele o tagata e savavali ese mai le ala o le a mautinoa ai le fiafia, ma o la lava e pisi o ia. E le moe lava le fili o le amiotonu.

O le mulimuli i aoaoga a le Alii, o le liliu atu ia te ia ma salamo mai agasala, o le galulue e faia mea lelei, e mafai ai ona tatou maua le filemu ma le fiafia ma le manuia. Afai o le a fealofani tagata, o le a mou atu le inoino ma le agaleaga lea ua matua faateleina i le lalolagi.⁹

I nei aso o le le mautinoa a o fetaufetulia’i tagata mai i ma o e saili ni fuafuaga fou e ono aumaia ai le filemu i le lalolagi, ia iloa le mea lenei: na pau le ala i le filemu mo lenei lalolagi, o le ala o le Talalelei a Iesu Keriso. E leai lava se isi. … O le mauaina o se iloa o le upumoni, e sili atu lea i lo oa uma o le lalolagi, o le iloa o loo tatou saogalemu i le alatanu pe a tatou i ai i le ala o tiute na faamanino mai e lo tatou Tama Faalelagi, ma o le iloa e mafai ona tatou tumau ai pea i le ala, tusa lava po o a faatosinaga ma uunaiga atonu e ofo mai e i latou e lei filifilia e avea ma o tatou taitai, o se faamanuiaga lea e le mafaatauina.¹⁰

Ua tatou ola i se aso ua faataunuuina ai le mau i atunuu ia na fetalai mai ai le Alii e ala mai i se tasi o Ana perofeta e faapea, o aso e gata ai, “… e fano lava le poto o o latou tagata popoto, e mavae foi le mafaufau o o latou tagata mafaufau.” (Isaia 29:14.) Faatasi ai ma le poto uma o le lalolagi, e leai se vaega ua mafai ona faasino mai se ala mo le filemu ma le mautinoa faapea o le ala lea. Ua … faamanuiaina i tatou i le iloa o loo i ai se ala mo le filemu ma ua na o lea le ala e maua ai tali, ma o lena ala o le tausia lea o poloaiga a le Atua e pei ona faailoa mai i le fanauga a tagata anamua faapea ona po nei. Pe a na mulimulita’ia lena ala, semanu e mafai ona foia faafitauli tugā uma i le lalolagi, ma o le a oo mai le filemu i lenei lalolagi faanoanoa.¹¹

E ui atonu e tumu le lalolagi i le faanoanoa, ma ‘au pouli le lagi, ma masau le feemo o uila, ma luluina le eleele mai le fatu e oo i tulimanu uma, afai tatou te iloa o loo soifua le Atua, ma o loo amiotonu o tatou olaga, o le a tatou fiafia, o le a i ai le filemu lē leoa, aua ua tatou iloa e faamaonia e lo tatou Tama [o] tatou olaga.¹² [Tagai fautuaga 3 i le itulau e 270.]

E le tatau ona tatou atuatuvale pe afai tatou te faia le mea na poloai mai le Alii ia i tatou e fai.

O le a tatou le matatau lava pe afai tatou te faia le mea sa poloaiina ai i tatou e le Alii e fai. O Lana lalolagi lenei. E faalagolago alii ma tamaitai uma ia te Ia. O le a taofiofia mana uma o le tiapolo mo le manuia o Lona nuu, pe afai latou te faamamaluina o Ia ma tausi Ana poloaiga.¹³

A tatou maua le faatuatuaga o lo tatou Tama Faalelagi, afai tatou te maua Lona alofa, afai tatou te agavaa mo Ana faamanuiaga, e le mafai e ‘autau uma a le lalolagi ona faaumatia i tatou, e le mafai ona gausia lo tatou faatuatua, ma lē mafai foi ona faatoilaloina le Ekalesia ua faasuafaina mo le Alo o le Atua.

Faitau le mataupu e sefuluiva o le 2 Tupu i le ala na sailia ai e Sanerivi le tupu o Asuria e faatoilalo Ierusalema. Sa aioi atu Esekia, le tupu sa tu mo Isaraelu, i le Alii mo se laveai ae sa faatauemu Sanerivi ia te ia ma fai atu, “Aua nei e manatu e mafai ona fesoasoani au tatalo i le Atua ia te oe. O nuu uma sa ou i ai ma faoa, sa latou tatalo. Ua leai sou faamoemoe,” ma o le taeao na sosoo ai sa toatele se vaega o le autau a Asuria sa fola i le palapala ua fasiotia, ma sa faasaoina Isaraelu e le Alii. [Tagai 2 Tupu 19:10–20, 35.] O Ia o lo tatou malosi, … o lo outou Tama ma lo’u Tama, o le Tama o tagata uma; pe afai na ona tatou agavaa lava o le a Ia faasaoina i tatou e pei ona sa Ia faia i atalii o Helamana [tagai Alema 57:24–27], e faapei foi ona sa Ia faasaoina o Tanielu mai leona [tagai Tanielu 6], ma taulelea Eperu e toatolu mai le ogaumu aasa [tagai Tanielu 3], ma le onoselau afe o e na tupuga mai ia Aperaamo ina ua ia aumaia i latou mai Aikupito i lalo o le taitaiga a Mose ma faaumatia ai le autau a Farao i le Sami Ulaula [tagai Esoto 14:21–30]. O Ia o le Atua o lenei lalolagi. O Ia o le Tama o i tatou uma. Ua ia te Ia le mana uma ma ua Ia folafola mai le puipuiga ia i tatou pe afai tatou te ola agavaa ai.¹⁴

Tusa lava pe faamalumalu mai ao, tusa lava pe tata mai talipalau o taua, tusa lava po o a tulaga e tulai mai i le lalolagi, iinei i le Ekalesia a Iesu Keriso o le Au Paia o Aso e Gata Ai, po o fea o tatou faamamaluina ai ma tausia poloaiga a le Atua, o le a i ai lava le puipuiga mai mana o le tiapolo, ma o le a faatagaina lava ona ola alii ma tamaitai i le lalolagi seia i’u o latou soifua i le mamalu ma le viiga pe afai latou te tausia poloaiga a lo tatou Tama Faalelagi.¹⁵ [Tagai fautuaga 4 i le itulau e 270.]

E mafai ona avea o tatou aiga ma nofoaga filemu ma paia e oo lava i le lotolotoi o mala.

Ou te manatu faapea, o le i ai o le faanoanoa i soo se mea, faatasi ai ma le valoaga na faia e le Alii i le Vaega muamua o le Mataupu Faavae ma Feagaiga e faapea, “o le a aveeseina le filemu mai le lalolagi,” [MFF 1:35] e tatau ona tatou lagonaina ua oo mai lena taimi. E moni ua tatau ona tatou iloiloina e i tatou lava, ma e tatau ona avea o tatou aiga ma nofoaga mautu o le tatalo ma le lotofaafetai ma le talisapaia. E tatau i tane ona agalelei i a latou ava, ma ia mafaufau ava i a latou tane. E tatau i matua ona taofimau le alofa o a latou fanau e ala i lo latou ola amiotonu. Ona avea ai lea o o tatou aiga e le gata ma nofoaga mautu o le tatalo ma le talisapaia, ae o le a avea ma nofoaga e mafai e lo tatou Tama ona aumai i ai ana faamanuiaga silisili, ona o lo tatou agavaa.¹⁶

Ou te tatalo ia mafai ona faapaiaina o tatou aiga e ala i le amiotonu o o tatou olaga, ia leai se mana o le tiapolo e oo mai i ai ma faaumatia fanau i o tatou aiga po o i latou e nonofo ai i totonu o o tatou fale. Afai o le a tatou faamamaluina le Atua ma tausi i Ana poloaiga, o le a paia o tatou aiga, e leai se uunaiga a le tiapolo e i ai, ma o le a tatou ola i le fiafia ma le filemu seia oo ina mae’a le vaaiga faaiu i le olaga faitino, ae tatou o atu e talia lo tatou taui i le tino ola pea.¹⁷

Faaogatusa o outou olaga ma aoaoga o le talalelei a Iesu Keriso, ma a oo ina taufaamata’u mai mala, o le a outou lagonaina le lagolago o lona aao e i ai le mana uma. Ia avea o outou aiga ma nofoaga mautu o le agaga o le Alii; ia avea ma nofoaga paia, e le mafai ona sau i ai le tiapolo; faalogo i le leo lemu ma le itiiti e uunaia outou i galuega a le amiotonu. Ou te tatalo mo oe ma outou uma ina ia aua nei se’e ese mai le ala e tau atu i le malamalama ma le mana o le Atua, le tofi o e faamaoni, o le ola lea e faavavau.¹⁸

Ou te tatalo ina ia mautu i o tatou loto ma i o tatou aiga lena agaga o le alofa, o le onosai, o le agalelei, o le alofa mama, o le loto fesoasoani lea e faamauoa ai o tatou olaga ma atili susulu ai ma lelei le lalolagi ona o lena.¹⁹ [Tagai fautuaga 5 i le itulau e 270.]

E mafai ona avea i tatou ma se uunaiga lelei i le lalolagi.

Ou te fia aioi atu ia te outou, … ia avea outou o ni taula i nuu o loo outou nonofo ai ina ia ta’a’ina atu isi ia te outou ma lagonaina le malupuipuia. Ia faasusulu atu lo outou malamalama ina ia iloa ai e tagata a outou galuega lelei ma naunau ai i o latou loto ia avea e faapei o outou.²⁰

O lo tatou tiute le avea ma faataitaiga; o lo tatou tiute le faaagiagia i le ea o le fu’a o le upumoni. O lo tatou tiute le faamalosiau i isi fanau a lo tatou Tama e faalogo i ana fautuaga ma apoapoaiga, ma fetuunai mea ina ia tatou maua le agaga o le Atua o mumu i o tatou agaga po o fea lava tatou te i ai, ma avea ai a tatou uunaiga mo le lelei.²¹

E lei poloai mai lava le Alii i se mea e le mafai ona fai. I se isi itu, ua ia tuuina mai ia i tatou o poloaiga ma fautuaga ma apoapoaiga e mafai e i tatou uma ona mulimuli ai i lenei vaitau ua tatou ola ai. …

… Uso e ma tuafafine, e tatau ona tatou faamaoni. O le laueleele o loo tatou nonofo ai e tatau ona faapaiaina i le amiotonu. … Pau lava le mea tatou te manaomia, o le salamo mai a tatou agasala, fulitua i sese o o tatou ala, faamama o tatou olaga mai mea e le mama, ona tatou o ai lea ma faia mea lelei. E le o manaomia le vaetofia o i tatou mo lena faamoemoe. O alii uma, o tamaitai ma tamaiti i le Ekalesia a Iesu Keriso, e mafai ona o ma faia mea lelei ma maua ai faamanuiaga e maua mai ai. [Tagai fautuaga 6 i le itulau e 270.]

… Tatou tuu atu o tatou lima i le galuega ua ia tuuina mai i la tatou tausiga, ia tatou faamanuiaina fanau a lo tatou Tama i soo se mea o i ai, ona faamauoaina lea o o tatou olaga ma atili ai ona fiafia lenei lalolagi. O le misiona lenei na tuuina mai i o tatou tau’au. O le a faamasinoina i tatou e lo tatou Tama Faalelagi i le faiga o le a tatou faataunuuina ai. Ia silasila mai le Atua, i le lotomaulalo o o tatou agaga o le a tatou o ai ma le naunau i o tatou loto e faia mea lelei i tagata uma po o fea lava o i ai, ma aumaia i latou i le olioli lea e na o le usitai i ana tulafono ma le tausia o ana poloaiga e maua mai ai. E mafai ona mautu lena filemu i o tatou loto ma i o tatou aiga, ia mafai ai ona tatou faasusulu atu le lasusulu ma le fiafia i soo se mea tatou te o i ai, ina ia tatou faamaonia atu ai i le lalolagi, tatou te iloa o loo soifua le Atua, e ala i olaga tatou te ta’ita’ia, ona maua ai lea o Ana faamanuiaga, ou te tatalo ai ma le lotomaulalo.²²

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai i itulau e v–vii.

Faitau le tala e uiga ia Belle S. Spafford a o mauaina fautuaga mai ia Peresitene Samita (itulau e 263–64). O a ni auala e mafai ona e “faauluitinoina ai au uunaiga”?
I le vaega muamua o aoaoga (itulau e 264), o loo ta’u mai ai e Peresitene Samita ia faigata sa valoia e muamua mai i le Afio Mai Faalua (tagai foi i le 2 Timoteo 3:1–7; MFF 45:26–35). Aisea e te manatu ai e taua le iloa sa valoia nei faigata i tusitusiga paia?
Toe iloilo le vaega o loo amata i le pito i lalo o le itulau e 264. O a ni faafitauli i le lalolagi e mafai ona foia e le usitai i le talalelei toefuataiina a Iesu Keriso? Na faapefea ona aumaia e le talalelei le filemu i lou lava olaga? I lou aiga? I au sootaga ma isi?
I itulau e 266–67 o loo aumai ai e Peresitene Samita ni faataitaiga mai tusitusiga paia o le puipuia e le Alii o Lona nuu. O a ni auala na Ia puipuia ai oe ma lou aiga? E faapefea ona fesoasoani le usitai ia i tatou e faatoilalo ai le fefe?
O a ni tulaga matautia e faamata’uina ai le saogalemu faaleagaga o o tatou aiga i aso nei? O a ni mea e mafai ona tatou faia e avea ai o tatou aiga ma “nofoaga paia, e le mafai ona sau i ai le tiapolo?” (Mo nisi manatu, toe iloilo le vaega o loo amata i le itulau e 268.)
Faitau le parakalafa muamua ma le fa i le itulau e 269. E faapefea ona pei ia le Au Paia o Aso e Gata Ai o ni “taula” i o latou nuu? Aisea e mafai ai e le “[faamamaina] o o tatou olaga mai le le mama” ona faaleleia atili lo tatou mafai ona “o atu ma faia mea lelei”? Mafaufau ma le loto tatalo po o le a le mea e tatau ona e faia e faamamaina ai lou lava olaga mai le le mama.

Mau E Faatatau I Ai: Isaia 54:13–17; Mataio 5:13–16; Ioane 16:33; 2 Nifae 14:5–6; Mataupu Faavae ma Feagaiga 87:6–8; 97:24–25; Iosefa Samita—Mataio 1:22–23, 29–30

Fesoasoani faafaiaoga: Mafaufau e valaaulia tagata o le vasega e faitau ia faaulutala o Aoaoga a Siaosi Alapati Samita” ma filifili se vaega e anoa ia i latou po o o latou aiga. Valaaulia i latou e suesue i aoaoga a Peresitene Samita i le vaega lena, e aofia ai fesili o loo faatatau i ai i le faaiuga o le mataupu. Ona talosagaina lea o tagata o le vasega e faasoa mai mea sa latou aoaoina.

“Ou te tuuina atu ia te outou le manuia, o lo’u manuia ou te avatu ai ia te outou; ou te le avatu ia te outou faapei ona avatu e le lalolagi.… Aua le atuatuvale o outou loto, aua foi tou te matatau” (Ioane 14:27).

“Ia avea o outou aiga ma nofoaga mautu o le agaga o le Alii; ia avea o ni nofoaga paia.”