Mataupu 12

O Se Mana’o Naunautai e Faasoa Atu le Talalelei

E manaomia e o tatou uso ma tuafafine i le lalolagi atoa le savali o le talalelei toefuataiina, ma o lo tatou avanoa lea e faasoa atu ai ia te i latou.

Mai le Soifuaga o Siaosi Alapati Samita

Sa tusia e se uo lelei a Siaosi Alapati Samita: “O Peresitene Siaosi Alapati Samita o se faifeautalai masani. Mai lava i lona talavou, sa i ai sona manao naunautai e faasoa atu aoaoga o le talalelei i ona uso a tagata, e faailoa atu i ‘atalii ma afafine o le Atua,’ i latou uma na ia manatu o ona uso ma tuafafine, upumoni sa faaalia i le Perofeta o Iosefa Samita.

“E tele ni taimi sa ou maua ai le avanoa e faimalaga ai i le nofoaafi ma Peresitene Samita. O taimi taitasi sa ou matauina ai e alu lelei loa le malaga a le nofoaafi, ona tago loa lea i ni nai tamai tusi o le talalelei mai lana ato, tuu i lana taga, ona agai atu loa lea i le pasese. I lona uiga faauo, ma le talileleia, e le umi ai ae masani ma se tagata o le pasese, ona ou faalogo atu ai lea i se taimi puupuu o faamatala le tala o le faavaeina o le Ekalesia e le Perofeta o Iosefa Samita pe faamatala le malaga umi a le Au Paia mai Navu ma o latou tofotofoga ma faigata, a o laasia mai laufanua valevalenoa o Iuta, pe faamatala foi ni mataupu faavae o le talalelei i sana uo fou. Ona sosoo mai ai lea o lea talanoaga ma lea talanoaga ma se tasi o le pasese pe a uma se isi, seia iu lava ina taunuu le malaga. I le taimi atoa na ou mafuta ai ia Peresitene Samita, lea e silia ma le fasefulu tausaga, sa ou aoaoina ai po o fea lava e alu i ai o ia, e muamua lava, o ia o se faifeautalai mo le Ekalesia a Iesu Keriso o le Au Paia o Aso e Gata Ai.”¹

Sa tusia foi e faatatau ia Peresitene Samita: “E talanoa i mea tau lotu i se tagata salu alāāsu sa faigaluega i lona aiga. Sa seāseā ona misia se avanoa e faamatala ai ‘upumoni e faavavau o le talalelei toefuataiina’ i se uo po o se tagata ese. O lona manatu, o le agalelei a’ia’i lea, aua o le savali a Keriso o le meaalofa aupito taua lea sa mafai ona ia tuuina atu.”² [Tagai fautuaga 1 i le itulau e 135.]

Talu ai o le faasoa atu o le talalelei o se autu sa tele ina laugaina e Peresitene Samita, o le mataupu muamua lea o mataupu e tolu e uiga i le mataupu i le tusi lenei. O loo taulai atu lenei mataupu i mafuaaga tatou te faasoa atu ai le talalelei; mataupu e 13 o loo tuuina mai ai ni auala se tele e mafai ai ona tatou auai i le faatinoga o lenei galuega taua; ma le mataupu e 14 o loo faamatala mai ai le auala e mafai ona sili atu le aoga i a tatou taumafaiga.

Aoaoga a Siaosi Alapati Samita

E manaomia e le lalolagi le mea ua ia i tatou—o le talalelei lea a Iesu Keriso, ua toefuatai mai i lona atoatoaga.

Ua mafatia le lalolagi, ua faaletonu, mai le tasi pito i le isi pito. O loo autilotilo alii ma tamaitai i i ma o, o loo tau saili po o fea a ō i ai e faia ai mea o le a latou maua ai le filemu. … Ua toefuatai mai le talalelei a Iesu Keriso. Ua i ai iinei le upumoni sa faaalia mai le lagi, ma o le upumoni lena, lena talalelei, pe ana iloa e le lalolagi, semanu o se vaifofo lea mo o latou mafatiaga uma. Na pau lea o le mea o le a latou maua ai le filemu a o ola ai i lenei lalolagi.³

E manaomia e tagata o i lenei lalolagi ona toe solisoli o latou tulaga aao ma toe foi i le faavae sa faataatia e le Matai o le lagi ma le lalolagi, le faavae o le faatuatua, salamo ma le papatisoga e ala i le faatofuina mo le faamagaloina o agasala, ma le taliaina o le Agaga Paia i lalo o lima o i latou e umia le pule paia. O le mea lena ua manaomia e le lalolagi. Ou te matua faafetai ona e toatele ua vaavaai atu i lena itu. Sa latou savavali tauto’ai i le ala sa tau atu i le faanoanoa ma le mafatia, peitai sa tuu i se mea lata ane se vaifofo mo faaletonu uma—o le talalelei lea a Iesu Keriso. Sa i ai lava se faafanua o le ala ua saunia mo tagata uma e ta’u mai ai se ala, e ui ina vaapiapi, ma faigata ona mulimuli ai, e toe taitai atu ai i le Tama o i tatou uma; ma e leai se isi ala e tau i ai.⁴

O loo taumafai ekalesia a le lalolagi, i la latou lava ala, e aumaia le filemu i loto o tagata. Ua ia i latou le tele o uiga faaleatua ma mea moni e tele, ma ua tele foi mea lelei ua latou ausia, peitai e lei faatagaina mai faalelagi. E lei valaauina faalelagi foi o latou faifeau.⁵

O le Au Paia o Aso e Gata Ai ua na o i latou na o loo tauaveina le pule a lo tatou Tama Faalelagi e faatautaia ai sauniga o le Talalelei. Ua manaomia i tatou e le lalolagi.⁶

Ua i ai se matelaina moni i le lalolagi mo afioga a le Alii, ma e toatele agaga faamaoni o loo saili ia iloa le mea o finagalo ai lo tatou Tama Faalelagi mo i latou. Sa ou feiloai i nisi o taitai o ekalesia i le lalolagi, ma ou iloa ai o nisi o i latou o ni tamalii ua tuuto atu i le faia o mea lelei, ae seāseā ona ou maua lea ia i latou ua tofia i le galuega i faapotopotoga eseese a ekalesia, ni tagata e i ai se malamalama i faamoemoega o o latou tagata, pe iloa foi le mafuaaga ua tatou i ai i lenei lalolagi. E le mafai e tagata ona aoao atu mea latou te lē iloaina foi. O tagata lelei, e lē malamalama i le talalelei ma le taua o sauniga o le talalelei, e gata lava le tele o a latou aoaoga i lesona o le amiolelei, ma le faitauina o salamo i a latou faapotopotoga. E filifilia fuaitau patino o tusitusiga paia e fai ma matua o lauga i le amio mama, faamaoni, ma isi mea; o nei mea uma e aoga ma faagaeetia, ae e laitiiti nai lauga e folafola e faamatala ai tulaga e manaomia e agaga uma a o lei mafai ona ulu atu i le malo o le lagi. O faamatalaga na o loo matua manaomia e le lalolagi. E toaitiiti ni faifeau e i ai se savali mo a latou faapotopotoga e uunaia ai i latou i le talitonuga i le paia o Iesu Keriso ma le tatau ona talia sauniga o le talalelei na fautuaina mai e ia.⁷ [Tagai fautuaga 2 i le itulau e 136.]

E toatele tagata e taliaina le upumoni pe a avatu i ai le avanoa.

O loo naunau fanau a lo tatou Tama i soo se mea, e iloa po o le a le mea e tatau ona latou fai, peitai, ona o uunaiga leaga ua tumu ai le lalolagi, ua faaseseina i latou; ua faatauasoina tamalii maualuluga i le upumoni. … O loo galue le tiapolo, ma e na pau lava le mana e mafai ona faafetaia’ia lana faatosinaga o le talalelei lea a Iesu Keriso.⁸

E femasalosaloa’i tagata. Latou te le’i talitonu i mea sa latou faalogo i ai, latou te le’i naunau foi e faia e faapei ona faia e Filipo, o se tasi o soo o le Faaola, sa fautuaina atu ia Natanielu o lē sa la talanoa. Fai mai Filipo, “Ua afio mai le Alii.”

Ma sa ia faamatala atu o ia ae fesili Natanielu, “O fea na sau ai o ia?”

Sa tali atu Filipo, “Oi, e sau o ia mai Nasareta.” Ona fai atu lea o le alii lelei, “E mafai ea ona tupu o se mea lelei mai Nasareta?” Fai mai Filipo, “Ina sau ia, ina matamata.” (Tagai Ioane 1:43–46.)

Sa aoaoina Natanielu ia talitonu e leai se mea lelei e mafai ona tupu mai Nasareta, ae o ia le tagata lea na faasino i ai le Faaola o se Isaraelu moni e leai sona pepelo—o se alii lelei, ae ua faaseseina ona o tala sa ia faalogo i ai.

Peitai, ina ua faatoa ia iloa, ina ua ia talia le valaaulia a soo e “Sau ma matamata,” sa sau o ia e vaai.

Ua matou maua le olioli tele i le uunaiga a Lona Agaga. Matou te fia mananao i tagata uma e olioli i lena faamanuiaga, o lea la ina ua latou fesili, “O a ituaiga o tagata e i ai i latou nei?” o la matou tali o le, “O mai ina matamata.”⁹

Na valaau mai … lo’u Tama Faalelagi ou te alu i le tele o vaega o le lalolagi, ma e silia ma le miliona maila ua ou faimalaga ai talu ona valaauina a’u i le galuega. Ua ou malaga i le tele o atunuu ma tau, ma po o fea lava ou te alu i ai, sa ou maua lava ni tagata lelei, o atalii ma afafine o le Atua soifua o loo faatalitali mai mo le talalelei a Iesu Keriso, ma e fiaafe, selau afe, fia miliona o i latou, o le a taliaina le upumoni pe ana fai latou te iloaina le mea lea tatou te iloa.¹⁰

E tele faapotopotoga o lotu lelei i le lalolagi, e toatele alii ma tamaitai faamaoni o loo soifua e tusa ai ma le finagalo o lo tatou Tama Faalelagi e pei ona latou malamalama ai. …

O tagata uma lava o le a ola e tusa ai ma le malamalama na ofoina atu e le Alii ia i latou ma sailia o ia i le tatalo faamaoni, o le a tuia o latou loto, o le a faatosinaina o latou mafaufau, ma o le a latou maua le avanoa e iloa ai na toe tulei mai le Atua.¹¹ [Tagai fautuaga 3 i le itulau e 136.]

Tatou te naunau e faasoa atu le talalelei aua tatou te alolofa i o tatou tuaoi.

Atonu e ono foliga atu i le tagata matau mai fafo e faapea, o loo i ai i le Au Paia o Aso e Gata Ai se naunautaiga e uiga ese. E pei ona ta’ua e se tasi alii talu ai nei: “E uiga ese lava ia te au lo outou fiafia e uunai la outou galuega. E le afaina pe ou te talanoa i se talavou po o se tagata matua, se faitogalaau po o se leoleo i o outou tagata, e fiafia uma lava i latou ma malilie ma mautinoa ua latou umia le talalelei a Iesu Keriso.” …

… Pe o se mea ea e ofo ai le i ai o le naunautaiga i a tatou tapuaiga, ua ia i tatou se loto e popole e faasoa atu nei upumoni viia i o tatou tuaoi? Pe o se mea ea e ofo ai, a oo mai le taimi e valaauina ai o tatou atalii i le galuega faamisiona, pe faatonuina i tatou e faataatia ese o tatou tiute ae o e fai ma auauna a le Atua soifua, ua maua le mana mai luga, maua le pule lea ua faaee mai i nei aso e gata ai, ina ia mafai ai ona tatou faasoa atu i tagata uma lenei upumoni matagofie lea ua matua faamauoaina ai o tatou olaga, … ma tatou tali atu ai ma le naunau ma le fiafia?¹²

O le Talalelei a Iesu Keriso lea tatou te tauaveina. O le naunautaiga e laveai agaga o fanau a tagata lea o loo mumu i o tatou loto. E le ina ia mafai ai ona galueaiina i tatou lava, ma avea ma ni tagata maoae i le itu tautupe; e le ina ia mafai ai ona viia o tatou igoa i le lalolagi mo mea tatou te ausia; ae ina ia mafai ai e atalii ma afafine o le Atua, po o fea lava o latou i ai, ona faalogo i le Talalelei, o le mana lea o le Atua mo le faaolataga o i latou uma o ē talitonu ma usitai i ona mataupu. O i latou foi o ē talitonu o le a mulimuli i le mamanu na tuuina mai e le Faaola ina ua Ia fetalai atu i Ona soo, “O lē faatuatua ma papatisoina, e faaolaina ia; a o le lē faatuatua, e faasalaina o ia.” [Mareko 16:16.]¹³

Mafaufau i le tiutetauave ua i o tatou luga, afai o tatou ola i o tatou olaga ma le faatamala po o le faalēano i ai, e le o saili e faasoa atu le upumoni ia i latou e alofa i ai le Alii e faapei foi ona ia alofa ia i tatou, ma ē e taua i lana silafaga. Ou te lagona e tatau ona fagua nisi o tagata o lenei Ekalesia. Ou te manatu ua tatau ona faia se taumafaiga sili atu e faasoa atu ai i fanau a lo tatou Tama i le lagi ia upumoni uma o loo i ai i lenei Ekalesia.¹⁴

Afai e gasegase se tagata, afai o ia o so tatou tuaoi, tatou te auauna atu ma le fiafia ia te ia; afai e i ai se maliu i lona aiga, tatou te taumafai e faamafanafana ia te ia. Ae peitai e alu le fia tausaga o tatou faatagaina o ia e savali i ala o le a faaumatia ai lona avanoa mo le ola e faavavau, tatou te le amanaia o ia, e pei lava o se mea noa.¹⁵

O tatou iloa ea o alii uma ua faia i le faatusa o le Atua ma o se atalii o le Atua, o tamaitai uma foi o Ona afafine? E le afaina po o fea e i ai, o i latou o Ana fanau, ma e alofa o ia ia te i latou ma finagalo i lo latou faaolataga. E moni, i le avea ai ma tagata o lenei Ekalesia, e le mafai ona tatou nofonofo vale. E le mafai ona tatou maua le alofa faapelepele ua faaee mai e lo tatou Tama Faalelagi ia i tatou, le iloa lea o le ola e faavavau, ma taofiofia ma le manatu faapito, ma mafaufau ia tatou manuia ai. E le o mea tatou te maua e faamauoa ai o tatou olaga, a o mea tatou te tuuina atu.¹⁶

Ia lava lo tatou naunau i le faaolataga o tagata e faaaoga ai se faanaunautaiga paia mo lo latou liua: ina ia tatou fiafia i lo latou lotofaafetai ma le alofa e faavavau, ma le talisapaia o lo tatou Tama Faalelagi, ona o lo tatou naunau ma le le manatu faapito i Ana fanau.¹⁷

O la tatou misiona i fanau a lo tatou Tama … o se misiona o le filemu, o le agalelei i tagata uma. O se manao o’oo’o ma le naunautai e faasoa atu i fanau uma a lo tatou Tama ia mea lelei ua ia faaee mai ma le agalelei i o tatou luga; faatasi ai ma le faamoemoe ia latou malamalama, tatou te o ifo i o tatou tulivae i lea aso ma lea aso, ma tatalo ina ia ootia o latou loto, ia afio ifo le agaga o le Atua i o latou agaga, ina ia latou malamalama i le upumoni pe a tuuina atu ia i latou.¹⁸

Ou te manao i lenei Ekalesia maoae, faatasi ai ma le mana ua tuuina i ai e le Atua, ia mafai ona faasalalau vave atu le upumoni, ma faasaoina malo mai le faatafunaga. Ua vave lo tatou tuputupu a’e, o se faalapotopotoga, ae ou te faalē fiafia tele i le faateleina faafuainumera e pei ona ou fiafia i le talitonu ai o le uunaiga o loo tatou faasusulu atu o loo lagonaina mo le lelei, ma o fanau a lo tatou Tama, mai matu i saute, ma mai sasa’e i sisifo, ua faalogoina le savali o le ola ma le faaolataga, lea a leai e le mafai ona latou nonofo i le afioaga o le Togiola o tagata.¹⁹ [Tagai fautuaga 4 i le itulau e 136.]

O le a faamasinoina i tatou e le Alii i a tatou taumafaiga e faasoa atu le meaalofa o le talalelei.

Ua tatou mauaina se meaalofa matagofie, peitai ua aumai faatasi ma lena meaalofa se tiutetauave tele. Ua faamanuiaina i tatou e le Alii i se iloa e sili atu nai lo isi tagata, ma faatasi ai la ma lena iloa ua aumai ai ma tulaga manaomia ia tatou faasoaina atu i Ana fanau i soo se mea o latou i ai.²⁰

Ae, ou te le malamalama faapea o loo tatou auauna atu i le Atua ma lo tatou malosi atoa, pe afai tatou te tuulafoai i ana fanau, pe tatou te faaaluina foi le tele o o tatou taimi ma le manatu faapito e galueaiina ai i tatou lava, ma faaputuputu mea o lenei olaga, ae tuua ana fanau i le pogisa, a o lea e mafai ona tatou aumaia i latou i le malamalama. O lo’u malamalama e faapea, o la’u misiona aupito sili ona taua i lenei olaga o le: muamua, ia tausia poloaiga a le Atua, e pei ona aoaoina ai au; ma le isi, ia aoao atu na poloaiga i fanau a lo’u Tama, o ē le malamalama i ai.²¹

E leai se isi Talalelei o le faaolataga, ma o i tatou, o’u uso e o ē o loo tauaveina le perisitua paia, ua i ai le tiutetauave o le aveina atu o lena savali, e le gata i atunuu o lenei lalolagi, ae ia faapupula atu i o tatou olaga ma aoao atu ia i latou o o tatou tuaoi, e le auai i lo tatou faatuatuaga. Ou te lapata’i atu ia te outou i le aso nei, ua tuu mai e le Alii le tiutetauave ia i tatou e valaau atu i Ana fanau ia salamo ma le folafolaina atu o Lana upumoni. Afai tatou te le faaaogaina o tatou avanoa e aoao atu ai i atalii ma afafine o le Atua, o ē le auai i la tatou tapuaiga, o loo nonofo faatasi ma i tatou, ia lenei Talalelei a lo tatou Alii, o le a Ia tuua’ia i tatou i le isi itu o le veli mo mea sa tatou le faia.²²

A mavae sina taimi, ona faafesagai lea ma faamaumauga tusitusia o o tatou olaga, ma afai sa tatou faamaoni, ou te talitonu o le a faafetai mai le Tama o i tatou uma i le lalolagi ma faamanuia mai mo le aumaia o le toatele o ona atalii ma afafine ia malamalama i le faamoemoega o le olaga ma le ala e olioli ai i le uunaiga a lona agaga.²³

A tatou maua le agaga o le talalelei, o lo tatou manao ia mafai ona aoao atu le toatele o fanau a lo tatou Tama tatou te mafai ona oo atu i ai, i le upumoni mamalu lea e tatau ai mo lo latou faaeaga; a oo mai le taimi o le a tatou tutu atu ai i le afioaga o le Togiola o tagata, o le a mafai ona tatou fai atu ia te Ia: “Faatasi ai ma lena mana na E tuuina mai ia te au, faatasi ai ma lena atamai ma le poto sa E tuuina mai ia te au, sa ou sailia ma le agamalu ma le alofa moni, ma faatasi ai ma le naunautai ma le agalelei ia aumaia ai le toatele o Au fanau ia iloa le talalelei e pei ona mafai ai ona ou faia.”²⁴ [Tagai fautuaga 5 i le itulau e 136.]

Afai tatou te faasoa atu le talalelei i fanau a le Atua, o lo tatou taui o le olioli sili faatasi ma i latou i le malo selesitila.

O le toatele o i tatou e faaalu le tele o o tatou taimi, e saili ai mea o lenei olaga lea e tatau ona tatou tuua pe a tatou o ese atu mai iinei, ae o loo i ai agaga tino ola pea o loo siomia ai i tatou, pe ana fai tatou te naunau e aoao ma musuia e sailiili i le upumoni, ma toto i o latou loto se iloa o loo soifua le Atua. O a oa i le lalolagi atoa e matua taua ia i tatou, o le a tatou maua ai lo latou lotofaafetai iinei ma la latou talisapaia tumau ma le faavavau i le lalolagi a sau. O se misiona e sili ona taua.²⁵

Mafaufau i le uiga pe afai, nai lo le manatu faapito ma taumafai e faasaoina na o si o tatou lava aiga toalaiti, e mafai ona tatou faitauina i le taitoasefulu ma ona tupu ma le taitoaselau alii ma tamaitai sa tatou uunaia e talia le Talalelei a lo tatou Alii. Ona tatou lagona ai lea o le faamanuiaina moni ma olioli ai i lo latou alolofa ma le agaga talisapaia e faavavau.²⁶

Oka se olioli o le a i ai i le isi itu o le veli, i le vaaia o nei alii ma tamaitai lelei o ē o loo soifua e tusa ai ma lena malamalama e pei ona latou faia, ma taumafai e faia o latou tiute i le Atua, ma ona o lo tatou fesootai, ona o lo tatou sagisagi ma le naunau e faasoa atu ia i latou, o le a latou maua ai isi faamatalaga e uiga i le talalelei a lo tatou Alii ma talia ia sauniga o Lona Maota Paia ma saunia ai mo le avea ma tagata auai o le Malo Selesitila. O le a outou matua fiafia, pe afai e oo mai le taimi, pe a outou tutu i le afioaga o le Faamasino sili e tuuina atu se tala o ni nai tausaga o le olaga na faaalu i le olaga faitino, pe a tutu nei fanau a lo tatou Tama ia e alofa tele i ai o Ia e pei ona Ia alofa ia i tatou, ma faapea atu, “Le Tama Faalelagi, o le alii lea, o le tamaitai lenei na uluai aumaia ia te au le tala o Lau upumoni mamalu ma ou maua ai se naunautaiga e saili i Lau Afio ma le faamaoni a’ia’i nai lo le mea sa ou faia muamua. O le alii lenei po o le tamaitai lenei sa faia lenei mea taua mo au.” Ae e le na o le pau lena.

A oo mai lena taimi, pe a e pasi atu i le vaitau o le faavavau, o se taimi umi lena, o le a e maua le alofa ma le lotofaafetai o alii uma, tamaitai ma fanau ia sa avea oe ma tufugaaao i le aveina atu i ai o le fiafia e faavavau. Pe le o se mea taua tele lena? Atonu tatou te faaalu o tatou ola iinei ma maua ai ni nai tupe pe fia selau pe fia afe foi, atonu e i ai ni a tatou lafu, fagaga, fale ma fanua, ae e le mafai ona tatou o ma ave nei mea i le isi itu. E le manaomia i le ola e faavavau, e na o iinei lava tatou te manaomia ai, ae afai ua tatou mauaina le lotofaafetai ma le alofa o isi fanau a le Atua, o le a tafe mai pea lena mea ia i tatou e faavavau. Mafaufau i le uiga o lena mea! A oo mai le taimi o le a faamama ai ma faaatoatoa lenei lalolagi e le afi ma avea ai ma malo selesitila, ma ua tafiesea foi mea uma e le manaomia, oka se logoleleia o le a i ai i le iloa ua tatou faapaaga ma i latou sa tatou auauna i ai i le olaga nei, ua tatou suli faatasi, ma taitaiina e le Alii o Iesu Keriso e faavavau—pe le taua tele ea na taumafaiga? Pe le o se avanoa fiafia ea?²⁷ [Tagai fautuaga 6 i le itulau e 136.]

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai i i itulau v–vii.

Toe iloilo le “Mai le Soifuaga o Siaosi Alapati Samita” (itulau e 123–24). Aisea na matua naunau ai Peresitene Samita i le galuega faafaifeautalai? O le a se uiga ia te oe o le avea “muamua lava, o ia o se faifeautalai mo le Ekalesia”?
O le a se isi mea ua ofo atu e le talalelei toefuataiina i le lalolagi e faaopoopo i “lesona o le amiolelei” ia e faia e le tele o lotu? (Mo ni faataitaiga, tagai itulau e 124–25.)
Faitau le vaega o loo amata i le itulau e 125 (tagai foi i le MFF 123:12). O a ni faataitaiga ua e vaaia i tagata ua faatoilaloina ni manatu sese e uiga i le Ekalesia e ala i lo latou taliaina o le valaaulia e “o mai ina matamata”? O a ni auala aoga e tuu atu ai se na valaaulia?
Faitau le parakalafa lona tolu i le itulau e 128. Aisea tatou te faatuatuai ai i nisi taimi ona faasoa atu le talalelei i o tatou tuaoi? A o e suesueina itulau e 127–29, mafaufau i ni mea e mafai ona tatou faia e faatoilalo ai lena faatuatuai.
A o e faitauina le vaega o loo amata i le itulau e 129, mafaufau pe o e faia mea ua faamoemoe mai le Alii e te faia e faasoa atu ai le talalelei. Mafaufau ma le agaga tatalo pe mafai faapefea ona e saga tausi atoatoa i lenei poloaiga.
Toe iloilo le vaega mulimuli o aoaoga (itulau e 130–32) ma mafaufau e uiga i le tagata na uluai folasia atu ia te oe po o lou aiga le talalelei a Iesu Keriso. O le a se mea e mafai ona e faia e faaali atu ai pe ta’u atu lou lotofaafetai i lena tagata?

Mau E Faatatau I Ai: Amosa 8:11–12; Mosaea 28:1–3; Alema 26:28–30; Mataupu Faavae ma Feagaiga 4:4; 18:10–16

Fesoasoani faafaiaoga: “E sili ai le faaaoga na o ni nai manatu lelei ma faia ai se talanoaga lelei—ma se aoaoga lelei— nai lo le soona fai, ma taumafai e aoao atu upu uma o i le tusi lesona … E matua taua lava se siosiomaga e le faanatinatia, pe afai e te manaomia le i ai o le Agaga o le Alii i lau vasega” (Jeffrey R. Holland, “Aoao Atu ma le Aoao Mai i le Ekalesia,” Liahona, Iuni 2007, 56).

“O le Talalelei a Iesu Keriso lea tatou te tauaveina. O le naunautaiga e laveai agaga o fanau a tagata lea o loo mumu i o tatou loto.”

“O i latou foi o ē talitonu o le a mulimuli i le mamanu na tuuina mai e le Faaola ina ua Ia fetalai atu i Ona soo, ‘O lē faatuatua ma papatisoina, e faaolaina ia.’”

“A tatou maua le agaga o le talalelei, o lo tatou manao, ia mafai ona aoao atu le toatele o fanau a lo tatou Tama tatou te mafai ona oo atu i ai.”