Mataupu 8

O Faamanuiaga o le Malumalu mo i Tatou Lava ma O Tatou Augatama

O le faamoemoega o malumalu o le saunia lea o se nofoaga e faatino ai sauniga paia mo e ola ma e oti.

Mai le Soifuaga o Siaosi Alapati Samita

I le 1905, a o avea ma se Aposetolo fou, sa malaga taamilo ai Siaosi Alapati Samita i ni nai nofoaga taua o le talafaasolopito o le Ekalesia, faatasi ma Peresitene Iosefa F. Samita ma isi uso o le Korama a le Toasefululua. O se tasi o nofoaga sa latou asiasi i ai o Katelani, Ohaio, lea sa fausia ai e le uluai Au Paia le malumalu muamua o lenei tisipenisione. “Ina ua latou vaaia le taulaga,” sa manatua e Elder Samita, “o le mea muamua lava na faafeiloaia la matou vaaiga o le malumalu matagofie o Katelani. … O iina sa vaai ai le Perofeta o Iosefa Samita ma [Oliva Kaotui] i le Faaola i luga o le si’o o le pulelaa. O iina na tauaao atu ai e Mose ia i la’ua ki o le faapotopotoina o Isaraelu; ma sa o mai ai foi Elaia ma Elia i le mana ma le mamalu o o la’ua valaauga, ma aumaia ki sa la tauaaoina i aso o la la’ua misiona i le lalolagi.”

A o savavali atu le aumalaga i le malumalu, sa mafaufau Elder Samita e uiga i le Au Paia tuuto o e sa latou fausia. “Ina ua matou malamalama sa fauina le fale e tagata i le taimi o lo latou matitiva a’ia’i, o le lotototoa o alii sa galulue mai lea aso i lea aso e faataatia le faavae ma fausia puipui ma le tino o lena fale, ona tutu ai lea i le po ma auupega e puipuia ai mai ia i latou o e na tauto e le tatau ona mae’a le fale, sa le faigata ona matou lagonaina e leitioa taliaina e le Alii la latou taulaga ma faamanuiaina i latou e pei o nai tagata e toaitiiti ua faamanuiaina i le fogaeleele.”¹

I ni tausaga mulimuli ane, ina ua uma ona vaetofia e avea ma Peresitene o le Ekalesia, sa faapaiaina ai e Peresitene Samita le Malumalu o Idaho Falls Idaho. I le tatalo o le faapaiaga, sa ia faafetai atu ai mo le galuega faaola o loo faatinoina i le malumalu mo e ola ma e ua oti:

“Matou te faafetai atu i lau afio, le Atua e, mo le auina mai o Elia, le perofeta anamua, o lē ‘… tuuina i ai ki o le mana o le faaliliuina o loto o tama i fanau, ma loto o fanau i tama, ina ia le taia le lalolagi atoa i le faafanoga.’ [MFF 27:9.] Matou te faafetai atu i lau afio i le auina atu o ia i lau auauna, o Iosefa Samita, e faaee atu i ai ki ma le pule o le galuega mo e ua maliliu, ma faailoa atu i ai o le ata o le faaolataga e aofia ai le aiga atoa o tagata, o le talalelei e āoāo lona mana, ma e te le faailoga tagata, ma ua saunia le ala mo le folafolaina atu o le talalelei o le faaolataga i e ola ma e ua oti. E sili ona matou faafetai atu i lau afio ona ua saunia le faaolataga mo i latou uma e mananao ina ia faaolaina i lou malo.

“Ia avea ma mea malie i lou nuu le sailia o gafa o o latou tuaa ina ia mafai ai ona avea i latou ma faaola i luga o Mauga o Siona, e ala i le faatinoina o sauniga i Ou malumalu mo o latou aiga ua maliliu. Matou te tatalo foi ina ia mafuta tele le agaga o Elia i luga o i latou uma i soo se atunuu, ina ia uunaia i latou e āo mai ma ia maua gafa o o latou augatama; ma ia faaaogaina e lau fanau faamaoni ia malumalu paia e faatino ai mo e ua maliliu o sauniga uma mo lo latou faaolataga e faavavau.”

I lana tatalo, sa faailoa aloaia ai e Peresitene Samita o le malumalu o le maota lava o le Alii ma o se nofoaga e mafai ona lagonaina ai le afio ai o le Atua:

“O le aso, matou te faapaiaina nei le Malumalu i lau afio faatasi ai ma mea uma o i ai ina ia mafai ona paia i lau silafaga; ia mafai ona avea ma se fale o le tatalo, se fale o le viiga ma le tapuaiga, ia i ai lou mamalu i ona luga ma ia tumau pea lou afio ai iinei; ma ia mafai ona avea ma se maota e taliaina mo lou Alo Pele, o Iesu Keriso, lo matou Faaola; ia mafai ona faapaiaina ma faamanuiaina i ona vaega uma e paia i lau afio, matou te tatalo foi ina ia uunaia i latou uma o e o le a ulufale mai i lou Maota, i lona paia. …

“Faamolemole, lo matou Tama Faalelagi e, ia lagonaina pea lava pea lou afio ai iinei, ina ia iloa ai e i latou o e faapotopoto mai iinei o i latou lava o au malo, ma o lou Maota lava lenei.”² [Tagai fautuaga 1 i le itulau e 92.]

Aoaoga a Siaosi Alapati Samita

O totonu o le malumalu tatou te maua ai sauniga paia, e aofia ai sauniga e fusia ai aiga mo le faavavau.

Ina ia mafai ona tatou sauniuni mo le malo [selesitila], na toefuatai mai ai le Talalelei a Iesu Keriso, e le Alii i lona alofa mutimutivale, ma tuuina i ai le pule paia, ona tuuina mai lea o le malamalama i Ana fanau e faapea, e i ai sauniga patino e mafai ona maua ma faatinoina. O le faamoemoega lenei ua fausia ai malumalu ma maua ai e i latou o e mananao i se nofoaga i le Malo Selesitila, le avanoa e o atu i ai ma maua ai o latou faamanuiaga, e faamauoa ai o latou olaga ma saunia ai i latou mo lena malo.³

Ua na o i tatou lava tagata i le lalolagi ua iloa le mafuaaga o le i ai o malumalu.⁴

O [malumalu] taitasi ua fausiaina mo se faamoemoega sili e tasi e faavavau: e avea ma se Maota o le Alii, ia maua ai se nofoaga paia ma le talafeagai mo le faatinoina o sauniga paia e fusifusia ai i le lalolagi e pei ona i ai i le lagi—o sauniga mo e ua oti ma ē o ola, ia e mautinoa ai e i latou o ē ua maua ma faamaoni i a latou feagaiga, le mafutaga ma o latou aiga, o lalolagi e leai se iuga, ma le faaeaga faatasi ma i latou i le malo selesitila o lo tatou Tama.⁵

E ao ina tatou faafetai mo se iloa i le faavavau o le feagaiga o le faaipoipoga. Afai e gata i lenei olaga mea tatou te faamoemoe i ai ia Keriso, ua sili lo tatou malaia i tagata uma lava [tagai 1 Korinito 15:19]. O le mautinoa e faapea e faaauau lava i le lagi a tatou sootaga o loo fai iinei o ni matua ma fanau, o ni tane ma ava, ma o le amataga lenei o se malo sili ma le mamalu sa fuafua e lo tatou Tama o le a fai mo tatou tofi i le isi itu, e faatumulia ai i tatou i le faamoemoe ma le olioli.⁶

Afai tatou te mafaufau, e pei ona manatu ai le toatele, ua maliu lo’u toalua faapelepele, ma ua maliliu foi o’u matua pele, ma ua mou atu e faavavau mai lo’u olaga ma o le a ou le toe vaai lava i ai, ona aveesea ai lea o se tasi o o’u fiafiaga aupito sili o le olaga: o le mafaufau e toe feiloai ma i latou, ma latou faafeiloai mai ma lo latou naunau alofa, ma faafetai atu ia i latou mai le ta’ele o se loto faafetai mo mea uma sa latou faia mo au.

Peitai, e tele naua, e miliona ma miliona fanau a lo tatou Tama e le o iloa, o lo latou taliaina o sauniga patino ua faatonuina mai e lo tatou Tama Faalelagi, e mafai ai e tane ma ava ona faatasia mo le olaga nei ma le faavavau ma olioli ai i le mafutaga ma a latou fanau e faavavau. E tatau ai ona tatou matua faafetai mo lena iloa.⁷

E laitiiti lava ni nai nofoaga i le lalolagi e mafai ai ona tatou faaipoipo mo le faavavau, ma o malumalu sa ia o le Atua. … E toatele foi o tatou uso ma tuafafine, fanau uma a lo tatou Tama Faalelagi, ua le mauaina lenei avanoa ona o … mafuaaga e lē maalofia. Peitai, afai latou te ola agavaa ma afai latou te faaavanoaina i latou lava mo le avanoa pe afai na mafai ona faia, o le a leai lava se mea latou te maumauina ona o nei tulaga lē tumau e le manaomia. Ae manatu ane la i le tele o le tiutetauave a i latou o ē nonofo i mea e mafai ai e alii ma tamaitai ona tuufaatasia mo le faavavau, ma mafai ai ona latou o e faia le galuega mo o latou tagata ua maliliu! E le maua e tagata o le lalolagi lenei faamanuiaga. Ou te le iloa pe tatou te talisapaiaina. …

Ia tatou aoaoina a tatou tupulaga i nei mataupu mai le popofou o lo latou talavou, a oo ai i le taimi latou te faaipoipo ai, o le a leai se fesili i o latou mafaufau po o fea pe faapefea ae po o ai foi e tatau ona faatinoina lena sauniga paia—ma na o le pau lava le nofoaga e mafai ona faatinoina ai mo le olaga nei ma le faavavau, o totonu lea o se malumalu sa.⁸

Ou te faafetai [i le Alii] mo sauniga uma o le Maota o le Alii ua ou mauaina, sauniga taitasi e le’i faamoemoeina mo na o a’u lava, ae ua faatagaina au ou te mauaina se vaega sa faamoemoeina mo ana fanau uma lava, po o fea lava o latou i ai, pe afai latou te naunau e talia mea ua ia ofoina mai mo i latou, e aunoa ma se tupe e aunoa foi ma se tau.⁹

O… malumalu uma lava ua fausia pe o le a faapaiaina, o le a faamaonia le avea ma se faamanuiaga e le mafuatiaina ia i latou uma e faaagavaaina i latou lava mo le avanoa e faaaoga ai, e le gata mo i latou lava ae mo o latou aiga foi ua maliliu.¹⁰ [Tagai fautuaga 2 i le itulau e 93.]

O galuega i le malumalu tatou te faaavanoaina ai faamanuiaga e faavavau mo o tatou tuaa ua maliliu.

E autausaga taimi ua faaalu e le sosaiete o gafa e āo mai ai faamatalaga [o talafaasolopito o aiga], ma ua autausaga foi taimi ua faaalu e isi e o ai i le Maota o le Alii e papatiso ai mo i latou o e ua maliliu, e faamauina tane ma ava ma a latou fanau, e faatasia le aiga e pei ona aoao mai e lo tatou Tama Faalelagi e tatau ona tatou faia. E lelei pe a taitasi i tatou ma fesili ifo ia te ia lava: O le a la’u mea o fai i ai? Pe o ou faia ea la’u vaega? Na ta’u mai e lo tatou Tama Faalelagi i tagata, e ala mai ia Iosefa Samita e faapea, o le a tatou le maua o tatou faamanuiaga, ma o le a vavaeeseina i tatou, sei vagana ai ua tatou faatinoina le galuega mo e ua maliliu. Ma o se tasi o mea mulimuli na taumafai le Perofeta e fai, o le faamae’aina lea o se malumalu ia mafai ai e tagata ona o i ai ma faatino le galuega mo e ua maliliu. O le taua lena. E tatau lava ona i ai se tasi na te faia.¹¹

Ua ou manatua ai nei se tala i se au uso e toalua o e sa nonofo i le taulaga i matu o Iuta: O le uso matua, o Enele, o se alii e teutupe ma o se faioloa, ma sa maumea. O le isi uso, o Siaosi, o se faifaatoaga, ma sa le tele ni ana mea vagana ai mea na te manaomia, ae sa i ai sona naunautaiga e fai galuega o le malumalu mo e ua maliliu. Sa ia sailia o latou gafa ma alu i le malumalu e faigaluega mo i latou ua maliliu.

I se tasi aso sa fai atu ai Siaosi ia Enele, “Ou te manatu ua tatau ona e alu i le malumalu e fesoasoani ai.”

Peitai sa fai mai Enele, “E leai so’u taimi e fai ai se mea faapena. E alu uma lo’u taimi i la’u pisinisi.” …

Na mavae se tausaga, ona alu atu lea o Enele i le fale o Siaosi ma faapea atu, “Siaosi, sa fai la’u miti, ma ua ou popole ai. Mata e mafai ona e faamatala maia le uiga?”

Sa fesili Siaosi, “O le a lau miti, Enele?”

Fai mai Enele, “Sa ou miti ua ta feoti ma sa ta o atu i le isi itu o le veli. A o ta o, sa ta tau atu i se aai matagofie. Sa potopoto tagata i ni vaega i le tele o nofoaga, ma o nofoaga uma lava na ta tau atu i ai, sa latou faatalofa atu ia te oe ma opo atu oe ma faamanuia atu ia te oe ma fai mai, oka so latou faafetai ina ua vaai ia te oe, ae,” ona ia fai mai lea, “sa leai ma se isi o i latou na amanaiaina au; sa toetoe lava ina lē ano mai. O le a le uiga o lena mea?”

Sa fesili atu Siaosi, “Sa e manatu ua ta i ai i le isi itu o le veli?”

“Ioe.”

“Ia, o le mea lena sa ou talanoa atu ai ia te oe. Sa ou taumafai ia e alu e fai ni galuega mo tagata na ua i ai iina. E toatele i latou ua ou faia o latou galuega, ae e anoanoai isi e lei faia o latou galuega. … Ua tatau ona e galue loa, aua o lena ua e tofo i le mea o le a i ai pe a e oo atu iina, pe afai e le faia lau vaega i le faatinoina o lenei galuega mo i latou.” [Tagai fautuaga 3 i le itulau e 93.]

E tele taimi ou te mafaufau ai i lenei tala i olaga o lenei au uso. E toatele tagata e le malamalama i le taua tele ma le paia o le olaga; latou te le malamalama i le paia o le faaipoipoga e faavavau. E i ai nisi o o tatou tagata e le naunau i o latou gafa. Latou te le popole lava i o latou augatama; pe a e manatu i a latou amioga. E le o i le malumalu e faia galuega mo o latou tagata ua maliliu. …

… A uma ona tatou ulu atu i le Maota o le Alii mo o tatou lava faamanuiaga, ona tatou mafaufau lea i lo tatou tiutetauave mo o tatou augatama. O le a se faataliga o oe pe a e alu atu i le isi itu? Pe o oe lea o le a latou aapa atu i ai ma faamanuia i aso uma o le faavavau, pe o le a pei oe o le uso sa galue ma lona manatu faapito i ana lava faafitauli iinei ae tuu i latou ua le mafai ona fesoasoani ia i latou lava e aunoa ma lana fesoasoani?¹²

Ua outou iloa ua fusia faatasi i tatou uma i le galuega tele o loo faia i malumalu o lo tatou Tama, lea e aumaia faatasi ai aiga sa le’i tuufaatasia muamua, e ala i le mana o le Perisitua Paia. Ua faamoemoe le Alii ia maua e ona atalii ma afafine taitasi le avanoa ia faamanuiaina ai, e le gata iinei i le lalolagi, ae ia olioli foi i faamanuiaga e faavavau.

Mafaufau i le tuuto ma le faamaoni o i latou e ulu atu i lea aso ma lea aso i na malumalu, ma faia ai sauniga mo i latou ua maliliu, ma ua iloa lenei mea, e tutusa foi le naunau mai o i latou o i ai i lena itu, mo i tatou. O loo latou tatalo mo i tatou ma lo tatou manuia. O loo latou aioi foi, i la latou lava ala, mo o latou aiga, mo a latou fanau o e o loo ola ai i le lalolagi.¹³

O le a fesoasoani le Alii ia i tatou i le sailiga o o tatou aiga ua maliliu.

I Sikako i ni nai tausaga ua mavae, i le taimi o le Faaaliga o Atinae o le Seneturi, sa ou alu atu ai i se tasi aso i le pa’usisi o le tatou Ekalesia ma fesili i faifeautalai po o ai e faauluulu i ai le faaaliga tele faaleaganuu ma faasaienisi.

Sa latou fai mai o le igoa o le tamaloa o Dawes, ma sa ou fesili, “Pe o ia o se uso o Charles G. Dawes, lea sa peresitene lagolago i le Iunaite Setete ma le amepasa i Peretania Tele?”

Ma sa latou tali mai, “Ioe.”

“Ia,” sa ou fai atu i ai, “Ua ou fiafia lava e iloa lena mea. Ou te iloa o ia.”

Sa ou faapea ifo ia te au lava, “Ou te manatu o le a ou asiasi atu ia te ia. O lona uiga o ia o Henry Dawes.” Sa ou iloaina Henry Dawes, o lea sa ou alu ai i le telefoni ma vili lona ofisa. Sa ta’u atu e lana failautusi … ia Mr. Dawes, o loo i o Siaosi Alapati Samita mai le Aai o Sate Leki, ma o loo manao la te feiloai, ma sa ia fai i ai e ta’u mai ou te alu atu. O lea, sa na le tuua a’u e faatalitali i se laina o le toaselau o tagata mo so’u avanoa, sa ia aveina a’u i se isi faitotoa i autafa, ma sa tu mai ai iina se alii umi ou te le’i vaai muamua lava i ai i lo’u olaga.

Sa ia fai mai, “O au o Mr. Dawes.”

Sa tauagafau lava le alii, ae e mafai ona outou vaai faalemafaufau i lo’u maasiasi tele! O ia o Mr. Dawes, ma o ia o le uso o Amepasa Dawe, ae o ia o Rufus Dawes. Ou te lei iloaina e i ai se Rufus Dawes i le lalolagi.

“Ia,” sa ou fai atu ai, “Ua ou sau e ta’u atu i lau susuga o se faaaliga matagofie tele lea, ma ta’u atu lo’u agaga talisapaia o mea sa e faia e faatulagaina ai ma vaaia ua tino mai. E ofoofogia mea ua ausia, ma o se aoaoga lava i le tele o tagata. Ia, ou te malamalama o oe o se tamalii e pisi, ma e na o le pau lena o le mea sa ou manao ai ou te sau e ta’u atu, ma faamalo atu ma faafetai atu i lau susuga.”

“E taua tele,” na ia fai mai ai. “Susu mai i totonu.”

“E leai, na pau lava lena o le mea na ou sau e ta’u atu,” sa ou tali atu ai.

Na ia fai mai, “Susu mai i totonu.”

Sa ou fai atu, “E leai, e selau tagata o loo faatalitali e vaai i lau susuga.”

“E leai lava se tasi o i latou o le a fai maia se tala manaia e pei ona e saunoa mai ai.”

O lea na ou alu ai i totonu, ua leai nisi manatu ma toetoe a le mafai ona manava. Sa tauanau pea ou te nofo i lalo, ma o le isi mea na ou fai atu ai o le: “Lau susuga Dawes, o fea e o mai ai ou tagata?”

“Pe o le uiga o lau tala o i fea o Amerika?” na ia fesili ai.

“Soo se mea lava.”

Na ia fai mai, “E te fiafia i gafa?”

“O lea lava.” Sa ou tali atu ai. “Ua ia i matou se tasi o faletusi o gafa e sili ona matagofie i le Aai o Sate Leki.”

Fai mai a ia, “Tulou lava,” ma savali ese atu ma lona ofisa ona toe foi mai ai lea ma se pusa e pei o le tele o se Tusi Paia tuai faaleaiga. Sa ia tago i se polo, ma tatala le pusa, ma aumai ai se afifi o loo tapeleni i ni pepa papae. Sa ia aveeseina pepa ae tuu i luga o le laulau se tasi o tusi aupito matagofie lona tuufaatasia, ua ou vaai i ai. Sa matua matagofie lona lolomiina ma ata tusi, ma sa matagofie le teuteuina o le faavaa i le auro.

A o ou matamata i ai, sa ou fai atu, “Lau Susuga Dawes, o se galuega matagofie tele lenei.”

“Ua tatau ai. Na alu ai la’u luasefululima afe tala.”

“Ia,” sa ou fai atu ai, “ua tatau ai.”

Fai mai a ia, “E i ai sona aoga ia te oe?”

Sa ou fai atu, “E i ai pe a faapea ou te maua.”

Na ia fai mai, “Ua lelei, e mafai ona ave ma oe!”—luasefululima afe tala le tau o gafa ua tuu mai i o’u lima e se tagata faatoa ou feiloai i ai i le na o le lima minute talu ai! Sa ou maofa. Sa faaauau le ma talanoaga mo sina taimi puupuu. Sa ou ta’u atu ia te ia lo’u fiafia tele ina ua ou maua le tusi, ma o le a ou tuuina i le faletusi o gafa i le Aai o Sate Leki.

A e ou te lei tuua le potu, sa ia fai mai, “Lau susuga Samita, o le gafa lea o lo’u tina, le gafa o le Au Gate. O loo matou saunia foi le gafa o lo’u tama—le aiga o Dawes. O le a pei lava foi o lena. A mae’a, ou te fia auina atu foi se kopi ia te oe.”

Limasefulu afe tala o gafa!—ae sa na ona ou taumafai lava e faaaloalo atu i se tasi. Ou te le manatu o se mea na faafuasei lena mea. …

O loo fesoasoani le Alii ia i tatou; e ofoofogia le ala e tatala ai le ala ma le auala e uunaia soo ai isi tagata e tapenapena o latou gafa. Peitai, e i ai nisi taimi tatou te le faaaogaina ai o tatou avanoa e sauni ai o tatou gafa, e ui lava ina sa tautino mai e le Alii sei vagana ua tatou faia o tatou galuega o le malumalu, o le a teena i tatou faatasi ma o tatou tagata o e ua oti [tagai MFF 124:32]. O se mea taua tele lenei. O se mea e le mafai ona tatou suia, pe afai tatou te faamaimauina o tatou avanoa seia uma lenei olaga. … E le mafai ona tatou faamoemoe e faia e nisi lenei galuega mo i tatou.

O lea, o le Alii, po o le a lava le auala, ua uunaia, fautuaina, ma apoapoa’ia i tatou e faia la tatou galuega. E i ai nisi aiga o ē le mafai ona latou faia le galuega mo i latou lava, ua i ai se tasi e galue i taimi uma i o latou gafa i le malumalu, ma faamaumauga.

Afai e fai la tatou vaega, o le a tatala mai o tatou gafa ia i tatou—o nisi taimi i se tasi ala, o se isi foi taimi i se isi ala. O lea la ou te fia fautua atu ai ia te outou, o’u uso e ma tuafafine: ia fai la tatou vaega.¹⁴ [Tagai fautuaga 4 i le itulau e 93.]

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai i itulau v–vii.

Faitau vaega mai le tatalo o le faapaiaga o le Malumalu o Idaho Falls Idaho i itulau e 82–83, ma faitau leMFF 109:1–5, 10–13 (mai le tatalo o le faapaiaga o le Malumalu o Katelani). Mafaufau loloto i lagona e te maua pe a e alu i le malumalu, ma mafaufau e uiga i aafiaga ua faamalosia ai lau molimau o le malumalu o le maota o le Alii.
O a mafuaaga ua tuuina mai e Peresitene Samita mo le fausiaina o malumalu? (tagai itulau e 83–84). O le a se mea e mafai ona tatou faia e faamalosiau ai i le autalavou e sauniuni ia faaipoipo i le malumalu?
Faitau le tala o i le itulau e 86. O a nisi o auala faigofie e mafai ai e se tasi e tele ni ona tiutetauave ona ia auai i le faia o galuega o talafaasolopito o aiga? O a mea e mafai ona fai e korama o le perisitua ma le Aualofa e faatinoina ai?
Toe iloilo le vaega o loo amata i le itulau e 88. Na faapefea ona fesoasoani le Alii ia te oe a o taumafai e saili faamatalaga o ou augatama? O a isi faamanuiaga ua e mauaina a o e faatinoina le galuega o talafaasolopito o aiga?

Mau E Faatatau I Ai: Malaki 4:5–6; Mataupu Faavae ma Feagaiga 97:15–16; 110; 124:39–41; 128:9, 15–24.

Fesoasoani faafaiaoga: A faitau leotele e se tasi tagata mai aoaoga a Peresitene Samita, valaaulia isi tagata o le vasega e “faalogologo ma vaavaai mo mataupu faavae po o ni manatu patino. Afai o i ai i se parakalafa ni upu po o ni fuaitau e le masani ai pe faigata foi, faamalamalama muamua a o lei faitauina le parakalafa. Afai e ono faigata i se tasi o le vaega ona faitau, fesili mo nisi e ofo mai nai lo le feauaua’i” (O Le Aoao Atu E Leai Se Isi Valaauga e Sili Ai, 58).

O totonu o le Malumalu o Katelani, lea na faaali ai Elia le perofeta anamua ia Iosefa Samita ma faaee atu ia te ia le mana o faamauga ma ki o le galuega mo e ua maliliu.

“E laitiiti lava ni nai nofoaga i le lalolagi e mafai ai ona tatou faaipoipo mo le faavavau, ma o malumalu sa ia o le Atua.”

“Mafaufau i le tuuto ma le faamaoni o i latou e ulu atu i lea aso ma lea aso i na malumalu, ma faia ai sauniga mo i latou ua maliliu.”