Mataupu 22

Tausiga o le Fanau i le Malamalama ma le Upumoni

Ua tuuina mai e le Alii i matua le tiutetauave e aoao a latou fanau i le talalelei e ala i upu ma faataitaiga.

Mai le Soifuaga o Siaosi Alapati Samita

I le tulata i le faaiuga o lona soifua, na tomanatu ai Peresitene Siaosi Alapati Samita i le tausiga o ia ma aoaoga a ona matua:

“Sa ou fanau mai i se fale faatauvaa. … Sa ola o’u matua i ni tulaga e ese le faatauvaa, ae sa ou faamanu atu i lo’u Mataisau ma faafetai atu ia te ia ma lo’u loto atoa mo le auina mai o au i lo la’ua aiga.

“Sa ou ola a’e i le Aai o Sate Leki. Ina ua valu o’u tausaga, sa papatisoina au i le City Creek. Sa faamauina au o se tagata o le Ekalesia i le sauniga anapogi i le Uarota Lona Sefulufitu, ma sa ou aoaoina ai a o ou tamaitiiti, o le galuega lenei a le Alii. Sa ou aoaoina ai e i ai perofeta o loo soifua i le lalolagi. Sa ou aoaoina ai o le a uunaia e musumusuga a le Silisiliese i latou o ē ola ina ia olioli ai. …

“Ou te le iloaina lava se tagata i le lalolagi atoa, e tele atu ni mafuaaga e faafetai ai nai lo a’u. Ou te faafetai mo lo’u tofi, faafetai mo matua sa aoaoina au i le talalelei a Iesu Keriso ma faia se faataitaiga i lo la’ua aiga. Afai na ou faia se mea sa le tatau ona ou faia i lo’u olaga, o se mea lava ou te le i ono aoaoina mai i le fale o lo’u tina. O le i ai o se aiga toatele o tamaiti, sa manaomia ai se tina e lava le onosai, ae sa onosai o ia i taimi uma ia i matou. Sa i ai i taimi uma le agamalu ma le agalelei ma le alofa.”¹

I lona lava fale, sa taumafai ai Siaosi Alapati Samita e mulimuli i faataitaiga a ona matua, o le aoao atu ma le onosai ma le alofa. Sa toe manatua e lona afafine o Edith se aafiaga mai lona talavou:

“Sa ia fautuaina pea i matou e uiga i a matou amio, ma faamamafa mai ai le faamaoni ma le lē faaitu’au. Ou te manatua se tasi aso a’o ou agai atu i le fale mai la’u lesona tapiano, sa galo i le avetaavale ona tapa mai i lo’u pasese. … Sa pasi loa o ia mai ia te a’u, ma sa ou taunuu i le mea ou te alu i ai o la lava e uu la’u tupe i lo’u lima, ma o le mea moni na ou fiafia ua ou tietie fua.

“… Sa ou tamoe fiafia atu i lo’u Tama ma ta’u atu i ai lo’u laki. Sa faalogologo mai o ia ma le onosai i la’u tala. Sa amata ona ou mafaufau ua matua manuia lava a’u. … Sa ou talitonu e le’i iloa e le avetaavale e le’i totogia lo’u pasese, o lona uiga sa lelei mea uma.

“Ina ua uma la’u tala, sa fai mai Tama, ‘Ae, talofa e isi o’u afafine, tusa pe le iloa e le avetaavale lena mea, ua e iloa ma ou iloa ma iloa foi e le Tama Faalelagi. O lea, e toatolu lava i tatou e tatau ona faamalieina i le vaai ua e totogia atoa le tau o le mea na e maua.’”

Sa toe alu Edith i le tulimanu o le auala ma totogi lona pasese ina ua toe foi mai le taavale. Sa ia faamatala mulimuli ane lona lotofaafetai i le auala sa taulima ai e lona tama lea tulaga: “Ua ou matua faafetai lava mo se Tama sa lava lona atamai e faasino mai ai lo’u sese, aua ana faapea e faagalogalo, semanu ua ou manatu sa ia faamaonia, ma atonu ou te toe taumafaia foi se isi mea faapena.”² [Tagai fautuaga 1 i le itulau e 250.]

Aoaoga a Siaosi Alapati Samita

Ua i ai i matua le uluai tiutetauave e aoao a latou fanau i le talalelei.

O se tasi o outou faamanuiaga silisili ma le ‘oa o lea e maua pe a outou aoao atu e faapei ona tatau ai, ma toleni faamasani e pei ona outou tatau ai ia nei agaga filifilia o loo auina mai e lo tatou Tama Faalelagi i le lalolagi i nei aso e gata ai. … Aua le tuua le aoaoina faamasani o a outou fanau i a’oga faitele. Aua le tuua le aoaoina faamasani o i latou i le Peraimeri, i le Aoga Sa, ma [faalapotopotoga mo autalavou a le Ekalesia]. O le a latou fesoasoani ia te outou ma faia so latou sao lelei, ae manatua le mea ua fetalaia mai e le Atua lava Ia, o matua e le aoaoina a latou fanau ia faatuatua i le Atua, salamo ma le papatisoga ma le faaee atu o lima pe a ta’ivalu o latou tausaga, o le a pau le agasala i ulu o matua [tagai MFF 68:25–28]. E le o se faamata’u lenei, o’u uso e ma tuafafine, o se fautuaga agalelei ma alofa lena a lo tatou Tama Faalelagi o lē na te silafia mea uma ma malamalama ma silafia le uiga pe a tuua fanau e ola e aunoa ma lenei aoaoga faamasani.³

O le mea o le a ou fai atu ai, ua ou matua naunau lava ina ia matua uunaia ai mafaufau o matua uma i Siona, o le, e ui ina sa tuuina mai e le Alii nei iunite matagofie uma faaleaoaoga, e ui ina tele naua le sao o saienisi mo lo tatou sologa lelei ma o tatou faamanuiaga, e ui ina saunia e le Ekalesia ni nofoaga e mafai ona tatou auina atu i ai a tatou fanau e aoao ai i le talalelei a Iesu Keriso, e le faamaloloina mai ai oe ma a’u mai le tiutetauave ma le matafaioi ua tuuina mai ia i tatou e lo tatou Tama Faalelagi e aoao a tatou lava fanau. … E le lava le aoao o la’u fanau i le faatuatua, salamo ma le papatisoga, ma le faaee atu o lima mo le meaalofa o le Agaga Paia i faalapotopotoga a ausilali. Ua poloai mai lo’u Tama i le lagi e tatau ona faia e a’u lava ia.⁴

E leai se isi e mafai ona faatinoina le vaega ua atofa mai e le Atua ia i tatou o ni matua. Sa tatou talitonu ua ia i tatou se matafaioi ina ua avea i tatou ma auala e aumaia ai fanau i le lalolagi. E le mafai ona tatou tuu atu lena tiutetauave i se faalapotopotoga. O tatou e ona. … Muamua ma le taua, o le matafaioi e i luga o oe ma a’u e le gata ina fautua ma apoapoai ae aoao foi, e ala i le faia o se faataitaiga, e ala i le faaalu ia lava se taimi ma e pele ia i tatou, o nei tama ma teine, ina ia latou lē oo atu … i ala leaga.⁵

Faapotopoto mai lou auaiga ia te oe, ma afai e te lei tuuina atu ia i latou i le taimi ua sola se malamalama i faamoemoega o le olaga ma se iloa i le Talalelei a lo tatou Alii, fai nei loa, auā ou te fai atu o se auauna a le Alii, ia te oe, latou te manaomia i le taimi nei ma o le a latou manaomia nei ma le lumanai.⁶ [Tagai fautuaga 2 i le itulau e 250.]

E le tatau ona avea mea tatou te pupū i ai ma ala e faagalo ai lo tatou tiute e aoao a tatou fanau.

O loo ta’u mai i le Luka o le a i ai se taimi o le a fetinaa’iina ai tagata i mea e popole ai ma oloa ma mea faafiafia o le olaga [tagai Luka 8:14]. Ua ou manatua … e oo lava i le taimi nei, alii ma tamaitai ou te alofa i ai, ua fetinaa’iina lo latou faaleagaga i mea lava nei, ma ua taitaia i latou e le tiapolo i lena auala faigofie o mea faafiafia, ma ua latou lē amanaiaina o latou tiute o ni matua ma ni tagata o le Ekalesia a Iesu Keriso.

… O lenei, i le lotolotoi o le le mautonu, faanaunauga ma mea faafiafia uma o le olaga, … aua nei galo ia i tatou lo tatou tiute mo nei tama ma teine o ē na faia i le faatusa o le Atua. O Ia o le Tama o o latou agaga, ma o le a ia tu’ua’ia i tatou mo aoaoga latou te maua. Ou te faamoemoe ma tatalo o le a tatou aoaoina i latou, a oo mai le iuga ua mafai ona tatou maua mai ia te ia lena faamanuiaga, “Le auauna lelei e ma le faamaoni, ulufale mai ia i le fiafia o lou Alii,” ma mafai ai ona tatou mafuta ma a tatou fanau e faavavau.⁷

Ou te fia faamatala atu se tala. I ni nai tausaga talu ai, sa nonofo ai i Initiana ni tamaiti se toalua, o ni tamaiti sa galulue i faatoaga—faatoaga e lima i le fitu maila le va. Sa la galulue malosi i aso uma i le faiga o a la’ua feau, tatauina o le susu, ma isi mea. Sa alu le tamaitiiti muamua i lona tama i se tasi aso ina ua tusa ma le 13 pe 14 tausaga le matua ma fai atu, “Tama, ou te fia alu i le aai. Ta te fia vaai i moli susulu. Faamata e mafai ona ou vave alu i se afiafi, pe afai ou te galue malosi ma uma a’u galuega?” Fai mai le tama, “E le mafai ona e alu aua e le mafai ona fai au galuega.” “Afai ou te naunau e alapo ma ou galue i le aso atoa, pe mafai ona ou savali i le aai? E le mamao tele, ma e mafai ona tasi pe lua ni itula ou te i ai iina ona ou vave sau ai lea i le fale.” Fai mai le tama, “Ioe, afai o le a faia uma au feau, ona mafai lea ona e alu.” Tama, matau mai le mea lenei. O le taunuuga, sa alu o ia. Sa taunuu o ia i le taulaga ae ua toeitiiti po. Ua tapuni faleoloa ma faletupe. Sa tele fale taalo ma taaloga faitupe na tatala. Ua i fale uma tagata lelei, o le toatele lava ua i o latou lava aiga. O le au tafafaovale uma la e i magaala po o nofoaga nei. Sa latou vaaia lenei tamaitiiti o sau, ma sa latou aveina. E lei leva ae o latou faaali atu i ai ni mea e le tatau ona vaai i ai se tamaitiiti. O le mea lena na oo i ai o ia. Sa ia maua ai se tofo o se mea e le lelei mo ia.

Na faapena foi ona alu le tamaitiiti lona lua i lona tama. Sa ia fai atu, “Tama, ta te fia alu i le taulaga i se aso. Pe e te le manao ou te alu e vaai ni mea ou te le i vaai i ai? E tatau ona ou alu a o lei pogisa e iloa ai se mea. “Lo’u atalii e,” na tali atu ai le tama, “Ou te manatu ua tatau ona e alu i le taulaga, ma ou te manatu foi e tatau ona oulua o ma lou tama. Filifili e oe le aso ona ou fesoasoani lea i au feau ina ia mafai ai ona ta vave o ma mafai ai ona e feiloai i nisi o a’u uo.”

O le nofoaga lava e tasi lea ou te talanoa atu ai— e le mamao le va o faatoaga nei e lua. E lei uma le vaiaso a ua filifilia le aso. Sa la faia feau, ona o ai lea i le taulaga. Sa taunuu i la’ua ae toeitiiti ta le itula e fa. Na la taunuu atu a o le’i tapunia faletupe. Sa ofu lelei le tamaitiiti. Sa ave o ia e lona tama ma faailoa atu i le pule o le faletupe, lea sa tago atu i lona lima ma fai atu, “A e sau i le taulaga, ona e sau lea e vaai matou ma o le a matou fiafia lava e talia oe.”

Sa ave o ia e lona tama i ofisa o pisinisi lea sa fai ai ana pisinisi, lea sa talileleia ai o ia. Ina ua la o faatasi i le fale, ina ua mae’a se tifaga sa la matamata ai, sa fesootai lena tamaitiiti ma nisi o tamalii aupito lelei i le taulaga. O le taunuuga, ina ua matua o ia ma alu i le taulaga, sa mafuta o ia ma tagata lelei.⁸ [Tagai fautuaga 3 i le itulau e 250.]

Ou te fia fautuaina atu ia te outou … , e leai se ala aupito sili e mafai ona e faaalu ai lou taimi, leai se ala sili e mafai ona e faaaoga ai lou taimi, o le a sili atu le aoga nai lo le aoaoina o au tamaiti ma au teineiti ia agavaa mo faamanuiaga a lo tatou Tama Faalelagi.⁹

O faataitaiga a se matua e mafai ona taitai atu ai se tamaitiiti i le saogalemu, amiotonu, ma le fiafia.

Ia avea i tatou ma faataitaiga o le amiotonu i a tatou fanau, ia faia a tatou tatalo faaleaiga ma ia ole atu mo faamanuiaga mo meaai. Ia vaai a tatou fanau, i le avea ai o i tatou o tane ma ava, tatou te fealofani. A o lava foi le taimi, faaaoga le avanoa o ni tane ma ava e faamanuia ai e le tasi le isi i lo oulua alofa, i lo oulua agalelei ma le loto fesoasoani i soo se itu. Faaaoga le avanoa manu o i ai le taimi e aoao atu ai o outou atalii ma afafine i le ala e ola ai ina ia fiafia. … Ia avea o tatou fale ma malutaga o le filemu ma le faamoemoe ma le alofa.¹⁰

Na o ni nai aso talu ai sa ou vaai ai i se tusi mai se alii pe ua te’a ma le limasefulu pasene o lona soifua. I lana tusi i lona tama sa ia fai mai: “O lou mafaufau alofa mo lau fanau, o lou aoaoina o au, o faataitaiga sa e faia mo au, ua avea o se musumusuga mo au e faia le mea e finagalo le Alii ou te faia. Sa ou lagonaina o lo’u mulimuli i ou tulagavae, o le a ou saogalemu ai.” O se tamā poto lena, o se tamā manuia lena, o sē sa mafai ona totoina i le mafaufau o lona atalii le mautinoa. … Ona o le amio a le tamā—o le mea sili ua ia saafi i lona tama i lana tusi—ona o faataitaiga na faia i lona aiga, ua avea ai nei o ia ma se tasi o le au totoa i lenei Ekalesia. Ua mafai ona ola o ia i le lalolagi ma tausia poloaiga a le Alii. O lona naunau e fai mea lelei, na musuia i le aiga sa ia ola ai. Na te lei mauaina le manatu faapito i le aiga, ae o le lē manatu faapito. E lei naunau matua e maua mea uma sa la mafai ona maua ma taofia ma le manatu faapito mo i latou lava, ae sa la o atu ma saili i latou sa manaomia, ma faamalosiau ma faamanuiaina ai i latou. E le mafai e upu ma tala uma i le lalolagi ona tuuina i le loto o lea alii mea ua ia maua i le taimi nei, ae o le faataitaiga na faia e ona matua, ma i latou sa nonofo i le fale lea sa ia ola ae ai.

E leai so’u masalosalo e i ai alii ma tamaitai e fiaselau, ma le fiaafe o i latou, atonu o i ai i nuu o loo tatou ola ai ma le lalolagi, o le a fai mai lea lava mea e tasi e uiga i aoaoga a o latou tama ma tina. Ae ou te popole o loo i ai nisi o i tatou, ua faatosinaina e tu ma aga a le lalolagi ma ua se’etia ai i le manatu faapea e tatau ona tatou faia mea la e fai uma e isi tusa lava po o a mea ua latou talitonu ai ma fai. O le tulaga la lena, o le a le avea a tatou faataitaiga ma se faamanuiaga ae e mafai ona faaumatia ai le fiafia o a tatou fanau.¹¹

Ia tatou tuuina atu molimau i a tatou taga fai i aso taitasi, faapea foi i a tatou talanoaga, tatou te talitonu o le galuega lenei a le Tama ma o le a aumaia le olioli e le mafaamatalaina ia i tatou, ma o le a faateleina le faatuatua ma le lotomaulalo o fanau e ola a’e i o tatou aiga. O le a faamanuiaina i latou, ma maua le mana e tetee atu ai i faaosoosoga a le tiapolo o loo taulai mai ia i latou, ma o le a suitulaga le mafanafana, filemu ma le fiafia i le faanoanoa e faamafatia ai le fanau a tagata ona o le agasala, ma … o alii ma tamaitai o le a nofoia lenei lalolagi o le a maua le malosi e faatuatuana’i ai i mea leaga o le olaga.¹² [Tagai fautuaga 4 itulau e 250.]

O le alolofa ma le aoaoina o o tatou talavou, e mafai ai ona tatou fesoasoani e malupuipuia i latou mai mea leaga.

Le Au Paia e o Aso e Gata Ai, aoao a outou fanau e tausi le tulafono o le amio mama. Siomia i latou e lima o lo outou alofa, ina ia leai so latou manao e faatino faaosoosoga i mea leaga o loo siomia ai i latou i itu uma. …

O se avanoa e maeu mo matua e nonofo ai i lalo i o latou lava fale, ua siosiomia e se aiga o ni tama ma ni teine mama a’ia’i na tuuina atu ia i latou e lo tatou Tama Faalelagi, o o latou agaga na fanaua e lo tatou Tama i le Lagi! O se avanoa e maeu lo latou miō faatasi e aai i faamanuiaga a lo tatou Tama Faalelagi ma olioli ai i le mafutaga a Lona Agaga, ma ua aoaoina lelei i latou i le popofou o o latou olaga, a o agaigai ina matutua, ua latou tausisia le mama a’ia’i o o latou olaga!

O’u uso e ma tuafafine, ou te aioi atu ia te outou e faapea, faatasi ai ma le faamaoni atili, magafagafa atili, onosai atili nai lo le mea sa i ai muamua, tou te malupuipuia ai le tupulaga faia’e mai i faigata e le maalofia ua tuu e le tiapolo i o latou luma. O le tele o a tatou [tifaga], polokalama i leitio, mekasini, tusi, ma isi mea, e le talafeagai … , vagana ua tatou faaitiitia faatosinaga o nei mea e ala i aoaoga ma siosiomaga lelei, aumaia i le autalavou o manuia e maua mai i le iloa o soifuaga o alii ma tamaitai lelei, aoaoina ia i latou o amioatua a perofeta ma le uiga o le Talalelei a Iesu Keriso, e ono se’e ese atu lava mai ia te i tatou nisi o i latou tatou te alolofa i ai. …

Ia tatou aoao a tatou fanau ina ia mama a’ia’i i o latou olaga, ia amiotonu. Aoao a tatou tama e malupuipuia le mama o o latou tuafafine ma a latou mafutaga ma teine. Aoao o outou afafine e malupuipuia le mama o tama latou te mafuta. … Ia avea ma a tatou mataupu autu, pe a mafai ona tatou faaaogaina lena faaupuga, le tausiga o a tatou tama ma teine i le uunaiga a le Agaga o le Atua, ina ia leai se malosi o le tiapolo e taitaisese ai i latou.¹³ [Tagai fautuaga 5 ma le 6 itulau e 250.]

O le suesue faatasi o le talalelei o se aiga o le a fesoasoani e latalata mai ai a tatou fanau.

I totonu o o tatou aiga, uso e ma tuafafine, o lo tatou avanoa lea, o lo tatou tiute, le faapotopoto mai o o tatou aiga ia fiafia ma faamalolosia ma lagolago e le tasi le isi, ia aoao ai upumoni o Tusitusiga Paia. I aiga uma, e tatau ona faamalosiauina le fanau e faitau le afioga a le Alii e pei ona faaali mai ia i tatou i tisipenisione uma. E tatau ona tatou faitauina le Tusi Paia, le Tusi a Mamona, le Mataupu Faavae ma Feagaiga, le Penina Tau Tele; e le gata ina faitauina i o tatou fale, ae ia faamalamalama foi i a tatou fanau ina ia latou malamalama ai i … fegalegaleaiga a le Atua ma tagata i le lalolagi.

Vaai pe le mafai ona tatou faateleina lenei mea i le lumanai nai lo le mea sa tatou faia ai i le taimi ua sola. Ia tatou tautino atu i tatou lava i le mataupu faavae ma le faiga masani o le faapotopoto mai o o tatou aiga i o tatou lava fale. Ia fesili ifo le tagata ia te ia lava: “Pe ua ou faia ea lo’u tiute i lo’u fale o le faitauina lea ma aoao atu le talalelei, e pei ona faaalia mai e ala i le perofeta a le Alii? Pe ua lata mai ea la’u fanau ia te au ma avea le fale o se nofoaga manaia ma se nofoaga o le migao, alofa, malamalama, ma le tuuto?”

Afai e leai, ia tatou salamo i lo tatou lē amanaiaina, ma faalatalata mai o tatou aiga ma aoao i latou i le upumoni. …

“Pe ua ou faatulagaina lelei ea lo’u aiga?” O le fesili lea e tatau ona i ai i loto uma. Ae le o lea, pe ua faia ea e lo’u tuaoi? Ae, pe ua ou faia ea le mea ua poloaiina ai au e le Alii?¹⁴

O a tatou fanau o le meaalofa aupito taua lea ua tuuina mai e lo tatou Tama ia i tatou. A mafai ona tatou taialaina o latou vae i le ala o le faaolataga, o le a i ai le olioli i le ola e faavavau mo i tatou ma i latou. …

O se tasi auala e mafai ai ona faalatalata mai i latou ia i tatou o le potopoto soo i o tatou fale. Ua faatonuina e le Ekalesia ia faataatia ese ia lē itiiti ifo ma le tasi le po faaleaiga i vaiaso taitasi e potopoto faatasi ai le aiga atoa, ma fiafia ai i le tasi ma le isi, ia olioli ai i nai mea faamalieloto faigofie o le mafutaga faaleaiga, ma talanoaina faatasi mea e taua tele ma tumau.

… I le 1915 na tusi atu ai le Au Peresitene Sili e uiga i lenei mea i “peresitene o siteki, epikopo, ma matua i Siona,” ma ou te sii maia le mea na latou tusia:

“Matou te fautuaina ma uunaia le amatalia o se ‘Afiafi Faaleaiga’i le Ekalesia atoa, o le taimi lea e mafai ai e tama ma tina ona faapotopoto ane a latou tama ma teine i le fale, ma aoao i latou i le afioga a le Alii. … O lenei ‘Afiafi Faaleaiga’ e tatau ona tuuto atu i le tatalo, usu ai viiga, o pese, musika e tata, faitauina o Tusitusiga Paia, autu faaleaiga, ma faatonuga patino i mataupu faavae o le talalelei, ma faafitauli i mea e sa’o ma sese o le olaga, faapea foi tiute ma matafaioi a fanau i matua, le aiga, le Ekalesia, nuu, ma le malo.”

Ma o le faamanuiaga folafolaina lenei ia i latou o le a faia mea ua poloaiina ai:

“Afai e usitai le Au Paia i lenei fautuaga, matou te folafola atu o le a tulai mai faamanuiaga sili. O le a faateleina le alofa i le aiga ma le usitai i matua. O le a atiina ae le faatuatua i loto o le autalavou o Isaraelu, ma o le a latou maua le mana e faasagatau atu ai i uunaiga leaga ma tofotofoga e lofituina ai i latou.”

O loo i ai lava i o tatou luma nei mataupu faavae ma folafolaga.¹⁵

Afai e mafai ona avea le afiafi faaleaiga ma mea moni i le Au Paia o Aso e Gata Ai, afai o le a tatou nonofo lava tatou i se afiafi se tasi i le vaiaso, i lalo o le uunaiga a le agaga o le Alii, i ni a tatou lava faeasaite o siosiomia e i latou na tuuina mai e le Alii ia i tatou, ma ta’u faapitoa mai ai e faapea, e tatau ona tatou aoaoina i latou, semanu o le a toatele ni aiga fiafia e i ai i le taimi nei i le mea o i ai le faanoanoa ma le femisaa’i ma mafatiaga. …

… A tapunia o tatou faitotoa i le lalolagi ma mea o i fafo, ae tatou tuuina atu i le mana o le tatalo ma le faafetai i o tatou atalii ma afafine na upumoni ‘oa sa tuuina mai e le Alii mo lo tatou soifua manuia faapea foi ma i latou, o le a mulimuli mai ai se atina’ega moni o le faatuatua. Ou te faamoemoe o le a mafai ona tatou toe foi mai, pe afai ua tatou o ese mai lena fautuaga. Faapotopoto mai a tatou fanau ma ia avea o tatou aiga ma nofoaga tumau o le Agaga o le Alii. A tatou faia la tatou vaega, o le a tatou iloa ma mautinoa, o le a faia e lo tatou Tama Faalelagi Lana vaega.¹⁶ [Tagai fautuaga 7 i le itulau e 251.]

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai iitulau v–vii.

Mafaufau i le tala o i itulau e 233–35. Aisea e te manatu ai sa mafai e Siaosi Alapati Samita ona faamanuiaina lona aoaoina o lona afafine o Edith? Mafaufau i se taimi mai lou talavou na aoao atu ai e se tasi o ou matua se mea na uunaia ai lou olaga. Aisea na aoga ai le na lesona?
Suesue le vaega muamua o aoaoga (itulau e 235–36) ma le Mataupu Faavae ma Feagaiga 93:37–40. Aisea na tuu mai ai e le Alii i matua, ae le o se isi faalapotopotoga, le tiutetauave e aoao a latou fanau i le talalelei? E mafai faapefea e faalapotopotoga a le Ekalesia ona fesoasoani i matua i lenei tiutetauave? E mafai faapefea ona fesoasoani tagata o aiga lautele? Afai e leai sau lava fanau, mafaufau i ni auala e mafai ai ona avea oe ma aafiaga amiotonu i talavou o le Ekalesia i se ala e lagolago atu ai i matua.
Toe iloilo le tala o i itulau e 237–38. E manuia faapefea le fanau pe a faaalu e matua ni taimi ma i latou? O a ni “mea e popole ai ma … faafiafia o le olaga” (itulau e 236) e mafai ona tatou faagalogalo ai i o tatou tiutetauave mo o tatou aiga? O le a se mea e mafai ona tatou faia e faatoilalo ai nei faalavefau?
Faitau le vaega o loo amata i le itulau e 238. Mafaufau i ou uiga faaalia “i tu ma aga a le lalolagi” ma pe faapefea e na uiga ona aafia ai lau fanau. O a nisi o “taga fai i aso taitasi” e tuuina atu ai se molimau malosi i o tatou talitonuga i a tatou fanau?
O a nisi o tofotofoga o loo feagai ma le autalavou i le tou nuu? Suesue le vaega o loo amata i le itulau e 240, vaai mo mea e mafai e matua, matua matutua, ma isi ona fai e fesoasoani ai i le autalavou ia tetee atu i faaosoosoga.
Sa fautua mai Peresitene Samita e tatau ona “avea ma a tatou mataupu autu,” pe faapitoa foi, le tausiga o a tatou fanau i lalo o le uunaiga a le Agaga (tagai itulau e 241). O le a le uiga o lena mea ia te oe? O a ituaiga o mea e mafai e matua ona fai e faapitoa ai lo latou tomai i le tausiga o fanau i le amiotonu?
I itulau e 242–43, o loo toe faamanatu mai ai e Peresitene Samita nisi o folafolaga ua faia i aiga o e faia e le aunoa afiafi faaleaiga. O faapefea ona faataunuuina nei folafolaga i lou aiga? O le a se fautuaga e te tuuina atu i se aiga e lei faia lava ni afiafi faaleaiga ae ua mananao e amata?

Mau E Faatatau I Ai: Faataoto 22:6; Isaia 54:13; Enosa 1:1–3; Mosaea 4:14–15; Alema 56:45–48; Mataupu Faavae ma Feagaiga 68:25–31; tagai “O Le Aiga: O Se Folafolaga i le Lalolagi,” Ensign, Nov. 1995, 102.

Fesoasoani faafaiaoga: “Faaeteete aua le vave faamutaina ni talanoaga lelei ona o le taumafai e avatu uma mea sa e saunia. E ui lava ina taua le faauma o le lesona, ae e sili atu ona taua le fesoasoani i le au a’oa’o ia lagona le uunaiga a le Agaga, tali a latou fesili, faateleina le malamalama i le talalelei, ma maua’a a latou tautinoga e tausi poloaiga” (O Le Aoao Atu, E Leai Se Isi Valaauga e Sili Ai, 67).

Faletua o Siaosi Alapati Samita, o Lucy, ma le la fanau teine o Edith (tauagavale) ma Emily (taumatau).

“E leai se ala aupito sili e mafai ona e faaalu ai lou taimi, leai se ala sili e mafai ona e faaaoga ai lou taimi, o le a sili atu le aoga nai lo le aoaoina o au tamaiti ma au teineiti ia agavaa mo faamanuiaga a lo tatou Tama Faalelagi.”

“Afai e mafai ona avea le afiafi faaleaiga tau lava o se mea moni i le Au Paia o Aso e Gata Ai,… semanu o le a toatele ni aiga fiafia e i ai i le taimi nei.”