Mataupu 13

Faia o La Tatou Vaega e Faasoa ai le Talalelei

E tele auala e mafai ona tatou auai i le galuega tele o le faasoa atu o le talalelei toefuataiina a Iesu Keriso.

Mai le Soifuaga o Siaosi Alapati Samita

E le gata i le galue i le toeitiiti 48 tausaga o se Pulega Aoao, sa faatolu ona faamisiona Siaosi Alapati Samita mo le Ekalesia, e aofia ai ma le lua tausaga na avea ai ma peresitene o le Misiona i Europa. Sa ia faamalosiauina tagata o le Ekalesia e sauniuni faaleagaga mo le galuega faafaifeautalai faamisiona, ma ia talia na valaauga pe a oo mai. Peitai, sa ia aoaoina foi i latou latou te le tau manaomia se valaauga aloaia faamisiona e folafola atu ai le talalelei. O Siaosi Alapati Samita o se faifeautalai i lona soifuaga atoa, ma e masani ona ia faamanatu i tagata o le Ekalesia o latou mau avanoa e faasoa atu ai le talalelei i o latou tuaoi ma uo, ma faamalosiauina i latou ina ia avea ma faataitaiga lelei o soo o Keriso.

E lei leva ona uma le Taua Muamua a le Lalolagi, ae amata le tautua a Peresitene Samita i le Misiona a Europa. Na matua faaitiitia lava le aofai o faifeautalai i le misiona, ona o le taua, ma sa faalavelaveina taumafaiga e faateleina lena aofai, ona sa le’i maua ni visa. E le gata i lea, ae sa faasalalauina e i latou e lē fiafia i le Ekalesia ni tala sese e uiga i le Au Paia o Aso e Gata Ai, ma faatupu ai le taufaaleaga sa faigata ona taofia. E ui i nei toatuga, ae sa mautinoa lava e Peresitene Samita o le a agai pea i luma le galuega ona o faataitaiga sa faia e le Au Paia faamaoni o Aso e Gata Ai. Sa ia matauina, a o faasolo ina lauiloa atili “sa faaaloalogia ona tagata i lo latou amiomama,” o le au faitio foi, “ua vave ona faia’ina i lo latou taufaaleaga lē tonu, e ala i le fesootai sa’o ma le Au Paia o Aso e Gata Ai i o latou olaga i aso taitasi. … Ona latou faamasinoina ai lea o i matou i o matou fua, mai le matauina e le tagata lava ia, ma a o latou tuuina atu lena faamatalaga, e mafai ona i ai se aafiaga lava e tasi, ma e sili ona lelei ia i tatou.”¹

E lei leva ona amata lana auaunaga o le peresitene o le misiona, ae tusi atu o ia i tagata o le Ekalesia i Europa, e faamanatu atu ia i latou o latou tiutetauave e faasoa atu le talalelei ma fesoasoani ia agai i luma le galuega.

“Faatasi ai ma le talitonuga atoa o le a faatosina mai e le Alii ia loto o tagata agavaa uma i le talalelei pe a oo ina latou malamalama i ai, ia tatou faaaogaina faatasi le avanoa e galulue ai manu o i ai le taimi. Ia tatou faasafua atu aoaoga a le Matai mo le faaolataga, i le faaletino ma le faaleagaga, mo tagata lelei o Peretania Tele ma isi atunuu o le misiona i Europa.”²

I ni nai masina mulimuli ane sa ia tusia: “E tatau i tagata uma o le Ekalesia ona fiafia e aoao atu le upumoni. E tatau ona tofu i tatou ma se mea e fai i aso uma e avatu ai le malamalama i o tatou uso a tagata. E taua tagata uma i le silafaga a lo tatou Tama Faalelagi, ma o le a ia tauia i tatou e tusa ai mo le faamalamalamaina o i latou. E le mafai ona si’i atu lo tatou tiutetauave i nisi tauau.”³

Ina ua toe taliu mai Europa i le 1921, sa lipotia mai e Siaosi Alapati Samita i le konafesi aoao, “O le taufaaleaga lea sa tulai mai e faasaga ia i tatou i aso ua mavae, ua matua foia lava ma e fiaselau ma fiaafe o alii ma tamaitai ua iloa le galuega o loo tatou faatinoina.” Ona ia lapata’ia lea o le Au Paia ina ia saili e le aunoa mo ni auala e faasoa atu ai le talalelei i isi: “O lo tatou faafitauli o le sailia o se auala e mafai ai ona tatou tuuina atu i tagata uma le talalelei a lo tatou Alii. O la tatou faafitauli, ma faatasi ai ma le fesoasoani faalelagi o le a tatou maua ai se auala e foia ai. O lo tatou tiute le vaai pe le o i ai ni auala e mafai ai ona tatou faia nisi mea e tele atu nai lo mea ua uma ona tatou faia, ina ia tatou faamalieina ai mea o loo manaomia e lo tatou Tama Faalelagi.”⁴ [Tagai fautuaga 1 i le itulau e 149.]

Aoaoga a Siaosi Alapati Samita

E tofu tagata o le Ekalesia ma le tiutetauave e faasoa atu le talalelei.

Ou te lagona lava le matua faafetai mo o’u avanoa i le Ekalesia a Iesu Keriso, mo la matou mafutaga ma alii ma tamaitai o lenei Ekalesia ma isi foi ekalesia. Ou te faafetai i le tele o uo i ekalesia eseese i le lalolagi, o loo salalau solo i nofoaga eseese. Ou te faafetai mo na faauooga, peitai o le a ou le malie lava sei vagana ua mafai ona ou faasoa atu ia i latou nisi o mea latou te le’i mauaina.⁵

Tatou te auina atu faifeautalai i atunuu o le lalolagi e folafola atu le Talalelei e pei ona faailoa mai i nei aso e gata ai. Ae e le na o le pau lena o lo tatou tiute. Ua i ai i fafo atu o o tatou faitotoa, le fiaselau ma le fiaafe, o atalii ma afafine filifilia o lo tatou Tama Faalelagi. O loo tatou ola faatasi, e avea i tatou o ni uo, ae tatou te le aoaoina i latou i le tele e tatau ai, e uiga i le Talalelei lea ua tatou iloa o le mana o le Atua mo le faaolataga. O loo faia e le Au Peresitene o le Ekalesia mea uma ua i ai i lo latou mana; ua latou tuuto atu lo latou taimi i le ao, ma e tele foi ina tuai taimi o le po, mo le manuia o le Ekalesia. E tuu atu foi e le usoga o loo latou galulue soosoo tau’au, o latou taimi e lē faitaulia, e malaga ma aoao atu le Au Paia o Aso e Gata Ai ma aveina atu le Talalelei i fanau a lo tatou Tama. E galulue e le aunoa ia peresitene o siteki, fautua maualuga, epikopo o uarota, ma o latou fesoasoani, e faamanuia ai tagata, ma e mautinoa lava lo latou taui. Peitai, pe o tatou faia ea mea e tatau ona tatou faia, ina ia tatou tutu atu ai i luma o le nofoa faamasino o lo tatou Tama Faalelagi o le a Ia fetalai mai, ua tatou faia lo tatou tiute atoa mo o tatou tagata, o Ana fanau?⁶

O se tasi o uluai faaaliga … i le Mataupu Faavae ma Feagaiga, e faitauina faapea:

“O lenei faauta, e le pine ona oo mai se galuega ofoofogia i le fanau a tagata; …

“O le mea lea, afai o ia te outou le mana’o e auauna atu i le Atua, ua valaauina outou i le galuega.” [MFF 4:1, 3.]

E le tau manaomia ona valaauina oe e te alu i le misiona ina ia folafola atu ai le upumoni. Amata i le tamaloa lena e sosoo o outou fale e ala i le musuia o ia ia mautinoa, e ala i le musuia o ia ia alofa ia te oe ona o lou amiotonu, ma o lena ua amata ai lau galuega faafaifeautalai,

“Aua faauta ua matua le faatoaga ma ua saunia e selesele ai.” [MFF 4:4.]⁷

O le faasalalauina o le upumoni e le o se tiutetauave o se isi tagata, ae o lou tiute ma lo’u tiute ia vaai o aoao atu le talalelei a Iesu Keriso i lona mama a’ia’i i le fanau a tagata. Pe e te le lagona ai ea le lotofaafetai?⁸

O se avanoa sili lenei mo i tatou taitoatasi. Ou te fia faamamafa atu le galuega faafaifeautalai a i tatou taitoatasi i o tatou tuaoi. O le a tatou ofo, i le toatele o le a naunau mai, pe a tatou faia le mea sili, ma e le gata o le a latou faafetai mai ia i tatou ona o lo tatou aveina atu o le upumoni ia i latou, ma tatalaina o latou mata i le mamalu ma faamanuiaga ua saunia e lo tatou Tama Faalelagi, ae o le a latou alolofa ia i tatou ma faafetai mai i le taimi atoa o le faavavau.

Ua matua tele naua mea ua tuuina mai e le Alii ia i tatou e le’i maua e isi tagata. O le a tatou le manatu faapito lava. E tatau ona i ai i o tatou loto se mana’o e faasoa atu i isi tagata uma i le mea e gata mai ai ia upumoni fiafia o le talalelei a Iesu Keriso.⁹

O lea, a o tatou agai i luma, o i tatou taitoatasi, ua tofu i tatou ma se uunaiga i o tatou tuaoi ma uo, aua tatou te soona matamumuli. E le tatau ona tatou faasoesa i tagata, ae ia tatou faia ia latou lagona ma malamalama o lea tatou te naunau atu i ai, e le faapea ina ia fai i latou ma tagata o le Ekalesia mo le faitau aofai, ae ia aumaia i latou i le Ekalesia ina ia latou olioli ai i faamanuiaga e tasi ia tatou te olioli ai.¹⁰ [Tagai fautuaga 2 i le itulau e 149.]

Afai o tatou ola i ni olaga ta’uleleia, e mafai e a tatou uunaiga ona faamalosiau ai isi e aoao i le talalelei.

Manatua, e i ai uma o tatou tiutetauave. Atonu e le valaauina i tatou i se tiute patino, ae i tuaoi uma lava, e i ai le avanoa mo i tatou uma e faasusulu atu ai se agaga o le filemu ma le alofa ma le fiafia e oo i le iuga, ina ia malamalama ai tagata i le talalelei ma faapotopoto mai ai i le lafu.¹¹

I ni nai aso talu ai, sa asiasi atu ai i sasa’e se tasi o o tatou tuafafine, sa ta’u atu ai e se tamalii atamai na la talanoa, “Ou te le talitonu pei ona e talitonu ai, ae maimau pe ana mafai. E ese le matagofie.” Ma e faapena lava i le tele o fanau a lo tatou Tama, latou te matauina uiga o lenei galuega, matauina taga a alii ma tamaitai ua talia le upumoni, e matua maofa i latou i mea ua faataunuuina, ma le filemu ma le fiafia e maua e le tagata e talitonu faamaoni, ma moomoo ai maimau pe ana i ai sa latou vaega e fai ai; ma e mafai pe afai e i ai so latou faatuatua.¹²

E tele taimi ou te matauina ai, ma ou te manatu o le a faamaonia e le toatele o outou sa i ai aafiaga faafaifeautalai, e leai se alii po o se tamaitai lelei e mafai ona maua le uunaiga a tagata faamaoni o le Ekalesia a Iesu Keriso o le Au Paia o Aso e Gata Ai, ma lē aumaia la latou faamalo i mea latou te matauina a o tatou mafuta. A oo ina latou tuua i tatou, e eseese i nisi taimi, ae a o latou i ai i le uunaiga lea e sau mai le Alii, lea e maua e Ana auauna o loo auauna atu ia te ia, e masani lava ona latou fiafia e faamalo mai i mea sa latou vaaia ma lagonaina.¹³

Ua faaaoga e le tiapolo ana taumafaiga e sili ona malolosi e taofia ai le salalau atu o le upumoni o le talalelei. Ma o lou tiute ma lo’u tiute, e ala i le faautautaga ma le alofa faauso ma le faatuatua, e faatoilalo ai le taufaaleaga lea ua toto e le tiapolo i loto o fanau a lo tatou Tama, ina ia motusi ai uunaiga sese o loo i ai i mafaufau o alii ma tamaitai lelei, ma ia aoao i latou i le talalelei a lo tatou Alii, o le mana o le Atua mo le faaolataga o i latou uma e talitonu ma usitai i ai.¹⁴

Ou te manatu i lenei faalapotopotoga sili ua tatou auai, e tatau ona mafai ona faia lea faataitaiga ina ia vaai ai tagata i o tatou tuaoi, o ē le auai i le Ekalesia, i a tatou galuega lelei, ma faaosofia ai i latou e viia le suafa o lo tatou Tama Faalelagi. O lo’u lagona lena e tusa ai ma lena mea. Na pau lava le mea e manaomia ona tatou faia, o le faia o se faataitaiga, ia avea ma alii ma tamaitai lelei, ona latou matauina ai lea. Ma atonu ai o le a latou aumaia ai le avanoa ia i tatou e aoao i latou i mea latou te le o iloa.¹⁵

Afai, i le avea ai ma tagata o le Ekalesia, tatou te tausia poloaiga a le Atua, afai tatou te faatauaina le upumoni e pei ona tatau ai ona tatou faia, afai tatou te ola i ni olaga e tusa ai ma le matagofie o ona aoaoga, ina ia faaosofia ai o tatou tuaoi o loo matauina a tatou amio, e sailia le upumoni, o le a tatou faia se galuega maoae faafaifeautalai.¹⁶ [Tagai fautuaga 3 i le itulau e 149.]

Tatou te auai i le galuega faafaifeautalai e ala i le fesoasoani e saunia faifeautalai mo le lumanai ma e ala i le lagolagoina o i latou i a latou misiona.

E le gata o la tatou misiona le aoao atu o le Talalelei a Iesu Keriso ma ola ai, ae o la tatou misiona foi le auina atu i le lalolagi o o tatou atalii ma afafine pe a valaauina i latou mai lea taimi i lea taimi e galulue i le galuega a le Ekalesia. A latou o, ua tatau ona matuai aoaoina lelei i latou ia latou mausali e tetee atu i tofotofoga a le tiapolo; ia latou mama a’ia’i ma amiomama ma amiotonu i o latou olaga e pei ona tatau ai, ona lagonaina ai lea o le uunaiga o lo latou i ai e ē latou te faafesoota’ia. O le a le nofo lava le Agaga o le Atua i malumalu e lē paia, ae o le a nofo lona Agaga ma i latou o ē tausisia lo latou lava mama ma le lelei.

O le mea lea, ia tatou [tausia] o tatou atalii ma afafine i lalo o le uunaiga a le Agaga o le Atua.¹⁷

Aua le tuua a outou fanau e ola e aunoa ma le aoaoina o i latou i mataupu faavae o le talalelei a Iesu Keriso. Aua le faatali e auina atu i latou i misiona e aoao ai le uiga o le talalelei. Ou te manatua a’o ou i ai i Saute [o se faifeautalai] ua limasefulu lima pe onosefulu tausaga talu ai, sa fai mai se alii e sau mai se aiga toatele, “Ou te le iloa la’u tala e fai. Ou te le iloa se mea e ta’u i nei tagata.”

“Se,” sa fai atu ai se tasi o le usoga, “aoao i ai le Tusi Paia. Alu e aveane lau Tusi Paia ma faitau le Kenese.” Fai mai a ia, “Ou te le iloa le mea e tu ai le Kenese i le Tusi Paia,” ae o lea na sau mai se … aiga o le Au Paia o Aso e Gata Ai e ave le savali o le ola ma le olataga i na tagata i Saute. Peitai, e le’i umi talu mai lena taimi ae suia lona mafaufau. Sa ia mauaina se molimau o le upumoni e ala i le suesue ma le tatalo, ma sa ia iloaina ua i ai iinei le talalelei, ma sa mafai ona ia tula’i ma tuuina atu ma le le taofiofia le molimau o le talalelei a Iesu Keriso o le upumoni lea.¹⁸

Ua faagaeetia lava au i le taua o le sauniuni mo le galuega. E le lava le na ona faaalia e se tama o lona mana’o, ona o lona talitonuga i ona matua, e faia ai le mea la te mananao e fai, e alu i le lalolagi ma folafola atu le talalelei; e le lava lona tali atu i valaauga e tuuina mai e lo tatou Tama Faalelagi mai lea taimi i lea taimi e ala mai i ana auauna mo le galuega faamisiona; ae e tatau foi ona agavaa o ia mo le galuega, suesue i tusitusiga paia, ma aoao mea e finagalo le Alii na te iloa. E taua le mautu o o tatou atalii ma afafine i lo latou faatuatua ma iloa e faapei ona iloa e o latou matua, o le galuega lenei a lo tatou Tama. …

O le sefulu ma ona tupu o ni alii e agavaa mo le galuega e sili atu le aoga i le misiona nai lo se toaselau e lē iloa le upumoni ma o e e manaomia ona tau aoao foi i latou a o lei gafatia e i latou ona faamalamalama atu i isi.

O le galuega lenei a lo tatou Tama, ma ia lē faatalale lava i ai. E matua taua ia i tatou. Ina tatou … taumafai ia e faavae le faatuatua i a tatou fanau, ina ia latou naunau e tali atu i valaauga uma, ma lagonaina i le ta’ele o o latou agaga e fai atu, “Ua ou saunia e alu i soo se mea e finagalo lo’u Tama Faalelagi ou te alu i ai.”¹⁹ [Tagai fautuaga 4 i le itulau e 149.]

Ua i ai se talosaga ua tuuina atu … ia auina atu o tatou atalii ma afafine i le galuega faamisiona. … O se olioliga ia te au le vaai atu i alii ma tamaitai ua teu tupe ma fuafua ia mafai ona o atu a latou fanau i le lalolagi. I nai toe vaiaso mulimuli, sa i ai se alii talavou … na tuua mo le misiona, sa auina atu … e ona tuafafine e toalua … ia te ia se vaega o nai o la’ua totogi laiti ina ia mafai ai e ia ona olioli i faamanuiaga o se misiona. O ia le tagata muamua o le fanau mai se aiga toatele ua alu i le misiona e faasalalau atu le upumoni. … Ua ou iloa le olioli o le a oo atu i loto o na tamaitai lelei e toalua, o ē sa faatuatua e tuuina atu i lo la’ua tuagane a la tupe na maua, ina ia mafai ai ona auauna atu o ia i le misiona a le Alii. O le a la maua faamanuiaga e maua i le aoaoina atu o le Talalelei, i le malosi e tatau ai ona maua e aunoa ma lo la’ua auai atu e auauna ai.²⁰

O lea ou te mafaufau … i o tatou sui i le galuega faamisiona, o loo salalau i vaega eseese o lenei atunuu ma isi nuu mamao. Tatalo mo i latou, uso e ma tuafafine. Latou te manaomia le fesoasoani a le Alii ma e latou te manaomia foi lo tatou faatuatua ma tatalo. Tusi i ai ma faamalosiau i latou, a latou maua se tusi mai le aiga, o le a latou iloa o loo manatuaina i latou i taimi uma.²¹

Tatou te auai i le galuega faafaifeautalai e ala i le saunia o i tatou lava e auauna atu i misiona.

E le o toe mamao ona i ai lea o se avea’i mo alii ma tamaitai e gafatia o lenei Ekalesia e aoao atu le upumoni i vaega o le lalolagi sa le’i talia ai muamua i tatou: ma afai tatou te mananao e olioli e faavavau i le malo o lo tatou Tama faatasi ma i latou ua ia faamanuiaina ai i tatou iinei, aua nei o tatou manatu faapito i o tatou ola: tatou sauniuni mo le galuega, ma o atu i le lalolagi e folafola atu le upumoni, pe a oo mai le avanoa, ma ia avea ma auala i aao o lo tatou Tama e toe aumaia ai ana fanau ia te ia e ala i le aoaoina o i latou i le matagofie o lana talalelei.²²

Na o ni nai tausaga talu ai, o le toatele o a’u uo sa maumea, sa latou maua mea uma o le olaga, ma le tele o oa, ae ina ua tau faaātaāta atu i ai atonu o le a latou o i le misiona, sa fai mai nisi o i latou: “E le mafai ona tuu la’u pisinisi, e le mafai ona ou ola lelei pe a ou alu ae tuu a’u meatotino.” Ae peitai ua galoma atu a latou pisinisi ae tuua i latou. O mea sa latou manatu e le mafai ona latou ola e aunoa ma na mea, ua mou ese atu mai o latou lima, ma o le toatele o nei tamalii i le asō semanu e fiafia pe ana mafai ona latou toe foi i tua i le sefulu tausaga, ma pe ana faapea sa valaauina i latou i lena taimi e o i le galuega a le Alii, sa mafai ona latou fai mai: “O le a ou fetuuna’ia a’u fuafuaga, ua ou fiafia i le avanoa ua tuuina mai ia te au e avea ai o se faifeau o le olaga ma le faaolataga.”

… Mafaufau i o tatou avanoa ma faamanuiaga, ia mafai ona nonofo i lalo i maota o tamalii taua o le lalolagi ma aoao atu ia i latou le Talalelei a Iesu Keriso; mafaufau i le uiga o le nonofo ifo i lalo ma alii e le o umia le pule paia, ma aoao atu i latou i le ata o le faaolataga ma faamatala atu ia i latou le auala e mafai ai foi e i latou ona olioli i faamanuiaga o le pule paia lea o loo outou sapi ai.

Ou te lagona e i ai nisi o i tatou e manatu faapito. Tatou te matua fiafia lava e olioli i o tatou faamanuiaga, tatou te matua fiafia e siosiomia i mea matagofie o le olaga ma maua mafutaga ma alii ma tamaitai e aupito sili e mafai ona maua i le lalolagi, ona galo ai lea o o tatou tiute mo i latou. O le a tatou matua fiafia pe afai e mafai ona tatou taumafai ia atili ona malolosi mo le lelei i le lalolagi e ala i le auauna atu ia i latou e lei malamalama lava i le Talalelei a lo tatou Alii.

E toatele i tatou ua te’a ma le afa o le olaga, e toatele i tatou ua mae’a le soifua faigaluega. E manaomia e le Ekalesia ni faifeautalai i le misiona. O alii e malamalama i le Talalelei ma o loo naunau e ofoina atu o latou soifua pe a manaomia, ma ina ua ou fai atu e manaomia ni faifeautalai, o lona uiga ua manaomia e le lalolagi i latou.²³

O loo i o tatou luma le galuega faamisiona. O loo manaomia i tatou e atalii ma afafine o lo tatou Tama. … E fiaafe alii ma tamaitai i lenei Ekalesia ua mafai ona aoaoina atu le talalelei ma e mafai ona gafatia atili ai e ala i le faia o o latou tiute i le galuega faamisiona. O le a faamanuiaina i latou i punaoa, e lava latou te o ai e faatino le galuega ua finagalo le Alii tatou te faatinoina.²⁴

Ua oo mai le taimi o le a talaia ai faitotoa ma faatoilalo papupuni sa sisi a’e i le faasalalauina o le talalelei, pe a oo mai le leo o le siufofoga o le Alii ia te outou, e ala mai i ana auauna, “Ina sauniuni ia e o atu i le lalolagi ma folafola atu le talalelei,” aua ne’i fai e faapei ona faia e Iona, aua le taumafai e lafi pe sola mai lou tiute; aua le faia ni ‘alofaga faapea e leai ni tupe e te alu ai; aua le fatuina ni mea faavalevalea e punitia ai lau vaaiga ma e lē iloa atu ai le ola e faavavau i le afioaga o lo tatou Tama Faalelagi, lea e na o le faatuatua ma le tuuto atu i lana galuega e maua ai. Ia faatulagaina lelei e tagata uma lona fale; ia faatulagaina lelei e tagata uma o ē umia le perisitua ia ia lava, ma a oo mai le valaau mai auauna a le Alii, e ta’u mai ai ia te ia e alu atu i le lalolagi e aoao atu le upumoni, e lapatai le fanauga a tagata, e pei ona finagalo ai lo tatou Tama e lapata’ia, ia aua lava nei nanaina i tua e se tagata ni mea faavalevalea, e faagalogalo ai pe foloina e se i’a tele, e ala i mea valea o le lalolagi. [Tagai Iona 1:1–17.]²⁵

E le o se galuega e faigofie; e le o se mea e mālie, le valaauina e alu atu i le lalolagi, ae tuua ē pele ia i tatou, ae ou te fai atu ia te outou, o le misiona e faatauina ai mo i latou o ē faamaoni, mo i latou o ē faataunuuina lena matafaioi pe a manaomia ai, le filemu ma le fiafia e le oo i ai se malamalama, ma o le a saunia ai i latou, pe a oo mai le taimi, pe a mae’a le galuega i le olaga, o le a latou tutu atu i le afioaga o lo latou Mataisau, ma taliaina e Ia ona o mea sa latou faia.²⁶

Ou te tatalo ia i ai lona Agaga i [le Ekalesia] atoa, ia i ai le alofa mo fanau a lo tatou Tama i o tatou loto, ia tatou lagonaina le taua o la tatou misiona i le lalolagi, a o tatou matape’ape’a atu i mea e le ni ō tatou, o mea ua na ona nono mai ia i tatou o ni tausimea, aua nei galo ia i tatou le meaalofa e le mafaatauina, le avanoa e le mafaatauina, e mafai ona tatou maua, o le folafolaina atu o le talalelei ma faasaoina ai agaga o le fanau a tagata.²⁷ [Tagai i fautuaga 5 o i lalo.]

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai i itulau v–vii.

Mafaufau i upu a Peresitene Samita i le “Mai le Soifuaga o Siaosi Alapati Samita” (itulau e 135–36). Aisea sa mautu ai lona faamoemoe i le galuega faafaifeautalai i Europa e ui lava i tetee sa feagai ma ia? E mafai faapefea ona fesoasoani lana faataitaiga ia te oe pe a teena e tagata o lou aiga po o uo lau valaaulia e aoao e uiga i le talalelei?
Toe iloilo le vaega muamua o aoaoga (itulau e 136–38). O a ni metotia ua e iloa e sili ona aoga i au taumafaiga e faasoa atu le talalelei i tuaoi ma uo?
A o e faitauina le vaega o loo amata i le itulau e 138, mafaufau i se taimi e te iloa na avea ai se faataitaiga a se tagata o le Ekalesia ma mea e aoao atili ai se tasi e uiga i le Ekalesia. O a nisi mafuaaga e matua taua ai tulaga faatonuina o le Ekalesia i le galuega faafaifeautalai?
I itulau e 140–41, vaai mea e manaomia ona fai e i latou ua faamoemoe e avea ma faifeautalai e saunia ai faaleagaga mo a latou misiona (tagai foi MFF 4). O a ni mea e mafai e matua ona fai e fesoasoani ai i o latou atalii ma afafine ia saunia? E mafai faapefea ona fesoasoani korama o le perisitua ma le Aualofa?
Toe iloilo le vaega mulimuli o aoaoga (itulau e 142–45). O a nisi o mea “mea faavalevalea” e ono taofia ai i tatou mai le auauna atu i se misiona? O a ni faamanuiaga e maua i le galuega a faifeau faamisiona matutua? Mafaufau i mea e tatau ona e fai e saunia ai oe lava mo le galuega faafaifeautalai.

Mau E Faatatau I Ai: Mataio 5:14–16; Mareko 16:15–16; 1 Timoteo 4:12; Alema 17:2–3; Mataupu Faavae ma Feagaiga 31:1–8; 38:40–41

Fesoasoani faafaiaoga: “Afai e te faaaogaina ni gaoioiga eseese e aoaoina ai, o le a sili atu foi ona malamalama tagata o loo aoaoina i mataupu o le talalelei ma tele ni mea latou te teuina. O se metotia e filifilia ma le faaeteete e mafai ona faamanino atili ai se mataupu faavae, atili manaia ai, ma manatua lelei ai” (Aoao Atu, E Leai Se Isi Valaauga e Sili Ai, 96).

Na avea Siaosi Alapati Samita o se peresitene o le Misiona i Europa mai le 1919 i le 1921.

“I tuaoi uma lava, e i ai le avanoa mo i tatou uma e faasusulu atu ai se agaga o le filemu ma le alofa ma le fiafia.”

“E fiaafe alii ma tamaitai i lenei Ekalesia ua mafai ona aoaoina atu le talalelei ma e mafai ona faateleina ai lo latou tomai e ala i le faia o o latou tiute i le galuega faamisiona.”