Mataupu 15

Faalauteleina o le Galuega a le Alii

E faatonutonu e le Atua Lana galuega, ma ua valaauina e Ia tagata uma o le Ekalesia ina ia auai i le tuleia i luma.

Mai le Soifuaga o Siaosi Alapati Samita

Ina ua valaauina Siaosi Alapati Samita i le Korama a Aposetolo e Toasefululua i le 1903, o le faitau aofai o le Ekalesia sa silia laitiiti ma le 300,000. E oo atu i le faaiuga o lana auaunaga o se Peresitene o le Ekalesia, ua ova atu ma le 1 miliona. Sa olioli Peresitene Samita i lena faatupula’ia, aua o lona uiga ua au atu le savali o le faaolataga i le anoanoai o tagata. “Oka so tatou fiafia,” na ia saunoa ai i se potopotoga o le konafesi aoao i le 1950, “e le faapea ona ua faateleina le fuainumera o le faalapotopotoga ua tatou auai, ae ona ua toatele atu fanau a lo tatou Tama, ua tele atu ona atalii ma ona afafine ua i ai se malamalama i le upumoni, ma ua o mai i lana faalapotopotoga lea sa ia saunia e aoao ai i tatou i le ala o le ola ma taitai atu ai i le ala o le fiafia e faavavau.”¹

I le va o le 1903 ma le maliu o Peresitene Samita i le 1951, sa tele luitau na feagai ma le Ekalesia i lona agai i luma i le lalolagi atoa. O mea e pei o le Taua Muamua a le Lalolagi, le Taua Lona Lua a le Lalolagi, ma le Pau Tele o le Tamaoaiga (o se mafatiaga tele i le tamaoaiga) ma le matua toaitiiti o faifeautalai sa mafai ona auina atu i fafo. E ui i nei faigata, sa tumau le talitonuga o Siaosi Alapati Samita o le a tumau pea le ola o le ekalesia ma faataunuu lona taunuuga e “tumu ai le lalolagi atoa” (Tanielu 2:35). I le 1917, i le taimi aupito ogaoga o le Taua Muamua a le Lalolagi, sa ia ta’u atu ai i le Au Paia: “Ou te le lotovaivai ona ua le televave le salalau o lenei upumoni. Nai lo lena, ua ou vaaia i mea ua tutupu nei le faasoasoa fuafua lelei a se Tama e tumu i le atamai, e saunia ai le ala mo le faasalalauina o le talalelei sa ia toefuatai mai i le lalolagi i o tatou taimi.”²

E ui ina sa matua faigata luitau i le afa muamua o le seneturi lona 20, ae sa aumaia ai foi tekinolosi fou ia sa talitonu Peresitene Samita o le a faalautele ai le galuega a le Alii. O ia o se lagolago malosi o le gaosiga o vaalele ma sa ia tagai i ai o se auala o le a atili ai ona faataunuuina lelei ona tofiga e malaga ai o se Pulega Aoao. Sa ia lagolagoina foi le faaaogaina e le Ekalesia o leitio ma televise e avatu ai le upu a le Alii i se aofia e tele atu. “E tatau ona tatou manatu i nei [fausaga fou] o ni faamanuiaga mai le Alii,” na ia saunoa ai. “E matua faateleina ai o tatou tomai. E mafai ona avea moni ma ni faamanuiaga pe afai tatou te faaaogaina i le amiotonu mo le faasalalauina o le upumoni ma faalautele ai le galuega a le Alii i tagata. O le luitau tele o loo feagai nei ma le lalolagi e taoto lea i lo tatou faaaogaina o nei fausaga fou. E mafai ona tatou faaaogaina e faataumaoi ai, e pei ona sa tatou faia ai i nisi taimi i aso ua mavae, pe mafai foi ona tatou faaaogaina e faamalamalama ai ma faamanuia tagata, e pei ona finagalo ai lo tatou Tama Faalelagi ia tatou faia.”³

I se saunoaga i le konafesi aoao i le 1946, na valoia ai e Peresitene Samita le faaaogaina o tekinolosi: “E le o toe mamao, ona mafai lea e auauna a le Alii mai lenei pulelaa ma isi nofoaga o le a saunia, ona auina atu savali i potopotoga e i nofoaga taumamao ia e le o mafai ona oo atu i ai. O lena auala ma isi auala, o le a faalogoina ai le talalelei a Iesu Keriso lo tatou Alii, le mana e tasi o le Atua mo le faaolataga e saunia ai mo le malo selesitila, i vaega uma o le lalolagi, ma o le toatele o outou o loo i ai iinei o le a soifua e vaai i lena aso.”⁴ [Tagai fautuaga 1 ma le 4 i le itulau e 170.]

Sa malamalama Peresitene Samita ua manuia le galuega a le Ekalesia aua o le galuega a le Alii, ma sa ia aoao mai i le Au Paia e faapea, o le avanoa e auai i lena galuega o se faamanuiaga ua tuuina mai e le Alii i tagata taitasi o Lana Ekalesia. I le konafesi aoao muamua ina ua uma ona vaetofia o ia e avea ma Peresitene o le Ekalesia, na ia saunoa ai: “Ua ou iloa le tiutetauve tele ua i o’u tauau. Ua ou iloa a aunoa ma le fesoasoani a lo tatou Tama Faalelagi, o le a le manuia le faalapotopotoga lea ua iloa ai i tatou. E leai se tagata po o se vaega o tagata e mafai ona faia ia manuia le galuega, ae afai o le a tumau ona tausia poloaiga a le Atua e tagata o lenei Ekalesia, ma ola ai i la latou tapuaiga, avea ma se faataitaiga i le lalolagi [ma] alolofa i o latou tuaoi e pei o i latou lava, o le a tatou agai i luma, ma o le a tafe mai ia i tatou le fiafia faateleina.”⁵

Aoaoga a Siaosi Alapati Samita

E lava avanoa mo tagata uma o le Ekalesia e auai ai e faatino le galuega a le Alii.

O le tiutetauave mo le taitaia o lenei galuega ua le taatia i luga o na o le [Peresitene o le Ekalesia], po o luga o ona fesoasoani, po o luga o le korama a Aposetolo; ae ua taatia i luga o alii ma tamaitai uma o ē ua papatisoina e auauna a le Atua ma ua avea o se tagata o le Ekalesia a Iesu Keriso o le Au Paia o Aso e Gata Ai. … E le mafai ona tatou fesiita’ia le tiutetauave pe a tatou mananao ai; ua tuuina mai e lo tatou Tama i o tatou tau’au, ma e tatau ona tatou tauaveina ma fesoasoani e faataunuu ma le fiafia.⁶

Ou te talitonu ia te outou, o’u uso e ma tuafafine. Ua i ai lo’u faatuatuaga i lo outou faatuatua ma lo outou amiosa’o. … Ua tofu outou ma se tiute [i le Alii] mo le faalauiloaina o lenei galuega, e pei foi o i latou o loo pulefaamalumalu ia te outou. E le mafai ona ou faapea atu, “O a’u ea o se leoleo o lo’u uso?” E le mafai ona si’iesea le tiutetauave … , ae i lo’u tu ai i le faatulagaga o fanau a lo tatou Tama, e tatau ona ou tauaveina la’u vaega, e tatau ona ou tauaveina lena vaega o le avega ua tuuina mai i o’u luga e le Alii, ma afai ou te le faia, ona ou iloa ai lea ua ou le mauaina le faamanuiaga e tatau ona ou maua e ala i le usiusitai i poloaiga a lo tatou Tama.⁷

E maeu le naunautai e tatau ona tatou i ai i le faia o mea lelei. O se auauna faatamala e faatalitali seia tau poloaiina i mea uma. [Tagai MFF 58:26–27.] E faamoemoe lo tatou Tama Faalelagi ia tatou faalauteleina o tatou valaauga, e le afaina po o fea, e le afaina foi po o le a le faatauvaa o tatou tulaga i le olaga.⁸

E le faapea e tatau i se tagata ona avea ma se sui auai o le Korama a le Toasefululua, po o le Au Peresitene o le Ekalesia, ina ia maua ai faamanuiaga silisili i le malo o lo tatou Tama Faalelagi. Ua na o ni tofi nei e manaomia i le Ekalesia, ma e toatele tamalii faamaoni ma tuuto ua agavaa e faatumuina nei tofi o e o loo manaomia o latou taimi ma taleni i le Ekalesia. … Manatua i faatulagaga ma i le Ekalesia atoa, e tele avanoa mo alii ma tamaitai uma e faia ai se mea mo le manuia o o latou uso a tagata ma mo le faalauteleina o le galuega a le Alii.⁹

O loo i ai se uiga o nisi o loo umia le perisitua ma nisi o loo umia tofiga i le Ekalesia, e faatuatuana’i ia sauniga faamanatuga ma isi tiute taua, ae tau lava ina galulue i nisi o valaauga faapitoa. Atonu o i latou o ni taitai ma faiaoga i le Aoga Sa, ma a oo ina faatino a latou galuega i le Aoga Sa, ua manatu ua lava lava lena; pe atonu foi o i latou o nisi e galulue i [Alii Talavou po o Tamaitai Talavou], po o le Peraimeri, po o gafa, po o le uelefea, po o nisi tofiga, ma afai latou te faataunuuina a latou matafaioi iina, ua latou manatu ua uma ai ona faia lo latou tiute atoa.

E ui ina tatou alolofa ma faamanuia i latou uma na mo le galuega tele ua latou faia, e tatau ia i tatou ona faamanatu ifo ia i tatou lava e faapea, o loo manaomia i tatou uma e ola i upu uma e pa’ū mai i le fofoga o lo tatou Tama i le lagi [tagai MFF 84:44]. I se tulaga lautele, o tofiga faapitoa e le aveesea ai mai ia i tatou isi matafaioi; ma o sauniga faapitoa e le masani ona suitulaga ai pe tuu ai sauniga masani o le Ekalesia. Ma i luga atu o a tatou matafaioi ma tofiga faapitoa, o loo faamoemoeina i tatou e faatautaia i tatou lava i lea aso ma lea aso o ni tagata o le Au Paia o Aso e Gata Ai, i le faauigaga e aupito lautele o le upu, afai tatou te vaai atu i se tasi ua fā’atu pe ua faavaivai, pe manaomia se fautuaga ma se apoapoaiga i se taimi, ua tatau loa ona tatou gaoioi o ni auauna a le Alii i le moni atoatoa.

E i ai foi i latou e taliaina le avea ma tagata o le Ekalesia i le na o le ta’u, ae foliga latou te tuusaunoaina i latou lava mai le tuuina atu o soo se auaunaga. Ae i se taimi ona mamafa lea i o latou loto, ma faaletonu o latou mafaufauga, e pei o i tatou uma pe a tatou le faia mea ua tatou iloa o lo tatou tiute atoatoa. O se tagata e ola e tusa ai ma le talalelei a Iesu Keriso, e le mafai lava ona masalosalo i le manuia o le ekalesia; ae o le tagata e le faia lona tiute, e le tausia ana feagaiga, na te le maua le Agaga o le Alii, ona amata ai lea ona taumafaufau po o le a le mea o le a tupu i Siona. …

Soo se taimi e te faia ai lou tiute atoatoa, o le a e iloaina, e pei ona e iloa o loo e ola, o le galuega a le Tama lenei, ma o le a ia faataunuuina lava ma le fiafia.¹⁰

Pe le o mafai ona e vaai i le ala ua agai ai i luma se galuega ofoofogia ma le matagofie? Pe le o mafai ea ona e vaai i le ala ua tatou ofo atu ai taitoatasi nai a tatou saofaga iti, ae ua tuufaatasia le motu o tagata, ma ua salalau atu le upu a le Alii i le fanau a tagata; e le i se auala faafitafita, ae i le agalelei ma le alofa, faatasi ma se manaoga ia manuia ai tagata uma?¹¹ [Tagai fautuaga 2 i le itulau e 170.]

O le a le taofia lava e le fili le alualu i luma o le Ekalesia, aua o le galuega a le Atua, ae le o tagata.

E na o le toaono tagata na amata ai le Ekalesia. Ua faatupulaia i lea aso ma lea aso e ui lava i le tetee o le tiapolo. Ana le seanoa le lima mamana o le amiotonu, ana le seanoa le tausiga a lo tatou Tama Faalelagi, semanu ua leva ona nutipalaina lenei Ekalesia e faapei o se atigi. Peitai, na fetalai mai le Alii o le a ia malupuipuia i tatou, ma sa ia folafola mai foi ia i tatou le puipuiga pe afai tatou te faamamalu ia te ia ma tausi ana poloaiga.¹²

E lei oo mai le faatupulaia o lenei Ekalesia ona ua lauiloa. E ui i le tetee o tamalii popoto o le lalolagi; e ui i le tetee a faiaoga faalelotu, ae sa faaauau pea ona āoina mai i i ma o agaga sa ola i se tulaga e mafai ai ona latou malamalama i le upumoni.¹³

Sa ou faitauina le api o talaaga a lo’u tamamatua, o Siaosi A. Samita. … sa ou faitau ai i ona aafiaga patino, o nisi e ese le matuitui a o isi o ni vavega. I lona talavou, sa auina atu ai o ia e folafola le Talalelei a lo tatou Alii. E tutusa foi ona aafiaga ma nisi tamalii sa valaauina i le galuega. O tagata e tiapoloa o latou mafaufau, sa latou faia ni tuua’iga sese e faasaga ia te ia ma ana paaga, ae sa tumau pea lona faamaoni ma sa puipuia i latou e le Alii ma faalauteleina i latou i mata o tagata, ma tuuina atu ia i latou se molimau o le paia o lenei galuega lea sa matua aoga, ma sa leai se galuega sa faigata tele ia i latou ona faia mo le faasalalauina atu o le upumoni.

O tamamatua o ia o se tasi o le vaega sa auina atu i Egelani e folafola atu le Talalelei i le 1839. Sa saili le tiapolo iina e faalotovaivaia i latou i soo se itu. O a latou api o talaaga na tusia i lena taimi, na faailoa mai ai o le mea moni sa ta’uvaleina i latou e tagata amioleaga ma sa osofaia i latou e agaga leaga, peitai sa faasaoina i latou e le Alii ma sa latou faatinoina se galuega maoae. E toavalu o le Korama a le Toasefululua sa i ai iina i lea taimi. O nisi na valaauina e o i Egelani, o ni tamalii e leai ni tupe e pasese ai ae sa latou amata savavali mai o latou aiga. Ona o se gasegase faaumiumi, sa matua vaivai ai se tasi o nei tamalii ma lē mafai ai ona savali mo le lua maila e pu’e ai se taavale solofanua, ae sa fesoasoani se uo e faasavali ia taunuu iina. Sa latou faatuatua i le Atua; sa latou iloa o lana Ekalesia lenei ma o lea na latou o ai, ma sa saunia e le Atua ni uo e le auai i le Ekalesia e ofoina atu ni tupe e totogi ai o latou pasese e folau ai i le vasa, lea na latou avatu ai la latou savali ma e toatele tagata faatuatua sa latou taliaina le upumoni ona o la latou galuega.¹⁴

O le galuega lenei a le Atua. E le o se galuega a se tagata. E leai se tagata po o ni tagata e mafai ona latou tauaveina i luma ma faamanuiaina a’o feagai ai ma le lalolagi tetee. E tele taimi sa lagona ai e i latou [o e tetee i le galuega] ua oo mai le iuga o le Ekalesia, ma o taimi taitasi sa si’i a’e ai e le Alii i le silisiliese o Lona mana, ma ua agai atu ai mai lea aai i lea aai, o lea nuu ma lea nuu, o lea atunuu ma lea atunuu.¹⁵

Ou te iloa e tele faafitauli ma o le a tele atu isi faafitauli a o gasolo aso, peitai o le Tama lava i le lagi sa taitaiina le Fanauga a Isaraelu, lea na laveaiina Tanielu ma taulelea Eperu e toatolu mai le faafanoga, o le Tama Faalelagi lava lea sa faasaoina o tatou tuaa na o mai i [le Vanu o Sate Leki] ma faavaeina i latou lava iinei, ma faamanuiaina i latou ma mafai ai ona i ai le malumalu maoe i [Sate Leki] ma isi malumalu e ui i le matitiva o tagata, … o le Tama lava lena, lo outou Tama ma lo’u Tama, ua sauni e liligi mai Ana faamanuiaga i o tatou luga i le taimi nei.¹⁶

E leai se mafuaaga e lotovaivai ai. E faaauau pea ona taavale i luma le talalelei a Iesu Keriso. Ua ia i tatou le folafolaga mai lo tatou Tama Faalelagi, o le a faaauau pea ona taavale i luma. E leai se isi tisipenisione na maua le mautinoa lea ua tatou maua. I tisipenisione ua mavae, sa aveeseina mai le Talalelei mai le lalolagi pe tuuina atu i se isi nuu. O le mea lea, ou te aioi atu ai ia te outou o e ua tuu o outou lima i le suotosina, aua ne’i toe tepa i tua. Auauna i le Atua ma tausi Ana poloaiga.¹⁷

E le tatau ona tatou atuatuvale e uiga i le alualu i luma o Siona, aua o le a folau pea le sa i manu, ma o i latou o e faatuatua ma faamaoni o le a taunuu i le saogalemu i le uafu a le Atua, ua faapaleina i le mamalu, tino ola pea ma le ola e faavavau. E leai so’u popole mo nei toeaiina ma olomatutua sa tumau i le faatuatua. E leai so’u popole mo tama ma teine o loo savavali i le usiusitai i poloaiga a le Alii. … Peitai, o le Au Paia o Aso e Gata Ai ua iloa le finagalo o lo tatou Tama ae le faia, o i latou e faalogo i aoaoga a le Alii mai lea taimi i lea taimi ma fulitua i ai, ou te popole aua o le a latou le taunuu i le tini sei vagana ua latou liliu mai ma salamo ma o latou loto atoa.¹⁸

O loo agai pea i luma Lana galuega, e tatau ona tatou toaaga pe a tatou mananao e maua lona saoasaoa. O tausaga uma lava, talu mai le faatulagaga o le Ekalesia, e vaaia ai lona tupu malosi atu nai lo le tausaga ua mavae. O le vaaiga i lona manuia faifai pea i le aso ua sili atu nai lo se isi lava taimi muamua. Ua toatele atu tagata ua latou aoaoina le mea moni e uiga ia i tatou, ma o tatou uiga faaalia ia i latou. Ua faatoilaloina le ta’uleagaina ona o le valelea, a o susulu atu le malamalama i le toatele. …

Ua tatau ona iloagofie i tagata uma, ma o le a oo lava i ai i se aso, semanu ua leva ona faatoilaloina e le itu tetee lenei galuega pe ana le paia. Ta’u atu i le lalolagi uma ia latou iloa e le mafai ona faatoilaloina, aua “o le mana lava o le Atua e ola ai i latou uma o e faatuatua.” [Tagai Roma 1:16.]¹⁹ [Tagai fautuaga 3 i le itulau e 170.]

E fetuunai e le Atua ia tulaga i le lalolagi ina ia mafai ai ona salalau atu Lana galuega i le lalolagi atoa.

Ua fuafuaina e le [Atua] o le savali lea sa folafolaina e ana auauna i tausaga ua mavae, lea sa toe faafou ma talai atu e ana auauna i aso e gata ai, o le a lagonaina, ma e ala i le mana o lona malosi o le a fetuunaia ai tulaga o lenei lalolagi ma faalotomaulalo ai le fanauga a tagata seia oo ina latou salamo ma naunau e faalogo. O lona uiga, o upumoni o loo tatou aoao atu, upumoni o loo finagalo le Atua tatou te aoao atu i le lalolagi, ua faasalalauina lava.²⁰

Sa faaalia e le Alii i se tasi o ana perofeta e faapea, o le oo mai o le Tusi a Mamona o le a ia amatalia ai lana galuega i malo mo le toefuataiga o lona nuu. [Tagai 2 Nifae 30:3–8; 3 Nifae 21:1–14; 29:1–2.] A oo ina tatou iloa le saosaoa e mafai ai ona faasalalau atu le talalelei a Iesu Keriso i le taimi nei pe a faatusatusa i le tausaga e 1830, ona mafai lea ona tatou iloa na i ai le aao o le Alii ma ua ofoina mai i tagata le avanoa e iloa ai. E le o toe mamao, ona mafai lea i vaega uma o lenei lalolagi ona faalogo e ala i auauna a le Alii o folafolaina atu i le mana. O le a fetuunai e lo tatou Tama Faalelagi ia tulaga i le lalolagi, ina ia mafai ai ona folafola atu le talalelei.²¹

Na fetalai le Faaola o le talalelei o le malo o le a folafolaina atu i le lalolagi uma e fai ma molimau i atunuu uma, ona oo mai ai lea o le iuga! [Tagai Iosefa Samita—Mataio 1:31.] O le a le manao mai lava le Alii i se mea e le mafai ona fai. Ua ia aveesea mea faalavefau, ma “o le a talaiina” le talalelei.²²

O le a togiolaina Siona, ma o le a ola le lalolagi, lea e le malamalama nei i le galuega “Faamamona” ia latou iloa ua i ai le mana o le Atua mo le faaolataga o i latou o le a tausia poloaiga a lo tatou Tama. O la’u molimau, ua tele’a’i le ola o le galuega, ma ua talia e le fanau a tagata le “Faamamona” i o latou agaga; o le galuega lenei a lo tatou Tama. Atonu tatou te faatauvaa ma vaivai i tatou lava, ae afai tatou te amioatua ma mama a’ia’i i o tatou olaga, afai o le a tatou faia mea tatou te iloa e sa’o, o le a tulai mai alii ma tamaitai e faaauau le galuega a le Alii, seia mae’a le galuega a lo tatou Tama i le ala ua Ia finagalo ai. O le a sili atu le iloa o i latou o loo le malamalama nei ia i tatou. O i latou e le malamalama ia i tatou i le taimi nei, o le a sili atu lo latou iloa o i tatou. O i latou o ē talitonu e manatu faapito o tatou faamoemoega, o le a le faaseseina i latou, ma o o tatou uso ma tuafafine i le lalolagi, o ē mananao i le upumoni ma fia iloa le mea e finagalo ai le Alii ia i latou, o le a tuia o latou loto ma taliaina le Talalelei. O le a tulai Siona ma susulu atu, ma o le a avea ma se mea e aupito mamalu i le lalolagi atoa, o le tautinoga lea a le Alii le Atua o Isaraelu.²³ [Tagai fautuaga 4 i le itulau e 171.]

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai i itulau v–vii.

Na valoia e Peresitene Samita e faapea “o le talalelei a Iesu Keriso lo tatou Alii … o le a lagonaina i vaega uma o le lalolagi” (itulau 159). O a tekinolosi o loo fesoasoani ia mafai ai lenei mea? O a nisi auala o loo saofaga ai tekinolosi po o le alualu i luma faasaienisi i le galuega a le Alii?
A o e faitauina le vaega muamua o aoaoga (itulau e 161–63), mafaufau e uiga i lou valaauga i le taimi nei po o lou tofiga i le Ekalesia. E faapefea i le faataunuuina o lou valaauga ona faatagaina ai oe e auai i “le faalauteleina o le galuega a le Alii?” E faapefea i au taumafaiga o se faiaoga o aiga po o se faiaoga asiasi ona saofaga i lenei galuega? O a ni auala e mafai ai ona tatou auai uma e faatino i talaatu o o tatou valaauga ma tofiga aloaia?
I itulau e 164–67, o loo molimau mai ai Peresitene Samita o loo taitaia e le Alii le galuega a Lana Ekalesia. O a ni aafiaga na e oo i ai e faaali atu ai ia te oe e moni? E faapefea i le aoao atu ma ola ai i le talalelei i o tatou aiga ona faaalia ai lo tatou faatuatua i le galuega a le Alii?
I itulau e 159 ma le 165–69, vaavaai mo mea na ta’ua e Peresitene Samita o le a faia e le Alii e saunia ai le ala mo Lana talalelei ina ia talaiina. O a faamaoniga ua e vaaia i nei mea ua tutupu pe o loo tutupu foi i le lalolagi i le aso?

Mau E Faatatau I Ai: Tanielu 2:44–45; Ioelu 2:27–28; Mosaea 27:13; Mataupu Faavae ma Feagaiga 64:33–34; 65:1–6; 107:99–100; Mose 1:39

Fesoasoani faafaiaoga: “Atonu e i ai … ni taimi e te le iloa ai le tali i se fesili. Afai e tupu lenei mea, tau lava ina e fai atu e te le iloa. Atonu e te manao e fai atu o le a e taumafai e sue le tali. Pe e te manao foi e valaaulia le vasega e sue le tali, ma tuu atu i ai se taimi i le isi lesona e lipoti mai ai mea ua latou aoaoina” (O Le Aoao Atu, E Leai Se Isi Valaauga e Sili Ai, 64).

Sa talitonu Peresitene Samita e faapea o le auiluma i tekinolosi “e mafai ona avea moni ma faamanuiaga pe afai tatou te faaaogaina i le amiotonu mo le faasalalauina o le upumoni ma le faalauteleina o le galuega a le Alii i tagata.”

I le Ekalesia atoa, o loo lava avanoa mo alii ma tamaitai uma e fai ai se mea mo le faamanuiaina o o latou uso a tagata ma le faalauteleina o le galuega a le Alii.”