Mataupu 11

Faaaliga mai le Atua i Ana Fanau

E taialaina e lo tatou Tama Faalelagi i tatou taitoatasi ma se Ekalesia e ala i le Agaga Paia.

Mai le Soifuaga o Siaosi Alapati Samita

Ina ia aoao atu e uiga i le taua o faaaliga e taiala ai le Ekalesia, sa faamatala e Siaosi Alapati Samita sona aafiaga i se malaga a se vaalele mai Los Angeles, Kalefonia, i le Aai o Sate Leki, Iuta:

“Ina ua latalata atu i Milford, Iuta, sa faafuasei ona matou fetaiai ma se puao e sili ona matautia ua ou vaai i ai. Sa ou taumafai e autilo i fafo o le faamalama o le vaalele ae sa le mafai ona ou iloa atu se mea i le puao. Sa leai se mea e mafai ona iloa atu i soo se itu i fafo o le vaalele.

“Sa ou iloaina ua matou latalata i atumauga i le saoasaoa e tusa ma le tolu maila i le minute, ma e tatau ona matou pasia ina ia oo atu ai i le Vanu o Sate Leki. Sa ou popole ma fesili ifo ia te au lava, ‘E mafai faapefea e le pailate ona iloa le ala pe afai e le mafai ona ia iloa atu se mea?’ Sa i ai lana tapasa, ae e ono se’e ese atu le vaalele mai lona alavaa. Sa i ai ana meafaigaluega e ta’u atu ai le mamao i luga a’e o le sami, ae leai se mea na te iloa ai po o le a lo matou mamao ese mai le laueleele. Sa ou manatu atonu o le a ia matua lele maualuga ese mai mauga i lo matou va ma le Vanu o Sate Leki, ma taumafai ai e sue le vaega e tulaueleele ai pe a iloa atu le emo mai o le faailoilo pe a latalata i ai, peitai, sa lagona le atuatuvale ina ua ou mafaufau i le matautia o le sese o lo matou ala ma misi ai le faailoilo ma le malaevaalele.

“Ona o lo’u atuatuvale, sa ou alu ai i le avanoa sa i ai le pailate ma lona soatau e vaai pe faapefea ona la iloaina le mea lea matou te o i ai. Sa le mafai ona ou iloa pe selau futu, pe afe futu pe sefulu afe futu sa matou i ai i luga a’e o le eleele, ma sa ou le iloaina foi pe mafai faapefea ona la iloaina, sei vagana ai se taufaatusatusa. Sa ou matauina sa i ai i le pailate se tamai masini i luga o lona taliga e pei o mea ia e faaaoga e le au talitelefoni. Sa ou fesili i le soatau pe mafai faapefea ona la iloa pe o sa’o le itu lea matou te felelei ai pe iloa foi ua matou se ese ma le alavaa. Sa ia tali mai, ‘A oo ina le mafai ona iloa, ona taialaina lea o i ma’ua e ‘peaulagi o le leitio.’

“O le a lena mea?” sa ou fesili ai. Sa ia faamatala mai o lea peaulagi e mafai ona faatusa i se alatanu eletise i le va o ni itu se lua, ma o le tulaga lea e i ai i matou o Milford ma le Aai o Sate Leki. Fai mai a ia, o le masini la e i taliga o le pailate, e aoga a i ai le vaalele i le peaulagi, ona faalogoina pea lea o le leo pei o le ‘anau a le pusi, ae afai e alu i le taumatau po o le tauagavale le vaalele, ona lapataia lea o le pailate e ala i se pa’ō e pei o se ki faatelekalafi. Afai na te … toe faafo’ia i le peaulagi po o le alatanu, i le ala o le saogalemu, ona uma lea o le pa’ō po o le tātā ae toe foi i le leo pei o le ‘anau a le pusi. Afai e faaauau ai pea i le peaulagi, o le a matou taunuu saogalemu.

“Sa ou toe foi i lo’u nofoa ua matua faamafanafanaina a’u ina ua ou iloa, e ui lava ina sa ufitia i matou i le puao ma le pogisa ma sa le mafai ona vaaia pe faalogoina le mea la ua matou i ai, ae o la sa maua e le aunoa e le pailate ia faamatalaga o la e matou te i ai i luga o le alatanu ma sa ia iloaina o le a matou taunuu saogalemu i le mea matou te o i ai. Na mavae ni nai minute, ona ou lagonaina lea o le faaifoifo o le vaalele. Ua matou pasia tumutumu o mauga ma ua matou latalata i le malaevaalele. Ina ua latalata ina matou tulaueleele, sa mafai ona matou vaaia moli malolosi o le malaevaalele e ta’u mai ai le mea e tulaueleele ai, ma sa pa’i malie ifo le vaalele ma lana uta taua i le eleele e faapei ua tuta se manuvai i luga o le sami, ma faifaimalie seia tu lelei ma matou feosofi mai ai i fafo, ua fiafia ua toe taunuu i aiga. …

“E tele taimi sa ou mafaufau ai i lesona sa ou aoaoina i luga o le vaalele ma ou faaaogaina i aafiaga i le Ekalesia a Iesu Keriso o le Au Paia o Aso e Gata Ai. …

“E le gata ua uma ona tuuina mai e le Alii o fautuaga ua uma ona tusia i tusitusiga paia e taialaina ai i tatou, ae ua ia tuuina foi se taitai i lenei Ekalesia, se tasi o ona atalii sa filifilia ma faauuina ma vaetofia e avea ma Peresitene. O ia o lo tatou pailate, ma o le a faatonutonuina o ia e se leo o le a mafai ai e ia ona taitai i tatou i le mea e tatau ona tatou o i ai. Afai tatou te atamamai, o le a tatou le faia ni a tatou faamasinoga e faasaga ia te ia, ae o le a fiafia e faamamaluina o ia i lona tulaga po o le a lava le umi e lagolagoina ai o ia e le Alii.”

Sa faaaogaina foi e Peresitene Samita lona aafiaga i luga o le vaalele e aoao mai ai e faapea, e mafai e i tatou taitoatasi ona maua ia faaaliga e taialaina ai o tatou olaga pe afai tatou te agavaa:

“Afai tatou te ola e pei ona tatou iloa e tatau ai, ua ia i tatou le aia tatau i musumusuga a se leo filemu ma le itiiti lea e lapatai mai i tulaga matautia, ma faapea mai o le ala lea i le saogalemu, savali ai. … Afai ua sese la tatou amio, o le a musumusu mai le leo e ‘toe foi, ua sese lou ala; ua e le amanaiaina le fautuaga a lou Tama Faalelagi.’ Liliu ese mai lou auala sese manu o i ai le taimi, aua a mamao ese lau alu mai le ala sa’o o le a e le faalogoina le leo ma ono mafai ai ona e sē e aunoa ma se faamoemoe. …

“O la’u fautuaga ia te oe, ia e maua le Agaga o le Atua ma tausia ma na pau le ala tatou te faatumauina ai o le ola latalata lea ia te ia, e ala i le tausiga o poloaiga. … Faalogo i le leo itiiti lena o le a faatonutonuina oe, pe a fai e te agavaa ai i se ala o lona uiga o le fiafia e faavavau.”¹ [Tagai fautuaga 1 o i le itulau e 123.]

Aoaoga a Siaosi Alapati Samita

E faaalia e le Atua o Ia lava i Ana fanau i o tatou taimi e faapei foi ona Ia faia i vaitaimi ua mavae.

Oka se avanoa e ola ai i se vaitau i le lalolagi ua tatou iloa ai o loo soifua le Atua, ua tatou iloa ai o Iesu Keriso o le Faaola o le lalolagi ma lo tatou Togiola, ma ua tatou iloa ai o loo faaauau pea ona faaalia mai e le Alii o ia lava i ana fanau, o ē ua saunia i latou lava mo le mauaina o faamanuiaga! O loo ou vaavaai atu i foliga o se aofia toatele i lenei taeao [i se sauniga o le konafesi aoao], o le toatele lava o loo fiafia i musumusuga a le Silisiliese, ma a oo ina latou tatalo, latou te tatalo i lo latou Tama i le lagi ma lo latou iloa o le a tali mai a latou tatalo i faamanuiaga i o latou ulu. … Ua tatou iloa o loo i ai se Atua i le lagi, ma o ia o lo tatou Tama, e naunau mai o ia i mea e faatatau ia i tatou, ma na ia faia lena mea mai lava i le amataga o le lalolagi, ina ua tuuina mai ana uluai fanau i le lalolagi.²

O le eseesega i le va o lenei Ekalesia tele ma isi ekalesia uma mai lava i le amataga, ona tatou te talitonu i faaaliga faalelagi; tatou te talitonu e fetalai mai lo tatou Tama i le tagata i ona po nei e pei foi ona sa ia faia i le taimi o Atamu. Tatou te talitonu ma ua tatou iloa—e tele atu i le na o le talitonu—ua faaloaloa mai e lo tatou Tama lona aao i lenei lalolagi mo le faaolataga o le fanau a tagata.³

E le gata ona ua i ai lo tatou faatuatua i nei tusi [le Tusi a Mamona, le Mataupu Faavae ma Feagaiga, ma le Penina Tau Tele], ua ta’ua i tatou o ni tagata e tulaga ese, ae ona ua tatou talitonu foi ma le mautinoa na fetalai mai lo tatou Tama i le lalolagi i lenei vaitau i nei ona po. O le mea moni, ua tatou iloa o loo i ai se fesootaiga ma le lagi. Ua tatou talitonu e faapena foi lagona o Ieova mo i tatou, lena uunaiga e tasi mo i tatou lea na ia te ia mo lana fanau sa ola i lenei lalolagi i taimi ua mavae.

O le au le talitonu, e manatu o tagata o le Ekalesia a Iesu Keriso i augatupulaga uma o le lalolagi o ni tagata e ese lava latou. Ina ua fetalai mai le Alii e ala mai i ana auauna, sa i ai vaitau eseese sa toatele tagata i le lalolagi e fai mai, “Ou te le talitonu i faaaliga.” Ua le ese ai foi lenei vaitau. O le fia afe, ioe, fia miliona o fanau a lo tatou Tama o ē nonofo i le lalolagi ua na ona toe faaauauina lava le talafaasolopito o taimi ua alu, pe a latou faafitia faapea sa toe faaali mai e le Atua lona finagalo i le fanau a tagata, ma fai mai latou te le manaomia nisi faaaliga.⁴

Tatou te le talitonu ua tapunia le lagi i o tatou luga a’e, ae o le Tama lava lena e tasi o lē sa alofa ma faapelepele i le fanauga a Isaraelu e alofa foi ma faapelepele ia i tatou. Tatou te talitonu tatou te matua manaomia foi le fesoasoani a lo tatou Tama Faalelagi i le faatonutonuina o o tatou olaga e faapei foi o i latou. Tatou te iloa i lenei vaitau tatou te ola ai, ua toe tatalaina mai le lagi, ma ua toe fetalai mai le Atua mai le lagi.⁵ [Tagai fautuaga 2 i le itulau e 123.]

E taialaina e le Alii Lona nuu e ala i faaaliga i le Peresitene o le Ekalesia.

Sa faatulagaina le Ekalesia a Iesu Keriso o le Au Paia o Aso e Gata Ai, e ala i le poloaiga tuusa’o mai lo tatou Tama Faalelagi. I luga o le papa o faaaliga sa faavae ai lenei Ekalesia ma e ala foi i faaaliga sa taialaina ai.⁶

E tulaga ese lava i nei aso le avea ma se tasi o se ekalesia, lea e talitonu ai i latou o tagata auai, e talanoa mai le Alii e ala i o latou taitai. A aoaoina i tatou e le Peresitene o lenei Ekalesia, tatou te talitonu na te ta’u mai ia i tatou le mea e finagalo le Alii tatou te fai. Ia i tatou, o se mea e sili atu i le na o se fautuaga a tagata. Tatou te talitonu i lena mea, ma afua ai ona tatou suesue i o tatou agaga, ma uunaia ai i tatou e faafou lo tatou naunautaiga e avea ma tagata e finagalo ai le Atua.⁷

Sa i ai ia te i tatou ni agaga i le Ekalesia na taitaiseseina, o ē na tetee i le fautuaga a le [Peresitene o le Ekalesia] ona o lo latou valea, latou te lei iloaina, o le mea moni, sa latou tetee i le Alii ma ua latou pauu atu ai i le pogisa ma le faanoanoa, ma sei vagana ua latou salamo o le a latou le maua se nofoaga i le malo selesitila.

Ia tatou manatua o le Peresitene o le Ekalesia ua tofia aloaia e avea ma pailate o le Ekalesia i le olaga nei, e avea ma sui o le Matai o le lagi ma le lalolagi.⁸

A o mai tagata, e pei ona latou faia i nisi taimi ina ia maua ai le mea o latou mananao ai i se tulimata’iga, i se tagata po o ni tagata ma fai mai, “Sa fai la’u miti ma o le mea lea e finagalo le Alii tatou te faia,” e mafai ona e iloa latou te le o i ai i le itu a le Alii. O miti ma vaaiga ma faaaliga a le Atua i le fanauga a tagata e ui mai lava i taimi uma i Lana auauna e masani ona tofia. E mafai ona i ai ni au miti ma faaaliga mo lou lava lelei ma lou lava loto malie, ae o le a e le maua lava mo le Ekalesia. … E le tatau lava ona faaseseina i tatou.⁹

Ua faatumulia lo’u agaga i le faafetai i lenei aso ina ua iloa, a o faaauau pea lo tatou auai i le Ekalesia o loo i ai so tatou pailate ua silafia le ala, ma afai o le a tatou mulimuli i ana faatonuga … o le a tatou le fetaia’i lava ma ni mala faaleagaga ia o loo fetaia’i ma le lalolagi, ae o le a tatou faia mea lelei, faamanuia tagata, ma olioli i le mafutaga ma i latou tatou te alolofa i ai.¹⁰ [Tagai fautuaga 3 i le itulau e 123.]

Ua tofu i tatou ma le aia tatau i musumusuga faaletagata lava ia mai le Agaga Paia pe afai tatou te usitai i poloaiga.

Ou te talitonu ia te outou, o’u uso e ma tuafafine. … Ua ia te outou foi le aia tatau i lena malamalama e tasi e faapei o le tamalii o loo pulefaamalumalu i le Ekalesia. Tou te aia foi i lena lava musumusuga e tafe atu ia i latou ua poloaiina e le Atua e faauuina e avea ma Ana taitai. Tou te aia i le musumusuga a le Agaga, ma le malamalama o Ia o lo outou Tama, ma a ou fai atu “outou” ou te tautala atu ia i latou uma e usiusitai i poloaiga a lo tatou Tama, ma ua taumamafa i le uunaiga suamalie a le Agaga o le Alii i le Ekalesia a Keriso. … E tofu aia i tatou i musumusuga a le Alii e tusa ma le tulaga tatou te ola ai amiotonu.¹¹

Po o fea lava e te alu i ai, o le a e le maua lava se isi potopotoga e pei o lenei, e tofu faatuatua tagata uma i le Atua; ma afai matou te fesili atu ia te outou uma pe toafia e i ai se molimau, e le o se talitonuga ona ua fai mai ai se tasi, ae toafia outou ua i ai se mautinoa o le galuega lenei a le Atua, o Iesu o le Keriso, o loo tatou ola i ni olaga e faavavau, o Iosefa Samita o se perofeta a le Atua Soifua, o le a outou tali mai ua ia te outou lena molimau lea e faamalosiauina ai outou ma faamalolosia ai outou ma maua ai le faamalieina a o outou fetuleni atu i luma i le lalolagi. …

… Sa ou aoaoina a o ou laitiiti o le galuega lenei a le Alii. Sa ou aoaoina sa i ai perofeta soifua i le lalolagi. Sa ou aoaoina o musumusuga a le Silisiliese, o le a uunaia ai i latou sa ola e fiafia ai, o le mea lea tatou te le o faalagolago ai i se tasi pe lua po o ni tagata se toatele. E fiaafe tagata o lenei Ekalesia ua iloa—latou te le na ona tau mafaufau i ai—ua latou iloa o loo soifua le Atua ma o Iesu o le Keriso ma o i tatou o fanau a le Atua.¹²

Tou te le o faalagolago na o le talafaasolopito, po o aoaoga a se tagata, e iloa ai o le galuega lenei a le Alii, aua ua mumu i o outou loto e ala i le meaalofa a le Agaga Paia. E leai se masalosalo i o outou mafaufau po o le a lo outou tupuaga, po o le nofoaga o le a outou o i ai pe a mae’a lenei olaga, pe afai tou te faamaoni i le faatuatuaga ua tuuina atu ia te outou.¹³

E le mafai ona tuuina mai se molimau e se isi tagata. O le talitonuga maumaututu e mai lo tatou Tama Faalelagi.¹⁴

Ou te tu atu i le aso ma le matua faafetai tele i le iloa ua oo mai ia te au. Ou te faafetai ona ou te le o faalagolago i se tagata mo le molimau ua ou maua. E moni, ou te faafetai mo le faamalosiauga ua ou maua mai isi ua maua le malamalama ma le upumoni, ma aumaia le faamalosiauga e ala i olaga o le amiotonu, ae ou te le faalagolago lava i se tasi o i latou mo se iloa faapea o loo soifua le Atua, o Iesu Keriso o le Togiola o tagata ma o Iosefa Samita o se perofeta a le Alii. Ua ou iloa e a’u lava nei mea.

… Ou te fiafia e molimau atu ua ou iloa e moni le talalelei, ma ou te faafetai ma lo’u loto atoa i lo’u Tama Faalelagi ua Ia faailoa maia ia te au.¹⁵

Mai faamanuiaga uma ua ou maua i lenei olaga, o le faamanuiaga e aupito taua o le iloa lea o loo soifua le Atua ma o Lana galuega lenei, aua ua aofia ai isi faamanuiaga uma ia ou te faamoemoe e olioli ai i lenei olaga po o le olaga a sau.¹⁶ [Tagai fautuaga 4 i le itulau e 123.]

O le Agaga Paia o se taiala saogalemu lea i le ala o le olaga faitino.

O le mafutaga ma le Agaga o le [Atua] … o se taiala saogalemu lea i le ala o le olaga faitino, ma o se tapenaga mautinoa mo le aiga i Lona malo selesitila.¹⁷

Ua tatou faitau i le Iopu e faapea e i ai se agaga i le tagata, ma o le musumusuga a le Silisiliese e maua ai e ia le malamalama [tagai Iopu 32:8]. Afai tatou te tausia poloaiga a le Atua, ua tatou aia i lena musumusuga, ma afai tatou te ola e pei ona tatau ai i atalii o le Atua, o le a tatou maua lena musumusuga, ma e leai se tasi e mafai ona ia taofia, ma o le taunuuga o lo tatou lava atina’ega faaleagaga ma faalemafaufau ma le amio e tatau ai, ma faaauau ai lava le atiina ae e faavavau.¹⁸

O le mafutaga ma le agaga o le Alii o se tali lea o le vaivai, … o le tali o le atuatuvale ma na mea uma e faatoilalo ai i tatou i nisi taimi o le olaga.¹⁹

A o i ai faatasi soo o le Faaola ma ia, sa latou vaai maualuga ia te ia ma lo latou le iloa lona maoae tele, ae ina ua oo mai i o latou luga le mana o le Agaga Paia, ina ua latou maua le papatisoga i le afi na mafai ai ona latou fetaiai ma faafitauli ma onosaia sauaga na semanu e le mafai ai ona latou taulimaina le olaga. Ina ua tuuina atu ia i latou e musumusuga a le Silisiliese le malamalama, sa latou iloa ai o la sa latou ola i [se] olaga e faavavau, ma afai e faamaonia lo latou faamaoni sa latou iloa afai e oti i latou, o le a latou toetutu mai le tuugamau i le mamalu ma le tino ola pea.

O le taunuuga lena o musumusuga a le Agaga o le Atua na oo mai ia i latou, o le musumusuga a le Silisiliese lea na latou maua ai le malamalama. …

Ou te tatalo ina ia tumau ma i tatou lena Agaga lea e faatumauina i tatou i le ala o le upumoni ma le amiotonu, ou te tatalo foi ina ia taitaiina i tatou e le manao lea e maua mai i musumusuga a lo tatou Tama Faalelagi i lena ala o le ola.²⁰

A mae’a le galuega i le olaga, talosia ia tatou iloa ai sa tatou faalogo i le musumusuga a lena leo filemu itiiti lea e taialaina ai i tatou e le aunoa i le ala o le amiotonu, ma iloa ai ua tatau mo i tatou le tatala mai o le faitotoa i le malo Selesitila, mo i tatou lava ma i latou tatou te alolofa i ai, e agai atu i luma i augatupulaga uma, … ma le fiafia e faavavau.²¹ [Tagai fautuaga 5 i le itulau e 123.]

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai i itulau v–vii.

A o e faitauina le “Mai le Soifuaga o Siaosi Alapati Samita” (itulau e 111–14), mafaufau pe faapefea ona faatatau le tala faatatau a Peresitene Samita i la tatou malaga i le olaga faitino. O a mea e mafai ona faatusa i ai le puao, le peaulagi, ma le pa’ō o le leo? Na faapefea ona lapataia e le Alii oe e uiga i se tulaga lamatia, ma fesoasoani ai e te tumau i luga o le ala i le ola e faavavau?
I itulau e 114–15, o loo tautino mai ai e Peresitene Samita e faapea, o faaaliga e tatau ona i ai i le taimi nei e pei foi ona i ai i ona po faatusi paia. E faapefea ona e tali atu i se tasi e faapea mai ua lava ia faaaliga o i tusitusiga paia mo o tatou taimi? O a ni aafiaga ua aoaoina ai oe faapea, “e naunau [le Tama Faalelagi] i mea e faatatau ia i tatou”?
Toe iloilo le vaega o loo amata i le itulau e 115. Na faapefea ona e iloa o fautuaga a le perofeta e mai le Alii ma e “sili atu i lo na o se fautuaga a se tagata”? (itulau e 116). E mafai faapefea ona fesoasoani ia faaaliga faaletagata lava ia e te talia ai ma faaaoga faaaliga e tuuina mai e ala i le perofeta?”
A o e suesueina le vaega o loo amata i le itulau e 116, mafaufau pe na faapefea ona e mauaina se molimau o le talalelei. Na faapefea ona fesoasoani ia te oe ia molimau a isi? O le a se mea na e faia ia e iloa ai le upumoni mo oe lava?
I levaega mulimuli o aoaoga (itulau e 118–19), vaavaai mo upu ma fasifuaitau o loo faamatala mai ai auala e mafai ona fesoasoani ai le Agaga Paia ia i tatou. Mafaufau po o le a se mea e mafai ona e faia ina ia agavaa faalausosoo ai mo le mafutaga ma le Agaga Paia i lou olaga.

Mau E Faatatau I Ai: Ioane 15:26; 1 Nifae 10:17–19; 2 Nifae 32:5; Moronae 10:3–5; Mataupu Faavae ma Feagaiga 1:38; 42:61; 76:5–10; Mataupu Faavae o le Faatuatua 1:9

Fesoasoani faafaiaoga: “Aua e te popole pe afai e fifilemu le vasega mo ni nai sekone pe a uma ona e fai atu i ai se fesili. Aua e te taliina lau lava fesili; tuu se taimi i le vasega e mafaufau ai mo tali. Peitai, o le faaumiumi o le fifilemu e mafai o na ta’u mai ai latou te le malamalama i le fesili, ma e tatau ona e toe faaupuina” (O Le Aoao Atu, E Leai Se Isi Valaauga e Sili Ai, 70).

O Siaosi Alapati Samita ma lona faletua, o Lucy. Sa faaaoga e Peresitene Samita sona aafiaga i luga o se vaalele e aoao mai ai le taua o faaaliga.

“E tofu aia i tatou i musumusuga a le Alii e tusa ai ma le tulaga o loo tatou ola ai i se olaga amiotonu.”