Mataupu 5

O Le Perisitua Paia—mo le Faamanuiaina o Fanau a le Atua

O le perisitua o le pule a le Atua. O i latou o ē umia le perisitua, e tatau ona agavaa ma faaaogaina e faamanuia ai isi.

Mai le Soifuaga o Siaosi Alapati Samita

I le sauniga a le au perisitua i le konafesi aoao i le aso 2 o Oketopa, 1948, na saunoa ai Peresitene Siaosi Alapati Samita:

“Ou te fia iloa i nisi taimi pe i le avea ai o ni tamā, tatou te taumafai ai e faamatala i o tatou atalii le matua taua o le matafaioi a se tamaitiiti pe a avea ma se tiakono. Ou te fia iloa pe a faauuina le tama e avea ma se tiakono, pe tuu atu ea e le tamā ina ia ona lagonaina ua ia te ia nei se mea e taua e faavavau. …

“Ou te manatua, e pei lava o ananafi, ina ua tuu e John Tingey ona lima i luga o lo’u ulu ma faauuina au e avea ma se tiakono. O le auala na tuuina mai ai ia te au ma lona taua, sa ou lagonaina ai o se faamamaluga tele. O le taunuuga, sa avea ma faamanuiaga ia te au, ma ina ua mavae sina taimi, sa oo mai isi faauuga ia te au. Peitai, o taimi taitasi lava, sa faataatia ai le faavae i lo’u mafaufau e faapea, o se avanoa lenei mo se isi faamanuiaga.”¹

I le lauga lava lea, sa aoao mai ai e Peresitene Samita e faapea, o se tasi o faamanuiaga e maua mai i le faauuina i le perisitua, o le avanoa lea e faamanuiaina ai olaga o isi. Mo se faataitaiga, na ia faamatalaina se tasi e umia le perisitua sa matua uunaia ai o ia—o se faiaoga o aiga—mai lona talavou:

“O Rodney Badger o se faiaoga o le aiga o lo’u tamā mo le tele o tausaga, ma o se alii maoae. Soo se taimi lava e sau ai o ia, e potopoto le aiga ona ia nofo lea ma fai mai fesili ia i matou, ma ta’u mai mea sa ia manatu e tatau ona matou malamalama ai. Ma ou te fia ta’uina atu ia te outou, a sau o ia i lo matou fale na te aumaia le agaga o le Alii. Ma a alu foi, matou te lagonaina sa asiasi mai se auauna a le Alii ia i matou.”²

Sa faaiu le saunoaga a Peresitene Samita i lona faailoa mai o lona naunau mo i latou e umia le perisitua ina ia auauna atu i tagata o a latou uarota ma siteki ma ia “aua nei maimauina se avanoa e fesoasoani ai e si’i a’e ma atiina ae ma aumaia i latou ia avea ma tagata e finagalo ai lo tatou Tama.”³ [Tagai fautuaga 1 i le itulau e 55.]

Aoaoga a Siaosi Alapati Samita

Na toefuatai mai e Iesu Keriso le pule paia i le lalolagi i le taimi o Lana misiona i le olaga nei.

Ina ua afio mai le Faaola i le taulotoaiga o taimi, sa Ia vaaia ai ua matua faatumulia le aai o Ierusalema i le amioleaga. Sa ola tagatanuu i se tulaga ua leai ia i latou le pule paia, o lea na auina mai ai e le [Atua] Lona Alo i le lalolagi ma toe amata ai se Ekalesia e umia ai le mana faalelagi. … Sa i ai i latou i Lona gafa, o ni tagata lelei, … sa i ai foi isi sa galulue lava i le Perisitua, ae sa tatau lava i le Faaola ona afio mai e toefuatai mai le pule paia. …

… Ina ua amata Lana misiona, Na te lei valaauina tupu ma faitaulaga ma i latou sa maualuluga la latou pule, e fesoasoani ia te Ia, ae na Ia valaauina le au faifaiva lē taualoa, ma o le taunuuga la sa Ia faapotopoto atu ia te Ia o tagata sa mafai ona aoao, ae lē o ni tagata e le talitonu ia te Ia. Sa Ia faatulagaina se Ekalesia i lalo o le taitaiga a lo tatou Tama Faalelagi. Sa Ia faaee atu i luga o Ana paaga le pule paia ma taitaia i latou i mea e tatau ona latou faia. … Sa ia te Ia le pule paia, ma sa iloa e i latou o e amiotonu o Ia o le Alo o le Atua. Sa manatu nisi o Ia ua na o se tagata e lelei. Tatou te talitonu na afio mai o Ia i le lalolagi e le gata ina aoao ia tagata i le mea e fai, ae ia faaee mai foi i luga o Ana paaga le pule paia e faatautaia ai sauniga o Lana Ekalesia. …

I ona po o le Faaola, o Ia o le pulefaamalumalu. Na sosoo atu ia te Ia, o se korama a tamalii e toasefululua, na Ia filifilia. Ina ua maliu o Ia, o le Korama a le Toasefululua, e lē o se aofai o ni alii faatauvaa o e na valaauina i latou lava o ni soo, ae o se korama a tamalii e toasefululua o ē sa umia le pule paia sa latou mauaina mai ia Iesu Keriso, na avea o le au taitai o le Ekalesia.⁴ [Tagai fautuaga 2 i le itulau e 55.]

Na toefuatai mai le perisitua i o tatou taimi e tamalii o e sa umiaina anamua.

O loo tusia ma silafia i le lagi ma le lalolagi e faapea, na faatoateleina talitonuga ma lotu ina ua tuua le lalolagi e [Iesu Keriso], ma sa faatoateleina lotu i le fogaeleele, seia oo mai i ona po o Iosefa Samita, lo tatou perofeta pele, sa tele lotu. Sa toatele tagata sa faafoliga ua latou umiaina le pule paia, ma ou te manatu sa faapea nisi o i latou ua latou mauaina. …

Ina ua oo mai le taimi ma mavae le aveesea mai le lalolagi o le pule o le perisitua, sa valaauina ai e le Alii se tama faatauvaa, ma tuuina atu ia te ia se faaaliga faalelagi ma talanoa atu ia te ia, ta’u atu ia te ia le mea e tatau ona ia faia, ma auina atu i ai nisi avefeau ma tamalii o le lagi mai lea taimi i lea taimi, o le taunuuga, o le faatulagaga o le Ekalesia a Iesu Keriso o le Au Paia o Aso e Gata Ai, ma tuuina i ai i lena Ekalesia le pule paia. …

Ina o talavou Iosefa Samita, sa faatonuina o Ia e le Alii e faaliliu le Tusi a Mamona. I se tasi taimi, a o faia le faaliliuga a Iosefa ma Oliva Kaotui, sa auina atu e le Alii se tamalii paia e tali a la’ua fesili e uiga i le papatisoga. O ai lena na sau? O Ioane le Papatiso, o lē sa umia le Perisitua Arona. O fea na sau ai o ia? Na sau mai le lagi. … Na faaali atu o ia ia Iosefa Samita ma Oliva Kaotui, o ia o se tamalii mamalu ua toetu. Na sau sa’o lava o ia mai lo tatou Tama Faalelagi e faaee atu le Perisitua Arona i luga o Iosefa ma Oliva, aua e le mafai ona maua i se isi lava nofoaga i le lalolagi uma. Sa tatau ona matala le lagi, ma sau se tagata o loo umia le Perisitua, ma o loo umia pea lava, e faaee mai.

Ina ua mae’a lena, sa faaee atu e Peteru, Iakopo ma Ioane, o ē o loo umia le Perisitua Mekisateko, lena Perisitua i luga o Iosefa ma Oliva, ma sa taitaiina e le Alii le faatulagaina o le Ekalesia, faatasi ai ma se Au Peresitene, e aofia ai se peresitene ma ni fesoasoani se toalua; faapea foi se Korama a Aposetolo e Toasefululua, se Peteriaka, Faitaulaga Sili, Fitugafulu, Toeaina, Ositaulaga, Aoao ma Tiakono; o le ituaiga o faatulagaga sa i ai i le uluai ekalesia anamua, e tusa ai ma le pule.⁵

O le pule lava lena sa ia [Iosefa Samita] ua faaee atu i luga o o outou atalii, ma o le a manaomia i latou e lo tatou Tama i le lagi, e faatautaia sauniga o le Talalelei. O le tiutetauave na oo mai ia Iosefa Samita, e le’i aveesea ina ua maliu o ia, ae na i luga o isi tauau. Mai lea taimi i lea taimi, sa faatuina ai e lo tatou Tama i le lagi i latou ua i ai le pule e saunoa atu ai i Lona suafa, e faatautaia ai sauniga o le talalelei, ma faamanuia le fanau a tagata. Ua latou faasoa atu lena mamalu faatasi ma outou ma a outou fanau.⁶

Ou te faafetai lava ona i lenei vaitau toe faaalia mai e le Alii le Talalelei. Na afifio mai le Tama ma le Alo; na oo mai foi tamalii sa umia muamua le Perisitua ma faaee mai le Perisitua i luga o ni alii e lē taualoa, ona poloaiina foi lea o i la’ua e faaee atu i isi. O le mea lea, ua i ai le Talalelei ma le Perisitua mo i latou uma o ē agavaa e mauaina, ma o le auala lea a le Alii.⁷

O la outou misiona o se misiona e ofoofogia tele, outou na alii o loo umia le Perisitua. Ua uma ona faaee atu i o outou luga le pule paia. Tou te lei mauaina la outou aia tatau e folafola atu ai ma aoao atu le talalelei ma faatautaia ona sauniga ona o ni aoaoga i se kolisi po o se iunivesite. Sa outou mauaina la outou pule mai tamalii na poloaiina faalelagi e galulue o ni auauna a le Alii, ma sa faaeeina atu i o outou luga e i latou sa mauaina sa’o mai ia Iesu Keriso lo tatou Alii.⁸ [Tagai fautuaga 3 i le itulau e 55.]

E na o Lana Ekalesia moni lava e mafai ona maua ai le mana ma le pule a le Atua.

E i ai tagata sa fesili mai ia te au: “O a ni manuia ua sili atu ai la outou ekalesia nai i lo nisi ekalesia?” Sa ou taumafai ma le faaeteete e faamatala atu ia i latou le eseesega. Soo se faalapotopotoga lava e mafai ona o mai faatasi mo tapuaiga, ae latou te le maua ai i lena mea le pule paia. E mafai e soo se faapotopotoga o ekalesia ona tutu faatasi ma faatulaga ai ni lotu faalenuu. E le faaee mai ai le pule paia i lena mea. E mafai e alii ona soofaatasi mo faamoemoega lelei, peitai o le pule mai lo tatou Tama Faalelagi, e na o Lana lava ala e maua mai ai, ma o Lana ala i aso ua mavae, sa ala mai i le valaauina ma le faauuina o alii ona vaetofia ai lea mo le galuega. O le mea lava lena e tasi ua moni i o matou taimi. …

E tatau ona faamalamalama i tagata, o le na ona ifo i luma o le Alii e tatalo latou te le maua ai le pule paia. O le ola e tusa ai ma tulaga manaomia o le faamaoni, mama, upumoni, ma isi mea, latou te le maua ai le pule paia. … E le lava lo tatou tatalo, lo tatou o i le lotu. E tatau ona tatou umia le pule paia, ma o le tala e faapea ua tatou umia lena pule na aumaia ai i lenei Ekalesia le tele o sauaga na mulimuli mai ai mai le amataga. Peitai, o le mea moni lava, ma ua toatele fanau a lo tatou Tama ua amata ona matauina le aafiaga o le pule paia i lenei Ekalesia. Ua latou vaai i le atina’ega ua faia i olaga o alii ma tamaitai.⁹ [Tagai fautuaga 4 i le itulau e 55.]

O a’u lava ia ou te le manao e manatu tagata faapea o loo ou vailiili masei ma faitioina tagata o isi lotu eseese i le lalolagi. Ou te faafetai ona e i ai i totonu o le tele o nei lotu ni alii ma ni tamaitai lelei o ē talitonu ia te ia ma le malamalama o loo latou auauna atu i le Atua; peitai, e tumau lava le mea moni e faapea ua faatuina e lo tatou Tama i lenei lalolagi lana Ekalesia. Na Ia faaee mai i luga o tamalii i lenei vaitaimi lana pule, ma e leai lava se isi pule i le lalolagi o le a na ia aloaia, ae ua na o lea lava na faatuina e ia lava.¹⁰ [Tagai fautuaga 5 i le itulau e 55.]

E taua sauniga o le perisitua mo i tatou e ulufale atu ai i le malo selesitila.

Pe ana fai e faapei i tatou o isi lotu uma, atonu tatou te sailia le Alii ma maua Ana faamanuiaga, aua o tagata uma lava e faia mea lelei i lenei lalolagi e mauaina se faamanuiaga; e ono mafai ona tatou maua uma amioatua e sili ona taua ma fai mo i tatou lava, ae a aunoa ma le mana o le Atua ma le pule o le Perisitua paia, e le mafai e tagata ona maua le malo selesitila.¹¹

Na pau le fuafuaga o le a saunia ai tagata mo le malo Selesitila, o le fuafuaga lea na tuuina mai e Iesu Keriso, lo tatou Alii; ma na pau le pule o le a faaagavaaina ai alii e aoao atu ma faatautaia tonu ai sauniga o le Talalelei o le pule a Iesu Keriso, lo tatou Alii.¹²

O Iosefa Samita le Itiiti na valaauina e le Atua e avea ma Ana perofeta, ma na ala mai ia te ia ona toefuatai mai i le lalolagi le Perisitua Paia Mekisateko, o le mana lea o le Atua ua faamatuu mai i le tagata e galue ai i Lona suafa. E ala i lenei Perisitua, ua faatautaia ai i le pule sauniga uma taitasi o le Talalelei a lo tatou Alii, o Iesu Keriso, ua tatau ai mo le faaolataga o le fanau a tagata.¹³

E aafia ai faapefea i tatou pe afai tatou te tuua le pule na faaee mai e le Atua i o tatou luga? O lona uiga e tapunia mo i tatou faitotoa o le malo selesitila. O lona uiga, o faamanuiaga tumutumu sa aoaoina a’u talu mai ina o tamaitiiti ou te faatalitali atu i ai, o le a le taunuu. … O le mafutaga ma ē ou te alofa i ai, … o ē sili ona pele ia te au e pei o le ola lava ia, o le a le mafai ona olioli ai i le malo selesitila.¹⁴

O le perisitua … o se faamanuiaga, afai tatou te faamaoni, o le a talaia faitotoa i le malo selesitila ma tatou maua ai se nofoaga iina e ola ai i le faavavau atoa. Aua nei o tatou faatalale i lenei faamanuiaga e le mafaatauina.¹⁵ [Tagai fautuaga 6 i le itulau e 55.]

Ua i ai i e umia le perisitua se tiutetauave e ola ai i ni olaga o faataitaiga ma faaaoga le perisitua e faamanuia ai isi.

E maeu le matagofie o le iloa e faapea, o alii e agavaa e mafai ona mauaina [le] perisitua, ma i le pule ua tuuina atu ia te i latou, e faia ai le anoanoai o mea e avea o se faamanuiaga i isi fanau a lo tatou Tama.¹⁶

E le mafai ona outou o atu i le lalolagi i se isi lava Ekalesia po o isi Ekalesia uma lava ma maua ai … ni alii o umia le pule paia. Aua nei galo lena mea. O outou o se tino o alii ua filifilia, … sa i ai lima na faaee atu i ai, ma mauaina ai le pule paia, ma avea ai outou ma paaga faatasi ma le Matai o le Lagi ma le Lalolagi. E le faapea ua ou fai atu e le mafai ona e ata, matafiafia, ma olioli i le olaga, ae o le uiga o la’u tala e tatau ona i ai i le ta’ele o agaga taitasi se silafia faapea “O a’u o se leoleo o lo’u uso. Ua ou umia le pule mai le Alii o Iesu Keriso—O a’u o sē e tauaveina le Perisitua Paia.” Afai tatou te faia lenei mea, o le a le maua i tatou o faatalale i mea paia e pei ona faia e nisi i aso ua mavae.¹⁷

O le tulaga e faapea ua latou umia le Perisitua o le a avea ma ta’usalaga i le toatele o alii ona o le auala latou te taulimaina ai, i le manatu i ai e faapei o se mea e faatauvaa tele.¹⁸

E manatu nisi alii e faapea ona ua latou umia le Perisitua, ua latou maua ai se ala faapitoa e mafai ai ona tafilisaunoa lava i latou i o latou aiga. Ou te fia ta’u atu ia te outou alii o loo umia le Perisitua, tou te le oo lava i le Malo Selesitila, sei vagana ua outou faamamaluina a outou ava ma o outou aiga ma aoao i latou ma tuu atu i ai faamanuiaga tou te mananao ai mo outou lava.¹⁹

Ua i ai le pule a lo tatou Tama Faalelagi i le lalolagi mo le faamanuiaina o tagata, ae le ia faamaualuluga ai i latou o ē mauaina lena pule, ae ia latou lotomaualalo ai; e le ina ia manatu ai i latou ua mauaina avanoa faapitoa e faapea ua sili atu i latou nai lo isi, ae ia tatou lotomaualalo ai i o tatou agaga, ia tumu o latou loto i le tatalo, ma mafaufau i tagata uma i a tatou mea uma e fai, ona faailoa atu ai lea e ala i olaga amiotonu lea o loo finagalo ai lo tatou Tama Faalelagi tatou te aoao atu.²⁰

O le avea ai ma se tasi o le Ekalesia ma umia le Perisitua o le a tatou le oo ai lava i se mea vagana ua tatou agavaa. Na fetalai mai le Alii e faapea, o faamanuiaga uma lava tatou te mananao ai e faavae i le usiusitai i Ana poloaiga. Atonu tatou te faaseseina o tatou tuaoi, atonu foi tatou te faaseseina i tatou lava i le manatu faapea o lea lava tatou te lelei, peitai sei vagana ua tatou tausia poloaiga a lo tatou Tama Faalelagi, vagana ua tatou tauaveina ma le agavaa lenei Perisitua paia lea ua matua taua tele, o le a tatou le mauaina lava so tatou nofoaga i le malo selesitila.²¹

Outou na uso e … ua uma ona faaee atu i o outou luga se avanoa paia, se faatuatuaga paia. Ua outou mauaina faamanuiaga o le Perisitua paia. Ua uma ona faaee atu i o outou luga le pule paia, faatasi ai ma lena pule ua avatu ai ma le tiutetauave o le si’i a’e o lou leo ma ola i lou olaga ina ia mafai ai e tagata o le lalolagi ona iloa le eseesega i le va o le Talalelei a Iesu Keriso ma isi faalapotopotoga a le lalolagi.²²

Po o fea lava tou te o i ai, ia manatua le mea moni o loo avea outou ma sui o le pule o o tatou tagata. O le perisitua o loo outou umia, e le o se perisitua a Iosefa Samita, po o Polika Iaga, po o se isi lava tamalii sa valaauina e avea ma taitai i le Ekalesia iinei po o fafo atu. O le perisitua ua outou umia o le mana lea o le Atua, ua faaee atu ia te outou mai luga. Sa tatau ona auina mai tamalii paia i le lalolagi … ina ia mafai ona toefuatai mai lena faamanuiaga mamalu sa aveesea mai le lalolagi mo le fiaselau o tausaga. E moni lava e tatau ona tatou faafetai mo o tatou faamanuiaga.²³

Ou te tatalo ia faamanuia i tatou uma e le Alii, ina ia tatou agavaa e tauaveina le perisitua na Ia tuuina mai ia te i tatou ma faaee mai i o tatou luga, ina ia mafai ona tatou faapea atu i soo se mea tatou te o i ai, “O le tagata le la o se auauna a le Alii.”²⁴ [Tagai fautuaga 7 i le itulau e 55.]

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai i itulau v–vii.

Mafaufau i aafiaga o Peresitene Samita o loo faamatala atu i itulau 45–47. O le a se mea e mafai ona tatou faia e fesoasoani ai i alii talavou ia saunia e faauuina i tofi o le perisitua? O le a se mea e mafai ona tatou faia e fesoasoani ai i tamaitai talavou ia malamalama i le taua o le mana o le perisitua i o latou olaga? Aisea e taua ai i alii ma tamaitai ona aoao e uiga i le perisitua?
Aisea na “tatau ai i le Faaola ona … toefuatai mai le pule paia” (itulau 47) i le taimi o Lana misiona i le lalolagi, e faaopoopo i le aoaoina atu o le talalelei?
Faitau le itulau e 49 ma le parakalafa muamua i le itulau e 50. Aisea e te manatu ai ua faaavanoa e le Alii Lana pule mo alii agavaa uma ae le faagata i ni nai alii toalaiti sa aoaoina aloaia?
Na saunoa Peresitene Samita e uiga i le “atina’ega ua faia i olaga o alii ma tamaitai” ona o le perisitua (itulau 50). O le a le uiga o lenei faamatalaga ia te oe? O le a se mea e mafai ona e faia e faafailele ai le mana ma le uunaiga a le perisitua i lou olaga?
A o e iloiloina le vaega o loo amata i le itulau e 50, mafaufau pe faapefea ona e tali atu i se tasi e fesiligia oe i le fesili na tuu atu ia Peresitene Samita: “O a ni manuia ua sili atu ai la outou ekalesia nai i lo nisi ekalesia?”
Suesue le vaega o loo amata i le itulau e 51. O a nisi o “faamanuiaga e le mafaatauina” ua e maua ona o le perisitua?
A o e suesueina le vaega mulimuli o aoaoga (itulau 52–53), vaavaai mo tiutetauave o loo fai mai Peresitene Samita e o mai faatasi ma le perisitua. O le a se mea e mafai e uso o le korama a le perisitua ona fai e lagolago ai e le tasi le isi i o latou tiutetauave? E mafai faapefea e tamaitai ona fesoasoani i ē o umia le perisitua ia tumau le faamaoni i nei tiutetauave? O a mea e mafai e i latou e umia le perisitua ona fai e lagolago ai i tamaitai i a latou matafaioi paia?

Mau E Faatatau I Ai: Ioane 15:16; Alema 13:1–3, 6–10; Mataupu Faavae ma Feagaiga 84:19–22; Iosefa Samita—Talafaasolopito 2:68–72; Mataupu Faavae o le Faatuatua 1:5

Fesoasoani faafaiaoga: “Molimau i soo se taimi e uunaia ai oe e le Agaga e faia, ae le na o le faaiuga o lesona taitasi. Tuu atu avanoa ia i latou e te faiaoga ai e fai ai a latou molimau” (O Le Aoao Atu E Leai Se Isi Valaauga e Sili Ai, 45).

“Ou te fia iloa pe a faauuina [se] tama e avea ma se tiakono, pe tuu atu e le tamā ina ia ona lagonaina ua ia te ia nei se mea e taua e faavavau.”

“O tamalii sa umia muamua le Perisitua, na o mai ma faaee mai le Perisitua i luga o ni alii e lē taualoa.”