Mataupu 17

O Le Mana Faamalosi o le Faatuatua

O le faatuatua o se meaalofa mai le Alii lea e faamanaina ai e amiotonu e faia mea ofoofogia.

Mai le Soifuaga o Siaosi Alapati Samita

I le 1919 na valaauina ai Siaosi Alapati Samita, o lē sa avea o se sui auai o le Korama a Aposetolo e Toasefululua i lena taimi, e avea ma peresitene o le Misiona a Europa. I se savali i le Au Paia i le lotoifale ina ua faatoa taunuu, sa ta’ua ai e Peresitene Samita ia tulaga faigata i Europa, lea sa tau faaleleia mai tulaga pagatia o le Taua Muamua a le Lalolagi: “Ua ou iloa o loo tatou ola i se vaitau taua i le talafaasolopito o le lalolagi. Faatasi ai ma tulaga fou ogaoga o feagai nei ma malo, ma se agaga le to’a ua salalau toetoe lava i vaipanoa uma, i le fanau a tagata, o lea ua ou lagonaina ai le tiutetauave tele e feagai ai ma i latou, ma sili ai ona ou naunau i le taitaiga faalelagi i le faatinoina o o’u tiute.” Sa i ai le faatuatua o Peresitene Samita e ui lava i le faigata o taimi sa latou feagai, ae o le a tauia lava i le manuia taumafaiga a tagata o le ekalesia ma faifeautalai: “Faatasi ai ma le lagolago mai paaga lelei ma le tomai i le laumua [o le misiona], ma alii ma tamaitai faamaoni i le talaiga, sa ou vaavaai atu ma le faamoemoe lelei mo se seleselega manuia o agaga faamaoni.”¹

O se tasi o tiute aupito sili ona mamafa o Peresitene Samita i le avea ai ma peresitene o le misiona, o le faateleina lea o le aofai o faifeautalai i Europa. E toalaiti ni faifeautalai na auina atu e le Ekalesia i Europa i le taimi o le taua, ma o le tau leai o ni meaai ma isi faafitauli tau i le tamaoaiga na le mananao ai taitai o le malo o Europa e faamatuu atu ni pemita mo tagata mai fafo. O le galuega faigata a Peresitene Samita, o le tauanauina lea o nei taitai e faataga atu ia faifeautalai i o latou atunuu. I se tusi i lona afafine o Emily, sa ta’ua ai e Peresitene Samita se malaga i Lonetona mo lenei faamoemoe.

“Sa maeu le agalelei o lo tatou Amepasa Amerika ma ua faamanuiaina i le faatulagaina o se faatalanoaga mo i matou ma Sir Robert Horne, le Minisita o Leipa mo Peretania Tele. Ina ua ma taunuu atu i lona ofisa, sa ma tuuina atu le matou tusi mai le Amepasa i le failautusi a Sir Robert, lea na fesili mai pe mafai ona taofi le matou mataupu aua ua toe o ni nai minute ona malaga lea o lona pule mo Sikotilani ma e tolu vaiaso o le a toesea ai. Sa ou faamautinoa atu ia te ia, o le a ma talisapaia sina lima minute o lona taimi nei lava, aua ma te le nonofo i Lonetona ma e faanatinati la ma mataupu. Sa alu le failautusi ia Sir Robert ma e lei leva ae taliu mai ma le faamatalaga, o le a tolopo lana malaga ae o le a matou feiloai i le itula e fa i le aso lena. Sa ou matua tatalo faatauanau i lena taeao ina ia tatala lo ma auala, ma ina ua valaaulia i ma’ua e toe foi atu sa ou matua faafetai a’e i lo tatou Tama Faalelagi.”

I le taimi na atofaina, sa valaaulia Peresitene Samita ma ana soa i le ofisa o Sir Robert Horne. “Sa matou taumafai e ta’u atu ia te ia le mea sa matou manaomia ma faamautinoa atu ia te ia, e manaomia e Peretania Tele le mea lea matou te talosaga atu ai. Toeitiiti atoa le itula ma le afa, sa matua fiafia lava o ia e faafofoga mai i le vaega o le talafaasolopito o le Ekalesia ma o matou talitonuga, ma isi mea.

“Ina ua uma la’u tala, sa ia toe fesili mai po o le a se mea sa matou mananao ai ia te ia ma ina ua matou ta’u atu i ai matou te mananao i le avanoa e faatoateleina ai a matou au faifeautalai ia oo i le luaselau limasefulu, e pei ona sa i ai a o lei faia le taua, sa ia fai mai o le a fiafia lava o ia e tuuina atu faatonuga i lana matagaluega e faataga lena aofaiga i le atunuu i le vave e taunuu mai ai. O le mea moni sa matou matua fiafia lava ma tuua ai o ia ma le mautinoa ua ia aveesea se avega mamafa mai o matou mafaufau.

“Ua ou mautinoa ua matou faia se faigauo ma se tasi o tamalii aupito sili o le au faitonu ma o le a ou le faatuai lava ona alu atu ia te ia pe afai e manaomia”²

Mulimuli ane sa fai mai James Gunn McKay, o se tasi o faifeautalai a Peresitene Samita sa i ai i le fonotaga ma Sir Robert Horne: “Vaai i le galuega matagofie sa ia faataunuuina. Sa na o ni nai faifeau toalaiti iina [i le misiona]. Sa foliga mai na punitia le ala i maagao, ae na sau o ia ua faatumulia i musumusuga a le Alii, ma sa mafai ona tuitui atu i faitotoa o taitai, ia maua ai lo latou talitonuga; ma sa iu ai lava ina matou maua le avanoa sa matou mananao ai, ia mafai ai e faifeau ona faataunuu a latou misiona mo le faalauteleina o le galuega a le Atua ma faataunuuina lana galuega, ma o lea sa ia faamautu ai ia i matou se molimau o loo taitaia e le Atua lena galuega.”³ Sa atofaina e Elder McKay le faamanuiaina o Peresitene Samita i lona “faatuatua ma lona tuuto ma lona alofa mama ia i latou uma na te mafuta atu i ai.” “Sa ou galue faatasi ma ia,” o lana tala lea. “Sa ou fefautuaai ma ia; sa ou tatalo ma ia, ma ou te iloa o lona faatuatua ma lona faamaoni e loloto pei o le loloto o le olaga lava ia.”⁴ [Tagai i le fautuaga 1 i le itulau 193.]

Aoaoga a Siaosi Alapati Samita

Ua manino le mana o le faatuatua i tusitusiga paia.

Ua faailoa mai ia i tatou a leai se faatuatua e le mafai ona fiafia mai le Atua [tagai Eperu 11:6]. O le mafuaaga faaosofia lea o galuega uma, ma ua tumu Tusitusiga Paia i faamaoniga o le mana o le faatuatua. O le faatuatua o Noa na mafai ai e ia ona fau se vaa, ma ona o lona usitai i poloaiga a le Atua na faasaoina ai o ia ma lona aiga, a o i latou uma sa leai se faatuatua na malelemo i le lolo tele [tagai Kenese 6:13–22; 7:1–24].

O le faatuatua o Lota ma tagata o lona aiga na faasaoina ai i latou ina ua faatafunaina e le afi mai le lagi ia aai o Sotoma ma Komoro, ma faaumatia ai tagata e lei i ai se faatuatua [tagai Kenese 19:12–25].⁵

O le faatuatua na taitai ai e Mose le fanauga a Isaraelu mai le nofo pologa, ma ui atu ai i le sami Ulaula e pei o le laueleele matutu, ae malelemo ai ‘au a Aikupito a o taumafai e tuliloa i latou. Sa fafagaina le motu o tagata i le areto mai le lagi. Ina ua ta e Mose le papa i Orepa, sa puna mai ai le vai e faamalie ai lo latou fiainu; ma ui atu ai i le vao, ma taitai atu ai i latou i le nuu folafolaina. [Tagai Esoto 14:21–31; 16:14–15; 17:5–6.]⁶

Ina ua faaauau pea ona tatalo Tanielu i le Atua o Isaraelu, e le tusa ai ma se faaiuga na saunia e ona fili ma le faamoemoe e faaumatia ai o ia, sa lafoina o ia i le lua o leona ma tuu ai iina i le po atoa. Sa ia iloa e mafai e lona Tama Faalelagi ona faasaoina o ia ma sa le maluelue lona talitonuga. I le taeao na sosoo ai, sa usupo le tupu i le lua ma iloa o loo ola Tanielu. O lona faatuatua na afua ai ona le afaina o ia i meaola ma sa tuuto atu ai le tupu ia te ia. [Tagai

O Eperu e toatolu, o Sataraka, Mesako, ma Apeteniko, o e sa mumusu e ifo i se faatusa auro na faatuina e Nepukanesa, sa lafoina i se ogaumu aasa e faafitu lona aasa nai lo le mea masani. Sa latou faatuatua i le Atua soifua ma na tauia lo latou faatuatua i le faasaoina o o latou ola. [Tagai Tanielu 3:8–28.]

O le faatuatua, na to mai ai e le Perofeta o Elia le afi mai le lagi e faamu ai lana taulaga, ma sa faatalitonuina ai le tupu ma tagata o le Atua o Isaraelu o le Atua lea ae le o Paala [tagai 1 Tupu 18:36–40].

O le faatuatua na faatumauina ai e le uso o Iareto ma ona tagata le gagana a o latou tama i le taimi na faaeseese ai gagana i le Olo o Papelu, ma aumaia ai i latou i le Lalolagi i Sisifo [tagai Eteru 1:33–43]. … O se faatuatua foi faapena na mafai ai e Liae ona aumaia lona aiga i le vasa ma tulaueleele ai i lenei atunuu, ua sili i lo isi atunuu uma.

O le faatuatua na mafai ai e soo o Iesu ona onosaia sauaga e sili atu i lo latou malosi, e ui i le tetee o Iutaia, e faatu le talalelei lea na auina atu e le Faaola ia i latou.⁷

O le faatuatua na faia ai vavega uma e le Togiola o le lalolagi, ma i latou o e sa mafuta ma Ia. Mai le amataga o taimi seia oo mai i le taimi nei, o le tagata faatuatua sa i ai le mana o le Atua.⁸ [Tagai fautuaga 2 i itulau e 193.]

O le mana o le faatuatua e iloagofie i olaga o le Au Paia amiotonu i lenei tisipenisione.

I lenei tisipenisione faaiu, o le faatuatua lē leoa i le Atua na alu ai le perofeta taulealea [o Iosefa Samita] i le vao ma tootuli ai ma tatalo, ma ia maua ai le uluai faaaliga maoae faalelagi na oo mai ia te ia, lea na toe faailoa mai ai foliga ma uiga o le Aigaatua i tagata. O le faatuatua na ia mafai ai ona alu i le mauga o Kumora ma maua ai mai lima o le agelu na faamaumauga paia, lea na ia faaliliuina mulimuli ane e ala i le meaalofa ma le mana o le Atua. O le faatuatua na ia taitai ai ona tagata mai Katelani i Misuri ma toe foi ai i Ilinoi, ma e ui ina sauaina pea lava pea ma tutuli ese mai o latou fale, ae sa tumau pea le faatuatua sa totoina i o latou loto, ma sa latou iloa sa silafia i latou e le Atua. O le faatuatua na faavae ai le aai tele o Navu, i lalo o le taitaiga a le Perofeta o Iosefa Samita; ma o le faatuatua foi na ia maua ai upumoni mamalu o loo i ai i le Mataupu Faavae ma Feagaiga.

O le faatuatua na taitai ai e Polika Iaga le nuu i le laueleele i sisifo [le Vanu o Sate Leki]; ma, ina ua ia taunuu i le tumutumu o le mauga ma vaavaai ifo i le vanu, sa tuuina atu e le Atua ia te ia se molimau o le nofoaga lenei e tatau ona faamautu ai Isaraelu. … O le faatuatua na faataatia ai e tagata le maatulimanu o lenei Malumalu maoae [le Malumalu o Sate Leki], i lo latou vaivai ma lo latou matitiva, ma le talitonu o le a saunia e le Atua le ala e maua ai mea e faamae’a ai le maota. O le faatuatua na oo mai ai le alofa tunoa o lo tatou Tama Faalelagi i tagata, ina ua latou vaai atu ma le faanoanoa i a latou faatoaga ua faaumatia e se akerise, ae leai ni mea e puipuia ai, ma i le alofa tunoa o le Atua, sa talia ai a latou tatalo, ma latou maua ai se molimau i lena mea, ina ua o mai gogo ma faasaoina fua e seleseleina, ma laveaiina ai i latou mai le matelaina. …

… O le faatuatua na musuia ai tamalii sa taiulu i lenei galuega mai lea taimi i lea taimi, e tuuina mai faatonuga sa tatou manaomia. O le faatuatua e faagaeetia ai i tatou e i latou e galulue i le suafa o le Alii, ma faapupula ai e le Fesoasoani lo latou malamalamaaga, ma toe faamanatu mai ai mea ua tuanai ma faaalia ia i latou mea o le a oo mai; ma faamaonia ai le agaga o faaaliga.⁹

O le faatuatua na o atu ai toeaina o Isaraelu, ae tuua o latou aiga ma e pele ia i latou, ma onosaia faitioga a le lalolagi, e tuuina atu molimau o loo soifua le Atua ma o Iesu o le Keriso, ma o Iosefa Samita o se perofeta a le Alii. O le faatuatua e faamaloloina ai e mama’i, ma toe faatutu mai ai e ua oti. Pe ana i ai ni faamaumauga o vavega na faia i nei tagata nb}… , semanu o se molimau lea i le mana o le Atua, e ala i le faatuatua, e le matineia lava i soo se vaitau o le lalolagi.

O le mataupu faavae lenei, o’u uso e ma tuafafine, e faasino atu agai i le lagi, tatou te maua ai le faamoemoe i le taua o le olaga. A oo ina tatou fememea’i, ma fesouaiina i tatou i mea faalavefau, e foliga mai e le mafai ona faatoilaloina, a i ai le faatuatua i le Togiola o le lalolagi, e mafai ona tatou o atu ia te Ia ma le iloa o le a tali mai a tatou tatalo mo lo tatou lelei.¹⁰ [Tagai fautuaga 3 i le itulau e 193.]

O le fesili e masani ona fesili ai: Faamata e mafai e tama ma teine, alii ma tamaitai talavou o ē o ola mai i lenei augatupulaga o le Ekalesia ona naunau e onosaia faigata, tuulafoaiina ma tofotofoga na onosaia e o latou tama ma tina ona o le talalelei? Pe latou te tuua ea o latou aiga toafilemu ina ia faa’aināina se atunuu fou i lo latou faatuatua?

Ou te fai atu ia te outou afai e totoina i o latou loto se iloa o le paia o lenei galuega e pei ona tatou iloa ai, afai na latou maua le faatuatua ona o lo tatou tausia o poloaiga a le Alii, afai na aoaoina i latou ia iloa o Iesu o le Keriso ma o Iosefa Samita o se perofeta a le Alii, ona ou fai atu lea ia te outou, Ioe! O le a latou faia mea sa faia e o latou tama ma tina, ma faataunuuina a latou matafaioi, i Isaraelu o aso e gata ai.

Afai o le faia o lea mea o le a matitiva ai, afai o le a mama’i ai ma faanoanoa, pe faaaunuua ai mai le aiga, e faitau selau ma faitau afe o tatou atalii ma afafine ua iloa o le talalelei lenei a Keriso, o le a faamaufaailogaina a latou molimau pe a tatau ai, i o latou ola.¹¹ [Tagaifautuaga 2 i itulau e 193.]

O le a tatala e le Alii le ala mo i tatou e faia ai mea ua Ia poloai mai ai pe a faaaoga lo tatou faatuatua.

Ou te manatuaina se tasi aso sa uunaia ai a’u e fai atu i se faifeautalai o le a alu i se taulaga patino e le faatagaina ai lo tatou faia o ni fonotaga i le alatele.

“Ia e manatua, tuu se avanoa i le Alii. O le a e fesili atu mo se fesoasoani. Tuu se avanoa i le Alii. Fesili ia te Ia e tatala le ala.”

Sa alu le taulealea i lena aai, ma alu i le ofisa o le pulenuu, ma talosaga pe mafai ona vaai ia te ia. Sa alu e fesili pe mafai ona suia le tulafono.

Ina ua taunuu atu o ia iina, sa iloa ai o loo malaga le pulenuu. Sa savali mai i fafo le taulealea mai le ofisa, ma tilotilo atu i le isi itu ma iloa atu ai i luga o se faitotoa i le pito le, “Ofisa o le Taitai Leoleo.” Sa faatalitali mo sina minute, ae e i ai se mea na fai atu ia te ia: “Tuu se avanoa i le Alii.” Sa savali atu o ia i le ofisa o le taitai leoleo ma ta’u atu i ai le mea na alu atu ai. Ina ua uma sa fai atu le tamaloa:

“Ia, o lē fea tulimanu o le ala e te manao ai?”

Sa ia fai atu: “Ou te le iloaina lenei aai e pei ona e silafiaina. O le a ou le talosaga atu mo se tulimanu o le a le talafeagai, po o se mea foi o le a matou polokaina ai taavale. Pe mafai ona ta o e filifili se tulimanu?”

Sei mafaufau la i se faifeautalai ua fesili atu i le taitai leoleo e filifilia se tulimanu e talai atu ai le talalelei?

Fai mai le leoleo:

“Ua lelei, ta o.”

E sefululima minute a ua latou maua tulimanu aupito sili i le taulaga, faatasi ai ma le faatagaga e talai le talalelei a Iesu Keriso i le mea sa le’i tala’ia ai i magaala a o lei amataina le taua [Taua Muamua a le Lalolagi]. …

E i ai se ala a le Alii e faataunuuina ai mea e le mafai ona tatou faia, ma na te le poloaiina lava i tatou e faia se mea e aunoa ma lona saunia o se ala e fai ai. O le mea lena na ia ta’u mai ia i tatou e ala ia Nifae. O le a na le poloai mai lava i se mea e aunoa ma le saunia o le ala.

“Ma ua oo ina fai atu a’u o Nifae i lo’u tama: Ou te alu atu ma fai ia mea ua poloaiina e le Atua, aua ua ou iloa, e le aumai e le Atua ni poloaiga i le fanauga a tagata, sei iloga na te saunia le ala mo i latou ia mafai ai i latou ona fai le mea ua ia poloaiina ai i latou.” [1 Nifae 3:7.]

Afai e i ai se mea ua poloai mai ai le Alii ia te oe pe o faamoemoe foi e te faia ae e te le iloa tonu pe faapefea ona fai, ia e faia le mea sili. Aga’i i le itu e tatau ona e alu i ai; faalagolago i le Alii, tuu atu ia te Ia se avanoa, ma o le a Ia le tuulafoaiina lava oe.¹²

Se mea ina a matagofie o le iloa tatou te mafai, pe afai tatou te uuina le aao o lo tatou Tama Faalelagi ma ia taialaina e ia. E leai nisi tagata i le lalolagi ua i ai le mautinoa ua i ai i lenei vaega o tagata.¹³ [Tagai fautuaga 4 i le itulau e 193.]

E tuuina mai e le Atua le faatuatua o se meaalofa i e amiotonu.

E faalagolago lo tatou faatuatua i o tatou olaga amiotonu. E le mafai ona tatou ola lē talafeagai ma maua le faatuatua e pei ona tatau ai, ae afai tatou te tausia poloaiga a le Alii, e mafai ona tatou maua le faatuatua, ma o le a tupu ma faateleina a o faateleina lo tatou amiotonu.¹⁴

Afai e i ai nisi o i tatou e leai se faatuatua i lenei galuega, e afua ona tatou te le o tausia poloaiga a le Atua. Afai e i ai nisi e le iloa o le galuega lenei a lo tatou Tama, e afua ona e le o faia o latou tiute. Ou te iloa e pei ona ou iloa o loo ou ola, o le galuega lenei a le Alii, ma e maua le malamalama ona o le tausiga o Ana poloaiga.¹⁵

Ua tatou iloa o le faatuatua o se meaalofa a le Atua; o fua o le ola amiotonu. E le sau ona o sa tatou faatonuga, ae o le taunuuga o le faia o le finagalo o lo tatou Tama Faalelagi. Afai e leai so tatou faatuatua, ia tatou suesue ifo ia i tatou lava e vaai pe o tatou tausia Ana poloaiga, ma vave ona salamo pe afai tatou te lei salamo, … Ia faateleina e le Alii lo tatou faatuatua, ma ia tatou ola agavaa mo le mauaina.¹⁶

Ou te faamoemoe o i latou ua mauaina lenei meaalofa ofoofogia, o loo ola ina ia faatumauina.¹⁷ [Tagai fautuaga 5 i le itulau e 193.]

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai i itulau v–vii.

Vaai mo ni faamaoniga o le faatuatua o Siaosi Alapati Samita i le tala o i itulau e 179–81. Na ta’ua e se tasi o faifeautalai a Peresitene Samita e faapea o mea na ia ausia “na faamautu ai ia i matou se molimau o loo taitaia e le Atua lena galuega” (itulau e 182). Na faapefea ona uunaia oe e le faatuatua o isi, e pei o se tagata o le aiga po o se uo mamae?
Toe iloilo faataitaiga o le faatuatua o loo i itulau e 182–86. O a isi faataitaiga o le faatuatua e faapitoa le ‘anoa ia te oe? E mafai faapefea ona e faaaogaina nei faataitaiga e fesoasoani ai i se tasi o loo faaaogaina le faatuatua ae na te lei mauaina faamanuiaga o loo ia manao ai?
Na faapefea e lou faatuatua ona e maua ai le “faamoemoe i le taua o le olaga”? E mafai faapefea ona fesoasoani le faatuatua ia i tatou e faatoilalo ai le fefe po o isi “mea faalavefau, e foliga mai e le mafai ona faatoilaloina”? (itulau e 186).
Faitau le tala o loo amata i le itulau e 186, ma faatusatusa i le tala “Mai le Soifuaga o Siaosi Alapati Samita.” O a ni mea na e oo i ai e talitutusa ma nei? O le a sou manatu o le a le uiga o le “tuu se avanoa i le Alii”?
Ua aoao mai e Peresitene Samita e faapea o le “faatuatua o se meaalofa a le Atua” e “le sau ona o sa tatou faatonuga” (itulau e 188). E faapefea e lenei mataupu faavae ona uunaia le ala e te taumafai ai e faateleina lou faatuatua ma musuia ai le faatuatua o isi? O a ni mea patino e mafai ona tatou faia e “faatumauina” ai le meaalofa o le faatuatua? (tagai Alema 32:35–43).

Mau E Faatatau I Ai: Eperu 11:1–11, 17–34; Iakopo 2:17–24; Alema 32:26–43; Eteru 12:6–22; Moronae 7:27–39; Mataupu Faavae ma Feagaiga 136:42

Fesoasoani faafaiaoga: “Ina ia fesoasoani i tagata aoao e saunia e tali i fesili, atonu e te manao e ta’u atu i ai a’o lei amata faitauina pe tuuina atu se vaega o le a e fesili atu mo ni tali. … Mo se faataitaiga, e mafai ona e fai atu, ‘Faalogo mai ae se’i ou faitauina atu le fuaitau lenei ina ia mafai ai ona outou faasoa mai po o le a le mea e sili ona e fiafia ai i ai’ po o le ‘A o faitauina lenei mau, vaai pe mafai ona outou malamalama i le mea o loo ta’u mai e le Alii e uiga i le faatuatua’” (O Le Aoao Atu, E Leai Se Isi Valaauga E Sili Ai, 72).

“Ua tumu tusitusiga paia i faamaoniga o le mana o le faatuatua. … O le faatuatua, na to mai ai e le Perofeta o Elia le afi mai le lagi e faamu ai lana taulaga.”

“O le faatuatua na taitai ai e Mose le fanauga a Isaraelu mai le nofo pologa, ma ui atu ai i le sami Ulaula e pei o le laueleele matutu.”

“O le faatuatua na taitai ai e Polika Iaga le nuu i [le Vanu o Sate Leki].”