Aoaoga a Peresitene
Mataupu 3: O La Tatou Molimau ia Iesu Keriso

Mataupu 3

O La Tatou Molimau ia Iesu Keriso

O le talalelei toefuataiina e maua ai e le Au Paia o Aso e Gata Ai ni molimau faaopoopo o Iesu Keriso o le Alo o le Atua.

Mai le Soifuaga o Siaosi Alapati Samita

I ana femalagaaiga o se Pulega Aoao, e i ai taimi na feiloai ai Siaosi Alapati Samita ma i latou o ē manatu e le talitonu le Au Paia o Aso e Gata Ai ia Iesu Keriso. O lenei talitonuga sese sa ofo ma popole ai Peresitene Samita, ma sa taumafai ai e faasa’o e ala i le faasoa atu o lana molimau patino e uiga i le Faaola.

Sa i ai se taimi sa ia saunoa ai i se sauniga a le Ekalesia i Cardston, Kanata, e uiga i le soifuaga ma le misiona a Keriso. O le taeao na sosoo ai, na alu ai o ia i le nofoaga o nofoaafi e faatau ai sana pepa malaga. A o faatalitali o ia i le laina, sa ia faalogoina se talanoaga a se fafine ma le tagata e faatau ai pepa malaga. Sa ta’ua e le fafine o anapo sa alu ai i se sauniga tapuai a le Au Paia o Aso e Gata Ai.

Sa te’i le tamaitai ofisa. “Auoi,” na ia fai mai ai. “Talosia e te le’i alu ai i le lotu.”

“Ioe, sa ou lotu ai,” o le tali lea a le fafine. “Ae aisea?”

Fai mai le tamaitai ofisa, “Latou te le talitonu ia Iesu Keriso.”

Ona tali atu lea o le fafine, “O anapo lava sa ou faalogologo ai i se tasi o toeaina o le Ekalesia, o talanoa e uiga i le soifuaga o Iesu le Nasareta, ma ou te le’i faalogo lava i se isi lava tagata e sili atu le loloto o lona silafia o Iesu lava o le Keriso, nai lo le failauga i lena sauniga.”1 [Tagai fautuaga 1 i le itulau e 31.]

Sa maua e Siaosi Alapati Samita le malosiaga mai lana molimau ia Iesu Keriso, ma sa fiafia o ia e faasoa atu i isi. I le 44 o tausaga o lona soifua, i le 11 o tausaga a o galue ai i lona valaauga faaaposetolo, fai mai o ia:

Ua faamalosiauina a’u, e pei ua sili atu nai lo a’u lava ia, ma ua tuuina mai mana e le o so’u lava malosi, e aoao atu ai upumoni na folafola mai e le Togiola o le lalolagi. Ou te lei vaai i Ona foliga ae ua ou olioli lava i le mafutaga ma Lona agaga, ma ua ou lagonaina Lona faatasi mai i se ala e le mafaaseseina lava. Ou te iloa o loo soifua lo’u Togiola, ma ua ou fiafia lava e tuu atu a’u taumafaiga faatauvaa e faatuina ai Ana aoaoga. … E lagona o’oo’o i uaua ninii uma o lo’u tagata le malamalamaaga o loo soifua o Ia, ma o le a i ai se aso o le a iloa ai e tagata uma lena mea.

“Na maliu le Faaola ina ia tatou ola. Na ia faatoilaloina le oti ma le tuugamau ma aumaia ai ia i latou uma o e usiusitai i Ana aoaoga le faamoemoe o se toetu mamalu. … Ou te iloa o le galuega lenei a le Alii, ma o Iesu lava o lo tatou Faaola.”2

Na maliu Peresitene Samita i lona aso soifua lona 81, 4 Aperila, 1951. I nai toe taimi o lona soifua, faatasi ai ma lona aiga, sa fesili lona atalii, “Tama, e i ai se mea e te manao e fai mai ai i le aiga—se mea faapitoa?”

A o soisoi o ia, sa ia toe faamautu mai le molimau sa ia faasoa maia i le tele o taimi o lona soifua: “Ioe, na o lenei: Ou te iloa o loo soifua lo’u Togiola; ou te iloa o loo soifua lo’u Togiola.”3

Aoaoga a Siaosi Alapati Samita

O Iesu Keriso o le Alo o le Atua, ma o loo soifua o Ia i le taimi nei o lo tatou Faaola toetu.

Ua ou iloa e toatele tagata i le lalolagi latou te le’i iloaina tatou te talitonu i le misiona paia a lo tatou Alii, ma sa taitaiina a’u ou te fai atu e sili atu i lo na o le faatasi, e leai ni tagata i le lalolagi e sili atu ona malamalama lelei i le misiona paia a Iesu Keriso, o e ua matua talitonu a’ia’i ia te Ia o le Alo o le Atua, o e ua matua mautinoa o le taimi nei ua faapaleina ai o Ia i le mamalu i le itu taumatau o Lona Tama, e pei o le Au Paia o Aso e Gata Ai.4

Ou te iloa e pei ona ou iloa o loo ou ola, o Ia o le alo o le Atua, ma e ala mai ia te Ia ma e na o Ia lava e ala ai ona tatou maua le faaeaga i le malo selesitila ma i latou uma o ē mulimuli i Ona tulaga aao ma ola e tusa ai ma aoaoga na Ia tuuina mai, o le a fiafia i lenei olaga ma o le a saunia mo i latou lava se maota i Lona malo selesitila, lea o le a latou nonofo faatasi ai ma Ia e faavavau.5

O le Togiola o tagata sa le na o se tamalii lelei sa afio mai i le lalolagi e aoao mai ia i tatou ni mataupu faavae. Sa i ai i le Togiola o tagata le poto e sili atu nai lo le atamai masani. E moni lava, o Ia o le Alo o le Atua, le Alo pele e toatasi o le Atua i le tino. … Na afio mai o Ia e valaau atu i tagata ina ia salamo, ia liliu mai i latou mai lo latou ala sese. Na femaliuai o Ia ma i latou e fai ma sui o le Atua le Tama e Faavavau, ma folafola atu ua ia te Ia foliga o Lona Tama, ma o i latou ua vaai ia te Ia ua vaai foi i le Tama, ma sa ta’u atu ia i latou na auina mai o Ia e faia le finagalo o Lona Tama, ma valaau atu i tagata uma ina ia liliu mai le sese ua latou oo i ai, ia salamo mai a latou agasala ma ulu ifo i le vai o le papatisoga.6

I le taimi o le Faaola, sa musumusu atu le tiapolo [i] tagata, e lē o Ia o le Alo o le Atua, o le a outou le taliaina o Ia, ua na o Ia o se tagata lē taualoa, ua na o Ia o se tama a Maria ma Iosefa ma ua le sili pe ese atu se avea o Ia o se Alo o le Atua nai lo outou, ma sa faalogo tagata i lena leo amioleaga ma le faataumaoi, ma latou faasatauroina ai le Togiola o tagata.7

O Ia lava o le Alo o le Atua. Sa galue o Ia [ma tagata] i le alofa ma le agalelei; peitai na latou lafo i fafo Lona suafa fai mai e leaga. … o Ia o le Alo o le Atua, ma sa ia te Ia le aia tatau e tautala ai i le suafa o le Tama. O upumoni sa Ia aumaia i le lalolagi, na aumai i le Tama; ae ui lava ina sa latou tu’itu’ia o Ia i le satauro, e ui ina sa latou tuuina i Lona ao le pale sa taataai i laau tuitui, ma tuu atu le tootoo faatauemu i Ona aao, e ui ina sa latou faamaligiina Lona toto i le tao mataga, ae o le upu sa Ia tuuina atu ia te i latou o le upu lava a le Alii, ma o Ia lava o le Alo o le Atua.8

E le gata ina tatou talitonu o Iesu le Nasareta sa soifua i le fogaeleele, ae tatou te talitonu foi o loo soifua pea lava o Ia, e le o se agaga, e le o se mea e le moni pe leai se tino, ae ua tatou talitonu ia te Ia o se tamalii ua faaeaina; aua na toetu mai o Ia ma lena lava tino sa faataoto i le tuugamau a Iosefa le Arimataia, le tino lava lea na tausia e i latou sa i ai o e alolofa ia te Ia. O le Iesu Keriso lava lea sa toetu mai i le tuugamau, ma aumaia lena lava tino ua faaatoatoaina ma faamamaina, … ma na malaga ese atu ma Ia ina ua mou ese atu a o sioa tagata i Ierusalema ina ua faapea atu tagata e toalua i ofu sisina: “E faapea ona toe afio mai o ia, pei o lona afio atu i le lagi.” [Tagai Galuega 1:10–11.]

O le Iesu o Nasareta lenei o loo talitonu i ai le Au Paia o Aso e Gata Ai. Tatou te talitonu foi i folafolaga na faia e faatatau i tagata, o le a faataunuuina lava, i le taimi e tatau ai, pe a talai atu le talalelei i le lalolagi uma, i atunuu uma, i gagana ma tagata, pe a tuua tagata e aunoa ma se ‘alofaga e faatatau i ai, ua tatou talitonu o le mana o lo tatou Tama Faalelagi, o le a maua ai e tagata lena faamanuiaga ofoofogia o le toetu mai le oti, ma o le a afio mai le Togiola o tagata i ao o le lagi ma le mana ma le mamalu e nofo ai i lenei lalolagi. Ua tatou talitonu o le a afio mai Iesu le Nasareta e nonofo faatasi ma i latou o ē agavaa mo le mamalu selesitila.9 [Tagai fautuaga 2 i le itulau e 31.]

Ua tatou taliaina le molimau a le Tusi Paia i le misiona paia a Iesu Keriso.

Sa alu ifo Iesu le Nasareta i le vai ma sa papatisoina ai e Ioane, ma ina ua alu a’e o ia mai le vai, sa oo mai le Agaga Paia i Ona luga i le faatusa o se lupe. Ma sa oo mai se leo mai le lagi ua faapea mai, “O lo’u Atalii pele lena, ua ou fiafia lava ia te ia.” [Tagai Mataio 3:13–17.]

Pe i ai ea se isi mea e sili atu ona mautu nai lo lena? O le mea moni, o loo i ai i la tatou Tusi Paia ofoofogia na faamatalaga uma ma le tele o isi. A fai mai tagata pe mafaufau foi tatou te le talitonu i le misiona paia a Iesu Keriso, ta’u atu ia latou iloa tatou te talitonu i mea uma o loo aoao mai e le Tusi Paia e faatatau ia te Ia. Tatou te talitonu i le tala i le ala na Ia faatulagaina ai Lona nuu ma aoao i latou, ma le ala na i’u ai lava … ina faasatauroina o Ia.10

Ua tatou talia e aunoa ma se faatuai le molimau a le au faievagelia uma o loo i ai i le Feagaiga Fou, e faatatau i le toetu o le Togiola o tagata. E matua manino lava, ma e foliga mai ia te au e mafai ona talitonu tagata mafaufau uma i ai. O le mea moni ina ua uma ona faasatauroina le Faaola, ma ua tuu i le tuugamau, sa toetu mai, ma e 40 aso sa latou mafuta ai ma Ona soo, sa taumafa o Ia faatasi ma i latou i i’a ma le meli, sa latou fetagofi i faailoga o fao i Ona aao faapea faailoga o le tao i Lona itu. Sa Ia tautino atu ia i latou a o latou faatasi, “Ia outou vaavaai mai i o’u lima ma o’u vae, aua o a’u lava lenei; ia outou tagotago mai ia te au, ma ia vaavaai mai; aua o le agaga e leai sona aano ma ni ivi, pei o a’u nei ua outou vaavaai i ai.” [Tagai Luka 24:39–43.] E moni lava o se faamaoniga e lē mafaafitia lenei, ae e toatele fanau a lo tatou Tama e le o malamalama i ai.11 [Tagai fautuaga 3 i le itulau e 31.]

O le Tusi a Mamona ma le molimau a Iosefa Samita ua tatou maua ai se faamaoniga faaopoopo o le paia o Keriso.

Sa tulai mai le fesili i le lalolagi tuai e faapea o Iesu e le tupuga mai i le aigaatua, aua na fanau mai o Ia o se tamaitiiti, na aui i se moega vaovao, o Lona tina o Maria ma ua iloa o lona tamā o Iosefa le kamuta. E toatele sa latou tautino o Ia o se tagata maoae ma le lelei, peitai sa latou naunau e aveesea mai ia te Ia le paia o Lona soifua mai.

Peitai, o le mea e lelei ai, mo le Au Paia o Aso e Gata Ai, ua tatou maua se molimau e moni nei mea; e le gata i lena, ae ua tatou maua foi le molimau sa afio mai o Ia i [le] lalolagi i sisifo, e pei ona tusia ai i le Tusi a Mamona, ma auauna atu i tagata sa Nifae i lenei konetineta. E lei afio mai i le taimi lea o se tamaitiiti, ae na afio mai o Ia i ao o le lagi; ma na fofogaina mai Lona afio mai e se leo sa tuia ai loto o tagata uma sa nonofo ai i le laueleele. Na afio mai o Ia i le taimi lea o se tamalii mai le lagi, ma sa latou vaaia o Ia o afio mai. Sa latou iloa o Ia o le Keriso, aua sa muai ta’u mai Lona afio mai e o latou perofeta. Sa Ia tuuina atu ia te i latou le faatulagaga lava e tasi sa i ai i le Ekalesia i Ierusalema. Sa Ia aoaoina i latou e tatau ona latou papatiso, e pei ona faia e Ia, e i latou ua i ai le pule e taitai ai i lena sauniga [Tagai 3 Nifae 11:1–27.] E le o se upu lenei a se tagata e lē taualoa; o le upu a le Alo o le Atua, o lē sa afio a’e i Lona Tama, ma sa toe afio mai, ina ia maua e le fanauga a tagata se isi molimau faaopoopo i le aofaiga ua uma ona tuuina atu ia i latou.12

O le a se isi faamaoniga tuusa’o o le toetu mai le oti e mafai ona i ai nai lo ia, i lona tino toetu, na afio mai ai i [tagata sa Nifae] ma aoao atu ia i latou le Talalelei lava lea sa ia aoao atu i Ierusalema? Ma o lea ua ia faataunuuina nei le folafolaga sa ia faia i Ierusalema ina ua ia fetalai, “Ua ia te au foi isi mamoe e le o i lenei lotoa; e tatau ona ou taitaiina mai o i latou foi, e faalogo foi i latou i lo’u leo; ona tasi ai lea o le lafu mamoe, ma le leoleo mamoe e toatasi.” [Ioane 10:16.] Na afio mai o Ia i lona tino toetu e aumai ia i latou le faamatalaga sa ia mua’i ta’ua e tatau ona tuuina atu ia i latou, ia ua ia auauna nei i ai.

O se aafiaga matagofie mo na tagata. Ina ua uma ona ia aoaoina i latou i le aso atoa … sa ia faamalolo i o latou tagata mama’i ma faamanuia i a latou fanau ma faaauau ai ona aoaoina i latou i le matagofie o lana Talalelei. Sa leai se masalosalo i o latou mafaufau, o ia o le Faaola o le lalolagi. Sa latou vaaia o ia o afio mai le lagi ma molimauina lona mana ofoofogia. … Sa afio mai o Ia i le mamalu. Sa o mai agelu mai le lagi e peiseai o i totonu o le afi ma siosiomia tamaiti ma ua siosiomia foi i latou i le afi. Ma sa auauna atu agelu ia te i latou. [Tagai 3 Nifae 17:6–24.]

E le o ni vaaiga faafoliga faalemafaufau na, ae o aafiaga matua ofoofogia naua e manatuaina e faavavau e i latou sa oo i ai. I le avea ai o ni Au Paia o Aso e Gata Ai, ua tatou taliaina lenei faamaumauga o se faamaoniga o le toetu mai o Iesu Keriso lo tatou Alii.13

Ona oo mai lea i lenei taimi ma tupulaga ua tatou ola ai, sa tulai mai ai foi se tasi tagata. … [o Iosefa Samita] na le gata ina i ai le molimau a le Tusi Paia o Iesu o le Keriso, ae sa ia vaai i le Atua le Tama o tu mai i ao o le lagi, ua ofu i le mamalu, ma Iesu Keriso, le Togiola o le lalolagi, ua faaeaina i Lona itu taumatau, ma sa ia faalogoina le siufofoga o le Alii o faapea mai, “O Lo’u Atalii Pele Lenei, faalogo ia te Ia.” [Tagai Iosefa Samita—Talafaasolopito 2:16–17.] Sa ia tuuina atu le molimau o lenei faaaliga vaaia mamalu, ia i latou sa latou mafuta. Sa maua foi e isi se molimau mai luga. Sa faateleina ma faamalosia la latou molimau i le paia o le misiona a le Faaola, o lea, sa le toe avea ai o se mataupu o le talafaasolopito anamua e faapea sa soifua le Atua ma o Iesu o le Keriso; ae sa latou iloaina lava e i latou, aua sa latou mauaina se molimau e i latou lava.14

Ou te mafaufau o se tasi o molimau aupito malosi i le paia ma le soifuaga o lo tatou Faaola, o le molimau lea a Iosefa Samita lea na tuu ai i lalo lona ola e avea ma molimau o le upumoni o le talalelei a Iesu Keriso.15 [Tagai fautuaga 3 i le itulau e 31.]

E mafai e i tatou taitoatasi ona maua se molimau patino o Iesu o le Keriso.

Ua i ai se isi a tatou molimau, o se tasi faamaoniga e sili atu ona atoatoa ma faatalitonuina ai nai lo isi, aua o se molimau e maua mai i le tagata pe a ola ai i mea o manaomia e lo tatou Tama i le Lagi. O se molimau e mumu i o tatou agaga e ala i le mana o le Agaga Paia, pe a tatou faatinoina le galuega na fetalai mai le Alii e tatau ona faatino, pe afai tatou te fia iloa pe o le mataupu e mai i le Atua po o tagata.16

O Ia lava na fetalai, “O la’u mataupu e le o sa’u lava, a o lana na auina mai a’u. Ai se tasi e fia fai lona finagalo, e iloa ai e ia le mataupu, pe mai le Atua, pe ou te tautala fua lava a’u.” (Ioane 7:16–17) O Lana lava lea folafolaga. O i tatou, i le avea ai ma Kerisiano i [le] lalolagi uma, ua taliaina lena folafolaga ma e tatau ona taumafai e tofotofo, ina ia iloa ai pe sa’o pe leai. E toatele ua latou faia lenei mea. Ua ou iloa e … toatele ua latou faata’ita’ia, e toatele ua iloa o loo soifua le Atua ma o Iesu o le Keriso, ma o Ia o le Faaola o le lalolagi.17

O le mea lea, e le gata ina i ai le faamaoniga i a tatou faamaumauga … , e le gata ina i ai la tatou molimau a tamalii lelei sa soifua ai i le fogaeleele i o tatou taimi, ae afai tatou te ola ai i mea ua manaomia mai e lo tatou Tama Faalelagi, afai sa i ai lo tatou faatuatua i le Atua, afai sa tatou salamo i a tatou agasala, afai sa papatisoina i tatou e ala i le faatofuina, afai sa tatou mauaina le Agaga Paia mai lima o auauna ua faatagaina a le Alii, ou te fai atu, afai ua tatou faia nei mea uma, ona i ai lea i agaga taitasi o se malamalama mautinoa e le mafai ona faafitia o loo soifua le Atua, ma o Iesu Keriso o le Togiola o tagata. …

… I le avea ai ma se sui faatauvaa o lenei Ekalesia, ou te tuuina atu la’u molimau ou te iloa o loo soifua o ia e faapei ona ou iloa o loo ou ola. … O Iesu o le Keriso, ma ou te iloa e tatau ona iloa e le fanauga a tagata, e tatau lava ona latou mauaina, ma i le gagana a ia o lē o loo afio i le lagi, “ia tootuli tulivae uma ma ta’uta’u atu e laulaufaiva uma o Iesu o le Keriso.” [Tagai MFF 88:104.]18 [Tagai fautuaga 4 i le itulau e 31.]

O la tatou misiona o le faasoa atu lea i tagata uma o mea ua tatou iloa e uiga ia Iesu Keriso.

Ou te fai atu ia te outou o le Au Paia o Aso e Gata Ai, e leai nisi tagata i le lalolagi uma o i ai uma faamatalaga ua tatou maua e faatatau i le paia o le Faaola; ma afai tatou te lei talitonu ia te Ia, o le a tele atu lo tatou faamalaiaga nai lo isi e le’i maua na faamatalaga. Ma o lea e mafai ai ona tatou faapea atu i le lalolagi e aunoa ma se faatuatuai, tatou te talitonu i nei mea. …

Ou te faamalo atu ia te outou ua maua i o outou olaga lenei avanoa ma lenei faamanuiaga. Ma o lea, ou te talosaga atu ai o se uso ia te outou, ma aioi atu o se tasi e aupito faatauvaa o outou, aua nei nanaina lau lamepa i lalo o le tuugalamepa. Aua nei nanaina mai ou uso a tagata le malamalama ua tuuina atu e le Atua ia te oe.

Aua le faasoesa ia te i latou, ae aua foi nei faavalevalea ma natia mai ai ia te i latou le talalelei a Iesu Keriso. Na pau lava lena o le mana o le Atua mo le faaolataga i le malo selesitila.19

O alii aupito fiafia ma tamaitai aupito fiafia ua outou iloa i le lalolagi, o i latou ia e ogatusa o latou olaga ma aoaoga o le talalelei a Iesu Keriso. O i latou ia ua mautinoa le ola e faavavau; o i latou ia ua malamalama i le faamoemoega o o tatou tagata. … A o ou femalagaa’i i i ma o o le lalolagi ma tuuina atu lenei savali, ua faatumulia lo’u agaga i le olioli, ma e taupulapula o’u mata i loimata, pe a ou vaai i olaga o tagata ua mafai ona faaatoatoaina e le talalelei a Iesu Keriso. Ua ou vaaia i latou o ē sa lotovaivai, o ē sa i le pouliuli, o ē sa fesiligia le faamoemoega o o latou tagata, ae ina ua aoaoina i latou i upumoni matagofie o le talalelei a Iesu Keriso, ua suia i latou, ua latou aoao ia fiafia, ia toafilemu, ia faamalieina, ia naunau e talitonu ma aoao atu le talalelei na folafola mai e Iesu Keriso a o soifua ai i lenei lalolagi ma femaliuai i Kalilaia.

Uso e ma tuafafine, e le malamalama le lalolagi i lena mea, ae o la tatou misiona o le fesoasoani atu ia i latou ia malamalama i ai, ma e auina atu lenei savali i le alofa mamā mo tagata uma, e aunoa ma le fia sili, e aunoa foi ma le faamaualuga. …

I le avea ai ma se tasi e aupito faatauvaa o outou, ou te faafetai ia te ia ma lo’u loto atoa ona o le faamautinoaga ua oo mai i lo’u olaga. … E sili i lo mea uma, ou te faafetai ia te ia mo le iloa ua mu i totonu o lo’u loto; ua ou iloa o loo soifua lo’u Tama Faalelagi, ua ou iloa o Iesu Keriso o le Faaola o tagata, ma e leai se isi lava igoa i lalo o le lagi e mafai ai e alii ma tamaitai ona faaeaina, ae o le suafa o Iesu Keriso, lo tatou Alii. Ua ou iloa na afio mai o ia i le lalolagi i nei aso e gata ai, na ia faaee mai le pule i se tama faatauvaa o lē sa sailia le upumoni, ma o le taunuuga o lena mea, o le faatulagaina lea o le Ekalesia lea ua iloa ai i tatou; ma o loo i ai iina le mana o le Atua mo le faaolataga o i latou uma o ē talitonu.20

Ou te tatalo ia mafai ona tatou ola ina ia avea ma faataitaiga agavaa o Lana galuega. Ou te tatalo ia agavaa o tatou olaga, ina ia mafai ai ona tatou faaali atu e moni lava o i tatou o ē talitonu i le Alii o Iesu Keriso.21 [Tagai fautuaga 5 i le itulau e 31.]

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai i itulau e v–vii.

  1. Faitau le tala o i le itulau e 21. E faapefea ona e tali atu i se tasi e faapea mai o le Au Paia o Aso e Gata Ai e le talitonu ia Iesu Keriso?

  2. Na aoao mai Peresitene Samita, “E le gata ina tatou talitonu sa soifua Iesu le Nasareta i le fogaeleele, ae ia tatou talitonu o loo soifua pea lava o Ia” (itulau 23). O a mafuaaga o i ai i le Au Paia o Aso e Gata Ai e talitonu ai o loo soifua Iesu Keriso i ona po nei? O a ni au lava mafuaaga e te talitonu ai i lenei mea?

  3. Ia toe iloilo vave itulau e 24–27. O a ni nai tala po o ni fuaitau mai tusitusiga paia ua faamalosia ai lau molimau o Iesu Keriso o le Alo o le Atua? Faitau le 1 Nifae 10:17 ma mafaufau i ni auala e mafai ona e faateleina ai lou malamalama i le misiona a le Faaola.

  4. A o e faitauina le itulau e 28, mafaufau pe faapefea e le usiusitai i mataupu faavae ma sauniga o le talalelei ona faamalosia lau molimau ia Iesu Keriso. O le a se mea e mafai e matua ona fai e fesoasoani ai i a latou fanau ia maua lenei molimau?

  5. O a ni ou mafaufauga po o ni lagona a o e faitauina le molimau a Peresitene Samita i le itulau e 29–30? Mafaufau i taimi na e vaai ai ua suia olaga o tagata ona o le talalelei a Iesu Keriso. Na faapefea ona suia e le talalelei lou olaga?

Mau E Faatatau I Ai: Mataio 16:15–17; 17:1–5; 2 Nifae 25:26; Alema 5:45–48; Mataupu Faavae ma Feagaiga 76:22–24; 110:1–4

Fesoasoani faafaiaoga: “[Aloese] mai le faaosoosoga o le matua tele naua o mea e faaaoga… . O loo tatou aoao atu tagata, ae le o le mataupu lava ia; ma … o auivi o lesona taitasi ua ou vaai i ai, e matua tele atu mea o i ai nai lo le mea e mafai ona tatou gafatia i le taimi faatulagaina” (Jeffrey R. Holland, “Aoao Atu ma le Aoaoina i le Ekalesia,” Liahona, Iuni 2007, 56).

Faamatalaga

  1. I le Deseret News, Dec. 27, 1924, Church section, 6; tagai foi Sharing the Gospel with Others, filifilia e Preston Nibley (1948), 201–2.

  2. “Testimony of Elder George Albert Smith,” Liahona: The Elders’ Journal, Feb. 2, 1915, 502.

  3. I le Robert L. Simpson, The Powers and Responsibilities of the Priesthood, Brigham Young University Speeches of the Year (Mar. 31, 1964), 8.

  4. I le Deseret News, Dec. 27, 1924, Church section, 6.

  5. I le Deseret News, Jan. 15, 1927, Church section, 8.

  6. I le Conference Report, Oct. 1921, 39.

  7. I le Conference Report, Apr. 1918, 39.

  8. I le Conference Report, Apr. 1904, 63.

  9. I le Deseret News, Dec. 27, 1924, Church section, 6.

  10. I le Conference Report, Oke. 1950, 156.

  11. I le Conference Report, Ape. 1939, 120–21.

  12. I le Conference Report, Ape. 1905, 61.

  13. I le Conference Report, Ape. 1939, 121–22.

  14. I le Conference Report, Ape. 1905, 61–62.

  15. I le Deseret News, Ian. 15, 1927, Church section, 8.

  16. I le Deseret News, Tes. 27, 1924, Church section, 6.

  17. Sharing the Gospel with Others, 206; lauga na faia ia Nov. 4, 1945, i Uosigitone, D.C.

  18. I le Deseret News, Tes. 27, 1924, Church section, 6.

  19. Sharing the Gospel with Others, 211, 214; lauga na faia ia Nov. 4, 1945, i Washington, D.C.

  20. I le Conference Report, Oke. 1927, 48–50.

  21. I le Deseret News, Ian. 12, 1907, 31.

“Ou te iloa o loo soifua lo’u Togiola, ma ua ou fiafia lava e tuu atu a’u taumafaiga faatauvaa e faatuina ai Ana aoaoga.”

“Ua tatou talia e aunoa ma se faatuai le molimau … i le Feagaiga Fou, e faatatau i le toetu o le Togiola o tagata.”

Ina ua asiasi atu le Faaola toetu i tagata sa Nifae, “na o mai agelu mai le lagi e peiseai o i totonu o le afi ma siosiomia tamaiti.”