Mataupu 9

Faamagalo Atu i Isi ma O Tatou Loto Atoa

Ua poloaiina i tatou e le Alii ina ia faamagalo atu i isi ina ia mafai ai foi ona faamagaloina a tatou lava agasala ma faamanuiaina ai i le filemu ma le olioli.

Mai le Soifuaga o Spencer W. Kimball

Ao aoao atu Peresitene Spencer W. Kimball e uiga i le sailia o le faamagaloga, sa ia faamamafaina atu foi le taua o le mataupu faavae o le faamagalo atu i isi. Ina ua aioi atu i tagata uma e taumafai e atiina ae le agaga o le faamagalo atu, sa ia faamatalaina le aafiaga lenei:

“Sa ou feagai ma se faafitauli faalenuu i se uarota toaitiiti … lea sa i ai ni alii lauiloa se toalua, o ni taitai o tagata, sa feagai i laua ma se fefinauaiga umi i lo la va. Sa i ai sina faaletonu i lo la’ua va, ma na faapea ona faatupulaia ai lo la’ua feitaga’i. A o gasolosolo atu pea aso, o vaiaso, ma masina, sa oo ina faateteleina le va. Sa amata ona aafia ai ma tagata o o la aiga i lea mataupu ma na iu ai ina toetoe lava a aafia uma ai ma tagata o le uarota. Sa salalau faamatalaga ma ua faalele solo ia feeseeseaiga ma o le faitala na avea ma laulaufaiva afi seia oo ai lava ina ua matuai vaeluaina lenei tama’i nuu. Sa auina atu au e foia le mataupu. … Sa ou taunuu atu i lea nuu le mautonu pe tusa o le 6 i le afiafi, o le Aso Sa, ma ou feiloai sao atu loa lava i tagata autu o le feeseeseaiga.

“Oka se tauiviga sa matou faia! Ua ou fiu e aioi ma lapatai ma tauanau ma faaoleole! Na foliga mai e leai ma se taumaluelue o se isi o i laua. Sa taufai tetee uma i la’ua ma fai mai le isi o ia e sa’o, ae fai mai foi le isi o ia e sa’o.

“Ua tuanai atu itula—ua mavae le tulua o po ma ao, ma sa foliga mai na i ai i lea nofoaga le lagona o le leai o se faamoemoe; sa i ai pea le lagona o le ita ma le vevesi. Sa le alu ifo i lalo le loto maaa. Ona i ai lea o se mea na tupu. Sa tei lava ua ou susueina la’u Mataupu Faavae ma Feagaiga ma sa tuu mai i o’u luma le tali. Sa ou faitauina i le tele o taimi i tausaga ua tuanai ma sa le i ai sona uiga loloto ia te au. Ae o le afiafi nei ua avea ma se tali. O se olega ma se aioiga ma se faamata’u ma sa foliga mai na tuusao mai lava e le Alii. Sa ou faitauina le [vaega e 64] mai le fuaiupu e fitu ma faaauau ai lava, ae sa leai ma sina faalogo mai i ai o le au tauaimisa, seia oo lava ina ua tau la’u faitau i le fuaiupu e iva. Ona ou vaaia lea ua pei e meia, ua popole, ma pei e tuufesili. Mata e sa’o le la mau? Ua fetalai mai le Alii ia i tatou—ia i tatou uma—’O le mea lea, ou te fai atu ai ia te outou, e tatau ona outou faamagalo atu le tasi i le tasi.’

“O se matafaioi lenei mea. Sa la faalogo muamua i ai. Sa la faia i le taulotoina o le Tatalo a le Alii. Ae o lenei: ‘… aua o le le faamagalo atu i lona uso i ana solitulafono ua tausalaina i luma o le Alii … ’

“Atonu sa faapea ifo i la’ua i totonu o o la’ua loto: ‘Ia, e mafai ona ou faamagalo atu pe afai e salamo o ia ma talosaga mai mo se faamagaloga, ae tatau ona fai mai muamua o ia.’ Ae peitai na foliga mai na sili ona ootia i la’ua i le laina mulimuli: ‘Aua e i ai pea ia te ia le agasala e sili ona mamafa.’

“O le a? Pe o lona uiga ea o lea mea e tatau ona ou faamagalo atu e tusa lava pe o tumau pea lo’u uso a tagata i le ita ma le tetee ia te au? Ua sao atoatoa lena mea.

“O le mea sese ua taatele, o le manatu lea e tatau i le tagata na faatupuina le ita ona faatoese ma faaalia le lotomaualalo faamaoni, a o lei maua e ia le faamagaloga. E mautinoa lava, o le tagata na ia faatupuina le faalavelave e tatau ona sui atoatoa lona lava tulaga, peitai, e tatau i le tagata na manu’alia ona faamagalo atu i le tagata na faatiga ia te ia e tusa lava po o a uiga e faaali atu ia te ia. O nisi taimi e faatoa maua lava e tagata le loto malie pe afai e vaai atu ua matua faaalia le lotomaualalo ma le faatoesega a le isi tagata, peitai e le o le tulaga lena o le talalelei.

“Sa faateia au ina ua nonofo ae i luga ia alii, sa faalogologo, mafaufau mo sina taimi, ona amata lea ona gauai mai. O lenei mau faatasi ma isi mau uma na faitauina, sa faapea ona ootia ai o la’ua loto ma tootutuli ifo ai i o la’ua tulivae. O le ta o le lua i le vaveao na toe faatalofa ai ia alii e toalua na i ai le feeseeseaiga, sa faaalia ia laufofoga fiafia o le tasi i le isi ma sa faapea foi ona faamagalo atu le tasi i le isi ma talosagaina foi so la faamagaloga. Sa toe feofoofoai nei alii e toalua. O se taimi paia lea. O tuuaiga ua mavae sa faamagaloina ma lafoaiina, ma sa toe avea ma se uo nei alii sa avea ma ni fili. Sa lei toe ta’ua lava se mea e uiga i le feeseeseaiga na tupu. Sa matua lafoaia mea leaga uma atoa ma le feitagai, ma sa toe aumaia le filemu.”¹

I lana galuega atoa, sa apoapoaiina ai e Peresitene Kimball ia tagata o le Ekalesia ina ia maua le loto faamagalo: “Afai o i ai ni le femalamalamaai, ia faamanino, faamagalo ma faagalo, aua nei faatagaina ni tuuaiga tuai e suia ai o outou agaga ma aafia ai, ma faaleagaina ai lou alofa ma o outou olaga. Ia faatulaga o outou aiga. Ia fealofani ma alolofa i o outou tuaoi, o a outou uo, o tagata o loo nonofo latalata ia te oe, e pei ona tuuina atu e le Alii lenei mana ia te oe.”²

Aoaoga a Spencer W. Kimball

E tatau ona tatou faamagalo atu ina ia faamagaloina ai.

Talu ai ona o le faamagaloga o se tulaga matuai manaomia i le mauaina o le ola faavavau, o lea ua masani ai ona mafaufau le tagata: O le a le tulaga sili e mafai ona ou maua ai lena faamagaloga? O se tasi o vaega autu ua tulai mai nei e taua ona vave fai: E tatau i se tasi ona faamagalo atu ina ia faamagaloina ai.³

“Aua afai tou te faamagaloina atu tagata i a latou agasala, e faamagaloina foi outou e lo outou Tama o i le lagi:

“Ae afai tou te le faamagaloina atu tagata i a latou agasala, e le faamagaloina foi e lo outou Tama a outou agasala.” (Mataio 6:14–15.)

Pe faigata ea ona fai? Ioe. E le mafai ona folafolaina mai e le Alii se ala faigofie, po o se talalelei e faatauvaa, po o ni tulaga aoaoina e maualalo, po o se fuafuaga e le taua. E maualuga lava le tau, peitai o mea ua maua mai ai ua talafeagai lava ma lo latou tau. O le Alii lava ia na ia liliu atu le isi alafau; sa puapuagatia o ia ma fetogia ma sasa ia te ia e aunoa ma lona tetee atu i ai; sa mafatia o ia i tauemuga uma ae leai ma se upu e tasi e faamalaia atu ai. O lana fesili ia i tatou uma lava: “Pe faapefea la outou amio e tatau ai?” Ma o lana tali ia i tatou: “E pei lava o au nei.” (3 Ni. 27:27.)⁴

O lo tatou faamagalo atu i isi e tatau ona faamaoni ma atoatoa.

E leai se isi faamaninoga sili ona lelei nai lo lea sa tuuina mai i faaaliga o ona po nei i le Perofeta o Iosefa Samita, e tusa ai ma le poloaiga i le faamagalo atu ma le tausalaina o le le tausia:

“Sa saili o’u soo e fai pona o le tasi i le tasi i aso anamua, a e le faamagalo atu le tasi i le tasi i o latou loto; ma ona o lenei mea leaga na puapuagatia ma a’oa’iina tiga ai i latou.

“O le mea lea, ou te fai atu ai ia te outou, e tatau ona outou faamagalo atu le tasi i le tasi; aua o le le faamagalo atu i lona uso i ana solitulafono ua tausalaina i luma o le Alii; aua e i ai pea ia te ia le agasala e sili ona mamafa.

“O a’u, le Alii, e faamagalo atu i e ou te loto ia faamagaloina, a o outou e ao ina outou faamagaloina atu i tagata uma.” (MFF 64:8–10.) …

Ua faatatau lenei lesona mo i tatou i aso nei. E toatele tagata ua latou fai mai ina ua faalelei ma isi tagata, ua latou faamagalo atu, ae o loo tumau pea ona taofi i le manatu leaga, tumau i le masalosalo i isi tagata, atoa foi ma le tumau ona le talitonu i le faamaoni o isi tagata. O se agasala lenei mea, aua afai ua maea ona faia le faaleleiga ma faaalia le salamo, e tatau i tagata taitoatasi ona fefaamagaloa’i ma faagalo maseiga, ma ia faatuputupulaia le puipuiga malosi ma toefuataia le tulaga o le feoeoeai na i ai muamua.

Ua manino le faaalia e le au soo anamua o upu o le faamagalo atu, ma sa na ona latou palepalealugaina le faaleleiga e pei ona manaomia, peitai “ua latou le fefaamagaloai o le tasi i le tasi i totonu o o latou loto.” E le o se faamagalo atu moni lenei mea, ae o se faailoga o le pepelo ma le taufaasese, o se sisi’o foi po o se togafiti. E pei lava ona faailoa mai i le tatalo faataitai a Keriso, o le faamagalo e tatau ona faataunuuina ma le loto ma le mafaufau atoa [tagai Mataio 6:12; tagai foi fuaiupu 14–15]. O le faamagalo atu o lona uiga o le faagalo. Sa i ai se tasi tamaitai na “faia” se faaleleiga i totonu o se paranesi ma sa faatinoina ia gaoioiga ma faaupuga e faailoa atu ai, ma sa faailoa atu foi upu o le faamagalo atu. Ona toe faapea mai lea o ia, “O le a ou faamagalo atu ia te ia, ae o lo’u manatua e pei o se elefane. [O lona uiga] o le a le galo lava ia te au.” Ua matuai leai lava se aoga o le faaleleiga pepelo na ia fai. Na teu pea i lona loto le ita. O ana upu o le agaga faauo sa pei o se apogaleveleve, o pa malolosi na ia toe fausia sa pei o ni vaovao, ma sa faaauau pea ona mafatia o ia e aunoa ma se filemu i le mafaufau. O le mea e sili atu ona leaga, o le “tausalaina lea o ia i luma o le Alii,” ma o loo tumau ai pea iina ia te ia le agasala sili ona mamafa nai lo le tagata sa ia fai mai sa faatiga ia te ia.

E itiiti lea mea ua iloa e lenei tamaitai loto ita, ua le o faamagaloina o ia. Sa na ona faatino e ia. Sa faataunuu e ia, ae leai se fua lelei na alia’e mai ai. I le mau o loo ta’ua i luga, o le faaupuga i o latou loto o loo i ai se uiga loloto. E tatau ona aveeseina atoatoa lagona ma manatu ma le ita. E le aoga le na o upu.

“Aua faauta, afai ua leaga le tagata, ma ua foai atu se meaalofa, e faia e ia ma le muimui; o le mea lea e tauia ai ia te ia e peiseai ua taofia e ia le meaalofa, o le a tauleagaina ai o ia i luma o le Atua.” (Moro. 7:8.)

Na faaupuina faapenei e Henry Ward Beecher lea manatu: “E mafai ona ou faamagalo atu ae le mafai ona ou faagaloina o se isi lea auala o le faapea atu e le mafai ona ou faamagalo atu.”

E mafai ona ou faaopoopo atu, ua le tatau ona talia e se tagata le faamanatuga sei vagana ua faamagalo e ia ma lona loto atoa ia mea sese a lona uso.⁵

E tatau ona tatou tuu atu le faamasinoga tonu i le Alii.

Ina ia tatou i ai i le itu sao e tatau ona tatou faamagalo atu, ma e tatau ona tatou faataunuuina e tusa lava pe salamo po o le le salamo foi o le tagata ua ita mai ia i tatou, e tusa lava pe o le a lona faamaoni i lona liua atoatoa, pe tusa lava foi pe na talosaga mai po o le lei talosaga mai foi mo la tatou faamagaloga. E tatau ona tatou mulimuli i le faataitaiga ma le aoaoga a le Matai, o le na fetalai mai: “… E tatau foi ona outou faapea i o outou loto—ia faamasino le Atua i lo ta va, ma tauia ia te oe e tusa ma au galuega.” (MFF 64:11.) Ae peitai ua masani ona le mananao tagata e tuu atu le faamasinoga i le Alii, ona o le matatau faapea ina nei itiiti ma mama le faasalaga nai lo le tulaga e tatau ona i ai.⁶

O nisi o tagata, ua le gata ina le mafai pe o le a latou le faamagaloina foi ma faagalo soligatulafono a isi tagata, ae ua faapea foi ona matua faatauemu i le tagata solitulafono. Ua tele tusi ma telefoni ua oo mai ia te au mai tagata o e ua manatu latou te tauaveina i o latou lima le pelu o le faamasinoga, ma mananao e vaai ua faasalaina le tagata solitulafono. “E tatau ona tape le igoa o lena tagata,” sa faailoa atu ai e se tamaitai, “ma o le a ou le mapu lava seiloga ua ou vaai ua faataunuu ia te ia se faasalaga e tatau ai.” Sa faapea atu le isi tagata, “E le mafai ona ou malolo, seiloga lava e le toe avea lena tagata ma se tagata o le Ekalesia.” Sa faapea mai foi le isi tagata: “Ou te le toe ulu lava i totonu o le falesa pe afai e faatagaina pea lena tagata ona alu atu i le lotu. Ou te manao e faia sona faamasinoga e tusa ai ma le avea o ia ma se tagata o le Ekalesia.” O le isi tagata na faafia ona malaga atu i le Aai o Sate Leki ma tusia ni tusi uumi se tele e tetee ai i le epikopo ma le peresitene o le siteki ona o le le faia e i laua o se mea e uiga i se tagata sa ia faapea mai sa solia ia tulafono a le Ekalesia.

Mo tagata na ua mananao latou te tauaveina i o latou lava lima le tulafono, o le a tatou toe faitau atu i ai le tautinoga matagofie a le Alii: “… aua e i ai pea ia te ia le agasala sili ona mamafa.” (MFF 64:9.) E faaauau pea le faaaliga: “E tatau ona outou faapea i o outou loto—ia faamasino le Atua i lo ta va, ma tauia ia te oe e tusa ma au galuega.” (MFF 64:11.) Afai ua lipotia mai ni soligatulafono i taitai e tatau ai o le Ekalesia, ona tatau lea i le tagata ona tuuina atu le faamasinoga ma le tiutetauave i taitai o le Ekalesia. Afai la o le a faatagaina pea e na taitai le agasala e tusa ai ma lea mea, o se tiutetauave maoae ma o le a pau i o latou luga le faamasinoga.⁷

O mea o loo tatou faia o le a faamasinoina ai i tatou e le Alii. Afai tatou te ‘ina’inā, e leai se isi mea e tatau ona tatou faamoemoe e oo mai vagana foi o le ‘ina’inā. Afai tatou te faaali atu le alofa ia i latou o e ita mai, o le a faapea foi ona faaalia e le Alii le alofa ia i tatou e tusa ai ma a tatou mea sese. Afai tatou te le faamagalo atu, o le a na tuua i tatou e ūtia i a tatou lava agasala.

E ui o loo manino ona faailoa mai i tusitusiga paia o le a faamasinoina le tagata e tusa ma le faamasinoga o loo faamasinoina ai o ia e ona uso a tagata, o le faia o le faamasinoga ua le tuua lea e faia e tagata lautele, ae ua faapitoa le tiute i taitai e tatau ai o le Ekalesia ma le malo. O le Alii o le a na faia le faamasinoga i le iloiloga mulimuli. …

E mafai e le Alii ona faamasinoina tagata i o latou mafaufauga atoa foi ma mea latou te fai ma tautatala ai, aua ua silafia e ia mea ua i ai i o latou loto; ae ua le i ai i tagata lea tulaga. Tatou te faalogo i upu e tautala ai tagata, tatou te vaai foi i mea latou te fai, ae ona o le le mafai ona tatou iloatinoina o mea ua latou manatu i ai pe faamoemoe i ai, ua masani ai ona tatou faamasino sese i latou pe afai tatou te taumafai e taumate le uiga ma mea o loo latou faia ma tuu i ai a tatou lava faauigaga.⁸

E ui e foliga mai e faigata, ae mafai ona tatou faamagalo atu.

I le aano o le agaga o le faamagalo atu, na fesili mai ai se tasi uso lelei lava ia te au, “Ioe, o le mea lena e ao ona faataunuuina, ae faapefea ona e faia? Pe le manaomia ai ea se tagata ua silisiliese sona malosi?”

“Ioe,” o la’u tali atu lea i ai, “ae ua poloaiina i tatou ina ia avea ma ni tagata silisili. Na fetalai le Alii, ‘Ia atoatoa ona lelei o la outou amio, e pei o lo otou Tama o i le lagi e atoatoa ona lelei o ia.’ (Mataio 5:48.) O i tatou o ni atua i lo tatou foafoaina mai, ma ua finagalo le Alii ina ia atoatoa lo tatou lelei.”

“Ioe, sa faamagaloina e Keriso i latou o e na faasaua ia te ia, peitai sa sili atu o ia nai lo se tagata,” sa ia toe tali mai ai.

O la’u tali i ai: “Ae o loo toatele tagata o e ua latou iloaina e mafai ona latou faia lenei uiga paia.”

Ua manino mai e toatele i latou, e pei foi o lenei uso lelei, o loo i ai le mafaufauga, o le agaga faamagalo atu … atonu ua na o tagata o loo taua mai i tusitusiga paia po o ni tala fatu foi e mafai ona faia, ae matua faigata lava ona faatino e tagata o le lalolagi i aso nei. E le o le tulaga lena.⁹

Ou te iloa se tasi tina talavou o le na maliu lana tane. Sa faafeagai le aiga ma se olaga mativa ma sa na o le $2,000 le inisiua sa i ai, ae sa pei o se meaalofa mai le lagi. Sa vave ona auina atu e le kamupani le siaki mo le aofaiga lena i le taimi lava na latou maua ai le faamaoniga o le maliu. Sa faia e lenei tina se faaiuga faapea e tatau ona ia teuina lenei tupe mo ni mea faafuasei e tutupu, o lea na ia teuina ai loa i le faletupe. Sa iloa e isi tagata lana teugatupe, o lea na alu atu ai se tasi alii o lona aiga ma tauanau o ia e tatau ona nono atu ia te ia le $2,000 i se tului maualuga.

Ua mavae atu tausaga, ma na te lei mauaina lava le tinoitupe faavae faapea ma le tului. Sa ia matauina ua solasola le alii lea mai ia te ia ma sa ia faia ni folafolaga pepelo pe a fesili atu o ia e uiga i le tupe. Ua ia manaomia nei le tupe ae sa le mafai ona maua.

“Sa ou matuai ita lava ia te ia!” o lana tala mai lea ia te au, sa faalogoina i lona leo le ita ma le inoino ma le emoemo ona mata. I le mafaufau atu i se tagata malosi ae ua ia faavaleaina se tina talavou ua maliu lana tane faapea ma se aiga o loo tausi! “Ua matuai o’u inoino lava ia te ia!” sa ia fai mai ai i le tele o taimi. Ona ou faamatalaina atu lea ia te ia [se] tala, lea sa faamagalo ai e se alii le tagata na fasiotia lona tama. Sa ia faalogo ma le toto’a. Sa ou vaaia lona faagaeetia. I le faaiuga sa vaaia le maligi o ona loimata, ma sa ia musumusu mai: “Faafetai. Faafetai atu ia te oe. E mautinoa lava, e tatau foi ia te au ona faamagalo atu i lo’u fili. O le a ou faamamaina nei lo’u loto tiga. Ou te le toe faamoemoe e toe aumai le tupe, ae o le a ou tuuina atu le ua faatiga ia te au i aao o le Alii.”

I ni vaiaso mulimuli ane, sa ma toe feiloai ai ma ia ma sa ia faailoa mai ua matua sili atu le fiafia ua ia maua i na vaiaso. Sa maua e ia se toafilemu atoa ma sa mafai ona ia tatalo mo le na agaleaga ia te ia, e ui lava e leai ma se tupe na ia toe mauaina.¹⁰

Afai tatou te faamagalo atu i isi, ua tatou faasaolotoina i tatou mai le inoino ma le tiga.

Aisea ua poloai mai ai le Alii ia te outou ina ia alolofa atu i o outou fili ma taui atu le leaga i le lelei? Ina ia mafai ai ona outou maua faamanuiaga. E le manu’a ai le tagata o loo e inoino i ai pe afai e te inoino i lena tagata, aemaise lava pe afai ua mamaoese se mea ua i ai ma ua e le toe fesootai i ai, ae o le inoino ma le loto tiga e faataumaoia ai lou loto le faamagalo atu. …

Atonu sa feiloai lava Peteru ma tagata o e sa solitulafono e tetee ia te ia, ma sa ia fesili atu:

“Le Alii e, e agaleaga mai faafia ea lo’u uso ia te au ma ou faamagalo ia te ia? … ”

Ona tali atu lea o le Alii:

“Ou te le fai atu ia te oe seia atu fitu: ae, ia fitugafulu ni fitu.” (Mataio 18:21–22.) …

… Afai ua latou salamo ma o mai i o latou tulivae e talosaga mai mo se faamagaloga, o le toatele o i tatou e mafai ona faamagalo atu, ae ua finagalo le Alii ina ia tatou faamagalo atu e tusa lava pe latou te le salamo pe le talosaga mai foi mo se faamagaloga mai ia i tatou. …

E tatau la ona matuai manino ia i tatou, e tatau lava ona tatou faamagalo atu e aunoa ma le taui ma sui po o le faasala atu, aua o le a faia e le Alii mo i tatou ia tulaga faapena pe a talafeagai ai. … O le loto tiga e faamanualia ai le o loo tauaveina; e faamaaaina ma faaitiitia ma faaleagaina ai.¹¹

E masani ona tupu le solia o tulafono ona o le le malamalama i ai o tagata solitulafono. O se mea sa ia tautala i ai pe sa ia faia ae sese le faauigaga pe le malamalama foi i ai. E teuloto e le tagata solitulafono le soligatulafono i lona loto, ma faaopoopo atu i ai ma isi mea e ono faamumuteleina ai le afi ma faamaonia ai ana faaiuga. Atonu o se tasi lenei o mafuaaga e moomia ai e le Alii le tagata solitulafono ina ia ona mua’i sailia le filemu.

“Afai foi e agaleaga atu lou uso po o lou tuafafine ia te oe, ia e ave o ia tau lava o ia ma oe; ma afai na te faaalia ona lava sese ona faalelei lea o lo oulua va.” (MFF 42:88.) …

Pe tatou te mulimuli ea i lena poloaiga pe tatou te ita pea i lo tatou tiga, ma faatali i le na agaleaga mai ia i tatou ina ia iloaina ma tootuli mai ia i tatou ma le salamo?¹²

E mafai ona tatou feita i o tatou matua, po o se faiaoga, po o le epikopo, ma ta’ufaatauvaaina ai lava i tatou i le oona o le loto tiga ma le inoino. A o agai atu lē o loo e inoino i ai i ana galuega, e aunoa ma le iloaina o le mafatiaga o loo feagai ma lē o loo inoino ia te ia, o lē o loo inoino ua nofo lava ia ma faataumaoi ia lava. …

… O le taofia o le toaga i le Ekalesia ona o le le fiafia i taitai po o le fia faailoa atu ai o lagona tiga, o lo tatou faataumaoia lava lea o i tatou.¹³

Ua avea le faamagalo atu ma vaifofo sili i le taimi o le ita, vevesi, atoa ma le taui ma sui e pei ona faaalia i le tele o taimi i nei aso. E le faatauvaa lona aoga i le tagata e faamagalo atu.¹⁴

A o tatou faamagalo atu i isi, e faamanuiaina i tatou i le olioli ma le filemu.

I le musuia ai e le Alii o Iesu Keriso, na tuuina mai ai e Paulo ia i tatou le ala e foia ai faafitauli o le olaga lea e manaomia ai le loto malamalama ma le agaga o le faamagalo atu. “A ia outou feagaleleiai, ia femutimutivaleai lo outou alofa, ia fefaamagaloai outou, faapei ona faamagaloina outou e le Atua ia Keriso.” (Efe. 4:32.) Afai e mafai ona i ai i totonu o aiga taitasi lenei agaga o le feagaleleiai, fefaamagaloai o le tasi i le isi, o le a sola ese le manatu faapito, o le le faatuatuaina ma le loto ita lea e masani ona lepetia ai le tele o aiga ma o le a nonofo tagata uma i le filemu.¹⁵

O le faamagalo atu o se vaega ofoofogia lea e mafai ona maua ai le agaga lotogatasi i le aiga po o le uarota. Afai e aunoa ma lea tulaga, o le a i ai le feitagai. Afai e aunoa ma le malamalama ma le faamagalo atu o le a i ai le feeseeseai, sosoo ai ma le le i ai o se lotogatasi, ma maua mai ai le tulaga lea o le leai o se faamaoni i totonu o le aiga, i totonu o paranesi ma totonu o uarota. I le tasi itu, o le faamagalo atu e ogatasi ma le agaga o le talalelei, le Agaga lea o Keriso. O le agaga lea e tatau ona maua e i tatou uma pe afai tatou te mananao e maua le faamagaloga o a tatou lava agasala, ma ia aua nei pona i luma o le Atua.¹⁶

Ua masani ona oo mai le loto faamaualuga ia i tatou ma avea ai ma se maa e tautevateva ai. Ae moomia e i tatou uma ona fesili ifo le tagata ia te ia lava le fesili: “Pe sili atu ea le taua o lou faamaualuga nai lo lou filemu?”

U tele taimi, o se tagata ua na faia ni mea matagofie se tele i le olaga atoa, ma tuuina atu lona sao maoae, ae na te tuuina foi i ai ma le loto faamaualuga, ona le mafai ai lea ona maua e ia le taui e tatau ai. E tatau pea ona i ai i taimi uma ia i tatou le loto faamagalo atoa ma le agaga salamo, o le naunau pea lea e faaaoga le lotomaulalo faamaoni, e pei ona faia e le telona [tagai Luka 18:9–14], ma ole atu i le Alii ina ia fesoasoani mai ia i tatou ina ia faamagalo atu.¹⁷

O le umi lava o le olaga, tatou te ola ai foi faatasi ma tagata e le atoatoa; ma o le a i ai le le malamalama, o soligatulafono, ma manu’a i lagona maaleale. E tele lava ina le malamalama i faamoemoega e sili ona lelei. O se tulaga faamalieina lava le iloa ua toatele i latou e lelei o latou uiga ua faasa’osa’oina o latou mafaufauga, ua aveese lo latou faamaualuga, ma faamagalo atu i mea na latou lagona o ni sasi faaletagata. E toatele i latou o e sa savavali i ala matautia, tuua toatasi, ma le faigata, ua iu ina latou taliaina le faasaoga, faailoa atu sese, faamamaina o latou loto tiga, ma ua toe maua le filemu, lena filemu sili ona manaomia lea sa iloagofie le misi. Ma o le le mautonu i faitioga, loto tiga, ma le faasinoesea ua suitulaga nei i le mafanafana ma le malamalama ma le filemu.¹⁸

E mafai ona faia. E mafai e le tagata ona faatoilaloina o ia lava. E mafai ona faatoilaloina le tagata. E mafai e le tagata ona faamagalo atu ia i latou uma o e na agaleaga atu ia te ia ma agai atu ai i le filemu i lenei olaga ma le ola faavavau i le lalolagi a sau.¹⁹

Afai tatou te sailia le filemu, ae faaaoga le fuafuaga o le faaleleia o ni feeseeseaiga—afai o le a tatou faamagalo atu ma faagalo ma o tatou loto atoa—afai o le a tatou faamamaina o tatou lava agaga mai le agasala, loto tiga, ma le tausalaina ae tatou te lei togi se maa o le tautuuai i isi—afai o le a tatou faamagalo atu i soligatulafono eseese uma ae tatou te lei ole atu e faamagaloina a tatou lava agasala—afai o le a tatou totogiina a tatou lava aitalafu, tetele po o le laiti, ae tatou te lei tulitulia i latou o loo nofo aitalafu ia i tatou—afai o le a tatou mafaia ona faamama o tatou lava mata mai utupoto o loo punitia ai ae tatou te lei aveeseina se fasi otaota mai mata o isi—e maeu se mamalu o le lalolagi o le a i ai! O le a matuai tuuitiitia ia faaipoipoga e tatalaina; o le a saoloto ia faamasinoga mai galuega e masani ai; o le olaga faaleaiga o le a faalelagi; o le fausiaina o le malo o le a agai i luma i se saoasaoa tulaga ese; ma o lena filemu e silisili i mea uma e manatu i ai [tagai Filipi 4:7] o le a aumaia ia i tatou uma le olioli ma le fiafia lea sa faigata ona “oo i le loto o le tagata.” [Tagai 1 Korinito 2:9.]²⁰

Ia faamanuia i tatou uma e le Alii ina ia mafai ona tatou faaauau pea ona tauaveina i o tatou loto le agaga moni o le salamo ma le faamagalo atu seia oo lava ina tatou faaatoatoaina i tatou lava, ma tulimatai atu i mamalu o le faaeaga o loo faatalitali mai mo i latou e sili ona faamaoni.²¹

Fautuaga mo Suesuega ma Aoaoga

Mafaufau i manatu nei a o e suesueina le mataupu po o lou saunia foi e aoao atu. Mo nisi fesoasoaniga faaopoopo, tagai i itulau v–ix.

Toe iloilo le tala o loo i itulau 102–104. Aisea e faigata ai i nisi taimi ona fefaamagaloai tagata? O le a le uiga o upu “aua e i ai pea ia te ia le agasala sili ona mamafa” (MFF 64:9) ia te oe?
Toe iloilo le Mataio 6:14–15, na sii mai e Peresitene Kimball i le itulau 105. Aisea e te manatu ai e tatau ona tatou faamagalo atu i isi ina ia tatou maua ai le faamagaloga a le Alii?
O a nisi o uiga ma mea e faia e faailoa ai le faamaoni ma le atoatoa o lo tatou faamagalo atu i isi? (Tagai itulau 105–106.) Aisea e tatau ai ona avea le faamagalo atu ma se “gaoioiga a le loto”?
Toe iloilo le vaega lea e amata i le itulau e 106. O a aoaoga o le talalelei e mafai ona fesoasoani ia i tatou ina ia tatou naunau e tuu atu le faamasinoga i le Alii?
A o e faitauina le tala i le tina talavou o loo i itulau 110–111, ia tagai po o a mea na taofia ai o ia, i le taimi muamua, mai le faamagalo atu ae o le a foi le mea na mafai ai ona ia toe faamagalo atu mulimuli. E mafai faapefea ona tatou faatoilaloina ia mea faasalavei ia e faalavelaveina ai lo tatou manao ma taumafaiga ina ia faamagalo atu i isi?
O a nisi taunuuga o le musu e faamagalo atu? (Tagai itulau 111–113.) O a faamanuiaga ua e iloaina a o e faamagalo atu i se isi? Ia mafaufau pe mafai faapefea ona e faaaogaina le agaga o le faamagalo atu i au fegalegaleaiga.

Mau e Faatatau I Ai: Mataio 5:43–48; Luka 6:36–38; Kolose 3:12–15; MFF 82:23

President Kimball speaking — Na fautuaina e Peresitene Kimball ia tagata o le Ekalesia: ”Ia faamagalo ma faagalo, aua nei faatagaina ni tuuaiga tuai e suia ai o outou agaga ma aafia ai, ma faaleagaina ai lou alofa ma o outou olaga.”

Sermon on the Mount — Na aoao mai Iesu Keriso, “Afai tou te faamagaloina atu tagata i a latou agasala, e faamagaloina foi outou e lo outou Tama o i le lagi” (Mataio 6:14).

mother and daughter hugging — “O le faamagalo atu o se vaega ofoofogia lea e mafai ona maua ai le agaga lotogatasi i le aiga po o le uarota.”