Mataupu 11

Ola Magafagafa: Faatinoina o Mataupu Faavae o le Faalagolago o le Tagata ia te Ia Lava ma le Nofo Sauniuni

O le ola atamai ma le magafagafa o se ituaiga olaga lea e atiina ae ai uiga ma faateleina ai le atoatoa lelei o le faaletino, fegalegaleaiga, lagona loloto, ma le faaleagaga.

Mai le Soifuaga o Spencer W. Kimball

A o avea ma se ulugalii talavou, sa silafia ai e Spencer W. Kimball ma lona faletua o Camilla, “e le mauoa i laua. Ae sa galulue i la’ua ma i ai foi o la’ua tomai. “Sa la iloa ona fuafua a laua lava tupe, ola e tusa ai ma a laua lava tupe maua, ma teu ni mea mo le lumanai.” ¹

Sa soifua le aiga o Kimball i le vaitaimi o le faateleina o faigata o le tamaoaiga—Taua 1 o le Lalolagi (1914–18), o le Pau o le Tamaoaiga (1929–39), ma le Taua Lona II o le Lalolagi (1939–45). O lo la’ua aafia ai i nei luitau, sa faia ai ma se faaiuga a Peresitene Kimball, “O le mea sa vaai i ai o’u lava mata ua ou fefe ai ina ne’i ou le faia le mea ou te mafaia e puipuia ai mai mala”²

O nisi o mea sa ia vaai i ai, o tauiviga ia sa feagai ma isi: “I lo’u olaga atoa mai lo’u laitiiti sa ou faalogo ai i le Usoga o saunoa mai, ‘ia o ese mai le aitalafu ma aua le nofo aitalafu.’ Sa ou faigaluega mo ni nai tausaga i totonu o faletupe ma sa ou vaaia le leaga tele o le tulaga sa oo i ai le tele o tagata ona ua latou le amanaiaina lena fautuaga taua.”

E faaopoopo i lana galuega i le faletupe, o Spencer sa ia tausia tusi o faamaumauga o tupe mo nisi o faleoloa i le taulaga. “O se tasi o mea e faateia ai lo’u olaga o le mauaina lea i nei tusi o faamaumauga o nisi e toatele o tagata o le aai ou te iloaina. Ou te iloaina i latou. Ou te iloaina lelei le aofai o a latou tupe maua, ona ou vaai lea ua latou faaaogaina uma lava. I se isi faaupuga, sa ou vaai sa latou faatauina o latou lavalava, o o latou seevae, o mea uma sa i ai ‘faaaitalafu.’

“Ma sa ou iloa o lo’u tiute o le faia lea o pili i le faaiuga o le masina mo i latou. Ma o le toatele o i latou sa le mafai ona totogiina mai i le faaiuga o le masina. Sa latou le mafaia foi ona totogi na o le vaega faatulagaina sa fuafuaina mo i latou. Ma i le ola ae ai ise aiga sa vaaia faalelei ana tupe, sa le mafai ona ou malamalama ai. Sa mafai ona ou malamalama i le auala sa mafai ai ona faatau e se tagata se fale po o se taavale faaaitalafu. Ae sa le mafai ona ou malamalama pe mafai faapefea e se tasi ona ofuina ni lavalava e le o ni ona lavalava. Po o le aai i meaai sa latou faatauina i ni tupe ‘e le o ni a latou tupe.’ ”³

I ana aoaoga, sa tautalagia ai e Peresitene Kimball e le gata i mataupu tau tupe ae faapea foi i isi tulaga e faatatau i le ola magafagafa, e pei o tiutetauave faaletagata, galuega, ma le gaosiga ma le teuina o meaai i le aiga. Sa ia saunoa mai: “Ia tatou faataitai i le mataupu faavae o le saunia o le tagata lava ia ma le aiga i aso taitasi o lo tatou olaga. ‘Afai ua saunia outou o le a outou le matatau ai lava’ (MFF 38:30).”⁴

Aoaoga a Spencer W. Kimball

E gafa lava i tatou ma lo tatou soifua manuia lelei i fegalegaleaiga, lagona, faaleagaga, faaletino, ma le tamaoaiga.

Ua poloaiina le Ekalesia ma ona tagata e le Alii ina ia ola faalagolago le tagata ia te ia lava ma tutoatasi. (Tagai MFF 78:13–14.)

O le matafaioi a le tagata lava ia mo le soifua manuia i fegalegaleaiga, lagona, faaleagaga, faaletino, po o le tamaoaiga ua pau muamua atu lava lea i ona luga, lona lua o lona aiga, ma lona tolu o le Ekalesia pe afai o se tagata faamaoni o ia.

E leai se tagata moni o le Au Paia o Aso e Gata Ai, o loo mautu le malosi faaletino ma le mafaufau, o le a na tuueseina atu lana avega po o le soifua manuia o lona aiga i se isi tagata. O le a lava le umi na te gafatia ai, e tusa ai ma musumusuga a le Alii faatasi ai ma ana lava galuega, o le a ia tuuina atu mo ia lava ma lona aiga ia mea faaleagaga ma le faaletino e moomia mo le olaga. (Tagai 1 Timoteo 5:8.)⁵

A o tatou femalagaai ai ma feasiasiai i tagata i le lalolagi atoa, tatou te matauina ai le tele o manaoga faaletino o o tatou tagata. A o tatou naunau e fesoasoani ia i latou, tatou te iloaina ai le taua tele o lo latou aoaoina o lenei lesona maoae: o le tulaga sili ona maualuga e ausia i le faaleagaga e maua mai lea i lo tatou faatoilaloina o le tino. Tatou te atiina ae ia uiga a o tatou faamalolosia tagata e taulimaina mea latou te manaomia.⁶

E leai lava ni filosofia, faanoi, po o ni faatusatusaga se tele o le a suia ai le tulaga manaomia sili mo le faalagolago o le tagata ia te ia lava. Ua mafua lea ona:

“E saoloto le mea moni uma i le tulaga ua tuu ai e le Atua, … e faapena foi malamalama uma; ana le faapea e leai se olaga” (tagai MFF 93:30.) Sa folafola mai e le Alii o iina o loo taoto ai le “saolotoga o le tagata” (tagai MFF 93:31), ma o le i ai o lena saolotoga ua aumai ai ma le matafaioi mo ia lava. O lenei saolotoga e mafai ona tatou manuia ai po o le pau ai foi i le malaia. Ia tatou taitoatasi ma ia aufaatasia foi ona ola faalagolago le tagata ia te ia lava. O lo tatou tofi ma la tatou matafaioi lena.⁷

Ua tatou tuuina atu le faamamafa i luga o sauniuniga mo le tagata lava ia ma aiga. Ou te faamoemoe o loo tali lelei atu tagata taitoatasi o le Ekalesia i lenei faatonuga. Ou te faamoemoe foi ua tatou malamalama ma faalauiloaina le tulaga lelei ae le o le leaga. Ou te fiafia i le auala a le Aualofa e aoaoina ai le saunia o le tagata lava ia ma le aiga i le “ola magafagafa.” E faatatau lea i le faasoasoaina [puleaina ma le faautauta] o a tatou punaoa, o le fuafuaina ma le poto o mea tau tupe, o le saunia atoatoa mo le soifua maloloina mo le tagata lava ia, ma le lava saunia mo aoaoga ma le atiina ae mo se galuega, tuuina atu o le faamuamua e tatau ai i le gaosiga ma le teuina o [meaai] i le aiga faapea foi le atiina ae o tulaga e faaleleia ai lagona i taimi o mafatiaga ootia.⁸

Ua fautuaina i tatou ina ia auai i le gaosiga ma le teuina o meaai i totonu o aiga.

Ua apoapoai mai le Alii ina ia teuina e lona nuu ni mea mo aso timu, saunia mo taimi faigata, ma tuuese ni mea mo faalavelave faafuasei, o se sapalai mo se tausaga se tasi pe sili atu o mea e manaomia ina ia oo mai ni lologa, mafuie, oge, afa, ni matagi o le olaga, ae o loo mafai ona tausia o tatou aiga i taimi o le faigata.⁹

Matou te uunaia outou ina ia totoina meaai uma e mafai ona e totoina i lou lava fanua. O laau aina, vine, fualaau aina suamalie—ia totoina pe afai ua tatau ai le tau mo lo latou totoina. Ia toto fua-laau faisua ma faaaoga mai lou lava fanua. E oo foi ia i latou o loo nonofo i fale mautotogi taitasi po o atufalega e mafai lava ona toto ni meaai laiti i ni tamai paelo po o ni tamai pusa. Aoao i le auala sili mo le saunia o au lava meaai. Ia faia lou togalaau ia mama ma matagofie ma ia fua lelei mai. Afai o i ai ni tamaiti i lou aiga, ia faaauai i latou i lea faiga faapea ma ni tiute e tofia i ai.¹⁰

Ou te faamoemoe ua tatou malamalama o le i ai o se togalaau … e masani ona aoga i le faaitiitia o le tau o meaai ma maua ai le tulaga tofo lelei o fualaau aina fou ma fualaau faisua, ae e iai foi nisi tulaga sili atu. O ai na te fuaina le taua o lena talatalanoaga faapitoa i le va o le Tama ma le afafine ao la veleina ma fui le togalaau? E faapefea ona tatou iloiloina le lelei o lesona e maua sa’o mai le totoina, faafaileleina, ma le tulafono e faavavau o le seleselega? Ma e faapefea ona fuaina le faatasia o le aiga ma le feoeoeai lea e tatau ona o faatasi ma se gaoioiga manuia e tuuapa ai meaai? Ioe, ua tatou faataatiaina ni punaoa e teuina, ae peitai o le lelei e sili atu o loo i ai lea i totonu o lesona o le olaga ua tatou aoaoina ao tatou ola magafagafa.¹¹

Matou te uunaia aiga ina ia i ai le sapalai o lenei tausaga; ma e matou te fai atu pea lava pea ma toe saga ta’u atu pea lava le mau a le Alii o loo Ia fetalai mai ai, “Se a ea le mea e taua ai au e outou, Le Alii e, le Alii e, a e tou te le faia mea ou te fai atu ai?” [Luka 6:46.] E matuai le aoga lava le faatinoina o lo latou faaleagaga, lea e faaigoaina ai, ma valaauina o ia i ona suafa taua, ae le faia mea ua ia fetalai mai ai.¹²

A tatou maua le tulaga manuia o le tamaoaiga ma faateleina a tatou teuga tupe, ona oo mai lea o le lagona o le malupuipuia, ma ua tatou lagona i nisi o taimi ua tatou le manaomia le sapalai lea e pei ona fautuaina mai e le Usoga. … E tatau ona tatou manatua e mafai ona fesuiai tulaga ma e mafai ona sili atu le talisapaia o oloa faavae e i tatou po o isi. O lea, e tatau ia i tatou ona tatou faalogo po o le a le mea ua faatonuina ai i tatou ma mulimuli i ai ma le manino lelei.¹³

E tatau ona tatou galulue mo mea ua tatou maua.

E tusa ai ma tulaga uma o o tatou olaga, ou te talitonu o tane e tatau ona fesoasoani ia i latou lava. E tatau ia i latou ona suotosina ma toto ma atiina ae ma selesele ae le o le faamoemoe i lo latou faatuatua e aumaia ni a latou falaoa.¹⁴

O le galue o se tulaga manaomia o le faaleagaga ae o se tulaga manaomia foi o le tamaoaiga.¹⁵

O le galue e aumaia ai le fiafia, lagona lelei o le tagata lava ia, ma le faauluolaina. O le autu lena o mea uma e ausia; o lona faafeagai o le paie. Ua faatonuina i tatou ina ia galulue. (Tagai Kenese 3:19.) O le taumafaiga ina ia maua lo tatou soifuaga manuia i le faaletino, fegalegaleaiga, lagona, po o le faaleagaga e ala i le maua fua o se mea ua solia ai le faatulagaga paia o le tatau ona tatou galulue mo mea ua tatou maua.¹⁶

Ua faamanatu soo mai ia i tatou e faapea o fesoasoaniga o le uelefea a le Ekalesia e faaleagaga le faamoemoega ma o nei aa faaleagaga o le a vaivai pe afai tatou te faatagaina soo se mea e pei o le filosofia o le maua fua o se mea e ulufale mai i totonu o lo tatou faatinoina o le Tautua Faa-Uelefea. O tagata uma e fesoasoani e mafai ona latou faia se mea. Ia tatou mulimuli i le faatulagaga a le Ekalesia i lenei tulaga ma faamautinoa o i latou uma ua mauaina, ia faapea ona tuuina atu i latou. Ia tatou tutu pea e tetee atu i le taliaina o suiga faalelalolagi mo le fuafuaga e tausia e matitiva, i le auala lenei a le Alii.¹⁷

O le auala a le Alii o le fausia lea o lagona lelei o le tagata ia te ia lava ma atiina ae ai ma maua le tauleleia o le tagata, ae o le auala a le lalolagi e faavaivaia ai le vaai a le tagata mo ia ma mafua ai lagona loloto o le musua.

O le auala a le Alii e mafua ai ona faavave taumafaiga a le tagata lava ia e toe oo atu ai i se tulaga o le tutoatasi faaletamaoaiga, e tusa lava pe na te manaomia mo se taimi le tumau le fesoasoaniga ma le lagolago, ona o ni tulaga faapitoa. O le auala a le lalolagi e atili faalagolago ai le tagata i polokalama o le uelefea ma matele atu ai i le saga manao i nisi mea nai lo le uunaia o ia ina ia toe foi i le tutoatasi faaletamaoaiga.

O le auala a le Alii e fesoasoani ai i o tatou tagata ina ia maua se molimau mo i latou lava e uiga i le talalelei o le galue. Aua o le galue e taua i le fiafia o le tagata faapea foi ma le limalima. Ae peitai, o le auala a le lalolagi e tuuina atu le faamamafa silisili i le tele o le taimi paganoa ma le ‘alofia o le galue.¹⁸

E sa’o le galue. O alii ma tamaitai ma tamaiti uma lava e tatau ona galulue. E oo lava i tamaiti laiti e tatau ona aoao pe faapefea ona fetufaai, ia fesoasoani i le faia o galuega i le fale ma galuega i le fanua, ia toto togalaau, ia toto laau, ia tau fualaau aina, ma faia mea uma e manaomia e moomia ona fai, aua e fausia ai ni uiga malolosi mai ia i latou ma atiina ae ai lo latou faatuatua ma uiga.

Matou te mananao ia te outou matua ina ia faia ni galuega mo a outou fanau. Ia uunaia i latou e aoao a latou lesona o le aoga. Aua le tuua i latou e taaalo i taimi uma. E i ai le taimi mo le taalo, e i ai le taimi mo le galue, ma e i ai foi le taimi e suesue ai. Ia mautinoa o loo tutupu ae lau fanau i olaga e te iloa e tatau ona ola ae ai.¹⁹

E tatau ona avea le galue ma matupu faavae e pulea ai olaga o tagata o le Ekalesia. (Tagai MFF 42:42; 75:29; 68:30–32; 56:17.)²⁰

E mafai ona avea i tatou ma tagata e ola faalagolago ia i tatou lava i tulaga faaletamaoaiga e ala i le teuina o tupe, aloese mai le aitalafu, ma ia ola ai e tusa ma mea tatou te maua.

Ua e saunia ea ma puipuia mai le maliu, ma’i, po o se gasegase e umi e faataotolia ai le tagata o loo faigaluega [e tausi ai le aiga]? O le a le umi e te mafai ona ola ai pe a taofia tupe maua? O a ni au teugatupe faaleoleo o i ai? O le a le umi e mafai ai ona totogi le tele o au tupe totogi mo le fale, taavale, meatotino ma meaafale? …

O le manatu muamua lava: E le mafai lava ona tatou faia. E toetoe lava a le mafai ona tatou ola i le faaaogaina o sene uma o tupe maua o le masina. … Afai e tau le mafai ona e gafataulimaina a o siisii pea i luga lou totogi, lelei lau galuega, malosi, mafai ona e maua mea, talavou, ae e faapefea la ona e faafetaiaia ia faalavelave faafuasei pe a faaletonu le galuega, gasegase ma isi faafitauli e le mailoa le tutupu mai?²¹

E le tatau ona faaaluina uma tupe ua e maua. E tatau ona tuu ese tupe mo misiona ma aoga mo le fanau. E tatau ona latou tauaveina se matafaioi ma faia ni galuega laiti e mafai ai ona latou fesoasoani e maua ai tupe, ona latou le faaaluina lea o na faaputuga laiti, ae o le a latou teuina mo ia faamoemoega taua. E mafai ona faauigaina faapea o matua o aso nei o le a ola e aunoa ma le tele o mea latou te mananao i ai, ae o taeao e sau ai le seleselega.²²

Aloese mai le aitalafu. … O aso nei ua foliga mai ua taulai atu mea uma i le aitalafu. “A i ai au kata e faatau ai faaaitalafu, ma e vave faatau mai mea uma”: o loo uunaia oe ina ia faia. Ae o le mea moni tatou te le moomia ona faia ina ia tatou ola ai.²³

Tatou te mafaufau po o le a le mea o le a faia e o tatou tagata ua faaaluina a latou mea uma ma sili atu foi. Afai o le a tuuitiitia galuega ma tupe maua, o le a la le isi mea? Po o e ola ea e sili atu i lo mea ua e maua? Po o e aitalafu ea i mea e le mafai ona e totogiina pe a oo i taimi o faigata? Pe o lava ea lou malosi e tatalia ai se tulaga e tulai faafuasei mai?²⁴

Fuafua ma galue i se auala e mafai ai ona faatagaina oe ia e fiafia e tusa lava pe faia e aunoa ma nisi mea sa i ai i taimi o le sologa lelei. Ola e tusa ai ma mea e te maua ae le o le sili atu ai. … Ia faatau ma le atamai ma le faaeteete mea e te moomia. Taumafai e faasao se vaega o mea e te mauaina. Aua nei faaluafesasia mea e te manaomia moni ma mea e te manaonao i ai.²⁵

Ia tatou aoao taitoatasi, aoao o ni aiga, uarota ma siteki e ola e tusa ai ma mea tatou te maua. O loo i ai le malosiaga ma le faaolataga i lenei mataupu faavae. Sa fai mai se tasi faapea e faateleina lo tatou tamaoaiga, pe a mafai ona tatou ola e aunoa ma nisi o mea. I le avea ai o ni aiga ma se Ekalesia, e mafai ma e tatau ona tatou saunia mea e matua tatau mo o tatou tagata, ae peitai e tatau ona tatou faaeteete ina ia aua nei sili atu i mea e tatau po o faamoemoega e leai se sootaga ma le soifua sololelei o o tatou aiga ma le autu o le misiona a le Ekalesia.²⁶

O le saunia o se auala o le olaga e aumaia ona lava taui.

O le saunia, pe a sailia ma le tatau, o se auala o le olaga, ae le o se mea tupu faafuasei, po o se polokalama uiga ese.²⁷

E mafai ona tatou toe tepa i vaega uma o sauniuniga a le tagata lava ia ma le aiga, e leai se sootaga i ni faatafunaga po o ni faalavelave, ae o le atiina ae o se ituaiga soifuaga e i ai i lea aso ma lea aso ma e i ai ona lava taui.

Ia tatou faia nei mea aua e sa’o, aua e faamalieina ai, ma ona o lo tatou usiusitai i fautuaga a le Alii. O le agaga lea tatou te saunia ai mo le tele o mea e ono tutupu mai, ma o le Alii o le a leoleo ma faamafanafana ia i tatou. E moni o le a oo mai taimi faigata—aua ua uma ona folafola mai e le Alii ma, ioe, o siteki o Siona o le a “avea ma olo ma sulufaiga mai le afa.” (MFF 115:6.) Ae afai tatou te ola magafagafa ma le faautauta, o le a tatou saogalemu e pei o tatou i ai i Ona alofilima.²⁸

Fautuaga mo Suesuega ma Aoaoga

Mafaufau i manatu nei a o e suesueina le mataupu po o lou saunia foi e aoao atu. Mo nisi fesoasoaniga faaopoopo, tagai i itulau v–ix.

Talu ai ona o o tatou olaga e fesootai ma aiga, uo, o le Ekalesia, ma le nuu, o le a sou manatu i le uiga o le faalagolago o le tagata ia te ia lava ma le tutoatasi? (Tagai itulau 131–132.)
Sa aoao mai Peresitene Kimball e faapea o le soifua manuia i “fegalegaleaiga, lagona, faaleagaga, faaletino [ma le] tamaoaiga” o ni elemene ia o le ola magafagafa (itulau 132). O a ni auala e fesootai ai le soifua manuia faaleagaga i isi elemene?
Ao e suesueina le vaega lea o loo amata i le itulau 133, ia mafaufau po o le a le lelei o lou saunia o loo i ai mo “afa o le olaga.” E mafai faapefea ona tatou matuai lava saunia lelei?
O a ni faamanuiaga e mafai ona aumaia e se togalaau i se aiga e ese mai le mauaina ai o meaai? (Tagai itulau 134)
Sa saunoa Peresitene Kimball o le “galue o se tulaga moomia i le faaleagaga” (itulau 135). O a ni faamanuiaga faaleagaga ua e iloaina e ala i le galue? O a ni auala e mafai ai ona tatou fesoasoani i a tatou fanau e aoaoina le taua o le galue?
O le a sou manatu o le a le eseesega i le va o le manao ma le moomia? O a uiga e mafai ona fesoasoani ia i tatou e pulea ai o tatou manaoga? (Mo ni faataitaiga, tagai itulau 137–38 ma tala o loo i le itulau 131–132.) O a ni faamanuiaga o loo iai iina i le i ai o se paketi? O le a se fesoasoani o loo avanoa e taialaina ai i tatou i le paketiina o a tatou punaoa?
Faitau le vaega lea o loo amata i le itulau e 138. O a ni auala e aumaia ai taui i aso taitasi ona o le saunia?

Mau e Faatatau I Ai: Kenese 41:14–57; 2 Nifae 5:17; MFF 29:8–11

family gardening — “Ia tatou faata’ita’ia le mataupu faavae o le saunia o le tagata lava ia ma le aiga i o tatou olaga i aso taitasi.”

father and son fixing engine — “O le galue e aumai ai le fiafia, lagona siitia, ma le faaeaea. O le taunuuga o mea uma ua ausia; o le faafeagai o le paie.”