Mataupu 8

Auaunaga e le Manatu Faapito

A o tatou tuuina atu o tatou tagata i le auauna atu i isi, tatou te maua le faateleina o le faaleagaga ma le fiafia.

Mai le Soifuaga o Spencer W. Kimball

Sa uunaia e Peresitene Spencer W. Kimball le Au Paia o Aso e Gata Ai ina ia punoua’i i “ni galuega faigofie o le auauna atu” lea o le a faamanuiaina ai olaga o isi e faapea foi ia i latou.¹ Sa masani ona ia mauaina ni avanoa e tuuina atu ai se auaunaga faapea e ia lava, e pei ona faaalia i le tala lenei:

“Sa i ai se tina talavou sa fuafua e malaga i le po ma sana tama teine e lua tausaga le matua, ae sa punitia i le malae vaalele i Chicago ona o le leaga o le tau, ma sa leai ni meaai po o ni lavalava mama mo le teineitiiti ma sa leai foi se tupe. Sa … ma’itaga le tina ma ona o le popole nei fafano lona ma’itaga, o lea na faatonuina ai e le fomai e aua nei ona siiina lana tama teine sei vagana ua matua tatau ai. Na mavae atu lea itula ma lea itula, sa tu ai o ia i lea laina ma lea laina, e taumafai ina ia maua se vaalele e malaga ai i Michigan. Sa pisapisao le malae vaalele, ma sa faatumulia i pasese ua lelavava, faasiasia, ma tomumumu, ma sa ia faalogoina ia faitioga na fai i lana tama ma ia, a o tautoso atu lana tama i luga o le sima a o faasolo agai i luma le laina. E leai se tasi na ofo atu e fesoasoani i le teineitiiti ua susu pala, fiaai, ma ua vaivai.

“Ma sa lipotia mulimuli ane e le tina lea, ‘sa i ai se tagata sa savali agai mai ia i ma’ua ma faapea mai ma le agalelei, “E i ai se mea e mafai ona ou faia e fesoasoani atu ai ia te oe?” Sa ou taliaina lana ofo ma se agaga faafetai tele. Sa ia siiina i luga la’u tama teine o loo tagi masusu mai le fola malulu, ma sa ia opoina o ia ma le alofa a o ia milimiliina lona papatua. Sa ia fesili i ai pe mafai ona ia lamuina se pululole. Ina ua nā [la’u tama], sa ia siiina o ia ma alu atu ma fai i isi tagata o loo i ai i le laina i o’u luma atu, o loo o’u manaomia la latou fesoasoani. Na foliga mai sa latou malilie i ai, ma sa alu atu o ia i le laulau e faatau ai pepa malaga [i le pito i luma o le laina] ma faia ai se fuafuaga ma le alii ofisa ina ia tuu a’u i le vaalele lea o le a sosoo ai. Na matou savavali faatasi ma ia i le nofoa, ma matou talatalanoa ai mo sina taimi, seia oo ina ua mautinoa ua lelei mea uma mo i ma’ua. Na ia tuua loa ma malaga ese atu. Pe tusa o se vaiaso mulimuli ane, sa ou vaaia ai se ata o le Aposetolo o Spencer W. Kimball ma ou iloa ai, o le tagata ese lea na i ai i le malae vaalele.’ ”²

I nai tausaga mulimuli ane, na maua ai e Peresitene Kimball se tusi, lea e faitauina faapea se vaega:

“Lau Susuga Peresitene Kimball:

“O au o se tamaitiiti aoga i le Iunivesite o Polika Iaga. O lea faatoa foi mai la’u misiona mai Munich, Siamani Sisifo. Sa manaia lava la’u misiona ma sa tele ni mea sa ou aoaoina ai. …

“Sa ou nofo i le sauniga perisitua i le vaiaso ua mavae, lea sa faamatala ai se tala e uiga i se galuega alofa sa faia e lau susuga i tausaga e tusa ua luasefulutasi ua mavae, i le malae vaalelei i Chicago. Sa faamatala ai i lea tala se auala sa oulua fetaui ai ma se tina talavou e ma’itaga ma … sana tama sa tagi faataitaio i le … mafatia, sa faatalitali i le laina umi mo pepa o pasese i le vaalele. Sa popole o ia ina ne’i fafano lona ma’itaga ma o le ala lea na le mafai ai ona ia siiina i luga lana tama e faanana. Sa faafa ona fafano ona ma’itaga i taimi ua tuanai, o le isi mafuaaga lena na faatonuina ai o ia e le fomai e aua ne’i toe punou i lalo pe sii se mea i luga.

“Sa e faananaina lana tama na tagi ma sa e faamalamalamaina atu i ai le tulaga i isi tagata o le pasese sa i ai i le laina. O lenei galuega alofa sa aveesea ai le lutia ma le mafatia o lo’u tina. Sa ou fanau mai i ni nai masina mulimuli ane i Flint, Michigan.

“Ou te fia faafetai atu mo lou alofa. Faafetai atu mo lau faataitaiga!”³

Aoaoga a Spencer W. Kimball

E tatau ona tatou mulimuli i le faataitaiga a le Faaola o le auauna atu e aunoa ma le manatu faapito.

Na tuuina atu e le [Faaola] ia lava mo ona soo. … Sa ia malamalama lava i le faia o le mea e tonu ma le ausia o le manaoga moni o e sa ia auauna atu i ai.⁴

E faamulimuli e Ia o ia lava ma ona manaoga ae auauna atu i isi e sili atu i tulaga manaomia o le tiute, e le faavaivai, [e faia ma le] agaalofa, ma le mataalia. O le tele o faafitauli i le lalolagi i ona po nei e mafua mai lea i le manatu faapito ma le manatu o le tagata mo na o ia lava lea ua tele ai nisi ua latou manaomia ni mea se tele mai le olaga ma isi ina ia faamalieina ai o latou lava manao.⁵

O le tele lava o lo tatou malamalama i le mea moni na tupu i le soifuaga o Iesu le Nasareta i Ketesemane ma luga i Kalevaria, o le a faapea foi ona sili atu ona tatou malamalama i le taua o le taulaga ma le le manatu faapito i o tatou olaga.⁶

Afai tatou te mulimuli i tulagaaao [o le Faaola], e mafai ona tatou ola i le faatuatua nai lo le fefe. Afai e mafai ona tatou faasoa atu ona manatu e uiga i tagata, e mafai ona tatou alolofa ia i latou, auauna ia i latou, ma aapa atu ia i latou—nai lo le lagonaina o le popole ma le faamata’uina e isi.⁷

E masani ona ausia e le Atua manaoga o isi e ala i nai auaunaga laiti.

E moomia ona tatou fesoasoani ia i latou o e o loo tatou saili e auauna atu i ai ina ia iloa mo i latou lava e le gata e alofa le Atua ia i latou, ae o loo manatu mai pea ia i latou ma mea latou te manaomia. …

E silafia i tatou e le Atua, ma na te leoleo ia te i tatou. Ae e masani ona ia taulimaina mea tatou te manaomia, e auala mai i se isi tagata. O le mea lea, e taua tele lo tatou auauna atu o le tasi i le isi i le malo. E taufai manaomia e tagata o le Ekalesia le malosi o le isi, o le lagolago, ma le taitaiga i totonu o se faapotopotoga o e talitonu e avea o se faatasiga a soo. Tatou te faitau i le Mataupu Faavae ma Feagaiga i le taua tele o le “… ia fesoasoani i e vaivai, ia sii a’e lima o loo tautau i lalo, ma faamalosia tulivae vaivai.” (MFF 81:5.) e masani lava, o a tatou aga o le auauna atu e aofia ai ni nai faamalosiaga faigofie po o le tuuina atu o se fesoasoaniga masani i ni galuega masani, ae maeu le matagofie o taunuuga e mafai ona tafe mai nai gaoioiga e masani ai ma maua mai i le faia o nai galuega faatauvaa! …

Afai tatou te taulai atu i mataupu faavae faigofie ma gaoioiga faigofie o le auauna atu, o le a tatou vaaia ai e le pine ae motusia le taua o tuaoi o faalapotopotoga. E masani ai i taimi ua tuanai, sa avea ia tuaoi o faalapotopotoga i totonu o le Ekalesia ma papupuni e taofia ai i tatou mai le aapa atu i tagata taitoatasi i le atoatoa e tatau ona tatou faia ai. O le a faaitiitia ai foi lo tatou popole pe viia ai le faalapotopotoga po o le tagata, ae o le a tatou popole atili e auauna atu i le tagata ua poloaiina i tatou e aapa atu i ai. O le a tatou iloaina ai foi le faaitiitia o lo tatou manatu i lo tatou faasinomaga i le faalapotopotoga ae faateleina le popole i lo tatou faasinomaga moni ma le silisili, o se atalii po o se afafine o lo tatou Tama o i le lagi, ma fesoasoani atu ai i isi ina ia ausia lea lava lagona e tasi o le avea ma se tasi o itutino.⁸

E tatau ona tatou faaaogaina a tatou taleni ma mea tatou te mafaia e auauna atu ai i isi.

E le tatau ona i ai se tasi o i tatou e pisi tele i ona tofiga faaleEkalesia ma faapea ai e leai se avanoa e auauna faaKerisiano atu ai ma le le faalaua’iteleina i o tatou tuaoi.⁹

E faigofie ia i tatou ona faafetaui i polokalama tuai na faavae mai ai, o le faia lea o mea e moomia ona tatou faia, e galue mo ni itula patino, ia pese faafia ma tatalo faafia, ae ia manatua na fetalai mai le Alii o se auauna faatamala ma le le aoga le faatali seiloga e poloaiina i mea uma [tagai MFF 58:26].¹⁰

“E moni ou te fai atu, e tatau i tagata ona galulue ma le naunautai i mea lelei, ma faia mea e tele i lo latou lava loto malie, ma faataunuuina le amiotonu tele.” (MFF 58:27.)

Ua tuuina atu i tagata uma ni mana faapitoa faatasi ai ma ni tapulaa patino e tatau ona atiina ae ai na mana, e faaaoga ai o latou mafaufau, ae le seiloga e tau faatonu. E tatau ona latou atiina ae a latou lava taleni ma tomai ma mea e mafaia i le mea e gata ai ma faaaoga e fausia ai le malo.¹¹

O le tagata o le Ekalesia e i ai le lagona faapea e tuu ai pea e fai e isi, o le a tele naua mea e ao ona ia tali atu ai. E toatele i latou o e fai mai: “O loo fai e lo’u toalua le galuega a le Ekalesia!” O isi e fai mai: “Ou te le fiafia tele i mea tau lotu,” ma ua foliga mai ai o le toatele lava o tagata ua le taumafai e auauna ma fai lo latou tiute. Ae ua tuuina mai e le Atua ia i tatou ia taleni ma taimi, ma ua i ai faatasi ma atamai faapea ma avanoa e faaaoga ai ma atiina ae nei taleni i lana galuega. O le mea lea ua faamoemoe ai o ia e tele mea e tatau ona tatou faia, o i tatou o lana fanau faamanuiaina. ¹²

I le tala i le mati ua le fua (tagai Mataio 21:19) sa fetuuina le laau ua le fua ona o lona le fua mai. E maeu se toilalo i le tagata ma le aiga tagata pe afai e le tupu le vine, e le fua le laau, e le faatupuina le agaga e ala i le auauna atu! E tatau i se tasi ona ola, e le na ona i ai; e tatau ona ia faia, ae le na ona i ai; e tatau ona tuputupu ae, ae le na ona ola. E tatau ona tatou faaaogaina a tatou taleni mo o tatou uso a tagata, nai lo le tanumiaina e ala i se olaga manatu faapito.¹³

O le a i ai nisi matau laulu o le a faapea ane po o le a le pogai e ala ai ona tatou popole fua i nai mea faigofie e pei o le auauna atu i isi i se lalolagi o loo siomia i le tele o faafitauli faigata ma le matautia. Ae peitai, o se tasi lea o itu e lelei ai le talalelei a Iesu Keriso ona e tuuina mai ai ia i tatou le malamalama e uiga i isi tagata i luga o lenei paneta, e aofia ai i tatou lava, ina ia mafai ai ona tatou vaai atu i mea e moni lo latou taua. …

Ou te fia fautuaina outou afai tou te filifilia galuega o le a tuu atu i ai lou taimi ma taleni ma tamaoaiga i le auauna atu i isi, ia faaeteete i le filifilia o mafuaaga lelei. E tele naua nei galuega e mafai ai ona outou tuuina atu i ai outou tagata atoatoa ma le saoloto, ma o le a maua mai ai le tele o le olioli ma le fiafia mo outou faapea i latou tou te auauna atu i ai. O loo i ai isi galuega, mai lea taimi i lea taimi, lea e foliga mai e sili atu ona mananaia lea e mafai ona maua mai ai viiga a le lalolagi, ae o nei galuega e masani ona sili atu ona faapito’au le natura. O galuega nei e matele lava ina mapuna ae mai le mea o loo ta’ua e tusitusiga paia “o poloaiga a tagata” [Mataio 15:9] nai lo poloaiga a le Atua. O galuega faapea e i ai ni uiga mama ma ni aoga, ae le taua atu nai lo galuega e mafua mai i le tausiga o poloaiga a le Atua.¹⁴

O le a faamanuiaina le autalavou i avanoa e tuuina atu ai ni auaunaga aoga.

E le tatau ona tatou fefefe e talosaga atu i a tatou talavou ina ia tuuina atu le auaunaga i o latou uso a tagata po o le ositaulaga mo le malo. O o tatou talavou o loo i ai se lagona e le taufaamasania i le faatupuina o ni manatu fou ma e le tatau ona tatou lotovaivai pe a valaauina i latou e auauna atu.¹⁵

A o tatou faitau i amioga faasolitulafono ma soligatulafono, … ma a o tatou matauina o le tele lava o solitulafono o loo faia e teine ma tama, tatou te fesili ifo ai ia i tatou lava po o le a le mafuaaga ae o a foi ni vaifofo? I se sailiiliga maeaea sa faia, na iloa ai o se vaega tele o talavou e moomia ni tiutetauave ma o le a faamanuiaina ai.

“O le a se mea e mafai ona tatou faia?” na fesili ai [le autalavou]. …

Fai faatau, galue i le falemai, fesoasoani i tuaoi …, fufulu ipu, veki [vacuum] le fola [o le fale], tapena moega, fai meaai, aoao e suisui.

Faitau tusi lelei, faalelei meaafale, fai se mea o loo manaomia i le fale, faamama le fale, auli ou lavalava, salu ia lau laau, asu ese le kiona.¹⁶

O loo matou popole lava … i le manaomia ona tatou saunia o ni avanoa taua mo o tatou alii talavou e faaleleia atili ai i latou i le auauna atu. E le masani ona le toaaga mai alii talavou i le Ekalesia ona ua tele naua ni mea taua ua tuu atu ia i latou e fai. E leai se alii talavou ua ia maua se molimau o le aoga o le talalelei i olaga o tagata, na te le faia ona tiute i le malo pe faatalale foi i ai.¹⁷

Ou te faamoemoe o le a faavaeina vave e o tatou tamaitai talavou o le Ekalesia se amioga o le auaunaga faaKerisiano. Afai tatou te fesoasoani atu i isi tagata i o latou faafitauli, o le a tatou taulimaina o tatou faafitauli i se vaaiga fou. Matou te uunaia tuafafine o le Ekalesia—o e talavou ma e matutua—ina ia “galulue ma le naunautai” [MFF 58:27] i galuega le leoa o le auauna atu mo uo ma tuaoi. O mataupu faavae uma o le talalelei o loo momoli atu ai i totonu lana lava molimau faapea e moni. O lea, o na galuega o le auauna atu e le gata e fesoasoani ai i e o loo mauaina le auaunaga, ae faamanuiaina ai foi le na foaiina atu.¹⁸

O le tuuina atu o le auaunaga e le manatu faapito tatou te tau atu ai i le ola tamaoaiga.

O le auauna atu i isi o le a atili ai ona loloto ma suamalie atili ai foi lenei olaga a o tatou sauni atu e ola i se lalolagi e sili atu ona lelei. O le faia o le tautua po o le auauna atu, tatou te iloa ai tautua ma auauna atu. Afai tatou te galulue e auauna atu i o tatou uso a tagata, e le gata i le faia o o tatou tiute ma galuega e fesoasoani ai ia i latou, ae o le a fou ai foi sa tatou vaaiga i o tatou faafitauli. Afai o le a tatou popole tele i isi tagata ma o latou olaga, o lona uiga o le a itiiti foi le taimi o le a tatou popole ai mo i tatou lava! I le totonugalemu o le vavega o le auauna atu, o loo i ai se folafolaga a Iesu e faapea o le tuuina atu o i tatou lava, o le a tatou toe maua ai i tatou lava! [Tagai Mataio 10:39.]

E le gata o le a tatou “mauaina” i tatou lava i le amanaiaina o le taitaiga paia i o tatou olaga, ae o le tele lava o lo tatou auauna atu i o tatou uso a tagata i auala talafeagai, o le a faapea foi ona tele mea taua o le a oo mai i o tatou agaga. O le a avea atili i tatou ma ni tagata taua a o tatou auauna atu i isi. O le mea moni—e sili atu ona faigofie ona tatou “maua” i tatou lava aua foi e tele naua isi vaega o i tatou e tatau ona sailia! …

… O le maua atili o le ola o loo ta’ua i tusitusiga paia [tagai Ioane 10:10] o le tali faaleagaga lea tatou te maua i le faateleina o a tatou auaunaga i isi ma le tuuina atu lea o a tatou taleni e auauna atu ai i le Atua ma tagata. Na fetalai Iesu, e pei ona outou manatua, o uluai poloaiga e lua o loo autu i ai tulafono uma ma le au perofeta, ma o na poloaiga e lua e aofia ai le atiina ae o lo tatou alolofa i le Atua, o i tatou lava, o o tatou tuaoi, ma tagata uma [tagai Mataio 22:36–40]. E le mafai ona maua moni le ola atili pe afai e le o fesootai ma le tausia ma le faataunuuina o na poloaiga sili e lua.

O le a matua gaogao ‘i’ī o tatou olaga, sei vagana ua tatou ola i se olaga tatou te latalata atu ai i lo tatou Tama Faalelagi ma o tatou uso a tagata. O se mea ou te matua fefe tele ai pe a ou vaai atu, mo se faataitaiga, i le faiga o olaga o le toatele i ona po nei ua avea ma mea ua vavaeeseina ai i latou mai o latou aiga ma a latou uo ma a latou aumea ae agai atu i le tuliloaina e aunoa ma le faaeteete o fiafiaga ma mea faaletino. Ua masani ai ona tuleiese i autafa le lotonuu i le aiga, o le nuu, ma le atunuu ae sailia isi mea ua manatu sese i ai ina ia maua ai le fiafia, ae o le mea moni lava, o le sailia ma le manatu faapito o tuinanau e faailoga fesili ia e vave ona mou atu. O se tasi o eseesega i le va o le olioli moni ma le faamalieina, e i ai nisi o vaega patino e faamalieina ai ae faatoa maua pe a faatiga i isi. Ae o le olioli, e mafua mai ona o le le manatu faapito ma le auauna atu, ma e faamanuiaina ai isi nai lo le faatiga i ai.¹⁹

Ou te iloa se alii o ona manatunatuga uma i le tolu kuata o se seneturi sa mo na o ia lava. … Sa ia saili e taofiofia lona olaga mo ia lava, ma faaputuputu uma mai mea lelei o le olaga mo lona lava atinaeina ma lona olioli. O se mea na matuai faateia tele ai, i le taumafai ai e taofiofia lona olaga mo ia lava, … sa paee o ia, sa leai ni ana uo, ua ‘alofia foi e lona aiga ua fiu ai.

O lenei, a o faifaimalie atu lava le olaga, sa ia iloaina ai le tuua na o ia, ua tuulafoaia, tiga, ua le alofagiaina, ma ua le amanaiaina; i lona manatu faapito, sa mafai lava ona ia mafaufau i se tagata e toatasi, o ia lava. Sa ia teuteu mo ia lava lona taimi, o taleni, ma mea na ia maua. Ua ia le maua le ola atili.

I se isi itu, ou te masani i se tagata sa le manatu mo ia lava. O ona faanaunauga uma e mo le puipuiga ma le faamalieina o i latou sa siomia o ia. E leai se galuega sa mamafatu, e leai se osigataulaga sa faigata ona ia faia mo ona uso a tagata. O mea na ia maua na oo mai ai le faamama avega mai puapuaga faaletino; o ana galuega agalelei ma le mafaufau i isi sa aumaia ai le faamafanafanaga ma le faafiafia loto ma le faalototeleina. Soo se mea e maua ai ni tagata lotovaivai, sa i ai o ia iina, e faafiafia i e lotovaiavai, e tanu i e maliliu, e faamafanafana i e faavauvau, ma sa faamaonia ai o ia lava o se uo i taimi e manaomia ai. O lona taimi, o mea na ia maua ma lona malosi sa tuuina atu ia i latou sa moomia le fesoasoani. O lona ofoina atu o ia lava e aunoa ma se totogi, sa faapena foi ona faatamaoaigaina ai lona mafaufau, tino, ma ona tausaafia seia oo mai i le taimi nei ina ua pulapula lagoto lona soifua, a ua avea o se mana mo le lelei, o se faataitaiga ma se faatosinaga lelei i le toatele. Sa ia atiina ae ma tuputupu ae seia oo atu o ia i soo se mea e viia ai, alofagia ai, ma talisapaia ai. Sa ia tuuina atu le ola ma i se tulaga moni lava sa ia maua atili le ola.²⁰

O se faatusatusaga i le va o ala o le lalolagi ma auala o le Atua ua matuai faamaninoina lava e tulaga e oo i ai, o le faatuatua o tagata o le Ekalesia o le a matuai tofotofoina lava. O se tasi o mea sili ona taua e mafai ona tatou faia, o le faailoa atu lea o a tatou molimau e ala i le auauna atu, lea o le a toe tauia ai i le tuputupu ae i le faaleagaga, faateleina le naunautai, ma se malosi tele e tausia ai poloaiga. …

O loo i ai se saogalemu tele i le faaleagaga, ma e le mafai ona tatou maua le faaleagaga e aunoa ma le auauna atu!²¹

Afai tatou te sailia le fiafia moni, e tatau ona tatou faaaluina o tatou malosi mo faamoemoega e sili atu nai lo mea tatou te fiafia i ai. Ia tatou manatunatu ma le agaga tatalo pe faapefea ona tatou tuuina atu ma le alofa ma le mataalia le auaunaga i o tatou aiga, o tuaoi, ma uso a Au Paia.²²

Fautuaga mo Suesuega ma Aoaoga

Mafaufau i manatu nei a o e suesueina le mataupu po o lou saunia foi e aoao atu. Mo nisi fesoasoaniga faaopoopo, tagai i itulau v–ix.

Iloilo le tala o loo i le itulau 91–93. Mafaufau i aafiaga o si gaoioiga itiiti agalelei a Peresitene Kimball. O le a se mea e mafai ona tatou aoaoina mai le auala na ia tuuina atu ai le auaunaga?
E faapefea ona e faamatalaina le auala na auauna atu ai le Faaola i isi? (Mo nisi faataitaiga, tagai itulau 93.) O le a se mea e mafai ona tatou faia e mulimuli ai i Lana faataitaiga?
Faitau le parakalafa muamua i le itulau 93. O anafea na faataunuuina ai e le Atua ou manaoga e ala mai i isi tagata? O le a se mea e mafai ona tatou faia ina ia saunia ai e faataunuu manaoga o isi?
Ia iloilo faapuupuu ia itulau 93–94, e vaai ai mo ni faafitauli e mafai ona taofia ai i tatou mai le tuuina atu o le auaunaga e aunoa ma le manatu faapito. E mafai faapefea ona tatou faatoilaloina nei faafitauli?
Na aoao mai Peresitene Kimball e moomia e talavou ni avanoa e auauna atu ai (itulau 96–98). Aisea? O a mea e mafai e matua ma taitai o le Ekalesia ona fai e tuuina atu ai i le autalavou ni avanoa taua e auauna atu ai?
O le a sou manatu o le a le uiga o le “maua atili le ola”? (Mo nisi faataitaiga, tagai i itulau 98–99.) Aisea e taua atu ai le auaunaga e aunoa ma le manatu faapito i le maua atili o le ola?

Mau e Faatatau I Ai: Mataio 25:40; Iakopo 1:27; Mosaea 2:17; 4:14–16; MFF 88:123

President Kimball holding child — O si faatinoga faigofie o le agalelei a Peresitene Kimball i se malae vaalele i Chicago sa mamao atu lava i tua ona aafiaga.

boy washing window — “E le tatau ona tatou fefefe e talosaga atu i a tatou talavou e auauna atu i o latou uso a tagata po o le ositaulaga foi mo le malo.”