Mataupu 6
Iloaina o Tusitusiga Paia mo i Tatou Lava
E mafai e i tatou uma ona ‘ae’ae i faamanuiaga o le faatofuina o i tatou i tusitusiga paia.
Mai le Soifuaga o Spencer W. Kimball
Ina ua 14 tausaga le matua o Spencer W. Kimball, sa ia faalogo ai i le afafine o Polika Iaga, o Susa Young Gates o lauga i le konafesi a le siteki i le mataupu o le faitauina o tusitusiga paia. Na ia toe manatua: “Sa ia tuuina mai se tautalaga faagaeetia loto i le faitauina o tusitusiga paia ma sa matou avea ai na aoaoga ma vaega o o matou lava olaga; ona taofi lea o lana lauga ae fesili mai i le faapotopotoga o tama ma teine, e tusa ma le afe o i matou, ‘E toafia outou ua uma ona faitauina le Tusi Paia?’
“… Na faatumulia au i se lagona o le ta’usalaina. O le taimi lea ua tele isi tusi ua uma ona ou faitauina, o komi, ma isi tusi mananaia i le faitau, ae peitai sa faapea mai lo’u loto ta’usalaina, ‘O oe, Spencer Kimball, e te lei faitauina lava lena tusi paia. Aisea?’ Sa ou vaavaai solo i itu uma o le fale pe na o au le tagata e lei faitauina le tusi paia. Mai le afe o i matou, e tusa na o le toaono i latou o e na sii ma le mitamita o latou lima i luga. Sa ou toe faapupuu ifo i lo’u nofoa. Ou te le iloa i isi tagata po o a mea na latou fai ma mafaufau i ai, ae ou te lei toe faalogo i se isi vaega o le lauga. Aua ua faataunuuina lana galuega. Ina ua tuua le sauniga, sa ou sailia loa le ala i fafo i le mea o i ai faitotoa tetele e lua ma ou faavave atu ai loa i lo matou aiga e le mamao tele i le itu i sasae o le falesa; ma sa ū o’u nifo ma ou faapea ifo ia te au lava, ‘O le a ou faia. O le a ou faia. O le a ou faia.’
“Sa ou ui atu i tua o le fale o lo matou aiga ma ou alu atu i le umukuka i le mea e teu ai moli-tu ma filifili le moli o loo tumu ma o loo i ai se vavae fou, ma ou a’e atu loa i luga i lo’u potu i le falealuga. O iina na ou susueina ai la’u Tusi Paia ma amata i le Kenese, i le mataupu muamua ma le fuaiupu muamua, sa ou nofo ai i le po atoa i le faitauina o Atamu ma Eva ma Kaino ma Apelu, ma Enoka ma Noa seia oo atu lava i le lolo faapea ma Aperaamo.”1
E tusa ma le tausaga mulimuli ane, ae maea ona faitau e Spencer le Tusi Paia: “Oka so’u faamalieina ina ua ou iloaina ua ou faitauina atoa le Tusi Paia mai le amataga e oo i le faaiuga! Ma e maeu foi le fiafia o le agaga! Ma e maeu foi le lagona olioli sa ou mauaina mai ona mataupu!”2 Na umi se lagona faagaeetia na maua mai lea aafiaga, ma sa ia faatatau soo i ai i se taimi mulimuli ane o le olaga i konafesi aoao ma konafesi faaeria.
Sa faaauau pea ona olioli ia Peresitene Kimball i faamanuiaga o le suesueina o tusitusiga paia i ona aso uma ma uunaia isi ina ia faia faapea. Na toe manatuaina e Elder Richard G. Scott, na avea mulimuli ane ma se sui o le Korama a Aposetolo e Toasefululua: “Sa vaaia e Elder Spencer W. Kimball lo matou eria a o avea au ma se peresitene o le misiona. Sa ou matauina lona malamalama lelei ma faaaoga le Tusi a Mamona i ana savali musuia i tagata faapea ma faifeautalai. … I se fonotaga faalesone i se tasi taimi, sa ia saunoa mai ai, ‘Richard, ua e faaaogaina se mau mai le Tusi a Mamona i lenei aso lea ou te lei mafaufau lava e faaaoga i le auala lena.’ O se sauniuniga maeaea lena mo se lesona taua sa ia manao ou te aoaoina. Ona ia toe faaopoopo mai lea, ‘Ma e ou te manatu ua silia ma le faafitusefuluono ona ou faitauina lena tusi.’ Na te le tau faailoa maoti mai faapea e laitiiti so’u iloa i tusitusiga paia, ma sa ou moomia ona faaalu le olaga atoa e mafaufau loloto i ai ma faaaogaina. O lena saunoaga e tasi sa uunaia ai a’u i se sini o le olaga atoa o le faateleina lea o le malamalama i le afioga paia a le Atua.”3
Aoaoga a Spencer W. Kimball
O tusitusiga paia o se ‘oa e le lau maua lea e tatau ona tatou sailia mo i tatou lava.
O nisi taimi e foliga mai ua tatou manatu faatalatalanoa ai tele e uiga i tusitusiga paia, ona ua tatou le talisapaia atoatoa le maua gata naua o ia tusitusiga paia, ma le faamanuiaina o i tatou i lo tatou maua o nei tusitusiga paia. E foliga mai ua matua faamalieina lava i tatou i o tatou aafiaga i lenei lalolagi ma ua masani ai i tatou i le faalogo soo o aoao mai le talalelei ia i tatou, ua faigata ai ia i tatou ona tatou mafaufau sa i ai se vaitaimi sa le i ai i le lalolagi le talalelei.
Ae moomia ona tatou malamalama e lei tele ni tausaga talu ona toe manu a’e le lalolagi mai le po umi o le pogisa faaleagaga lea tatou te ta’ua o le Liliuese Tele. E moomia ona tatou lagonaina le loloto o le pogisa faaleagaga lea na faaalia i lena aso o le tautotogo o le 1820 ina ua faaali mai le Tama ma le Alo ia Iosefa Samita—o se pogisa na muai vaaia e le perofeta o Nifae ma faamatala mai o se “pouliuli tele lava” a o taofia le talalelei mai le tagata. (Tagai 1 Ni. 13:32.) …
… O le mea moni lava ou te lei fanau mai i le taimi o le pogisa faaleagaga, lea na filemu ai le lagi ma aveesea ai le Agaga, e tumu ai lava lo’u loto i le faafetai. E moni, o le aunoa ma le afioga a le Alii na te taitaiina i tatou e tusa lea ma ni tagata maumausolo i se toafa tele ua le mafai ona latou maua se laueleele e masani ai, pe ua i ai foi i totonu o se ana pogisa tele e leai se malamalama e faailoa mai ai ia i tatou le ala e sola ese ai. …
… Na faasino tonu lava e Isaia i le faamutaina o le pogisa ma le oo mai o le Tusi a Mamona [tagai Isaia 29:11–12]. …
Ma ua faapea ona amata ai le galuega ofoofogia, “o le galuega lava e ofo ai” lea na folafola mai e le Alii o le a ia faia. (Tagai Isa. 29:14.)
Talu mai le amataga o le toefuataiina mai o le talalelei e ala mai i le perofeta o Iosefa Samita, ua [faitau miliona] kopi o le Tusi a Mamona ua lolomiina ma tufatufaina atu. … E le mafaitaulia le aofai o Tusi Paia ua lolomiina, e sili mamao atu i le faitau aofai o isi galuega lomia uma. Ua ia i tatou foi le Mataupu Faavae ma Feagaiga ma le Penina Tautele. E le gata ua mafai ona tatou maua nei galuega taua o tusitusiga paia, ae ua tatou maua foi aoaoga atoa ma le agavaa e faaaoga ai ia mea pe afai tatou te faia, o nei aoaoga sa lilo i le tele o taimi o le talafaasolopito o le lalolagi.
Na silafia lelei e perofeta anamua e faapea afai e mavae atu le pogisa, ona oo mai ai lea o le malamalama. O loo tatou ola i lena malamalama—ae pe ua tatou malamalama atoatoa ea i ai? Ona o le faigofie naua ona tatou maua o aoaoga faavae o le faaolataga, ou te popole ai ona o loo i ai pea nisi ua faatoilaloina i le “loto moe gase, o mata latou te le vaai ai, ma taliga latou te le faalogo ai.” (Roma 11:8.)
… Ou te talosagaina i tatou uma ina ia iloilo ma le faamaoni a tatou taumafaiga e uiga i le suesueina o tusitusiga paia. O se mea masani le i ai o ni nai faitau o tusitusiga paia ua tatou iloa, e i ai foi i o tatou mafaufau, e pei ona sa i ai, ma o lea tatou te manatu sese ai e faapea ua tele naua mea e uiga i le talalelei ua tatou iloa. I lea la tulaga, o le maua o sina malamalama itiiti, e mafai lava ona avea moni ma se faafitauli. Ou te talitonu e i ai lava se taimi i o tatou olaga e tatau ai ia i tatou taitoatasi ona iloa tusitusiga paia mo i tatou lava—a e le na o le iloa i se taimi e tasi, a ia toe saga saili pea ia iloa ma saga iloa.4
E faalolotoina la tatou tautinoga e auauna atu i le Alii pe a tatou liliu atu i tusitusiga paia.
O le tala i le Tupu o Iosia i le Feagaiga Tuai o se tala sili lea ona aoga e “faatatau … ia i tatou lava.” (1 Ni. 19:24.) Ia te au lava ia, o se tasi lenei o tala pito sili o tusitusiga paia uma.
Sa na o le valu tausaga o Iosia ae amata lana nofoaiga ia sa Iuta, ma e ui sa matua amioleaga lava ona tupuaga moni, peitai ua ta’u mai e tusitusiga paia ia i tatou “na ia faia le amiotonu i luma o Ieova, ua ia savali foi i le ala uma o Tavita lona tama, e lei alu ese ai lava ia i le itu taumatau, po o le itu tauagavale.” (2 Tupu 22:2.) O se mea lenei tatou te ofo ai pe a tatou manatunatu atu o le vaitaimi tonu lava lea (toe lua augatupulaga a o lei faatafunaina Ierusalema i le 587 T.L.M.) na leiloloa ai tulafono a Mose ma sa matua leiloa lava, e oo lava i faitaulaga o le malumalu sa le maua i ai!
Ae i le sefulu ma le valu o tausaga o lana nofoaiga, na poloaiina ai e Iosia ia toe faafouina le malumalu. O ona po lava ia na maua ai e Hilikia, le faitaulaga sili le tusi o tulafono, lea na tuu e Mose i totonu o le atolaau o le feagaiga, ma auina atu i le Tupu o Iosia.
Ina ua faitau atu le tusi o tulafono ia Iosia, sa ia “saeia ona ofu” ma tagi i luma o Ieova.
“E tele lava le toasa o Ieova ia te i tatou,” o ana upu ia, “aua ua le faalogo o tatou tama i upu o lenei tusi ina ia faia ia tusa ma mea uma ua tusia mai ai ia te i tatou.” (2 Tupu 22:13.)
Ona faitau lea e le tupu le tusi i luma o tagata uma, ma i lea lava taimi na latou osia ai se feagaiga e usiusitai i poloaiga uma a le Alii ma o latou “loto atoa ma le agaga atoa.” (2 Tupu 23:3.) Ona faamama ai lea e Iosia le malo o Iuta, ua aveesea uma tupua ma mea sa latou tapuai i ai atoa ma mea maualuluga na faamu ai taulaga, faapea ma mea inosia uma sa faaputu mai i ona po o le nofoaiga a ona tama, ua faaleagaina le nuu atoa ma ona tagata. …
“E lei muamua ia te ia se tupu e tusa ma ia, o le na liliu atu ia Ieova ma lona loto atoa ma lona agaga atoa, ma lona malosi atoa, e tusa ma le tulafono uma a Mose; talu ai foi e lei tu mai se e tusa ma ia.” [2 Tupu 23:25.]
E malosi lava lo’u lagona ua tatau ia i tatou uma ona toe taliu atu i tusitusiga paia e pei ona sa faia e le Tupu o Iosia, ma avea na tusitusiga paia ia galue malosi i totonu ia i tatou, e uunaiina i tatou i se faanaunauga mausali e auauna atu i le Alii.
Sa na o le tulafono a Mose sa ia Iosia. Ua tatou maua i totonu o a tatou tusitusiga paia le talalelei a Iesu Keriso i lona atoatoa; ma afai e suamalie sina mea ititi e tofo i ai, o lona atoatoaga e maua ai le olioli.
E le o ta’ufaatauvaaina i tatou e le Alii ina ua ia tuuina mai ia i tatou nei mea, aua “o le ua foaiina atu i ai o mea e tele, e su’eina atu foi ia te ia o mea e tele.” (Luka 12:48.) O lo tatou mauaina o ia mea, o lona uiga ua ia te i tatou le tiutetauave mo na mea. E tatau ona tatou suesue i tusitusiga paia e tusa ma le poloaiga a le Alii (tagai 3 Ni. 23:1–5); ma e tatau ona tatou tuuina atu le avanoa e taitaiina ai e tusitusiga paia o tatou olaga atoa ma olaga o a tatou fanau.5
Tatou te aoaoina lesona o le olaga e ala i le suesueina o tusitusiga paia.
O lesona uma i amioga faatulagaina ma le olaga faaleagaga e tatau ai o loo maua i totonu o tusitusiga faavae. O iina o le a maua i ai taui o le amiotonu ma faasalaga o le agasala.6
E sili atu ona tatou saunia e aoaoina ma le mautinoa ia lesona o le olaga pe afai tatou te vaai i le taunuuga o le amioleaga ma le amiotonu i olaga o isi. … O le iloaina lelei o Iopu ma le masani lelei i ai, o le aoaoina lea e tumau i le faatuatua e ui i le matautia o faigata e oo mai. O le iloaina lelei o le malosi o Iosefa i le tamao aiga o Aikupito anamua ina ua faaosoosoina o ia e se fafine faatosina, ma iloa ai lenei alii talavou mama sa teteeina ia mana uma o le pouliuli sa ufitia ai lenei tau faaosooso, e mautinoa lava e tatau ona faamalosia ai le tagata faitau e tetee atu i se agasala faapea. O le iloaina o le onosai ma le malosi o Paulo ina ua ia tuuina atu lona ola i lana galuega, o le tuuina atu foi lea o le lototele ia i latou o e lagona ua faamanu’aina ma tofotofoina. Sa tele taimi sa sasaina ai o ia, sa faafalepuipuiina soo ona o le galuega, sa lata ina oti ina ua fetogia i maa, e faatolu ona masofa ona vaa, sa faoa ana mea, na toetoe a malemo, sa mafatia i le sese ma le le faamaoni o ona uso. A o matelaina i le fiaai, mole, maalili, leaga lavalava, sa tumau pea Paulo i lana galuega. E lei faaluafesasi o ia ina ua mavae ona oo atu le molimau ia te ia ina ua tuana’i lona aafiaga maoae. O le vaai atu i le tuputupu ae o Peteru i le talalelei a o agaigai atu o ia mai le avea ma se faifaiva maualalo—e le lava le tomai i le aganuu, e lei lava le aoaoina, ma e le malamalama, e pei ona latou faatulagaina ai o ia—sa tulai mai o se tagata maoae i le faatulagaina o mea, o se perofeta, o se taitai, o se tagata tomai i mataupu silisili, o se faiaoga. …
E mafai e a tatou fanau ona aoaoina ia lesona o le olaga e ala i le naunautai ma le malosi faaletagata o Nifae; o le amioatua o sa Nifae e toatolu; o le faatuatua o Aperaamo; o le mana o Mose; o le taufaasese ma le pepelo o Anania; o le lototele e lei faafiti e oo i le oti o sa Amona; o le faatuatua e le mafaatusalia o tina sa Lamana na tuufaasolo atu i a latou fanau tama, lea sa matuai malosi ma sa faasaoina ai le autau totoa a Helamana. E leai ma se tasi na oti i lena taua.
I tusitusiga paia uma e toeitiiti lava o vaivaiga uma ma malosiaga uma o le tagata o loo faaalia mai ai, ma o loo tusia ai foi taui ma faasalaga. O se tasi na te le aoaoina ia ola tatau i lenei olaga mai lona faitau i ai, e matua faamaonia lava lona tauaso. Ua fetalai mai le Alii, “E suesue outou i tusi, aua ua outou manatu tou te maua ai le ola e faavavau: o tusi foi ia o loo molimau ia te au.” (Ioane 5:39.) Ma o le Alii lava lenei ma le matai, o lona soifuaga tatou te maua i ai uiga lelei uma: o le amioatua, malosi, puleaina, atoatoa. E mafai faapefea e tamaiti o le vasega ona suesueina lenei tala maoae e aunoa ma le le pueina o sina vaega i o latou lava olaga?7
O iinei [i tusitusiga faavae] o loo i ai talaaga o soifuaga o perofeta ma taitai ma le Alii lava ia, o loo tuuina mai ai faataitaiga ma le taitaiga ina ia mafai e tagata, e ala i le mulimuli i na faataitaiga, ona faaatoatoaina, fiafia, tumu i le olioli, ma avea le faavavau ma a latou sini ma faamoemoega.8
O loo avanoa le malamalama faaleagaga mo i latou uma o e suesueina ma sailia ia tusitusiga paia.
O loo toatele pea le Au Paia e le o faitauina ma manatunatu loloto i tusitusiga paia e le aunoa, ma e itiiti lava lo latou malamalama o maua e uiga i faatonuga a le Alii i le fanauga a tagata. E toatele ua papatisoina ma maua ai se molimau, ma ua latou “i ai i lenei ala sa’o ma le vaapiapi,” ae ui i lea, ua toilalo e laasia se isi laasaga manaomia—ina ia “fetaomi atu i luma, o fiafia i le afioga a Keriso, ma tumau e oo i le iuga.” (2 Ni. 31:19, 20; ua faatusilima mea e faamamafa.)
E na o e faamaoni o le a mauaina le taui folafolaina, o le ola lea e faavavau. Aua e leai se tasi na te maua le ola faavavau e aunoa ma le avea ma se e “anaana i le upu” (tagai Iakopo 1:22) ma le lototoa e usiusitai i poloaiga a le Alii. Ma e le mafai ona avea se tasi ma se e “anaana i le upu” e aunoa ma le muai avea ma se “e faalogo.” Ma ina ia avea ma se “e faalogo” e le na o le tu faasamasamanoa ma faatalitali mo ni faatonuga; ae alu atu o ia e saili ma aoao ma tatalo ma malamalama i ai. O le mea lea ua feta-lai mai ai le Alii, “Ai se le faalogo i lou leo e le masani ma lou leo, ma e le a au ia.” (MFF 84:52.)9
Ua aoaoina au i le tele o tausaga e faapea afai o le a tatou sailia ma le naunautai lenei sini aoga faaletagata [ia suesueina tusitusiga paia] i se tulaga naunautai ma le malamalama, e tatau ona tatou mauaina ia tali i o tatou faafitauli ma le filemu i o tatou loto. E ao ona tatou iloa le faalauteleina e le Agaga Paia o lo tatou malamalama, maua ni manatu fou, molimauina se faatulagaga o le faailoaina mai o mau uma; ma e ao ona oo mai aoaoga faavae a le Alii ina ia sili atu lona uiga ia i tatou nai lo le mea na tatou manatu e mafai. O se taunuuga, e ao ona tatou maua le atamai sili atu lea e taitaiina ai i tatou lava ma o tatou aiga.10
Ou te talosaga atu i tagata uma ina ia amata nei ona suesueina ma le maelega ia tusitusiga paia, pe afai tou te lei faia nei.11
A o tatou faatofuina i tatou lava i tusitusiga paia, o le a tatou iloa ma alolofa ai i le Tama Faalelagi ma Iesu Keriso.
Ua ou iloaina a ou manatu faatalale i le ma fesootaiga ma le e paia, ma a oo ina foliga mai e le o faafofoga mai le Atua ma leai se siufofoga paia o fetalai mai, o lona uiga ua ou matua mamao, mamao ese lava. Afai ou te faatofuina au lava i tusitusiga paia, ona vaapiapi ai lea o le va ma toe foi mai le faaleagaga. E faateleina ai lo’u alofa ia i latou e tatau ona ou alofa i ai ma lo’u loto atoa ma le mafaufau atoa ma le malosi atoa, ma o le faateleina o lo’u alofa ia i latou, e faigofie ai ona ou tumau i a latou apoapoaiga.12
Ua ou iloaina e na o le pau le mea e manaomia ona ou faia e faateleina ai lo’u alofa mo lo’u Foafoa ma le talalelei ma le Ekalesia atoa ma o’u uso o le faitauina lea o tusitusiga paia. Ua tele itula ua ou faaaluina i tusitusiga paia. … Ou te le malamalama pe mafai faapefea e se tasi ona faitau i tusitusiga paia a e le faatupuina ai se molimau e uiga i le paia o nei tusitusiga faapea ma le galuega a le Alii, o le o loo avea ma fofoga fetalai i tusitusiga paia.13
E toaitiiti lava tagata mai le fia piliona o loo i [luga] o le fogaeleele e mafai ona savavali faatasi ma le Atua e pei ona faia e Atamu ma Aperaamo ma Mose, ae peitai, i le lalolagi o loo tatou nonofo ai, o loo maua ai tusitusiga paia e toetoe lava o tagata uma, lea e mafai ai e tagata ona matuai masani lelei ma lo latou Tama Faalelagi, o lona Alo o Iesu Keriso, faapea ma aiaiga ma avanoa ma faamoemoega o le ola faavavau.14
E leai se aofaiga o suesuega e faia e le tagata faapea, e mafai ona sailia ai le Atua, ae ua ia faaalia mai o ia lava i ana auauna perofeta, ma ua latou aoao mai ai ia i tatou lona natura. E mafai ona tatou maua se faamautinoaga o le upumoni e ala i a tatou lava anapogi ma tatalo. E ui i le vevesi mai o talitonuga faalelotu o loo siomia ai i tatou, e mafai lava ona tatou fifilemu i le totonugalemu o na fevesiaiga, i le malamalama mautinoa lea o le Tama ma le Alo na maua mai tusitusiga paia anamua ma ona po nei ma faamautuina e le Agaga. O le malamalama lenei tatou te maua ai le faamoemoe i le ola faavavau.15
Fautuaga mo Suesuega ma Aoaoga
Mafaufau i manatu nei a o e suesueina le mataupu po o lou saunia foi e aoao atu. Mo nisi fesoasoaniga faaopoopo, tagai i itulau v–ix.
-
Manatunatu loloto i tala o loo i itulau 69–71. E faapefea ona aafia oe i nei tala? Ia fesili ifo ia te oe lava po o a mai lou faitauina, malamalama, ma le faaaogaina o tusitusiga paia. Manatunatu i au lava sini faaletagata mo le suesueina o tusitusiga paia.
-
A o e iloiloina le vaega o loo amataina i le itulau 71, ia vaai faalemafaufau i lou olaga e aunoa ma tusitusiga paia. Na semanu e ese faapefea lou olaga? O a nisi o taunuuga o le “faatalale naua” i tusitusiga paia?
-
Aisea e le lava ai le na o le maua o ni nai mau o tusitusiga paia e fiafia i ai e “manatua i o tatou mafaufau”? (itulau 72–73). O le a sou manatu o le a le uiga o le sailia o tusitusiga paia mo oe lava ma “saga saili pea ia iloa ma saga iloa”?
-
Na uunaiina i tatou e Peresitene Kimball ina ia faatatauina le tala i le Tupu o Iosia ia i tatou lava (itulau 73–74; tagai foi 2 Tupu 22–23). O a mea e tutusa ai ma eseese ai tou te iloaina atu i le va o lou olaga ma olaga o le Tupu o Iosia ma ona tagata?
-
Mafaufau i nisi o “lesona o le olaga” na e aoaoina e ala i le suesueina o tusitusiga paia. (Mo nisi faataitaiga, tagai itulau 74–76.)
-
Toe iloilo le parakalafa lona lua o loo i le itulau 76. O a nisi o fuaitau faatusipaia na fesoasoani ia te oe e tali atu ai i ou faafitauli ma le filemu i lou loto?
-
Faitau ia parakalafa muamua ma le lua o loo i le itulau 77–78. Ua faapefea ona aafia le lua sootaga ma le Atua i lau suesueina o tusitusiga paia? o au fesootaiga ma tagata o lou aiga? o lau auaunaga i tofiga faaleEkalesia?
Mau e Faatatau I Ai: Amosa 8:11–12; 1 Nifae 19:23; Alema 37:8; MFF 1:37; 18:33–36
A o avea ma se alii talavou, sa naunau lava Spencer W. Kimball e faitau le Tusi Paia atoa.
“Ou te talitonu e i ai lava se taimi i o tatou olaga e tatau ai ia i tatou taitoatasi ona iloa tusitusiga paia mo i tatou lava—a e le na o le iloa i se taimi e tasi, ae saga saili pea ia iloa ma saga iloa.”