Mataupu 3

O Iesu Keriso: O Lo’u Faaola, O Lo’u Alii

O Iesu Keriso o le Alo o le Atua ma o le Faaola o tagata, ma e mafai ona tatou maua faamanuiaga uma na Ia soifua ma maliu, ina ia tuuina mai ia te i tatou.

Mai le Soifuaga o Spencer W. Kimball

I popofou o lana auaunaga o se Aposetolo, na faatolu ai ona mafatia Elder Spencer W. Kimball i le gasegase o le fatu i totonu o se vaitau pe tusa ma le lua vaiaso. Ina ua mavae le latalata i le fitu vaiaso o le toe faasolosolo manuia ai i le fale, sa ia “amata ona sailia se auala e solaese ai mai lona nofo ai pea i le fale.” Sa ia fuafua o le a alu e malolo i ana uo Navajo i le setete o Niu Mekisiko.¹

“I se tasi taeao i lenei vaitaimi o le sailiili matagi mo se malosi, sa iloa ai ua leai se isi i le moega o Elder Kimball. Sa manatu o loo alu sana savalivaliga i le taeao ma e toe foi mai mo le taumafataga o le taeao, o lea sa faia ai pea lava tiute o i latou sa vaaia o ia. Ae ina ua ta le 10:00 i le taeao e le’i toe foi ane lava o ia, sa amata loa ona popole i latou. Sa amata loa se sailiga.

“Sa iu ina ua maua atu o ia i nai maila e mamao ese i lalo o se paina. Sa taatia lana Tusi Paia e sosoo ane ia te ia, o loo susue i le mataupu mulimuli o le tusi a Ioane. Sa moeiini ona mata, ma ina ua oo atu tagata na sailia o ia i le mea o loo nofonofo ai, sa leai ma sona minoi e pei lava o le taimi muamua na latou iloa atu ai o ia.

“Ae peitai, o o latou leo atuatuvale na te’i ai o ia, ma ina ua ea a’e o ia i luga sa mafai ona latou iloa atu ia loimata i ona alafau. Na tali atu o ia i a latou fesili, ‘I le [lima] tausaga talu ai sa valaauina ai au e avea ma se Aposetolo a le Alii o Iesu Keriso, ma ou te manao e faaalu lenei aso e mafuta ai ma Ia, o a’u lava o Lana molimau.’ ”²

Na tuuina atu “pea lava pea”³ le molimau a Peresitene Kimball i le paia o le Faaola. Na ia tautino atu: “E tusa lava po o le a le tele o mea tatou te tautalagia ia te ia, ae laitiiti lava.”⁴ Ma o le lelei o le soifuaga o Peresitene Kimball na fetaui lelei ma le mana o lana molimau. Na matauina e Elder Neal A. Maxwell o le Korama a Aposetolo e Toasefululua: “O Peresitene Kimball o le tagata o le Alii ae le o se isi. O ona faanaunauga loloto o le auauna atu lea i le Alii, ma sa musu o ia e suia ona o nisi manatunatuga.”⁵

Aoaoga a Spencer W. Kimball

E sili atu nai lo na o se faiaoga maoae, o Iesu Keriso o le Alo o le Atua soifua ma le Faaola o tagata.

I totonu o le mekasini o le Time, i se lomiga talu ai nei, na sii mai ai e se polofesa lauiloa i se tasi o a tatou iunivesite tele lava se faamalamalamaga umi. Na ia faamatalaina o Iesu o Nasareta na ia tuuina mai le mafanafana faaletagata soifua; o se alofa faateleina; o se malamalama tulaga ese. Na ia faaigoaina o ia o se tagata sili ona magafagafa mo le lelei o isi, o se faiaoga maoae, o se tusitala ofoofogia. O se faamatalaga feliua’i e masani ai, na ia faamatala ai e faapea e lei oti Lasalo, ae sa na ona “… faafoi mai lava e Iesu ‘le ola maloloina’, le mana o le mafaufau ma le aoaoina, ma le ‘vaifofo o lona lava malosi!’ ”

Ou te fia tuuina atu la’u molimau i lenei aso o Iesu sa le gata o se faiaoga maoae, o se tagata sili ona magafagafa mo le lelei o isi, ma se tusitala ofoofogia, ae o ia moni lava o le Alo o le Atua Soifua, o le Foafoa, o le Togiola o le lalolagi, o le Faaola o tagata uma.⁶

Ou te iloa o Iesu o le Keriso, o le Alo o le Atua soifua. Ou te iloa lena mea.⁷

Na faailoa mai e le Keriso o ia lava o le Alii le Atua e Ona le Malosi Uma, o Keriso le Alii, o le amataga ma le faaiuga, o le Togiola o le lalolagi, o Iesu le Keriso, o le malosi o Isaraelu, o le Foafoa, o le Alo o le Atua Soifua, o Ieova.

Na folafola mai e le Tama o Elohima e faapea o Iesu O Lona lava Alo, o le upu a lo’u mana. E le itiiti ifo ma le faalua, i le papatisoga i Ioritana ma luga o le Mauga o Liua, na ia faailoa mai ai:

“O lo’u Atalii pele lenei ou te fiafia ia te ia” (tagai Mareko 1:11; Luka 3:22) ma fetalai mai faapea “na faia lalolagi e ia: Na faia tagata e ia: Na faia foi mea uma e ia, e mai ia te ia, ma e a ia lava.” [Tagai MFF 93:10.]⁸

Tatou te molimau faatasi ma Ioane le Papatiso, o le, a o ia vaaia le latalata atu o le Alii ia te ia, sa ia faapea atu: “… Faauta i le Tamai Mamoe a le Atua, na te aveesea agasala a le lalolagi.” (Ioane 1:29.) E le na o se tagata soifua, ae o le Tamai Mamoe a le Atua.

Tatou te molimau atu faatasi ma Natanielu, o se tagata Isaraelu sa leai se faa’ole’ole: “… Rapi e, o oe lava o le Alo o le Atua, o oe lava le Tupu o Isaraelu.” (Ioane 1:49.) Ua le na o se faiaoga maoae, ae o le Alo lava o le Atua.

Tatou te toe molimau atu foi faatasi ma Ioane le Pele, o le na vaai ia Iesu i le auvai, o faapea atu ma le talitonu a’ia’i, “O le Alii lea!” [Tagai Ioane 21:7.] E le na o se tagata e magafagafa mo le lelei o isi, ae o le Alii le Atua o le lagi.

E faapea foi ia Simona Peteru, o le, ina ua fesiligia e le Alii, “A o outou, pe se a la outou upu ia te au, po o ai?” ae tali, “O oe o le Keriso, o le Alo o le Atua soifua,” (Mataio 16:15, 16), ma maua ai le fetalaiga lenei mai le Faaola: “… Amuia oe Simona Paiona, aua e le se tagata na ia faaali atu ai ia te oe, a o lo’u Tama o i le lagi.” (Mataio 16:17.)

Ma le vaega mulimuli, tatou te molimau atu faatasi ma le Perofeta o Iosefa Samita o le na naunau e tuuina atu lona soifua mo lana molimau.⁹

Ou te iloa o Iesu Keriso o le Alo o le Atua soifua ma na faasatauroina o Ia mo agasala a le lalolagi. O Ia o la’u uo, o lo’u Faaola, o lo’u Alii, ma lo’u Atua.¹⁰

O le galuega a le Faaola e oo atu i le faavavau—o le taimi ua tuanai, o le taimi nei, ma le lumanai.

Ou te fia … molimau atu e faapea o [Iesu Keriso] e le gata sa soifua i le vaeluaga o aso pe tusa ma le tolusefulutolu tausaga, ae sa soifua o ia i le faavavau a o lei oo i lea taimi, ma o le a tatou ola uma foi i le faavavau e sili atu; ma ou te molimau atu faapea sa le gata o ia sa faatulagaina le malo o le Atua i le lalolagi, ae o le Foafoa foi o lenei lalolagi, o le Togiola foi o tagata.¹¹

O Iesu Keriso o le Atua o le Feagaiga Tuai, ma o Ia lea sa fagatua ma Aperaamo ma Mose. O Ia lea sa musuia Isaia ma Ieremia; o Ia lea na valoia e auala mai i na alii filifilia ia mea e tutupu i le lumanai, e oo lava i le toe aso ma le toe itula.¹²

O Ia lava lea, o Iesu Keriso, lo tatou Faaola, o le sa faailoaina atu i le au faalogologo na tetei i Ioritana (tagai Mataio 3:13–17), i le Mauga paia o Liua (tagai Mataio 17:1–9), i le malumalu o sa Nifae (tagai 3 Ni. 11–26), ma le togavao i Palamaira, Niu Ioka [tagai Talafaasolopito—Iosefa Samita 2:17–25]; ae o le tagata na faailoaina mai e leai lava se tasi nai lo lona lava Tama, le Elohima paia, o ona foliga o loo ia te ia ma sa ia tauaveina foi lona finagalo.¹³

Ou te iloa o loo soifua le Alii ma ou te iloa o loo ia faaalia mai lona mafaufau ma lona finagalo ia i tatou i aso taitasi, ina ia mafai ona musuia i tatou po o fea le itu tatou te o i ai.¹⁴

O ia le maatulimanu autu. O Ia le faaao o le malo—o ona soo nei—o lana Ekalesia lenei—o ana aoaoga faavae ma ana sauniga nei—o ana poloaiga nei.¹⁵

O loo tatou tulimatai atu nei i lona afio mai faalua e pei ona ia folafola mai. O lenei folafolaga o le a faataunuuina lava e pei o le tele o isi ana folafolaga, ae o le taimi nei, tatou te viia lona suafa paia ma auauna atu ia te ia, ma tuuina atu le molimau i le paia o lana misiona, faatasi ma perofeta o augatupulaga! …

Ou te iloa o Iesu, mai lava i le vavau e oo i le faavavau, o le Foafoa, o le Togiola, o le Faaola, o le Alo o le Atua.¹⁶

O Lana Togiola, ua laveaiina ai e Iesu Keriso tagata uma mai aafiaga o le Pau ma laveaiina le tagata ua salamo mai ana agasala.

O’u uso e ma tuafafine peleina, o loo soifua le Atua, ma e tuuina atu ai la’u molimau i ai. O loo soifua Iesu Keriso, ma o ia o le faapogai o le ala moni o le ola ma le faaolataga.

O le savali lenei a le Ekalesia a Iesu Keriso o le Au Paia o Aso e Gata Ai. O le savali sili lea ona taua i le lalolagi i aso nei. O Iesu Keriso o le alo o le Atua. Na filifilia o Ia e le Tama e avea ma Faaola o lenei lalolagi.¹⁷

Ina ua ‘ai ma le faamoemoeina ma le poto e Atamu ia le fua o le laau na faasaina i le Faatoaga o Etena, na ia aumaia i luga o i tatou uma, o ana fanau ni oti se lua—o le oti o le tino po o le “oti faaletino,” ma le oti faaleagaga po o le tuliesea lea mai le afioaga o le Alii.¹⁸

I le ata faataatia paia a le Atua, na faia ai se fuafuaga mo se togiola na te motusia ia noataga o le oti, ma o le toetu, e mafai ai ona toe faatasia ia agaga ma tino o tagata uma o e nonofo ai i le lalolagi.

O Iesu le Nasareta o ia lea na filifilia, a o lei foafoaina le lalolagi, e sau i le lalolagi e faatinoina lea auaunaga, ina ia faatoilaloina le oti faaletino. O lenei galuega faatino o le a togiola ai mo le pau o Atamu ma Eva ma faatagaina ai le agaga o le tagata ina ia toe maua lona tino. O lea e toe faatasia ai le tino ma le agaga.¹⁹

O lenei toetutu ua faatatau lea i le galuega a Iesu Keriso, le Faaola, aua sa faaletino o ia (o le tama a Maria) ma faalelagi (o le Alo o le Atua), o le sa mafaia ona faatoilaloina ia mana o loo pulea ai le tino. Sa ia tuuina atu lona lava ola ma toe maua mai e avea ma “uluai fua,” e mulimuli i ai agaga uma o e ola ai [tagai 1 Korinito 15:22–23]. O le avea ma se atua, na ia foaiina atu ai lona ola. E leai se tasi na mafai ona aveeseina mai ia te ia. Sa ia atiina ae, e ala i lona atoatoa i le faatoilaloina o mea uma, le mana e toe maua ai lona lava ola. O le oti o lona fili mulimuli lea, ma na ia faatoilaloina foi ma faavaeina ai le toetutu.²⁰

Talu ai ona o le meaalofa a le Tama Faalelagi o Lona Alo lea, ua mafai ai e tagata uma—i le taimi ua tuanai, o le taimi nei, ma le lumanai—ona toe foi atu e mau faatasi ma Ia o le Tama o o tatou agaga. Ae ina ia mautinoa e mafai ona tupu lena mea, sa moomia muamua ai lava e Iesu ona afio mai i le lalolagi i la le tino ina ia aoaoina tagata e ala i Ana faataitaiga i le ala sao e ola ai ona naunau lea e foaiina atu Lona ola, ma o se auala faavavega, sa ia taliaina ai le avega mo agasala a tagata.²¹

O le faamamaina mai le agasala semanu e le mafai ae ua mafai ona o le salamo atoatoa o le tagata ma le alofa tunoa agalelei o le Alii o Iesu Keriso i lana taulaga togiola. E na o le pau ia o auala e mafai ai e le tagata ona toe faaleleia, faamaloloina ma faamamaina ma fufuluina, ma mafai ai lava ona agavaa mo mamalu o le faavavau. E tusa ai ma le maoae o le matafaioi a le Faaola i lenei mea, na faamanatu atu ai e Helamana i ona atalii ia upu a le Tupu o Peniamina:

“… E leai se isi ala po o se tasi mea e mafai ona faaolaina ai tagata, a e na o le toto togisala o Iesu Keriso, o Le afio mai, ioe, ia oulua manatua e afio mai o ia e togiola le lalolagi.” (Hel. 5:9.)

Ma, i le toe manatuaina o upu na tautala atu ai Amoleka ia Seseroma, na toe faamamafa atu ai e Helamana le vaega a le tagata e fai mo le mauaina o le faamagaloga—o le salamo mai ana agasala:

“… Aua na ia fai atu ia te ia e moni e afio mai le Alii e togiola lona nuu, ae le afio mai o ia e faaola i latou ai a a latou agasala, ae peitai, e faaolaina i latou mai a latou agasala.

“Ma ua foaiina mai ia te ia le pule mai le Tama e togiola a’i i latou ai a latou agasala ona o le salamo.…” (Hel. 5:10–11. Ua faatusilima mea e faamamafa.)²²

Na maliu [le Faaola] o se togiola mo a tatou agasala ina ia tatalaina ai le ala mo lo tatou toetutu, e faasino mai ai le ala e faaatoatoaina ai o tatou olaga, e faaali mai ai le ala i le faaeaga. Na maliu o Ia e tusa ai ma lona lava finagalo ma lona lotofuatiaifo. Na fanau mai o Ia i se ala faatauvaa, na atoatoa lona soifua, na matua faagaeetia naua ana faaaoaoga; o lona maliu na tatalaina mai ai faitotoa, ma na tuuina mai ai i le tagata meaalofa lelei uma faapea ma faamanuiaga.²³

Ina ia mauaina faamanuiaga uma o le Togiola a le Faaola, e tatau ona tuufaatasia a tatou taumafaiga ma Ia.

E tofu lava le agaga ma le filifiliga saoloto. E mafai ona maua e ia o faamanuiaga uma na soifua ai Keriso ma maliu ina ia maua e ia. Ae o le a le aoga le maliu o Keriso ma lana fuafuaga pe afai tatou te le faaaogaina: “Aua faauta, o au le Atua na puapuagatia i nei mea mo tagata uma, ina ia latou le puapuagatia pe afai latou te salamo” (MFF 19:16).

Na afio mai le Faaola ina “ia faataunuu le faaofuina o le tagata i le tino ola pea ma le ola faavavau” (Mose 1:39). Na aumaia e ala i lona fanau mai, lona maliu, ma lona toetu le tino ola pea. Ae ui i lea, e ao ona tuufaatasi a tatou taumafaiga, ina ia faataunuuina ai le vaega lona lua, o le mauaina lea o le ola faavavau.²⁴

Pe a tatou mafaufau atu e uiga i le taulaga sili ona maoae a lo tatou Alii o Iesu Keriso ma puapuaga na ia onosaia mo i tatou, o le a avea i tatou ma ni tagata e le loto faafetai pe afai tatou te le talisapaia lana taulaga e tusa ai ma so tatou mafaia i le malosi o loo ia i tatou. Sa puapuagatia o ia ma maliu mo i tatou, ae peitai afai tatou te le salamo, o lona uiga o le a leai se aoga o ona tiga ma ona mafatiaga uma ona o i tatou.²⁵

O ona puapuaga a o lumanai le satauro faapea ma luga o le satauro ma lana taulaga silisili e mafai ona avea ma sina mea faatauvaa po o le leai o se uiga ia i tatou, sei vagana ua tatou ola i ana poloaiga. Aua na ia fetalai mai:

“… Se a ea le mea e ta’ua ai au e outou, le Alii e, le Alii e, ae tou te le faia mea ou te fai atu ai?” (Luka 6:46.)

“Afai tou te alofa mai ia te au, ia outou tausi mai i a’u poloaiga.” (Ioane 14:15.)²⁶

O tagata e iloa le Atua ma alolofa ia te ia ma ola i ana poloaiga ma usiusitai i ana sauniga moni, a le o lenei olaga po o le olaga a sau o le a mafai ai, ona vaai i ona fofoga ma iloa ai o loo soifua o ia ma latou fagatua ai.²⁷

Tatou te talitonu, ma o la tatou molimau, ma e tatou te talai atu i le lalolagi “e leai se tasi igoa e foaiina mai, po o se tasi ala e oo mai ai le olataga i le fanauga a tagata, ua na o le suafa lava o Keriso, le Alii e Pule Aoao” (Mosaea 3:17).

Tatou te iloa, ma o la tatou molimau foi, ma e tatou te talai atu foi i le lalolagi e faapea, ina ia faasaoina tagata, e tatau ona “talitonu sa i ai le olataga, ma ua i ai nei, e oo mai ai foi atali ona o le togisala o le toto o Keriso, le Alii Pule Aoao” (Mosaea 3:18).

O lea, e faapei o Nifae, “ua matou galulue ma le maelega ina ia tusitusi e faaoleole i a matou fanau, atoa ma o matou uso, ia talitonu ia Keriso, ma ia lelei ma le Atua, aua ua matou iloa e faaolaina i tatou i le alofa tunoa pe a uma ona faia mea uma tatou te mafaia. …

“Ua matou tautalatala ia Keriso, ua matou olioli ia Keriso, ua matou talai atu Keriso, ua matou vavalo atu foi ia Keriso, ua matou tusitusi e tusa ma a matou valoaga, ina ia iloa e a matou fanau le mea latou te faamoemoe ai mo le faamagaloina o a latou agasala.” (2 Ni. 25:23, 26; ua faatusilima mea e faamamafa.)²⁸

Tatou te faafiafiaina le Alii pe a tatou ola i Lana talalelei.

E mafai ona ou vaai faalemafaufau atu i le Alii o Iesu Keriso [i le taimi o lana galuega i la le tino,] o soisoi fiafia a o ia silasila ifo i tagata i lo latou naunautai. …

… Ou te manatu e soisoi fiafia le Alii o Iesu Keriso pe a silasila ifo i fale o nei tagata ma iloa atu i latou o loo tootutuli i o latou tulivae ma tatalo atu i le afiafi ma le taeao, o loo auai ai foi ma le fanau. Ou te manatu e soisoi fiafia o ia pe a silasila atu i tane ma ava talavou, ma e foi ua matutua, o loo i ai lagona loloto o le alofa o le tasi i le isi, o e o loo faaauau pea a latou faamasaniga …, o e o loo faaauau pea ona alofa atu le tasi i le isi ma o latou agaga atoa seia oo i le aso latou te oti ai ma faaauau ai pea lena alofa e oo atu i le faavavau.

Ou te manatu e fiafia o ia i aiga o e ositaulaga ma fetufaai atu. … Ou te manatu o loo soisoi fiafia le Alii o Iesu Keriso pe a ia silasila ifo i lalo ma iloa ai le [fiaafe] o e sa le i toaaga i le tausaga ua mavae, ae o le taimi nei ua latou fiafia i le malo, o le toatele o i latou o e ua uma ona ulufale atu i le malumalu o le Atua ma maua o latou faaeega paia ma o latou faamauga, ma sa faafetai atu ma loimata o le lotofaafetai i le Alii mo lana polokalama.

Ou te manatu ua ou iloa atu ia loimata o le olioli i ona fofoga ma se ataata i lona laufofoga a o ia silasila mai … i agaga fou o e ua o mai ia te ia i lenei tausaga, o e ua tauaveina lona suafa, o e ua ulu ifo i le vai o le papatisoga, ma ou te manatu e alofa foi o ia i a i latou o e na fesoasoani e faaliliuina i latou.

Ua ou iloa atu lona soisoi fiafia a o ia silasila atu i le anoanoai o tagata o loo tootutuli ua salamo, ua suia o latou olaga, ua tele atu lo latou susulu ma lo latou mama, ma saga avea atili ai e faapei o lo latou Tama Faalelagi, ma lo latou Uso/Tuagane, o Iesu Keriso.

Ou te manatu o loo fiafia ma soisoi o ia a o ia silasila ifo i le autalavou a o latou faatulagaina o latou olaga ma puipuia ma faamalolosia i latou e tetee atu i mea sese o o latou aso. Ou te manatu na muamua faanoanoa o ia, ona fiafia lea, ina ua ia silasila ifo, atonu sa ia faia faapena i ni nai aso ua mavae i totonu o lo’u ofisa, sa i ai se ulugalii talavou o e sa faia se mea sese matuia ae ua la tootutuli faatasi nei ma o la lima ua matuai uulima faatasi. Atonu sa i ai le olioli i lana ataata ina ua ia silasila ifo i o la’ua agaga ma iloa ai lo la faia o se fetuunaiga, a o faapea ona susu lo’u lima i o la loimata a o o’u tuuina atu i luga o o la lima.

Ou te alofa i le Alii o Iesu Keriso. Ou te faamoemoe e mafai ona ou faaali atu ia te ia ma faailoa atu lo’u faamaoni ma le naunautai. Ou te fia ola e latalata atu ia te ia. Ou te fia faapei o ia, ma ou te tatalo o le a fesoasoani le Alii ia i tatou uma ina ia mafai ona faapei i tatou uma o soo sa Nifae ina ua ia fetalai atu i ai, “O lea foi, pe faapefea la outou amio e tatau ai?” ma sa ia toe taliina lana lava fesili i le faapea atu, “E pei lava o au nei.” (3 Nifae 27:27.)²⁹

O le Togiola e tuuina mai ai ia i tatou le faamoemoe i lenei olaga ma le faavavau o loo i o tatou luma.

O loo i ai so tatou faamoemoe ia Keriso iinei ma le taimi nei. Na ia maliu mo a tatou agasala. O ia ma lana talalelei, ua fufulu ese ai a tatou agasala i le vai o le papatisoga; o le agasala ma le amioleaga ua susunu ese mai o tatou agaga e pei na susunuina i se afi; ma ua faamamaina ai i tatou, ua maua ai ni manatu mama, ma maua ai lena filemu lea e silisili i mea uma e manatu i ai. (Tagai Filipi 4:7.)

O le ola ai i tulafono o lana talalelei, tatou te maua ai le manuia faaletino ma le faatumauina o le maloloina o le tino ma le malosi o le mafaufau. Ua faamanuiaina i tatou e le talalelei i aso nei.

Ae o le aso ua na o si vaega itiiti o le faavavau, e pei o sina fasi oneone i le [toafa o] Sahara. O loo i ai foi so tatou faamoemoe ia Keriso mo le faavavau lea o loo i o tatou luma atu; a leai, e pei ona fai mai Paulo, semanu ua “sili lo tatou malaia i tagata uma lava” (1 Kor. 15:19).

Semanu e maeu so tatou faanoanoa—ma e matuai sa’o lava—pe a na fai e leai se toetutu! Semanu e maeu so tatou malaia o le a i ai pe a na fai e leai se faamoemoe i le ola faavavau! Afai o lo tatou faamoemoe mo le faaolataga ma le taui o le ola faavavau e tatau ona mou ese atu, semanu e sili atu lo tatou malaia nai lo i latou o e le’i i ai lava se faamoemoe faapea.

“A o lenei ua toe faatuina mai Keriso i e ua oti, ua avea ma faapolopolo o e ua momoe” (1 Kor. 15:20).

O lenei, o aafiaga o lona toetu e ao ona oo atu i luga o tagata uma, “aua faapei ona oti uma ia Atamu, e faapea foi ona faaolaina uma ia Keriso” (1 Kor. 15:22).

O lenei “e faapei ona foliga o i tatou i lē faaleeleele, e faapea lava ona foliga o i tatou i lē faalelagi” (1 Kor. 15:49).

O lenei ua saunia se auala ina ia “ofu foi lenei tino iu vale i le … tino ola pea, e ofu foi lenei tino oti … i le tino e le oti lava, ona taunuu ai lea o le upu na tusia, Ua faaumatia le oti i le manumalo” (1 Kor. 15:54). …

O loo i ai so tatou faamoemoe e faavavau ia Keriso. Ua tatou iloa o lenei olaga ua tuuina mai e saunia ai i tatou mo le faavavau, “ma o lea lava mafutaga foi o loo ia i tatou iinei o le a ia i tatou foi iina, a e faaopoopoina i ai le mamalu faavavau, o le mamalu lea tatou te lei maua nei” (MFF 130:2).³⁰

Fautuaga mo Suesuega ma Aoaoga

Mafaufau i manatu nei a o e suesueina le mataupu po o lou saunia foi e aoao atu. Mo nisi fesoasoaniga faaopoopo, tagai i itulau v–ix.

Faitau le tala o loo i le itulau 27. O a ni auala e mafai ai ona tatou faalatalata atu i le Alii ma “faaaluina lenei aso” e faatasi ai ma Ia, e pei ona faia e Peresitene Kimball?
Toe iloilo itulau 28, ma vaai ai mo suafa ma faalaniga na faaaoga e Peresitene Kimball mo Iesu Keriso. O a suafa ma faalaniga mo Iesu Keriso e faapitoa sona uiga ia te oe, ae aisea foi? E faapefea ona e tali atu i se tasi o le e faapea mai o Iesu sa na o se faiaoga maoae?
Manatunatu i le molimau a Peresitene Kimball i le misiona i le muai olaga, o le olaga faaletino, ma le olaga i talaatu o le olaga faaletino a le Faaola (itulau 29-30). Mafaufau i mea e ono mafai ona e faia ina ia faalolotoina ai lau molimau i le misiona a le Faaola.
Suesue itulau 30–33, e vaai ai mo mafuaaga tatou te moomia ai se Faaola. O le a se eseesega ua faia e le Togiola a Iesu Keriso i lou olaga?
I itulau 28–33, na molimau mai ai Peresitene Kimball i mea na faia a le Faaola mo i tatou. I itulau 34–37, tatou te aoao ai i mea e tatau ona tatou faia ina ia maua ai faamanuiaga uma o le Togiola. O a ou lagona a o e faatusatusaina mea na faia e le Faaola mo i tatou ma mea ua Ia talosaga mai ia i tatou e fai?
Toe iloilo manatunatuga o Peresitene Kimball i le auala e mafai ona tatou faafiafiaina ai le Alii (itulau 35–36). Mafaufau i lagona e oo ia te oe pe a e iloa o loo fiafia le Alii ia te oe.
Na aoao mai Peresitene Kimball e mafai ona tatou maua se faamoemoe ia Keriso e le gata mo le taimi nei ae mo le faavavau o loo i o tatou luma atu (itulau 36–37). E faapefea ona suia olaga o tagata pe a i ai so latou faamoemoe ia Keriso?

Mau e Faatatau I Ai: Ioane 14:6, 21–23; 2 Nifae 9:5–13, 21–23; Moronae 7:41; 10:32–33; MFF 19:15–19

Jesus Christ — “Ou te iloa o Iesu o le Keriso, le Alo o le Atua soifua.”

resurrected Christ — “O le oti o lona fili mulimuli lea, ma na ia faatoilaloina foi ma faavaeina ai le toetutu.”