Folasaga

Ua faavaeina e le Au Peresitene Sili ma le Korama a Aposetolo e Toasefululua le faasologa o Aoaoga a Peresitene o le Ekalesia e fesoasoani ai i tagata o le Ekalesia ia faalolotoina lo latou malamalama i mataupu faavae o le talalelei ma faalatalata atili ai ia Iesu Keriso e ala i aoaoga a perofeta o aso e gata ai. A o faaopoopo atu e le Ekalesia voluma i lenei faasologa, o le a e faatupula’ia se faaputuga o tusi mo faamatalaga o le talalelei mo lou aiga.

O loo faalauiloa atu i lenei tusi ia aoaoga a Peresitene Spencer W. Kimball, o le sa galue auauna atu o le Peresitene O Le Ekalesia a Iesu Keriso o le Au Paia o Aso e Gata Ai mai le aso 30 Tesema, 1973, e oo i le aso 5 Novema, 1985.

Suesuega a le Tagata Lava Ia

A o e suesue i aoaoga a Peresitene Kimball, saili i musumusuga a le Agaga. Ia manatua le folafolaga a Nifae: “Aua o le saili ma le filiga e iloa e ia, e faamatalaina mea lilo a le Atua ia te i latou, i le mana o le Agaga Paia” (1 Nifae 10:19). Ia amata lau suesuega i se tatalo, ma faaauau ai pea ona e tatalo i lou loto a o e faitau.

I le faaiuga o mataupu taitasi, o le a e maua ai fesili ma mau e faatatau i ai ia o le a fesoasoani ia te oe ia e malamalama ma faaaoga aoaoga a Peresitene Kimball. Taumafai e iloilo a o lei faitauina le mataupu.

Ia mafaufau foi i taiala nei:

Vaai upu ma fuaitau autu. Afai e te mauaina se upu e te le malamalama ai, ia faaaoga se lolomifefiloi po o se isi punaoa ina ia e malamalama lelei ai i lona uiga.
Mafaufau i le uiga o aoaoga a Peresitene Kimball. Atonu e te manao e maka upu taitasi ma fuaiupu e ootia ai lou mafaufau ma lou loto.
Ia toe manatunatu i aafiaga na e maua e faatatau i aoaoga a Peresitene Kimball.
Ia manatunatu loloto i le auala e faatatau ai aoaoga a Peresitene Kimball ia te oe. Mafaufau i le auala e faatatau ai aoaoga i ou atugaluga po o ni au fesili. Fai sau faaiuga po o le a lau mea e fai, e avea ma taunuuga o mea na e aoaoina.

Aoaoga mai Lenei Tusi

E mafai ona faaaogaina lenei tusi e aoao atu ai i le fale po o le lotu. O taiala nei o le a fesoasoani ia te oe:

Tulimatai atu i Upu a Peresitene Kimball ma Tusitusiga Paia

Ua poloai mai le Alii ina ia “aua nei fai atu nisi mea tau lava o mea ua tusia e perofeta ma aposetolo, ma mea e aoaoina ai i [tatou] e le Fesoasoani i le tatalo faatuatua” (MFF 52:9).

O lou tofiga o le fesoasoani lea i isi ia malamalama ma faaaoga le talalelei e ala i aoaoga a Peresitene Kimball ma tusitusiga paia. Aua ne’i e tuueseina lenei tusi pe saunia ia lesona mai nisi mea. Ia matuai faaalu se vaega tele o le lesona e faitau ai aoaoga a Peresitene Kimball o loo i totonu o lenei tusi ma talanoaina o latou uiga ma le faaaogaga.

Ia uunaia tagata auai ina ia suesue mataupu a o lei oo i vasega o le Aso Sa ma aumai le tusi i le lotu. Afai latou te faia lena mea, o le a sili atu ona saunia i latou e auai i le talanoaina ma fefaamalamalamaai ai e le tasi le isi.

Saili le Taitaiga a le Agaga Paia

A e tatalo mo se fesoasoani ma sauniuni ma le filiga, o le a taitaiina au taumafaiga e le Agaga Paia. O le a Ia fesoasoani ia te oe e faamamafa atu vaega o mataupu taitasi, na o le a uunaia ai isi ina ia malamalama ma faaaoga le talalelei.

Afai e te aoao atu, ia tatalo i lou loto ina ia faatasi atu le mana o le Agaga i au upu faapea ma talanoaga a le vasega. Na saunoa mai Nifae, “Aua pe a tautala atu le tagata i le mana o le Agaga Paia, e moliooina ai i le mana o le Agaga Paia i loto o le fanauga a tagata” (2 Nifae 33:1; tagai foi MFF 50:13–22).

Saunia e Aoao Atu

O mataupu o i totonu o lenei tusi ua faatulagaina ina ia fesoasoani ai ia te oe e aoao atu. Ia manatunatu foi i taiala nei:

Suesue le mataupu. Ia suesue ma le agaga tatalo le mataupu ina ia e mautinoa ai ua e malamalama i aoaoga a Peresitene Kimball. O le a e aoao atu ma le matua’i loto i ai, faapea foi ma le mana, pe afai e aafia ai oe lava ia i ana upu (tagai MFF 11:21). A o e faitau, ia teu i lou mafaufau ia mea e manaomia e i latou e te aoaoina. Atonu e te manao e faailoga vaega e te lagona o le a fesoasoani ai ia i latou. Ia matau soaulutala o le mataupu o loo matamata tetele atu. O loo otootoina atu ai ia manatu autu o i totonu o le mataupu.
Fuafua po o a vaega e faaaoga. E tele atu mea o loo aofia ai i vaega taitasi nai lo mea e mafai ona e aoaoina atu i le lesona e tasi. Nai lo le taumafai ina ia aoao atu le mataupu atoa, ia filifilia ma le agaga tatalo vaega na e te lagona o le a sili atu ona fesoasoani ia i latou e te aoaoina.
Ia fuafua pe faapefea ona faalauiloa atu le lesona. Ina ia faatupuina le naunau i le amataga o le lesona, atonu e te manao e faasoa atu sou lava aafiaga po o le talosagaina foi o tagata auai e faitau se tala mai le amataga o le mataupu, pe vaai i se ata o loo i totonu o le mataupu. Ona mafai lea ona e fesili atu, “O le a se mea o loo aoao mai e lenei tala (po o le ata) e uiga i le ulutala o le mataupu?” O isi vaega e filifili mai ai mo le amataina o se lesona, e aofia ai se mau po o se upusii mai le mataupu, po o le usuina foi o se viiga. O se isi manatu e aoga tele o le faailoa atu lea i tagata auai po o a manatu autu o le lesona.
Ia fuafua pe faapefea ona uunaia ia talanoaga. O le vaega lea e tatau ona tele le taimi o le lesona e faaalu ai. Ia toe iloilo fautuaga o loo i le [vaega o le ] taitai ni talanoaga e malamalama ai o loo i itulau viii–ix o le tusi lenei. Atonu e te faaaogaina ia fesili mai le “Fautuaga mo Suesuega ma Aoaoga” o loo i le faaiuga o le mataupu. E mafai foi ona e saunia ni au lava fesili. Ia tuuina atu fesili e fesoasoani ai ia i latou o loo e aoaoina:
- Vaavaai mo le mea o loo aoao atu. O nei ituaiga fesili e fesoasoani i tagata auai e saili ma faamasani ai i se faamatalaga patino o loo i aoaoga a Peresitene Kimball. Mo se faataitaiga, a mae’a ona faailoa atu se upusii patino, e mafai ona e fesili atu, “O a nisi o upu po o fuaitau autu o loo i ai i lenei saunoaga?” po o le “O le a le autu o lenei saunoaga?”
- Mafaufau i le uiga. O nei ituaiga fesili e fesoasoani ai i tagata auai ina ia malamalama lelei i aoaoga a Peresitene Kimball. Mo se faataitaiga, “Aisea e te manatu ai ua taua tele lenei aoaoga?” po o le “O a manatu po o lagona o loo ia te oe e uiga i lenei saunoaga?” po o le “O le a le uiga o lenei aoaoga ia te oe?”
- Fefaasoaa’i ia aafiaga. O nei fesili e uunaia ai tagata auai ina ia faatatau le mea o loo saunoa mai ai Peresitene Kimball i se mea i o latou lava olaga. Mo se faataitaiga, “O a ni aafiaga na oo ia te oe e faatatau i le mea na saunoa mai ai Peresitene Kimball?”
- Faaaoga mea o loo aoao atu. O nei fesili e fesoasoani ai i tagata auai e mafaufau i auala e mafai ona latou ola ai e tusa ma aoaoga a Peresitene Kimball. Mo se faataitaiga, “O le a le mea o loo uunaia i tatou e Peresitene Kimball e fai? O a ni auala e mafai ai ona tatou faaaogaina mea o loo ia saunoa mai ai?”
Ia fuafua pe faapefea ona faaiu le lesona. E mafai ona e filifili e vave fai se aotelega o le lesona pe tofi se tagata se toatasi pe toalua e faia. Ia molimau atu i aoaoga na outou talanoaina e pei ona uunaia ai e le Agaga. Atonu e te manao foi e valaaulia isi e faasoa atu a latou molimau. Ia uunaia i latou e te aoaoina ina ia mulimuli i uunaiga latou te maua mai le Agaga Paia.

A o e sauni e aoao atu, atonu e te fia vaai mo ni manatu i totonu o le [tusi], O Le Aoao Atu, E Leai Se Isi Valaauga e Sili Atu (36123), vaega E, mataupu 14, 16, 28, ma le 29; po o totonu o le Tusitaiala Faafaiaoga (34595).

Taitai ni Talanoaga e Malamalama Ai

O taiala nei o le a fesoasoani ia te oe e uunaia ma taitai ni talanoaga e malamalama ai:

Saili le taitaiga a le Agaga Paia. E mafai ona Ia uunaia oe e fesili atu ni fesili patino po o le faaaofia ai foi o ni tagata patino i le talanoaga.
Fesoasoani i tagata auai e taulai atu i aoaoga a Peresitene Kimball. Tuu atu ia i latou e faitau ana saunoaga ina ia faaosofia ai talanoaga ma tali ai fesili. Ia toe faatonutonu ia talanoaga ua amata ona aluese mai le autu pe ua taumatemate foi pe fefinauai ai.
Pe a talafeagai ai, ia faasoa atu ni aafiaga e faatatau i aoaoga o loo i totonu o le mataupu.
Ia uunaia tagata auai e faasoa atu o latou manatu, tuuina atu fesili, ma aoao e le tasi le isi (tagai MFF 88:122). Mo se faataitaiga, e mafai ona e fai atu ia i latou e aumai ni manatu i mea na saunoa atu ai isi, pe tuusao atu foi se fesili se tasi i nisi o tagata auai.
Aua e te fefe i le leai o se leo e faalogoina pe a uma ona e tuuina atu se fesili. E masani lava ona moomia e i latou e te aoaoina se taimi e mafaufau ai pe sue ai i a latou tusi a o lei mafai ona faasoa mai o latou manatu, molimau, ma mea na oo i ai.
Faalogo atu ma le faamaoni, ma taumafai ia malamalama i manatu o tagata uma. Ia faailoa atu le agaga faafetai mo lo latou auai.
Afai e faasoa mai e tagata auai ni manatu eseese, ia mafaufau e lisi i luga o le laupapa pe talosaga atu foi i se tasi na te tusia.
Vaavaai mo ni auala eseese ina ia faaaofia ai tagata auai i le talanoaga. Mo se faataitaiga, atonu e te tuuina atu ia i latou e talanoaina ni fesili i vaega laiti pe talanoaina foi ma le tagata o loo la sosoo.
Mafaufau e vave faafesootai se tagata auai se toatasi pe toalua a o lei taitai oo i le aso o le lesona. Fai atu ia i la’ua e o mai saunia i le vasega e tali se tasi o fesili ua e saunia.
Aua e te faamutaina se talanoaga lelei ona o lou manao ia aofia uma mea na e saunia mo le aoaoga. O le mea e sili ona taua o le lagonaina lea e tagata auai o le Agaga ma ola ai i a latou tautinoga ina ia ola i le talalelei.

Faamatalaga e Uiga i Punaoa o loo Ta’ua i Lenei Tusi

O aoaoga a Peresitene Kimball o loo i totonu o lenei tusi o ni upusii tonu lava ia mai punaoa eseese. O nei upusii po o saunoaga o loo tausisia pea ia faailoga, sipelaga, mataitusi tetele, ma parakalafa o loo i ai i tusi na sii mai ai sei vagana ai suiga mai le faatonu po o suiga i le taina ina ia faigofie ai ona faitau. O le mafuaaga lea, atonu o le a matauina ai e le aufaitau ia ni nai eseesega i le tusi.

E le gata i lea, sa masani foi ona faaaoga e Peresitene Kimball upu e pei o men, man, po o le mankind e faasino ai i tagata uma, alii ma tamaitai. E masani foi ona ia faaaoga le suinauna o le o ia [he] e faasino ai i kenera uma e lua [alii ma le tamaitai]. O se tulaga lea sa masani ai le gagana i lona vaitaimi. Ae ui lava i le eseesega o le gagana i nei potopotoga ma le faaaogaina i ona po nei, ae o aoaoga a Peresitene Kimball e faatatau uma i tamaitai ma alii.