Mataupu 5

O Le Tatalo, o le Tusifolau Lea i le Mana Faaleagaga

O le tatalo faamaoni ma le loto i ai, tatou te maua ai le alofa, mana, ma le malosi mai lo tatou Tama Faalelagi.

Mai le Soifuaga o Spencer W. Kimball

“Ou te mauaina pea lava le lagona mafana e uiga i tatalo atoa ma lona mana ma ona faamanuiaga,” na saunoa ai Peresitene Spencer W. Kimball. “Ua ou mauaina i lo’u olaga atoa ia faamanuiaga e sili atu lea e le lava ona ou faafetai atu ai. Ua matuai agalelei mai pea le Alii ia te au. Ua tele o’u aafiaga ua ou oo i ai i le taimi o le ma’i ma le ola maloloina lea e le mafai ona i ai se masalosalo i lo’u loto ma lo’u mafaufau o loo i ai se Atua i le lagi, o ia o lo tatou Tama, ma na te faafofoga ma tali mai i a tatou tatalo.”¹

O se tasi o nei aafiaga na oo mai ina ua malaga atu Peresitene Kimball ma lona faletua o Camilla i se konafesi i Niu Sila. Ina ua latou taunuu atu i le aai o Hamilton, sa matuai gasegase lava i la’ua o lea na talosaga atu ai Peresitene Kimball ia Peresitene N. Eldon Tanner, le Fesoasoani Muamua i le Au Peresitene Sili, e suitulaga ia te ia i se polokalama faaleaganuu na fuafuaina mo lena afiafi. I ni nai itula mulimuli ane, sa faafuasei ona “ala i luga ia Peresitene Kimball ma fesili atu ia Dr. Russell Nelson, o le sa nofo e vaavaai o ia, ‘Uso Nelson, o le a le taimi e amata ai lena polokalama i le afiafi nei?’

“ ‘O le fitu, Peresitene Kimball.’

“ ‘Ua ta nei le fia?’

“ ‘Toeitiiti ta le fitu.’

“Sa matuai afu susu uma ia Spencer. Ua alu i lalo lona fiva. … Sa ia faapea atu, ‘Fai ia Sister Kimball o le a ma o.’

“Sa tulai ese ia Camilla mai le moega, ma sa faatopetope ona fai o la laei ona matou malaga atu loa lea i le malae e le mamao ese lea faatoa amata ai lava le polokalama. Sa faamalamalama atu e Peresitene Tanner i le amataga o le sauniga ua le mafai ona auai mai i la’ua ona ua matuai gasegase lava. I le tatalo amata, sa ole faatauanau atu ai se talavou Niu Sila, ‘O i matou o talavou e 3,000 o Niu Sila ua matou potopoto iinei, sa matou saunia mo le ono masina e pepese ma sisiva mo lau perofeta. Sei e faamaloloina o ia ma aumai o ia iinei.’ Ina ua mae’a le tatalo, sa ulufale atu loa le taavale o loo malaga atu ai Spencer ma Camilla ma na faafuasei ona taufai alalaga uma tagata, ina ua talia la latou tatalo.”²

Aoaoga a Spencer W. Kimball

E moomia ona tatou tatalo, e pei foi ona moomia ona tatou tausia o isi poloaiga.

O le tatalo e le o se gaoioiga e tuu i le faitalia pe fai pe leai; o se faavae i lo tatou talitonuga faalelotu.³

Aisea e tatau ai ona tatou tatalo? Aua o i tatou o atalii ma afafine o lo tatou Tama Faalelagi, o Le tatou te faalagolago i ai mo mea uma tatou te ‘ae’ae ai—o a tatou meaai ma lavalava, o lo tatou ola maloloina, o lo tatou lava ola, o la tatou vaai ma le faalogo, o o tatou leo, o lo tatou malosi e gaoioi ai, atoa ma o tatou mafaufau.

… Pe e te tuuina ifo ea ia te oe lava lau manava, lou ola, ma lou tagata? Pe mafai ea ona e faaumiina ou aso i se itula se tasi? Pe ua e malosi tele ea e aunoa ma meaalofa a le lagi? Pe na outou faia ea o outou faiai, ma teuteuina e outou lava? Pe mafai ona e tuuina atu i ai le ola ma faaumiina? Pe o ia te oe ea le mana e te faia ai e aunoa ma le Alii? Ae peitai ua toatele ua ou iloaina e le o tatalo. …

Ua outou tatalo i nisi taimi, ae aisea e le tatalo soo ai, i taimi uma, ma sili atu ona naunau? Pe taua tele ea le taimi, pe ua puupuu le olaga, pe ua itiiti tele ea le faatuatua?. …

O loo ia i tatou uma se matafaioi mamafa i lo tatou Alii. E leai se tasi o i tatou ua ausia le atoatoa. E leai se tasi o i tatou ua saoloto mai le sese. O le tatalo e moomia e tagata uma e pei lava ona moomia o le ola mama, ma le tausia o le Sapati, ma le sefuluai, ma le tausia o le Upu o le Poto, auai i sauniga, ma le ulu atu i se faaipoipoga faaselesitila. E pei lava o le moni o isi poloaiga, o se poloaiga foi lenei a le Alii.⁴

A o masani ona ou femalagaai i siteki ma misiona a le Ekalesia i tausaga ua mavae, e masani lava ona ou feiloai ma tagata o e sa i ai o latou faafitauli po o e sa sili ona latou manaomia se fesoasoani. O la’u fesili muamua lava ia i latou, “Ae o faapefea a outou tatalo? E faafia ona fai? O le a se loloto o le aafia ai o oe a o e tatalo?” Ua ou matauina e masani lava ona oo mai le agasala pe a motusia laina o fesootaiga. O le mafuaaga lea na fetalai atu ai le Alii i le Perofeta o Iosefa Samita, “O le mea ou te fai atu i le toatasi ua ou fai atu ai lava i tagata uma; ia tatalo e le aunoa ina nei i ai le mana o le amioleaga ia te outou.” (MFF 93:49.)⁵

O loo matua manaomia tele le tatalo i ona po nei i le lalolagi, ma o tatalo ia e mafai ai ona tatou fesootai ma le Atua ma faaavanoaina ai pea ala o fesootaiga ma le Atua. E le tatau ona pisi tele i tatou i o tatou olaga o le a le mafai ai ona tatou mafaufau loloto e ala i le tatalo. O le tatalo o le auala lea i le malosi faaleagaga.⁶

O a tatou tatalo e tatau ona aofia ai faailoga o le loto faafetai ma le olega faamaulalo i le Tama Faalelagi ina ia faamanuia i tatou ma i latou o loo siomia ai i tatou.

O a mea e tatau ona tatou tatalo atu ai? E tatau ona faaali atu lo tatou fiafia atoa ma le agaga faafetai mo faamanuiaga sa tuuina mai. Ua fetalai mai le Alii, “E ao foi ina outou faafetai atu i le Atua i le Agaga i soo se faamanuiaga e faamanuiaina ai outou.” (MFF 46:32.) O se agaga mautinoa ma le ofoofogia e faapea ona oo mai i o tatou luga a o tatou faaali atu le agaga faafetai i lo tatou Tama Faalelagi mo o tatou faamanuiaga—mo le talalelei ma le malamalama ua mafai ona faamanuiaina ai i tatou e maua, mo taumafaiga ma galuega a o tatou matua ma nisi mo i tatou, mo o tatou aiga ma uo, mo avanoa, mo le mafaufau ma le tino ma le ola, mo mea lelei ma le aoga e tutupu i o tatou olaga, mo fesoasoani uma lava ma le agaalofa o lo tatou Tama ma le taliina mai o tatalo.

E mafai ona tatou tatalo mo o tatou taitai. Na tusia e Paulo:

“O lenei, e muamua i mea uma ou te apoapoai atu ia faia olega, ma tatalo, faatoga, ma faafetai, mo tagata uma lava;

“Mo tupu ma i latou uma ua i ai le pule.” (1 Tim. 2:1–2.)

O le a tatou atiina ae le faamaoni i le atunuu ma ana tulafono e puipuia ai pe a tatou tatalo atu. Ma o le a tatou atiina ae le alofa ma le faatuatua i taitai o la tatou Ekalesia, ma o le a faaaloalogia i latou e a tatou fanau. Aua e faigata i se tasi ona faitioina taitai o le Ekalesia pe afai o loo tuuina atu ni tatalo faamaoni mo i latou. O se fiafiaga sili ia te au lo’u lagolagoina o ou taitai mai lo’u olaga atoa, ma sa ou tatalo mo lo latou soifua laulelei. I nai tausaga e lei mamao atu, sa ou faalogoina ai lea lava malosi ua oo mai ia te au ona o tatalo a le Au Paia, na latou tatalo atu ai i le lagi mo au.

O le galuega atoa faafaifeautalai ma vaega uma o loo aofia ai e tatau ona avea ma faamoemoega o a tatou tatalo e le aunoa. Tatou te tatalo ina ia tatalaina faitotoa o malo uma ina ia taliaina le talalelei. Tatou te tatalo mo avanoa ma taitaiga e fetufaai ai le talalelei paia ma isi tagata. Afai e tatalo tamaiti taitoatasi i lona olaga atoa mo le galuega faafaifeautalai, o le a avea foi o ia ma se faifeautalai lelei.

… Tatou te tatalo mo i latou o loo fai i tatou ma o latou fili, ina ia tatou manatua ai le matagofie ma le malosi o le fautuaga a le Alii: “A ou te fai atu ia te outou o e faalogo mai, Ia e alofa atu i e o fai outou mo latou fili, ia agalelei atu i e ita mai ia te outou, ia outou faamanuia atu i e fetuu mai ia te outou, ia outou tatalo mo e tuuaifua mai ia te outou.” (Luka 6:27–28.) Pe mafai ea ona i ai se tasi e umi ona i ai sona fili pe afai e tatalo o ia, mo tagata o loo siomia o ia o e atonu o loo i ai ni ona lagona le fiafia i ai?

Tatou te tatalo mo le atamai, mo le faamasinoga, ma le malamalama. Tatou te tatalo mo le puipuiga i nofoaga matautia, faapea le malosi i taimi o faaosoosoga. Tatou te manatua e ua pele ia i tatou atoa ma uo. O nisi taimi tatou te tatalo ai mo sina minute i upu po o mafaufauga, i le leotele po o le matuai filemu lava. E masani pea lava ona faia a tatou tatalo i le loto ina ia mafai ona tatou faia ma le saogalemu galuega o le aso. Pe mafai ea e se tasi ona faia se mea leaga pe afai o loo ia tatalo atu ma le faamaoni i lona loto ma ona laugutu?

Tatou te tatalo mo a tatou faaipoipoga, o a tatou fanau, o o tatou tuaoi, o a tatou galuega, o a tatou faaiuga, o o tatou tofiga i le ekalesia, o a tatou molimau, o o tatou lagona, o a tatou sini. O le mea moni lava, tatou te faaaogaina le fautuaga maoae a Amoleka ma tatou te tatalo mo le alofa tunoa, tatou te tatalo mo le auala o loo maua ai lo tatou tausiga, o o tatou aiga ma le malosi e tetee atu ai i o tatou fili; tatou te tatalo “ia tetee atu i le tiapolo, o le ita i le amiotonu uma,” ma fua o o tatou fanua. Ma afai tatou te le tagi atu i le Alii, ua tatou “tuu i o [tatou] loto sei tumu, ia faalatalata atu ia te ia i le tatalo e le aunoa mo lo [tatou] manuia, ina ia manuia foi i latou o e faatasi ma [i tatou].” (Tagai Alema 34:18–27.)⁷

Tatou te tatalo mo le faamagaloga. Ua ou faatalanoaina le anoanoai o i latou ua faamoemoe e faafaifeautalai. E masani ona ou mauaina ai e le o tatalo i latou, e ui lava o loo i ai ni a latou amioga e lei faamagaloina. “Aisea e te le tatalo ai,” sa ou fesili atu ai, “ae o loo i ai sau matafaioi tele e toe totogiina? Pe e te manatu ea e mafai ona e aveeseina ma faamimigi ou tauau ma faapea mai o le mea lava ua masani ai? Pe e te matamuli ea e te tootuli, e te matamuli ia Keriso? Pe i ai nisi e le o talitonu i le Atua? Pe e te leiloaina ea o loo soifua o ia, ma e alofa, faamagalo pe afai e oo mai le salamo? Pe e te iloaina ea o le agasala e mafai ona soloieseina, o solitulafono e mafai ona faamagaloina e ala i le lafoa’i ma faagalo?” …

Tatou te tatalo mo mea uma e manaomia ma mamalu ma tonu. Sa ou faalogo i se tamaitiiti e tusa ma le sefulufa tausaga i se tatalo faaleaiga o ole atu i le Alii ina ia puipuia mamoe a le aiga o loo i luga o le mauga. Sa toulu le kiona ma maatiati le malulu. Sa ou faalogo i se aiga o tatalo mo le timu ina ua oo mai se lamala ma sa matuai faaletonu lava le tulaga na i ai. Sa ou faalogo i se teine talavou o tatalo mo le fesoasoani i ana suega na faia i lena aso.

O a tatou olega e tuuina atu foi mo e mama’i ma mafatia. O le a faafofogaina e le Alii a tatou tatalo faamaoni. Atonu na te le faamaloloina pea i latou, ae e mafai ona ia tuuina atu ia i latou le filemu po o le lototele po o le malosi e onosaia ai. Tatou te le faagaloina i a tatou tatalo ia tagata matutua o e moomia e toetoe lava a sili atu nai lo le malosi faaletino ua le atoatoa—o tagata popole ma le le mautonu, o e faaosoosoina, o e agasala, o e ua fai ma faasoesa.

O a tatou tatalo e mo le soifua manuia o a tatou fanau. O nisi taimi a o tutupu ae ia fanau, e oo mai ai i o latou olaga se uiga faatautee e ui i mea uma e mafai ona tatou fai atu ai ma faia. Na iloa e Alema le le aoga o ana apoapoaiga i lona [atalii] ma o lea na ia tatalo ai mo [ia], ma o ana tatalo o ni tatalo maoae. O nisi taimi e toetoe ai lava e na o le pau lena o se mea e mafai e matua ona fai. O le tatalo a se tagata amiotonu e aoga tele, o loo fai mai ai tusitusiga paia, ma e faapena foi i le tulaga lenei [tagai Iakopo 5:16; Mosaea 27:14].⁸

Ua faapea ona avea ma avanoa ma se fiafiaga le tatalo atu i lo tatou Tama Faalelagi, ma o se faamanuiaga mo i tatou. Ae peitai, e le mae’a pe a uma ona tatalo. Sa aoao mai e Amoleka le tonu ma le sa’o: “O lenei foi, faauta, ou uso pele, … pe a uma ona outou faia nei mea uma, afai tou te aauina fua atu o e matitiva, ma e le lavalava, ae le asiasi atu i e mamai, ma e puapuagatia, pe foai atu ni a outou mea i e matitiva, afai ua ia te outou—ou te fai atu ia te outou, afai tou te le faia nei mea, faauta, e fai fua a outou tatalo, e le aoga ai ia te outou i se mea e tasi, e tusa foi outou ma tagata pepelo, o e faafitia le faatuatua.” (Alema 34:28.) E le tatau ona galo ia i tatou e ao ona tatou ola i le talalelei i le faamaoni ma le naunautai e pei ona tatou faia pe a tatou tatalo.⁹

E mafai ona tatou fagatua ma le Atua ma iloa ai Lona finagalo i a tatou tatalo faaletagata ma le patino.

E i ai nisi mea e sili ona tatalo atu ai i se nofoaga paganoa, pe afai e le manatu i le taimi ma le le faalauaiteleina. O le tatalo e faia i se nofoaga paganoa e sili ona taua ma aoga. O le tatalo toatasi e fesoasoani ia i tatou e aveeseina ai le maasiasi po o a tatou faaiuga sese, po o a tatou togafiti; o le a fesoasoani foi lea i le tatalaina o o tatou loto ma faaatoatoaina ai lo tatou faamaoni ma le faaaloalo e faaali atu ai o tatou faamoemoega ma o tatou manaoga.

Ua leva ona faagaeetia au i le moomia lea o le le faalauaiteleina o a tatou tatalo faaletagata. Sa i ai taimi na silafia ai e le Faaola le talafeagai ona tuumuli ese atu i mauga po o le faatoaga e tatalo ai. E faapena foi i le Aposetolo o Paulo, sa ia faliu atu i le toafa ma tatalo ai ina ua mae’a ona ia maua lona valaauga sili ona maoae. Na maua foi e Enosa lava ia se nofoaga e na o ia ai lava e fagatua ma le Atua. Na maua e Iosefa Samita sona taimi paganoa i le togavao sa na o manufelelei ma laau ma le Atua sa faalogo i lana tatalo. Ia matauina nisi o vaega autu i lana tala: “O lea, e tusa ma le mea ua tonu ia te au o le ole atu lea i le Atua, sa ou alu atu ai loa i le vao ou te tatalo atu ai ia te ia. … O le taimi muamua lava lea na faatoa ou faia ai se taumafaiga faapea, aua e ui lava i mea uma na ou popole ai, ou te lei taumafai lava e tatalo ma le leo.” (Talafaasolopito—Iosefa Samita 2:14; ua faatusilima mea e faamamafa.)

O i tatou foi, e tatau ona tatou sailia, pe a mafai, se potu, se tulimanu, se vaega paganoa, se nofoaga e mafai ona tatou “o atu i ai” e “tatalo ai ma le leo” i le mea lilo. Tatou te manatua o le tele o taimi na faatonuina ai i tatou e le Alii ina ia tatou tatalo ma le leo: “Ma lenei, ou te poloai atu ia te oe ia e tatalo ma le leo, faapea foi i lou loto; ioe, i luma o le lalolagi, e faapea foi i le mea lilo, i luma o tagata, faapea foi i le na o oe.” (MFF 19:28.)¹⁰

Afai i nei taimi faapitoa o le tatalo e taofiofi ai [lo tatou ole atu] i le Alii, o lona uiga e i ai nisi o faamanuiaga o le a taofia mai ia i tatou. O le mea moni, tatou te tatalo atu o ni tagata talosaga i luma o se Tama Faalelagi ua i ai le atamai uma, ae aisea la e tatau ai ona tatou manatu e taofiofi o tatou lagona po o manatu lea e tauaveina ai o tatou manaoga ma o tatou faamanuiaga?¹¹

I a tatou tatalo, e le tatau ona i ai se tau faaufiufi, leai se faa’-ole’ole, talu ai e le mafai ona i ai se taufaasese. Ua silafia e le Alii o tatou tulaga moni. Pe tatou te ta’u atu ea i le Alii lo tatou lelei tele, po o lo tatou vaivai? Tatou te tutu atu i ona luma e le lava-lavā. Pe tatou te tuuina atu ea a tatou olega i le tauagafau, faamaoni, faapea ma se “loto momomo ma se agaga salamo,” pe faapei o le Faresaio o le sa faamaualuga ia te ia lava i le auala sa ia tausisia ai le tulafono a Mose? [Tagai Eteru 4:15; Luka 18:11–12.] Pe tatou te tuuina atu ea ni upu ua faaaoga soo ma ni fuaitau ua se tai taliga i le faalogo, pe tatou te talanoa vavalalata ea ma le Alii pe a tusa ai ma le tulaga o loo manaomia ai? Pe tatou te tatalo ea na o nisi o taimi pe a ua tatau ona tatou tatalo e le aunoa, faifai soo, ma faifai pea?¹²

O le tatalo o se avanoa lava—e le na o le talanoa atu ai i lo tatou Tama o i le Lagi, ae ia maua mai ai foi le alofa ma musumusuga mai ia te ia. I le faaiuga o a tatou tatalo, e ao ona tatou faalogologo ma le naunautai—mo ni minute. Sa tatou tatalo mo se fautuaga ma se fesoasoani. O lenei e tatau ona tatou “[fifilemu], ma ia iloa [o ia] lava o le Atua.” (Salamo 46:10.)¹³

E tatau ona tatou faaavanoa se taimi i aso uma mo tatalo faaleaiga.

Ua uunaia e le Ekalesia le tatau ona faia o tatalo faaleaiga i afiafi uma ma taeao uma. O se tatalo e tootutuli uma ai tagata o le aiga e mafai ona aofia ai. … O tagata uma o le aiga, e aofia ai le fanau laiti, e tatau ona maua le avanoa e faaleoina ai se tatalo, e feauauai ai, e pei ona faatonuina ai e le o loo pulefaamalmalu, lea e masani lava o le tama o loo umia le perisitua, ae afai e le o i ai o ia, o le tina, ae afai e le o i ai uma i la’ua, o le tamaitiiti e pito i matua.¹⁴

Ua tuuina mai ia i tatou e lo tatou Tama oi le Lagi le faamanuiaga o le tatalo ina ia fesoasoani ai ina ia tatou manumalo ia tatou gaoioiga sili ona taua i le aiga ma le olaga. Ou te iloa afai tatou te tatalo ma le naunautai ma le amiotonu, i tatalo taitoatasi pe faaleaiga, i lo tatou alafai mai i le taeao ma lo tatou malolo i le po, faapea ma autafa o le laulau ‘ai i le taimi o taumafataga, e le gata o le a sili atu ai ona maua e tatou le agaga auautasi i le avea ma e pele, ae o le a faapea foi ona tatou alualu ai i luma faaleagaga. Tatou te matua manaomia lava le fesoasoani a lo tatou Tama Faalelagi a o tatou taumafai e saili e aoao i upumoni o le talalelei ma ia tatou ola ai, ma tatou saili atu i lana fesoasoani i filifiliga tatou te faia i o tatou olaga.¹⁵

O le tatalo faaleaiga e tatau ona talafeagai le umi ma faaupu i mea o loo manaomia. O se tatalo a se … ulugalii e mafai ona ese mai se tatalo mo se aiga ua matutua tamaiti pe mo se aiga foi e laiti le fanau. E mautinoa lava, e le tatau ona umi pe afai o loo aofia ai tamaiti laiti, aua a leai o le a le maua so latou naunau ma le fiafia ma le lavava i le tatalo, ma avea ai ma mea e le fiafia i ai. Afai e tatalo tamaiti, e le taitai ona soona uumi a latou tatalo. O le Tatalo a le Alii, ua tuuina mai o se faataitaiga, pe tusa na o le tolusefulu sekone ma e mautinoa lava e mafai e se tasi ona tuuina atu le faafetai ma le olega i le tasi po o le lua po o le tolu minute, e ui lava e manino mai e i ai taimi atonu e talafeagai ai ona umi atu le taimi e fagatua ai.¹⁶

Pe a tatou tootutuli i le tatalo faaleaiga, e aoaoina e a tatou fanau o loo tootutuli i o tatou tafatafa ia amioga ia o le a tumau ai ia i latou i o latou olaga atoa. Afai tatou te le faaaluina se taimi mo tatalo, o le mea moni lava o loo tatou ta’uina atu i a tatou fanau, “Ia, e leai lava sona taua tele. Tatou te le popole lava i ai. Afai e mafai ona tatou faia i se taimi e talafeagai ai, o le a fai le tatou tatalo, ae afai e ta le logo o le aoga ma ua sau le pasi ma ua oo foi i le taimi o le galuega—e le taua le tatalo ma e mafai lava ona tatou faia pe a avanoa se taimi.” Sei vagana ua faia se fuafuaga mo le taimi o le tatalo, o le a le mafai lava ona maua se avanoa.¹⁷

E leai se tina e le popole i le auina atu o sana fanau laiti i le aoga i se taeao malulu e aunoa ma ni ofu mafanafana e puipuia ai i latou mai le kiona ma le timu ma le malulu. Ae o loo anoanoai tama ma tina o e auina atu a latou fanau i le aoga e aunoa ma le puipuiga ua saunia mo i latou e ala i le tatalo—o se puipuiga e tetee atu ai i faafatiatamai e le mailoa, o tagata amioleaga, ma faaosoosoga e masani ai.¹⁸

I aso ua mavae, sa le afaina le tasi o le tatalo faaleaiga e fai i le aso. Ae i le lumanai o le a le lava lena pe afai tatou te mananao e faasaoina o tatou aiga.¹⁹

I totonu o o tatou li’o faaleaiga, o le a aoaoina ai a tatou fanau ina ia iloa ona talanoa atu i lo latou Tama Faalelagi e ala lea i le faalogologo i o latou matua a o tatalo. O le a le pine ona latou iloa le loto momomo ma le faamaoni i tatalo o loo tatou faia. Pe afai e faavavevave a tatou tatalo, ma ua matele e pei o se sauniga e le o manatu tele i ai, o le a latou iloa lava foi lea tulaga. E sili ona tatou tatalo i o tatou aiga ma tatalo taitoatasi e pei ona aioi mai ai Mamona, “O le mea lea, ou uso pele e, ia outou tatalo atu ai i le Tama ma le malosi uma o le loto.” (Moro. 7:48.)²⁰

I le tatalo faaleaiga, e sili atu mea o loo aofia ai nai lo le na o se olega ma se tatalo o le loto faafetai. O se laasaga agai i luma lea mo le lotogatasi ma le fealofani o le aiga. E fausia ai le nofo malamalama o le aiga ma faavaeina ai se agaga o le felagolagomai o le aiga. O se taimi lea i le aso pisi ua tape ai le leitio, ua faamuitiiti moli, ae taufai liliu atu mafaufau ma loto o le tasi i le isi faapea le silisiliese; o se taimi e taofia ai le lalolagi i fafo ae faaulufale mai le lagi i totonu.²¹

Afai tatou te tatalo o se potopotoga, e tatau ona talafeagai lelei le tatalo ma le faamoemoe.

A o tatou potopoto faatasi i le tatalo, pe o le fale, Sauniga Faalelotu, faafiafiaga po o se gaoioiga faitele, e tatau ona tatou manatua le faamoemoega o a tatou tatalo—ina ia fesootai ai ma le Tama Faalelagi. E ui ina faigata, ae ua ou iloa afai tatou te tatalo faatasi ma nisi tagata e tatau ona sili atu ona lelei o tatou uiga e faaali atu i la tatou fesootaiga vavalalata ma le faamaoni ma le Atua nai lo le popole i tagata o loo faalogologo mai i le tatalo. O le mea moni lava, o le nofoaga e fai ai tatalo e moomia ona mafaufau foi i ai, ma o se tasi lea o mafuaaga e le mafai ai ona atoatoa a tatou tatalo faitele, po o tatalo foi faaleaiga.²²

O tatalo i mea faitele e tatau pea lava ona talafeagai ma le faatasiga. O se tatalo o le faapaiaga e mafai ona umi ae o se tatalo amata e ao ona puupuu. E tatau ona talosagaina ai mea e manaomia mo lena faatasiga patino. O le tatalo faaiu e mafai foi ona puupuu—o se tatalo o le faafetai ma faatuua ai. O le faauuina i le suauu o se vaega puupuu ma maoti o se sauniga ma e le tatau ona ta’ua ai faaupuga o le faamauga [o le sauniga] lea e mulimuli mai ai, ma e mafai ona faaumiumi atu pe a talafeagai ai i le talosagaina lea o faamanuiaga i luga o le tagata o loo tuu atu i ai. O le faamanuiaina o meaai e le tatau ona umi, ae tatau ona faailoa atu ai le agaga faafetai mo faamanuiaga ma talosagaina ai faamanuiaga i luga o meaai. E le tatau ona toe fai faalua ai se tatalo faaleaiga lea faatoa uma ona fai.²³

Ua faafia ona tatou faalogo i tagata o e ua matuai malolosi i le faauumi o a latou tatalo ua oo ai lava i le tulaga e pei o loo faia se lauga atoa? E oo ina le lavava i latou e faalogologo ma leai ai se uiga o le tatalo.²⁴

Talu ai ona e silafia ma atoatoa le alofa o le Tama Faalelagi ia i tatou, e mafai ona tatou faatuatuaina Ana tali i a tatou tatalo.

O le tatalo ea ua na o se auala o fesootaiga e tasi sona itu? E leai! …

O le aoaoina o le gagana o le tatalo o se fiafiaga sili lea o le olaga atoa. O nisi taimi e lolofi mai ai manatu i o tatou mafaufau a o tatou faalogologo atu pe a mavae a tatou tatalo. O nisi taimi e fetuleni mai ai lagona ia i tatou. E faamaonia mai e le agaga o le toafilemu ia i tatou o le a lelei mea uma. Peitai, e masani lava, pe afai tatou te faamaoni ma faatauanau, o le a tatou maua le faalogona lelei—o se faalogona mafanafana mo lo tatou Tama o i le Lagi ma se lagona o lona alofa mo i tatou. E lagona lava lo’u faanoanoa ona o nisi o i tatou e lei iloaina lava le uiga o lena toafilemu faaleagaga, aua o le molimau lena ia i tatou i le taliina mai o a tatou tatalo. Ma e talu ai ona o lo tatou Tama o i le Lagi e sili atu lona alofa ia i tatou nai lo lo tatou alolofa ia i tatou lava, o lona uiga e mafai ona tatou faatuatuaina lona agalelei, e mafai ona tatou faatuatuaina o ia; o lona uiga pe afai e faaauau pea ona tatou tatalo ma ola i le olaga e tatau ai, o le a taitaia i tatou e le aao o lo tatou Tama ma faamanuiaina i tatou.

Ma tatou te faapea atu i a tatou tatalo, “Ia faia lou finagalo”—ma ia savavali ai. Tatou te le talosaga atu i se taitai mo se fautuaga, ona tatou le amanaiaina lea. E le tatau ona tatou ole atu i le Alii mo faamanuiaga ona faatuatuanai lea o le tali. O lea tatou te tatalo ai, “Ia faia lou finagalo, le Atua e. Ua e silafia mea sili, le Tama alofa e. O le a ou taliaina ma mulimuli i au taitaiga.”²⁵

E tatau ona tatou tatalo ma le faatuatua, ae ia malamalama o le tali e aumaia e le Alii atonu e le o le tali lea sa tatou faamoemoe pe mananao i ai. E tatau ona tatou faatuatua po o le a lava le filifiliga a le Atua mo i tatou o le mea lena ua tonu.²⁶

Ina ua mavae se olaga atoa o le tatalo, ua ou iloa ai le alofa ma le malosi e oo mai ona o le tatalo faamaoni ma le agaga atoa i ai. Ua ou iloa le nofo saunia o lo tatou Tama e lagolago i tatou i lo tatou olaga faaletino, ina ia aoao ma taitaiina i tatou. O lea, faatasi ai ma le alofa silisili, ua fetalai mai ai lo tatou Faaola, “O le mea ou te fai atu ai i le toatasi ua ou fai atu ai lava i tagata uma; Ia tatalo e le aunoa.” (MFF 93:49.)

Afai o le a faapea ona tatou faia, o le a tatou maua le malamalama mo i tatou lava e faapea o lo tatou Tama o i le Lagi e moni lava na te faafofogaina ma tali mai i tatalo. O lenei malamalama e finagalo o ia ina ia maua e i tatou uma. Saili i ai, o’u uso e ma tuafafine peleina! Saili i nei mea!²⁷

Fautuaga mo Suesuega ma Aoaoga

Mafaufau i manatu nei a o e suesueina le mataupu po o lou saunia foi e aoao atu. Mo nisi fesoasoaniga faaopoopo, tagai i itulau v–ix.

E mafai faapefea ona ese lou olaga pe a na fai e te le tatalo? Manatunatu loloto i mafuaaga ua poloaiina ai i tatou e le Alii ina ia tatou tatalo (itulau 55–56).
Toe iloilo itulau 57–61. O a ni auala e aafia ai i tatou pe a tatou faailoa atu le agaga faafetai i le tatalo? pe a tatou tatalo mo isi?
Toe iloilo le parakalafa lona lua i le itulau 61. Aisea e le atoatoa ai a tatou tatalo pe afai tatou te le “ola i le talalelei i le faamaoni ma le naunautai e pei ona tatou faia pe a tatou tatalo”?
Na saunoa Peresitene Kimball, “o le tatalo e faia i se nofoaga paganoa e sili ona taua ma aoga” (itulau 61). O le a se mea e mafai ona tatou faia ina ia maua ai se taimi mo tatalo faaletagata ‘anoa? Aisea e te manatu ai e i ai taimi e aoga ai le tatalo leotele i a tatou tatalo faaletagata? Aisea e avea ai le faalogo ma se vaega taua o le tatalo?
I itulau 62–65 na faamatala ai e Peresitene Kimball ia faamanuiaga ia e oo mai ona o se taunuuga o tatalo faaleaiga. O a ni aafiaga ua e oo i ai i le i ai o nei faamanuiaga? O a ni mea e mafai e aiga ona fai ina ia maua ai se taimi mo tatalo faaleaiga i taeao uma ma afiafi uma?
Na aoao atu Peresitene Kimball e faapea o tatalo i faapotopotoga e tatau ona talafeagai ma le faatasiga (itulau 65). Afai e talosagaina i tatou e tuuina atu ni tatalo faapena, o le a lo tatou tiutetauave? O le a se mea e mafai ona tatou aoaoina mai le faataitaiga a le talavou Niu Sila o loo i le tala i le itulau 55–56?
Faitau le parakalafa o loo amataina i le pito i lalo o le 66. Na faapefea ona aafia lo oulua va ma le Tama Faalelagi ona o le tatalo?

Mau e Faatatau I Ai: Salamo 55:17; Mataio 6:5–15; Iakopo 1:5–6; 2 Nifae 32:8–9; 3 Nifae 18:18–21

President Kimball — “E le tatau ona pisi tele i tatou i o tatou olaga o le a le mafai ai ona tatou mafaufau loloto e ala i le tatalo.”

bishop praying — “Tatou te tatalo i a tatou faaipoipoga, o a tatou fanau, o o tatou tuaoi, o a tatou galuega, o a tatou faaiuga, o o tatou tofiga i le ekalesia, o a tatou molimau, o o tatou lagona, o a tatou sini.”

family praying — O le tatalo faaleaiga “o se laasaga agai iluma lea i le lotogatasi ma le fealofani o le aiga.”