Mataupu 7

Molimau Faaletagata Lava Ia

O se malamalama mautinoa o le upumoni o le talalelei o se faitotoa avanoa lea i taui sili ma le olioli e le mafaamatalaina i ni upu.

Mai le Soifuaga o Spencer W. Kimball

I le 1947 na maua ai e Elder Spencer W. Kimball se tusi mai lona atalii o Andrew, o le sa auauna atu faamisiona. Sa tusia e Andrew: “Sa ou fai atu i se tasi alii … ua ou iloa le moni o le mea sa ou ta’uina atu ia te ia, ma sa ou fai atu o le Agaga Paia na molimau mai ai ia te au. … Ina ua ou toe mafaufau i ai mulimuli ane sa taufai si o’u popole ona o lo’u faia o se mea faapea.” Talu ai ona o lona popole sa ia faapea atu ai, “Ua ou matuai faaeteete lava e aloese mai le tuuina atu o la’u molimau i soo se tasi e sili atu nai lo le tulaga o le faapea atu ‘ua ou lagona, ua ou talitonu, ma isi mea faapena.’ ”

Sa toe tusi atu Elder Kimball i lona atalii. “Ou te manatu ua ou iloa lelei lava ou lagona sa i ai,” sa ia fai atu ai, “aua sa ou oo foi i se tulaga faapena i la’u misiona. Sa ou manao ou te matuai faamaoni lava ia te au faapea le galuega ma le Alii. Sa i ai se taimi sa ou matuai filifilia ai ma le faaeteete a’u upu ina ia taumafai e atiina ae ai isi e aunoa ma le matuai tautino atu o lo’u lava tagata i se faaupuga lelei ma le manino faapea ua ou iloa. Sa ou tau lagona le faalotolotolua e uiga i lena faaupuga, aua afai sa ou naunau i ai ma faia lo’u tiute sa ou lagonaina le Agaga. Sa ou matuai manao lava e ta’u atu mea tonu na ou lagonaina, o mea na ou iloaina, ae sa ou le magagana. Afai ou te tau tuuina atu se faamatalaga sao, sa ou fefe, ae peitai afai sa ou matuai lagonaina lava ma musuia faaleagaga, sa ou manao ou te ta’utino atu. Sa ou manatu o lea ou te faamaoni, matuai faamaoni lava, ae sa ou toe mafaufau o lea ou te faavaleaina lo’u lava tagata. …

“E le masalomia lava, o le aso na e molimau atu ai i lau tagata sailiili e te ILOA e moni, o loo taumafai malosi le Alii e faailoa atu lenei upumoni ia te oe e ala i le mana o le Agaga Paia. A o e i ai i le Agaga ma mauaina ma puipuia le polokalama paia, e te matuai lagonaina lava, ae ina ua e ‘le maua le Agaga’ ma amata ona faia ni au lava faaiuga ma siaki lou tagata ma tuufesilisili ia te oe lava, ua e manao ai e te solomuli ese. …

“E le tau fesiligia i lo’u mafaufau lau molimau. Ou te mautinoa o oe (e pei foi ona ou faia) ua faatumulia i ni filo auro e le mafaitaulia o le molimau, o loo faatalitali mo le aao o le Fai’oa Sili, na te tuufaatasia ma lalaga ai se ielino e matagofie ma atoatoa lelei lona mamanu. O lenei lo’u atalii e, ia e talia la’u fautuaga ma AUA LE TINEIA LE AGAGA, ae soo se taimi e musumusu atu ai le Agaga, ia mulimuli i ana musumusuga paia. Ia tumau pea i le faaleagaga ma faalogologo mo musumusuga ma afai e uunaia oe ia e faaleo atu ma le malosi mea ua uuna’ia ai oe. O le a faalauteleina e le Alii lau molimau ma pa’i atu i loto. Ou te faamoemoe o le a e iloa e le o i ai se faitioga o i ai, ae na o taumafaiga agalelei. …

“E le mafai ona ou faaumaina la’u tusi ia te oe e aunoa ma le tuuina atu o la’u molimau. Ua ou iloa e moni—o Iesu o le Foafoa ma le Togiola; ma o le Talalelei o loo aoaoina atu e i matou ma a tatou faifeautalai e 3,000 na toefuataiina ma faaalia mai e auala mai i le Perofeta moni, o Iosefa Samita, ma e mai le Atua, ma ua ou faapaiaina le vaega o loo totoe o lo’u olaga e ‘talai atu ai le malo.’ Ua ou [tuuina atu] la’u molimau ma le malosi … ma ou te toe faamautuina atu foi i soo se taimi. Ou te mautinoa e faapena foi lau molimau sei vagana ai o au amataga matagofie e moomia ona tuufaatasia i se molimau atoatoa lea o le a vave ona ausia i lau galuega faamisiona talai a o e faatagaina le agaga e ta’ialaina oe ma faafoe ai lou mafaufau.

“Ia fesoasoani le Atua ia te oe i le uunaiina o oe ina ia e maua se molimau matagofie mai ou aafiaga ma musumusuga ma ia faateleina pea le mana e te faaauau ai … e ola ma aoao atu ai le upumoni faavavau.”¹

Aoaoga a Spencer W. Kimball

E mafai e i tatou uma taitoatasi ona maua se molimau—o se faaaliga mai le Tama Faalelagi e ala i le Agaga Paia.

Na fesili le Faaola ia Peteru, “A o outou pe se a la outou upu ia te au?” Ona tali atu ai lea o Peteru, e fai ma sui o isi ona uso a Aposetolo e faapea, “O oe o le Keriso, o le Alo o le Atua soifua.” O le isi fetalaiga na sosoo ai a le Faaola e sili atu ona taua. Na Ia fetalai, “Amuia oe Simona Paiona: aua e le se tagata na ia faaali atu ai ia te oe, a o lo’u Tama o i le lagi” (Mataio 16:13–17).

O ai na faailoa atu lenei upumoni ia te ia? O lo tatou Tama o i le Lagi. Na faapefea ona ia faia? E ala i faaaliga. O lenei malamalama faavae faapea o Iesu o le Keriso, o le Togiola, o le Faaola, e lei sau mai se tagata pe mai se tusi pe mai se kolisi. Na maua sa’o lava e Peteru mai lo tatou Tama Faalelagi e ala i faaaliga a le Agaga Paia. …

… O agaga uma lava o loo i lenei lalolagi e mafai ona maua se faaaliga, e pei o lea na maua e Peteru. O lena faaaliga o le a avea ma se molimau, o se malamalama faapea o loo soifua Keriso, o Iesu Keriso o le Togiola o lenei lalolagi. O agaga uma lava e mafai ona maua lenei faamautinoaga, ma afai na te maua lenei molimau, o le a sau mai le Atua ae le mai na o le suesue. O le suesue o se vaega taua, e sa’o lava, ae tatau ona o faatasi le suesue ma le tatalo ma le tauivi, ona oo mai ai lea o lenei faaaliga.

Afai e te iloaina e oe lava ia o Iesu e le gata o se tagata sili ona atamai ae o ia moni lava o le Alo o le Atua, na ia afio mai i le lalolagi i le auala na ia fetalai o le a afio mai ai, ma na ia afio ese atu ma le lalolagi mo le faamoemoe lea tatou te faapea na ia afio atu ai—ina ua e iloaina e sa’o lena mea, ma iloa o Iosefa Samita o se perofeta a le Atua ma o le Ekalesia paia lenei na faavaeina e Iesu Keriso, o lona uiga sa e maua se faaaliga.²

E i ai tagata e faamaualuluga lava i latou i o latou mafaufau atamamai, o e manatu e mafai ona latou malamalama i mea e le mafai ona faamatalaina, ae le mafai ona latou faauigaina ma faamalamalamaina pe malamalama i mea faaleagaga e ala i o latou mafaufau po o le gaoioi o o latou faiai. O mea faaleagaga, e faatoa mafai ona malamalama i ai e ala i le Agaga. E tatau ona oo mai i le loto ma o iina e maua i ai le molimau.³

O se malamalama mautinoa i mea faaleagaga o se avanoa lea e maua ai taui sili ma olioliga e le mafaamatalaina. O le teenaina o le molimau o le taumafai lea e sailia tauaso lou auala i le pogisa, ma tuuina atu lou lava tagata i ni tulaga matautia e le o mavaaia. O lena tagata na teenaina le molimau e ao ona maasiasi ma e mafai ona savali pea i le pogisa i le aoauli, o loo lavelavea solo i maatui e mafai ona aveese, ma e mafai ona tumau pea i le le mautonu ma le masalosalo, e pei lava o loo nofo i se potu e le o malamalama lelei, ae na te le o manaomiaina. O le malamalama faaleagaga o le upumoni o le malamalama lea e faamalamalamaina ai le fale uma; e pei o le savili ma le la e faataapeina le puao; o masini tetele e aveeseina ia mea faalavelave mai le auala.⁴

E maua se molimau ma faatumauina e ala i tauiviga malolosi ina ia alualu i luma.

O se molimau o se faaaliga lea faaletagata—o se tasi o meaalofa taua faaleagaga—ma e mafai ona ‘ae’ae ai agaga uma o le a totogiina le tau.⁵

O se fesili lelei tele lea sa fesiligia e le fia miliona talu ona faaupuina e Iosefa Samita: E faapefea ona ou iloa pe o le fea o nei faalapotopotoga uma, pe afai e i ai, e tonu, paia, ma silafia e le Alii?

Ua ia tuuina mai le ki. E mafai ona e iloa. E le moomia ona e masalosalo. … O le faagasologa talafeagai o le: suesue, mafaufau, tatalo, ma fai. O faaaliga o le ki lea. O le a faailoa atu e le Atua ia te oe pe a e gauai atu ma faamaualaloina oe ma talia gofie. O le toeseina uma o le faamaualuga mai lou mafaufau, o le faailoaina atu lea i luma o le Atua o lou le mautonu, ua lafoai lou manatu faapito, ma le tuuina atu o lou lava tagata i aoaoga a le Agaga Paia, ua e saunia nei e amata ona aoaoina.⁶

E mafai ona tatou iloa e moni o loo soifua le Atua; o loo tumau pea foi le soifua ai o Keriso, e ese mai i lona Tama ae pei lava o ia; o le paia o le toefuataiga na ala mai ia Iosefa Samita ma isi perofeta o le faalapotopotoga ma aoaoga faavae a le ekalesia a le Atua i luga o le fogaeleele; ma le mana faalelagi, le pule o le perisitua ua tuuina mai i alii e ala i faaaliga mai le Atua. O nei mea e mafai ona iloa e tagata faatuatua uma e pei lava ona mautinoa le oso a’e o le la. O se tasi e le mafai ona maua lenei molimau, o lona uiga na te lei faia mea e manaomia ina ia maua ai. E pei o tikeri faaleaoaoga, e maua e ala i tauiviga mamafatu. O le agaga e mama e ala i le salamo ma e mauaina sauniga pe afai e manao ma naunau i ai, e sailiili ma le matuai faaeteete, suesue, ma tatalo ma le faatuatua.⁷

Na folafola mai e le Togiola:

“O la’u mataupu e le o sa’u lava, a o lana na auina mai au.

“Ai se tasi e fia fai lona finagalo, e iloa ai e ia le mataupu, pe mai le Atua, pe ou te tautala fua lava au.” (Ioane 7:16–17.)

O le a le mea e tatau ona iloa e uiga i le mataupu? O se faamautinoaga e le maluelue lea. Ua tuuina mai e le Alii se taui sili ae ua ia fuafuaina, e faatoa mafai ona maua pe afai e ausia ni aiaiga patino. O le faamanuiaga la lea ua folafolaina mai, o se malamalama lea i le paia o le mataupu. Ma i le tulaga lava lenei, o le tulafono po o le tulaga e manaomia, o le tatau lea i le tagata ona “fai [le] finagalo [o le Atua].” …

… O le na o le taliaina o aoaoga faavae o le a le tuuina atu ai le molimau; o le a le maua lena faamautinoaga i le le manatu mamafa i ai po o le faa-afaafa i le talalelei, ae o se taumafaiga atoa e ola i ana poloaiga.

E masani ona tatou vaaia lenei mea i olaga o tagata o le Ekalesia. Na fai mai ia te au se tasi i se siteki sa ou asiasi i ai, “Ou te matua ‘alo’alosa lava i sauniga molimau uma. Ou te le mafai ona ou taliaina ia faamatalaga faaootia loto ma le faagaeetia e faia e nisi o tagata. E le mafai ona ou taliaina nei aoaoga sei vagana ua mafai ona ou faamaonia i se auala atamai ma le manino ia laasaga uma.” Ou te iloaina lenei ituaiga tagata e pei foi o isi sa ou feiloai i ai. E leai ma se tulaga ua latou faia ai se taumafaiga atoa e ola i poloaiga: e na o sina sefuluai po o le leai foi o se sefuluai, e na o nai taimi foi e auai atu ai i sauniga, e faitio i aoaoga, o faalapotopotoga, ma taitai, ma ua tatou iloa lelei ai lava le mafuaaga ua le mafai ai ona i ai sa latou molimau. Ia manatua na fetalai mai le Alii:

“Ua noatia au le Alii, pe a outou faia mea ou te fai atu ai; a e pe a outou le faia mea ou te fai atu ai, e leai sa outou folafolaga” (MFF 82:10).

O tagata faapea ua latou toilalo e “faia mea na ia fetalai mai ai,” o lea la, ua leai ai so latou folafolaga. …

… E le o le lotonuu tauaso ae o le tausia faamaoni ma le mimiloina o ki lea e tatalaina ai le faleteuoloa o le malamalama faaleagaga. O le a le faailogaina e le Alii ana fanau ae o le a fiafia e talia i tatou ma faamanuia i tatou uma, pe afai o le a tatou faatagaina o ia.⁸

O le a lau mea o le a fai i lau molimau? Pe o le a outou faama’aia pea e pei o le naifi lea e tipi ai e o outou tina le fasipovi? Pe o le a outou tuuina pea e elea ma pala? … E pei lava o si rosa laitiiti. Afai e aua ne’i toe pa’u i ai le timu; tape le paipa e aua ne’i toe kiina i ai mo sina taimi, o le a le mea o le a tupu i lau rosa? E mate. E mate lau molimau. E mate lou alofa. O mea uma lava e moomia le fafagaina. E te fafagaina faatolu lou tino i le aso. Na fetalai mai le Alii ina ia tausia lau molimau, ina ia tausia lou agaga ia ola, e ao ona e fafagaina i aso uma. … O le mafuaaga lena na ia fetalai mai ai ina ia tatalo i po uma ma taeao uma. O le mea lena na ia fetalai mai ai ina ia tatalo soo ina ia tatalaina pea lena fesootaiga.⁹

E tatau ona tatou auai i sauniga molimau.

O sauniga molimau o nisi ia o sauniga sili ona lelei i le [Ekalesia] i le masina atoa, pe afai e te maua le agaga. Afai e te lagona le le fiafia i se sauniga molimau, o loo i ai se mea o loo ponatia ai oe, ae le o isi tagata. E mafai ona e tulai i luga ma tuuina atu lau molimau ma e manatu ai o le sauniga sili lea i le masina; ae afai e te nofo iina ma faitau mea sese ma ata i le tagata e le lelei lana tautala, o le a e le fiafia. … Aua nei galo! E ao ona e tauivi mo se molimau. E ao ona e saga tauivi pea!

O loo fetalai mai le Alii i le vaega e 60 o le Mataupu Faavae ma Feagaiga, “Ae ou te le fiafia i nisi aua latou te le tatalaina o latou gutu” (MFF 60:2). O le a le uiga o lana fetalaiga? Ua ia fetalai mai afai latou te le faaaogaina, o le a latou le mauaina le mea na tuuina atu ia i latou. O le a leiloloa o latou agaga. O le a leiloloa a latou molimau. Ma o lenei mea taugata o loo ia te oe e mafai ona see ese atu mai lou olaga.

O masina taitasi uma lava e potopoto ai le Au Peresitene Sili ma le Au Toasefululua faatasi ai ma Pulega Aoao uma i le malumalu. Latou te tuuina atu molimau ma latou faailoa atu lo latou alolofa i isi o i latou e pei foi o outou uma. Aisea e moomia ai e le Au Pulega Aoao se sauniga molimau? O le mafuaaga lava e tasi o loo outou manaomia ai se sauniga molimau. Pe tou te manatu e mafai ona outou ola i le tolu, ma le ono, ma le iva, ma le sefululua masina e aunoa ma le tuuina atu o lau molimau ma ola ai i lona taua atoatoa? …

Ua outou iloa o lenei molimau o se mea e matua taua tele, o se mea ua silisili ona taua. E mafai e soo se faifeau po o se failotu ona sii maia ia mau ma tuuina atu lauga. Ae le o failotu po o faifeau uma e mafai ona tuuina atu sana molimau. Aua e te nofo ai iina i la outou sauniga anapogi ma faavalea lou tagata ma faapea ane, “Ou te matea o le a le tuuina atu la’u molimau i lenei aso. Ou te matea o le a le lelei mo isi tagata aua ua tele o’u avanoa.” Ia e tuuina atu lau molimau. Ma ua lava ma totoe le minute e tasi e tuu atu ai.

O loo i ai sau molimau! E moomia ona atiina ae ma siitia ma faateleina, e sa’o lava; ma o le mea lena o loo e faia. O taimi uma lava e te tuuina atu ai lau molimau e faamalosia ai foi.¹⁰

O molimau e faailoa atu i ni upu e faigofie ae mamana.

“Ou te iloa e moni.” Talu ai o nai upu na ua fia piliona ona ta-’ua e le fia miliona o tagata, e le faapea ai ua uma le taua. O le a le mou atu lava. Ou te lagona le faanoanoa mo tagata ua taumafai e faailoa atu i nisi upu, aua e leai nisi upu e tutusa ma le “Ou te iloa.” E leai ni upu e faailoa atu ai lagona loloto lea e mafai ona sau mai le loto o le tagata e pei o le “ou te iloa.”¹¹

O nisi o o tatou tagata lelei ua popole tele i le faaaogaina soo o upu ma ua latou taumafai ai e aloaloese mai a latou molimau e ala lea i le tautatala i mea e le faaautu i le talalelei. Aua lava ne-’i outou popole i le faaaogaina soo o upu i molimau. Pe a tuuina atu e le Peresitene o le Ekalesia lana molimau, e saunoa atu o ia, “Ou te iloa o Iosefa Samita na valaauina e le Atua, o se sui e paia. Ou te iloa o Iesu o le Keriso, o le Alo o le Atua soifua.” Ua outou iloa ai, o le mea lava lea e tasi e ta’u atu e outou uma taitoatasi. O se molimau lena. E le taitai lava ona tuai, ma e le tuai lava! Ia ta’uta’u soo atu i le Alii le tele o lou alofa ia te ia.

O se molimau e le o se apoapoaiga; o se molimau e le o se lauga (e leai se tasi e tula’i iina ma fautua mai pe lapata’i mai i isi tagata); e le o se faamatalaga o se malaga na e alu ai. Ua e i ai iina e tuuina mai lau lava molimau. E matuai maofa lava i mea e mafai ona e ta’uina atu i le 60 sekone e ala i le molimau, po o le 120 sekone, po o le 240 sekone, po o le a lava le taimi e tuuina atu ia te oe, pe afai e te tausisi lava i le molimau. Matou te fia iloa po o a ou lagona. Pe e te fiafia i le galuega? Pe e te alofa i le Alii? Pe o e fiafia ua avea oe ma se tagata o le Ekalesia?¹²

E na ona ta’u atu lava o ou lagona o loo i totonu. O le molimau lena. O le taimi lava e amata ai ona e lauga atu i isi, ua mae’a ai foi lau molimau. E na ona ta’u atu lava i ai o ou lagona, po o le a le mea o loo ta’u atu ia te oe e lou mafaufau ma lou loto ma vaega uma o lou tino.¹³

Ina ua iloaina atoatoa e le o toe mamao, i le gasologa o mea tutupu, ua tatau ai ona ou tulai i luma o le Alii ma tuuina atu se faamatalaga o a’u upu, ou te faaopoopo atu nei i ai ma la’u lava molimau paia, o le Atua, le Tama Faavavau, ma le Alii toetu o Iesu Keriso, sa faaali atu i le taulealea o Iosefa Samita. Ou te molimau atu o le Tusi a Mamona o se faaliliuga o se talafaamaumau anamua o malo o e sa nonofo ai i le itu lalolagi i sisifo, lea sa latou uluola ai ma malolosi ai ina ua latou tausia poloaiga a le Atua, ae e i ai foi i latou sa matuai faatafunaina lava i taua matautia i le lotoifale, ona ua latou faagalo i le Atua. O lenei tusi o loo molimau mai i le moni o le soifua ai o le Alii o Iesu Keriso, o le Faaola ma le Togiola o tagata uma.

Ou te molimau atu o le perisitua paia, le Arona ma le Mekisateko, faatasi ai ma le pule e galue ai i le suafa o le Atua, na toefuataiina mai i le lalolagi e Ioane le Papatiso, ma Peteru, Iakopo, ma Ioane; o isi ki ma le pule na toefuataiina mai mulimuli ane; ma o lena mana ma le pule na tuuina mai e na tagata paia o loo ia i tatou i aso nei. Ou te molimau atu ai i nei mea i tagata uma o loo lagonaina mai lo’u leo. Ou te folafola atu i le suafa o le Alii, o i latou uma o e faalogo mai i la tatou savali, ma taliaina ma ola ai i le talalelei, o le a tuputupu ae i le faatuatua ma le malamalama. O le a latou maua se fuataga faaopoopo o le filemu i o latou olaga ma o latou aiga ma o le mana o le Agaga Paia o le a fetalai atu i upu faapena o le molimau ma le upumoni.¹⁴

Fautuaga mo Suesuega ma Aoaoga

Mafaufau i manatu nei a o e suesueina le mataupu po o lou saunia foi e aoao atu. Mo nisi fesoasoaniga faaopoopo, tagai i itulau v–ix.

Toe iloilo le tusi a Elder Spencer W. Kimball na tusi atu i lona atalii o Andrew (itulau 80–81), ia matau le faatusatusaina o se molimau i se ielino. O a ni aafiaga ma lagona e maua ai ni a oe lava “filo auro o le molimau ”? Mafaufau i le mea na faia e le Alii e fesoasoani ai ia te oe i le lalagaina o au filo o le molimau i se ielino.
O le a sou manatu na faapefea ona fesoasoani ia Andrew Kimball le mauaina o le tusi mai lona tama? O a avanoa o loo i ai i matua e faasoa atu ai a latou molimau i a latou fanau? E mafai faapefea ona tatou fesoasoani atu i le autalavou ina ia maua ma iloaina ia musumusuga faaleagaga lea e oo atu ai ina maua se molimau?
Ia iloiloina faapuupuu le itulau 82–86, ma su’e ai upu ma fuaitau sa faaaoga e Peresitene Kimball e faamatala ai taumafaiga ina ia maua ma faamalolosi a tatou molimau. Afai e lagona e se tagata o lana molimau o loo maluelue, o le a se mea e mafai ona faia e lena tagata?
Suesue le fautuaga a Peresitene Kimball e uiga i sauniga anapogi ma molimau (itulau 86–87). O le a sou manatu aisea ua tatou maua ai nei sauniga? Aisea e faateleina ai le malosi o a tatou molimau pe a tatou faamatala atu? O le a se mea e mafai ona tatou faia ina ia mautinoa ai o le sauniga molimau o le a avea ma se tasi o sauniga sili ona lelei o le masina mo i tatou?
Toe iloilo le fautuaga a Peresitene Kimball i le auala e tatau ona tatou tuuina atu ai a tatou molimau (itulau 87–89). Aisea e mamana tele ai upu “ou te iloa”?

Mau e Faatatau I Ai: 1 Korinito 12:3; 1 Peteru 3:15; Alema 5:45–46; Moronae 10:4–7; MFF 42:61; 62:3

Christ and Peter — I le tali atu i le molimau a Peteru, sa fetalai atu le Faaola, “Amuia oe Simona Paiona: aua e le se tagata na ia faaali atu ai ia te oe, a o lo’u Tama o i le lagi” (Mataio 16:17).

woman reading scriptures — Mo i latou o loo sailia se molimau,“ o le faagasologa talafeagai o le: suesue, mafaufau, tatalo, ma le faia.”